Yekova Nga Gaani “Nyanyaki Gbata Ti Rago Fudifudipai”
“Ga ruru aboro bata si aye be Yekova; ko nga gayo nyanyaki gbata ti rago fudifudipai.”—ATAMBUAHE 37:39.
1, 2. (a) Gine Yesu akparikpee tipaha tipa gako abawiriki? (b) Gine nga gupai Mbori akpinyemuhe tipa gako aboro auru kpotosende?
YEKOVA nga gu boro duna tanduapai dũ. Ko na ome beko ka banda gu ruru aboro nga airisiko ngba gu gene ka ko aidaha. Ko rengbe arengba ka rogoda gako aboro ki kparayo kusayo ti kura aboro rogo zegino ki moi yo rogo gu ba du zezeredii ka pai afudanga yo rogoho ya. Ono tie, nibi gupai nadu tipa ga Yesu abawiriki, ko akparikpee fu Bako du ngbangbaturũ yo ki yaa: “Mi akpara nga foro mo rogo yo aroga zegino te, ono mo ka aka kuti yo ti gbegberẽ ko.”—Yoane 17:15.
2 Yekova asia gupai nga, ko aidanga ka ‘roga rani kusayo rogo zegino’ te. Kuba gupai nga ko rogo rani kusayo rogo zegino, gupai ko akpinyemuhe nga ani raki kina dagba aboro-zegino tipa ka takapande gu gako pangbangaa fuyo nafu maabangirise gbiati wasa. (ARomo 10:13-15) Ono a wa tiiworo ga Yesu kpee ayugoho, wa ani araka rogo gi zegino re, du ani adu gbaiga fu gu sogote nga ga “gbegbere ko.” Abasasangbaa gbiati rimbasa gbigbita atoro, i naye na bakere ima gbiati arungo fu aboro, na anga he ho nabanda aKristano be yo te.—1 Petero 5:9.
3. Zavura agu aboro nairisa Yekova du niruru yo, ginipai i ka enga gbia tiyo ti ni ya, ono gini afugo wasa ani agbiaha rogo Fugo Mbori?
3 Ho du aboro ni rogo ngbatunga agu asada re, si nisino aboro kpotoyo yo zere tipa regbo ngbutuko. (Asanza 24:10) Gu keke-keke apangbangaa du rogo Ziazia Kekeapai, si na dungu apangbangaa rogoho tipa gu fudifudiapai namangi ruru aboro. Fugo bake papara Atambuahe nayaa: ‘Gbigbitapai namanga ruru boro nibadunguhe; ono Yekova nabatasa ni abatasa behe dunduko.’ (Atambuahe 34:19) Ii, gbegbereapai namanga aboro amanga zavura aguyo nga ‘ruru yo’ a. Wa kina gu bake papara Atambuahe nangia Davide, ani ti kura aregbo ‘narungbura arungbura be apai na ki mbu behe gbe.’ (Atambuahe 38:8) Ono, wa vura duhe wo, si nipa wasa ka ino gupai nga, ‘Yekova mbembedii na agu aboro du kpotoyo yo na rungo, kini batasi aguyo toroyo aima be ingapai.’—Atambuahe 34:18; 94:19.
4, 5. (a) Na ngbanyaa kuti Asanza 18:10, ginipai si aida ani mangihe tipa Mbori ki rengbe ka banda rani? (b) Gine nga gu bete kparakparaapai rengbe ani ka mangaha tipa Mbori rengbe ka undo rani?
4 Na ngbanyaa kuti ga Yesu kparakpee, Yekova nasinziri rago asinziri pati rani nirengo. Ko nga ‘gaani nyanyaki gbata ti rago fudifudipai.’ (Atambuahe 37:39) Gu buku nga Asanza nafura wa kina gure ho si ayani wee: “Rimo Yekova nga nyanyaki tumbatumba gbata [“ngbaõbambu,” NW]; ruru boro naora koyo ki du zezeredi.” (Asanza 18:10) Gi veresi re nayugo gu bambata rengo nga, Yekova nangera angera na nyemuse fuo agu aboro ko akusi yo. Agu aboro Mbori abanda yo gbe i nga gu ruru aboro nagbata ko zaaza, si kidu wa i naora kutii nyanyaki ngbaõbambu yo tipa ka gbu yo.
5 Wai rengbe ani ka ora fuo Yekova tipa ko banda rani ho du ani ni rogo fudifudiapai? Ani wisiginga nyanyakipa apai biata ti genehe nga gu rengbe ani ka mangaha tipa ka gbia undo be Yekova. Nibambatapai, ani du wa ka ani aria tirani rogo kparakpee koyo du ko ni nga gu Barani du ngbangbaturũ yo. Niuepai, si naida ani mangipai na ngbanyaa kuti agu arugute nga ga gako ziazia toro. Nibiatapai, si naida ani ra fu gako mbakadapai nigbata ani gene kaa kodatirani na akuarani aKristano nga agu aboro rengbe ka zeresa ngba gu fudifudiapai du ani rogoho.
Gu Ome Nga ga Kparakpee
6. Wai ndikidi aKristano abi kparakpee?
6 Gu kura abangbasia rogo agu apai du tipa wasa kpotose nafu berã ya kparakpee nga ziga tipa bakere gberarago gbiati fuda berã. Wa vura duhe nirengo nga, ho boro aberã ni kuriipai kukiri wa ni nakparakpee akpara, gipai re rengbe ka zeresa gu fudifudi berã du ni nani, woro ahe kinaho rogo zegino rengbe arengba ka manga kina gu bangisapai re a, watadu wega boro gii kurani yo na beni. Sidu, ndikidi aKristano aumbasinga pa kparakpee kini bihe wa kina kungbo ziga gbua tipa fu ngbarago fu berã te. Ani nabi kparakpee nigu fugo irisa ani afura nani dagbarani na Bakusiahe. Ga boro kparakpee nakodapa gani ranigose fu Mbori na pa gani kido kutiko. Ii, kparakpee nga papara gaani irisombori.
7. Pa kpara ani kpee kidu na kido tipa agu apai ani akparakpee tipaha nayugo ginipai, na wai ngbatunga agu akpee re aundo rani ani dibe fudifudiapai?
7 Si naida gaani akpee yugu gupai nga, ani nakido akido kuti Yekova. Gu mokedi nangia Yoane akepai ki yaa: “Mbiko gere ani rengbe ka du zukazuka fu ko [“ani na kido,” NW], nga, ani ini ka ani ho gu he ku sangba gako nyemuhe yo, ko gi pa rani agia.” (1 Yoane 5:14) Yekova, nga Bakerepa Boro Kisusi, nga gu bangisa Mbori duna Tanduapai dũ, namaaberã ko amaa nirengo ngba kparakpara gene kuti gu kakaka akpee airisiko afuhe fuko. Kina berẽberẽ gupai gbua nga gaani Mbori nga boro nyemuse nagia rani agia ho ani agumbapa gaani abakabangirise ni fuko na pa gu kpakarakpakarapai du ani rogoho, si nafu wasa afu fu rani nirengo.—AFiripoio 4:6.
8. Tipagine si aidanga ti ni ruru aKristano mangi zee watadu ka bi tiyo wa rẽnga yo te ho i akparakpee ni fu Yekova wa gu sa ya?
8 Ho ruru aKristano akparakpee ni fu Yekova, si aidanga zee naamanga yo, i kini bi tiyo ya rẽnga yo te, watadu ki zanga du na kido kutiko te. Rengo ngaha nga, ho du ani ni na gberarago tirani watadu ho ome fudifudiapai afu ni rii omerani, si rengbe kadu nga ani adunga dedede na nyemu ka kparakpee fu Yekova te. Ti ngbatunga agu aregbo re, si naida ani tingidi gupai nga, Yekova ‘na nunga gu gako aboro tiko i arungosi yo’ na kini fu ‘wasa fu agu aboro narungo.’ (Yesaya 49:13; 2 AKorindo 7:6) Gu regbo gbe si aida ani aria tirani kini kido koyo du gu Barani ni du ngbangbaturũ yo, du fu rani nigaani bagbuko, si nga regbo rungo gbiati regbo fudifudiapai.
9. Gine idapase amangaha rogo mbedisa rani na Mbori rogo kparakpee fuko?
9 Tipa ani rengbe ka gbia undo bakere gbe be kparakpee, si naida ani du na ndikidi idapase. Ziazia Kekeapai nayawee ‘gu boro naye koyo du Mbori ni gani pai nga ida ya Mbori kinaho, na ko nafu mosoro afu fu agu aboro nagbata ko.’ (AEbere 11:6) Idapase naida kura apai susi gu gbua nga ka ida ya unga Mbori “kina ho” ti ni. Ndikidi idapase nakoda nyanyaki ida kuti ga Mbori tandu na kuti gu nyemupai du tiko ka fu mosoro fu rani tipa gaani raka nga ga giasangbako. “Bangiri Gbia du fuo ruru aboro, na tuko ni haha ha tipa gayo akpe.” (1 Petero 3:12) Pa ruga ani tirani zanga piriga na gupai nga, Yekova nangera angera fuo rani rogo nyemuse, nasa gaani akpee si du kia ti ga gu kura aboro.
10. Wai si aida gaani akpee du nzunzu ka ani aida Yekova banda rani rogo toroyo?
10 Yekova nadegatuko adega kuti gaani akpee ho ani afuhe ni na ngbaduraniyo dunduko. Bake papara Atambuahe akepai ki yaa: “Ako Yekova, mi nakpara foro na kpotore yo dunduko; mo karaga pai fere.” (Atambuahe 119:145) Gu gaani akpee ani afuhe, si wa gu kungbo akpee nga ga vugahe aboro adogoda gumbaha watadu i agumbaha zanga nyemuhe du ngbaduyo yo wa gu duhe rogo kura apambori te. Ho ani akpara ni fu Yekova na ‘kpotoraniyo dunduko,’ ani nagumba agu afugo duna rogoyo ti ni na nduhe a. Fuo kpara ani ngbatunga gu kakaka akpee re, ani natona ka bi gu zereda naye fu rani mbiko bafa ani gaani ‘atindiro ku auru Yekova.’ A wa Ziazia Kekeapai akidohe, ‘ko asongoda rani asongoda.’—Atambuahe 55:22; 1 Petero 5:6, 7.
Ga Mbori Toro Nga Gaani Moundo
11. Gine nga gene sa dagba agu akuraha Yekova akaragapai ngbaha fu rani ho ani ‘anye ni kindi kuti sana’ ko tipa undo?
11 Anga Yekova gbua nga kina Bagi akparakpee sa te, ono ko a nga Bakaragapai sa akparakpee. (Atambuahe 65:2) Davide akepai ki yaa: “Rago gi fudifudipai mi akpara fu kina ro, bambiko mo akaraga pai fere.” (Atambuahe 86:7) Na ngbanyaa kuti gipai re, Yesu angarasi gako abawiriki i ‘nye kindi kuti sana’ Yekova tipa undo, mbiko ko nga ‘gu Bayo du ngbangbaturũ yo’ nika “gama Ziazia Toro [agama] fu agu yo nasana ko” tipaha. (Ruka 11:9-13) Ii, ga Mbori zaaza ome namangasunge wa moundo, watadu bafu-wasa fu gako aboro.—Yoane 14:16.
12. Wai rengbe ga Mbori toro ka undo rani ho si awira ni wa ome apai ima fu rii omerani?
12 Zavura ho du ani ni rogo asada, ga Mbori toro rengbe arengba ka hiisa rani na “gu bakere tandu susi.” (2 AKorindo 4:7) Gu mokedi nangia Pauro, nga gu boro nahi dungu fudifudiapai, afura na kido ki yaa: “Mi rengbe na manga apai dunduko rogo gu ko nanyakasa re.” (AFiripoio 4:13) Teketeke wa kina gure a, dungu aKristano areme ima makia gupai nga, i azambua rogo toroyo na ome ki ye ku ngbaduyo yo nisangbana karaga Mbori pai fuyo kuti gayo akpee. Dedede, ome kpakarakpakaraapai naawiranga si nika fu rii omerani fuo gbia ani gu undo nga ga ga Mbori toro te. Bambiko gi ga Mbori ome ko afuhe re, ani rengbe arengba ka fura wa kina gu mokedi re ki yaa: “I nagbisa rani kirikiri ono i adingisa nga rani te; pai nagasa rani ono si adia nga be rani te; i nado rani [“i narungosi rani,” NW] ono ani ni sa rani te; i nabafa rani ono i agbarasa nga rani te.”—2 AKorindo 4:8, 9.
13, 14. (a) Wai Yekova nayugu gupai nga, ko nga gaani nyanyaki bagbuko rogo keke Fugo ko? (b) Wai pa manga oni agu arugute nga ga Ziazia Kekeapai adunga ngburungburu ya aundo kina boro oni nitironi?
13 Ga Mbori toro adu a kugiipa ke fugo ko na ki bandaha tipa si undo rani. Wai Yekova nayugu gupai rogo Fugo ko yo nga, ko nga gaani nyanyaki bagbuko ti regbo fudifudiapai? Gene sa dagba agu akuraha nga ka fu wene tatamana gbiati tandu berãpai fu rani. (Asanza 3:21-24) Ziazia Kekeapai naraba gaani tandu berãpai na kini mbakadi gu gaani ome nga ga wisigopai berãse yo. (ARomo 12:1) Rogo geda Fugo Mbori dedede na wisigoho, kodihe kuti manga gupai ani awirikaha, ani rengbe kadu na “aome nga ga makiapai nimanga [ani] sunge nani tipa ka kpara rurupai kusayo ti irairapai.” (AEbere 5:14, NW) Oni nitironi vura ka ino pa gu regbo agu arugute nga ga Ziazia Kekeapai adunga ngburungburu ya, aundo roni oni mangi agu adiaberã nga ga tatamana ho oni aduni rogo fudifudiapai. Ziazia Kekeapai nafu gu tatamana fu rani rengbe ka undo rani ani gbia wene aziga tipa gu fudifudiapai du ani rogoho.—Asanza 1:4.
14 Fugo Mbori nafu gu kura mburu ome fu rani, nga gu maabangirise nga ga bata. (ARomo 15:4) Ziazia Kekeapai naya fu rani wee gbegbereapai anyenga anye kaa manga kindi te. Ngbatunga agu agberangbii dunduko ani arungo behe, si gbua tipa regbo ngbutuko. (2 AKorindo 4:16-18) Ani na “[maa]bangirise tipa nyenye unga, nga gu Mbori, arengba nga na re zire ya, akido pa ha mbata rago nikaenga.” (Tito 1:2) Ka ani du na ngbarago rogo gu maabangirise re, na kini rugutirani ti aregbo dunduko na pa gu wene raka du kumbatayo Yekova nakido rani tipaha re, ani rengbe arengba ka hi agberangbii.—ARomo 12:12; 1 ATesaroniko 1:3.
Dungurati Nga Yuguyugu ga Mbori Nyemuse
15. Wai rengbe aKristano kadu ni undo fu akurayo?
15 Gu kura mbakadapai be Yekova nga gu rengbe ka undo rani ti regbo fudifudiapai, si nga gu kodatise na akuarani ani agbia ngbarago behe rogo gu dungurati nga ga aKristano. Ziazia Kekeapai nayaa: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.” (Asanza 17:17) Fugo Mbori nangarasa agu aboro dunduko du rogo dungurati i fu irisa dagbayo na kini kpinyemu tiyo. (ARomo 12:10) Gu mokedi nangia Pauro akepai ki yaa: “Ka boro gbáta nga gani he ya, ono gu ngba fu kurani.” (1 AKorindo 10:24) Padu ani na ngbatunga gu sino re rengbe ka undo rani ani moiberã rani fuo agu azingo nga ga akuarani angianga fuo agu a’asada du ani rogoho ya. Ho ani afu tirani ni ka undo kura aboro, anga kina undo gbua ani afuhe fuyo sa te, ono ani nagbia ngbarago a be undo yo na si kini fu ome fu rani ani kini rengbe ka hi agu apai nafuda rani.—Amokedi 20:35.
16. Wai rengbe aKristano nibasasa kadu ni agu aboro nangarasa akurayo?
16 Agu akumba gbiati adee ima nyaka rogo toroyo rengbe arengba ka manga nyanyakipa sunge rogo nyakasa akurayo. Tipa i rengbe ka mangaha wo, i nambakada asinoyo tipa ka aboro adunga dindikodindiko tipa ka ndu fuo yo ya na i adekanga be awirinayo a te. (2 AKorindo 6:11-13) Dungurati nagbia undo agbia nirengo ti agu aregbo agu aboro dunduko du rogoho abi regbo tipa ka tambua rukutu agude ti ni, tipa ka sonosa vovo aidipase, na ka ngarasa agu aboro duna gberarago tiyo. (ARomo 15:7) Gu nyemu awirinarani du tirani nika undo rani a ani ne kapa kuti akuarani. Si aidanga ani ipisi tirani ka dakuti gu digisopai nga, padu wirinarani rogo kpakarakpakaraapai nayugo gupai nga ni nirurungbura ni rogo toroyo te . Si aruaru wa Pauro anyakasi gupai fu akurako aKristano nga, i ‘songodi aguyo rungbura.’ (1 ATesaroniko 5:14) Ziazia Kekeapai nayugo gupai nga, zavura ruru aKristano, i nagbiatiyo agbia na fudifudiapai.—Amokedi 14:15.
17. Gini amamu duho berani ka nyakasa gu gaani kodatise dagbarani nga ga aKristano?
17 Agu adunguratise nga ga aKristano nafu bawene mamu fu rani ani fu wasa fu akuarani na ka ngarasa tirani dagbarani. (AEbere 10:24, 25) Gi mangapai dagbase nga ga nyemuse re adiganga kina kuti regbo agu dunguratise nga ga dungurati sa te. Kuba gure, ga Mbori aboro nagbata amamu a kadu na wene kodatise dagbayo na akurayo ti kura kungba aregbo tipa kaa fura dagbayo. Ho ka fudifudiapai kuru ni, ani aguari zanga keesa ka undo tirani dagbarani mbiko ani aima sigira gu pabakure du dagbarani si ki nyaki. Gu mokedi nangia Pauro akepai ki yaa: “Ka kparaka du nga rogo kpotoboro ya; ono apaha banda tihe abanda dagba ha wa sa. Watadu gu paha ki hi pai, kura apaha ki hi pai na ni dunduko, na i irisi gu paha sa, kura apaha ki ngi angi na ni dunduko.”—1 AKorindo 12:25, 26.
18. Gini bipai si aida ani sovura kuti ni ho du ani ni na gberarago tirani?
18 Ti kura aregbo, si rengbe kadu nga ani na bakere gberarago tirani, ani ki bihe ya ani arengbanga ka gbia ngbarago be kodatise na akuarani aKristano te. Si naida ani sovura kuti ngbatunga agu aberã re tipa ka ani abengetanga tirani na gu wasa gbiati undo rengbe akuarani aidipase ka fuhe ya. Ziazia Kekeapai nafu rugute fu rani niyaa: “Gu ni nakpara tini nagbata kina gu pai ni akpi nyemu he, ka zinga kuti gu bawenepai nga ga sarangbanga dunduko.” (Asanza 18:1) Awirinarani ni agu aboro Mbori nafu yo fu rani ka yugo gupai na yo nga ko nangera angera fuo rani. Ka ani idipa gu mbakadapai ko amangihe rogo nyemuse re, ani agbia undo agbia ti regbo fudifudiapai.
Oni Kakuti Wene Maabangirise Kindi
19, 20. Wai Ziazia Kekeapai aundo rani ani do gbegbere aberã kusayo rirani yo?
19 Ho kpoto boro yo azera ni na ni kidu na gberarago tini, si taata gbegbere aberã tona kaa ye ku rini yo. Nikpiapai, ho du aboro ni na gberango tiyo, beteyo rengbe ka tona kaa kapa singia nyaki yo anyaka rogo toro ke, kini dakuti gu digisopai nga, ga Mbori mbusa du nga gi kerepai kuru sa yo re. Ono tie, oni tingidi gupai nga, Yekova a’asadanga boro “na gbegberẽpai te.” (Yakoba 1:13) Ziazia Kekeapai nayaa: “[Mbori] arungosi nga awiri aboro mbiko nyemuhe du ti ko te, watadu fu rungo fu yo a te.” (Abia Kpenunga 3:33) Kuba gure, Yekova na bakere gberarago tiko ho gako amoyambu arungo ni.—Yesaya 63:8, 9; Zekaraya 2:8.
20 Yekova nga “Ba inaapai, nga Mbori wasa dunduko.” (2 AKorindo 1:3) Ko nangera angera fuo rani na ko atumbapa rani atumba kuari ti gako regbo. (1 Petero 5:6, 7) Pa maa ani gupai zanga piriga ku berã rani yo nga, Mbori nakpinyemu rani akpi nika undo rani ani du na ruru bipai na kini ngi a. Yakoba akepai ki yaa: “Awirinami, ho dungu ngbatunga asada ka ye ni fuo roni, oni ki sa ha ni kina ngbarago dũ.” (Yakoba 1:2) Tipagine? Ko akaragapai ki yaa: “Maku du fu gu boro naru nyanyaki rogo asada, bambiko ho i ka bi gani pai ni si rengbe, i afu gu kpakpari unga fu ni, Gbia akido he tipa ha fu agu yo nakpi nyemu ko.”—Yakoba 1:12.
21. Zanga bipa gu kpakarakpakaraapai du ani rogoho, gini ngbaanga Mbori afuhe fu agu aboro nye niruru yo fuko?
21 A wa Yesu aza rani, ani nagbia tirani agbia na agberangbii rogo zegino. (Yoane 16:33) Ono Ziazia Kekeapai nakido rani ya “rungo, nunga, rungosi, gberãngbi, du kundiri, du ngbapai,” si arengbanga ka kpara rani kusayo ti ga Yekova nyemuse na ti gu nyemuse nga ga Wiriko te. (ARomo 8:35, 39) Nga gu wasa du ani na ni ka ino gupai nga, agu agberango dunduko du ani rogoho, si gbua tipa regbo ngbutuko! Wa du rago re, baraho ani apido gu regbo ni agu arungo namanga aboro nika digo ti ni, Yekova, nga gu Barani nga boro nyemuse, nasinziri rago asinziri pati rani. Ka ani oro koyo du ko ni tipa ko banda rani, ko aduadu fu rani wa “sosono kirikiri gbata . . . tipa agu aboro i namanga yo, ni sosono kirikiri gbata ti rago fudifudipai.”—Atambuahe 9:9.
Ginipai Wiriki Ani He?
• Ginipai si aida aKristano moibangiriyo tipaha baraho i araka ni rogo gi zegino nga ga ingapai re?
• Wai gaani kakaka kpee narengbe ka nyakasa rani ho du ani ni rogo fudifudiapai?
• Wai du ga Mbori toro nimoundo?
• Ginipai rengbe ani ka mangaha ka undo tirani dagbarani?
[Gu kpiahe du ti kpewaraga 15]
Si naida ani gbata Yekova si kidu wa ani naora kutii nyanyaki ngbaõbambu yo
[Gu kpiahe du ti kpewaraga 16]
Agu aboro ima nyaka rogo toroyo, i namangasunge na agu amamu dunduko nakura fuyo tipa ka tambua kura aboro na ka ngarasa yo