GU BA AWARAGA DU ROGO INTERNET nga ga Ngbaõbambu Sinziri
Ngbaõbambu Sinziri
GU BA AWARAGA DU ROGO INTERNET
Zande
ã
  • ã
  • ẽ
  • ũ
  • á
  • ö
  • ò
  • ĩ
  • ä
  • BAIBIRI
  • AWARAGA
  • ADUNGURATISE
  • w05 9/1 kpe. 28-32
  • Ani Nikaa Ta Nirimo Yekova Gaani Mbori

Vidio ho tipa gipai mo nasiaha re te.

Akoo, wiri ingahe ima manga ho gu vidio re naambakada tihe ka tona ni.

  • Ani Nikaa Ta Nirimo Yekova Gaani Mbori
  • Ngbaõbambu Sinziri Natakapande ga Yekova Kindo—2005
  • Umbariiapai
  • Awirinaha
  • Zuũ Atona Berewe Dagba Ngbatunga Aboro
  • Ani Namaaberã Rani Amaa Kuti agu Azahe Nga ga Yekova
  • Oni Kakuti Ta na Mbori ti Aregbo Ruguzuruguzu Mangaapai
  • ‘Ani Dagba Agu Aboro Nakaraga Tiyo Kusayo Te’
  • Gine Nasa Gupai Nga Noa Bi Undahe be Yekova?
    Ngbaõbambu Sinziri Natakapande ga Yekova Kindo—2008
  • Ko ‘Anaata na Mbori’
    Oni Wiriki Gayo Idapase
  • Si Naida Ani Naangera Awere Kakaka Susi Gu Nidu Mbata
    Ngbaõbambu Sinziri Natakapande ga Yekova Kindo—2004
  • Ko ‘Abati na Kura Aboro Saba’ Fuoko
    Ngbaõbambu Sinziri Natakapande ga Yekova Kindo—2013
Mo Bi Kuraapai
Ngbaõbambu Sinziri Natakapande ga Yekova Kindo—2005
w05 9/1 kpe. 28-32

Ani Nikaa Ta Nirimo Yekova Gaani Mbori

“Ani ata na rimo Yekova gaani Mbori nyeanye kindi.”—Mika 4:5.

1. Gini sino nadu ti rago Noa nibipa ruru mangapai na wai Noa adu ti gako akia?

ENOKA nga gu bambata boro Ziazia Kekeapai nafura tipa ko ya ko anaata na Mbori. Gu ue boro nangia Noa. Kekeapai naya fu rani wee: “Noa adu ni ruru boro, ki du ziazia dagba arika ngbatungako; Noa anata na Mbori.” (Bambata Pai 6:9) Ti rago Noa, ngbatunga aboro dunduko aima kpangbara ti ziazia irisombori. Gu kere sino raka re aye ka gbera kumbatayo berewe gbe be gu gbegbere amaraika nga aguyo naye ka manga gu rogatise na adee nga gu naarẽnga tipa yo ya, na ki batika diangbadiangba akumba, nangia “aira nyaka” watadu “abaworimo” mbata. Mbiko gipai re, si airiwonga te, si du kpotosende ahi ti ni be zuũ! (Bambata Pai 6:2, 4, 11) Wa si avura du wo, Noa ayuguhe kindi ya ko adunga na pai ti rimoko te, ono ko angia “batungusi pa ruru mangapai.” (2 Petero 2:5) Ho Mbori azinahe ni fuko tipa mbakada bakurungba tipa batasa raka, Noa “[a]mangi wo; wa Mbori arugu ko nani, kina wo ko amangi he dũ.” (Bambata Pai 6:22) Nirengo, Noa anaata na Mbori.

2, 3. Gini wene kpiapai Noa ambuhe fu agurani du areme?

2 Pauro akodi Noa kurogo gako tangaratangara rimo nga ga ruru adezire ho ko akepai ni ki yaa: “Mbiko idapase Noa, ho Mbori ayugu pa agu apai ni fu ko i ata bi nga ya, ko ki gunde ti Mbori, ki mbakadi kurungba ki batasi kpuko; rogo gi pai re ko akiti ngbanga zegino, gu rurupai du mbiko idapase ki du ni gako.” (AEbere 11:7) Nga gu bawene kpiapai! Wa ko aima rugatiko na gupai nga fugo Yekova adaada ti rengo, Noa amangi sunge na gako regbo, gako ome, na agu ahe nadu beko tipa ka digiso agu azinahe nga ga Mbori. Rogo gu gene duwa kina gure, dungu aboro areme a naká agu amamu nga ga sunge-zegino, na kini mangisunge na gayo aregbo, gayo ome, na agu ahe du beyo tipa ka irisa agu azinahe nga ga Yekova. Gayo idapase nikparakparaha na sangbanaha adu fuyo nga bata na fu gu kura aboro a.—Ruka 16:9; 1 Timoteo 4:16.

3 Yugo idapase rogo mangapai aima du nikpakarakpakaraha fu Noa na gako aborokporo, a wa si adu tipa Enoka nangia tita-titako, nga guko wisigi ani pai tipa ko rogo gu kekeapai ye mbata fu gere. Ti rago Noa, a wa si adu ti rago Enoka, bange ndikidi airisimbori adu nikina umbaha, nangia aboro muambe gbua nayugupa gayo du niruruse na i ki bati be Ime Akangbii. Noa anaatungusapa ruru mangaapai rogo gu zegino nadu na zuũ gbiati wasiwasi mangapai rogoho. Kurii gure, Noa na gako aborokporo aambakada bakurungba nimbakadatise tipa ime akangbii, wa si avura du nga boro ho sa nabi ngbatunga gu ime re mbata te vurũ. Gupai re aima du nikpakarapai bangiri agu aboro naabi yo i nimbakadihe.

4. Gini iraira mangapai nga ga agu aboro nadu ti rago Noa Yesu ayuguhe watadu anyakasipaha?

4 Si ni gupai nagbeberã rani nga, ho Yesu aafura ni tipa rago Noa, ko afuranga tipa gu zuũ, zire pambori, watadu gu wasiwasi mangapai nadu te, wa agu apai re avura du nikerehe vurũ. Gu irairapai Yesu ayuguhe nangia pa ká aboro ka pekafuo gu zahe Noa anaatungusaha. Ko ayawee i “aniri he nimbiri he, nirogo ade nifuku ade sa roga yo, ki da ti gu uru Noa arimi ni ku kurungba yo.” Gini irairapai naduho ti rihe, mbirahe, roga adee, na fuka adee sa roga yo? I aaraka kina “gu kungbo” raka gbua aboro naarakaha! Ono tie, ime akangbii aaye, na Noa kini tungusipa ruru mangapai. Si aida fugo ko na gako sino mangaapai, si du nizahe fuyo. Wa si avura du wo, i ‘ainonga ha te daho ngirimo akangbii ayeni kini rogo yo dunduko kusayo.’—Matayo 24:38, 39.

5. Gini asino Noa aaidaha na gako aborokporo?

5 Ningera ani kusayo ka bi agu aregbo susi re, ani nabi gu tatamana abi nga ga pekafuo gu gene-raka nangia ga Noa. Wa vura duhe wo, si aaida wingbaduse tipa ko du kia ti agu aboro dunduko naaraka rogo agu aʹuru nadumbata fu Ime Akangbii re. Si aidi Noa, na gako aborokporo, i duna kakaka idapase tipa ka mbakada bakere kurungba na ka hiisoho na ngbatunga anyaa dũ. Ya mo bete aboro dagba gu ruru aboro re adu ti gu kura aregbo na nyemu gupai nga, ka aboro ininga payo gbe ya ono i kini raki kina “gu kungbo” raka gbua aboro aarakaha? Ka si vurangia ngbatunga agu aberã re anaaye aye kuriyo yo, si arungburasinga gayo kakuti ruru mangapai te. Tingbafuo dungu agarã, nga gu bagizo regbo naaima susi gu regbo rengbe ani ka hipai rogoho rogo gi sino raka re, gu idapase nangia ga Noa andu naako sa bata be Ime Akangbii. Ono tie, Yekova aye na sapangbangaa kurii agu aboro dunduko naaraka “gu kungbo” raka aboro naarakaha nga aguyo nazanga maaberã yo kuti nyakapa gu regbo i aaraka rogoho re.

Zuũ Atona Berewe Dagba Ngbatunga Aboro

6. Gini ngbatunga sino raka naandu kumbatayo kindi tingbafuo Ime Akangbii?

6 Fuo Ime Akangbii ugudi, ngbatunga aboro atona vovo raka. Wa si avura du wo, i adu kindi nikpakpa aboro na “gu ga aboro berã du kpotoyo yo” si adu kindi ni “gbigbita ha tona ti parangayo.” (Bambata Pai 8:21) Kurii gure, wa si avura du nga adaimona aarengbanga ka roga kpoto aboro berewe kutiyo te, i aamangasunge amanga kindi nyanyakii. Gu zegino nangia ga azangasinombori ayuguhe niipo ya si “ni zogozogo ho be gbegbere ko,” na a wa duhe teketeke areme a, si aidi ndikidi airisimbori sovura kuti “ga bakitingbanga birĩ.”—1 Yoane 5:19; AEfeso 6:11, 12.

7. Waigu zuũ amoipai rogo gu zegino nadu tingbafuo Ime Akangbii?

7 Gbe, natona ti rago Nimeroda, gu zegino nadu fuo Ime Akangbii ada berewe nigu ba nga ga manga zuũ fu aboro. Nisangbana gu sona kumbatayo nga ga bange aboro na gu sona kumbatayo nga ga birĩ-ino-mangaahe, zuũ ima maapai wa regbo andu kumbatayo. Rogo agu agarã nadumbata, agu aũvura nadu be aboro nangia abasape, abaso, amboto na aguanza, na angbagidavura. Rogo agu aregbo susi bambeda kusayo, i akusi agu abundu duwa basuka na gu kikindigi abundu i naaturaha rii gaha angbagida, tingbafuo gure abundu makana na kura kpakarakpakarapa kikindigi abundu ki kuru ti tonatona gu 20 kama agarã nga gu i aturaha rii anduhe. Bambata Vura Nga ga Zegino akusi agu aũvura nga gu nafu bakere gunde kisusi, ngbatunga gu duwa atiyara (avion), na adababa, nga agu atarambiri nga kina abundu nitihe, gu bakurungba vura nga gu tigaha nata nduandu rii ime kini nduandu tii ime yo a, na gu kere uturo kikpa ahe nga gu i azakaha kurogo wege tipa si imi aboro. Rogo gu vura re, ngbatunga agi abundu re aimi dungu amirioni aboro. Ya mo gipai re akuru akura ruré watadu nitunguotunguoho? Oó.

8. Wai du Yugoti 6:1-4 nidigisidigisihe?

8 Rogo gu garã nangia, 1914 Mbori amoi Yesu ni Bakindo rogo Gako Kindo nga ga ngbangbaturũ, na “ga Gbia uru” ki tona tigu regbo re. (Yugoti 1:10) Rogo gu yuguyugupai tingidi yo paha rogo gu buku nga ga Yugoti, si yugu Yesu ni Bakindo ko nindu rii pusi farasi na diabese. Gu kura abandurii afarasi kini pefuo ko, i dunduko nibasasa narukuba ngbatunga agberangbii nga gu naye kuri ngbatunga aboro. Guko nandu rii zamba farasi, i aʹasia “pa dia zereda auru kpotosende fu ko, aboro imi tiyo dagba yo. I ki fu bakere basape fu ko.” (Yugoti 6:1-4) Gi farasi re na gu kumba nandu ri ru, si nayugokpia sovura, na gu bakere gbanga basape re narukuba gu bakere gbarasarago nga gu naamanganga mbata ya, naye be ngbatunga gu sovura du awere na kikindigi abundu nga gu duna bakere ome. Agu aũvura re areme nakoda agu akerehe (neclear devices), nga gu nisaha rengbe ka imo dungu akutu aboro, gu kura abundu kinaho rengbe ka zumo amarã-bundu tutuurũ rii dungu amairo; gbiati gu kura kere abundu (sophisticated chemical weapons) du tipa zumo kikpa ahe gbiati agu aũvura nga agbiro-kaza i azaka ra kurogo wege, nga agu agbiro rengbe ka imo dungu aboro ti bangisa regbo.

Ani Namaaberã Rani Amaa Kuti agu Azahe Nga ga Yekova

9. Wai gu zegino du areme aringbisatihe na gu nadumbata fu Ime Akangbii?

9 Ti rago Noa, Yekova agbarasi ngbatunga aboro mbiko gu kere zuũ nangia ga gbegbere aboro, nga gu zuũ diangbadiangba awiri amaraika afubee sani tipa si moipai. Ginipai du tie tipa areme? Ya mo kpotosende na zuũ rogoho nibetehe tooni tigu nadumbata tigu regbo re? Wagusa te! Kurii gure, a wa si adu ti rago Noa, aboro naora kina fuo agu apai ngba tiyo areme, kini asadi kaa raka kina “gu kungbo” raka gbua aboro naarakaha, ka i akpinga nyemu ka pekafuo agu azahe awirina amangaha ya. (Ruka 17:26, 27) Fuo gure tie, ya mo ndupai ho tipa ka tiko tipa ye Yekova na gbarasarago kurii ngbatunga aboro berewe? Oó.

10. (a) Gini azahe du rogo Ziazia Kekeapai nisangbanebi i nafuguhe nidunguhe? (b) Gine nga gu yangara gene mangapai sa nga ga tatamana areme?

10 Dungu akama agarã mbata fu Ime Akangbii, Enoka aima gumbapai nisangbanebi tipa gu gbarasarago nga gu duwa ka si ye ti gaani regbo. (Yuda 14, 15) Yesu afura afura a tipa gu “bakere gberãngbi” nga gu naye. (Matayo 24:21) Gu kura anebi afu zahe afu a tipa gu regbo re. (Yezekere 38:18-23; Daniere 12:1; Yoere 2:31, 32) Rogo gu buku nga ga Yugoti, ani nageda nyanyaki afugo rogoho nga gu naringbisapa gu gbarasarago nga yangaraha. (Yugoti 19:11-21) Wadu ani nibasasa, ani nawirika mangapai wa Noa na ani kidu nizaaza abatungusipa ruru mangapai. Ani namaaberã rani kuti agu azahe nga ga Yekova, na ani kini undo gaani amurakporo ninyemuse tipa i mangi kinawo a. Sidu, wa kina Noa, ani nata na Mbori a. Nirengo, si ninyanyakipa pai nga gu boro nakpinyemu raka, ni kakuti ta na Mbori. Wai rengbe ani ka manga wo nibipa gu fudifudiapai namanga rani na aʹuru? Si naida ani sonosi nyanyaki idapase kuti wai gu ringbisapai nga ga Mbori amangasunge.—AEbere 11:6.

Oni Kakuti Ta na Mbori ti Aregbo Ruguzuruguzu Mangaapai

11. Rogo gini gene ani awirika mangapai wa agu aKristano nadu rogo bambata sa kama agarã?

11 Rogo bambata sa kama agarã, i anaafura tipa mbedimbedi aKristano ya i akakuti “gi gene re.” (Amokedi 9:2) Gayo gene raka naabaha dunduko, si aru rii gayo idapase kuti Yekova na kuti Yesu Kristo. I andu kina ngba gu gene Bairayo andu ngbaha a. Areme, ruru aKristano namangaapai teketeke wa kina gure a.

12. Ginipai namangi fuo Yesu rigi rimbasa aboro rogo gu gene nadu niʹiiriwoho?

12 Padu idapase ninyanyakipa he niyuguyuguhe gbaiga rogo gupai namangi ti regbo ga Yesu sunge tungusapai. Ti kura regbo sa, Yesu arigi rimbasa aboro bangeyo aduwa 5,000 rogo iiriwo gene. Si airiwo airiwo ti rimbasa na i kidu na bakere ngbarago. Ono tie, oni bingo gupai namangi tingbafuoho. Ani nageda gupai tipaha nga: “Ho aboro abi gu pai ni i aina pai tini ko amangi re, i ki nimo ka ya, ‘Gi kumba re ko nga gu nebi nirengo naye ku zegino!’ Yesu ki nimo ka ina ha ya i nikaye ka zia ko, ka sa ko ni bakindo, ko ki di tiko berewe ku ri bagangara yo ni sa ko.” (Yoane 6:10-15) Kina rogo gu yuru re, Yesu andu kurogo gu kura rago. Si nawira gupai nga, pa ká Yesu kadu ni bakindo aima fu bakere gberarago fu dungu aboro. Nirengo, Yesu aima yugoho nga ko adu niʹiratatamana ki rengbe arengba kadu ni bakindo, na ko aduadu na ome tipa ka mbiisa gu nyemuahe nga ga borose nga gu aboro adu nani. Wa si avura du wo, ga Yekova regbo adanga fuko tipa ko tona zogarago ni Bakindo te. Kurii gure, ga Yesu zogarago angia gu zogarago nga ga ngbangbaturũ, angia nga ga zegino ya.

13, 14. Gini bipai gu duho aboro ayuguhe, na wai gayo idapase adu niʹasadiʹasadihe?

13 Wa si avura du wo, rimbasa aboro adiberã nyanyakii tipa ka pefuo Yesu, na i ki bi ko “mbiti baime yo” a wa Yoane apehe. Tipagine i apefuoko ti ni baraho ko aima soga gayo bakere asadatise ni tipa ka maa ko ni bakindo? Dungu aboro aduna kina gu bipai nga ga borose, na i kini fura tipa kina agu ambakadapai nga ga riahe Yekova amangihe ngbakungba yo rogo agu aʹuru nangia ga Mose. Gipai re aayugo gupai nga, si aida Yesu nindu kumbatayo kindi na gu mbakadapai nga ga fu riahe fuyo. Fuo Yesu rugu tiko na gayo bipai nga gu nadu nigbegberehe, ko atona ka yugo arengo nga ga toro fuyo nga gu narengbe ka undo yo tipa i mbakadi gayo aberã. (Yoane 6:17, 24, 25, 30, 31, 35-40) Nikaragapai tie sa gipai re, bete aguyo akpakanako, bakere gbe, ho ko afura ni fuyo rogo gi yugopai na kpiapai re kini yaa: “Mi nagumba ha fu roni, nirengo, nirengo, ka oni ari nga pasio Wiri boro ki mbiri kureko ya, unga du nga kpotoroni yo te. Gu ni ka ri pasiore ki mbiri kurere nyenye unga du adu be ni; mi azíngisa ni azingisa ti yangara rame.”—Yoane 6:53, 54.

14 Dedede, ga Yesu yugopai na kpiapai anaasa aboro i yugu agu apai nadu ngbaduyo yo singia i aida nirengo kaa ta na Mbori. Gi yugopai na kpiapai re adunga kia ti akuraha te. Si awoti gupai nga aboro berẽ nyanyaki aberã. Ani nageda gupai nga: “Ho dungu gako abawiriki agi gi ni re, i ki nimo ka ya, ‘Nyanyaki pai nga gere; da ka gi he?’ ” Yesu aandu kindi kumbatayo kaa sakarogopai fuyo ya si aida i wisigi afugo ko tipa gu rogoyo nga ga toro. Ko ayaa: “Si nga toro nafu unga; borose amanga nga he wa sa te; agu apai gumba mi fu roni si nga toro, na unga.” Wa si avura du wo, dungu aboro adeganga tuyo te, na pangbangaaha nayaa: “Dungu gako abawiriki ki karaga tiyo be gere, ka i ata nga na ko berewe ya.”—Yoane 6:60, 63, 66.

15. Gini ruru bipai bete ga Yesu abawiriki adu nani?

15 Wa si avura du wo, anga ga Yesu abawiriki dunduko nakaragapai wagu re te. Si nirengo nga, ga Yesu ruru abawiriki aaruganga tiyo wenengai na rogo agu apai yo ko apehe fuyo re te. Wa si avura du wo, i aruaru ngutete rogo gayo kido kutiko. Petero nga guni sa dagba gako ruru abawiriki, ayugu gu berãpai nga ga aguyo dunduko nanye ho ko ayani wee: “Gbia, ani andú koyo du da ni? Wa du mo du agu apai be ro nga ga nyenye unga.” (Yoane 6:68) Nga gu beedi sino berã, na nga gu bawene kpiapai!

16. Waigu rengbe ani kadu niʹasadiʹasadi rani, na gini ruru bipai si aida ani sonosihe?

16 Ani rengbe arengba kadu niʹasadiʹasadi rani areme a wa kina agu abawiriki nadumbata. Tipa rani, ani rengbe kadu na bakere gberarago tirani ya agu akidohe nga ga Yekova, si adigonga niipo kuho ani aidaha kuhoni ni wadu ani nibasasa te. Si rengbe kadu nga, ani naberã gupai nga, agu asakarogo Ziazia Kekeapai yo du rogo agu abuku du mburuhe rii Ziazia Kekeapai, si gu kpakara akpakara tipa giarogoyo. Gu sino nga ga wirina ni Kristano rengbe arengba ka fu gberarago fu rani. Ya mo si adu fu rani nirurupai tipa ka mbu ta na Mbori tipa gi nduapai re watadu agu nawiraha? Wagusa te! Agu abawiriki nambu pekafuo Yesu, i ayuguhe ya i aaberã apai tipa kina agu ahe nangia ga borose. Si naida ani ne manga kina ngbatunga gupai re a.

‘Ani Dagba Agu Aboro Nakaraga Tiyo Kusayo Te’

17. Wai rengbe ani ka gbia undo tipa ka kakuti ta na Mbori?

17 Gu mokedi nangia Pauro akepai ki yaa: “Ziazia Kekeapai dunduko si aye be ga Mbori Toro.” (2 Timoteo 3:16) Rogo akpewaraga nga ga Ziazia Kekeapai, Yekova napehe fu rani gbaiga nga: “Gene du re, oni ndú ngba ha.” (Yesaya 30:21) Pa gia ani fugo Mbori naundo rani ani ‘naangera angera wenengai wa ani ata.’ (AEfeso 5:15) Pa wisigo ani Ziazia Kekeapai na kini berẽkurii agu apai ani awirikaha, si naundo rani ani ‘naata rogo rengo yo.’ (3 Yoane 3) Nirengo, a wa Yesu apehe, “Si nga toro nafu unga; borose amanga nga he wa sa te.” Gu ngisa gene rengbe ani ka kido kuti ni tipa manga ani gaani sunge ngbaha wenengai, si nga agu arugute nga ga toro, nga gu naye fu rani rogo Fugo Yekova, na be gako toro, na rogo gako riigbu.

18. (a) Ginipai kura aboro amangaha nipamungo? (b) Gini ngbatunga idapase ani asonosaha?

18 Areme, agu aboro nagbia gberarago mbiko wa i aberã kina agu apai nga ga borose, watadu agu apai i akpinyemuhe ono ka si amanganga fuyo ya, dedede, i naaʹaria tiyo tipa mangasunge na omeyo dũ na agu ahe du rogo gi zegino re. Nigobangiriyo tipa mangapai niipiipihe, i abingo ho nga zingo gu duho tipa ‘kaa ngera angera kindi’ te, na fuo duhe wo, i kini sia pekafuo agu asásá nga ga gbangbati kuba gupai nga i moi agu apai nga ga Kindo mbata rogo gayo raka. (Matayo 24:42) Pa ta boro rogo ngbatunga gu gene re, si nipamungo kisusi. Ani kparianga afugo gu mokedi nangia Pauro: ‘Anga ani dagba agu aboro yo nakaraga tiyo kusayo kurogo kpio yo te; ono ani dagba aguyo yo duna idapase tiyo tipa batasa mbisimoyo.’ (AEbere 10:39) Wa kina aNoa na Enoka ani naraka ti agu aregbo aboro amangapai rogoho niruguzuruguzuhe, ono tie, ani gudu adu na mamu berani tipa kaa ta na Mbori a wa i anaata. Nimanga ani he wo, ani nikadu na gu kido nga ani abi digisidigisi ga Yekova akidohe abi, i nadi gbegbereapai kusayo na ki sigira ruru vovo zegino. Nga gu iiriwo maabangirise re!

19. Waigu fugo Mika aringbisapa gu gene mangapai nga ga ndikidi airisimbori?

19 Gu nebi nangia Mika nga guko ga Mbori toro adu kugiiko ko gumbapai, aya tipa gu arikaaboro nga ga zegino yo wee: “Aboro dunduko ata ni ba sa sa na rimo gayo mbori.” Fuo gure, ko afura tipa tiko na tipa gu kura ruru airisimbori ki yaa: “Ono [tipa rani tigaani,] ani atá na rimo Yekova gaani Mbori nye anye kindi.” (Mika 4:5) Ka singia gaoni nyanyaki diaberã gudu wa kina gu nangia ga Mika, oni nye tie mbembedii na Yekova, ka aregbo vura du na ruguzuruguzuapai rogoho wai vurũ. (Yakoba 4:8) Si dunga adu tie nigaani bakere nyemupai wadu ani nibasasa kaa ta na Yekova gaani Mbori tipa gu regbo i ainonga digidoho ya, watadu nyeanye kindi!

Gaoni Karagapai Nga Gine?

• Gini awiratise duho dagba agu aʹuru nangia ga Noa na gu du areme?

• Gini gene raka Noa apeke fuoho na gako aborokporo, na waigu rengbe ani ka wirika manga gayo idapase?

• Gini iraira bipai naduho bete ga Yesu abawiriki ayuguhe?

• Ginipai ndikidi aKristano nadiberã tipa ka mangaha?

[Gu kpiahe du ti kpewaraga 30]

A wa si adu ti rago Noa, kinawo a aboro aora fuo gu mangapai nga ga aʹuru dunduko areme

[Gu kpiahe du ti kpewaraga 31]

Wa du ani ni abatungusipa Kindo, ‘ani dagba agu aboro yo nakaraga tiyo kusayo kurogo kpio te’

    Agu Awaraga Nga ga Zande (2000-2025)
    Mo Kuru
    Mo Rimi
    • Zande
    • Mokedihe
    • Wai mo aida apai du
    • Copyright © 2025 Watch Tower Bible and Tract Society of Pennsylvania
    • Agu Andiko du Tipa Mangasunge na Ni
    • Pa Banda Agu Apai du Tipa Boro
    • Privacy Settings
    • JW.ORG
    • Mo Rimi
    Mokedihe