Ga Yekova Sarangbangaa Nika Ye Kuti Gbegbere Aboro

“Oni mbákadi tironi ka gbia gaoni Mbori!”—AMOSA 4:12.

1, 2. Tipagine rengbe ani kadu ti ni naa kido ya Mbori adigiso gbegbereapai adigiso?

YA MO Yekova atingidi digisi gbegbereapai gbiati rungo auru gi kpotosende re? Ti tonatona gu 21 kama agarã, si adaada aboro sana gu sanahe re. Si nawiraha nga, agu arago dunduko ani andu kurogoho, ani nabi gu irairaapai aboro amangaha kuti akurayo. Nairiwo wai du ani na nyemu ka bi gu zegino adunga azuũ, gu vura nga ga abamoi, na iraira mangaapai rogoho ya!

² Gu wene pangbangaa duho nga, ani rengbe arengba kadu naa kido ya Yekova nika digiso gbegbereapai adigiso naabaha dunduko. Asino Mbori nasa gupai nirengo bangirani nga, ko aguari aguari ka mangapai kuti gbegbere aboro. Yekova niruru ko na kini mangiapai ngba ruru gene. Rogo Atambuahe 33:5, Fugo ko naya fu rani wee: “Ko nakpi nyemu rurupai na ruru sarangbanga.” Gu kura Atambuahe nayaa: ‘Mbisimo Yekova nasoga airazuũ.’ (Atambuahe 11:5) Nirengo, Yekova, nga gu Mbori duna tandu apai dũ nakpinyemu rurupai na ruru sarangbangaa, ko ahinga agu apai ko asogaha nyeanye kindi te.

3. Ginipai i ka nyakasapai tipaha rogo wisigopai kumbatayo tipa ga Amosa sangbanebi?

³ Ani wisiginga gu kura ndupai rengbe ani kadu ti ni naa kido ya Yekova adia gbegbereapai adia kusayo. Gu kekeapai du tipa gako mangaapai bakuru kusayo nga ngbaanga tipa gipai re. Iiriwo kpiaapai tipa ga Yekova sigirasigira sino mangaapai na gbegbere aboro gu du rogo gu buku nga ga Ziazia kekeapai nga Amosa. Pa wisigo ani ga Amosa sangbanebi kumbatayo nika nyakasapa apai biata tipa ga Mbori sapangbangaa. Nibambatapai, gu sapangbangaa re nirẽ arẽ tipa agu aboro re ti agu aregbo dunduko ko naaye nani. Niuepai, ka boro batinga behe te. Nibiatapai, si tipa kina gbegbere aboro, mbiko Yekova namanga gako sarangbangaa kina kurii agu aboro namanga gbegbereapai ono kini inipai fu agu aboro sa gayo berã gbiati aguyo duna gu sino tiyo nga ga manga rurupai.—ARomo 9:17-26.

Ti Aregbo Dunduko, I Nirẽ Arẽ na ga Mbori Sapangbangaa

4. Wari Yekova akedi Amosa kuhoni, na tipa ginipai?

⁴ Rogo agu a’uru nangia ga Amosa, aYisaraere aima kparaka kurogo akindo ue. Gu sa angia gu kindo nangia ga aYuda nadu ku sudiyo na angbatunga ue. Gu kuraha angia gu kindo nangia ga aYisaraere nadu ku nodiyo na angbatunga bawe. Yekova asia Amosa ko mangisunge ni nebi, ki kedi ko rogo gu gbata kpuko adu rogoho Yuda yo ko ndu ku Yisaraere yo. Yo du si aduni nga Mbori nika mangasunge na Amosa ko takipande ga Mbori sapangbangaa.

5. Gini rikaaboro Amosa agumbapai nisangbanebi tipa yo mbata, na gine nangia ndupai sa i arẽ ti ni Mbori saringbangaa nikerehe kutiyo?

⁵ Amosa atonanga gako sunge nitaka ko pande ga Yekova sapangbangaa kuti gu iraira aboro nadu rogo gu kindo nadu ku nodiyo nangia ga aYisaraere te. Kuba gure, ko atona gako sunge nitaka ko pande ga Mbori sapangbangaa kuti gu rikaaboro nadu sita nadu pati yo. Agi arikaaboro re angia aSurio, aFereseto, aTuro, aEdome, aAmono, na aMoabo. Ya mo i aima manga gupai nirengo nasa yo i rẽ na ga Mbori kere sarangbangaa kutiyo? Ii, nirengo. Ndupai sa nga, i angia yososo avura ga Yekova aboro.

6. Tipagine Mbori aandu ti ni ka ye na gberangbii kurii aSurio, aFereseto, na aTuro?

⁶ Nikpiapai, Yekova asaringbangaa kuti aSurio ‘bambiko i adekpera Girada na bakere bande-marã nga ga fõahe.’ (Amosa 1:3) Asurio adi papara ringara kusayo be aboro Girada, nangia gu ba nadu pavuru Yaradene ku uroyo, na ki mangi fu ga Mbori aboro yo gbegberee. Ginipai aFereseto na aTuro amangihe tigayo? Gayo ingahe angia i anarogoda aYisaraere kini ga na yo ku kpuyo yo, watadu kini ga na yo nizizi aboro, na kini bagi yo fu aEdome, na kini bagi bete aguyo ni akanga fu agu aTuro nangia ababagi akanga. (Amosa 1:6, 9) Oni moinga kpia gupai re ku berã roni yo nga, aboro anabaga ga Mbori aboro ni akanga! Si airiwonga te, si du Yekova aguari ti ni ka pepa ye na gberangbii kurii aSurio, aFereseto, na aTuro.

7. Gine nanakoda aEdome, aAmono, aMoabo na aYisaraere, ono wai i amangipai fu aYisaraere?

⁷ Pai aduho sa nanakoda aEdome, aAmono, na aMoabo na kini kodi aYisaraere na yo dunduko. Gu rikaaboro biata re dunduko angia agume aYisaraere. AEdome angia atita Abarayama rogo ga Esau ngbadimo nangia gu wirina Yakobo nangia bi. Sidu, i angia awiriba aYisaraere. Tipa aAmono na aMoabo tigayo, i angia atita Roto nangia wiri unvurua Abarayama. Ono ya mo aEdome, aAmono na aMoabo amangi agu agumeyo nangia aYisaraere wa awiribayo? Wagusa te! AEdome amo basape sa ‘awirinayo’ zanga inapai fuyo, na aAmono anamanga gbegberee fu agu aYisaraere i anazio yo. (Amosa 1:11, 13) Wa Amosa avuranga fura ngburungburu tipa gu gbegberepai aMoabo amangi ga Mbori aboro nani ya, aMoabo aima duna gbanga pangbangaa sogote aYisaraere tiyo. Si adu nga gu mbusa nika du tipa agu arikaaboro biata nangia agume re, adu nikerehe. Si adu nga, Yekova nika keda gbarasarago wa ngumbe kuriyo.

Ka Boro Batinga be ga Mbori Sapangbangaa Te

8. Tipagine gu rikaaboro sita nadu pati aYisaraere arengbanga ti ni ka bata be gu ga Mbori sarangbangaa nadu kutiyo ya?

⁸ Si tie ziazia nga, gu rikaaboro sita Amosa afura tipa yo rogo gako sangbanebi ti tonatonaha re aima rẽ tipa ga Mbori kere gbarasangbangaa fuyo. Kurii gure, gene adunga beyo i bati behe te. Tona rogo Amosa kapita 1, veresi 3, da kurogo kapita 2, veresi 1, Yekova aya bara sita wee: “Mi asá nga gaha mbusa te.” Nirengo a wa ko agumbaha, ko aenga fu mbusa fu gu rikaaboro re te. Gu kuru pangbangaa du nikekehe nayugo gupai nga, gu rikaaboro re aima gbia tiyo na ambusa wa i aduku nibasasa kusa. Oni ngere, tunga aguyo kandara biama, nga aFereseto, aMoabo, aAmono, na aEdome, niyangaraha aima runo ki go kusayo auru kpotosende!

9. Gine araki ringara Yuda yo arẽ nani, na tipagine?

⁹ Fuo gure gu sangbanebi nangia ga Amosa agbeberã kuti gu saba rikaaboro nadu ringara Yuda yo, nangia aboro gako ringara. Ngba agu aboro naadegatuyo kutiko nadu rogo gu kindo nadu ku nodiyo re avura zera azera ka gia ko ko nitakipande sapangbangaa kuti ringara Yuda nangia gako ringara. Tipagine araki ringara Yuda yo arẽ ti ni na sapangbangaa kutiyo? Amosa 2:4 nayaa: “Bambiko i agindiga ga Yekova rugute.” Yekova abinga gu basapa gako aNdiko aboro ataino aino kini mangihe re nikungbopai watadu nitaatapai te. Kuti gupai du rogo Amosa 2:5, ko afura tipa pai kumbatayo ki yaa: ‘Mi akeda we kurii Yuda, si ki riti gu nyanyaki abaagbata du Yerusarema yo.’

10. Tipagine ringara Yuda arengbanga ti ni ka bata be gu gberangbii naye kuriihe ya?

¹⁰ Agu aYuda naadunga na kido kuti Mbori re ya arengbanga ka bata be gu gberangbii naaye sa yo te. Nigu saba gumbagumbaha, Yekova ayaa: “Mi asá nga gaha mbusa te.” (Amosa 2:4) Gu gbarasarago nebi afura tipaha kumbatayo re aye kurii ringara Yuda ho aBabero agbarasihe ni rogo 607 M.B.K. Ani nabi gupai re berewe nga, tipa gbegbere aboro, gene beyo ka bata be ga Mbori sarangbangaa kutiyo te.

11-13. Gini rikaaboro Amosa agumbapai nisangbanebi tipa yo nibambatapai, na gini ngbatunga arungosi nadu yo?

¹¹ Gu nebi nangia Amosa anyasi na gako takapande sapangbangaa gbua kuti arikaaboro saba. Ono, kangia boro aberẽ gupai nga ko aima nyasa na gako agumbapai nisangbanebi, ni angia ingahe. Amosa ambedanga ka nyasa na gako sunge te! Gu bambata sunge nzunzu i afuhe fuko, si angia ko ndu ka takapande ga Mbori kere asapangbangaa kuti gu kindo nangia ga aYisaraere nadu ku nodiyo. Na aYisaraere aima rẽ tipa Mbori saringbangaa kutiyo nikerehe bambiko asinoyo gbiati gu gayo mangimangiapai nangia ga toro aima gbera nikerehe.

¹² Agu agumbapai nisangbanebi nangia ga Amosa re akusipa agu arungosi kuyangura nga agu arungosi narengbe na arago dũ aboro aamanga akurayo nani rogo gu kindo nangia ga aYisaraere re. Nibi gipai re, ani nageda gupai rogo Amosa 2:6, 7 nga: “Ya Yekova wẽ: ‘Tipa samungu bara biata nga ga Yisaraere, na tipa biama a, mi asá nga gaha mbusa te; bambiko i bagi ruru boro tipa feda, na irazingohe tipa katara—i nga agu yo simbi ri rurungbura aboro ku nvutu yo, ki aria bayee aboro ku bani ngba gayo gene.’”

¹³ I anababaga ruru aboro tipa “feda,” nga gupai du rogoyo gbe nga abasapungbangaa anarogoda marã-mobirimo be aboro kini gbarasi ngbangaa fu aboro-wenesa. Abafubape anabaga rungorungo aboro ni akanga tipa “katara,” isoke tipa gu kungbo tooni bape ni adihe. Agu akumba nazanga duna nunga aboro tiyo ‘anasimbido’ rii “rurungbura aboro” kusande si ki sa gi rungorungo aboro re i nindukudi nvutu kuriyo yo ka yugopa gu rungo i adu rogoho, gbiati pa gu gberãrago i adu nani, watadu pa gu payasi payo aboro napayasi yo nani. Iraira mangaapai amoipai bakere gbe ki sa “bayee aboro” i zanga wiri maabangirise tipa ruru mangaapai kumbatayo.

14. Ada aboro aarungosi yo rogo gu kindo nangia ga aYisaraere nadu na angbatunga bawe?

¹⁴ Oni kparianga pa agu aboro i aarungosi yo. I angia agu aboro-ringara nangia bayee aboro payo adu kusende, nangia ruru aboro nirungorungo yo. Ga Yekova Ndiko nga ga mokido na aYisaraere aida gupai beyo nga i yugu nunga fu agu aboro nadu rogo zingo gene adunga beyo ya. Ono tie, tipa ngbatunga agu aboro re nga aguyo nadu rogo gu kindo nangia ga aYisaraere nadu na angbatunga bawe, apai agbere kubarayo yo kisusi.

“Oni Mbákadi Tironi ka Gbia Gaoni Mbori!”

15, 16. (a) Tipagine i arugu aYisaraere ti ni ya i ‘mbakadi tiyo ka gbia gayo Mbori’? (b) Wai Amosa 9:1, 2 ayugo gupai nga, gbegbere aboro arengbanga ka deka be ga Mbori sarangbangaa kutiyo te? (d) Ginipai namangi rogo 740 M.B.K. tipa gu Kindo nangia ga aYisaraere nadu na angbatunga bawe?

¹⁵ Wa si adu nga wasiro gbiati kura ingaapai aima maapai ringara aYisaraere yo, si aruaru wa gu nebi nangia Amosa re azinahe fu agu abasamungu re niyaa: “Oni mbákadi tironi ka gbia gaoni Mbori!” (Amosa 4:12) Agu aYisaraere nangia iraira aboro watadu azangaidapase re arengbanga ka bata be gu ga Mbori sapangbangaa naaye sa yo te bambiko nigu muambe gumbagumbaha, Yekova ayaa: “Mi asá nga gaha mbusa te.” (Amosa 2:6) Nibipa gu gbegbere aboro navura ida ka oka tiyo, Mbori aya tipa yo wee: “Gu ni aóra nga dagba yo yo ku sa yo wa sa te, ka gu ni amérã nga dagba yo yo wa sa a ya. . . . Ka i vura ge due ku Baatoro kpikpi aboro yo vurũ, bere aróga yo aroga yo; ka i vura bita ku ngbangbaturũ yo vurũ, mi azógo yo yo ku sande.”—Amosa 9:1, 2.

¹⁶ Gene adunga be gbegbere aboro ka deka be gako sapangbangaa kutiyo nigeteka yo “due ku Baatoro kpikpi aboro yo” te, nga gu fugo masaku du rogoyo nga ka manga asadatise ka ndu ka gbu beko kutii sendeyo. Na gene adunga beyo a ka ora be gako sapangbangaa nidakpa yo “ku ngbangbaturũ yo” te, nga gu fugo du rogoyo nga ka manga asadatise ka dakpa kurii gbanga bagangara yo ka gbu yo. Ga Yekova zahe adu ziazia nga: Anga bagbuko ho ka ko he da rogoho te. Gu ruru sarangbangaa nga ga Mbori aidi gupai nga Mbori fu mbusa afu fu gu kindo nangia ga aYisaraere tipa gayo gbegbere mangimangiapai. Na gu regbo re aima ye nirengo. Rogo 740 M.B.K., fuo susa agarã wa 60 fuo ke Amosa gako sangbanebi, gu kindo nangia ga aYisaraere ati kube agu abazirago nangia aAsuro.

Ga Mbori Sapangbangaa Nasiaka Aboro Asiaka

17, 18. Ginipai Amosa kapita 9 ayugoho tipa ga Mbori inapai?

¹⁷ Gu sangbanebi nga ga Amosa ima undo rani ani bi gupai nga, gbegbere aboro nirẽarẽ na ga Mbori sapangbangaa kutiyo ti aregbo dunduko nga gu sapangbangaa adunga gene beyo ka bata behe ya. Ono gu buku nga Amosa re nayugo gupai fu rani a nga, ga Mbori sapangbangaa nasiaka aboro asiaka. Mbori rengbe arengba ka kura bara ho gbegbere aboro agbuka ni ki sapungbangaa kutiyo. Na ko rengbe arengba a ka bi agu aboro sa gayo berã gbiati gu ruruyo, nga agu aboro ko aida ka inapai fuyo. I gumba agi apai re na bawene afugo rogo gu yangara kapita nga ga gu buku nga Amosa.

¹⁸ Rogo Amosa kapita 9, veresi 8, Yekova ayaa: “Mi agbárasa nga ngbatunga Yakoba kpakaya” te. A wa duhe tona rogo veresi 13 ki da kurogo 15, Yekova akidohe ya ko ‘akaraga gu gako aboro akaraga berewe i aziyo.’ Si adu nga ko nika inapai fuyo na i kidu na ngbarago mbiko bayo angba na gayo ahe kini zugo. Yekova akidohe ki yaa: ‘Basopobino apeka fuo bakeahe ki gbia ko.’ Oni berẽnga gupai re, nga ahe aida kpaima, i kini kehe kindi rogo kura garã daho i ka tona sopa kura bino ni berewe na kini mi tunga!

19. Ginipai namangi tipa yangara aYisaraere gbiati yangara aYuda?

¹⁹ Ani rengbe ka ya tie wee Yekova asiaka kina gbegbere aboro ka sapangbangaa kutiyo ringara Yuda yo na ringara aYisaraere yo, ono ki inipai fu aguyo nasa gayo berã gbiati aguyo nadu na ruru ngbaduyo yo. Rogo digisidigisi gu sangbanebi du nikekehe rogo Amosa kapita 9 tipa karaga apai kubaha, gu yangara aYisaraere gbiati aYuda nasa gayo berã akaragatiyo ba zio Babera yo rogo gu garã nangia 537 M.B.K. Fuo karaga yo tiyo ku ringara kpuyo yo, nga gu ringara i akpinyemuhe gbe, i akaraga ziazia irisombori kubaha. Fuo i du zanga fudifudiapai, i adudua gayo abambu berewe kubaha na ki ruku abakakue na ki ruku kura ahe atiyo.

Ga Yekova Gbarasangbangaa Ayeaye!

20. Gine si aida pa wisigo ani gu pangbangaa nga ga sapangbangaa Amosa atungusihe kido rani naapaha?

²⁰ Gu wisigopai mangi ani he tipa ga Mbori takapande sapangbangaa nga gu Amosa atungusihe, si naida si nyakasi rani na gupai nga, Yekova nika digiso gbegbereapai adigiso rogo gi gaani uru re. Tipagine rengbe ani ti ni ka ida kuti gipai re? Bambatapai nga, gi kpiaapai nga ga Mbori tipa wai ko amangipai na gbegbere aboro bakuru kusayo re, nayugopa wai ko ka mangapai a kuti gbegbere aboro rogo gi gaani uru re. Uepai nga, pa ga Mbori sapangbangaa kuti gu kindo nangia ga aYisaraere nangia abasamungu re, narugusa gupai bangirani zanga kapa nga, Mbori ayeaye na gbarasarago kuti agu apambori i aya tipaha wee si nga ga aKristano, nga papara ‘Bakerepa Babera,’ nga ngbii zire pambori rẽ tipa i biráha bakere gbe.—Yugoti 18:2.

21. Tipagine agu apambori i aya tipaha wee si nga ga aKristano narẽ ti ni na ga Mbori kere sarangbangaa?

²¹ Anga kango ho tipa gupai nga, agu apambori i aya tipaha wee si nga ga aKristano ima rẽ tipa Mbori saringbangaa kuti ni nikerehe te. Gu gayo kere mangimangiapai nga ga pambori gbiati wasiwasi mangapai na agoho ti ni ka ba tikangoho adunga ti ni ya. Agu apambori i aya tipaha wee si nga ga aKristano, gbiati yangara ga Satana zegino, ima rẽ tipa Yekova saringbangaa kuti ni. Ba ora behe ti ni a te, mbiko ho regbo ka da ni tipa Mbori saringbangaa, agu afugo du rogo Amosa kapita 9, veresi 1, nika manga: “Gu ni aóra nga dagba yo yo ku sa yo wa sa te.” Ii, ka gbegbere aboro vura oka tiyo watadu gbuka kina wari vurũ, Yekova akura akura bara yo.

22. Gini bangiriapai duho tipa ga Mbori sapangbangaa i nasakirogoyo ziazia rogo 2 ATesaroniko 1:6-8?

²² Ti aregbo dunduko, ga Mbori sapangbangaa nidu fu kina agu aboro nirẽarẽ nani, ka boro batinga behe te, na si nasiaka aboro asiaka. Ani rengbe ka bi gipai re nga wo duhe rogo agu afugo nga ga gu mokedi nangia Pauro nayaa: “Mbori amanga kina rurupai, ko afú gberãngbi ni mosoro fu agu yo namanga roni, na ongoda fu agu roni i namanga roni na ani, rago yugo Gbia Yesu ngbangbaturũ yo na amaraika gako tandu ni mirã we. Ko aíra bape fu agu yo aina nga Mbori ya, na agu yo agia nga sangba wene pangbanga nga ga gaani Gbia Yesu ya.” (2 ATesaroniko 1:6-8) “Mbori amanga kina rurupai” ni mosoro rogo gbarasangbangaa fu agu aboro rẽ nani nga agu aboro naye na agberangbii kurii gako mbedimbedi amoyambu. Anga boro ho nika ora be gu sapangbangaa re te, mbiko gbegbere aboro abatanga ti gu regbo i ka ‘yugo Yesu na gako amaraika duna tandu rogo mira we te.’ Ga Mbori sarangbangaa asiaka aboro asiaka a rogo gu gene nga Yesu nika irabape kina kuti agu aboro “aina nga Mbori ya, na agu yo agia nga sangba wene pangbanga nga ga gaani Gbia Yesu ya.” Na gu sapangbangaa nga ga Mbori re, si aye na wasa fu agu agunde ti Mbori narungo be agberangbii.

Maabangirise Tipa Ruru Aboro

23. Gini maabangirise gbiati afugo wasa rengbe ani ka gbiaha rogo gu buku nga Amosa?

²³ Gu sangbanebi nga ga Amosa na bawene pangbangaa nga ga maabangirise rogoho gbiati afugo wasa tipa agu aboro duna ruru ngbaduyo yo. A wa Yekova aima fura tipaha kumbatayo rogo gu buku nga Amosa, ko arunosinga gako aboro kpäkäyä ti gu regbo re te. Niyangaraha, ko adungura agu aYisaraere gbiati aYuda nangia zizi aboro, ki karaga yo ku ringara kpuyo yo na ki fu maku fuyo nimbakada ko bayo na ki sa gayo ahe si naazugo. Gine gipai re ayugoho tipa gi gaani regbo re? Si nasa rani ani du na gu kido berani nga, ti gu regbo nga ga ga Yekova sapangbangaa, ko abi gbegbere aboro abi rogo agu ba dunduko gbuku yo rogoho na ki ini bara agu aboro ko abi yo ya i rẽ tipa ko inipai fuyo, ka i vura kaa raka kina wari auru gi kpotosende re vurũ.

24. Rogo gini agene gu ga Yekova amoyambu du awere nagbia amaku?

²⁴ Wa ani apido gu regbo ga Yekova sapangbangaa nika ye ti ni kuti gbegbere aboro, ginipai namanga fu rani wa du ani nigako ruru amoyambu? Oni ngere, Yekova nafu gu maku fu rani nga ga kumuko rogo toroyo kpaima! Ani nagbia ngbarago be gu irisombori zanga aziree na zanga iraira afugo wa gu namanga rogo agu azire yugopai du rogo agu apambori i aya tipaha wee si nga ga aKristano. Yekova ima fu maku fu rani a na agu ariahe nga ga toro kpaima. Ono tie, ani tingidi gupai nga, agi amaku nga ga kumuko rogo toroyo ani agbiaha be Yekova re, si a nikodikodihe na bakere sunge kupati ni. Mbori naida gupai berani nga ani za aboro tipa gu sapangbangaa naye. Gu nyemupai du tirani si nga ka manga agu apai dunduko du kuvuru berani tipa ka gbia agu aboro ‘duna nyemu gbia nyenye unga.’ (Amokedi 13:48) Ii, ani na nyemu ka undo badungu aboro gbe a wa rengbe omerani nani tipa i ye a ka zio umbaga agi akumuko nga ga toro ani agbia ngbarago behe awere re. Na ani naida i bati be gu ga Mbori gbarasangbangaa naye kurii gbegbere aboro. Rengo ngaha nga, tipa ani rengbe ka gbia ngbarago be agi amaku re, si naida agu apai du ngbadurani yo du niruruhe. A wa ani ka bihe rogo gu papara kekepai naye fuo gere, i nyakasi gipai re a kina rogo gu sangbanebi nga ga Amosa.

Gaoni Karagapai Nga Gine?

• Wai gu sangbanebi nga ga Amosa ayugo gupai nga, ga Yekova kere asapangbangaa nirẽarẽ na agu aboro ko asapaha kutiyo?

• Gini gopai Amosa afuhe ka yugo gupai nani nga, ka boro batinga be ga Mbori sapangbangaa te?

• Wai gu buku nga Amosa ayugo gupai nga, Mbori nasiaka aboro asiaka ka sapangbangaa kutiyo?

[Gu kpiahe du ti kpewaraga 13]

Gu kindo nangia ga aYisaraere abatanga be ga Mbori sapangbangaa te

[Gu kpiahe du ti kpewaraga 15]

Rogo 537 M.B.K., yangara aYisaraere gbiati yangara aYuda karagatiyo ba zio yo Babera yo