Oni Nadia Ga Yekova Undo Kugume?

“Gbia nga gimi mounda; mi agunde nga wa sa te.”—AEBERE 13:6.

1, 2. Tipagine duhe ti ni ninyanyakipa pai ani di ga Yekova undo gbiati arugute kugume rogo gaani raka?

ONI moinga kpia gupai ku berã roni yo nga oni nandu ngba gu gene du ti vuro bagangara. Ono tie, wa oni andu, oni nisaroni te, mbiko bayugu-rago ima ida ka gasa roni, na ko nga bawene bayugu-rago kisusi. Ko na inohe beko gbiati ome susi gaoni, ono ko zeresi ngbaduko kini ndu mbembedii pati roni. Ko nakparia gupai nga, oni nakokota akokota ti kura aregbo. Mbiko wa ko aidanga gbegberepai mangi roni ya, ko nataa beko fu roni tipa ka undo roni rogo gu ba du tigaha nikerehe gbe. Ya mo oni aká aká ya oni aidanga ko undo roni tee? Wagusa te! Ka oni amanganga ha wo ya, oni ngba kerepai.

² Wa du ani ni aKristano, ani nandu ngba kpakarakpakara gene. Ya mo si naida ani ndu ngba gu fitikiri gene re nisarani? (Matayo 7:14) Oó, Ziazia Kekeapai naya fu rani wee gu Bayugu-rago ini gako sunge kisusi, nga Yekova Mbori, naidaha aida fu aboro i naata na ko. (Bambata Pai 5:24; 6:9) Ya mo Yekova naundo gako amoyambu wa i andu? Ko nayaa: “Mi nga Yekova nga ga Mbori, nazada kumba bero; mi du naya foro, ‘Ka mo gúnde nga ya, mi aunda ro [aundo].’ ” (Yesaya 41:13) Wa kina gu bayugu-rago du pako rogo gaani yugopai na kpiapai re, niweneringise Yekova napepa undo aboro na ka zio bakure na yo, nga agu aboro nagbata gene kaa ta na ko. Nirengo, anga boro ho duna nyemu ka ká gu undo ko afuhe re te!

3. Gini asanahe ani ka wisigoho ti regbo gi sakapai re?

³ Rogo gu papara kekepai ye mbata fu gere, ani asakipai rogoho tipa agene biata Yekova anaundo gako aboro ngbaha ti agu aregbo nadu bakuru kusayo. Ya mo ko naundo gako aboro areme kina ngba agu agene duwa kina agu nadumbata re? Na wai rengbe ani ka rugatirani na gupai nzunzu nga, ani nadia ngbatunga gi gako undo re adia dunduko kugume nirengo? Ani wisiginga agu asanahe re. Pa manga ani he wo rengbe ka sa rani ani du naa kido gbe nga, Yekova nirengo nga gaani Moundo.—AEbere 13:6.

Gu Undo Amaraika Afuhe

4. Tipagine rengbe gu ga Mbori amoyambu du areme kadu ti ni naa kido ya amaraika kinaho ka undo yo?

⁴ Ya mo amaraika naundo gu ga Yekova amoyambu du areme? Ii, i naundo yo aundo. Rengo ngaha nga, i akuranga areme gbaiga fu aboro tipa ka batasa ndikidi airisimbori be kerepai te. Zavura ti agu aregbo i aakeka Ziazia Kekeapai ti ni, kina ti kura aregbo gbua i anakura fu aboro gbaiga wa ngbatunga gure. Dungu agu apai i anamangaha anidu niokõokõho ti bangiri aboro a wa i amangaha areme. Wa si anivura du wo, gu rugatinapai ga Mbori amoyambu anidu nani nga, amaraika anidu kinaho ka undo yo, si anafu ngara afu fuyo. (2 Abakindo 6:14-17) Ani na wene ndupai berani ka berã wa kina gure a.

5. Wai Ziazia Kekeapai ayugo gupai nga, amaraika namanga papara gu sunge nga ga tungusapai amanga areme?

⁵ Ga Yekova amaraika na nyemu gu kparakpara sunge tiyo gbe kodi yo rani kurogoho. Gini sunge du ngaha? Ani rengbe ka bi karagapai sa gi sanahe re rogo Yugoti 14:6: “Mi ki bi kura maraika, ko nigu bebere ngbangbaturũ yo, nyenye pangbanga ki du ngbako yo ka tungusa ha fu agu yo dunduko naraka auru kpotosende, na fu arikaaboro, na ngbatunga aboro, na ngbatunga afugoyo, na aboro.” Si ziazia nga, gi “nyenye [wene] pangbanga” re nikodikodihe kuti gu “wene pangbanga nga ga ngbi [“kindo,” NW ],” nga gu Yesu afura tipaha kumbatayo ya “i atungusa ha [atungusa] rogo zegino dunduko mbiko ndika fu arikaaboro dũ” mbata gi zegino re nika digo. (Matayo 24:14) Rengo ngaha nga, amaraika atungusanga pai ngburungburu te. Aboro Yesu afu gi nyanyakipa sunge re fuyo. (Matayo 28:19, 20) Anga si nangarasa rani ka ino gupai nga, wa ani amanga gu sunge re, ziazia amaraika, nga agu aboro nga atoro duna tatamana gbiati ome naundo rani nani tee?

6, 7. (a) Gine nayugo gupai nga, amaraika nasongoda gaani sunge tungusapai asongoda? (b) Ginipai ka ani mangihe tipa ga Yekova amaraika rengbe ka undo rani?

⁶ Bakere gopai gu duho nayugo gupai nga, amaraika nasongoda gaani sunge asongoda. Nikpiapai, ani naagia gupai dedede aDezire Yekova nigumbaha nga, wa i aamanga gayo sunge tungusapai, i akurubara gu boro nyasi na kpee fu Mbori bambeda tipa ko undo ni ni ini rengo. Ngbatunga agu apai re namanga dedede gbe ka si aidanga ani bihe nigu kungboapai gbua namanga nisaha ya. Nisangbana gu undo amaraika afuhe re, dungu aboro nawirikapai ka manga wa gu “[maraika naagu] bebere ngbangbaturũ yo” azinahe fu aboro i mangihe nga: “Oni gúnde ti Mbori, ki taasi rimoko.”—Yugoti 14:7.

⁷ Oni nakpinyemu gupai nga, gu ga Yekova amaraika duna tandu songodi roni? Oni mangi gupai tie naabaha rengbe oni ka mangaha rogo gaoni sunge tungusapai. (1 AKorindo 15:58) Wa ani afu tirani ka manga gi kparakpara sunge re pusiapusia, nga gu sunge Yekova afuhe fu rani, ani rengbe arengba ka kido kuti gu undo amaraika afuhe.

Undo be gu Gbia Nga ga Amaraika Ko

8. Gini tumbatumba ba du Yesu rogoho ngbangbaturũ yo, na tipagine si asa rani ti ni ani du naa kido?

⁸ Yekova nafu gu kura ngbatunga undo afu vurube maraika fu rani kurii gure. Yugoti 10:1 naringbisapa iiriwo “nyanyaki maraika” du “kpakpuko . . . wa uru.” Wa gopai ayugoho, gi maraika nadu rogo yuguyugupai re narukuba Yesu Kristo rogo gako taarimo nga ga ngbangbaturũ. (Yugoti 1:13, 16) Ya mo Yesu nirengo nga maraika? Ii nirengo, mbiko ko nga bakumba maraika watadu gayo gbia. (1 ATesaroniko 4:16) Da nga bakumba maraika? Rogo gu fugoyo re nga “bakerepa maraika,” watadu “gbia nga ga maraika.” Yesu nga gu wiri Yekova duna tandu tiko kisusi kura awiri Yekova dunduko. Yekova amoi agu ariivura dunduko nga ga amaraika kutii beko. Gi gbia amaraika re nga mburu undo duna bakere ome nirengo. Rogo gini gene?

9, 10. (a) Wai Yesu amangasunge ni gaani “Azarõ”? ho ani amanga ingapai ni? (b) Gini undo rengbe ani ka gbiaha rogo ga Yesu kpiapai?

⁹ Gu gbinza mokedi nangia Yoane akepai ki yaa: ‘Ka boro ingi pai, Azarõ be rani nga Yesu Kristo, nga ruru boro yo du Mbori ni nga Ba.’ (1 Yoane 2:1) Tipagine Yoane afu gu berã ti ni ngawee Yesu nga gaani “Azarõ,” gbe, ho ka ani “ingi pai” ni? Oni ngere, ani namanga ingaapai na a’uru dũ, na ingapai nandu na boro sa kpio. (Batungusipai 7:20; ARomo 6:23) Ono tie, Yesu afu gako unga nimotumo tipa gaani ingaapai. Na ko sungu pati gu Barani nga boro inapai tipa ka zungodi ko tipa rani. Ani dunduko nibasasa naida ngbatunga gu undo re. Wai tie rengbe ani ka dia gu undo re kugume? Si naida ani sa gaani berã ti gaani ingaapai na ki sana Mbori ko mbupai fu rani ti ni riimburu ga Yesu motumo. Si naida gupai a nga ani ne fugö manga gaani ingaapai.

¹⁰ Kupati kpi Yesu tipa gaani ingaapai, ko amoi rengberengbe kpiapai fu rani. (1 Petero 2:21) Gako kpiapai nayugo gene fu rani, kini undo rani ani mbakadi gaani gene raka tipa ka ne manga kere ingapai, si ki ta du wo, ani kini fu ngbarago fu Yekova. Anga ani na ngbarago tirani ka dia ngbatunga gu undo re kugume tee? Yesu akido apefuo ko ya ko afu kura moundo afu fuyo.

Gu Undo Nga ga Ziazia Toro

11, 12. Gine nga ga Yekova toro, wai kii omehe, na tipagine du ani ti ni areme na zingo tipaha?

¹¹ Yesu akidohe ki yaa: “Mi akpara fu Buba, ko fu kura Mounda fu roni, ko nye anye na oni kindi, nga gu Ziazia Toro nga irarengo, gu ko ka aboro adia nga ko ku gume zegino dunduko ya.” (Yoane 14:16, 17) Gi “Ziazia Toro nga irarengo” re, anga si nga boro te ono si nga ome, nga ga Yekova zaaza ome. Digido gaha ome ti ni te. Si nga gu ome Yekova amangisunge nani ka kusa haurago na agu ahe du rogoho, ka manga iiriwoapai, na ka fu yuguyuguapai tipa agu apai ko akpinyemuhe. Wa duhe nga Yekova amanganga sunge na gako toro ngba gu kparakpara agene re areme te, ya mo si nayugo gupai nga, ani na zingoho tirani tee?

¹² Wagusa te, ani naidaha aida! Rogo gi “gbegbere aregbo . . . du nikpakarakpakaraha ka mangapai sani” re, ani naida ga Yekova toro susi gu nidu mbata. (2 Timoteo 3:1, NW ) Si nanyakasa rani ani hi fudifudiapai. Si naundo rani ani sonosi wene asino nga agu asino nambedisa rani koyo du Yekova ni na koyo du agu awirinarani ni nga ga toro yo. (AGaratio 5:22, 23) Wai tie rengbe ani ka gbia undo be gi wenepai Yekova nambakadihe re?

13, 14. (a) Tipagine rengbe ani kadu ti ni naa kido ya Yekova afu gako ziazia toro afu na ngbarago tiko fu gako aboro? (b) Gini ngbatunga mangaapai rengbe ani ka yugo gupai nani nga, ani adianga gu gamahe nga ziazia toro kugume te?

¹³ Nibambatapai, si naida ani kparikpee tipa ziazia toro. Yesu ayaa: “Oni, wa vura du oni nigbegbere aboro ki ima ino pa gama wene ahe fu awironi, angbatika gu Baroni du ngbangbaturũ yo nga wene boro susi roni, ko ima susa rogo gama ziazia toro fu agu aboro nasana ko!” (Ruka 11:13, NW ) Ii, Yekova nga gu Barani ngbaa sinoko kisusi gbe. Kangia ani nasana ko nirengo rogo idapase tipa ziazia toro, ko afuhe afu fu rani nirengo nigaani gamahe. Gu sanahe tie duho nga, Ya mo ani naasanahe tipaha? Ani na wene ndupai berani kaa sanahe tipaha na a’uru dunduko rogo gaani akpee.

¹⁴ Niuepai, ani nadia gu gamahe re kugume nimanga ani pai ringbisihe kuti gaha gene mangaapai. Ani yugunga ha na kpiapai: Ani ya Kristano gu duho nasota ka mbu bi agu ahe gbiati gu kekeapai nazingisa nyemu kodaba ti boro. Ni ima kparakpee tipa ziazia toro undo ni ni sovura kuti gi bibirikopai re. Ni aima ndu fuo agu aKristano nga abaakumba rogo dungurati tipa undo, na i ki fu arugute funi ni mangi nyanyaki diaberã, ka mbu bi gu gbegbereapai re na zavura ka zanga mbeda kina kandara mbeda kupati ni a. (Matayo 5:29) Ginipai ka mangi ka ni basa gayo arugute na kini biki agu ahe re na kini gedipaha kindi ho asada aye ni funi? Ya mo ni namangapai ringbisihe kuti gani akpee tipa ziazia toro undo ni? Watadu kuba gure, ni ngba gu kerepai nga ga rungosi ga Mbori ziazia toro na ki kpa ti gbia gi gamahe nga ga ziazia toro re? (AEfeso 4:30) Ka pe rengo, ani dunduko si aida ani mangi gupai rengbe ani ka mangaha tipa ka rugatirani na gupai nga, ani kindi ngba gene kaa dia gi wene gamahe re be Yekova.

Undo be Fugo Mbori

15. Wai rengbe ani ka yugo gupai nga, ani abinga Ziazia Kekeapai naapaha taata te?

¹⁵ Ziazia Kekeapai aima du nga mburu undo fu ga Yekova ruru amoyambu tipa dungu akama agarã. Ono tie, kuba gupai nga ani bi Ziazia Kekeapai naapaha gbua taata, si naida ani moi gupai ku berã rani yo nga, si nga mburu bakere ome kisusi. Pa dia ani gu undo re kugume naida bakere asadatise berani. Si naida ani sa geda Ziazia Kekeapai nipapara gupai ani amangaha dedede rogo gaani raka.

16, 17. (a) Wai Atambuahe 1:2, 3 aringbisapa agu amosoro du ti geda ga Mbori andiko? (b) Wai Atambuahe 1:3 ayugopa mangasunge nyanyakii?

¹⁶ Atambuahe 1:2, 3 nafura tipa gu boro nga vurumbori niyaa: “Gani ngbarago du rogo gu rugute nga ga Yekova, ni namakia pa gako rugute uru na yuru. Ni adu wa kina gu ngua i nirũ ti ngba di, si ki nizuku ti regboho, ka kpehe auga nga ya. Gu pai ni amanga, si adu na wenepia.” Oni kparia gu nyanyakipa pai du rogo agu averesi re? Si taata boro gedi agu afugo re na ki dakuti gu digisopai nga, si nafura tipa kungbo bawene kpiarago du nizezeredihe, nga pa gu ngua duna nzeremehe ti ni nasona tingba di. Nangbaa wai ka boro ongodi tii gu ngua re fuo susa bebere uru na ki uka wiri rame tooni ti bangirini! Ono tie, anga agi abia Tambuahe re naida ani berẽpa ongoda tii ngua te. Si nafura tipa kurapai kia ti gure, nga gu nafu gu berã du tipa mangasunge nyanyakii. Ngba gini gene?

¹⁷ Oni kparia gupai nga, anga gi ngua re gbua nga gu ngua-nzereme nasona nisaha tingba di te. Si nga gu ngua nazuka azuzuhe, i ‘arũhe arũ’ rogo gu ba i asiaha, nga “ti ngba di.” Ginipai gu veresi re aida ka gumbaha fu rani? Rogo ati agu angua ruku yo ho tipa zuzuhe, baira ati rengbe ka geteka agene-ime tipa ime naafu ngbaha kaa tuda atarã gu kikindigipa angua re. Ii rengo, ani rugutirani tie awere na gupai si agumbaha! Kangia ani nafuna rogo toroyo wa kina gu ngua re, si nayugo gupai nga, bakere sunge gu duho kura aboro amangihe tipa rani. Ani rogo gu riigbu naye na ziazia ime nga ga rengo kina boro fu rani, ono si naida ani mangi gu papara sunge nga gaani tipa ka mbira gu ime re. Si naida ani mangi gupai nika undo rani ani rengbe ka mbira gi kikiipa ime re, nga kita wetekapai kini berẽkuriihe tipa ka maa agu arengo du rogo Fugo Mbori ku berã rani yo na ku ngbaduraniyo. Rogo gu gene re, ani arengba a ka zuka wene zuzu ngua.

18. Gine si aidaha ani mangihe tipa ka gbia agu akaragapai nga ga Ziazia Kekeapai sa gaani asanahe?

¹⁸ Ka Ziazia Kekeapai nye nikina kisikisihe rogo bamaa abuku, si aundonga rani te. Na anga ũsangbaatoro watadu ũabinza ngaha te, si aida ani kisi bangirani, ki tona zaraha ku bitimo, na fuo gure ani kini berẽ gupai nga, ani nika bi karagapai kuti gaani sanahe kina boro ti gu kpewaraga nzunzu ani ka zaraha barabangirani te. Ho si aida ni ani mangi diaberã, si naida ani gbata gu ‘inohe du tipa Mbori’ wa ka ani agbata rago tipa gu ũkumuko du niokõokõho. (Asanza 2:1-5) Wetekapai sirisiri zanga nyomoro ni gupai si aida ani naamangaha dedede tipa ka gbia gu rugute nga ga Ziazia Kekeapai nafura tipa gu kparakparaapai du ani na zingoho. Ani na dungu agu abuku du mburuhe rii Ziazia Kekeapai berani tipa ka undo rani rogo gi gaani wetekapai re. Wa ani amangasunge na ngbarago nani ka gbata gu bawene tatatamana du rogo Fugo Mbori, gure nga ani nagbia undo nirengo be agu ahe Yekova afukaha fu rani.

Undo be Akuarani Aidipase

19. (a) Tipagine rengbe ani ti ni ka bi gu papara kekeapai du rogo Ngbaõbambu Sinziri na Awake! nigu undo akuarani aidipase nafuhe fu rani? (b) Wai kparakpara papara kekepai sa rogo gaani amagazini aundo roni?

¹⁹ Dedede, wo gu ga Yekova amoyambu nga aboro naaundo tiyo dagbayo. Ya mo Yekova ima aria gi sinoko nga ga fu undo fu gako aboro rogo akurayo yo re? Wagusa te. Zanga kapa, ani rengbe arengba wa du ani nibasasa ka tingidapa gu regbo ani agbia undo be kuarani idipase, nga kina boro gu undo nzunzu ani aidaha na ti kina boro gu regbo nzunzu ani aidaha ti ni. Nikpiapai, oni rengbe ka tingidapa gu papara kekeapai nadu rogo Ngbaõbambu Sinziri watadu Awake! nga gu nafu wasa fu roni ho oni aidaha ni watadu nga gu naundo roni oni mbakadi gupai naafuda roni watadu oni ru nyanyakii kuti gu asada naye sa gaoni idapase? Yekova aye na gu undo re fu roni rogo gu gene nga ga ‘ruru kangara moyambu’ nga gu moyambu i afu gu sunge fuko nga ga fu ‘riahe [fu aboro] ti wene regboho.’—Matayo 24:45-47.

20. Rogo agini agene agu aKristano nga abaakumba rogo dungurati ayugo gu gopai nga, i nga “agamahe rogo aboro yo”?

²⁰ Ono dedede tie, gu undo ani naagbiaha be akuarani aidipase, i nifuhe ngburungburu kina boro fu rani. Wa gu nga, gu Kristano nga bakumba rogo dungurati namanga gu gumbapai nazio ngbaduraniyo, watadu ko naye ka bi rani kpuraniyo ki ngarasi rani na agu afugo naundo rani ti regbo kpakarakpakarapai, watadu ko nafu arugute fu rani rogo weneringise nga gu naundo rani ani dibe gupai ani arungbura rogoho. Kristano sa nga guri duna tambuahe akepai tipa gu undo bakumba afuhe furi, si nayaa: “Ti kura regbo ani adu tingba sunge tungusapai na bakumba sa, ko adi regbo ka sana re tipa ka rugatiko naapa agu apai nadu tipa re. Kina boro rogo gu yuru nadumbata fu gu uru re, mi asana Yekova tipa ko fu gu boro fere mi ka peka agu apai funi nafuda re. Rogo gu uru naye fuo gure, gi wirina re afura fere rogo gu gene nga ga nunga. Ko aundo re mi bi wai Yekova aima digo niundo re tipa dungu agarã. Mi na tambuahe fu Yekova tipa keda ko gi bakumba re fuo re.” Rogo ngbatunga agu agene re naabaha dunduko agu aKristano nga abaakumba rogo dungurati ayugo gupai nga, i nga “agamahe rogo aboro yo” Yekova afu yo rogo Yesu Kristo yo i undo rani ani hipai wa ani andu ngba gene unga.—AEfeso 4:8, NW.

21, 22. (a) Ginipai namanga ho agu aboro du rogo dungurati amanga agu arugute ni du rogo AFiripoio 2:4? (b) Zavura gu rukutu mangaapai nga ga weneringise, tipagine duhe ti ni na nyanyakipaha?

²¹ Kodihe na abaakumba, ruru aKristano nibasasa naida ka manga gu zinahe naye be ga Mbori toro nga, “ka oni bérẽ nga pa kina gaoni pai ya, ono oni bérẽ pa ga akuaroni apai [a].” (AFiripoio 2:4) Ho agu aboro du rogo gu dungurati nga ga aKristano amanga agu arugute ni re, sangbanaha nga wene mangaapai nga ga weneringise. Nikpiapai, aborokporo sa arungo be gu dungu agberango nati kuriyo ti bangisa regbo sa. Bairakporo adi gu wiriko nangia degude ki ndu na ri ku bambu bagaahe yo. Wa i aakaraga tiyo ku kporo yo, béno amangi yo nga ga tarambiri. Gi degude re akpi; bari ki oko gbegberee. Fuo i kusi ko bambungua yo, ko aima gbara gbegberee ka gene adunga beko wa ka ko mangi wiripai tipa tiko ya. Rii diako yo avundu nikerehe ka ri arengbanga ka ngerafuo ko nisari ya. Sidu, arogotise ue rogo dungurati adi agi aboro naarungo re ku kpuyo yo ki ngerefuo yo tipa dungu aposo.

²² Rengo ngaha nga, anga gu mangaapai dunduko nga ga weneringise, si tipa kina banaru agberango wa ngbatunga gure na naida agu aboro nafu undo mbupa kura gayo apai wa kina gure te. Ani nagbia gu kura bete aundo agbia nga gu umba ti gure. Ono ka gu mangaapai nga ga weneringise re vura umba wai, ani nidu adu na tambuahe tipaha, anga wo tee? Oni rengbe ka berẽpa agu aregbo ho wirina agumba wene afugo ni watadu amangi wenepai ni si kingia kina boro gupai nzunzu oni aidaha? Agu agene re du Yekova angerafuo rani dedede ngbaha.—Asanza 17:17; 18:24.

23. Wai Yekova abi gu nyanyaki asadatise ani amangaha ka undo akuarani?

²³ Oni nakpinyemu Yekova mangisunge na oni tipa oni undo kura aboro? Ngbadimo gu mamu re nizakizakihe fu roni. Nirengo, Yekova nabi ngbatunga gu asadatise re na nyanyakipaha. Fugo ko nayaa: “Gu boro du na nunga rungorungo boro ti ni nafu he fu Yekova, tipa gani wene mangapai ko afú mosoro [afu] fu ni.” (Asanza 19:17) Bakere ngbarago naye fu rani ho ani afu tirani ni ka undo awirinarani. (Amokedi 20:35) Agu aboro nakpara tiyo kaa sungo nisayo, i agbianga gu ngbarago naye fu boro tipa fu ni ngbatunga gu undo re te watadu gu wasa naye fu gu boro i afu undo funi a te. (Asanza 18:1) Sidu, niruru mangaapai, ani naadungura tirani kindi tipa agu adunguratise nga ga aKristano tipa wa ka ani ngarasi tirani dagbarani.—AEbere 10:24, 25.

24. Tipagine si aidanga ti ni ani berẽ ya Yekova nabengeta rani abengeta na gu baiiriwoapai ko amangihe bakuru kusayo ya?

²⁴ Anga si nipa ngbarago ka berãkurii agu agene Yekova aundo rani ngbaha tee? Wa ani avuranga kaa raka ti gu regbo Yekova amanga baiiriwoapai ka digiso gako ringbisaapai nani ya, si aidanga ani berẽ gupai nga, ko nabengeta rani abengeta na gi mamu re te. Gupai nyakipaha gbe nga, Yekova nafu agu aundo afu dunduko si aida si du berani tipa ani nye niruru rani fuko. Na ka ani mongo hipai wa du ani dũ rogo idapase, ani aduadu ti unga ka bi gu ga Yekova mangaapai iriwo kisusi wa rago aenge aenga kindi! Ani dinga berã ka dia ga Yekova undo kugume na ki mangisunge nani bakere gbe tipa wa ka ani rengbe ka fugö agu afugo du rogo gu gaani veresi nga ga gu garã nga 2005 nayaa: “Gi undahe naye be Yekova.”—Atambuahe 121:2.

[Gu kpiahe du ti kpewaraga 18]

Ginipai Oni Aberãha?

Wai Yekova afu gu undo ani aidaha areme—

• rogo amaraika yo?

• rogo gu gene nga ga gako ziazia toro?

• rogo Fugo ko gako toro adu kugiipa kehe?

• rogo akuarani aidipase?

[Gu kpiahe du ti kpewaraga 15]

Si ni gupai nangarasa rani ka ino gupai nga, amaraika nasongoda sunge tungusapai asongoda

[Gu kpiahe du ti kpewaraga 17]

Si rengbe kadu nga Yekova namangasunge na kuarani idipase ni fu gu wasa fu rani ani aidaha