Oni Naakido Kuti Fugo Yekova

‘Mi nakido kuti gamo fugo.’—Atambuahe 119:42, NW.

1. Ginipai rengbe oni ka gumbaha tipa gupai nayugo gu boro nake Atambuahe kapita 119 gbiati gani asino-berã?

FUGO Yekova aima ngba bakere gbe ti gu boro nasari bia Atambuahe kapita 119. Si nawira ya gu Wiri Bakindo nangia Izikiya nga ga ringara Yuda ko nasari gu bia re. Bambiko agu aberã du rogo gi bia ga Mbori toro adu kugiipa kehe re nawira kina agu asino-berã nangia ga Izikiya, nga guko ‘nakakuti Yekova’ ho ko aazogarago ni ni bakindo ringara Yuda yo. (2 Abakindo 18:3-7) Pai sa adunga kapa tipaha ya nga: Gu boro nasari gu bia re aima rugatini naapa gani azingo nga ga toro.—Matayo 5:3.

2. Gine nga gu banguapai du rogo Atambuahe kapita 119, na wai i ambakadi gi bia re?

² Gu memepai du rogo Atambuahe kapita 119 nga kiopa fugo Mbori, watadu gako pangbangaa.a Si nawira gupai nga, bake gi bia re akparaka bangbandaha na bangiri kekeapai tipa si fu undo tipa tingidaha. Agu averesi du bangehe nga 176 du rogoho, i akparaka abangbandaha na gu bangiriapai ti genehe i ake pa-Ebere nani. Rogo gu bambata pa-Ebere i akehe rogoho, agu apapara gi Atambuahe du 22 re na agenehe 8 nga agu natona na kina gu bangisa bangiripai sa nga gu i ake pa-Ebere nani. Gi Atambuahe re nafura tipa fugo Mbori, gako ndiko, gako atingidapai, gako agene, gako azinahe, gako arugute, gako asarangbangaa, na gako agumbapai. Rogo gi papara kekepai re gbiati gu naye fuoho, ani nika wisigi Atambuahe kapita 119 ringbisihe kuti gu ruru sasa fugoho nga ga gu Ziazia Kekeapai i ake bambataha rogo pa-Ebere. Si naida gupai nga, pa berã ani kurii agu apangbangaa namangi gu ga Yekova amoyambu nadumbata gbiati aguyo du awere, kiisi gaani tambuahe tipa gi bia ga Mbori toro adu kugiipa kehe re, na ki kiisi gaani tambuahe a tipa keke Fugo Mbori nga Ziazia Kekeapai.

Oni Irisi Fugo Mbori na Kidu na Ngbarago

3. Oni sakinga rogo gupai yo nga kadu ziazia rogo mangaapai na ki yuguhe na kpiapai.

³ Ndikidi ngbarago naye fu boro mbiko ta ni rogo ga Mbori andiko. (Atambuahe 119:1-8) Ka ani mangi gipai re, Yekova aberãpa rani nga ani ‘ni agu aboro du gayo apai ziazia.’ (Atambuahe 119:1) Anga padu gaani apai ziazia ngawee ani nga rengberengbe aboro te, ono si nayugo gupai nga ani na’asada tirani ka manga gupai Yekova Mbori akpinyemuhe. Noa “[a]du ziazia dagba arika ngbatungako” nigu kumba “[n]anata na Mbori.” Gu ruru iriiripa bakumba re gbiati gako aborokporo abati be Ime Akangbii bambiko ko apefuo gu gene raka Yekova aringbisipaha. (Bambata Pai 6:9; 1 Petero 3:20) Teketeke a, pa gaani bata ti digido gi zegino re naruriipa gaani ‘kakuti ga Mbori andiko nzunzu,’ si kita du wo ani kini mangi gupai ko akpinyemuhe.—Atambuahe 119:4.

4. Pa gaani ngbarago gbiati diabese naru ri gine?

⁴ Yekova arengbanga ka mbu rani wagusa te ka ani ‘afu tambuahe fuko na ruru kpotoraniyo na ki kakuti irisa gako arugute.’ (Atambuahe 119:7, 8, NW ) Mbori agindigonga gu ga aYisaraere barumbatayo nangia Yosua, nairisi agu arugute nangia kaa ‘geda kitabu arugute uru na yuru tipa ko rengbe kaa manga agu apai dunduko nadu nikekehe rogoho te.’ Pa manga ko gipai re nasa gupai nga ko du na diabese rogo apai na ki sa gupai fuko nga ko nimangi apai nitatamana. (Yosua 1:8, NW ) Nimbedi kuti digido gako raka, Yosua aatambua Mbori kindi na ko atingidi gupai fu aYisaraere nga: “Oni dunduko ini he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te.” (Yosua 23:14) A wa si adu tipa Yosua gbiati bake Atambuahe kapita 119, pa gaani ngbarago gbiati diabese naru riipa sambuo ani Yekova naapa kido ani kuti fugo ko.

Fugo Yekova Nabanda Rani Gigirii

5. (a) Oni sakinga rogo wai yo rengbe boro ka banda tini gigirii rogo toroyo. (b) Gini undo duho tipa gu paranga boro mangi kere ingapai?

⁵ Ani rengbe arengba kadu gigirii rogo toroyo ka ani abanda tirani ringbisihe kuti fugo Mbori. (Atambuahe 119:9-16, NW ) Gipai re si nga gupai rengbe arengba ka manga ka si vura du nga avungurani amaanga wene kpiapai fu rani te vurũ. Wa si avura du nga, ba Izikiya angia gu boro nanairiso kpiaahe, si nawira Izikiya ‘agirisi gako gene’ be gu mangaapai nga ga apagano. Ka gu paranga namangasunge fu Mbori areme mangi kere ingapai, ginipai ka ni mangihe? Biratise ti gani ingapai, kparakpee, gu undo nga ga avunguni, gbiati gu undo nga ga nyemuse be agu aKristano nga abaakumba rengbe ka undo ni ni duwa Izikiya ki ‘girisi gani gene na kini banda tini.’—Yakoba 5:13-15.

6. Gini adee ‘nagirisi gayo agene na kidu na bandatise ringbisihe kuti fugo Mbori’?

⁶ Wa si avura du nga, aRaba na Ruta aima raka bakuru kusayo mbata fu sarayo bia Atambuahe kapita 119, i aima ‘giriso gayo agene.’ Raba angia dee niboro Kanana nanakodaba na akumba mbata tipa marã, ono i aini ri tipa gari ida ni nairisi Yekova. (AEbere 11:30, 31) Gu de nangia Ruta niboro Moaba ambu gari ambori, kini mangisunge fu Yekova, na kini irisi gu gako aNdiko ko afuhe fu aYisaraere. (Ruta 1:14-17; 4:9-13) Agi ade tibarayo ue re naangianga aYisaraere re ya, ‘aduna bandatise ringbisihe kuti fugo Mbori’ na i aduna gu iiriwo mamu beyo nga kadu ni atita Yesu Kristo.—Matayo 1:1, 4-6.

7. Wai aDaniere na kura paranga aEbere biata amoi wene kpiapai tipa bandatise gigirii rogo toroyo?

⁷ “Gu ga aboro berã du kpotoyo yo, si ni gbigbita ha tona ti parangayo,” ono paranga aboro rengbe arengba ka ndu ngba gigiri gene, zavura rogo gi gbigbita zegino du tii ga Satana ome re. (Bambata Pai 8:21; 1 Yoane 5:19) Wa i adu nimeresimeresi yo ku Babera yo, aDaniere gbiati kura paranga aEbere biata ‘abanda tiyo ringbisihe kuti fugo Mbori.’ Nikpiapai, i aidanga ka birikosi tiyo “na ga bakindo wene riahe te.” (Daniere 1:6-10) Ababero anari bibiriko anyaa, nga agura ga Mose aNdiko azahe ti ri ra. (Pa Amotumo 11:1-31; 20:24-26) Dedede, i anatogosanga kure agu anyaa i anayepa gorayo te, sidu pa gayo ri pasio zanga togosa kurehe kini mo ka kuo ga Mbori ndiko tipa kure. (Bambata Pai 9:3, 4) Sidu, si airiwonga te, gure nangia ndu gupai agu aEbere nadu biama re arengbanga ka ri ga bakindo wene riahe ti ni ya! Agu aparanga nangia airisi fugo Mbori re abanda tiyo gigirii rogo toroyo na ki moi wene kpiapai fu rani.

Fugo Mbori Nafu Undo Tipa Boro Du Niruru Ni

8. Gini sino berã gbiati inohe si aida ani du nani ka si du nga ani nika giarogo ga Mbori andiko yo na ki mangisunge nani?

⁸ Padu ani na nyemu fugo Mbori tirani nga nyanyakipa pai tipa banda rani niruru aboro fu Yekova. (Atambuahe 119:17-24) Kangia ani wagu bakeke-abia ga Mbori toro adu kuriiko, ani duadu na bakere nyemu ka rugatirani na “iiriwo apai” rogo ga Mbori arugute. Ani adu dedede na ‘nyemu ga Yekova asarangbangaa’ na ki yugu ‘ngbarago tipa gako adezirepai.’ (Atambuahe 119:18, 20, 24) Kangia ani akpara gaani raka fu Yekova kandara kina vuru gu guru regbo susi awere kusayo, ya mo ani ‘nakpinyemu gu mai nga ga toro adunga na biriki ti ni ya’? (1 Petero 2:1, 2) Si naida ani rugutirani na bangua agu apai Ziazia Kekeapai ayugoho tipa ani rengbe wenengai ka giarogo ga Mbori andiko yo na ka mangasunge nani.

9. Wai si aida ani mangipai ho du tagbagatagbagapai ni dagba ga Mbori andiko na agu apai aboro aidaha?

⁹ Ani rengbe arengba kadu na bakere nyemu ga Mbori atingidapai, ono ginipai ka mangi ka “awiri abazogo” ataburõ rani tipa kura ndupai? (Atambuahe 119:23, 24) Areme, agu aboro duna ome zogarago beyo na’asada dedede ka manga rani ngbaome ani bi agu andiko nga ga aboro na kikiipaha susi ga Mbori andiko. Ho du tagbagatagbagapai ni dagba agu apai aboro aidaha na gupai Mbori akpinyemuhe, ginipai rengbe ani ka mangaha? Gu bakere nyemu fugo Mbori du tirani nika undo rani ani nye niruru aboro fu Yekova. Wa kina gu ga Yesu Kristo amokedi i arungosi yo, ani nika yaa: “Ani gi nga sangba Mbori agia susi ga aboro.”—Amokedi 5:29.

10, 11. Oni yugunga wai na kpiapai rengbe ani ka kakuti gaani ruru mangaapai fu Mbori ho du ani ni rogo bakere kpakarakpakaraapai.

¹⁰ Ani rengbe arengbe ka nye niruru rani fu Yekova ti gu regbo du ani rogo bakere kpakarakpakaraapai. (Atambuahe 119:25-32) Kangia ani nikadu na diabese rogo gaani kakuti ruru mangaapai fu Mbori, si naida ani du na nyemu wirikapai na kini kparikpee kakaka tipa gako rugute. Si naida a ani sia “gu gene nga ga ruru mangaapai.”—Atambuahe 119:26, 30, NW.

¹¹ Izikiya, navura ngia gu boro nake Atambuahe kapita 119, asia “gu gene nga ga ruru mangaapai.” Ko amangihe wo zavura gupai nga airisi kungbo ambori akeko kirikiri vurũ, na si nawiraha nga, agu agumeko nadu ngbangaa yo asawia ko asawia a. Na si nawira gupai gbe nga, ‘mbisimoko aranga be arungo te’ be ngbatunga agu apai naamanga ko re. (Atambuahe 119:28) Ono Izikiya aakido kuti Mbori kindi, ko angia wene bakindo, na kini mangi “gu pai naru aru bangiri Yekova.” (2 Abakindo 18:1-5) Ka ani akido kuti Mbori, ani rengbe arengba tigaani a ka hi a’asada ni agu aboro kakuti gayo ruru mangaapai. —Yakoba 1:5-8.

Fugo Yekova Nafu Ngarã

12. Wai rengbe ani nitirani ka mangasunge na Atambuahe 119:36, 37?

¹² Pa manga ani agu arugute du rogo fugo Mbori yo nafu gu ngarã fu rani si aidaha tipa ka sovura kuti agu a’asada nga ga raka. (Atambuahe 119:33-40) Ani nagbata ga Yekova arugute niumbasitise tipa ani rengbe ka banda gako andiko ‘na kpotoraniyo dunduko.’ (Atambuahe 119:33, 34) Wa kina gu bake apapara Atambuahe agumbaha, ani nasana Mbori niyaa: “Mo rúgu kpotore yo tipa gamo adezirepai; sa mokiisa” te, watadu gu mokiisa nga ga biriki. (Atambuahe 119:36) Wa kina gu mokedi nangia Pauro, ani “[na]sunga na rurupai rogo apai dunduko.” (AEbere 13:18) Kangia gu boro ani amangasunge funi naida ani mangi gupai du niirairaha, si naida ani hõ ngarã be Mbori ka kakuti gako arugute, na dedede, Yekova naafu maku afu tipa ngbatunga gu gene mangapai re. Nirengo, ko naundo rani ani ká fu nyemu manga gbegbereapai dunduko. Sidu tie, ani naakparakpee kini yaa: “Mo di bangire ti ngera kuti pa wia.” (Atambuahe 119:37) Si aidanga ani bi gu kungboapai dunduko na nyemuhe Mbori asogaha te. (Atambuahe 97:10) Gi kpee re nika undo rani ani ne apai ue dagba akuraha, nga gu kpiaahe na agu abuku dũ nazingisa nyemu kodaba gbiati manga sangbaatoro.—1 AKorindo 6:9, 10; Yugoti 21:8.

13. Wai gu ga Yesu abawiriki i aarungosi yo agbia gu wingbaduse si aida i du nani tipa ka tungusapai zanga gunde?

¹³ Pa gbia ani ruru inohe nga ga fugo Mbori nanyakasa rani ani naatungusapai zanga gunde. (Atambuahe 119:41-48) Na si naida ani du ngangaraa tipa ka ‘karagapai fu gu boro napayasipa rani.’ (Atambuahe 119:42) Ti kura aregbo, ani rengbe kadu wa gu ga Yesu abawiriki i arungosi yo, nafu kpee ki yaa: “Gbia, mo . . . idi fu gamo amoyambu i . . . [naa]peka ga pai apeka zukazuka gbe.” Gine nangia sangbana gu kpee re? “I ki hiki ahika be Ziazia Toro dunduko, i ki nipeke ga Mbori pai apeka zukazuka.” Kinawo a teketeke gu bangisa Bakerepa Bakindo re afu gu wingbaduse fu rani ani aidaha tipa ka gumba fugo ko zanga gunde.—Amokedi 4:24-31.

14. Gine naundo rani ani naamanga dezirepai zanga gunde teketeke wa kina gu Pauro anamangaha?

¹⁴ Ani aduadu na gu wingbaduse si aida ani du nani, tipa ka manga dezirepai zanga wiri ngbatunga gunde be zee, ka ani kakuti “gu pai nga ga rengo” na ki ‘kakuti ga Mbori rugute nyeanye kindi.’ (Atambuahe 119:43, 44) Wisigo keke Fugo Mbori sirisiri naundo rani ani ‘fura tipa ga Mbori atingidapai barabangiri abakindo.’ (Atambuahe 119:46, NW ) Kparakpee gbiati ga Yekova toro nika undo rani a ani gumba kina agu apai du niruruhe ngba wene gene. (Matayo 10:16-20; AKorosaio 4:6) Pauro afura zanga gunde tipa ga Mbori atingidapai fu agu abazogorago nadu rogo bambata sa kama agarã. Nikpiapai, ko amangi dezirepai fu gu ga aRomo Bazogo nangia Ferika, nga guko “[na]gi pako tipa idapa Kristo Yesu.” (Amokedi 24:24, 25) Pauro amangi dezirepai a barabangiri gu Bazogo nangia Feseto gbiati Bakindo Aguripa. (Amokedi 25:22–26:32) Be ga Yekova songodahe, ani rengbe arengba a tigaani kadu ni agu adezire duna wingbaduse na ka ‘zee amanganga rani na wene pangbangaa’ ya.—ARomo 1:16.

Fugo Mbori Nafu Wasa fu Rani

15. Wai rengbe Fugo Mbori ka ye na wasa fu rani ti gu regbo aboro abisirapa rani?

¹⁵ Fugo Yekova nafu gu wasa ka nyasanga ya nga gu rengbe ani kadu naa kido kuti ni. (Atambuahe 119:49-56) Kura aregbo kinaho si aida gbe i fu wasa fu rani. Wa vura duhe nga ani naafura niwingbaduse gbaiga ni agu aDezire nga ga Yekova yo, “airaenda,” nga agu aboro namangapai kuti Mbori nigusaapai, ‘nawia rani awia gbe’ ti kura aregbo. (Atambuahe 119:51) Ono tie, baraho ani afu kpee ni, ani rengbe ka tingida weneapai rogo Fugo Mbori, na fuo duhe wo ani kini ‘gbia wasa’ tipa tirani. (Atambuahe 119:52) Ti regbo gaani akpesarawatise, ani rengbe ka tingidapa ndiko sa nga ga Ziazia Kekeapai watadu bangua ndiko nga gu nafu gu wasa fu rani gbiati gu wingbaduse si aida ani du nani ti regbo mbusa.

16. Zavura gupai nga aboro narungosi ga Mbori amoyambu, ginipai agu amoyambu re amanganga ha ya?

¹⁶ Agu aboro-gusaapai naabisirapa bake apapara Atambuahe, angia aYisaraere, nangia gu rikaaboro nadu nikparakpara yo fu Mbori. Nga gu pazee re! Ono tie, zanga duwa yo, ani dinga berã ki zanga kpara tirani kusayo ti ga Mbori andiko. (Atambuahe 119:51) Ti regbo gu rungosi aboro nangia ga aNazi na kura arungosiro wa kinaha vuru gu dungu agarã yo susi, dungu ga Mbori amoyambu aká ka kpara tiyo kusayo ti agu andiko gbiati bangua andiko du rogo Fugo Mbori yo. (Yoane 15:18-21) Na anga si nirorõi tindiro ka irisa fugo Yekova te, bambiko gako arugute wa kina gu wene woroahe nafu wasa fu rani.—Atambuahe 119:54; 1 Yoane 5:3.

Oni Fu Tambuahe Tipa Fugo Yekova

17. Gine padu ani na tambuahe tipa fugo Mbori afõ rani ani mangihe?

¹⁷ Ani nayugo gopa gaani tambuahe tipa fugo Mbori niirisa ani he. (Atambuahe 119:57-64) Bake apapara Atambuahe akidohe ka ‘kakuti ga Yekova apai’ na zavura ‘bebere yuru ko aniguari ka fu tambuahe fu Mbori tipa Gako ruru asarangbangaa.’ Kangia ani nazinga rameyo yuru, si adu niwene mamu fu rani ani yugu gaani tambuahe fu Mbori rogo kpee yo! (Atambuahe 119:57, 62) Gaani tambuahe tipa fugo Mbori nafõ rani ani gbata gako yugopai, na kini mangi rani ani du ni agu aboro ngbarago duna agu akuarani nga ‘abadiangbanyaa nagunde ti Yekova,’ nga agu aboro nibasasa nagunde tiko niirisa. (Atambuahe 119:63, 64) Anga kura kodatise ho susi gure rengbe ani ka gbiaha rogo zegino te.

18. Wai Yekova akaragapai kuti gaani akparakpee ho ‘ga gbegbere aboro agire’ nake rani ni kirikiri?

¹⁸ Ho ani afu kpee ni na ngbaduraniyo dunduko na kini sana Yekova niumbasitise ko yugupai fu rani, gure nga ani ‘nazungadi ko’ na gu berã nga ka gbia ngbarago mbiko ko idi na gaani apai. Gu regbo gbe si aida ani fu kpee nga baraho ‘ga gbegbere aboro agire’ nake rani ni kirikiri. (Atambuahe 119:58, 61) Yekova rengbe arengba ka kafa ga asogorani agire akafa ki zaki rani tipa sunge tungusapa Kindo gbiati sunge sa aboro ni abawiriki. (Matayo 24:14; 28:19, 20) Gipai re aima manga niyuguyuguhe bara dunguhe rogo agu aringara i aaká tipa gaani sunge tungusapai rogoho.

Oni Duna Idapase Kuti Fugo Mbori

19, 20. Wai rengbehe kadu ni wenepai i rungosi rani?

¹⁹ Pa ida ani kuti Mbori na kuti fugo ko naundo rani ani hi arungosi ono kini mangi gupai Mbori akpinyemuhe kindi. (Atambuahe 119:65-72) Wa si avura du nga airaenda ‘are azire kutiko,’ bake apapara Atambuahe abibia ki yaa: “Si ni wenepai fere wa mi adu ni rungosirungosi re.” (Atambuahe 119:66, 69, 71) Wai rengbe pa hi rungosiro kadu niwenepai tipa kura boro dagba ga Yekova amoyambu yo?

²⁰ Ho ani ambu ni be rungosiro, zanga kapa, ani nafu kpesarawatise fu Yekova kakaka, na si nambedisa rani naako gbe. Si rengbe kadu nga ani nadia gbanga regbo kupati wisigo keke Fugo Mbori na kini mangi bakere asadatise ka mangasunge na sangbaha. Si naye na gu sangbana nga bakere ngbarago rogo raka. Ono ginipai ka mangi ka ani mangipai tipa rungosiro rogo gu gene nayugo agu asino angbanga ya, ngbatunga gu duwa imisiringbaduse gbiati rukö? Mbiko gaani kakaka kparakpee gbiati gu undo nga ga Fugo Mbori na gako toro, ani rengbe arengba ka diabe ngbatunga agu arungbura re na ki ‘ukadi tirani wenengai na vovo borose.’ (AKorosaio 3:9-14) Kurii gure, gaani idapase nanyaka ho ani ahi fudifudipai ni. (1 Petero 1:6, 7) Pauro agbia mamu be gako fudifudiapai bambiko si asako ko nikido kuti Yekova bakere gbe. (2 AKorindo 1:8-10) Ya mo ani nambu rungosi rani si du na wene sangbanaha kurii rani?

Ani Kido Kuti Yekova ti Aregbo Dunduko

21. Ginipai nika manga ho Mbori nika bazee ni kubangiri airaenda yo?

²¹ Fugo Mbori nafu ruru ndupai fu rani tipa ani nikido kuti Yekova. (Atambuahe 119:73-80) Ka ani akido nirengo kuti Bakusirani, ndupai adunga ho tipa ani naamanga zee te. Ono tie, bambiko agu apai kura aboro amangaha, ani naida wasa na ki wiri ida ka kparakpee niyaa: “Zee zi airaenda azia.” (Atambuahe 119:76-78) Baraho Yekova aba zee ni kubangiri ngbatunga agi aboro yo re, sangbanaha nga si nakusa gayo gbegbereapai kuyangura na si kini ziasi ziazia rimoko. Ani rengbe kadu naa kido ya, agu aboro narungosi ga Mbori aboro, nirengo, i agbianga wirihe nimosoro te. Nikpiapai, i arengbanga mbata ka nyasa riipa aDezire Yekova, nga agu aboro du naa kido kuti Mbori na ngbaduyo yo dunduko te, na i arengbanga a gizo kumbatayo te.—Asanza 3:5, 6.

22. Rogo gini gene bake apapara Atambuahe adu “wa mangu ime rogo ngime”?

²² Fugo Mbori nanyakasa gaani kido kutiko ho aboro arungosi rani ni. (Atambuahe 119:81-88) Bambiko wa aboro-gusaapai aarungosi bake apapara Atambuahe, ko adu “wa mangu ime rogo ngime.” (Atambuahe 119:83, 86) Rogo agu aregbo i akeka Ziazia Kekeapai ti ni, i anamaa ime, buda, gbiati kura imeahe kurogo amangu kpoto anyaa. Ho i anamanganga sunge ni nani ya, agu amangu kpoto anyaa re arengbe arengba ka kutukpa, kangia i a’asi he mbembedii na we rogo gu vurubambu naadunga na bakura ngime ti ni ya. Ya mo rungosi amanginga roni ti kura regbo oni kidu “wa mangu ime rogo ngime”? Ka si du wo, oni kido kuti Yekova na ki kparikpee ki yaa: “Mo bátasi re ku sangba ga weneringise yo; si du mi ka ka kuti gamo adezirepai ti ni du ngbaro.”—Atambuahe 119:88.

23. Agini apai ani nawisigihe rogo ngera berewe rii Atambuahe 119:1-88, na gini sanahe rengbe ani ka sana tirani nani wa ani angera kumbatayo tipa wisigo Atambuahe 119:89-176?

²³ Agu apai wisigi ani he rogo bambata bebere Atambuahe kapita 119 nayugo gupai nga, Yekova namangapai niweneringise nga ga nyemuse fu gako amoyambu, bambiko i nakido kuti fugo ko na kini kpinyemu gako andiko, gako atingidapai, gako azinahe, na gako arugute. (Atambuahe 119:16, 47, 64, 70, 77, 88) Ko na ngbarago tiko ya agu aboro ra fuko na goyo nabanda tiyo ringbisihe kuti fugo ko. (Atambuahe 119:9, 17, 41, 42) Wa oni angera kumbatayo tipa ka wisigo gu yangara papara gi wene Atambuahe re, oni rengbe ka sana tironi ki yaa, ‘Mi naambu fugo Yekova nirengo si nihaasi gimi gene?’

[Gu rukutu kekeapai du bandu kpewaraga yo]

Gaoni Karagapai Nga Gine?

• Gine ndikidi ngbarago aru riihe?

• Wai fugo Yekova abanda rani gigirii rogo toroyo?

• Rogo agini agene fugo Mbori afu wingbaduse gbiati wasa?

• Tipagine si aida ti ni ani du naa kido kuti Yekova na kuti fugo ko?

[Gu kpiahe du ti kpewaraga 4]

Ruta, Raba, na gu paranga aEbere i aga naayo nizizi yo ku Babera yo ‘akakuti bandatiyo ringbisihe kuti fugo Mbori’

[Gu kpiahe du ti kpewaraga 5]

Niwingbaduse Pauro ‘afura tipa ga Mbori atingidapai barabangiri abakindo’