Ani Nambu Ambu Ono Omerani Abatanga Te
“Yekova, nga Bafu digida kpotosende. . . . Ko nafu tandu fu gu ni he amaka ni, na gu ni adu nga ome ti ni ya ko nakiisa omeni.”—YESAYA 40:28, 29.
1, 2. (a) Gini wene yambahe i ayamba agu aboro dunduko nani naida kaa irisombori ngba ziazia gene? (b) Gine rengbe ka maa rani ngbapai rogo toroyo?
WA DU ani niga Yesu abawiriki, ani ima rugatirani wenengai na gu wene yambahe ko ayamba rani nani niyaa: “Oni yé fuo re, agu roni nambu dunduko, ki du na rorõi tindiro, mi ki fu ongoda fu roni. . . . Bambiko kii nga gi gonga te, na gi tindiro ni aakpura ha.” (Matayo 11:28-30) Berewe a, aKristano ni agu aboro nagbia gu “zereda [na]ye yo du Gbia ni.” (Amokedi 3:19) Nirengo, nimanga oni gu ga Yekova arugute adunga ngburungburu ya rogo gaoni raka, kina boro oni nitironi ima ino wai agu arengo du rogo Ziazia Kekeapai afu wasa fu roni fuo wirika oni he, na wai si afu ziazia maabangirise fu roni tipa raka kumbatayo.
2 Wa vura duhe wo, bete airisi Yekova narungo arungo ti bete aregbo be sangbana agu apai nambusa yo ngbaduyo yo. Rogo gu kura apai, agi aregbo nga ga rungo kpotoseyo re si nadu nibetehe. Ono ti kura aregbo, si rengbe ka ima na boro tipa gbanga regbo. Wa regbo asusa, bete aKristano nabi gupai nga, gu gayo asunge nga ga aKristano ima da nibakere tindiro kuba gupai nga si naafu wasa fuyo a wa Yesu akido yo nani. Ngbatunga gu gbegbere aberã re rengbe ka maa ga Kristano pagume dagbani na Yekova ngbapai.
3. Tipagine Yesu afu agu arugute ti ni du rogo Yoane 14:1?
3 Ngbutuko mbata fu i zi Yesu na ki imi ko, ko aya fu gako abawiriki wee: “Ka oni rungo nga kpotoroni yo ya; oni ídi pa Mbori, oni ídi pa re a.” (Yoane 14:1) Yesu agumba agi apai re fu gako amokedi baraho kereapai aambeda ni ka ye sa yo. Si adu nga, fuo gu regbo re, aboro nika rikito na kere arungosi kutiyo. Yesu aima ino gupai nga, gako amokedi arengbe arengba ka kota be kere zerakpotoseyo. (Yoane 16:1) Na si adu a nga, ka i amanganga asadatise tipa ka rugusa gu gberarago nika du tiyo re ya, si arengba arengba ka gbarasa payo rogo toroyo na ki sa yo i zanga kido kuti Yekova. Kina gu bangisapai re a du tipa aKristano areme. Gu zerakpotoseyo ka ndu na ani nitorotiri, si rengbe ka ye na bakere rungo fu rani, na ki fu bakere gberarago a. (Yeremaya 8:18) Kpotoraniyo rengbe arengba ka rungbura. Fuo du ani rogo ngbatunga gi fudifudiapai re, ngbaduraniyo rengbe ka zera na ani ki zere rogo toroyo ka nyemu iriso Yekova adunga berewe tirani ya.
4. Gine rengbe ka undo rani ani banda kpotoraniyo si ka zera?
4 Naruu agu arugute nirengo nga ga Ziazia Kekeapai nayaa: “Mo nibánda kpotoro yo ngangarã [susi agu ahe dunduko si aida mo bandaha]; bambiko yo unga naye ni.” (Asanza 4:23) Ziazia Kekeapai nafu wene arugute fu rani tipa ka undo rani ani banda kpotoraniyo si ka zera na ka bandaha ti gu mbugo nga ga toro. Nibambatapai tie, si naida ani kparia gupai wenengai naye na mbugo fu rani.
Gu Pambori Nga ga AKristano Ayenga na Rungosi Te
5. Ginipai du tipa gu sunge nga ga gu bawiriki nga Kristano nawira wa si natagbagatihe atagbaga?
5 Nirengo, padu boro ni Kristano naida nyanyaki asadatise. (Ruka 13:24) Yesu ayawee: “Gu ni ka aaka nga gani wagiwagi ngua, ki ye fuo re ya, ka ni du nga ni gi bawiriki te.” (Ruka 14:27) Ka ani bi agu afugo re gbua zanga berãkuriihe, si rengbe ka wira wa si natagbagatihe na gu ga Yesu afugo ko agumbaha ya gako tindiro ni aakpuraha na kini fu wasa, ono ka pe rengo, si atagbaganga tihe te.
6, 7. Tipagine rengbe ani ka ya ti ni wee ngbatunga gu irisombori nga gaani abatasanga omerani te?
6 Pa manga boro nyanyaki asadatise gbiati kakaka sunge, ka ni vura mbu ambu be mangaha, si rengbe arengba kadu nigu sunge nafu ngbarago na wasa funi ho ni amangaha ni na wene ndu mangaha. (Batungusipai 3:13, 22) Ya mo kura wene ndupai ho fu rani ani du na ngbarago ti gu nga ka yugo agu arengo du rogo Ziazia Kekeapai fu akuarani aboro? Berewe a, gu sota ani asota nani ka manga ga Mbori tumbatumba andiko nga ga raka nada nikungbopai wa ani aringbisaha na agu aundo ani agbia ngbarago behe be mangaha ani he wo. (Asanza 2:10-20) Zavura ho i arungosi rani ni, ani nabihe nipa irisa ka rungo tipa pa ga Mbori Kindo.—1 Petero 4:14.
7 Ga Yesu tindiro nafu wasa afu nirengo, gbe ka ani ringbisihe na gu bitimo nga ga toro du agu aboro rogoho nye kuti tinda gu tindiro nga ga zire pambori. Mbori na gu nyemuse tipa rani nga ga nunga na ko asananga rani ani mangi agu apai ani arengbanga ka mangaha ya te. Ga Yekova “rugute asusa nga omerani te.” (1 Yoane 5:3) Gu ndikidi pambori nga ga aKristano, a wa fura yo tipaha rogo Ziazia Kekeapai, si ayenga na arungosi fu aboro te. Si tie ziazia nga, gu ngbatunga irisombori nga gaani, si abatasanga omerani na ki zeresi kpotoraniyo te.
‘Ani Moi Rorõi Ahe Dunduko Kusayo’
8. Gine dedede ningia ndu gu mbugo nga ga toro?
8 Agu ambugo dunduko nga ga toro ani agbiaha dedede, si naye nisangbana gu kura rorõi apai gi iraira zegino re amaaha kurii rani. Wa duhe nga “zegino dunduko du ni zogozogo ho be gbegberẽ ko,” kereapai ima ke pati rani kirikiri nga gu rengbe ka batasa omerani ki zeresi gu sino rani nga ga aKristano. (1 Yoane 5:19) Agu apai anyakanga paha ya, si rengbe arengba ka sa gu gaani apai nga ga aKristano nga gu ani naamangaha dedede, si du fu rani ni kpakarakpakaraha na si ki fudi rani. Gi kura atindiro du kurii akuraha re, si rengbe arengba ka fuda rani na ki rungosi rani. Ruhe aru wa Ziazia Kekeapai afu rugute fu rani ani ‘moi rorõi ahe dunduko kusayo.’—AEbere 12:1-3.
9. Wai pa orafuo aũzegino narengbe ka rungburasi rani rogo toroyo?
9 Nikpiapai, pa dingiso aboro-zegino tiyo na pa worimoyo, pa marã, pa agu ambaro nafu wasa, pa ta ka biko arago tipa ngbarago, na gu kura a’ato fuo aũzegino, omehe rengbe arengba ka aria gaani berãpai. (1 Yoane 2:15-17) Bete agu aKristano nadu rogo bambata sa kama agarã nga aguyo naaora fuo kumuko, avundu gayo raka nikerehe. Gu mokedi nangia Pauro asakirogoyo ki yaa: ‘Agu boro nakpinyemu ka kumuko i natiwa atiwa kurogo asada na gbina na dungu mumungo gbegbere nyemuahe nga gu narindasi aboro kurogo gbarasayo yo na kpio. Bambiko nyemu marã nga tarã ngbatunga gbegbereapai dũ; agu aboro nakpinyemuhe wo aingi ainga ti idapase, ki rupu tiyo na dungu arungo.’—1 Timoteo 6:9, 10.
10. Ginipai rengbe ani ka wirikaha tipa kumuko be ga Yesu sanza tipa bamitunga?
10 Ho ani abi tirani ni nga omerani bati tingba gaani sunge fu Mbori na kpotoraniyo ki zere, ya mo si rengbe kadu mbiko ani naora fuo aũzegino si kini kandasi rani rogo toro? Gipai re rengbe arengba ka manga nirengo, a wa duhe niyuguyuguhe rogo ga Yesu yugopai na kpiapai tipa bamitunga. Yesu aringbisi “berã pa zegino, na gu nangaahe nga ga ũkumuko na nyemu kura ahe” kuti agu akiwe ‘nasona ki kandasi’ tunga fugo Mbori ngbaduraniyo. (Marako 4:18, 19) Sidu, Ziazia Kekeapai nafu rugute fu rani niyaa: “Ka oni dú nga ni akanga fu nyemu marã ya; agu ahe du be roni si ki rengbe bangironi, bambiko ko aya tigako, ‘Mi ahe nga unda ro wa sa te, mi ambú nga ro a wa sa te.’”—AEbere 13:5.
11. Wai rengbe ani ka maa agu ahe kusayo rengbe ka rõasa rani?
11 Ti kura aregbo, gupai nasa gaani raka si du nikpakarakpakaraha, anga si nga pa orafuo kura ahe te, ono si nga gupai ani amangaha na agu ahe ima du berani. Bete aboro rengbe ka mbu be agu apai nafuda yo ngbaduyo yo nisangbana gu kere akaza namanga yo, pakpio badiangbayo, watadu gu kura iigira fudifudiapai. I bi gupai nga, si naida i naamanga a’ariapai rogo gayo raka ti kura aregbo. Arogotise ue adiberã ka mbu bete agu ambaro i anangihe na ka rogoda kura ahe kusayo kporo nga agu ahe paha anyakanga ya. I aguari aguari nzunzu ka wisigo agu ahe nadu beyo na nirengo, i ki dungura agu naadunga na sunge ti ni ya ki moihe rogo kura ba tutuurũ. Ti kura aregbo, ani rengbe arengba ka gbia undo be wisigo agu apai ani amangaha gbiati agu ahe du berani, kini moi agu ahe kusayo adunga sunge ti ni ya tipa si ka batasa omerani na ani ki rungbura rogo gaani berã.
Duna Ruru Berã Gbiati Zanga Kiisatise Nga Nyanyakipa Pai
12. Ginipai si aida ani kpariaha tipa gaani irairaapai?
12 Gu irairaapai ani amanga, zavura gu rukutuhe, si rengbe arengba tooni tooni ka vundo gaani raka. Naruu agu afugo Davide nga: “Gimi irairapai fu ri re; wa rõrõi tindiro si rõi susi omere.” (Atambuahe 38:4) Dedede, kina bete wene ariaapai gbua rengbe ka zaka rani kusayo be rorõi atindiro.
13. Wai ruru berã narengbe ka undo rani ani du na ruru bipai tipa gaani sunge tungusapai?
13 Ziazia Kekeapai nangarasa rani ani sonosi “ndikidi tatamana na sia pa pai.” (Asanza 3:21, 22) Ziazia Kekeapai nayaa: “Gu tatamana naye ari yo si du na wene sino.” (Yakoba 3:17) Gu kura aboro bihe wa i nasosoda yo asosoda tipa i naamanga gu ga aKristano sunge nga ga tungusapai na bangisa bakioho wa gu kura aboro amangaha. Ono tie, Ziazia Kekeapai naruga rani niyaa: “Boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te. Bambiko boro nakpida kina gani pai.” (AGaratio 6:4, 5) Rengo ngaha nga, gu wene kpiapai nga ga akuarani aKristano rengbe arengba ka ngarasa rani ani mangisunge fu Yekova na ngbaduraniyo dunduko, ono tie, wene tatamana gbiati ruru berã nika undo rani ani moi agu asásá dada ringbisihe kuti agu apai du tipa rani.
14, 15. Wai rengbe ani ka mangapai niwene tatamana rogo ngera fuo agu apai du tipa kpotorani na gu du ngbaduraniyo?
14 Padu ani na ruru berã zavura rogo agu apai nawira wa nyakinga paha te rengbe arengba ka undo rani ani he berãpa ambugo. Nikpiapai, ani nasonosa gu sino mangaapai rengbe arengba nabanda kpoto boro si du niwene wasawasaha? Ani wisiginga gu kpiapai du tipa agu arogotise ue namangasunge rogo biroo sa rogo ga aDezire Yekova be-basunge. I aima bi gu mosoro nga ga wene tatamana du ti manga gupai nika za mbugo tiyo. Ri nayaa: “Ka sunge vura kio berani wai vurũ, ani nandu ka ra ti kina gu bangisa regbo yuru ani naandu ti ni dedede. Ani naamanga amangonvo amanga a dedede. Gipai re ima undo rani nirengo. Ani ima ino gaani angbanda, sidu ani kini mangiapai ringbisihe kuti ni. Ani a’asadanga tirani ka mangaapai wa gu kura aboro amangaha si awira wa digido bakio gayo ome ti ni te te.” Ani nari wene ariahe na kidu na wene regbo ongoda berani ti aregboho dedede? Padu ani na ruru berã tipa wasa kpotorani dunduko rengbe arengba ka umbasi agu aberã nga ga mbugo ti kpotorani gbiati gu mbugo nga ga toro.
15 Bete rani na agu azingo tirani du nikparakakparakaha nibakiakia. Nikpiapai, wirinarani nga Kristano amangisunge Kindo ti aregbo dunduko rogo dungu agu apaparaha nadu nikpakarakpakaraha. Ri aduna kere fudifudiapai tipa wasa kpotori, kodihe na gu kaza nga kenisa. Gine naundo ri ri duna diabese rogo gu fudifudiapai re? Ri nayaa: “Si ninyanyakipa pai fere mi gbia regbo ka sungo nisare na rogo gu ba ongo rago rogoho kii. Ho du mi ni nifudifudi re gbe rogo gimi berã na omere kini bati bakere gbe, si naida mi ipisi tire ka sungo nisare rogo gu rago rengbe mi rogoho ka gedapai na ka ongoda.” Wene tatamana gbiati tandu berãpai naundo rani ani kpariapa gaani azingo nibasasa na ki mangipai tipaha tipa ka ani ambunga rogo toro ya.
Yekova Mbori Nafu Ome fu Rani
16, 17. (a) Tipagine du pa ngera ani fuo tirani rogo toroyo ti ni ninyanyakipa pai gbe? (b) Gine si aida ani kodihe kurogo agu apai ani naamangaha na a’uru dunduko?
16 Rengo ngaha nga, pa ngera ani fuo tirani tipa kadu niwasawasa rani rogo toroyo nga nyanyakipa pai. Ho du ani ni na dawedawe ngbanyaa dagbarani na Yekova Mbori, ani rengbe arengba ka mbu ti kpotorani, ono omerani abatanga ti irisoko te. Yekova nga gu boro “nafu tandu fu gu ni he amaka ni, na gu ni adu nga ome ti ni ya ko nakiisa omeni.” (Yesaya 40:28, 29) Gu mokedi nangia Pauro, nangia gu boro naini rengo gipai re nitiko, akepai ki yaa: “Wa du he were ani arungbura nga te; ono gu kpotorani du zegi yo navura zirã, gu tororani du ku vuru he yo i nambakada ha waragoagira.”—2 AKorindo 4:16.
17 Oni kparianga gu fugo nga “waragoagira.” Si nayugo gupai nga, si naida ani naagbata gene na a’uru nibasasa ka gbia agu aundo Yekova afuhe. Mokedi sa nga guri namangisunge niruru ri tipa agarã 43, aregbo anidu kinaho ri anidu rogoho na mbugo-kpotose gbiati zerakpotoseyo. Ono omeri abatanga rogo toroyo te. Ri nayaa: “Mi sa gupai nisinore nga kaa guari ngbatutu wiso mbata fu mi tona sunge tipa ka kpara fu Mbori na ka geda Fugo ko. Gipai mi naadogoda mangaha na a’uru dunduko re, si undo re mi hipai daa ku awere.” Ani rengbe arengba ka kido kuti ga Yekova ome songoda aboro nirengo, ka ani akpara fuko “waragoagira,” na kini berẽkurii asinoko du nibawenehe gbiati agu apai kido ko he tipaha.
18. Gini wasa Ziazia Kekeapai afuhe tipa gu ruru aboro du nigbinza yo watadu aguyo nga airawokote?
18 Gipai re nafu undo gbe fu agu aboro rago agbera tiyo mbiko i gbinza na mbiko zingo wasa kpotoyo. Ngbatunga agu aboro re, kpotoyo yo rengbe arengba ka zera, angianga mbiko i naringbisa tiyo na kura aboro ya, ono mbiko i naringbisa tiyo na agu apai i anamangaha mbata. Nga gu wasa si afuhe ka ino gupai nga, Yekova nafu irisa afu fu sosono aboro! Ziazia Kekeapai nayaa: “Nvue nga kpakpari taarimo fu boro; ni nibi he be kina gu pai nga ga rurupai.” (Asanza 16:31) Yekova ima ino gaani angbanda na ko nabi gaani irisombori nga gu ani amangaha fuko na ngbaduraniyo dunduko na kikiipaha, wa vura rungbura ani rogo kura apai vurũ. Na gu weneapai ani aima mangaha, si nikekehe zanga gbataka rogo ga Mbori berã. Ziazia Kekeapai nakido rani niyaa: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi.” (AEbere 6:10) Nga gu ngbarago du ani nani kadu na agu aboro dagbarani naima yugo gupai tipa dungu agarã nga, i ningia ruru aboro fu Yekova!
Ka Ome Roni Batinga Ya
19. Wai ani agbia undo be dingiso ani tirani kaa manga gupai ngba angba?
19 Dungu aboro idi kuti gupai nga, manga boro nyanyaki asunge dedede rengbe arengba ka do mbugo kpotose kusayo tini. Teketeke wa kina gure a, pa manga ani agu apai nga ga toro dedede rengbe arengba ka dia agu ambugo nga ga toro kusayo tirani. Ziazia Kekeapai nayaa: “Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni. Were, momu nimángi rani tie, ani ki mangi gu pai amanga ngba angba fu aboro dunduko, fu kina agu yo gbe du . . . [ani na yo ti] idapase.” (AGaratio 6:9, 10) Oni kparia agu afugo nga, “manga rurupai” na ‘manga gupai ngba angba.’ Agi afugo re nayugo gupai nga, si naida ani guari nga ani ka mangapai. Pa manga ani weneapai fu kura aboro rengbe arengba ka undo rani ka omerani abatanga rogo gaani sunge fu Yekova ya.
20. Tipa ani rengbe ka sovura kuti zerakpotoseyo, ada si aida ani ne sungo na yo?
20 Ni gupai du kia ti gure, pa koda ani tirani na agu aboro nabasa ga Mbori andiko na pa manga ani kura apai na yo, si rengbe arengba ka ye na mbugo fu rani. Ziazia Kekeapai naza rani niyaa: “Roĩ mbia aroã, ngume roĩ aroã a, ono ga mumungo boro zinga si roĩ ki susi he wa du he ue” re. (Asanza 27:3) Tipa ani rengbe ka sovura kuti zerakpotoseyo gbiati mbugo kpotose, si adu niwenepai ka ani ne sungo na agu aboro nagumba kina gbegbere aberã, nga agu aboro duna nyemu ka gbata kina ga akurayo irairaapai na kini bisira payo.
21. Wai rengbe ani ka ngarasa kura aboro ti regbo agu adunguratise nga ga aKristano?
21 Agu adunguratise nga ga aKristano nigu mbakadapai mangi Yekova ha tipa ka fu gu ome nga ga toro fu rani. Yo du ani agbia bawene mamu ni ka ngarasa tirani dagbarani na wene arugute gbiati gu kodatise nafu wasa. (AEbere 10:25) Si naida gupai nga, agu aboro dunduko du rogo dungurati mangi nyanyaki asadatise ka sonosa akurayo na gayo afugo ho i akaragapai ni ti regbo adunguratise watadu ho i amanga gumbapai ni rii tambara yo. Agu aboro nangbembatayo rogo apai ni abayugupai, i gbe si aida i ngarasi kura aboro. Zavura ho si aida i fu rugute ni fu awirina, si naida woro fugo gu boro nafu agu arugute re du ni agu afugo nafu wasa. (AGaratio 6:1, 2) Gu nyemuse du ani nani tipa aboro nika undo rani ani mangisunge fu Yekova zanga omerani bati.—Atambuahe 133:1; Yoane 13:35.
22. Wa vura du ani nikpakpa aboro, tipagine rengbe ani arengba ti ni kadu ngangaraa?
22 Pa iriso ani Yekova ti gi digido regbo re nakoda sunge. AKristano wa kina kura aboro a, i nambu ambu rogo gayo aberã, be agu apai naimisa yo ngbaduyo yo, na gu kura apai nafuda yo rogo gayo aberã. Ani nga kpakpa aboro wa kina poporopoporo akoro. Wa vura duhe wo, Ziazia Kekeapai nayaa: “Ani na gi kumuko re rogo agu ahe i ameke he rogo sende yo, ya gu bakere tandu susi ye be Mbori, be rani te.” (2 AKorindo 4:7) Ii, ani ambu ambu, ono omerani abatanga rogo toro watadu ka bata ani ki mbu rengo te. Kuba gure, si naida ani du ‘ngangaraa ki ya, “Gbia nga gimi mounda.’”—AEbere 13:6.
Fugöpai Niguruhe
• Gine nga bete gu rorõi atindiro ka ani rengbe ka zogaha kusayo rirani?
• Wai rengbe ani ka koda berani ka manga “gupai ngba angba” fu akuarani aKristano?
• Wai Yekova asongoda rani ho du ani ni na mbugo watadu ho zerekpotoraniyo ni?
[Gu kpiahe du ti kpewaraga 19]
Yesu aima ino gupai nga, zerakpotoseyo tipa gbanga regbo arengbe arengba ka fuda gako amokedi
[Gu kpiahe du ti kpewaraga 20]
Gu kura aboro ambu kura agu apai i aduna nyemu mangaha mbata si naafu ngbarago fuyo gbiati gu kura ahe adunga sunge ti ni ya
[Gu kpiahe du ti kpewaraga 22]
Wa vura du angbanda ti agu apai rengbe ani ka mangaha, Yekova nabi gu gaani irisombori abi na kikiipaha ani amangaha na ngbaduraniyo dunduko