Oni Na Gu Sino Berã Nga Ga ‘Sungudopai’?
‘Oni nika du nigini ngbatunga aboro nibipa gu sino nga ga ziazia mangaapai na ki zitironi kuti manga sinombori wa oni apidopa ye ga [Yekova] uru na kini ipisihe?’—2 PETERO 3:11, 12.
1, 2. Gini yugopai na kpiapai rengbe ani ka mangaha ka yugo gu sino berã nga ga ‘sungudopai’ nani nibipa ga Yekova uru?
ONI moinga gu kpiapai ku berã roni yo nga, aborokporo gu susungu kini pidi agu ageno nika ye tipa riahe uru. Gu regbo i aringbisipaha tipa ka da ti ni nambeda nikina boro ipo. Nairakporo namangasunge kakaka ka nyasa na gu sunge riahe re. Kumbaari gbiati awiriyo naundo ri tipa ka sikiso ahe dunduko ti genehe auru mbisa. Aboro dunduko zaaza na ngbarago. Ii, aborokporo dunduko napido pada ageno na kini pidipa ka ngbabe wene riahe na yo na ka gbia ngbarago be wene kodatise.
2 Ni aKristano, ani napido guhe kiipaha kisusi gure. Ginihe du ngaha? Oni ngere, ani dunduko nasungudopa da ‘ga Yekova uru’! Daa kinaho gu uru re nika ye ni, si naida ani du wa gu nebi nangia Mika, nga guko nayaa: “Mi angéra koyo du Yekova ni, mi asúnguda Mbori nga [ga] gi bata [ko].” (Mika 7:7) Ya mo gupai re nayugo gupai nga, ani nika sungo asungo zanga mangapai? Oó. Bakere sunge gu duho si aida ani mangihe.
3. Kuti sangba 2 Petero 3:11, 12, gini sino berã si aida aKristano du nani?
3 Fugo gu mokedi nangia Petero naundo rani ani duna ruru berã wa ani asungudo ga Yekova uru. Si nayaa: ‘Oni nika du nigini ngbatunga aboro nibipa gu sino nga ga ziazia mangaapai na ki zitironi kuti manga sinombori wa oni apidopa ye ga [Yekova] uru na kini ipisihe?’ (2 Petero 3:11, 12) Oni kparia gupai nga, Petero akapanga akapa tipa gini ngbatunga aboro si aida ani du wa yo na gi gako sanahe re te. Rogo agu awaraga ue ga Mbori toro adu kugiiko ko kehe, ko aringbisipa agu aboro si aida aKristano du wa yo. Ko azungodi yo a i susi kumbatayo rogo ‘gu sino nga ga ziazia mangaapai na ziotise kuti sinombori.’ Wa si avura du nga, ti gu regbo re, agarã aima susa wa 30 fuo Yesu Kristo fura tipa agu apai ‘i ka ina pa digido zegino ti ni,’ si aidanga aKristano mbu gayo maabangirise te. (Matayo 24:3) Si aidi i ‘nipidipa ye ga [Yekova] uru na kini ipisihe.’
4. Pa ‘pido boro pa ye ga [Yekova] uru na kini ipisihe’ nakoda ginipai?
4 Rengo ngaha nga, ani arengbanga ka ‘ipiso’ ga Yekova uru a wa duhe rogo gu veresi du kuari re te. Mbiko gu nduhe re, ani “aina nga gu uru na gu saa” Yesu Kristo nika ye ti ni ka manga sarangbangaa kuti avura Bako te. (Matayo 24:36; 25:13) Buku gu duho sa nafura tipa tarã gu fugo i asaha herẽ nga ‘kini ipisihe’ ya rogoyo nga “‘ka ipisopai, na rogoyo a mbembedii kuti gu fugo nga ‘ka du zaaza, ka du ngangaraa, kaa bakabangirise tipa pai tipa ka mangaha.’” Sidu, Petero aangarasa akurako aidipase i duna kakaka nyemu da ga Yekova uru. I arengbe ka mangaha wo ni nye yo kuti maa pa gu uru re ku berãyo yo zanga piriga. (2 Petero 3:12) Wa duhe nga “gu bakere iiriwo [uru] nga ga Yekova” re ima mbeda gbe, si naida ani duna kina gu bangisa sino berã re.—Yoere 2:31.
Oni Ta Pido gu Uru re ki Duna ‘gu Sino Tironi Nga ga Ziazia Mangaapai’
5. Wai rengbe ani ka yugo gupai nga, ani na kakaka nyemu ka bi ‘ga [Yekova] uru’?
5 Ka ani duna kakaka nyemu ka bata rogo ga Yekova uru, si naida ani yuguhe ziazia rogo ‘gu sino nga ga ziazia mangaapai na ki zitirani kuti manga sinombori.’ Gu gumbagumbapai nga ‘gu sino nga ga ziazia mangaapai,’ si rengbe ka tingida rani na pa gu ga Petero arugute nga: “Wa agude giasangba, ka oni mbákadi nga tironi sa gu kuru nyemuahe nadu ti roni mbata ya, ho oni aruga nga tironi ni na pai ya. Ono wa du gu ko nayambu roni du ni ziazia ko oni dú a wo ni ziazia roni rogo gaoni apai dũ, mbiko Ziazia Kekeapai naya, ‘Oni dú ziazia bambiko mi du ziazia.’”—1 Petero 1:14-16.
6. Tipa ani rengbe ka du ziazia, ginipai si aida ani mangihe?
6 Tipa ani rengbe ka du ziazia, si naida ani du gigirii ti kpotorani, rogo gaani berã, rogo gaani mangaapai, na rogo toroyo. Ya mo ani nambakada tirani tipa ‘ga Yekova uru’ nibanda ani tirani ziazia ni agu aboro du rimo Yekova riyo? Anga si taata rogo agi a’uru re boro banda ngbatunga gu girõ re rogo apai dunduko te mbiko gu sino mangaapai nga ga zegino nagbera kina kumbatayo. (1 AKorindo 7:31; 2 Timoteo 3:13) Ya mo ani nabi gu gbungumu du dagba gaani sino mangaapai na ga aboro zegino si nikii? Ka si adunga wo ya, gure nga ndupai kinaho naida ani tona ka bakabangirani. Wa duhe nga, gaani andiko nibatumbatumbaha kuari gbe ti ga aboro zegino, ani ima tona kaa basa paha? Kangia wo duhe, si naida ani mangi gupai daada tipa ka mbakada gupai gbere tipa ani ki ruho ka fu ngbarago fu Mbori.
7, 8. Ginipai ka mangi si ki sa rani bangirani go ti ‘gu sino nga ga ziazia mangaapai’? (b) Gini apai rengbe ani ka mangaha ka mbakada agu apai gbere?
7 Fuo da sunge yugokpia kundiri aboro awere rogo Internet na mbiko wa rengbe aboro arengba kaa bihe rogo gbuko, agu aboro naadunga mbata na gene beyo ka biko ngbatunga gu wasiwasi kpia aboro re ya, i awere na “agu aba beyo du tipa bi kpia aboro i nikodiba,” wogu munganga sa agumbaha. Ka ani tona ka gbata ngbatunga gu wasiwasi aba nga ga Internet re, gure yugu gupai nga, ani nabasa gu zinahe nga ga Ziazia Kekeapai nga gu nayaa, “ka oni zádi nga birikobiriko he wa sa ya.” (Yesaya 52:11) Ya mo ka ani aabiko ngbatunga gu kpia aboro re, si yugu gupai nga ani ‘napidopa ye gu uru nga ga [Yekova] kini ipisihe’? Watadu gupai ka si yuguhe nga, ani nagbisigapa ye gu uru re agbisiga kumbatayo, kini berẽ gupai nga, ka ani vura kaa birikosi berã rani na gu wasiwasi apai re awere, regbo kinaho kindi tipa ani girisi tirani mbata fu ye gu uru re? Ka ani bi gupai nga ani ima gbia tirani na fudifudipai rogo gi bangiri aba re, si aida gupai berani tie nga ani kpari fu Yekova niipo tipa ko ‘di bangirani kusayo ti kungbopai na ki banda rani kungba gako gene’!—Atambuahe 119:37.
8 Bakere bange aDezire Yekova, nga aparanga na sosono aboro, nazio tiyo kuti ga Mbori tumbatumba andiko nga ga raka na kini ne gu wasiwasi mangaapai nga ga gi zegino re nga gu nagbe aboro kusayo. Niruga yo tiyo na pa ipo gu regbo ani araka rogoho re na pa ino yo gu ga Petero zahe nga ‘gu uru nga ga Mbori nika ye wa batuka,’ i nakakuti ‘gu sino nga ga ziazia mangaapai’ kindi. (2 Petero 3:10) Agu apai i amangaha nayugo gupai nga, i ‘napidopa ye ga [Yekova] uru kini ipisihe.’a
Oni Ta Pido gu Uru re ki Duna gu Mangaapai Nga ga ‘Ziotise Kuti Sinombori’
9. Gine si aida gaani ziotise kuti sinombori fõngbaduraniyo ani mangihe?
9 Gu mangaapai nga ga ‘ziotise kuti sinombori’ a na nyanyakipaha ka si du nga ani nika banda ga Yekova uru ku berã rani yo. ‘Ziotise kuti sinombori’ nakodapa du ani na bakere irisa tipa Mbori nga gu nasa rani ani mangi gupai nika fu ngbarago fuko. Ruru ziotise kuti Yekova nga gu ome nafõngbaduraniyo ani zitirani kuti ngbatunga gu mangaapai nga ga sinombori re. Gupai ko akpinyemuhe nga “aboro bati dunduko, ki ye sa gu inahe nga ga rengo.” (1 Timoteo 2:4) Mbori “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Petero 3:9) Wa duhe tie were, ya mo si aidanga gaani ziotise kuti sinombori fõngbaduraniyo ani mangi bakere asadatise ka undo aboro i ini pai tipa Yekova na kini wiriki ko tee?—AEfeso 5:1.
10. Tipagine si aida ti ni ani banda tirani ti “gu nanga he nga ga ũkumuko”?
10 Gaani raka ahi be gu mangaapai nga ga ziotise kuti sinombori ka ani gbata ga Mbori Kindo mbata. (Matayo 6:33) Si naida ani duna ruru bipai tipa aũzegino. Yesu azahe ki yaa: “Oni gí he, ka oni dí nga ngbiti ahe ya; bambiko i aringbisa nga ungaboro na gani ahe te.” (Ruka 12:15) Wa vura duhe nikpakarakpakarapai fu rani ani idi kuti gupai nga, nyemu marã rengbe arengba ka vurasi bangirani, si adu niwenepai ka ani kparia gupai nga, “berã pa zegino, na gu nanga he nga ga ũkumuko” rengbe arengba ka “kandasi” fugo Mbori ngbaduraniyo. (Matayo 13:22, gu kekepai duni pigipigihe re, ani du pigihe.) Pai rengbe ka du nga, si fu rani taata ani bi agu ahe rengbe ka songoda rani rogo gaani raka te. Rogo kura apapara zegino, dungu aboro naberã ya tipa i rengbe ka raka wene raka, si naida i ndu kurogo kumukokumuko ringara, isoke ki mbu gayo aborokporo sayo tipa bete agarã. Zavura ga Mbori aboro a, i gu du adu na ngbatunga gi berã re tiyo. Nindu yo kurogo kura ringara, i rengbe ka undo gayo aborokporo na agu awene vovo aũzegino du awere. Ono tie, ginipai rengbe ka manga gayo aborokporo rogo toroyo sayo kporoyo gii bangiriyo? Nizanga du yo tiibe gu ngerakuriipai nga ga ngangara bairakporo, ya mo i anyaka rogo toroyo ki rengbe ka bata rogo ga Yekova uru?
11. Wai bamangisunge marã sa rogo kungbo ringara ayugu gupai nga, gu mangaapai nga ga ziotise kuti sinombori, si kiipaha ti aũkumuko?
11 Kumba nga boro gu ringara nga Philippines awiriki gu rengo nga ga Ziazia Kekeapai be aDezire Yekova ho ko anduni ka mangasunge marã rogo gu ringara nga Japan. Fuo ko wirikipai tipa gu sunge nga ga bairakporo a wa Ziazia Kekeapai agumbaha, ko abi gupai nga, si naida ko undo gako aboro i sa tiyo ni airisi Yekova. (1 AKorindo 11:3) Diako Philippines yo asogo gi gako vovo idapase re nikerehe, sidu ri ki idi ko nye kina yo kaa kekeda marã fuyo kuba karaga ko tiko ku kporo yo ka yugo gu gako idapase du mburuhe rii Ziazia Kekeapai re. Ono tie, mbiko gu regbo du awere naida i mangi apai rogoho niipo, na mbiko gu nyemuse ko adu nani tipa gako aborokporo, ko akaraga tiko akaraga ku kporoyo. Gako zerangbaduse na gako mangapai na gako aborokporo ninyemuse akusi wene sangbanaha. Fuo bete regbo kusa, gako aborokporo akpamia tiyo rogo ndikidi irisombori, na diako ki rimi sunge tungusapai ti aregbo dunduko.
12. Tipagine si aida ani peresipa agu apai nga ga toro ti ni mbata rogo gaani raka?
12 I rengbe ka ringbisa gupai du tipa rani kuti agu aboro nibasasa du rogo gu bambu nagbi. Ya mo si du nipatatamana ka ani aotoka mbangirimbangiri kini asadi tirani ka rogoda ahe ku zegiyo vuru gu bambu nagbi kini mbedi ka gburuwa re? Kuba gure, anga gupai ka ngba kisusi si nga ani batasi aboro tee, nga unga rani na gaani aborokporo gbiati gu kura aboro du rogo gu bambu re? Oni ngere, gi gbegbere zegino re nandu nikina boro ipo ka gburuwa, sidu, ga aboro raka ngbapai. Niruga ani tirani na gipai re, nirengo, si naida ani peresi agu apai nga ga toro mbata na kini tungusipa Kindo, nga gu sunge nabatasa unga.—1 Timoteo 4:16.
Si Naida Ani Du Zanga “Biriko He” Tirani
13. Gini sino raka si aida ani du rogoho ho ga Yekova uru ka da ni?
13 Ninyakasa Petero nyakapa nye boro kuti gu sino berã nga ga sungudopai, ko ayaa: “Abadiangba, wa oni nangera tipa agi apai re, oni nifú tironi nyanyaki ya [Mbori] bi roni zezeredi, ka wiri biriko he adú nga ti roni barangba ko na sirõ a ya.” (2 Petero 3:14) Ku pati gu rugute Petero afuhe tipa ani duna gu sino nga ga ziazia mangaapai na ki zi tirani kuti gu mangaapai nga ga sinombori, ko anyakasi nyakapa gupai nga, ani mbakadi tirani tipa wa Yekova ka ye, ko ki bi rani niyangaraha ni agu aboro du nigirisigirisiyo be gu kikiipa kure nga ga Yesu. (Yugoti 7:9, 14) Gipai re naida boro duna idapase kuti ga Yesu motumo na ki kpara gani raka fu Yekova na ki zi bapatiza nigako moyambu.
14. Padu boro zanga “biriko” nakoda gine?
14 Fugo Petero nangarasa rani ani mangi bakere asadatise ka zanga duna “biriko.” Ani nabanda gu gaani arokoo nga sino aKristano zanga si duna biriko, watadu zanga zegino kubasihe? Ho ani nibi wiri biriko ni ti gaani arokoo, ani niasadi tirani nibasa ka girisoho. Kangia gi biriko re, tihe kuti gu gaani rokoo ngbaa tirani gbe, ani niasadi tirani nyanyakii ka girisoho. Ka pepai ni sanza, ya mo ani naamangapai wa kina gure ho he niti ni kuti gu gaani arokoo nga sino aKristano, nga guhe ti kuti ni be iraira mangapai rogo gaani sino watadu gaani mangaapai?
15. (a) Tipagine si aidi aYisaraere nimangi ngba gayo arokoo ti ni nizawizawihe? (b) Tipagine du gu ga Yekova amoyambu ti ni du areme kia ti kura aboro?
15 Si aidi aYisaraere nimangi “ngba gayo aroko ni zawizawi he” na ki “mói gbaya gire ti ngba gayo zawizawi aroko.” Tipagine si aidi i nimangihe ti ni wo? Tipa wa ka si aasa yo i naatingidapa ga Yekova arugute na kini irisihe, na ki ‘du niziazia yo’ fu gayo Mbori. (Pa Geda Aboro 15:38-40) Nidu ani nigu ga Yekova amoyambu du areme, ani kia ti agu aboro du rogo zegino, mbiko ani namanga agu andiko nga ga Mbori gbiati agu arugute adunga ngburungburu ya. Nikpiapai, ani nabanda tirani ti wasiwasi mangapai, ani nairisa kure niguhe du ziazia, na ani nane irisokpiaahe rogo angbatungaha dunduko. (Amokedi 15:28, 29) Dungu aboro nafu irisa fu rani tipa gaani diaberã ka banda tirani ti biriko.—Yakoba 1:27.
Si Naida Ani Du Zanga “Sirõ” Tirani
16. Gine si akodaha tipa ani banda tirani zanga “sirõ”?
16 Petero aya wee a si naida ani du ‘zanga sirõ’ tirani. Wai rengbe gupai re ka manga? Si taata boro wege gu biriko kusayo togo kuti kpotoni ono angianga gu sirõ du tini ya. Sirõ nayugo gupai nga, aro naduho mbata si kini mo ka wi. Gu mokedi nangia Pauro afu rugute fu akurako aKristano Firipoi yo ki yaa: “Oni mángi apai dunduko zanga kpakanahe na darãpai, oni ki zanga sirõ ki du na zera, wa awiri Mbori, nizanga gu pai ka i rugu roni kuti ni dagba iraira rika aboro nga airanyakari, i bi roni wa aimahe dagba yo auru kpotosende.” (AFiripoio 2:14, 15) Ka ani mangi agu arugute re, ani akpakananga he na kini dari akango te, ono ani amangasunge fu Mbori na ziazia ndu mangaha na si ki sa rani ani zanga serõ. Nyemu Yekova nika fõngbaduraniyo na nyemu akuarani ani tungusi ‘gi wene pangbangaa nga ga kindo’ re fuyo. (Matayo 22:35-40; 24:14) Kurii gure, ani nikaa ndu kumbatayo kindi kaa tungusa wene pangbangaa ka aboro avuranga ruga tiyo na ndu gupai ani afu tirani ti ni ka undo kura aboro i wirikipai tipa Mbori na tipa Fugo ko nga Ziazia Kekeapai ya.
17. Gine si aida si du nga gu ndupai ani aida amamu sunge ti ni rogo gu dungurati nga ga aKristano?
17 Wa duhe nga ani aidanga ka duna “sirõ” tirani tee, si naida ani wisigi gu nduapai nasa rani ani naamanga agu apai dunduko ani amangaha. Ani aima mbu gu gene mangaapai nga ga zegino i amangaha mbiko gbangbati, ngbatunga gu du wa asada boro tini ka gbia aũkumuko watadu ka gbia gu pagbia nika sa ni ni naamaapai kurii kura aboro. Kangia ani naida ka duna amamu sunge be rani rogo gu dungurati nga ga aKristano, ndu pa gbata ani he nyenga anye kindi nikina ziaziaha, nga nyemu Yekova gbiati nyemu kura aboro. Si ni gupai nafu wasa fu rani wa ani abi agu akumba ima nyaka rogo toroyo i “[ni]gbata sunge babipai” na ngbarago na ki duna nyemu mangasunge fu Yekova na fu akurayo aidipase rogo umbasitise. (1 Timoteo 3:1; 2 AKorindo 1:24) Nirengo, agu aboro rẽ ka mangasunge ni abaakumba ‘nambu ti ga Mbori rimbasa akandoro mbiko du yo nizizi yo kuti ni te, ono ninyemuhe fu Mbori; tipa gbegbere ũkumuko a te, ono mbiko i idipaha kpotoyoyo. I amanganga sunge ni abazogo aguyo i a’asia payo fuyo te, ono i nayugo kpiapai fu rimbasa akandoro.’—1 Petero 5:1-4.
Si Naida Ani Sungu Rogo ‘Pazereda’
18. Gini sino ini aboro aDezire Yekova wenengai ti ni?
18 Niyangaraha, fugo Petero nangarasa rani tipa ani du rogo ‘pazereda’ na kura aboro. Tipa ani rengbe ka manga gi rugute fu yo ho fu rani re, si naida ani du rogo pazereda na Yekova gbiati akuarani aboro. Fugo Petero nanyakasa nyakapa du ani na ‘bakere nyemuse dagbarani’ na ka banda zereda dagbarani na akuarani aKristano. (1 Petero 2:17; 3:10, 11; 4:8; 2 Petero 1:5-7) Tipa ani rengbe ka banda gaani pazereda, si naida ani duna nyemuse dagbarani. (Yoane 13:34, 35; AEfeso 4:1, 2) Aboro nabi gaani pazereda na gaani nyemuse ziazia gbe ho ani amanga gaani kikindigi adunguratise ni nga ga dungu aringara. Rago agbere ti babagiahe Costa Rica yo ti regbo bakere dunguratise rogo gu garã nangia 1999, mbiko agu aDezire nadu rogo gu dagbarago re adadi bangiri gu ba ko aabaga gako ahe rogoho zanga i inihe wa i aadia agu akurayo kugume naada na tiyara tipa bakere dunguratise. Ono tie, rogo gu ue uru, ko akparia gu nyemuse na pazereda nadu niyuguyuguhe rogo gu esuesu dia ageno kugume aDezire amangihe tipa awirinayo zavura gupai nga, i agbianga tiyo mbata te vurũ. Rogo yangara uru da awirina, gi babagiahe re akodi tiko kuti agu aDezire re rogo dia awirina kugume na ki sanahe tipa i wisigi Ziazia Kekeapai na ko.
19. Tipagine duhe ti ni ninyanyakipa pai ani duna pazereda dagbarani na akuarani aidipase?
19 Pa pe ani fuo pazereda nirengo na agu akuarani nga ga toroyo rengbe ka duna sangbanaha kurii wai ani apido ga Yekova uru kakaka na gako kidohe tipa vovo zegino. (Atambuahe 37:11; 2 Petero 3:13) Ani ya, ani bihe nikpakarakpakarapai ka banda pazereda na gu kura kuarani idipase. Ya mo ani rengbe ka bi tirani ani kini sungu na ni rogo pazereda rogo Paradiso? Kangia wirina na pai tini kuti rani, si naida ani ‘mbakadi pazereda na ni’ nibasa. (Matayo 5:23, 24) Pa manga ani he wo na nyanyakipaha ka ani aida ka duna pazereda dagbarani na Yekova.—Atambuahe 35:27; 1 Yoane 4:20.
20. Rogo gini agene si aida ani yugu gu sino berã nga ga ‘sungudopai’?
20 Ya mo kina boro ani nitirani ‘napidopa ye ga [Yekova] uru na kini ipisihe’? Ani nayugopa gaani kakaka nyemu ka bi digido gbegbereapai ninye ani ziazia rogo gi wasiwasi zegino re. Kurii gure, rogo gu gaani mangaapai nga ga ziotise kuti sinombori, si ani ayugo gupai nani nga, ani na kakaka nyemu ye ga Yekova uru na nyemu raka tii gu zogarago nga ga Kindo. Na gu maabangirise du ani nani ka raka rogo vovo zezeredi zegino niyuguyuguhe rogo gu gaani mangaapai nga ga gbata pazereda dagbarani na akuarani aidipase awere. Nimanga ani ngbatunga agu apai re, ani nayugo gupai nga, ani na gu sino berã nga ga ‘sungudopai’ na kini ‘pidipa ye ga [Yekova] uru na kini ipisihe.’
[Gu rukutu kekeapai du bandu kpewaraga yo]
a Nikpiapai, oni bi gu Ngbaõbambu Sinziri nangia ga Ngi ti rameru 1, rogo 2000, ti kpewaraga 16 na 1997 Yearbook of Jehovah’s Witnesses, kpewaraga 51 (si dunduko rogo pa-Ngirisi).
Oni Natingidaha?
• Ginipai pa ‘pido boro pa ye ga [Yekova] uru na kini ipisihe’ ayugoho?
• Wai ani ayugo gu sino berã nga ga ‘sungudopai’ rogo gaani mangaapai?
• Tipagine du ‘gu mangaapai ti ni nga ga ziotise kuti sinombori’ na nyanyakipaha?
• Ginipai si aida ani mangihe “ka wiri biriko he adú nga ti [rani] barangba [Yekova] na sirõ a ya”?
[Gu kpiahe du ti kpewaraga 11]
Gu sino berã nga ga ‘sungudopai’ niyuguyuguhe rogo gu sino nga ga ziazia mangaapai
[Gu kpiahe du ti kpewaraga 12]
Sunge tungusapa Kindo nabatasa aboro
[Gu kpiahe du ti kpewaraga 14]
Wa ani apido ga Yekova uru, ani gbata gene ka duna pazereda dagbarani na kura aboro