Yekova Nabatasa Agu Aboro Du Rogo Arungosi

“Gbigbitapai namanga ruru boro ngenge; ono Yekova nabatasa ni be he dunduko.”—ATAMBUAHE 34:19.

1, 2. Ginipai naafuda kura ruru Kristano sa, na tipagine gupai namangi ri re narengbe arengba ti ni ka manga rani?

GU PARANGA dee du rimori nga Keikoa aima du nga Dezire Yekova tipa agarã susi 20. Ri amangisunge ninazakigene tipa bete regbo, watadu ninatakipande Kindo ti aregbo dũ. Ri anaabi gu sunge re na kikiipaha bakere gbe. Ono tie bambeda kusayo, pa zanga Keiko du na maabangirise gbiati sungo nisase afu bakere gberarago furi. Ri nayaa: “Gupai mi aamangaha gbua nga kaa kpara niʹaume.” Tipa ka diabe gari gbegbere aberã, ri adi regbo tipa kaa wisigopai nisari. Ri nayaa: ‘Wa si avura duwo, mi arengbanga ka mbakada gupai nadu tipa re re te. Si andu na mi ki da ti gupai nga mi duna nyemu ka kpi kusendeyo.’

² Ya mo oni asotangaa na aberã wa gure? Nidu oni nga boro sa dagba aDezire Yekova, oni na badungu nduapai beroni kadu na ngbarago bambiko sinombori “[nafu] gu kidohe nga ga gu unga du awere, na gu nikaye.” (1 Timoteo 4:8) Kina boro awere, oni rogo gu paradizo nga ga toro! Ono tie, ya mo si nayugo gupai nga oni nibandabanda roni be arungosi? Wagusa te! Ziazia Kekeapai nayaa: “Gbigbitapai namanga ruru boro ngenge.” (Atambuahe 34:19) Gipai re airiwonga tirani te, bambiko “zegino dunduko du ni zogozogo ho be gbegberẽ ko,” nga Satana Bakitingbanga. (1 Yoane 5:19) Singia nibetehe watadu bakere gbe, ani dunduko nagbia tirani agbia na arungosi.—AEfeso 6:12.

Asangbana Arungosi

3. Oni funga gu kpiapai nga ga Ziazia Kekeapai tipa gu ga Mbori amoyambu nagbiatiyo na arungosi.

³ Kakaka rungosi rengbe arengba ka gbarasapa gu maabangirise du boro nani rogo raka yo. (Asanza 15:15) Ani wisiginga gupai nadu tipa gu ruru kumba nangia Eyobo. Ho Eyobo aduni rogo kere arungosi, ko ayaa: “Gu boro de avungu ni gani arame ni kina guru he gbua, ki hi ahi be fudifudipai.” (Eyobo 14:1) Ga Eyobo ngbarago aima go kusayo tiko. Tipa bete regbo, ko aberẽ gupai a nga Yekova aima gindigo ko. (Eyobo 29:1-5) Anga kina Eyobo sa nga gu ga Mbori moyambu kereapai agbia ni te. Ziazia Kekeapai naya furani wee Ana aduna “imisiri ngbaduse” mbiko wa ri angia irazangada. (1 Samuere 1:9-11) Fuo gbera gu ramukporo nangia ga Yisaka, Rebeka nangia diako ayaa: “Omere bati.” (Bambata Pai 27:46) Wa Davide aaberãkurii gu irairaapai ko amangihe, ko ayaa: “Mi nakpara kpenunga na uru pitipiti.” (Atambuahe 38:6) Gi bete akpiapai re nayugo gupai ziazia nga, agu akumba gbiati adee nanaagunde ti Mbori mbata fu rago aKristano, i ahi kere arungosi ahi.

4. Tipagine si airiwonga ti ni tirani ka bi gupai nga ‘agu aboro narungo,’ i kinaho dagba aKristano areme ya?

⁴ Ginipai tipa aKristano tigayo? Gu mokedi nangia Pauro abihe nga si adaada ko ngarasi aTesaroniko i “nyakasi agu aboro narungo.” (1 ATesaroniko 5:14, NW) Buku sa nayawee gu fugo Giriki i asaha nga ‘agu aboro narungo,’ si rengbe kadu tipa “agu aboro ome arungosi nafu riyo tipa bete regbo.” Afugo Pauro nayugo gupai nga, bete mbedimbedi aKristano rogo gu dungurati nadu Tesaronike yo re aduna gberarago tiyo. AKristano kinaho areme a duna bakere gberarago tiyo. Ono tipagine du yo ti ni na bakere gberarago tiyo? Ani wisiginga anduhe biata nga gu ninaamanga dedede.

Gaani Zangarengba Rengbe Arengba ka Fuda Rani

5, 6. Gini afugo wasa rengbe ani ka gbiaha rogo ARomo 7:22-25?

⁵ Si naimisa ndikidi aKristano wa i aino gupai nga kpakpa aboro nga yo. Anga i wa gu kura aboro ‘susi ba ino pa wasiro’ te. (AEfeso 4:19) I rengbe kadu na berã wa kinagu nadu ti Pauro, nga guko nakepai ki yaa: “Rago nangba ti re na ga Mbori rugute ku kpotore yo. Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo.” Fuo gure, ko apoi kuari ki yaa: “Ako, rungorungo boro nga mi!”—ARomo 7:22-24.

⁶ Ya mo oni aberẽnga wa gu Pauro aberẽ? Anga si nga irairapai furoni tipa oni rugutironi naapa gaoni zangarengba te, mbiko si rengbe ka nyakasapa wai gberẽ guhe nga ingapai na ki nyakasi roni tipa oni diberã ka ne manga gbegberepai. Ono tie, si aidanga oni nye kaa ako tipa gu irairaapai oni amangaha te. Pauro adigisi agu afugoko nadu tipa arungosi re na agu afugo nga: “Mi natambua Mbori mbiko Yesu Kristo gaani Gbia.” (ARomo 7:25) Ii, Pauro aduna kido ya gu kure Yesu nauka, si rengbe arengba ka batasa ko be gu ingapai ko adihe nigako ũkumbo.—ARomo 5:18.

7. Gine rengbe ka undo boro ka rago gberenga tini tipa gu nyemu manga ingapai du tini ya?

⁷ Kangia gaoni zangarengba ima fu rii omeroni, oni duna wasa mbiko afugo gu mokedi nangia Yoane, nga guko nakepai ki yaa: “Ka boro ingi pai, Azarõ be rani yo du Mbori ni nga Ba nga Yesu Kristo, nga ruru boro. Ko nga motumo gaani ingaapai; tipa gaani sa te, tipa zegino a dunduko.” (1 Yoane 2:1, 2) Kangia gu nyemu manga ingapai du tironi nafu kina gberarago furoni, oni naatingida gupai dedede nga, Yesu akpi tipa aboro ingapai, angianga tipa ruru aboro ya. Ka pe rengo, “aboro aingi ainga dũ, ki ti bungudu ti ga Mbori taarimo.”—ARomo 3:23; gu kekeapai du nibibirihe na nikikindigihe re, ani du kehe wo.

8, 9. Tipagine si aida ti ni ani sogo agu aberã nga ga sarangbangaa tirani nisarani?

⁸ Nikpiapai, ani yawee oni amangi kere ingapai ti agu aregbo nadu kusayo. Zanga kapa, oni aima gumbaha fu Yekova rogo kpee yo, isoke oni avura nigumbaha dedede. Na oni aima gbia gu undo nga ga toro be agu aKristano nga abaakumba rogo dungurati. (Yakoba 5:14, 15) Oni aima sa gaoni berã nirengo, na si ki ta du were, oni ki nye kindi kina rogo dungurati. Watadu si adu nga oni aima mbu ga Mbori riigbu tipa bete regbo, ono kusa, oni ki sa gaoni berã na paroni ki se genehe rogo dungurati. Rogo agu abangiriba re dunduko, gu ingapai oni amangihe re rengbe arengba kaa ye kindi ku berã roni yo na kini fudi roni. Kangia gupai re nika manga, oni tingidi gupai nga, Yekova nambupai ambu “kpaima” fu agu aboro nasa gayo berã nirengo. (Yesaya 55:7) Kurii gure, ko aidanga oni berẽ gupai nga wiri sunge tironi berewe te te. Satana du naida oni berẽ wo. (2 AKorindo 2:7, 10, 11) Mbori nika imo Bakitingbanga aimo bambiko ko ima rẽ na kpio, ono ko naida oni naaberã ya oni ima rẽ a na kina gu bangisa sapangbangaa re. (Yugoti 20:10) Ka oni mbunga Satana ko dibe roni rogo gi gako birĩ re ka gbarasapa gaoni idapase ya. (AEfeso 6:11) Kuba gure, “oni ká fu ko ki ru nyanyaki” rogo gipai re, a wa oni amangaha rogo gu kura apai.—1 Petero 5:9.

⁹ Rogo Yugoti 12:10, i nayamba Satana nga “bakitingbanga awirinarani,” nga mbedimbedi aKristano. Ko ‘nakitangbaanga yo uru na yuru’ barabangiri Mbori. Pa berã oni kurii gu veresi re rengbe ka undo roni oni bi gupai nga, Satana, nga bakitingbanga aboro, ko na ngbarago tiko ka bi roni oni nisaringbangaa kuti roni nisaroni, si ki vura du nga Yekova amanganga ha wo te vurũ. (1 Yoane 3:19-22) Tipagine oni anye ti ni kuti imisa tironi riipa gaoni irairaapai ki da ti gupai nga oni naida ka mbu sovura kuti ingapai? Ka oni mbunga Satana ko gbarasipa gaoni pagume dagbaroni na Mbori ya. Ka oni mbunga Satana ko vurasi bangironi kuti gu rengo nga Yekova “na nunga aboro na undahe ti ko, du ni bayee ko tipa zinga, ki du na inapai kpaima na rengo” ya.—Gate 34:6.

Akpakarapai Rengbe Arengba ka Zeresa Kpotoraniyo

10. Rogo gini agene agu akpakarapai namanga rani narengbe ka zeresa kpotoraniyo?

¹⁰ Kpoto kura aKristano yo nazera mbiko agu apai i akpa ti mangaha rogo gayo sunge fu Mbori. Ya mo wo duhe tipa roni? Si rengbe kadu nga oni na kere kaza, gbinza, watadu kura apai nasa gupai nga ka oni dinga regbo nibakerehe kutingba sunge tungusapai wa gu oni anaamangaha mbata ya. Rengo ngaha nga, si naida aKristano ngbe regbo tipa ka mangasunge fu Mbori rogoho. (AEfeso 5:15, 16) Ginipai ka oni mangihe ka singia pai gudu kinaho nirengo naká na oni ti mangasunge tungusapai bakere gbe na si kini fudi roni afuda?

11. Wai rengbe gu ga Pauro arugute du nikekehe rogo AGaratio 6:4 ka undo rani?

¹¹ Ziazia Kekeapai nangarasa rani ka ani manginga nyomoro ya, ono ani ‘wiriki aguyo du ni adikumbo akidohe mbiko idapase na hipai.’ (AEbere 6:12) Ani rengbe ka manga gipai re kinaho sa ka ani wisigi gayo wene kpiapai ni na ki gbata gene kadu na idapase wa gayo. Ono tie, ka ani aaringbisa tirani na kura aboro na ki dakuti gupai nga, anga wiripai ho niwenehe rengbe ani ka mangaha te, ani gbianga undo te. Sidu tie, si naida ani mangi gu ga Pauro arugute nayaa: “Boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.”—AGaratio 6:4.

12. Tipagine si aida ti ni ani sambuo tirani tingba gu sunge ani amangaha fu Yekova?

¹² AKristano na wene ndupai beyo ka sambuo tiyo, zavura ho kere kaza asayo ni ka i mangingo agu apai i akpinyemu ka mangaha ya. Ziazia Kekeapai nakido rani kini yaa: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko.” (AEbere 6:10) Si rengbe kadu nga, agu apai du tipa roni, si ambunga roni oni naamanga apai wa gu oni anaamangaha mbata te. Ono tie, mbiko gu undo Yekova afuhe, oni rengbe arengba ka manga gu kura apapara gu sunge nga ga aKristano wenengai, ngbatunga gu duwa manga dezirepai rogo terefuni watadu rogo keka awaraga. Oni rengbe kadu naa kido ya Yekova Mbori afu maku afu furoni tipa gu gaoni sunge oni amangaha na ngbaduroniyo dunduko fuko na tipa gu nyemuse oni ayuguhe tipa ko na tipa akuaroni aboro.—Matayo 22:36-40.

“Gbegbere Aregbo” Rengbe Arengba ka Batasa Omerani

13, 14. (a) Rogo gini agene gi “gbegbere aregbo” re narengbe ka ye na arungosi furani? (b) Wai duhe areme ziazia nga aboro sa tiyo ni airasakparakpa?

¹³ Wa vura duhe nga ani na ngbarago ka raka rogo ga Mbori ruru vovo zegino, ono ani na gberarago awere mbiko ani naraka ti ‘gbegbere aregbo du nikpakarakpakaraha ka mangapai sani.’ (2 Timoteo 3:1, NW) Ani nagbia wasa be ino gupai nga gu fudifudiapai re nayugo gupai nga regbo batasa rani ima mbeda kada. Ono, wa vura duhe wo, agu apai du pati rani, si nafuda rani afuda. Ani dinga kpiapai sa, ka oni ngia gu boro abingo sunge-marã ya, ya mo si fudinga roni tee? Si rengbe kadu nga zingo sunge gu du adu, wa adiwi nikaa susa, oni rengbe kaa baka kina bangironi singia Yekova nabi gi kpakarapai du oni rogoho re ke watadu singia ko nagia gaoni akpee agia ke. Watadu boro ho amanganga furoni wenengai ya watadu mangi roni na irairapai. Zavura ho oni ageda riiapai ni rogo waraga pangbangaa, si rengbe ka fu kina gberarago furoni wa gupai nadu tipa Roto, nga guko “narungo arungo bakere” gbe be gu wasiwasi mangaapai nangia ga agu aboro nadu pati ko.—2 Petero 2:7.

¹⁴ Papara agu apai namanga rogo yangara arame kinaho si aidanga bangirani go ti ni ya. Ziazia Kekeapai aima fura tipaha kumbatayo ki yawee dungu aboro nikangia “airasakparakpa.” (2 Timoteo 3:3) Gu nyemuse nga ga agume, si berewe rogo dungu akporo te. Buku sa nayaa: ‘Gopai gu duho nayugo gupai nga, aboro narungo be gayo aborokporo susi gu i arungo be kura aboro. Kina gayo aborokporo naimo yo, nataka yo, na nakodaba naayo ngbaome. Gu ba ka i nikpinyemu aboro rogoho na bayo ki ngba rogoho, si satihe nikina kere ba fu bete agude na sosono aboro.’ (Family Violence) Agu aboro naraki rogo agu akporo apai angbakanga rogoho ya rengbe kadu ni agu aboro rago nika gbera tiyo fuo bete agarã. Ginipai ka oni mangihe ka singia wo duhe tipa roni?

15. Wai kii ga Yekova nyemuse ti gu nga ga aboro dunduko?

¹⁵ Gu bake apapara Atambuahe nangia Davide abibia ki yaa: “[Ka] buba mbu re na nina, ono Yekova adia re [adia].” (Atambuahe 27:10) Nairiwo wai si afu wasa ka ino gupai nga, ga Yekova nyemuse tipa rani ima susa gu nga ga vungugude! Wa vura duhe nga ho vunguroni agindigo roni ni watadu ka manga furoni gbegberee nigupai ima egerã gbe, anga pai ho nakodaha kuti wai Yekova angerafuo roni te. (ARomo 8:38, 39) Oni tingidi gupai nga, Mbori naye na agu aboro fuoko ko akpinyemu yo. (Yoane 3:16; 6:44) Zanga bipa gu gene aboro amangi furoni ngbaha, gu Baroni du ngbangbaturũ yo nakpinyemu roni akpi!

Weneapai Tipa ka Zeresa Gberarago

16, 17. Ho rago agbera ni ti boro, ginipai rengbe ni ka mangaha tipa ka banda gu gani ome nga ga toro?

¹⁶ Oni rengbe arengba ka manga weneapai ka sovura na diabese kuti gberarago. Nikpiapai, oni naapefuo gu wene ringbisapai du tipa gu mangaapai nga ga aKristano. Oni naaberãkurii Fugo Mbori, gbe, ho si awira ni wa ome gberarago ima fu rironi. Bake apapara Atambuahe abibia ki yaa: “Ho mi aya ni, ‘Ndure nazerenga.’ Ako Yekova, ga weneringise azi re. Wa du sakapai ku kpotore yo ni badungu he, gamo wasawasa apai nangarãsa mbisimore.” (Atambuahe 94:18, 19) Geda Ziazia Kekeapai dedede nika hiiso berã roni na afugo wasa gbiati agu aberã nika banda roni.

¹⁷ Kparakpee a nga nyanyakipa pai. Ka si vura du nga oni arengbanga ka gumbapa agu apai nzunzu nafuda roni te, Yekova ima ino gupai oni aida ka gumbaha. (ARomo 8:26, 27) Bake apapara Atambuahe agumba agi afugo kido re ki yaa: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.”—Atambuahe 55:22.

18. Giniapai si aida gu boro duna gberarago tini mangihe?

¹⁸ Gu kura aboro nasungo na zanga maabangirise mbiko gu kere gberarago du yo nani.b Kangia gipai re namanga roni, oni asadi ka maaberã roni kuti ga Mbori vovo zegino na kuti gu regbo “boro kporo sa . . . [nikaa yanga ni wee], ‘Mi nawoka’” ya. (Yesaya 33:24) Ka singia gi gaoni gberarago re aidanga ka go kusayo te, si adu nipatatamana oni ndu fuo amunganga. (Matayo 9:12) Si daada a oni naangerafuo kpotoroni. Ri wene riahe na kini mangi mangonvo nigupai daada. Oni bi gupai nga oni nadia regbo ka ongoda wenengai. Ka oni nyenga kuti ngana terevizioni regbo ki susi ya, na oni ne gu ngbatunga ambaro nika batasa omeroni. Gu nyakipaha kisusi nga, oni nye kindi kuti manga agu asunge nga ga Mbori! Wa avuranga du gi regbo re nga gu regbo Yekova nika ‘wéga aume’ kusayo bangiri aboro yo ya, ko aundo roni aundo oni hipai.—Yugoti 21:4; 1 AKorindo 10:13.

Raka Tiibe ‘gu Nyanyaki Bee Nga ga Mbori’

19. Gine Yekova akidopaha fu agu aboro du rogo arungosi?

¹⁹ Ziazia Kekeapai nakido rani kini yawee wa vura du agu arungo nga ga ruru boro nidunguhe, “Yekova nabatasa ni [abatasa] be he dunduko.” (Atambuahe 34:19) Wai Mbori amanga gipai re? Ho gu mokedi nangia Pauro anaakparakpee ni dedede tipa Yekova di ‘kiwe kusayo tii kpotokoyo,’ Yekova aya fuko: “Gi tandu du ni mbakadimbakadi he ziazia rogo rungbura yo.” (2 AKorindo 12:7-9) Gine Yekova akido Pauro naapaha, na gine ko akidopaha furoni? Anga si nga ka husa roni ti gi regbo du awere re te, ono ka fu ome furoni tipa oni hipai.

20. Wa vura du ani rogo fudifudiapai, ginipai kido yo rani tipaha rogo 1 Petero 5:6, 7?

²⁰ Gu mokedi nangia Petero akepai ki yaa: ‘Oni úmbasi tironi tii gu nyanyaki bee nga ga Mbori ya ko tumba roni ho ragoho ka rengba ni. Oni bá agu apai nafuda roni ku auru ko yo; mbiko ko naberãpa roni aberã.’ (1 Petero 5:6, 7) Wa duhe nga Yekova naberãpa roni aberã, ko ambunga roni te. Ko asongoda roni asongoda oni ki vura du rogo asada vurũ. Oni moi gupai ku berã roni yo nga, ruru aKristano tiibe “gu nyanyaki be yo nga ga Mbori.” Wa ani amangasunge fu Yekova, ko nafu ome furani ani naahipai kindi. Ka ani nye niruru rani fuko, anga pai ho ka gbarasipa rani nyeanye kindi rogo toroyo te. Sidu tie, ani kanga kuti gaani ruru mangaapai fu Yekova tipa wa ka ani gbia ngbarago be nyenye unga rogo gu gako vovo zegino ko nakido rani naapaha, na ki bi gu uru ko ka batasa agu aboro du rogo arungosi, ka i arungongo berewe ya nyeanye kindi!

[Gu rukutu kekeapai du bandu kpewaraga yo]

Oni Natingidaha?

• Tipagine arungosi amanga aboro ti ni dunduko zavura ga Yekova amoyambu a?

• Gine nga bete agu apai rengbe ka sa ga Mbori amoyambu i duna bakere gberarago tiyo?

• Wai Yekova aundo rani ani sovura na diabese kuti gberarago?

• Rogo gini gene du ani tiibe ‘gu nyanyaki bee nga ga Mbori’?

[Gu kpiahe du ti kpewaraga 18]

Wa fudifudiapai avura nimangi ga Yekova aboro, ndupai kina beyo i duna ngbarago