Gu Mboimboiapai Nadu Tipa Ga Mbori Kindo Ada Nirengo

“Ka oni kuti ni [gu fugo nga ga sangbanebi] ngba, wa kuti gu we nahasa rago rogo bitimo.”—2 PETERO 1:19.

1. Gini kparakakparakapai ani abihe rogo zegino areme?

FUDIFUDIPAI fuo fudifudipai. Gure nga bangua fugo tipa agu apai namanga rogo zegino areme. Tona ti gbarasa arago na gu ungaahe naraka rogoho gbiakuti gu vura nga ga abamoi rogo zegino dũ, ome gu fudifudiapai namanga ngbatunga aboro nawira si namaapai kina kumbatayo. Zavura agu apambori nga ga zegino si arengbanga ka undo gipai re te. Nirengo, apambori dedede nasa gupai nga apai naagberã kina kumbatayo mbiko gaha kakuti nyakasapa kungboapai, zingisa sogote, na nyakasapa angbatunga nga agu apai naye na kparakapai dagba aboro. Ii, a wa i agumbaha kumbatayo, “nduunduu bitimo” ima dada “aboro.” (Yesaya 60:2) Ono tie, ti kina gi bangisa regbo re a, amirioni aboro naa maabangirise kumbatayo naa kido zanga kapa. Tipagine duhe ti ni wo? Bambiko i nadegatuyo kuti ga Mbori sangbanebi “wa kuti gu we nahasa rago rogo bitimo.” I nambugene fu ga Mbori “pai” watadu fugo ko, nga gako pangbangaa, nga gu du awere nikekehe rogo Ziazia Kekeapai, si yugu gene fuyo.—2 Petero 1:19.

2. Kuti gu sangbanebi nga ga Daniere nibipa “digida rago,” kina ada sa i nafu gu tatamana nga ga toro fuyo?

² Nibipa ‘digida rago,’ gu nebi nangia Daniere akepai ki yaa: “Dungu aboro nikaora koyo na kono, inahe amáa pai. Dungu aboro akpúruka tiyo, ki girisi tiyo, ki mbakadi tiyo; ono gbegberẽ yo amánga pai ni gbegberẽ he. A nga guni sa dagba gbegberẽ yo yo nikaruga tini na pai te; ono agu yo du ni airatatamana i nikaruga tiyo na ni.” (Daniere 12:4, 10) Gu tatamana nga ga toro nibandabandaha sa tipa kina agu aboro nirengo ‘naora koyo na kono’ rogo wisigo Fugo Mbori zanga nyomoro, kini ra kutii gako arugute, na kini asaditiyo ka manga gupai ko akpinyemuhe.—Matayo 13:11-15; 1 Yoane 5:20.

3. Rogo agu agarã nangia ga 1870, gini nyanyakipa rengo bambata abawiriki Ziazia Kekeapai akpariaha?

³ Naima tona bakuruyo kina rogo agu agarã nangia ga 1870, mbata fu tona ‘yangara arame,’ Yekova Mbori atona ka fu imarago kurii “gu gbugbu pai nga ga gu ngbi nga ga ngbangbaturũ.” (2 Timoteo 3:1-5; Matayo 13:11) Ni gupai nadu kia ti gu berã nadu bangiri aboro dunduko ti gu regbo re, badona abawisigi Ziazia Kekeapai akparia gupai nga, paye Yesu berewe adunga gbaiga tipa bihe nibangirise te. Fuo i moi Yesu rii mbatabakindo ngbangbaturũ yo, si adu nga ko akaraga tiko rogo gu gene nga ko amaa gako berã nga ga pagbia tipa zogarago auru kpotosende. Si adu nga kodikodi bange agu apai i aino apai ti ni, nga agu apai i ka bihe abi nibangirise, nika yugo gupai fu gako abawiriki nga, padu ko ho ti ni zanga aboro biko ima tona.—Matayo 24:3-14.

Gu Regbo Mboimboipai Ada ti ni Nirengo

4. Wai Yekova nanyakasi gu idapase nga ga gu gako amoyambu du areme?

⁴ Gu yuguyugupai nangia ga sakpoto Yesu tihe angia ziazia mboimboipai tipa du Kristo rogo taarimo nga ga Kindo. (Matayo 17:1-9) Gu yuguyugupai re anyakasi gu idapase nangia ga aPetero, na Yakoba, gbiati Yoane ti gu regbo dungu abawiriki aima mbu pekafuo Yesu, bambiko ko amanganga gu gayo apai i aberãha ya ko amangaha te nga agu apai naadunga rogo sangba Ziazia Kekeapai yo ya. Teketeke wa kina gure a, ti gi digido rago re, Yekova ima nyakasa gu idapase nga ga gu gako amoyambu du areme ni tiga ko bakere imarago kurii digisidigisi gu iiriwo yuguyugupai re gbiati dungu sangbaanebi a nga gu duna ngbanyaa dagbaha nani. Ani wisiginga bete agi arengo nga ga toro nanyakasa idapase re awere.

5. Da nayugu gupai nga ni nga Tungu, na gini regbo nadu na wai ko ‘akuru’?

⁵ Nifura ko tipa sakpoto Yesu tihe, gu mokedi nangia Petero akepai ki yaa: “Sidu tie ani na fugo berani nga sangbanebi nga gu i aima nyakasaha berewe gbe; na oni namangapai wenengai nimaa oni berã roni kuti ni wa ka boro angana gu ramba naki rogo bitimo ngbaduroni yo, daho tungu nika kura ni na rago ki giri.” (2 Petero 1:19, NW ) Gu kerekuru nga Tungu, watadu gu “taataa kerekuru nga ga wiso ru” re, u narukuba Yesu Kristo rogo gako taarimo. (Yugoti 22:16) Ko ‘akuru’ rogo 1914 ti gu regbo i asigira ga Mbori Kindo ngbangbaturũ yo, si kini yugupa gu wiso nga ga vovo regbo. (Yugoti 11:15) Rogo gu yuguyugupai nga ga sakpoto Yesu tihe, aMose na Eriya akuru ki rundu pati Yesu, kini fura na ko. Ada i arukuba yo naaye kumbatayo?

6, 7. Ada aMose na Eriya arukuba yo rogo gu yuguyugupai nga ga sakpoto Yesu tihe, na gini nyanyakipa futufutuapai Ziazia Kekeapai ayugoho tipa agu aboro i arukuba yo re?

⁶ Wa duhe nga aMose na Eriya adu rogo ga Kristo taarimo, gi ruru adezire du ue re narukuba agu aboro nika zogarago na Yesu rogo gako Kindo. Gi giarogopaiyo nga si adu nga Yesu nika du rogo zogarago na kura aboro re, si na ngbanyaa dagbaha na gu yuguyugu mboimboipai nga ga sungo Masiya rii mbatabakindo nga gu i ayuguhe fu gu nebi nangia Daniere. Daniere abi “boro wa wiri boro” ko nidi “nyenye zogarago, nga gu nikanyasa nga ya” be “gu Bakuru Ko” nga Yekova Mbori. Ono oni makianga gupai i ayuguhe fu Daniere fuo regbo ngbutuko fuo gupai re. Ko akepai ki yaa: “I afu ngbi na pa zogarago na gu nyaka nga ga angbi tii ngbangbaturũ no dunduko fu agu aboro nga ga ziazia yo nga ga gu Ko nga Bahe ki susi.” (Daniere 7:13, 14, 27) Ii, susi agarã bisue kama kusayo mbata fu sakpoto Yesu tihe, Mbori ayuguhe ya kparakpara ‘ziazia aboro’ aduadu na Kristo rogo gako bawene zogarago.

⁷ Ada nga gu ziazia aboro du payo rogo ga Daniere yuguyugupai re? I nga ngbatunga agu aboro gu mokedi nangia Pauro aya tipa yo wee: “Toro nga dezire ni tiko na tororani ya awiri Mbori nga ani. Ka ani du ni awiriko, ani du adu ni adikumbo, ni ga Mbori adikumbo, ki gbia tirani ni adikumbo na Kristo; ka si du wa ani nahi pai na ko ani amongo du ni taasitaasi rani a na ko.” (ARomo 8:16, 17) Anga gu ziazia aboro re nga kura aboro te, i nga gu ga Yesu abawiriki du nimbedimbediyo niziazia toro. Rogo Yugoti, Yesu ayaa: “Gu ni ka di be pai, mi aásia pa sunga na mi fu ni auru gi mbatabakindo, wa mi adi be pai ki sungu na Buba auru gako mbatabakindo.” Agi aboro nika zingabekpio re, nga ‘adibepai’ du bangeyo nga 144,000, i akodatiyo na Yesu, ka zogarago auru kpotosende dunduko.—Yugoti 3:21; 5:9, 10; 14:1, 3, 4; 1 AKorindo 15:53.

8. Wai ga Yesu mbedimbedi abawiriki amangisunge wa ga aMose na Eriya, na sangbanaha nga gine?

⁸ Ono tie, tipagine aMose na Eriya aru ti ni kuba mbedimbedi aKristano? Ndu gupai re nga ngbatunga agu aKristano re, ho du yo ni kindi ni aboro auru kpotosende, i namangasunge teketeke wa kina gu aMose na Eriya amangihe. Nikpiapai, i namangasunge ni ga Yekova adezire, zavura ho du yo ni rogo rungosi vurũ. (Yesaya 43:10; Amokedi 8:1-8; Yugoti 11:2-12) Wa kina aMose na Eriya, niwingbaduse, i nayugopa agu apai nga ga zire pambori gbaiga na kini zungadi airarengo i fu kparakpara iriso fu kina Mbori sa. (Gate 32:19, 20; Pa Fu Rugute ni Ue he 4:22-24; 1 Abakindo 18:18-40) Ya mo fuö gayo sunge na azuzuhe ti ni? Zanga kapa, ii! Kupati gu undo i afuhe tipa dungura gu yangara mbedimbedi aboro, i aundo amirioni “kura akandoro” a i yugu gupai nga i nara na goyo fu Yesu Kristo.—Yoane 10:16; Yugoti 7:4.

Kristo Anyasi Gako Diabepai

9. Wai Yugoti 6:2 aringbisapa Yesu wa du ko areme?

⁹ Yesu areme ni Bakindo na ome tiko, ko berewe ni kungba boro sungu auru paranga wiri dongi te. I naringbisa pako wa ko naora rii farasi, nga gu yugokpiapai nga ga Ziazia Kekeapai du tipa sovura. (Asanza 21:31) Na Yugoti 6:2 nayaa: “Oni ngére, mi ki bi farasi ni pusi ru, mboto ki du be gu ko nasungu auru ru; i ki fu kpakpari fu ko. Ko ki ta kura nidi be apai, ki ndu ka dia be apai.” Kurii gure, gu bake apapara Atambuahe nangia Davide akepai tipa Yesu ki yaa: “Yekova nataã gako ngbondo ome Siona yo. Mo zógo rago dagba avuraro!”—Atambuahe 110:2.

10. (a) Wai ga Yesu oto ka diabepai atona nitaasitaasihe? (b) Ginipai ga Yesu bambata diabese amangihe tipa zegino dunduko?

¹⁰ Ga Yesu bambata diabevura adu kurii agu avurako duna ome kisusi, nga Satana gbiati adaimona. Fuo kusa ko yo kusayo ngbangbaturũ yo, ko abafu yo ku auru kpotosende no. Ni ino yo gupai nga gayo regbo niguruhe, gi gbegbere atoro re asa gayo kere zinga kurii ngbatunga aboro, si kini fu bakere rungo. Pa gi rungo re niyuguyuguhe rogo gu buku nga Yugoti be gu mangaapai nga ga gu kura abaoro rii afarasi nadu biata. (Yugoti 6:3-8; 12:7-12) A wa duhe rogo ga Yesu sangbanebi nibipa agu apai “i ka ina pa [gako] ye ti ni, na pa digida rago,” sangbana gayo oto ningia avura, angbongi, na kere akaza. (Matayo 24:3, 7; Ruka 21:7-11) Wa kina ndikidi aegetera vungu, agi ‘arungo re’ zanga kapa, si nikaa maapai kindi kina kumbatayo daho Kristo nika ‘nyasa gako diabepai ni’ nigbarasa ko yangara apapara ga Satana riigbu naabaha nga gu i abihe abi.a—Matayo 24:8.

11. Wai gu kuru pangbangaa nga ga gu dungurati nga ga aKristano afu dezirepai tipa ga Kristo tandu nga ga pagbia?

¹¹ Ga Yesu tandu nga ga pagbia niyuguyuguhe a rogo gupai yo nga, ko nabanda gu dungurati nga ga aKristano, tipa si rengbe ka manga gaha sunge nga ka tungusa gu pangbangaa nga ga Kindo rogo zegino dunduko. Zavura gu kere rungosi namanga tipa sunge tungusapai be Babera duna ome ti ni, nga ngbii zire pambori, na be agu azogarago nasoga ndikidi pambori, sunge tungusapai asusanga kina kungbo susa sa gbua kumbatayo te, ono si ima maapai kisusi gu paha si adumbata ngbaha rogo gu kuru pangbangaa nga ga zegino. (Yugoti 17:5, 6) Nairiwo gu banyanyaki dezirepai du tipa ga Kristo zogarago ni bakindo re!—Atambuahe 110:3.

12. Tipagine dungu aboro akparianga padu Yesu ti ni ho zanga i biko nibangirise ya?

¹² Ono tie, si nafu kina gberarago nga, dungu aboro kisusi, kodi gu dungu amirioni yo naya tipa tiyo wee i nga aKristano, i arengbanga ka kparia agu arengo i abingaha nibangirise ya du gii gu nyanyakipa apai namanga auru kpotosende re te. I nasawia agu aboro a natakapande ga Mbori Kindo. (2 Petero 3:3, 4) Tipagine duhe ti ni wo? Bambiko Satana ima kiso gayo aberã. (2 AKorindo 4:3, 4) Nirengo, tipa dungu kama agarã, ko aima tona ka dada agu aboro naya tipa tiyo wee i nga aKristano, na gu bitimo nga ga toro kini sa yo a i mbu gu kikiipa maabangirise nga ga Kindo.

I Ambu gu Maabangirise Nga ga Kindo

13. Ginipai gu bitimo nga ga toro andu na aboro sani?

¹³ Yesu aima gumbaha kumbatayo ya, wa kina gu i nimi tunga rende dagba marũ, asamungu kuti ndikidi pambori nika rimo kurogo gu dungurati nga ga aKristano ki ingisi dungu aboro. (Matayo 13:24-30, 36-43; Amokedi 20:29-31; Yuda 4) Ti digidoho, agi aboro naya tipa tiyo re wee i nga aKristano arogodi ga apagano apumbo, gayo mangaapai, na gayo yugoapai, kini ya tipaha wee si nga ga “aKristano.” Nikpiapai, Kirisimasi na mburuhe rogo agu avugahe nakodi iriso gu ga apagano ambori nangia Mitara na Saturani.” Ono gine nazomia agu aboro naya tipa tiyo wee i nga aKristano i idi na agi apumbo naangianga ga aKristano re ya na ki dihe kugume? Gu buku nga The New Encyclopædia Britannica (1974) nayaa: “Kirisimasi, nga gu pumbo nga ga pabatika Yesu Kristo, i asigiraha bambiko gupai nga gu maabangirise nadu tipa ye Kristo barambeda aima go.”

14. Wai gu yugoapai nangia ga aOrigen na Agusitino aingisi gu rengo du tipa Kindo?

¹⁴ Oni wisiginga pa irasi giarogo gu fugo yo a nga “kindo.” Gu buku nga The Kingdom of God in 20th-Century Interpretation nayaa: “Origen [nangia bangbasia bawisigi pambori rogo gu biata kama agarã] naenge pa aria ga aKristano mangasunge na gu fugo nga ‘kindo’ kuti kpotoseyo, na gu rogoyo nga, ga Mbori zogarago ngbaduseyo.” Gine Origen amoi mburu gako yugopai riihe? Ko amaangaha rii Ziazia Kekeapai te, ono ko amoihe rii gu kungbo aberã nga ga nyemu tatamana na gu bipai nga ga zegino du kia ti gu berã nga ga Yesu gbiati ga bambata kanisa.” Rogo gako buku nga De Civitate Dei (Gu Bagbata Nga ga Mbori), Agusitino boro gu rago nga Hipo (354-430 F.B.K.) ayawee kanisa nitihe nga ga Mbori Kindo. Ngbatunga agu aberã adunga rogo Ziazia Kekeapai yo re ya afu wene ndupai rogo pambori fu agu akanisa i aya tipaha wee si nga ga aKristano si di gu ome nga ga birĩ zogarago ku behe. Na si aduna ngbatunga gu ome re tipa dungu akama agarã, nga gu nadu dedede niregbo kere mangimangiapai si aamangaha.—Yugoti 17:5, 18.

15. Wai sangba AGaratio 6:7 nada nidigisidigisihe nibipa agu akanisa naya tipa tihe wee si nga ga aKristano?

¹⁵ Ono tie, areme, akanisa nake zuzu guhe si auruguhe. (AGaratio 6:7) Dungu akanisa nawira wa si na ome wa gu nadu mbata te na ngenga agu aboro a nandu kurogoho berewe tipa irisombori te. Putu yo du, du ngbatunga gi ariapai tihe re ni gbaiga. Kuti gu magazini nga Christianity Today, si nayaa: “Areme, gu kikindigi akanisa du Putu yo, [si namangasunge] ni abambu banda kuru ahe, angianga ni abambu irisombori ya ono kina agu aboro nata kaa biko arago nandu kurogoho.” Kina gu aria ariapai re teketeke rengbe ani ka bihe rogo gu kura papara arago nga ga zegino. Gine gipai re ayugoho tipa gupai nika manga zire pambori kumbatayo? Ya mo si nika go ago kusayo gbua mbiko zingo songodaha? Fuo duhe were, ginipai nika manga tipa ndikidi pambori?

Oni Mbakadi Tironi Tipa ga Mbori Bakerepa Uru

16. Tipagine du gu kere sogote namaapai kina kumbatayo ti ni kuti Babera duna ome na nyanyakipaha?

¹⁶ Rogo kura aba, agangara mbia gu duho duna zaragazaraga fofõi-ime-mbia vuruhe yo nata runguda ngime gbiati kuke kini gbadi rogo gu yaroho du riihe yo. Fuo gure, gu zaragazaraga fofõi-ime-mbia du vuruhe yo re kini mo ka fukö kini uka kusande. A wa pagbada ngime gbiati kuke rogo gu yaro mbia naima mbu fukö tipa gbanga regbo narengbe ka yugopa fuköho berewe bambeda, gu kere sogote namaapai kuti pambori rogo dungu papara arago rogo zegino re nayugo gupai nga, agu arame nga ga zire pambori ima nyasa. Mbembedii, Yekova nika sarii agu aboro birĩ zogarago yo nga ga zegino yo i kpamia gayo asadatise ka kusa gu de-bäri gbaiga nga ga toro ri, nga Babera duna ome na ki gbarasi ri. (Yugoti 17:15-17; 18:21) Ya mo si naida ndikidi aKristano gunde be gupai re na gu kura apapara gu “bakere gberãngbi” nga gu nika ye fuoho? (Matayo 24:21) Wagusa te! Ono tie, i adu nirengo na nduapai beyo ka ngi ho Mbori ka fu mbusa ni kurii gbegbere aboro. (Yugoti 18:20; 19:1, 2) Oni berẽpa gu kpiapai nadu tipa Yerusarema rogo bambata sa kama agarã na agu aKristano naaraka rogoho, kinawo a si kadu tipa aguyo du areme.

17. Tipagine rengbe ga Yekova ruru amoyambu ti ni ka pido digido gi zegino re naa kido zanga gunde?

¹⁷ Ho ga aRomo abanzengere arunguru ni pati Yerusarema rogo 66 F.B.K., agu aKristano nadu na maabangirise azigbánga te na i agundenga a te. Bambiko wa i adu niwene abawisigi Fugo Mbori, i aima inoho ‘ya rago gbarasa Yerusarema mbedi.’ (Ruka 21:20) I aima ino gupai a nga Mbori azaka gene azaka fuyo i oro ka bata. Ti gu regbo gupai re amangi, aKristano aoro kusayo. (Daniere 9:26; Matayo 24:15-19; Ruka 21:21) Teketeke a wa kina gure areme, agu aboro ini Mbori na nagiasangba Wiriko, i rengbe arengba ka sungudo digido gi zegino re naa kido zanga gunde. (2 ATesaroniko 1:6-9) Nirengo, ho gu bakere gberangbii nika rikito ni re, i aduna ngbarago ki ‘tumba riyo; bambiko rago tumo riyo nambeda.’—Ruka 21:28.

18. Gine nikangia sangbana ga Gogo zubo vura kuti ga Mbori amoyambu na ome ko dũ?

¹⁸ Fuo gbarasa yo Babera duna ome ti ni, Satana, nga Gogo ni boro Magogo, nika zubo vura na ome ko dũ kuti ga Yekova aDezire nga aboro zereda. Wa i nika guari ka ye “wa dubo na dada ringara,” ga Gogo ndurumo aboro aberã gupai nga, i nikadu na diabese taata. Nairiwo wai i ka kiga ti gu regbo re! (Yezekere 38:14-16, 18-23) Gu mokedi nangia Yoane akepai ki yaa: “Mi ki bi ngbangbaturũ ni zaza ha, oni ngére, pusi farasi kidu! Gu ko nasungu auru ru, i niya tiko, Iranyaka, nga Irarengo. . . . Tĩtĩ basape ki kuru ngbako yo, ko di be arikaaboro na ni.” Gi “Bakindo ri abakindo” kura boro arengbanga ka diabe ko re ya, abatasa ruru airisi Yekova na ki gbarasi avurayo dunduko. (Yugoti 19:11-21) Nairiwo gu digidopai nikadu tipa digisidigisi gu yuguyugupai nga ga sakpoto Yesu tihe re!

19. Ginipai ga Kristo bakere diabe vura nika mangaha tipa gako ruru abawiriki, na ginipai si aida i mangihe awere?

¹⁹ Yesu nika ye rogo gu uru re “iriwoko ti ti agu yo naidi pase dunduko.” (2 ATesaroniko 1:10) Oni naida kadu dagba agu aboro nikadu na kiki kuti Wiri Mbori nga badibepai? Kangia wo duhe, si naida oni ninyakasi gaoni idapase tie kindi na ‘oni mbákadi tironi a; bambiko Wiri boro naye ti gu saa oni aberãnga paha ya.’—Matayo 24:43, 44.

Oni Nibanda Tironi

20. (a) Wai rengbe ani ka yugo gaani tambuahe tipa ga Mbori gamahe nga ga ‘ruru kangara moyambu’? (b) Agini asanahe si aida ani sana tirani nani?

²⁰ ‘Ruru kangara moyambu’ naazungadi ga Mbori aboro dedede i du ngangaraa rogo toroyo na kini bandatiyo. (Matayo 24:45, 46; 1 ATesaroniko 5:6) Oni na tambuahe tipa agi atingidapai du ti wene regbo re? Oni namangasunge nani tipa maa bambataapai mbata rogo raka? Tipagine ka oni asananga tironi ti ni na gu sanahe naye re ya nga: ‘Mi na ziazia kpiapai bangire nga ga toro nga gu naundo re mi bi Wiri Mbori ko nizogorago ngbangbaturũ yo? Mi nabi ko ko nambakadi tiko ka manga ga Mbori sarangbangaa kuti Babera duna ome ti ni na kuti ga Satana zegino naabaha?’

21. Tipagine kura aboro arengbe ti ni ka mbu gu gayo bipai nga ga toro si du tätäitä, na ginipai si aidaha i mangihe niipiipihe?

²¹ Bete agu aboro nakodatiyo na ga Yekova aboro awere aima mbu gu gayo bipai nga ga toro si du tätäitä. Ya mo si rengbe kadu nga i na zingo zerangbaduse watadu zingo hipai, wa bete ga Yesu bambata abawiriki adu? Abakabangirise nga ga raka, nyemu aũzegino, watadu rungosiro du namanga yo? (Matayo 13:3-8, 18-23; Ruka 21:34-36) Isoke beteyo bi kura tingidapai nikpakarakpakaraha fuyo tipa i girogoyo, nga gupai ‘ruru kangara moyambu’ akehe. Kangia ngbatunga gipai re mangi tipa roni, ani nazungadi roni oni wisigi Fugo Mbori na vovo nyemuhe berewe na ki kparikpee fu Yekova tipa ko undo roni oni rengbe ka gbia dawedawe pagume na ko nga gu du ninyanyakihe.—2 Petero 3:11-15.

22. Wai wisigopai tipa gu yuguyugupai nga ga sakpoto Yesu tihe gbiati gu sangbaanebi duna ngbanyaa dagbaha nani a’aria gaoni bipai?

²² I afu gu yuguyugupai nga ga sakpoto Yesu tihe fu gako abawiriki ho i aida i nyakasi yo ni. Areme, ani na guhe berani kii kisusi gure tipa nyakasa rani, si nga digisidigisi gu iiriwo mboimboipai re na dungu sangbaanebi nga gu duna ngbanyaa dagbaha nani. Wa ani aberãkurii agi arengo nga ga taarimo re na gu nyanyakipa apai si nika mangaha kumbatayo, ani gumbanga kina agu aberã a tigaani nga ga gu mokedi nangia Yoane ho ko ayani wee: “Amina. Mo yé, Gbia Yesu!”—Yugoti 22:20.

[Gu rukutu kekeapai du bandu kpewaraga yo]

Oni Natingidaha?

• Rogo agu agarã nangia ga 1870, ginipai tooni badona nga ga abawisigi Ziazia Kekeapai agirogoyo nibipa ga Yesu ye berewe?

• Wai gu yuguyugupai nga ga sakpoto Yesu tihe ada nidigisidigisihe?

• Gini sangbana du ga Yesu ora rii farasi nani kurii zegino na kurii gu dungurati nga ga aKristano?

• Ginipai du ani wa ka ani mangihe kadu dagba agu aboro nika bata ho Yesu nika nyasa gako diabepai ni?

[Gu kpiahe du ti kpewaraga 9]

Mboimboipai ada nirengo

[Gu kpiahe du ti kpewaraga 10]

Oni ini gupai namangi ho Kristo atona gako diabepai ni?