“Oni Kadu Ni Gini Ngbatunga Aboro?”

“Wa du agi ahe re nikadu ni gbandakagbandaka ha oni ka du ni gini ngbatunga aboro tipa manga ziazia apai na sinombori?”​—2 PET. 3:11.

1. Tipagine si angba angba ti ni Petero ke waraga niuehe fu agu aKristano nadu ti ragoko?

HO GU mokedi nangia Petero ake gako ue waraga ni naye be ga Mbori toro, gu dungurati nangia ga aKristano aima hi dungu arungosiro, ono gure aazeresanga gayó nyemuse watadu gayó sona kumbatayo te. Sidu, Bakitingbanga amangisunge na gu kura gene ka ingisa aboro, nga gu gene naaima ingisa gu kura aboro mbata. A wa Petero apehe, Satana aʹasadi ka ingisa aboro rogo gu gene nga ga zire abayugupai nga aguyo ‘bangiriyo ahiki na pa bari,’ na “ngbaduyo awiriki pa kpi ahe.” (2 Pet. 2:1-3, 14; Yuda 4) Sidu, ga Petero ue waraga nangarasa rani ani nye niruru rani fu Mbori.

2. Ginihe 2 Petero kapita 3 afura tipaha, na gini asanahe si aida ani sana tirani nani?

² Petero akepai ki yaa: “Wa du mi rogo borore mi berẽ he tigimi ya zingisa mi roni ngba nitingida agi apai fu roni re; wa ini mi he ya rago maa borore ku sa yo aye ni kina ipo. . . . Ii, mi amánga pai ngangarã ya fuo guari mi oni arèngba na tingida agi apai re na arago dunduko.” (2 Pet. 1:13-15) Petero aima ino nga ko ima mbeda ka kpi, ono ko aidi sangbako nyeanye kindi. Nirengo, agu apai ko akehe re nga papara Ziazia Kekeapai ani agedaha areme. Kapita 3 nga ga ga Petero ue waraga na nyanyakipaha furani areme bambiko si nafura tipa “yangara arame” nga ga gi zegino re, na apa gbarasa angbangbaturũ na kpotosende nga gu narukuba kura ahe. (2 Pet. 3:3, 7, 10) Gini rugute Petero afuhe furani? Wai rengbe gu rugute re ka undo rani Yekova idi na ani?

3, 4. (a) Ginipai Petero apehe, na gini rugute ko afuhe? (b) Gini apai biata ani ka makiaha?

³ Tingbafuo Petero pepa digido gi ga Satana zegino re, ko ayaa: “Oni ka du ni gini ngbatunga aboro tipa manga ziazia apai na sinombori!” (2 Pet. 3:11, 12) Petero aima inoho nga kina agu aboro namanga gupai Yekova akpinyemuhe nika bata ti gu “rago irabape” naye. (Yes. 61:2) Ko aya berewe wee: “Abadiangba, wa ini oni pa agi apai re mbata, oni bánda tironi gu ingapai nga ga gbegberẽ aboro, si ka ndu ka ngbe fu roni ku mbata yo, oni ki ti pati gaoni ru nyanyaki.”​—2 Pet. 3:17.

⁴ Wa Petero adu dagba agu aboro naima ‘inopa agi apai re mbata,’ ko aima rugatiko na gupai nga ti yangara arame, si nikadu nimbumbupai fu aKristano i kakuti gayó ruru mangaapai. Kusa, gu mokedi nangia Yoane ape ndu gupai si nikadu ti ni wo. Ko aima bi gupai nadu kumbatayo nga i nika do Satana ngbangbaturũ yo ko ki ye ku sende no na “bakere zinga” kuti “agu yo naka kuti ga Mbori rugute, na agu yo naka kuti gu dezire pai nga ga Yesu.” (Yugo. 12:9, 12, 17) Ga Mbori ruru mbedimbedi amoyambu na “gu kura akandoro” nikadu adu na diabese. (Yo. 10:16) Ono na ani tigaani wa du ani nibasasa? Ya mo ani akakuti gaani ruru mangaapai? Agu apai rengbe ka undo rani ani nye niruru rani nga: (1) Asadatise kadu na agu asino nga ga Mbori. (2) Asadatise ka nye zanga ‘wiri biriko na sirõ.’ (3) Asadatise ka hi aʹasada. Ani makianga agi apai re nibasasa.

Ani Asadi tirani Kadu na Agu Asino Nga ga Mbori

5, 6. Gini ngbatunga asino si aida ani asadi tirani kadu nani, na tipagine si aida ti ni ani ‘mangiapai nyanyakii’?

⁵ Ho Petero atona ke gako ue waraga ni, ko ayaa: “Oni kúsi gu pai nga manga apai nyanyaki, rogo gaoni idapase oni kúsi wenesino, rogo gaoni wenesino oni kúsi inahe; rogo gaoni inahe oni kúsi rugatise; rogo gaoni rugatise oni kúsi hipai; rogo gaoni hipai oni kúsi sinombori;rogo gaoni sinombori oni kúsi nyemu awirina; rogo gaoni nyemu awirina oni kúsi nyemuse. Bambiko ka agi apai re du ni gaoni ki moi pai, si namanga gu pai fu roni nga oni adu nga ni aboro nyomoro, na ni aboro zanga zu rogo ina pa gaani Gbia Yesu Kristo yo te.”​—2 Pet. 1:5-8.

⁶ Rengo ngaha nga, si naida ani ‘mangiapai nyanyakii’ kadu na agu asino nga ga Mbori. Nikpiapai, si naida asadatise tipa kaa ndu tipa agu adunguratise nga ga aKristano dunduko, ka geda Ziazia Kekeapai na aʹuru dunduko, na kaa wisigopai nisase zanga nyomoro. Na si naida nyanyaki sunge na wene mbakadatise tipa kaa manga Gu Irisombori Nga ga Aborokporo rogo gu uru ani naamangaha ti ni, na ki saha si duni guhe nika fu ngbarago na ki fu undo. Ono ho ani asigiraha ni, si nada taata tipa mangaha, gbe ho ani aino gaha aundo ni.

7, 8. (a) Gini apai gu kura aboro apehe tipa gu Irisombori Nga ga Aborokporo? (b) Ya mo oni nagbia undo ti gu Irisombori Nga ga Aborokporo?

⁷ Nibipa gu irisombori nga ga aborokporo, wirina sa nidee ayaa: “Si undo rani ani wiriki dungu apai.” Gu kurari ayaa: “Ka pe rengo, mi aaidanga i di gu dunguratise kusayo nga ga wisigo buku te. Si nangia gu dunguratise nangba tire gbe. Ono awere, wa ani natona gu Irisombori Nga ga Aborokporo nyemu, mi ini gupai nga Yekova ima ino gupai si aidaha furani na ti gini regbo.” Kumba sa ayaa: “Gu Irisombori Nga ga Aborokporo naundo rani nibakerehe. Ho du ani ni na gu dunguratise na agu apai rogoho nabipa gaani rogatise, si nga bawenepai kisusi! Si nasa rani ani niyugu agu asino nga ga zuzu toro, na ani nagbia bakere ngbarago rogo gaani sunge tungusapai.” Kura wirina ayaa: “Si sa gupai nga agude niweteke apai nisayo kini wiriki dungu apai na si naye na bakere ngbarago. Gi mbakadapai re nayugo gupai nga Yekova naberãpa rani aberã na kini karagapai sa gaani akparakpee.” Ya mo oni na tambuahe tipa gi bawene mbakadapai re?

⁸ Si aidanga oni mbugene fu rukutu apai si gberesipa gaoni irisombori nga ga aborokporo te. Arogotise sa ayaa: “Agu aposo susi biama kusayo, pai amangi nambedi ka rugusa gaani irisombori, ono ani ambungaha si rugusihe te.” Ti kura regbo, pai rengbe ka kura ka gene adunga oni mangi gaoni irisombori rogo gu uru oni naamangaha ti ni ya. Ka si vura duwo, si aidanga kandara poso sa susi ka oni amanganga gaoni irisombori ya te!

9. Wai Yeremaya agbia undo be Yekova, na ginipai rengbe ani ka wirikaha behe?

⁹ Gu nebi nangia Yeremaya nga wene kpiapai furani. Ko adu na nyemu gu riahe nga ga toro Yekova aafuhe, na ki duna bakere tambuahe tipaha. Gi riahe nga ga toro re aundo ko ko nitungusipai na hipai fu agu aboro naaidanga na gako pai ya. Ko ayaa: “Sangba Yekova . . . kpotore yo wa ka si du nga we kisi yo ku rogo amemere yo.” (Yere. 20:8, 9) Si aundo ko a ko hipai ti gu kere aregbo nandu ki dati gbarasa Yerusarema. Areme, ani na Fugo Mbori nga Ziazia Kekeapai naabaha berani. Gedaha na aʹuru dunduko na ki duna gu bipai nga ga Mbori, si rengbe ka undo rani ani du wa Yeremaya, na hipai, gbiati ngbarago rogo gaani sunge tungusapai, ki nye niruru rani ti regbo asada na ki nye nigigiri rani rogo mangapai yo na rogo toro yo.​—Yak. 5:10.

Oni Nye Zanga ‘Wiri Biriko na Sirõ’

10, 11. Tipagine si aida ani mangi ome ti ni ka nye ‘zanga wiri biriko na zanga sirõ,’ na ginipai si akpinyemuhe berani?

¹⁰ Wangia ani aKristano, ani ima ino gupai nga ani naraka ti yangara regbo. Sidu, si airiwonga tirani ka bi zegino si nahi be agu apai Yekova asogaha te, wa gu nga ngbaduse, gbegberẽ nyemu kodaba, na zuũ. Ga Satana diaberã nga: ‘Ka si dunga ga Mbori amoyambu arengbanga ka gunde te, apai kinaho rengbe arengba ka gberesa berãyo.’ (Yugo. 2:13, 14) Sidu tie, si naida ani di ga Petero rugute nga ga nyemuse ku ngbaduraniyo nga gu nayaa: ‘Oni nifú tironi nyanyakii ya i bi roni zezeredi, ka wiri biriko he adú nga ti roni barangba ko na sirõ a ya.’​—2 Pet. 3:14.

¹¹ Gu fugo nga ‘oni nifú tironi nyanyakii,’ si wakina gu ga Petero zungadihe nidu mbata kusayo nga ‘oni mangi apai nyanyakii.’ Si tie ziazia nga, Yekova gako toro adu kugii Petero ko ke agi apai re aima ino gupai nga si naida ani mangi ome amanga tipa ka ‘nye zanga wiri biriko na zanga sirõ,’ ki nye nigigiri rani rogo gi ga Satana zegino re. Manga ome nakoda banda ngbaduraniyo ti gbegberẽ nyemuahe. (Oni gedi Asanza 4:23; Yakoba 1:14, 15.) Gu kurapai berewe si akodaha nga bandatise ti aguyo si airiwo tiyo ya ani aoranga naayó rogo gayó apai yo te, “i ki gberẽ ngbayo yo furoni.”​—1 Pet. 4:4.

12. Gini kidohe ani agbiaha rogo Ruka 11:13?

¹² Mbiko gaani zangarengba, si ninyanyaki pai ka manga gupai duni ruruhe. (Rom. 7:21-25) Si rengbe kadu taata kinagu ka ani sana Yekova tipa ziazia toro, bambiko ko nafuhe afu fu aguyo nasanako tipaha. (Ruka 11:13) Gu toro re rengbe ka kusa agu asino rogoraniyo nika sa gupai nga Yekova idi na ani, na si ki undo rani ani sovura kuti agu apai nga ga raka na ani ki rengbe arengba a ka sovura kuti agu aʹasada naye wa ga Yekova uru ambeda.

Oni Nyaki ti Regbo Asada

13. Ho ani agbiatirani ni na aʹasada, ginipai rengbe ka undo rani ani hihe?

¹³ Wa ani kaa raka rogo gi zegino re, aʹasada ngba arikoho ani ka gbiatirani nani. Kuba gupai nga si niba gberarago tirani, tipagine ka ani abingo ho ti ni nimomu ka inopa gaani nyemuse koyo du Mbori ni na ka nyakasa gaani idapase tipa Mbori na Ziazia Kekeapai ya? Gu bawiriki nangia Yakoba akepai ki yaa: “Awirinami, ho dungu ngbatunga asada ka ye ni fuo roni, oni ki sa ha ni kina ngbarago dũ; niini ya asada gaoni idapase namanga zadapase.” (Yak. 1:2-4) Oni tingidi gupai a nga, “Gbia ini pa batasa aidipambori be asada.”​—2 Pet. 2:9.

14. Wai ga Yosefa kpiapai angarasa rani?

¹⁴ Ani makianga gu kpiapai nga gu wiri Yakobo nangia Yosefa awirinako abagi ko. (Bam. P. 37:23-28; 42:21) Ya mo ga Yosefa idapase azere nisangbana gipai re? Ya mo ko aduna zinga kuti Mbori tipa mbugene fu gipai re? Fugo Mbori nakaragapai nga oó! Gure angianga digido ga Yosefa aʹasada te. Kusa, i akitingbaanga ko niziree ki ya ko aida ka kodaba ngbaome na dia Potifaro, na i ki bako ku bambukiso yo. Wa si avura duwo, ko asanga berãko ti kakuti sinombori te. (Bam. P. 39:9-21) Kuba gure, ko ambu agu aʹasada re si nyakasi ko, na ko agbia dungu amosoro.

15. Ginipai ani awirikaha ti ga Naomi kpiapai?

¹⁵ Nirengo, aʹasada rengbe arengba ka ba gberarago tirani watadu zeresa rani. Si rengbe kadu nga Yosefa aima duwa gure. Zavura kura ruru amoyambu aima du wo. Oni berẽnga pa Naomi, kumbaari akpi na awiiri ue. Ri ayaa: “Ka oni yambu nga re ni rimo Naomi berewe ya, oni niyambu rimore nga Mara, [du rogoyo nga “Imisiri”], bambiko gu Ko du na tandu apai dũ amangi imisiripai ti re bakere.” (Ruta 1:20, 21) Ani ima ino gupai nasa Naomi ri gumbapai wa gure. Wakina Yosefa, ri azeranga rogo toro yo watadu ka mbu gari ruru mangaapai te. Yekova aima fu mosoro fu gi iriiri dee re. (Ruta 4:13-17, 22) Kurigure, rogo gu Paradizo nga ga kpotosende nika ye, ko nika dia gu gbegberẽ apai nga gu Satana aye nani na gako gbegberẽ zegino. “I atíngida nga pa gu bambata apai te si ayé nga ku berãyo yo a te.”​—Yes. 65:17.

16. Wai si aida ani nikpari, na tipagine?

¹⁶ Ka si vura du nga gini ngbatunga aʹasada nika gbia rani, Mbori nyemuse nika undo rani aundo. (Oni gedi ARomo. 8:35-39.) Satana ambunga ye na gbegberẽ apai sa rani te, ono ka ani ‘rúgu gaani aberã ki niso gima kpe,’ ko dunga na diabese te. (1 Pet. 4:7) Yesu ayaa: “Oni ngére dedede, ki nikpari, ya oni di be pai ka bata be agi apai nikamanga dunduko re, ki ru barangba Wiri boro.” (Ruka 21:36) Gupai Yesu agumbaha nga ani “nikpari,” si nayugo gupai nga ani nikpari akpara kindi kakaka. Gupai berewe Yesu anyakasihe nga, regbo du re ani mbakadi pa ru ani gigirii barabangiriko na Bako. Kina agu aboro du gigirii barabangiri Yekova na Wiriko, i nika bata rogo ga Yekova uru.

Oni Du Zaaza ti Ngba ga Yekova Sunge

17. Ka si dunga tungusapai rogo gaoni dagbarago nimbumbuhe, wai rengbe oni ka gbia undo be gu kpiapai nga ga agu anebi nadumbata?

¹⁷ Manga agu apai nga ga toro naye na ngbarago. Gure natingida rani na gu fugo Petero nayaa: “Oni ka du ni gini ngbatunga aboro tipa manga ziazia apai na sinombori?” (2 Pet. 3:11) Gu nyakipaha gbe dagba ziazia apai na sinombori nga takapande wene pangbanga. (Mt. 24:14) Nirengo, rogo kura adagbarago, sunge tungusapai nibambumbuhe. Si rengbe kadu nga aboro na nyakarii, sogote, watadu regbo be aboro ka giaha te. Gu ga Yekova aboro nadumbata agbia tiyo na kina ngbatunga apai wa kina gure. Wa si avura duwo, i ambunga dogoda na gu pangbanga nga ga Mbori te. (Oni gedi 2 Pekapai 36:15, 16; Yeremaya 7:24-26.) Ginipai naundo yó i du na hipai wa gure? I aabi gayó sunge wa gu Yekova abihe, angianga wa zegino abihe ya. I abihe a nibakere pa irisa ka ta na rimo Yekova.​—Yere. 15:16.

18. Wai sunge tungusapa Kindo nika taasarimo Yekova kumbatayo?

¹⁸ Ani a na gu momu nga ga takapande rimo Yekova na gako ringbisapai. Oni berẽnga kurii gipai re: Nisangbana gaani sunge tungusapai, avura Mbori arengbanga ka yawee i aagianga tungusapai te ho ga Mbori bakere uru nika ye ni te. I nika ino ya Yekova du nasovura kutiyó, a wa Faro ainihe. (Gate 8:1, 20; 14:25) Ti kina gu bangisa regbo re, Yekova nika irisa gako ruru amoyambu niyugo ko gupai fuyó ziazia nga i angia agu aboro naamangasunge kubako nzunzu.​—Oni gedi Yezekere 2:5; 33:33.

19. Gini apai si aida ani mangihe wa Yekova ahipai?

¹⁹ Bara kuti digido ga Petero ue waraga, ko akepai fu akurako aidipase ki yaa: “Oni . . . ini he ya gu hipai nga ga gaani Gbia si nga gene bata.” (2 Pet. 3:15) Sidu tie, wa Yekova ahipai, si naida ani sonosi agu asino nasa ngbarago tiko, ki nye zanga ‘wiri biriko na zanga sirõ,’ kini hi aʹasada, na kidu zaaza tingba gu sunge nga ga Kindo. Ka ani amangaha wo, gure nga ani moi tirani ngbagene agu amaku nga ga ‘vovo angbangbaturũ na vovo kpotosende.’​—2 Pet. 3:13.

[Gu kpiahe du ti kpewaraga 21]

Gine rengbe ka undo roni nga akumbakuadee oni sonosi agu asino nga ga Mbori rogoroniyo na rogo gaoni aborokporo yo?

[Gu kpiahe du ti kpewaraga 22]

Oni Natingidaha?

• Wai rengbe ani ka sonosa agu asino nga ga Mbori?

• Wai rengbe ani ka nye zanga ‘wiri biriko na sirõ’?

• Gini apai rengbe ani ka wirikaha be aYosefa na Naomi?

• Tipagine du pa tungusa ani pai ti ni nimomu?

[Gu kpiahe du ti kpewaraga 23]

Ginipai ani awirikaha ti gu gene Yosefa amangipai ngbaha sa aʹasada?