Gu Maabangirise Du Tipa Zingabekpio—Rogoyo Nga Gine Fu Roni?

“Mo naza bero, ki nimbisi gu nyemuhe nga ga unga ahe dunduko.”—Atambuahe 145:16.

1-3. Gini maabangirise du kura aboro nani tipa raka kumbatayo? Oni yugunga ha na kpiapai.

GUDE rimoko angia Christopher garãko adu ribua, aguari na unvurako gbiati ando yo na dia ando yo gbiati awiri ando yo ue ka ndu ku gene sunge tungusapai yo wiso rogo kura uru sa Manchester yo du ringara aNgirisi yo kini tanga na gi tungusapai re ti akporo. Gu kura gaani magazini nga Awake! nasakarogo gupai yo namangi rogo gu uru re. “Fuo susa bebere uru, i andu tipa ka biko arago Blackpool yo, nga gu rago du mbembedii pangba baime yo, nga gu ba aboro andu kurogoho dedede tipa ongoda. I dunduko tibarayo 6 adu dagba agu aboro 12 nakpiki nibasa kina bangiri gene yo be gu béno nangia ga tarambiri namangi, nga gu apurusi aringbisipaha ya si angia ‘bakere kpio badungu aboro be we.’ ”

² Rogo gu yuru nandu mbata fu gi gberango re, agi aborokporo re andu kupati gu Wisigo Buku Nga ga Dungurati, yo i asakipai ni tipa gu riipai nadu tipa kpio. Ba Christopher ayaa: “Christopher angia gu gude nanaberã kuriiapai dedede. . . . Rogo gu yuru re, ko afura ziazia tipa vovo zegino na tipa gako maabangirise tipa raka kumbatayo. Fuo gure, wa gaani sakapai aandu kindi kumbatayo, Christopher atuka ngbako ki yaa: ‘Gu undo duho fu boro tipa du ni niboro sa dagba aDezire Yekova nga, wa vura du pakpio badiangba boro ni gupai imi aima, ani ima ino gupai nga, ani abi tirani abi berewe auru kpotosende herẽ rogo kura uru.’ Boro adunga ho dagbarani naini ya agu afugo re nika nye kurii rani yo ani naatingidaha kindi te.”a

³ Mbata kusayo, rogo 1940, Franz, nangia Dezire niboro Austria aapido kpio be gu masini i anakafa goro aboro nani, tipa ká ko ka manga irairapai kuti Yekova. Rogo gu ba i azi Franz kurogoho Berlin yo, ko ake waraga fu nako ki yaa: “Mbiko gupai ini mi he, wa ka mi amangi mozunga [nga ga abanzengere], gure nga ka mi mangi gu ingapai rẽ na kpio. Ka si du fere niirairapai. Ka zingabekpio dunga tipa re te. . . . Ono awere tie Nina, na oni nga atamere na adawire dunduko, i niima gumba pa gu sarangbangaa areme fere sari yo ho kutire, si nga kpio, na ka iriwoho tinga tironi ya, gba wiso i ka imore. Gbia mi gimi ome be Mbori, a wa si adu ti aregbo dunduko tipa ndikidi aKristano bakuru kusayo. . . . Ka oni ru nyanyakii dati kpio, ani agbia tirani agbia berewe ti rago zingabekpio. . . . Ani gbia tirani agbia berewe.”b

4. Gine nga sangbana agu apangbangaa gumba yo ho herẽ kurii roni, na ginipai ani ka wisigoho fuo gure?

⁴ Gu maabangirise du tipa zingabekpio aduna bakere rogoyo ti ni fu Christopher na fu Franz. Si angia ndikidi rengo fuyo. Nirengo, agi apangbangaa re naba kina nunga tirani! Tipa ani rengbe ka kiiso gaani tambuahe tipa Yekova na ka nyakasa gaani maabangirise tipa zingabekpio, ani wisiginga ndu gupai Mbori nika ye ti ni na zingabekpio na gupai ino pai tipa gipai re nika mangaha tipa rani nibasasa.

Yuguyugupai Tipa gu Zingabekpio Nga ga Kpotosende

5, 6. Gine gu yuguyugupai gu mokedi nangia Yoane akehe du rogo Yugoti 20:12, 13 ayugoho?

⁵ Rogo gu yuguyugupai i ayuguhe fu gu mokedi nangia Yoane tipa gu ga Kristo Yesu Zogarago Nikadu Tipa Agarã Kutu, ko abi gu zingabekpio nga ga kpotosende si nimangi. Ko ayaa: “Mi ki bi agu yo naima kpika, nga kikindigi pa yo na umba pa yo, . . . Baime ki gasi agu akangba nadu rogo ho, kpio na Adisi ki gasi agu akangba nadu rogo ho.” (Yugoti 20:12, 13) Aboro ngba arikoyo dunduko, singia gu “kikindigi pa yo” watadu gu “umba pa yo,” nga agu aboro dunduko du Adisi (Sheol ) yo, nga muro tipa ngbatunga aboro, i akusa yo akusa dunduko. Agu aboro a nakpiki rogo abaime akaragatiyo akaraga berewe ka raka ti gu regbo re. Gi bawenepai nika manga re nga papara ga Yekova ringbisapai.

⁶ Ga Kristo zogarago nikadu tipa agarã kutu natona na zio Satana na ki ba ko kurogo gu due zanga mburuhe. Anga boro ho dagba agu aboro i ka zingisa yo bekpio watadu agu aboro nika bata be bakere gberangbii Satana nika ingisa yo ti regbo gu zogarago re te, mbiko ko adunga tingba sunge te. (Yugoti 20:1-3) Agarã sa kutu rengbe ka wira gu regbo bangironi du nigbangaha gbe, ono nirengo, Yekova tigako nabihe wa “uru sa.”—2 Petero 3:8.

7. Gine nikangia mburu sapangbangaa ti regbo gu ga Kristo Zogarago Nikadu Tipa Agarã Kutu?

⁷ Kuti sangba gu yuguyugupai re, gu ga Kristo Zogarago Nikadu Tipa Agarã Kutu nikangia regbo sapangbangaa. Gu mokedi nangia Yoane akepai tipaha ki yaa: “Mi ki bi agu yo naima kpika, nga kikindigi pa yo na umba pa yo, i niru barangba mbata sapangbanga, i ki za akitabu. I ki za gu kura kitabu nga kitabu unga. I ki sapu ngbanga agu yo naima kpika kuti agu apai du ni keke he rogo akitabu, ringbisi he kuti gayo mangaapai. . . . I ki nisapu ngbanga aboro dunduko ringbisi he kuti gayo mangaapai.” (Yugoti 20:12, 13) Oni kparia gupai nga, anga mburu gi sapangbangaa re rii agu apai boro amangihe watadu ni azanga mangaha mbata fu kpio ni te. (ARomo 6:7) Kuba gure, mburuhe rii agu “akitabu” i ka zakaha gizo. I nika sapangbangaa kuti aboro riimburu agu apai i ka wirikaha rogo agu akitabu re singia i rẽ tipa i keke arimoyo kurogo “kitabu unga” watadu i arẽnga tipa i kekehe te.

“Gu zingabekpio Nga ga Unga” Watadu “gu Zingabekpio Nga ga Sapangbanga”

8. Gini apai ue rengbe ka manga tipa agu aboro i ka zingisa yo?

⁸ Mbata kusayo rogo gu yuguyugupai i ayuguhe fu Yoane, i aringbisipa Yesu yo wa ko na “awiri arifungura . . . nga ga kpio [beko] na ga Adisi.” (Yugoti 1:18) Ko namangasunge niga Yekova bangbasia “Iraunga,” na nigu boro fu yo ome fuko ko sapungbangaa “unga aboro na kangba aboro a.” (Amokedi 3:15; 2 Timoteo 4:1) Wai ko ka manga gipai re? Nikaraga ko agu aboro kurogo unga nara ara awere rogo kpio re. Ti kura regbo sa, Yesu aya fu gu rimbasa aboro ko atungusapai fuyo wee: “Ka gi iriwo nga ti roni re ya, bambiko ragoho nada, ho agu yo ka gia fugoko ni dunduko du rogo amurã yo, ki kuru.” Fuo gure, ko agbia gupai kuti ni nga: “Agu yo nanamanga wenepai sa gu zingabekpio nga ga unga; agu yo nanamanga gbegberẽpai, sa gu zingabekpio nga ga sapangbanga.” (Yoane 5:28-30) Sidu, gini raka du kumbatayo napido gu ruru akumba gbiati ruru ade nadumbata?

9. (a) Ho i ka zingisa aboro ni bekpio, ginipai zanga kapa dunguyo nika wirikaha? (b) Gini bakere sunge yugupai nika manga?

⁹ Ho i ka karaga gi ruru aboro ni re kurogo unga ti regbo zingabekpio, fuöho aturanga te i ki bi gupai nga, agu akidohe i adu nani ima da awere ti rengo. Nairiwo wai i kadu na nyemu ka ino gu boro nga Tunga ga Mbori dee du pani rogo bambata sangbanebi rogo Ziazia Kekeapai rogo Bambata Pai 3:15! Nairiwo wai i kadu na ngbarago ka ino ya Yesu nangia gu Masiya i akidohe tipa ko aima kakuti gako ruru mangapai ki da ti kpio, si ki ta du were, ko kini fu ungako nimotumo tumorii tipa aboro! (Matayo 20:28) Agu aboro nikaa dia yo kugume kurogo raka aduna bakere ngbarago ka undo yo i rugutiyo na gupai nga, gi motumo tumorii re nga yuguyugu ga Yekova weneringise arẽnga aboro tipaha ya gbiati gako inapai. Ho agu aboro i ka zingisa yo nika rugatiyo ni naapa gupai ga Mbori Kindo amangaha tipa digiso gako ringbisapai tipa kpotosende, zanga kapa, ngbaduyo aduadu na bakere tambuahe fuko. I nikadu na bakere mamu beyo ka yugo gayo nyemuse fu gu Bayo nga boro nyemuse du ngbangbaturũ yo na ka kakuti ko gbiati Wiriko. Agu aboro dunduko nikaa raka aduna ngbarago ka koda beyo kuti gu bakere sunge yugopai si ka idaha tipa ka yugopai fu agu abirioni kpikpi aboro i ka zingisa yo muro yo, nga agu aboro si ka ida i di ga Mbori mbakadapai tipa motumo tumorii kugume.

10, 11. (a) Gine gu Zogarago Nikadu Tipa Agarã Kutu nika fu amamu he fu aboro dunduko auru kpotosende? (b) Gini ariapai si ka mangaha na ani?

¹⁰ Ho i ka zingisa Abarayama ni, zanga kapa, ko aduadu na bakere ngbarago ka bi wai du raka nzunzu tiibe gu zogarago nga ga gu “bakporo” ko anamaabangiriko tipaha re. (AEbere 11:10) Nga gu ngbarago gu ruru kumba nga Eyobo nikadu nani ho ko ka ino gupai ni nga, gako gene raka anyakasi ga Yekova kura amoyambu nga aguyo nagbia asada rogo gayo kakuti ruru mangaapai! Na nairiwo wai Daniere nikadu na nyemu ka ino wai gu sangbanebi ga Mbori toro adu kugiipa ke ko ho adigi!

¹¹ Nirengo, agu aboro dunduko nika gbia unga rogo vovo zegino, singia ngba gu gene nga ga zingabekpio watadu nika bata rogo gu bakere gberangbii naye, i aduna dungu apai ka wirikaha tipa ga Yekova ringbisapai tipa kpotosende gbiati araki auruhe. Gu maabangirise du tipa raka nyeanye kindi na kini taasirimo Yekova a nyeanye kindi, si nika sa gu ringbisapai tipa yugopai nikadu ti regbo gu Zogarago Nikadu Tipa Agarã Kutu re nibawenepai kisusi nirengo. Ono tie, gupai paha nika nyaka gbe nga agu apai ani nikaa mangaha wa du ani nibasasa wa ani kaa wirika agu apai du rogo agu akitabu gumba yo paha re. Ya mo ani amanga agu apai ani kaa wirikaha? Ya mo ani aberãkurii gu nyanyakipa arugute na ki dihe ku ngbaduraniyo, nga agu arugute nika nyakasa rani ani sovura kuti ga Satana yangara asadatise ka nyaga rani kusayo ti rengo?

12. Gine nika undo aboro nibasasa i nimangisunge wa aboro sa rogo agu asunge ue nga ga yugopai gbiati sunge sa kpotosende ni paradiso?

¹² Agu apai si aidanga bangirani go ti ni ya nga gu bawene amaku nika ye fu rani nisangbana manga yo sunge na ga Kristo motumo tumorii tipa rani. Agu aboro i ka karaga yo kurogo unga nizingisayo yo bekpio, adunga na agu akaza gbiati agbara du areme te. (Yesaya 33:24) Wene auwakpotose gbiati maabangirise tipa raka zanga awokote nika sa agu aboro nikaa raka rogo vovo zegino i kodi beyo kuti sunge yugopai zanga mbugo tipa raka fu gu dungu aboro i ka zingisa yo. Agu aboro nikaa raka auru kpotosende ti gu regbo re akoda beyo a kuti gu babakere sunge kisusi aboro amanganga gu waha ya wa zegino aenge aenga kindi, nga sunge sa kpotosende naabaha ni paradiso si ye na taarimo fu Yekova.

13, 14. Ndu zaka Satana ti regbo yangara asada nga gine, na gini sangbanaha rengbe kadu tipa rani wa du ani nibasasa?

¹³ Ho i ka zaka Satana ni rogo gu due zanga mburuhe tipa ko ye na yangara asada fu aboro, ko amanga asadatise ka ingisa aboro berewe. Ringbisihe kuti sangba Yugoti 20:7-9, gu ingisiingisi ‘rikaaboro’ watadu gu badona nga ga aboro dunduko nika ye kutii ga Satana gbegbere ome, agbiatiyo na gayo sapangbangaa nga ga gbarasa yo: ‘We azora ngbangbaturũ yo kini zokodi yo.’ Tipa agu aboro i ka zingisa yo ti regbo gu Zogarago Du Tipa Agarã Kutu, na nikadu dagba agi aboro we ka rita yo re, gi pa gbarasa yo re nika sa gayo zingabekpio nigu zingabekpio nga ga sapangbangaa. Gu kparakparapai du dagbayo na agu aboro i ka zingisa yo i ki kakuti gayo ruru mangaapai nga, i agbia gu gamahe nga nyenye unga. Nirengo, gayo zingabekpio angia “gu zingabekpio nga ga unga.”—Yoane 5:29.

¹⁴ Wai rengbe gu maabangirise du tipa zingabekpio ka fu wasa fu rani zavura kina boro awere? Na gupai nyakipaha gbe nga, ginipai si aida ani mangihe tipa kadu naa kido nga, ani agbia gu undo agbia si ka ye nani gizo?

Agu Apai Rengbe Ani ka Wirika Awere

15. Wai rengbe gu ida du boro nani tipa zingabekpio ka fu undo funi awere?

¹⁵ Si rengbe kadu nga boro kpi sa roni bambeda nga guni oni akpinyemu ni na oni kini sovura nidiabese ka mbakada gu bakere ariapai ngbatunga gu bakere nunga re aye nani fu roni. Gu maabangirise du tipa zingabekpio nafu wasa fu roni ku kpotoroniyo gbiati ome nga gu adunga be agu aboro ainonga rengo ya. Pauro afu wasa fu aTesaroniko na agu afugo nga: “Awirina, ani akpi nga nyemu oni zanga ina pa agu yo ka ti ni rame te; ya ka oni rungo nga wa kura aboro, adu nga na maabangirise ti yo ya te.” (1 ATesaroniko 4:13) Ya mo oni nabi tironi rogo vovo zegino kini bi gupai nga Mbori nazingisa aboro bekpio? Oni gbia wasa awere be berãkurii gu maabangirise du tipa gbia oni abadiangbaroni berewe.

16. Gine nika vura du nga gaoni berã ho i kaa zingisa aboro ni?

¹⁶ Si rengbe kadu nga oni narungo awere be sangbana gu samungu nangia ga Adamu, isoke rogo gu kaza namanga roni. Ka oni mbunga agu arungo si aye nani si sa roni bangironi go ti gu maabangirise nga ga ngbarago nga ga zingisa yo roni kurogo unga berewe na wene ngangara auwakpotoroni gbiati ome rogo vovo zegino ya. Wa bangironi nika za na oni ki bi kpakpu agu aboro naida ka yugo gayo nyemuse fu roni wa i nazingisi roni, oni akpanga ti fu tambuahe fu Mbori tipa gako weneringise nga ga nyemuse te.

17, 18. Gini nyanyakipa apai ue si aida ani moihe ku ngbaduraniyo?

¹⁷ Wa du rago tie re, ani wisiginga apai ue nga gu si aida ani dihe ku ngbaduraniyo. Gu sa nga nyakapa mangasunge fu Yekova awere na ngbaduseyo dunduko. Niwirika ani mangapai wa Bairarani nga Kristo Yesu, gu gaani raka ani arakaha nga ga mbupa kura gaani apai, si nayugopa gaani nyemuse tipa Yekova na tipa akuarani aboro. Kangia asogote gbiati agu arungosi aboro amanga rani nani nabengeta rani na agu ahe si aida si du berani watadu si ambunga rani ani du ngbarii rani te, gaani diaberã nga ka ru nyanyakii kindi rogo gaani idapase ka kina gini asada vura ye sa rani vurũ. Ka si wiri gupai nga asogo rani naserekpo rani sa kina kpio, gu maabangirise du tipa zingabekpio du ani nani tie nika fu wasa gbiati ome fu rani ani nye niruru rani fu Yekova kaa mangasunge gako Kindo kindi. Ii, gaani ngara rogo sunge tungusapa Kindo gbiati sunge sa aboro ni abawiriki namaa ndurani ngbagene gu nyenye amaku Yekova abandaha tipa ruru aboro.

¹⁸ Gu uepai rengbe ani ka wirikaha, si na pagume dagbaha naapa wai ani amangapai sa agu a’asada naye sa rani be gu kpotorani zangarengba. Gaani inohe tipa gu maabangirise du tipa zingabekpio gbiati gaani tambuahe tipa ga Yekova weneringise arẽnga aboro tipaha ya nanyakasa gaani diaberã ani nye nyanyakii rogo idapase yo. Gu mokedi nangia Yoane afu rugute ki yaa: “Ka nyemu zegino du nga ti roni ya, na agu ahe du zegino. Ka nyemu zegino du ti boro, ga Mbori nga Ba nyemuse du nga ti ni te. Agu ahe dunduko du zegino, gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga, adu nga ni ga Mbori nga Ba ya, du ni kina ga zegino. Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni anye anye kindi.” (1 Yoane 2:15-17) Gu zomia aboro nga ga zegino si amangaha rogo ba nyemu aũzegino ti aboro, si agbenga berã rani te baraho ani aringbisaha ni na “ndikidi unga.” (1 Timoteo 6:17-19) Ka asada ye fu rani ani mangi wasiro, ani aká aká ki ru nyanyakii. Ani ima rugatirani na gupai nga, ka ani kpasaka nduge ngba gu gene nafu gberarago fu Yekova, kina gu bangisapai du tipa agu aboro adunga gu maabangirise du tipa zingabekpio beyo ya kadu tipa rani, ka ani kpiki mbata fu Aramegido.

19. Gini bakere irisa si aidanga bangirani go ti ni ya?

¹⁹ Kurii apai dunduko, ka bangirani ya gonga ti gu bakere irisa nga ga sa ngbarago ti Yekova awere na nyeanye kindi ya. (Asanza 27:11) Pa nye ani niruru rani dati kpio watadu pa ka ani kuti gaani ruru mangaapai dati digido gi gbegbere zegino re nayugo gu boro fu Yekova ani asongoda gu ngbangaa kubara ni yo du tipa gu bakere pagbia nga ga haurago. Nga gu ngbarago nikangiaha ani raki rogo gu Paradiso nga ga kpotosende singia fuo bata ani rogo bakere gberangbii watadu i nazingisi rani ngba iiriwo gene bekpio!

Mbiisa Gaani Nyemuapai

20, 21. Gine nika undo rani ani nye niruru rani ka kura gaani asanahe tipa zingabekpio vura nye kindi zanga i karagapai sani vurũ? Oni sakinga rogoyo.

²⁰ Rogo gi gaani sakapai du tipa zingabekpio re, i ata karaganga pai fu rani sa gu kura gaani asanahe te. Wai Yekova nika mbakadapai tipa agu aboro nakpiki ho i aduni nga arogotise? (Ruka 20:34, 35) Ya mo i azingisa aboro kina rogo agu aba i akpiki rogoho? Ya mo agu aboro i ka zingisa yo, i azingisa yo mbembedii na gu ba du gayo aborokporo rogoho? Dungu kura asanahe kinaho kindi tipa gu mbakadapai du tipa zingabekpio i ata karaganga pai tipaha ya. Wa vura duhe wo, si naida ani moi agu afugo nga ga Yeremaya ku berã rani yo nga gu nayaa: “Yekova namanga apai ni wene he fu agu yo nasunguda ko, fu mbisimo gu ni nagbata ko. Gu pai ngba nga ka boro du na maabangirise ki nisungudi ga Yekova bata ni zera.” (Abia Kpenunga 3:25, 26) Ti ga Yekova ringbisiringbisi regbo, ko akaragapai akaraga fu rani sa gaani asanahe dunduko wa ani aidaha rago ki ngba tirani. Tipagine rengbe ani kadu ti ni naa kido tipa gipai re?

²¹ Ani berẽnga kurii agu afugo ga Mbori toro adu kugii bake apapara Atambuahe ko bihe fu Yekova niyaa: “Mo naza bero, ki nimbisi gu nyemuhe nga ga unga ahe dunduko.” (Atambuahe 145:16) Wa ani asona, gaani nyemuapai na’ariatihe a’aria. Agu apai ani anaamaabangirani tipaha ho ani adukuni rukutu, si berewe ni agu apai ani aidaha areme te. Agu apai namanga rani rogo raka gbiati agu apai ani amaabangirani tipaha namanga ariapai amanga tipa wai ani abi raka. Wa vura duhe wo, ka gaani ruru nyemuapai vura du wai, rogo vovo zegino, Yekova ambiisaha ambiisa nirengo.

22. Tipagine du ani ti ni na wene ndupai ka sambuo Yekova?

²² Gu banguapai du tipa rani awere wa du ani nibasasa nga ani du niruru rani. “Gu pai i nakpi nyemu he ti abaringbisipai [watadu amoyambu] nga, boro du ni irarengo” watadu niruru ni. (1 AKorindo 4:2) Ani nga agu amoyambu natungusa gu wene pangbangaa du tipa ga Mbori Kindo. Pa tungusa ani gi wene pangbangaa re zanga nyomoro fu agu aboro dunduko ani agbia yo naundo rani ani nye kindi kungba gene unga. Ka ani ya basanga pa gu rengo nga “rago gbia kuti mamu” namanga rani dunduko ya. (Batungusipai 9:11) Tipa oni rengbe ka umbasi agu abakabangirise adunga nidingisoro fu roni ya nga agu naye be agu apai nga ga raka, oni kakuti gu gaoni idapase du tipa gu taasitaasipa maabangirise du tipa zingabekpio. Oni ini gupai nga, kangia oni nika kpi mbata fu tona gu ga Kristo Zogarago Nikadu Tipa Agarã Kutu, oni rengbe ka gbia wasa be gu maabangirise nga ziga ayeaye. Ti ga Yekova regbo, oni arengba arengba ka fugö afugo Eyobo, nga agu afugo ko agumbaha fu Bakusiahe ki yaa: “Mo ayamba he, mi akaraga pai foro.” Ani sambuo Yekova, nga gu boro duna nyemu ka karaga agu aboro dunduko berewe kurogo unga du rogo gako berãpai!—Eyobo 14:15.

[Gu rukutu kekeapai du bandu kpewaraga yo]

Oni Natingidaha?

• Riimburu ginipai i ka sapangbangaa aboro ti gu regbo gu Zogarago Nikadu Tipa Agarã Kutu?

• Tipagine kura aboro nika gbia “gu zingabekpio nga ga unga” ti ni na gu kurayo ki gbia “gu zingabekpio nga ga sapangbanga”?

• Wai gu maabangirise du tipa zingabekpio narengbe ka fu wasa fu rani awere?

• Wai agu afugo du rogo Atambuahe 145:16 aundo rani ani mangipai sa agu asanahe adunga akaragapai sani tipa zingabekpio ya?

[Gu kpiahe du ti kpewaraga 27]

Wai pa ida ani kuti zingabekpio narengbe ka undo rani awere?