Oni Mbu Fugo Mbori Si haasirago Ngba Gaoni Gene
“Ga pai nga . . . imarago ngba gi gene.”—ATAMBUAHE 119:105.
1, 2. Rogo agini apai fugo Yekova nika haasarago ngba gaani gene?
FUGO Yekova nika haasarago ngba gaani gene ka ani idi gupai re si mangi. Tipa ani gbia ngbarago be ngbatunga gu imarago nga ga toro re, ani duwa ka ani du nikakaka awiriki keke Fugo Mbori na kini mangi gaha arugute. Kina fuo manga ani gupai re rengbe ani kadu na agu aberã nga ga bake apapara Atambuahe nayaa: “Ga pai wa baro tipa ndure, nga imarago ngba gi gene.”—Atambuahe 119:105.
2 Awere, ani wisiginga Atambuahe 119:89-176. Nairiwo gu bazagino apai du rogo agi averesi kparaka yo ho kurogo apaparaha 11 nizungudizungudihe timburu kuraha re! Agi averesi re rengbe ka undo rani ani naandu ngba gu gene nika ndu na ani kurogo nyenye unga.—Matayo 7:13, 14.
Tipagine Si Aida ti ni Ani Kpinyemu Fugo Mbori?
3. Wai Atambuahe 119:89, 90 ayugo gupai nga ani rengbe arengba ka kido kuti fugo Mbori?
3 Sangbana kpinyemu fugo Yekova nasa rani ani du nyanyakii rogo toroyo. (Atambuahe 119:89-96) Bake apapara Atambuahe abibia ki yaa: “Ako Yekova, ga pai du ni nyakasinyakasi he ku angbangbaturũ yo nye anye kindi. . . . Mo anyakasi kpotosende, si ki ru aru kindi.” (Atambuahe 119:89, 90) Kuti fugo Mbori, gako “andika nga ga angbangbaturũ,” uru, na diwi, gbiati akerekuru nandu ti kina agene ra zukazuka na kpotosende nisigirasigiraha nyanyakii nyeanye kindi. (Eyobo 38:31-33; Atambuahe 104:5) Ani rengbe arengba ka kido kuti agu afugo dunduko nakura ngba Yekova yo; bambiko agu apai Mbori agumbaha, si “[a]nyasa” gupai anyasa ngba tiko.—Yesaya 55:8-11.
4. Ginipai pa kpinyemu fugo Mbori amangaha fu gu gako amoyambu nambu be rungosiro?
4 Ka bake apapara Atambuahe aima ‘kpi rogo gako rungosiro wa ka ko adunga na nyemu ga Mbori andiko tiko ya.’ (Atambuahe 119:92, NW ) Anga kungbo aboro kura ringara naarungosi ko te; kina agu akuondiko nangia aYisaraere i naasoga ko. (Pa Amotumo 19:17) Ono ome gipai re afunga riko te, bambiko ko akpinyemu ga Mbori andiko nga gu naasongoda ko. Korinda yo, gu mokedi nangia Pauro adu “ngba pai dagba zire awirina,” isoke nakodi “bawene amokedi kisusi,” nga agu aboro naagbata gene ka kitangbaanga ko. (2 AKorindo 11:5, 12-14, 26, oni ringbisinga ha na NW.) Ono wa si avura du wo, Pauro abati abata rogo toroyo bambiko ko anakpinyemu fugo Mbori. Wa duhe nga ani nakpinyemu keke Fugo Yekova na kini mangi agu apai si agumbaha, gure nga ani nakpinyemu awirinarani. (1 Yoane 3:15) Zavura gu sogote nga ga zegino kuti rani, si amanganga rani bangirani go ti ga Mbori arugute te. Ani namanga gupai kindi ko akpinyemuhe rogo kodatise nga ga nyemuse na awirinarani, wa ani angera kumbatayo tipa nyenye sunge nga ga ngbarago fu Yekova.—Atambuahe 119:93.
5. Wai Bakindo Asa agbata Yekova?
5 Tipa ka yugopa gaani ranigose fu Yekova, ani rengbe ka fu kpee wa bake apapara Atambuahe ki yaa: “Mi nga gamo ni, mo bátasi re; bambiko mi nagbata gamo andika.” (Atambuahe 119:94) Bakindo Asa agbata Mbori na ki nyasi riipa samungu kuti ndikidi pambori rogo ringara Yuda. Ti regbo bakere dunguratise rogo gu 15 garã zogarago nangia ga Asa (963 M.B.K.), aboro-ringara Yuda “[a]zunga he ka gbata Yekova.” Mbori aidihe i “ki bi ko” na ko “ki fu zereda fu yo pati yo kirikiri.” (2 Pekapai 15:10-15) Gi kpiapai re duwa ka si ngarasi agu aboro naima karagatiyo kusayo pati gu dunguratise nga ga aKristano i tona gbata Mbori berewe. Ko afu mosoro afu fu agu aboro tona kaa kodatiyo na gako aboro berewe na kini banda yo.
6. Gini mangapai nika banda rani be egera rogo toroyo?
6 Fugo Yekova nafu tatamana fu rani nga gu rengbe ka banda rani be egera rogo toroyo. (Atambuahe 119:97-104) Ga Mbori azinahe nasa rani ni airatatamana susi avura rani. Pa irisa ani gako atingidapai nafu dudungurobipai fu rani, naapa ‘ka ani kuti gako azinahe naundo rani ani mangipai nirugatinapai susi gbinza aboro.’ (Atambuahe 119:98-100, NW ) Kangia ga Yekova agumbapai ‘nziri ngbarani yo kisusi nzeme anyege,’ ani nika soga “iraira[a]pai . . . dunduko” na ki nekehe. (Atambuahe 119:103, 104) Gipai re nika banda rani be egera rogo toroyo wa ani ka gbia tirani na airarukö, nzengerenzengere aboro, gbiati agu aboro zanga sinombori rogo gi yangara a’uru re.—2 Timoteo 3:1-5.
Baro Tipa Ndurani
7, 8. Nidia ani fugo Atambuahe 119:105 kugume, ginipai si aida ani mangihe?
7 Fugo Mbori nga mburu gu nyenye imarago nga ga toro kaa bisonga ya. (Atambuahe 119:105-112) Singia ani nga gu mbedimbedi aKristano watadu agu abadiangbayo nga “kura akandoro,” ani nayaa: “Ga pai wa baro tipa ndure, nga imarago ngba gi gene.” (Yoane 10:16; Atambuahe 119:105) Fugo Mbori wa kina baro nga gu nahaasarago ngba gaani gene, tipa ka ani akotanga na kiti kusayo rogo toroyo ya. (Asanza 6:23) Ono, wa vura duhe wo, si naida ani nitirani mbugene fu fugo Yekova tipa si du nibaro kaa haasarago tipa ndurani.
8 Si naida ani du nyanyakii wa kina gu boro nasari agu abia du rogo Atambuahe kapita 119. Ko amangi nyanyaki diaberã tipa zanga kpara tiko kusayo ti ga Mbori azinahe. Ko ayaa: “Mi zungahe, na mi adigisoho a, ka bandapa gamo [ga Yekova] ruru asarangbangaa.” (Atambuahe 119:106, NW ) Ka ani ya berẽnga pa wisigo Ziazia Kekeapai gbiati du pati agu adunguratise nga ga aKristano taata ya.
9, 10. Wai ani aino gupai nga, agu aboro nibasasa nakpara gayo raka fu Yekova rengbe arengba ka ‘inga ti ga Mbori andika,’ ono wai rengbe ani ka ne gipai re?
9 Tipa bake apapara Atambuahe, ko ‘ainganga ti ga Mbori andika te,’ ono gupai re rengbe arengba ka manga gu boro naima kpara gani raka fu Yekova. (Atambuahe 119:110) Bakindo Soromo a’aria tiko ti ga Yekova azinahe, wa si avura du nga ko adu dagba gu rikaaboro nadu nikparakpara yo fu Yekova, na wa si avura du nga ti tonatona gako zogarago, ko anamangaapai na ngbanyaa kuti gu tatamana Yekova afuhe fuko vurũ. “Kina ko kungba ade anangi ko ko ki ingi pai” nisosoda yo ko kuti iriso kungba ambori.—Nemaya 13:26; 1 Abakindo 11:1-6.
10 “Gu bazi-azire” nga Satana, nareka dungu agbina. (Atambuahe 91:3, NW ) Nikpiapai, gu boro nadumbata ni irisimbori na ani rengbe ka asada ka sosoda rani ani kpara kusayo ti gu gene imarago nga ga toro ki rimi kurogo gu bitimo nga ga samungu kuti ndikidi pambori. Dagba agu aKristano nadu Tuatira yo, ‘gu dee nangia Izebere’ adu yo, si nawira gbe, ri angia gu badona adee naayugopa iriso kpiaahe gbiati pa manga meteka fu akurayo. Yesu ahinga pai tipa ngbatunga gu ingaapai re te, na ani a tigaani ani arengbanga ka hipai tipaha te. (Yugoti 2:18-22; Yuda 3, 4) Sidu, ani funga kpee fu Yekova ko fu gako undo fu rani tipa ka ani kparanga kusayo ti gako azinahe ya ono ani nyenga anye rogo gako imarago.—Atambuahe 119:111, 112.
Fugo Mbori Nabanda Rani
11. Kuti fugo Atambuahe 119:119, wai Mbori abi aboro ingaapai?
11 Ka ani akparanga kusayo ti ga Mbori arugute ya, ko abanda rani abanda. (Atambuahe 119:113-120) Ani aidanga na agu aboro “du na berã ue” te, wa kina Yesu a aidanga na agu aboro du uru-uru ya nga agu aboro naya tipa tiyo areme wee i nga aKristano. (Atambuahe 119:113; Yugoti 3:16) Bambiko ani namangasunge fu Yekova na ngbaduraniyo dunduko, ko nga ‘gaani bagbuko’ na ko asongoda rani asongoda. Ko nika ‘gindiga agu aboro kusayo dunduko nainga ti gako rugaapai’ be gayo mangapai nibiriki gbiati gumba ziree. (Atambuahe 119:114, 117, 118; Asanza 3:32) Ko nabi ngbatunga agu aboro ingaapai re wa “mirĩ marã” watadu saka-marã nga agu abiriko kpara yo ho kusayo ti gu kikiipa amarã duwa feda gbiati dahabu. (Atambuahe 119:119; Asanza 17:3) Ani naayugonga nyemuse ayugo dedede tipa ga Mbori atingidapai, bambiko nirengo ani aidanga ka koda tirani na aboro ingaapai kurii gu gugudo saka-marã nga ga gbarasarago te!
12. Tipagine du gunde ti Yekova ti ni ninyanyakipa pai?
12 Bake apapara Atambuahe ayaa: “Borore nakiga be gunde ro [Yekova].” (Atambuahe 119:120) Padu ani na wene gunde ti Mbori, du niyuguyuguhe be neka ani agu apai Mbori asogotehe, nga nyanyakipa pai ka si du nga ani naida ko songodi rani nigako amoyambu. Iriiri gunde ti Yekova asa Eyobo ko raki ruru raka. (Eyobo 1:1; 23:15) Gunde ti Mbori rengbe ka undo rani ani kakuti gu gene ko akpinyemuhe zanga bipa agu arungo ani ahihe. Ono tie, hipai naida kakaka kparakpee ni idapase.—Yakoba 5:15.
Ani Nikparikpee Rogo Idapase
13-15. (a) Tipagine rengbe ani kadu na idapase ti ni ya Mbori akaragapai akaraga kuti gaani akpee? (b) Ginipai rengbe ka manga ka singia ani ainonga gupai ka ani gumbaha rogo gaani kpee yo te? (d) Oni yugunga ha na kpiapai wai rengbe Atambuahe 119:121-128 kadu na ngbanyaa dagbaha na gaani ‘aukaga ome’ kukiri rogo kparakpee.
13 Ani rengbe ka fu kpee rogo gu idapase nga Mbori amangapai amanga tipa rani. (Atambuahe 119:121-128) Wa kina bake apapara Atambuahe, ani naa kido ya Mbori akaragapai akaraga kuti gaani akpee. Tipagine? Bambiko ani nakpinyemu ga Mbori azinahe “ki susi dahabu, ii, susi ziazia dahabu.” Kurii gure, “[ani] nauda gamo andika dunduko ya si . . . [ru] aru tipa apai dunduko.”—Atambuahe 119:127, 128.
14 Yekova nagia gaani akpesarawatise agia bambiko ani nakparakpee fuko ni idapase na kini mangi agu apai a na rubangirise ko azinahe tipaha. (Atambuahe 65:2) Ono ginipai ka ani mangihe ka singia ani ti gu kura regbo na vunduvundu kpakarakpakaraapai berani, si ki sa gupai nga ani ainonga gupai ka ani gumbaha rogo kpee yo te? Fuo du pai were, “Ziazia Toro ni tiko nakpara tipa rani niukaga ome nga gu ka i agumba nga ha agumba ya.” (ARomo 8:26, 27) Ti ngbatunga agu aregbo re, Mbori naida na agu apai du rogo Fugo ko yo wa agu akpee du tipa gaani azingo.
15 Ziazia Kekeapai ima hi be agu akparakpee na aberã duna ngbanyaa dagbaha na gaani ‘aukaga ome’ kukiri. Nikpiapai, ani wisiginga Atambuahe 119:121-128. Gu gene i afura herẽ ngbaha tipa apai rengbe kadu wa kina agu apai du tipa rani. Nikpiapai, kangia ani nagunde agunde be nanga yo rani, ani rengbe ka sanahe tipa ga Mbori undo rogo gu gene bake apapara Atambuahe asanahe ngbaha. (Veresi 121-123) Ani ya ani naida ka manga bakpakarakpakara diaberã. Sidu, si rengbe kadu nga ani kparikpee tipa ga Yekova toro undo rani ani tingidi gako arugute na ki mangihe. (Veresi 124, 125) Wa vura duhe nga ani ‘nasoga irairaapai asoga dunduko,’ ani rengbe ka sana Mbori ko undo rani tipa ka ani mbunga gene fu kura asada si sa rani ani kuo gako andiko ya. (Veresi 126-128) Kangia ani nageda Ziazia Kekeapai na a’uru dunduko, ngbatunga agu averesi nafu undo wa agere rengbe arengba ka ye ku berã rani yo bara ho ani azungodi tirani ni fu Yekova.
Ga Yekova Atingidapai Naundo Rani
16, 17. (a) Tipagine ani aida ga Mbori atingidapai ti ni, na wai si aida ani bihe? (b) Wai rengbe kura aboro ka berãpa rani, ono ginipai nirengo nyakipaha?
16 Tipa Mbori gi gaani akpee na kangia ani naida Mbori idi na gaani apai, si naida ani irisi gako atingidapai. (Atambuahe 119:129-136) Wa duhe nga bangirani naago ago ti apai, sidu ani naida ga Yekova iiriwo atingidapai nga gu nakaraga gako arugute berewe kurii rani yo. Rengo ngaha nga, ani na tambuahe tipa gu imarago nga ga toro gu vovo agiarogopaiyo dunduko du tipa afugo Mbori ayugoho. (Atambuahe 119:129, 130) Ani a na ngbarago mbiko ‘kpakpu Yekova haasi rago kurii rani’ ni ida ko na gaani apai, wa vura duhe nga ‘bangirani naga na aume wa ime wiridi’ bambiko kura aboro nakuo gako andiko vurũ.—Atambuahe 119:135, 136; Pa Geda Aboro 6:25.
17 Ani ini nirengo ya Mbori rengbe arengba kaa ida na gaani apai kindi ka ani airisa gako ruru atingidapai. (Atambuahe 119:137-144) Wadu ani niga Yekova amoyambu, ani idi kuti gupai nga ko na rengo beko ka yugo gako atingidapai fu rani, na ki mangihe fu rani ni azinahe nga gu si aida ani irisihe. (Atambuahe 119:138) Wa duhe nga bake apapara Atambuahe anairisa ga Mbori azinahe airisa, tipagine ko aya ti ni: “Mi du ni umba boro ni payasipayasi re”? (Atambuahe 119:141) Si nawira gupai nga, ko afura tipa gu gene asogoko anabiko ngbaha. Ka ani kakuti rugo kindi niruru rani zanga wo, kura aboro rengbe arengba ka payasipa rani. Ono tie, gupai nyakipaha gbe nga Yekova naida aida na gaani apai bambiko ani naraka na ngbanyaa kuti gako ruru atingidapai.
Du Rogo Ngbabase na Rogo Pazereda
18, 19. Gine nga sangbana irisa ani ga Mbori atingidapai?
18 Pa irisa ani ga Mbori atingidapai nabanda rani ani du mbembedii naako. (Atambuahe 119:145-152) Bambiko ani naberãpa ga Yekova atingidapai, ani ini gupai nga ani rengbe arengba ka kparakpee fuko na ngbaduraniyo dũ, na ani ki ini gupai a nga ko agiaha agia. Ani rengbe ka zinga “mbata fu ngbatutu” ka kparakpee tipa undo. Gere nga bawene regbo tipa kparakpee! (Atambuahe 119:145-147) Mbori mbembedii na ani a bambiko ani nane gbegbere mangaapai na kini bi fugo ko niparengo, a wa Yesu anabihe. (Atambuahe 119:150, 151; Yoane 17:17) Gaani pagume dagbarani na Yekova nasongoda rani rogo gi totorotototoroto zegino re na gi gaani pagume re, si nika banda rani ti regbo gako bakere vura nga ga Aramegido.—Yugoti 7:9, 14; 16:13-16.
19 Bambiko gaani bakere irisa tipa fugo Mbori, ani na ngbarago rogo ndikidi ngbabase. (Atambuahe 119:153-160) Wa adunga ani wa gbegbere aboro ya, ani ‘akparanga kusayo ti ga Mbori atingidapai te.’ Ani nakpinyemu ga Mbori azinahe na sidu, ani kidu na ngbabase rogo gako nyemuse nga ga weneringise. (Atambuahe 119:157-159, NW ) Ga Yekova atingidapai nazingisa gaani aberã tipa ani tingidi gupai ko aida ani mangihe tipa agu apai du apai tipaha nikparakparaha. Rogo gu kura gene, ga Mbori azinahe nga arugute, si ki ta du wo, ani naidapa gu rengo dube Bakusirani niipo ka ruga rani watadu ka yugo gene fu rani. Wa duhe nga ani ima rugatirani na gupai nga ‘ga Mbori apai nga kina ku rengo dunduko’ na gupai nga ani arengbanga ka ruga gaani anduge nisarani te, ani nadia ga Mbori arugute kugume na ngbarago.—Atambuahe 119:160; Yeremaya 10:23.
20. Tipagine du ani ti ni na “bakere zereda” berani?
20 Gaani nyemuse tipa ga Yekova andiko naye na zereda fu rani kpaima. (Atambuahe 119:161-168) Arungosi adianga “gu zereda nga ga Mbori” berani kusayo ka boro arengbanga ka ringbisaha na kurahe ya te. (AFiripoio 4:6, 7) Ani nataasapa ga Yekova asarangbangaa bakere gbe, si ki da na ani ti gupai nga ani naatambua ko tipaha dedede ‘bara saba na a’uru’ nibasasa. (Atambuahe 119:161-164) Bake apapara Atambuahe abibia ki yaa: “Bakere zereda du fu agu . . . [aboro] nakpi nyemu ga rugute; he adu nga ho sa ka kotosi yo te.” (Atambuahe 119:165) Kangia ani nakpinyemu ga Yekova andiko ki kakuti ni wadu ani nibasasa, ani akotanga rogo toroyo be agu apai kura boro amangaha watadu be kura ngbatungapai te.
21. Kangia kpakarakpakaraapai tona rogo dungurati gini kpiaapai nga ga Ziazia Kekeapai nayugo gupai nga si aidanga ani koto te?
21 Dungu aboro nibasasa du payo nikekehe rogo Ziazia Kekeapai ambunga ngbatunga he sa si du ninyenye ũkota fuyo te. Nikpiapai, gu Kristano nangia Gayo akotanga te, ono ko ‘ata kindi rogo rengo yo’ ga Dioturepe mangapai nga ga zanga sinombori ki vura du vurũ. (3 Yoane 1-3, 9, 10) Pauro angarasi agu adee nangia aKristano rimoyo angia Euodia na Sunduke “i du na berã sa rogo Gbia” yo, bambiko si nawira kpakarakpakaraapai atona dagbayo. Si nawira gupai nga, i agbia undo ki mbakadi gayo fudifudipai, na i ki susi kindi kumbatayo kaa mangasunge fu Yekova niruru yo. (AFiripoio 4:2, 3) Sidu, kangia kura ngbatunga kpakarakpakaraapai tona rogo dungurati si aidanga ani koto te. Ani moinga berã rani gbe kuti irisa ga Yekova azinahe, kini tingidi gupai nga ‘gaani apai dunduko si kubarabangiri ko.’ (Atambuahe 119:168; Asanza 15:3) Sidu, anga he ho nika ká na “bakere zereda” berani nyeanye kindi te.
22. (a) Ka ani gi sangba Mbori, gini mamu rengbe ani ka gbia ngbarago behe? (b) Wai si aida ani bi gu kura aboro nakuru kusayo rogo gu dungurati nga ga aKristano?
22 Ka ani airisa sangba Yekova ti aregbo dunduko ani aduadu na mamu berani kaa tambua ko kindi. (Atambuahe 119:169-176) Niraka ani na ngbanyaa kuti ga Mbori arugute, anga kina ngbabase sa rogo toroyo ani agbia ngbarago behe te ono ‘ngbarani napekapa ga Yekova tambuahe a.’ (Atambuahe 119:169-171, 174) Gere nga gu bakere mamu kisusi rengbe ani kadu nani berani rogo gi yangara arame re. Bake apapara Atambuahe aidi kaa raka kindi na kini sambuo Yekova, ono rogo gu gene i afuranga tipaha ya, ko “amerẽ kubani wa ingiingi kandoro.” (Atambuahe 119:175, 176) Si rengbe kadu nga bete agu aboro naima kura kusayo rogo gu dungurati nga ga aKristano nakpinyemu Mbori akpi kindi na kidu na nyemu sambuoko tiyo. Sidu, ani asadinga tirani tie ka manga agu apai dunduko rengbe ani ka mangaha, ka undo yo tipa i rengbe berewe ka bi ngbabase rogo toroyo na ka gbia gu ngbarago nga ga sambuo Yekova na gako aboro.—AEbere 13:15; 1 Petero 5:6, 7.
Nyenye Imarago Tipa Gaani Gene
23, 24. Gini amamu gbia oni he be geda Atambuahe kapita 119?
23 Atambuahe kapita 119 rengbe ka fu undo fu rani rogo agene nibakiakia. Nikpiapai, si rengbe ka sa rani ani naakido gbe kuti Mbori, bambiko si nayugo gupai nga ndikidi ngbarago naye fu agu aboro “nata rogo ga Yekova rugute!” (Atambuahe 119:1) Fugo bake apapara Atambuahe natingida rani na gupai nga, ndikidi fugo Mbori “nga kina ku rengo.” (Atambuahe 119:160) Gipai re nirengo duwa ka si kiisi gaani tambuahe tipa keke Fugo Mbori naabaha. Pa berã ani kurii Atambuahe kapita 119 duwa ka si sa rani ani wisigi Ziazia Kekeapai sirisiri na zanga manga nyomoro ti ni. Bake apapara Atambuahe anafu kpee fu Mbori dedede niyaa: “Mo rába re na gamo rugaapai!” (Atambuahe 119:12, 68, 135) Ko azungadihe a ki yaa: “Mo rába re na wene sarangbanga na inahe, bambiko wa idi mi sangbaro.” (Atambuahe 119:66) Si naida ani fu kpee a kina rogo gu bangisa gene re.
24 Ga Yekova yugopai nambu gene tipa dawedawe pagume dagbarani naako. Bake apapara Atambuahe anayamba tiko dedede niga Mbori moyambu. Nirengo ko anafura fu Yekova na agu afugo duna nunga ti ni niyaa: “Mi nga gamo ni.” (Atambuahe 119:17, 65, 94, 122, 125; ARomo 14:8) Nairiwo gi irisa nga boro naamangasunge fu Yekova na ka sambuo ko ni guni sa dagba gako aDezire yo re! (Atambuahe 119:7) Ya mo oni namangasunge ningbarago fu Mbori nigu boro natakapande gako Kindo? Ka si du wo, oni rugutironi na gupai nga, Yekova nikaa songoda roni asongoda kindi na kini fu maku fu roni rogo gi mangaapai nga ga mamu re, ka oni akido kuti fugo ko ti aregbo dunduko na ki mbu gaha imarago si nahaasa gaoni gene.
Gaoni Karagapai Nga Gine?
• Tipagine si aida ti ni ani kpinyemu fugo Mbori?
• Wai fugo Mbori asongoda rani?
• Rogo agini agene ga Yekova atingidapai aundo rani?
• Tipagine du ga Yekova aboro ti ni na ngbabase gbiati zereda?
[Gu kpiahe du ti kpewaraga 9]
Fugo Mbori nga mburu gu imarago nga ga toro
[Gu kpiahe du ti kpewaraga 10]
Ka ani akpinyemu ga Yekova atingidapai, ko aberãnga parani wa “mirĩ marã” te
[Gu kpiahe du ti kpewaraga 11]
Ka ani ageda Ziazia Kekeapai na a’uru dũ, agu afugo nafu undo rengbe ka ye kurii rani yo niipo bara ho ani afu kpee ni