Oni Kido Kuti Ga Mbori Toro Rogo Gaoni Mangapai Kuti Agu A’ariapai Du Rogo Raka

“Mo ké na mbakada pa tiro bangiri Mbori.”—2 TIMOTEO 2:15.

1. Gini a’ariapai rengbe ka ye na kpakarakpakaraapai fu rani na ki fudi rani rogo toroyo?

AGU apai du pati rani rogo zegino, si na’ariatihe a’aria waragoagira. Ani nabi iiriwo sona kumbatayo rogo agu apai nga ga birĩ-inohe na gu nga ga mbakada ahe wa si andu sa na kere basapa ruru mangaapai. A wa ani awisigihe rogo gu papara kekepai ye mbata fu gere, aKristano du wa ka i sovura kuti gu sino mangaapai nasovura kuti Mbori du rogo gi zegino re. Ono tie, wa agu apai du rogo zegino a’ariatihe, kinawo a ani na’aria tirani rogo dungu agene. Ani nasusa rogo gu regbo ani adu ni agude ki da nisosono aboro. Ani rengbe ka gbia aũkumuko watadu paha rengbe ka gbera berani, ani rengbe kadu na wasawasa tiikpotoraniyo watadu kaza rengbe ka zio rani, abadiangbarani rengbe ka kpiko berani. Tandu berani kurii ngbatunga gu dungu a’ariapai re te, sidu, si rengbe arengba ka ye na vovo bakere kpakarakpakaraapai fu rani na ki fudi rani rogo toroyo.

2. Gini a’ariapai namangi rogo ga Davide raka?

² Kina bete aboro gbua ngbatunga gu kakaka a’ariapai namangi Davide wiri Yisai amanga yo rogo gayo raka. Davide aguari nikina boro ipo rogo gu ba aboro ainonga ko rogoho ya, nangia ga banda avusende, ki da nigu boro-ringara nangia baworimo gbe mbiko gako wingbaduse. Kusa, gu bakindo naakpiko, atona do fuo ko wa ka i ado nyaa tipa ka imo ru, sidu ko ki sa tiko nigbukugbuku boro rogo ringara. Fuo gure, Davide ada ni Bakindo na ni badibevura. Ko ahi iimi sangbana kere ingapai. Ko arungo be kere gberango gbiati kparaka dagba gako aborokporo. Ko agbia kumuko, ki gbinza, na ki ini pa agu asigaro nga ga gbinza. Ono tie, wa dungu a’ariapai rogo ga Davide raka avura du, ko anakido kindi rogo gako raka kina kuti Yekova na kuti Gako toro. Ko amangi agu apai dunduko ko arengbe ka mangaha ‘ka mbakada pa tiko bangiri Mbori,’ na Mbori ki fu maku fuko. (2 Timoteo 2:15) Wa vura duhe nga, agu apai du tipa rani si kia ti agu nadu tipa Davide, ani rengbe arengba ka wirikapai ti gu gene ko amangi apai ngbaha rogo gako raka. Gako kpiapai rengbe ka undo rani ani girogo wai rengbe ani kaa gbia gu undo kindi nga ga ga Mbori toro wa ani agbia tirani na a’ariapai nibakiakia rogo gaani raka.

Ga Davide Umbasitise Nga Wene Kpiapai

3, 4. Wai Davide aguari rogo gu ba i ainonga ko rogoho ya nangia ga banda avusende ki da kurogo gu ba ko adu rogoho nibaworimo boro-ringara?

³ Ho Davide aduni ni kumbagude, pako akionga te, zavura dagba gako aborokporo vurũ. Ho gu nebi nangia Samuere aye ni ku Betereme yo, ba Davide ayugu agu awiriko nadu saba fuko ki zanga yugo gu muambe ko. I ambu Davide nangia kiaro kusayo ko nibanda gayo avusende atiyo. Ono, wa pa Davide avura umba, Yekova aima sia kina ko ko ngia gu bakindo nika zoga aYisaraere gizo. I ayambu Davide atiyo. Fuo gure, gu kekepai du rogo Ziazia Kekeapai nayawee: “Samuere ki di gbanga na nzeme, ki mbedi ko ku dagba aunvurako; ga Yekova Toro ki ye na bakere tandu ku ri Dawidi tona ti gu uru re ki da ku mbata yo kindi.” (1 Samuere 16:12, 13) Davide anakido kuti gu toro re rogo gako raka naabaha dunduko.

⁴ Fuoho aturanga te rimo gi gude nanabanda avusende re ki wo rogo apapara ringara dũ. I ayambu ko ko ye ka ndusunge fu bakindo na kaa taka woroahe fuko. Ko aimi gu basovura nangia Goriata, nangia kere ngburunga kumba gu wene abanzengere nangia aYisaraere agunde agunde tipa ka zubo ko. Fuo maa yo Davide kurii aborovura nibairayo, ko anasovura kuti aFereseto kini di beyo. Aboro akpinyemu ko gbe. I asapu abia ka sambuoko nani. Mbata fu gu regbo re, gu kumba nangia bafurugute fu Bakindo Saura, aringbisanga pa gi paranga nangia Davide re nikina gu boro gbua “[na]ini pa taka kundi ni birĩ” sa te, ono ko aringbisi pako a “[ni]nyanyaki boro ni irarugatinapai, ni basovura a, ni baberẽpai rogo fura yo, tamako ki ngba angba.”—1 Samuere 16:18; 17:23, 24, 45-51; 18:5-7.

5. Gini apai ka rengbe arengba ka sa Davide ni iraruko, na wai ani aino gupai nga, si asanga ko te?

⁵ Si nawiri wa Davide aima duna agu asino beko dunduko aboro aida si du beyo, nga worimo, ngbanyaa kpotose, parangase, birĩ ino fugo, birĩ ino taka woroahe, birĩ ino sovura, na ga Mbori weneringise kidu kuriko. Agi apai re nibasasa, arengbe arengba ka sa Davide ko duni iraruko, ono tie, anga guho sa nasa ko ni iraruko te. Oni kparianga ga Davide karagapai fu Bakindo Saura, ho Saura apepa fu wiriko ni fu Davide ko di ri nidiako. Rogo agu afugo nangia ga ndikidi umbasitise, Davide ayaa: “Da nga mi, ada nga agumere, da nga angbatunga buba dagba aYisaraere, ka mi du ni kumba ku wiri bakindo?” (1 Samuere 18:18) Wa wene bawirikipai sa aasakapai riipa agi afugo re, ko akepai ki yaa: “Gupai Davide aaberãha nga, anga agu apai ko arẽ ka mangaha, watadu gako ba dagba aboro, watadu ngbatunga ko, nasanga ko kandara tooni ko rẽ tipa gu irisa nga ga du nikumbaku wiri bakindo te.”

6. Tipagine si aida ti ni ani du na umbasitise?

⁶ Mburu ga Davide umbasitise adu rii gu inohe nga, pa Yekova ima kio bakere gbe ti ga kpakpa aboro rogo apai dunduko. Na ngba Davide azere ka ino gupai nga, Mbori naberãpa boro aberã. (Atambuahe 144:3) Na ko aima ino gupai a nga, zanga kapa, gu kiopase nadu beko, si adu mbiko Yekova ayugu umbasitise, ka zoga patiko kusende ka songoda Davide, ka banda ko, na ka ngera fuo ko. (Atambuahe 18:35, NW) Nga gu bawenepai tipa ani wirikipai behe! Si aidanga gupai nga, agu atandu du berani, agu apai mangi ani he wa du ani nibasasa, na agu amamu du berani sa rani nirukoo te. Gu mokedi nangia Pauro akepai tipa gipai re ki yaa: ‘Ginihe du bero Mbori afunga ha afu foro ya? Ono wa duhe nga, i afuhe afu foro, tipagine mo asambuo tiro ti ni si kidu wa i afunga ha afu foro te.’ (1 AKorindo 4:7) Tipa ani rengbe ka gbia ga Mbori ziazia toro na ka gbia ngbarago mbiko ko idi na gaani pai, ani du wa ka ani du na umbasitise na ki nye kuti ni.—Yakoba 4:6.

‘Ka Oni Iringa Bape Roni Ya’

7. Gini mamu nakuru fu Davide ko imi Bakindo Saura?

⁷ Wa pa wo rimo Davide avuranga manga ko nirukoo ya, ono tie, si asa Bakindo Saura ko naakpiko akpi nikerehe, nga gu kumba ga Yekova toro aima guari kusayo tiko. Wa Davide avuranga manga irairapai ya, ko aoro tipa ka batasa ungako, na ki tona kaa raka ngbakungbo yo. Ti kura regbo sa, ti gu regbo Bakindo Sauro akpasaka dofuo Davide kindi, Sauro arimi kurogo siimbia, zanga ko ini gupai nga, Davide gbiati gako akumba aima rimo kurogo gu siimbia re ka gbu mbata fuko. Ga Davide akumba angarasi ko ya ko imi Saura mbiko si nawira Mbori du fu gu mamu re fuko. Ani rengbe arengba ka maa kpia gupai re ku berã rani yo wa i aafura rogo patapata rogo bitimo rogo siimbia, kini ya fu Davide wee: “Mo ngere, areme nga gu uru Yekova agumba pa ha foro ki ya, ‘Mo ngere, mi afu vuraro ku be ro, mo ki mangi fu ko a wa si ka ngba ti ro.’”—1 Samuere 24:2-6.

8. Tipagine Davide aza tiko ti ni ti irabape ko?

⁸ Davide aká aká ka imo Saura. Nidu ko na idapase gbiati zerangbaduse, gupai nada bangiriko nga ka mbu agu apai re kina kube Yekova. Fuo gu bakindo re kuru kusayo siimbia yo, Davide afura fuko ki yaa: ‘Yekova saringbanga dagbarani na mo, Yekova ki iribape re tiro; ono mi amaanga bere tiro te.’ (1 Samuere 24:12) Wa Davide avura ino gupai nga, Saura nangia ingahe, ko airánga bape ko te; na ko apenga gbegbere afugo fu Saura watadu ka pe gbegbere afugo bara ko a te. Ti kura dungu aregbo, Davide aza tiko ti irabape ko nisako. Kuba gure, ko akido kube Yekova tipa ko rugusi gupai re.—1 Samuere 25:32-34; 26:10, 11.

9. Tipagine si aidanga ti ni ani karaga gbegberepai kuba gbegberepai ya ka ani gbia tirani ti sogote watadu rungosi?

⁹ Wa kina Davide, si rengbe kadu nga oni bi tironi rogo asada. Isoke ka si vura du nga agu akuaro du mo na yo sukuru yo, agu akuaroni oni amangasunge na yo, gaoni aborokporo, watadu gu kura aboro nasogote roni asogote na kini rungosi roni tipa gaoni idapase. Ka oni karaganga gbegberepai fuyo kuba gbegberepai ya. Oni pidi kina Yekova, kini sanahe tipa gako ziazia toro tipa si undo roni. Pai rengbe arengba ka manga nga, gaoni wene sino mangaapai nika iriwo ti agu aboro adunga ti idapase na oni re ya na si ki sa yo i ye kadu ti ni na oni. (1 Petero 3:1) Ka si vura du kina wai, oni du na kido nga Yekova nabi agu apai abi du tipa roni na ko amangapai amanga tipaha ti gako regbo. Gu mokedi nangia Pauro akepai tipa gipai re ki yaa: ‘Abadiangbaa, ka oni manginga boro ti gupai mangi ni he fu roni ya, kina onga aonga fu zinga ngbaa; bambiko si nikekehe ya, “Pa irabape nga gimi, mi nika karagapai, wo poi Gbia.”’—ARomo 12:19.

“Oni Gi Rugapai”

10. Wai Davide amangi ingapai, na wai ko a’asadi tiko ka dadaha?

¹⁰ Dungu agarã asaki; fuo gure, Davide ki da nigu bakindo aboro akpinyemu ko gbe na pako ki kii a gbe. Gu gako gene raka nangia ga iiriwo ruru mangaapai, kodihe kuti gu wene abia Tambuahe ko akekehe ka taasarimo Yekova nani, arengbe taata ka ye na gu berã kurii boro yo nga, si taata fu gi kumba re ko mangi kere ingapai te. Ono, wa si avura du wo, ko aima manga kere ingapai. Rogo kura uru sa, gu bakindo re aru rii gako bambu yo ki bi bawene dee ri nimbedi ime. Ko asanahe ka ino da nangia ri. Fuo ino Davide gupai nga, rimo gi dee re angia Bataseba, na ki ini gupai a nga, kumbaari nangia Uria, aima ndu ku gene vura yo, Davide akedi sunge i ye na ri na ko ki pi na ri. Kusa, ko abi gupai nga ri ima dia mobara beko. Nairiwo gu gbarasarimo ka gipai re aye nani ka aboro aini he! Tii ga Mose Ndiko, gu mbusa nanidu tipa bäri, angia kina kpio. Si nawira, gu bakindo re aberẽ gupai nga, si naida i dadi gu ingapai re adada. Sidu, ko akedi sunge fuo aborovura ya Uria karagatiko ku Yerusarema yo. Davide abere gupai nga, Uria nika ra kpuko yo fuo Bataseba, ono tie gupai re amanganga te. Fuo du Davide awere nifudifudi ko be gi kerepai re, ko akedi Uria berewe ku ba vura yo na waraga fu Yoaba, nangia baira abanzengere. Gu waraga re ayawee si naida i moi Uria rogo gu ba i ka imoko rogoho tingba vura. Yoaba aidi nani, sidu, i ki imi Uria. Fuo Bataseba nyasi na agu apai nangia ga nunga be kpio kumbaari nga gu adee anamangaha ti agu aregbo re, Davide adi ri nidiako.—2 Samuere 11:1-27.

11. Giniapai namangi Natana agumbaha fu Davide, na wai Davide akaragapai sani?

¹¹ Si awiri gupai bangiri Davide nga, gi gako bura re aima manga gupai ko aida si mangihe, ono tie, wa ka ko angia gu boro, ka ko aima ino gupai nga, gipai re naabaha dunduko aima du niyuguyuguhe gbaiga fu Yekova. (AEbere 4:13) Dungu adiwi asusi, na Bataseba ki batika gu gude re. Fuo gure, Mbori aringbisipai fu Natana ko ndu fuo Davide. Gu nebi re agumba gu pangbangaa fu Davide nadu tipa kumukokumuko kumba nga guko nadu na dungu avusende beko, kita mbu ra ambu kini mo ka dia gu bangisa vusende nangia ga rungorungo kumba ru ka yera goru yo, nga gu vusende gi rungorungo kumba re akpinyemu ru gbe. Gi pangbangaa re azingisi gu nyemu ruru sarangbangaa nadu ti Davide, ono ka gu okõokõ ndupai Natana agumbaha ti ni ayenga ku bangiriko ya. Davide asaringbangaa niipo kuti gu kumukokumuko kumba re. Fuo ima ngbaduko be bakere zingaa, ko aya fu Natana wee: “Gu boro namangi gi pai re kina kpi ni ngba.”—2 Samuere 12:1-6.

12. Gini sarangbangaa Yekova asarihe kuti Davide?

¹² Natana aya fuko wee: “Kina boro mo nga gu boro re.” Davide aima sarangbangaa kuti tiko na gipai ko agumbaha re. Zanga kapa, gi ga Davide zinga re aima ariatihe niipo kurogo bakere zee na rungo. Fuo zerangba Davide, ko adegetuko wa Natana aagumbapa ga Yekova sarangbangaa, nga gu sarangbangaa gene adunga beko ka nehe ya. Afugo adunga ho ka i afu wasa nani fu Davide te. Davide apayasipa fugo Yekova nimanga ko gupai naangbanga ya. Anga ko aimi Uria na gu basape nangia ga avurako tee? Sidu, basape aguaringa rogo ga Davide kporo te. Anga ko adi dia Uria nigbuko tee? Sidu, kina ngbatunga gbegberepai wa gure nika manga ko, angianga rogo gbuko ya, ono gbaiga.—2 Samuere 12:7-12.

13. Ginipai Davide akaragaha kuti ga Yekova rugapai?

¹³ Gu wenepai Davide amangihe nga, ko atinga kango gako ingapai te. Ko azinganga kuti gu nebi nangia Natana re a te. Ko abiranga kura aboro tipa gupai ko amangihe re watadu ka rugusa ndu gupai ko amangihe ti ni te. Fuo Natana kusi ga Davide ingapai ku barabangiriko, ko aidipaha ki yaa: “Mi ingi pai kuti Yekova.” (2 Samuere 12:13) Atambuahe 51 nayugo wai ko arungo be imisiri gako ingapai gbiati bakio gako biratise. Ko azungodi Yekova ki yaa: “Ka mo ba nga re bara bangiro ku sa yo, ki di ga Ziazia Toro ti re ya.” Ko aima ida kuti gupai nga, Yekova, nigako inapai, apayasinga pa “gu kpoto yo naima be rungo ingapai” te. (Atambuahe 51:11, 17) Davide asusi kumbatayo kindi kaa kido kuti ga Mbori toro. Wa Yekova avuranga banda Davide be gbegbere ima gako ingaapai ya, ono ko aima mbupai fuko tipaha.

14. Ginipai si aida ani mangihe kuti ga Yekova arugute?

¹⁴ Ani dunduko nga kpakpa aboro na ani dunduko namanga ingapai amanga. (ARomo 3:23) Ti kura aregbo, ani rengbe arengba ka manga kere ingapai wa gu Davide amangihe. A wa gu baagude duna nyemu awirini tini naaruga yo, kinawo a Yekova afu arugute fu agu aboro nagbata gene ka mangasunge fuko. Ono tie, wa vura duhe nga rugute nafu undo afu, anga si taata fu boro ni dihe kugume te. Nirengo, si naye aye na “rungo” fu boro ti kura aregbo. (AEbere 12:6, 11) Ono, wa vura duhe wo, ka ani “gi rugapai,” ani rengbe arengba ka mbakadapai dagbarani na Yekova. (Asanza 8:33) Tipa ani rengbe kaa gbia ngbarago kindi be ga Yekova maku nga gu naye be gako toro, ani du wa ka ani di arugute kugume na ki mangipai tipa Mbori idi na gaani pai.

Ka Oni Moinga Bangironi Kuti gu Ũkumuko Nago Niipo Ya

15. (a) Rogo gini agene bete aboro amangasunge na gayo aũkumuko? (b) Wai Davide aida ka mangasunge na gako kumuko?

¹⁵ Anga pai ho nayugo gupai nga, ga Davide aborokporo angia agu aboro payo adu kuari watadu i angia kumukokumuko aboro te. Ono tie, ti regbo gako zogarago, Davide agbia aũkumuko nibakerehe gbe. A wa ini oni he, dungu aboro nababeemba gayo aũkumuko, kini gbata gene ka kiisiho rogo gu mangaapai nga ga ngbaduse, watadu kini mangisunge nani nikina ringi. Gu kura aboro namangasunge na gayo amarã tipa ka taasapa rimoyo. (Matayo 6:2) Davide amangisunge na gako ũkumuko tigako ngba gu gene nadukia. Ko aduna nyemu ka fu irisa fu Yekova. Ko aya fu Natana wee ko aduna nyemu ka dua yekaru fu Yekova tipa ka maa gu sanduki nangia ga mokido tiihe, nga gu sanduki nadu ti gu regbo re Yerusarema yo ‘kini raki kina tii bamburokoo yo.’ Rago angba ti Yekova na gu nyemupai nadu ti Davide re, ono ko aya tie fu Davide rogo Natana yo wee wiri Davide nga Soromo, ko nikangia gu boro nika dua gu yekaru re.—2 Samuere 7:1, 2, 12, 13.

16. Gini mbakadatise Davide amangihe tipa dua yekaru?

¹⁶ Davide adungura aũdua bambu tipa gi bakere sunge dua bambu re. Ko aya fu Soromo wee: “Mi mbakadi ahe tipa ga Yekova bambu wa taranda dahabu 100,000, na taranda feda wa mirioni sa; na sirigi na marã ki susi geda barõaha, bambiko si adu adu kpaima; mi mbakadi gbakigbaki ngua na ambia a. Mo arengba ka maa gu ku ri he a.” Dagba kina boro gako aũkumuko, ko afu ataranda nga ga dahabu 3,000 na ataranda nga ga feda 7,000.a (1 Pekapai 22:14; 29:3, 4) Anga ga Davide weneringise rogo gamaahe angia rekangose te ono si angia yuguyugu gako idapase na ka yugo gako nyemuse tipa Yekova Mbori. Fuo ino ko pa gu Boro gako aũkumuko aenge yo du ni ni, ko aya fu Yekova wee: “Ahe dunduko naye kina be ro, kina dagba gamo ahe yo ani afu he ni foro.” (1 Pekapai 29:14) Gu ngbadu Davide yo nahi be weneringise, si afõko ko mangi agu apai dunduko ko arengbe ka mangaha tipa ka zugosi ziazia irisombori.

17. Ginipai si aida kumukokumuko aboro gbiati rungorungo aboro mangihe na agu arugute du rogo 1 Timoteo 6:17-19?

¹⁷ Teketeke wa kina gure a, ani manginga sunge na gaani ahe rogo manga weneapai. Kuba gupai nga ani naaraka gu raka nga ga orafuo aũzegino, gupai ngbaa nga, ani gbata gene ka manga gupai nika sa Mbori ko idi na gaani apai, si nga gu gene nga ga ndikidi tatamana gbiati ngbarago. Pauro akepai ki yaa: “Mo nirugu agu aboro aruga nakumuko rogo gi zegino re, ka i énde nga ya, ka i mói nga bangiriyo ti ũkumuko wa si nago ni ipo . . . ya, ono koyo du Mbori ni nafu ahe fu rani u au ani ngi mbiko ho. I mángi gu pai ngba angba, i kumuko na wene mangaapai, i só gima fu he, rago ki ngba angba ti yo sa fuka ha. I naiga wene nyanyaki he fu kina yo sa gu rago nikaye yo, i nye anye na gu unga nga ndikidi unga.” (1 Timoteo 6:17-19) Ka kina gini apai nga ga mosoro vura du tipa rani, ani kido kina kuti ga Mbori toro na kini raki gu raka nika sa rani ni ‘airakumuko fu Mbori.’ (Ruka 12:21) Anga pai ho kiipaha kisusi pa ru ani gigirii barabangiri gu Barani du ngbangbaturũ yo te.

Oni Mbakadipa Tironi Bangiri Mbori

18. Rogo gini gene Davide amoi wene kpiapai fu aKristano?

¹⁸ Rogo ga Davide raka naabaha, ko anagbata gene ka manga kina agu apai nika ngba ti Yekova. Rogo bia sa ko abihe, ko ayaa: “Ako Mbori, mo íni pai fere, mo íni pai fere, bambiko mbisimore fu tihe ku be ro.” (Atambuahe 57:1) Gako kido kuti Yekova adunga gbua te. Davide asono ki gbinza, fuo ‘susa dungu agarã.’ (1 Pekapai 23:1) Wa Davide avura manga kere ingaapai, i natingida pako ni boro sa dagba gu ga Mbori adezire nayugu bakere idapase.—AEbere 11:32.

19. Wai rengbe ani ka mbakadapa tirani bangiri Mbori?

¹⁹ Wa oni asusa rogo agu apai na’ariatihe rogo gaoni raka, oni tingidi gupai nga, a wa kina gu Yekova asongodi Davide, ki nyakasi ko, na ki rugu ko, Yekova rengbe ka manga kina gu bangisa apai re a tipa roni. Gu mokedi nangia Pauro, wa kina Davide, agbia tiko a na dungu a’ariapai rogo gako raka. Wa si avura du wo, ko anye niruru ko kindi nikido kina kuti ga Mbori toro. Ko akepai ki yaa: “Mi . . . na manga apai dunduko rogo gu ko nanyakasa re.” (AFiripoio 4:12, 13) Ka ani kido kuti Yekova, ko aundo rani aundo ani du na diabese. Ko naida aida ani du na diabese. Ka ani degeturani kutiko na ki mbedi na ko, ko afu gu ome afu fu rani ani aidaha tipa ka manga gupai ko akpinyemuhe. Na ka ani nye kindi kaa kido kina kuti ga Mbori toro, ani rengbe arengba ka ‘mbakadapa tirani bangiri Mbori’ wa du rago re na nyeanye kindi kumbatayo.—2 Timoteo 2:15.

[Gu rukutu kekeapai du bandu kpewaraga yo]

Gaoni Karagapai Nga Gine?

• Wai rengbe ani ka bandatirani be rukoo?

• Tipagine si aidanga ti ni ani iribape rani ya?

• Gini bipai tipa arugute si aida ani du nani?

• Tipagine si aida ti ni ani kido kuti Mbori angianga kuti aũkumuko ya?

[Gu kpiahe du ti kpewaraga 28]

Davide akido kuti ga Mbori toro na kini gbata gene ka manga kina agu apai nika ngba ti Yekova. Oni namanga kina gu bangisapai re?

[Gu kpiahe du ti kpewaraga 30]

Davide akido kuti ga Mbori toro na kini gbata gene ka manga kina agu apai nika ngba ti Yekova. Oni namanga kina gu bangisapai re?

[Gu kpiahe du ti kpewaraga 31]

“Ahe dunduko naye kina be ro, kina dagba gamo ahe yo ani afu he ni foro”