Fugo Yekova Niungaha

Memeapai Rogo gu Bisue Kitabu Nga ga Atambuahe

AIRAKUMUKO rengbe ka yawee: “Awirani nga akumba nidu wa tomaahe asona rago parangayo, awirani nga ade nidu wa sekeseke ambia tukpu bambu rengbe na ga bakindo bambu; gaani agbamu nihi . . . gaani akandoro nibatika banambu yo wa akutu na akutu bawe.” Gu kura kumukokumuko aboro rengbe ka paa kuari a kini yaa: “Rago nangba ti agu aboro du ngbatunga pai fu yo wa gere!” Ono tie, bake apapara Atambuahe agumba gupai dukia ti gure ki yaa: “Rago nangba ti agu aboro du gayo Mbori nga Yekova!” (Atambuahe 144:12-15) Wai rengbe gupai re kadu? Yekova nga gu Mbori duna ngbarago, sidu, agu aboro nairiso ko, i a na ngbarago. (1 Timoteo 1:11, NW ) I gumbapa gi rengo re ziazia rogo gu yangara badona abia ga Mbori toro adu kugiipa kehe nga gu nakoda Atambuahe tona ti namba 107 ki dati namba 150.

Gu Bisue Kitabu Nga ga Atambuahe nanyakasapa ga Yekova asino adunga ti kura boro ya, na kini kodi gako weneringise nga ga nyemuse, naapa gumba rengo, gbiati wene sino. Wa ani kaa inopai bakere gbe tipa asino Mbori, kinawo a ani kadu na nyemu gunde tiko bakere gbe. Gipai re tigaha kini ye na ngbarago furani. Nangbaa gu pangbangaa ani agbiaha rogo gu Bisue Kitabu Nga ga Atambuahe re!​—AEbere 4:12.

ANI NA NGBARAGO MBIKO GA YEKOVA WENERINGISE NGA GA NYEMUSE

(Atambuahe 107:1–​119:176)

Agu aYuda nadu niziziyó Babera yo abibia ho i aakaraga tiyó ni ki yaa: “Ako, si du ka aboro atámbua Yekova ti ni tipa gako weneringise, na tipa gako iiriwo mangaapai fu awiri aboro!” (Atambuahe 107:8, 15, 21, 31) Wa Davide aasambuo Mbori, ko abibia ki yaa: “Ga rengo . . . da ku rogo mai angbangbaturũ yo.” (Atambuahe 108:4) Rogo gi gako bia naye re, ko akpari ki yaa: “Ako Yekova, gi Mbori, mo unda re! Ako mo batasi re wa du pa ga weneringise!” (Atambuahe 109:18, 19, 26) Atambuahe namba 110 nga sangbanebi tipa ga Masiya zogarago. Atambuahe 111:10 nayaa: “Gunde ti Yekova nga tonatona tatamana.” (Atambuahe 111:10) Gu tambuahe naye fuo gure nayaa: “Boro maku nga gu ni nagunde ti Yekova.”​—Atambuahe 112:1.

I nayamba agu Atambuahe tona ti namba 113 ki dati namba 118 nga Areruya, bambiko si dedede na gu fugo rogoho nga “Areruya,” du rogoyo nga “Oni tambua Yekova!” Ringbisihe kuti gu buku du rimoho nga Misina, i akehe rogo gu biata kama agarã, si nayawee i anaabika agi abia re ti regbo Pumbo Susiri na ti regbo gu kura apumbo biata aYuda anaamangaha na agarã dunduko. Agu Atambuahe nga gu gizo kisusi rogo Ziazia Kekeapai, na nga gu kapita gizo kisusi akuraha dunduko rogo Ziazia Kekeapai, si nga Atambuahe namba 119, na si nataasapa ga Yekova pangbangaa nga gu ko akusihe fu aboro.

Akaragapai sa agu Asanahe Nga ga Ziazia Kekeapai:

109:23​—Ginipai Davide aaberãha ho ko ayani wee: “Mi nasusa wa kirima he nagura nyemu”? Masaku du Davide aagumbaha ya regbo kpioko aima mbeda kada.​—Atambuahe 102:11.

110:​1, 2​—Gine “[ga Davide] gbia,” nga Yesu Kristo, aamangaha baraho ko asungu ni ku kumbabee Mbori yo? Tingbafuo zinga Yesu bekpio, ko andu ku ngbangbaturũ yo na ki sungu pati kumbabe Mbori ka sungudo gu garã nangia 1914 tipa ka tona zogarago ni Bakindo. Vuru gu regbo re, Yesu aazogarago kurii mbedimbedi apefuoko, na kini yugu gene fuyó rogo gayó sunge tungusapai na sunge sa aboro ni abawiriki na kini raba yó a tipa i rẽ tipa ka zogarago naako rogo gako Kindo.​—Matayo 24:14; 28:18-20; Ruka 22:28-30.

110:4​—​Ginipai Yekova ‘azungahe tipaha ka ko asanga gako berã ya’? Gi zungahe re, si nga gu mokido Yekova amangihe na Yesu Kristo tipa ko mangisunge ni Bakindo na ni Gbiamotumo.​—Ruka 22:29.

113:3​—Rogo gini gene si aida i taasirimo Yekova “ho uru nakura ni dati ti he a”? Anga gi pai re nafura gbua tipa pa dungura aboro tiyó kaa irisombori na aʹuru dunduko te. Tonaho uru naakura ni uroyo ki dakuti gu regbo ti he dioyo, anzere uru naahaasarago auru kpotosende dunduko naabaha. Teketeke a, si naida i sambuo Yekova rogo zegino dunduko. Aboro arengbanga ka manga gipai re zanga i du nimbakadimbakadi yó te. Wa du ani ni aDezire Yekova, ani na gu mamu berani nga ga sambuo Mbori na kini mangi gu sunge nga ga takapande Kindo zaaza.

116:15​—Waidu du ‘pakpio ga Yekova ruru amoyambu nikikiipa pai bangiriko’? Gu kpio nga ga ga Yekova amoyambu dunduko wa du yó nibadona, si nikikiipa pai bangiriko, na ba-genoho gbe, sidu ka ko idinga si mangi te. Ka ko idi gupai re mangi, si sa aboro asa i naakapa kini sanahe tipa ndu gupai ko abatasanga gako ruru amoyambu ti ni ya, wa duhe tie nga ko na tanduapai dũ tiko. Kurigure, anga boro ho ka nye auru kpotosende ka tona mburu raka rogo vovo zegino te.

119:71​—Gini wenepai duho ti rungo be ima? Agberango rengbe ka yugopai furani ani naakido kuti Yekova rogo apai dunduko, kaa kpara fuko kakaka, na kaa wisigo Ziazia Kekeapai kakaka zanga manga nyomoro tingbaha, na ka manga gupai si agumbaha. Kurigure, gaani karagapai kuti rungosi rengbe ka yugo gu sino rani arunga ya. Rungo asanga rani ngbadurani imi te ka ani mbuhe si raba rani.

119:96​—Gine nga rogo gupaiyo nga “digida ziazia apai dunduko”? Bake apapara Atambuahe aafura tipa ziaziapai kuti gu bipai nga ga aboro. Si nawiraha nga ko aduna gupai berãko yo nga, gu bipai du boro nani tipa ziaziapai, si nikina guruhe. Nigupai dukia ti gure, ga Mbori arugute na ngbatunga agu angbanda re ti ni te. Gaha arugute tipa abangiriba nga ga raka dunduko.

119:164​—Gini nyanyakipa pai du ti sambuo Mbori ‘bara saba rogo uru sa’? Gu namba nga saba, si dedede nayugopa rengba he. Sidu, gupai bake apapara Atambuahe aagumbaha ngawee Yekova ima rẽ aboro dunduko naasambuo kina ko sa.

Agu Apai Rengbe Ani ka Wirikaha:

107:27-31. Ho Aramegido nika ye ni, ‘si agasa ga aboro berã agasa,’ bambiko gu tatamana nga ga zegino afunga wiri undo fuyó te. (Yugoti 16:14, 16) Gu tatamana nga ga zegino arengbanga ka batasa boro bekpio te. Kina agu aboro sa nangera kube Yekova tipa bata, i nika raka kini ‘tambua Yekova tipa gako weneringise.’

109:30, 31; 110:5. He anaadunga ho ka banda kumbabe banzengere ko anaazada basape nani te, mbiko ko anaazada vurakubee na garebeko. Ka gumbapai nimasaku, Yekova gudu “ku kumbabe” gako amoyambu yo, ka sovura tipa yó. Rogo gi gene re, ko kini banda yó na kini undoyó. Gipai re nga wene ndupai tipa ani ‘fu bakere tambuahe fu Yekova’!

113:​4-9. Pa Yekova ima kio gbe si ki sa gupai nga ko umbasipa tiko aumbasi tipa “ka ngana agu ahe du ngbangbaturũ yo.” Wa vura duhe wo, nunga umbapa boro, nunga rungorungo boro, na nunga gu dee nga irazangada namanga ko amanga. Gu Bakerepa Bakindo nga Yekova, ko nga boro umbasitise, sidu ko naida agu aboro nairisoko i du a ni aboro umbasitise.​—Yakoba 4:6.

114:​3-7. Si naida gupai nga, pa wirika ani gu iiriwoapai Yekova amangihe tipa gako aboro bangiri Zamba Baime, bangiri Yaradene, na pavuru Bagangara Sinai, si ba iriwoko tirani bakere gbe. Ka pepai nimasaku, si naida gupai nga “kpotosende,” nga ngbatunga aboro, i “kio” be Gbia.

119:97-​101. Pa gbia ani tatamana, dudungurobipai, na giarogopai rogo Fugo Mbori yo nabanda rani be gu kereapai rengbe ka manga rani rogo toroyo.

119:105. Fugo Mbori nga imarago tipa ndurani na gu rogoyo ngawee si naundo rani ani mangipai sa gu kpakarapai nakura sa rani. Ka pepai nimasaku, si nayugo gene furani a, wa duhe nga si nafura tipa ga Mbori ringbisapai kumbatayo.

KADU NA NGBARAGO AGBERANGO KI VURA DU VURŨ

(Atambuahe 120:1–​145:21)

Wai rengbe ani ka mangapai sa kereapai na ki bati behe? Atambuahe tona ti namba 120 ki dati namba 134 nafu gu karagapai du ziazia. Ho ani angera ni kube Yekova tipa undo, si nasa rani ani bati be agberango. Agi atambuahe re, nga gu i ayambaha nga Abia Dakpa Kuari yo, si nawira i anaabihe ho aYisaraere anaandu nunguro ni ku Yerusarema yo tipa ka manga apumbo yo, nga agu apumbo i anaamangaha bara sa rogo garã.

Atambuahe 135 na 136 nayugo Yekova ni Bamangi agu apai ngbatiko, nga gupai kpiaahe arengbanga ka mangaha ya. I asari gu bia nga Atambuahe namba 136 nigu bia i atabi bambata papara gaha veresi gu kura aboro kini karaga gu yangara paparaha. Gu bia Atambuahe ye fuo gure, si nafura tipa gu rungo aYuda adu rogoho ho i aduni Babera yo, nga agu aboro naaida ka iriso Yekova Siona yo. Davide nasari abia Atambuahe tona ti namba 138 ki dati namba 145. Ko aaida ka ‘sambuo Yekova na ngbadukoyo dunduko.’ Tipagine? Ko akaragapai ki yaa: “Bambiko mo ambakadi re na iiriwo banaru pai.” (Atambuahe 138:1; 139:14) Rogo agu atambuahe bisue naye fuo gure, Davide akparikpee tipa Mbori banda ko be gbegberẽ aboro, tipa wene arugute, na tipa i batasi ko be abarungosi aboro, na tipa arugute nga ga sino mangaapai. Ko anyakasipa gu ngbarago nga ga ga Yekova aboro. (Atambuahe 144:15) Fuo Davide fura tipa kiopa Mbori na gako wene sino, ko ayaa: “Ngbare agúmba pa tambua Yekova, aboro dunduko sámbua kparakpara ziazia rimoko asambua nye anye kindi.”​—Atambuahe 145:21.

Akaragapai sa agu Asanahe Nga ga Ziazia Kekeapai:

122:3​—Wai Yerusarema angia gu bakporo “kpamia tihe rogo ho sa”? A wa si anidu tipa agu abaakporo naanidumbata, i adudua agu abambu nadu Yerusarema yo kpitikpiti na akuraha. Gu bakporo re adu kpikpikpi si kidu taata i bandaha. Kurigure, pa mbeda akporo na akuraha rogo gu bakporo re asa araki rogoho i naakido kube akurayo tipa undo na tipa bandahe. Gipai re nayugopa gu kodatise nangia ga agu angbatunga Yisaraere nadu 12 ho i anaadunguratiyo ni tipa irisombori.

123:2​—Gini nyanyakipa pai du ti gu yugopai na kpiapai du tipa bangiri amoyambu? Agu amoyambu nga akumba na aguyó nga adee nangera kube abairayo tipa apai ue: bambataha nga ka ino gupai bairayo aidaha beyo na gu uehe nga i nangera kube bairayo tipa bandahe gbiati agu ahe nika songoda gayó raka. Teketeke a, ani nangera kube Yekova tipa ka ino gupai ko akpinyemuhe berani na tipa ka gbia gako weneringise.

131:​1-3​—Wai Davide ‘azeresi mbisimoko wa gu gude mbu ha mamu nani’? Wakinagu gu gude mbu ha mai agbatagene ka gbia wasa be nani, Davide awiriki wai ka gbia wasa “wa gu gude mbu ha mamu nani.” Rogo gini gene? Ko amanganga ha rogo gu gene nga ga rekangoko, ka enda, watadu ka abiatiko watadu ka orafuo agu ahe paha aima kio fuko te. Kuba gupai nga Davide gbata gene tipa rimoko naawo, ko aima ino agu apai ka ko amanganga ha ya na ki nye na kina umbasitise. Si adu nipatatamana furani ka ani wiriki gako sino berã, gbe, ho ani aida ni ka mangasunge rogo dungurati.

Agu Apai Rengbe Ani ka Wirikaha:

120:​1, 2, 6, 7. Kitangbaanga aboro gbiati gbegberẽ afugo bara boro rengbe ka fuda yó nikerehe. Gene sa dagba agu akuraha ani ayugo gupai nani nga ani nasongoda “pa zereda” nga ka banda ngbarani ti gumba kere afugo.

120:​3, 4. Kangia si naida ani raki na gu boro nga ‘iranangahe,’ ani rengbe ka gbia wasa bambiko Yekova ambakada apai ambakada ti gako regbo. Agu aboro nakitangbaanga akurayo agbiatiyo agbia na kerepai be “iranyaka.” Nirengo, i agbiatiyo agbia na ga Yekova ngariangaria zinga nga gu zinga “kingiri we yegbende ngua” arukubaha.

127:​1, 2. Rogo agu apai dunduko ani amangaha, si naida ani ngere kube Yekova tipa arugute.

133:​1-3. Gu kodatise nga ga ga Yekova aboro naye na pazereda na kini fu wasa. Si aidanga ani gbarasipaha nibisirapa akuarani, rogo papaya, watadu rogo kpakanahe te.

137:​1, 5, 6. Agu airisi Yekova nadu ba zio yo adu nikodikodiyo kuti Siona, nangia ga Yekova riigbu auru kpotosende ti gu regbo re. Ginipai tipa rani areme? Ya mo ani kakuti gu riigbu Yekova amangasunge nani areme?

138:2. Yekova ‘nakiiso gako gumbapai kurii rimoko,’ na gu rogoyo ngawee digisidigisi agu apai ko akidohe tipaha nirimoko nika susa pa wai ani amaabangirani ka bihe. Ka pe rengo, iiriwoapai gu duho napido rani kumbatayo.

139:​1-6, 15, 16. Yekova ima ino gaani mangaapai, gaani aberã, na gaani afugo mbata fu ani gumbaha. Ko aima ino rani ho ani aduni nimobara rukumbu yo, mbata fu apapara kpotorani nika kura. Gu inohe du Mbori nani tipa rani ‘nagasa rani agasa’ tipa ka rugatirani naapaha. Nairiwo wai si afu wasa ka ino gupai nga, anga Yekova nabi kina bibi gu kerepai nafuda rani sa te, ono ko ima ino wai a du sangbanaha kurirani!

139:​7-​12. Anga rago ho du nituturuhe rengbe ka sa Mbori ka ko nyakasingo rani rogoho ya te.

139:17, 18. Ya mo inohe tipa Yekova nafu ngbarago furani? (Asanza 2:​10) Kangia wo duhe, gure nga ani ima gbia gu mburu ba nikaa fu ngbarago furani. Ga Yekova aberã ima ‘nge kisusi ngume.’ Apai nikadu kinaho kindi tipa wirikaha tipa Yekova.

139:23, 24. Si naida ani duna nyemu Yekova wisigi kpotoraniyo tipa “gene gbegberẽpai,” nga iraira aberã, iraira nyemuapai, na ki undo rani ani moho kusayo.

143:​4-7. Wai rengbe ani ka hi kere arungosi? Bake apapara Atambuahe afu karagapai ki yaa: Berãkurii ga Yekova mangaapai, kaa berãpa agu apai ko amangaha, na ka kparakpee fuko tipa undo.

“Oni Tambua Yekova”

Gu bambata badona atambuahe du biama, si nadigo na atambua fu Yekova. (Atambuahe 41:13; 72:19, 20; 89:52; 106:48) Gu yangara badonaha nadigo kinawa a. Atambuahe 150:6 nayaa: “Agu ahe dunduko du na omeonga ti ni si nitámbua Yekova! Oni támbua Yekova!” Gupai re amanga nirengo rogo ga Mbori vovo zegino.

Wa ani angera kumbatayo tipa gu regbo maku re, ani na wene ndupai berani ka taasarimo ndikidi Mbori na kini sambuo rimoko. Ho ani aberã ni tipa gu ngbarago du ani nani bambiko ani ini Yekova na kini gbia ngbarago be pagume dagbarani naako, ya mo si afõnga rani ngbaduraniyo ani sambuoko tee?

[Gu kpiahe du ti kpewaraga 31]

Ga Yekova iiriwo mangaapai naba kina kiki ti boro

[Gu kpiahe du ti kpewaraga 32]

Ga Yekova aberã ima nge kisusi “ngume”