Pa Gbata Ani Gene Kaa Manga Ruruapai Nika Banda Rani
‘Oni naagbata kina ga Mbori rurupai mbata.’—MATAYO 6:33.
1, 2. Gini diaberã paranga dee ni Kristano amangihe, na tipagine ri amangi gu diaberã re ti ni?
PARANGA dee ni Kristano aamangasunge Asia yo ninakeke-apai rogo gu biroo nga ga irangbii. Ri angia gu boro nanaamangasunge wenengai, kini ye ku ba sunge yo mbata fu regbo na ki zanga ta kuari ti regbo sunge. Ono tie, wa si adu nga, gi gari sunge re angianga nyenye sunge te, regbo ada tipa i wisigipai ka bihe singia si naida ri ga watadu ka sigira rimori ninyenye boro-sunge. Gari bangerekurii basunge aya furi wee ko rengbe arengba ka sigira rimori ninyenye boro-sunge na ki tumba pari kuari a, ono tipa pai sa nga, ri idihe fuko ko kodiba na ri. Ri aká gipai re nyanyakii wa si avura du nga si arengbe ka sa gupai nga i mbu ri ti sunge vurũ.
2 Ya mo gupai gu paranga dee ni Kristano re amangihe arunga tee? Oó, gupai ri aamangaha na rubangirise nga ka irisa gu ga Yesu afugo nayaa: ‘Oni naagbata kina ga Mbori rurupai mbata.’ (Matayo 6:33) Tipa gi dee re, pa irisa ri bangua ruru arugute paha akii bangiiri kisusi pa gbia ri weneapai nimanga ri wasiwasi kodaba.—1 AKorindo 6:18.
Nyakapa Ruru Mangaapai
3. Gine nga ruru mangapai?
3 “Ruru mangaapai” nayugopa ka boro kuti manga kina ruruapai naapa ka ni kuti manga gu bangua arugute du tipa ruru sino mangaapai. Rogo Ziazia Kekeapai, gu fugo Giriki na fugo Ebere i asaha nga ruru mangaapai re, si nayugopa gupai du “diiri” watadu du “nzunzu.” Anga si nga padu boro niruru ni bangiri kina ni nisani te, nga boro naringbisa tini kuti gani andiko kina ni nisani amoihe te. (Ruka 16:15) Ono, si nga ruru mangaapai ringbisihe kuti ga Mbori andiko. Si nga ga Mbori ruru mangaapai.—ARomo 1:17; 3:21.
4. Tipagine du ruru mangaapai ti ni ninyanyakipa pai fu Kristano?
4 Tipagine du ruru mangaapai ti ni ninyanyakipa pai? Bambiko wa du Yekova nga “ruru Mbori,” ko namanga wenepai fu gako aboro ho i amanga ruruapai ni. (Atambuahe 4:1, NW; Asanza 2:20-22; Abakuka 1:13) Gu boro namanga irairapai arengbanga kadu na dawedawe pagume dagbani naako te. (Asanza 15:8) Si nga ndu gupai gu mokedi nangia Pauro angarasi Timoteo ti ni kini yaa: “Mo óro be ga paranga gbegbere nyemuahe, . . . [ono kini] peke fuo rurupai,” gbiati gu kura nyanyakipa asino. (2 Timoteo 2:22) Si a nga ndu gupai Pauro akodi gu “marã ngbaduse nga rurupai” ti ni ku dagba agu aũvura nibakiakia nga ga toro ko atangara arimoho.—AEfeso 6:14.
5. Wai rengbe kpakpa aboro ka gbata gene tipa manga rurupai?
5 Rengo ngaha nga, anga boro ho du niruru ni rogo apai yo dunduko te. Aboro dunduko nadi zangarengba be Adamu nigayo ũkumbo, sidu aboro dunduko nga aboro ingapai, du niʹiraira yo tona kinaho i abatika yo ni. Ono, wa vura duhe wo, Yesu ayawee si naida ani naagbata gene ka manga rurupai. Wai rengbe gupai re ka manga? Si rengbe ka manga bambiko Yesu afu gako rengberengbe unga nimotumo tumorii tipa rani, na ka ani yugo gaani idapase rogo mangaapai tipa gu motumo re, Yekova aduadu na nyemu ka mbupai fu rani tipa gaani ingaapai. (Matayo 20:28; Yoane 3:16; ARomo 5:8, 9, 12, 18) Riimburu gupai re, wa ani awirika ga Yekova ruru andiko na kini mangi bakere asadatise ka irisaha, na kini kparikpee tipa undo, ani dibe agu apai adia rungbura ani rogoho, Yekova aidapa gaani irisombori aida ani amangaha fuko. (Atambuahe 1:6; ARomo 7:19-25; Yugoti 7:9, 14) Nairiwo wai gupai re afu wasa fu rani!
Ani Du Niruru Rani Rogo Iraira Zegino
6. Tipagine zegino adu ti ni nikere rago fu agu aKristano nadumbata?
6 Ho Yesu afu sunge ni fu gako abawiriki i ndu ka manga dezirepai ku “digida sendeyo,” i aduna kpakarapai barabangiriyo. (Amokedi 1:8) Agu abatungusapai dunduko i afuhe fuyo adu “ni zogozogo ho be gbegberẽ ko” nga Satana. (1 Yoane 5:19) Zegino aima gbera be gu gbegbere sino Satana aaurugoho, na si adu nga aKristano nikadu adu gbaiga fu gu gaha ome nagbarasa rii aboro yo. (AEfeso 2:2) Tipa yo, zegino angia kere ba tipa ka raka rogoho. Kina pa gbata yo ga Mbori ruru mangaapai mbata ka i arengbe ti ni ka hipai ki kakuti gayo ruru mangaapai zanga wo. Dunguyo aima hipai, ono beteyo akpangbara kusayo “ngba gene rurupai.”—Asanza 12:28; 2 Timoteo 4:10.
7. Gini asunge duho be Kristano si aida ti ni i sovura kuti gbegbere ome maapai kurii aboro?
7 Ya mo zegino areme niwene ba zereda tipa aKristano? Wagusa te! Si ima gbera be manga irairaapai awere kisusi gu si adu nani rogo bambata sa kama agarã. Kurii gure, i aima ba Satana kusayo ngbangbaturũ yo ku auru kpotosende no na ko naso kere vura kuti mbedimbedi aKristano, nga “yangara awiriri [nga mbedimbedi aKristano], nga agu yo naka kuti ga Mbori rugute, na agu yo naka kuti gu dezire pai nga ga Yesu.” (Yugoti 12:12, 17) Satana nazubo agu aboro dunduko a nasongoda ‘awiri’ gu dee re. Wa vura duhe wo, aKristano arengbanga ka gbu be zegino te. Wa vura duhe nga i nga paparaha te, i duwa ka i araka kina rogoho. (Yoane 17:15, 16) Na si naida a i naatungusapai rogoho kini gbata agu aboro duna ruru ngbaduyo yo na kini yugupai fuyo tipa i satiyo niga Kristo abawiriki. (Matayo 24:14; 28:19, 20) Sidu tie, Wa duhe nga aKristano arengbanga ka ne gu iraira ome maapai kurii kura aboro du rogo gi zegino re naabaha dunduko te, si naida i sovura kuti ni. Ani makianga aome maapai kurii kura aboro tibaraha biama dagba agu akuraha.
Gu Gbina Nga ga Wasiwasi Mangaapai
8. Tipagine aYisaraere asatiyo ti ni kaa iriso ga aMoabo ambori?
8 Nimbedi kuti digido gu ga aYisaraere nunguro nadi agarã 40 ku ngbakungbo yo, bakere bange aYisaraere asatiyo kusayo ngbagene ruru mangaapai. I aima bi gu dungu mangaapai nangia ga bata Yekova amangihe tipa yo, na si adu koyo ngbutuko i ki rimi Ringara Mokido. Ono, wa si avura du wo, ti gu nyanyakipa regbo re, i asatiyo kaa iriso ga aMoabo ambori. Tipagine? Bambiko i afutiyo fu “gu nyemuhe nga ga borose.” (1 Yoane 2:16) Kekepa gu pangbangaa re nayaa: “Aboro ki tona ka manga pa sino bari na awiri aMoabo nga ade.”—Pa Geda Aboro 25:1.
9, 10. Gini apai namanga areme nasaha ninyanyakipa pai fu rani ani moi pa banda ani tirani ti aregbo dunduko be gu ome nga ga nyemuahe nga ga borose?
9 Gu pangbangaa re nayugo wai gu nyemuahe nga ga borose narengbe ka gbarasapa agu aboro ainonga gupai namanga ya. Si naida ani wirikipai behe, gbe, mbiko aboro rogo arago dunduko nabi wasiwasi kodaba nigu sino raka daada fu aboro. (1 AKorindo 10:6, 8) Tingidapai aye Amerika yo nayaa: “Natona bakuru kusayo ka ye kurogo 1970, zio badia [nga kumba nasungo na dee zanga rogatise], angia irairapai kuti ndiko rogo apapara Amerika naabaha dunduko. Ono awere tie, si ni gupai dungu aboro amangaha amanga gbe rogo gu ringara re. Susi bebere bange agu arogatise aboro naamangaha nibambataha, i natonaha mbata rogo zio badia yo.” Gi mangapai nga ga zio badia re, gbiati gu kura wasiwasi mangaapai duwa kinaha, si amanganga rogo kina bangisa ringara sa te. Si nga gupai ima rengba rogo zegino dunduko, na si nafu kina gberarago nga, kura aKristano aima merafuo gipai re, na payo kini gbere a rogo gu dungurati nga ga aKristano.—1 AKorindo 5:11.
10 Kurii gure, gu poropoganda natambua agu apai nga ga wasiwasi kodaba, si nawira si rogo aba dunduko. Asinima na aterevizioni nafu agu aberã fu aboro nga, si niwenepai fu paranga aboro i mangi kodaba amanga na agu aboro i aida ka amanga rogatise naayo mbata fu roga yo tiyo. Aboro nabi koda kumba ba na kurako watadu koda dee ba na kurari ni gupai adunga irairapai ti ni ya. Na dungu agu aba nga ga sinima re nayugo kpia aboro i nimangi kodaba amanga ziazia. Na ka boro gbatanga kpia aboro agbata i nimangi kodaba ngburungburu rogo Internet te. Nikpiapai, bakeke-apai rogo waraga pangbangaa ayawee, wiriko du garãko saba aye sukuru yo rogo kura uru sa ki ya fuko wee, bakureako sukuru yo akurubara gu bangiriba nga ga Internet nayugokpia kundiri adee i nikodiba na akumba. Rago agbere ti bako nikerehe, ono oni ini bange agu agude nakurubara gu bangiri aba re na ki zanga gumbaha fu avunguyo? Na kurii gure, bange avunguagude wai ini agu apai du rogo agu ambaro nga ga vidio awiriyo naangihe? Dungu agu ambaro nga ga vidio ngbaa ti aboro gbe, si nayugo kere wasiwasi kodaba, kodihe na sino adaimona gbiati zuũ.
11. Wai rengbe aborokporo ka bandatiyo be gu wasiwasiapai nga ga zegino?
11 Wai rengbe aborokporo ka sovura kuti ngbatunga gu gbegbere “ambaro” re? Nigbata yo ga Mbori ruru mangaapai nibambatapai, kini ká ka rimiso tiyo kurogo wasiwasi apai. (2 AKorindo 6:14; AEfeso 5:3) Agu avunguagude nasinziri agu apai awiriyo amangaha na kini yugupai fuyo nyanyakii nidogoda gumbaha, na kini yugupai fuyo ninyemuse tipa Yekova na tipa gako ruru andiko, si nika nyakasa yo i sovura kuti bi kpia kundiri aboro, kuti gu kundiri aboro du rogo avidio, kuti wasiwasi asinima, na kuti gu kura gbegbere aʹasada.—Pa Fu Rugute ni Ue he 6:4-9.a
Gu Kerepai Du Ti Sosodapai Nga ga Badona Aboro
12. Gini kpakarapai nakuru rogo bambata sa kama agarã?
12 Ho Pauro aduni Rusetura yo Asia Minor yo, ko ahusi kumba yo ngba iiriwo gene. Gu pangbangaa re nayaa: “Ho arimbasa abi gi pai ni re Pauro amangi, i ki poi ku ari niya rogo pa aboro Rukaonia, ‘Ambori azorõ kono du ani ni ni kpia aboro!’ I ki yambu rimo Barunaba, nga Zeu; na Pauro nga Ereme, bambiko ko adu ni bagumbapai.” (Amokedi 14:11, 12) Kusa, kina gu bangisa rimbasa aboro re aida ka imo aPauro na Barunaba. (Amokedi 14:19) Si tie ziazia nga, agu aboro re angia agu aboro nanaambugene fu akurayo i naamaapai kuriyo yo. Si nawira gupai nga, ho bete aboro rogo gu dagbarago re asatiyo ni ni aKristano, i ambunga gu gayo mangaapai nangia ga sangbaatoro te. Rogo gu ga Pauro waraga ko akehe fu agu aKristano nadu Korosai yo, ko aza yo ti ‘iriso amaraika.’—AKorosaio 2:18.
13. Gine nga gu kura sino mangaapai si aida Kristano nehe, na wai rengbe ni ka gbia ome ka mangaha wo?
13 Areme a, si naida ndikidi aKristano wa kina aguyo nadu re ne gu sino mangaapai ngbaa ti aboro gbe, nga gu sino aboro du mburuhe rii agu aberã nga ga zire pambori natagbagatihe na gu bangua arugute nga ga aKristano. Nikpiapai, rogo kura aringara, dungu gu mangaapai du tipa batika gude na kpio boro, mburuhe rii gu zire i agumbaha ya ani na toro rogo rani yo nabata ti regbo kpio. (Batungusipai 9:5, 10) Aringara kinaho i agbundo kura papara barangba adegude rogoho.b Si nga kere mangaapai zanga nunga adunga nidingisoro i mangihe ya na adunga na ngbanyaa na gu nyemuse du agu avunguagude nga aKristano nani tipa awiriyo ya. (Pa Fu Rugute ni Ue he 6:6, 7; AEfeso 6:4) Wai rengbe aKristano ka sovura kuti gu sosodapai nga ga badona aboro na ki mbu gu mangimangiapai re? Nikido yo rogo wiri apai dunduko kina kuti Yekova. (Atambuahe 31:6) Gu Mbori du niruru ko, ko nika nyakasa agu aboro naya fuko ngbaduyo yo wee: “Mo nga gi bagbuko nga gi gbata; gi Mbori, nga gu ko mi nakida kuti ko.”—Atambuahe 91:2; Asanza 29:25.
Ka Bangironi Gonga ti Yekova Ya
14. Gini arugute Yekova afuhe fu aYisaraere ngbutuko mbata fu i rimi Ringara Mokido?
14 Ngbutuko mbata fu aYisaraere rimi Ringara Mokido, Yekova afu arugute fuyo ya ka bangiriyo ya gonga tiko ya. Ko ayaa: “Oni banda tironi bangironi ka go ti Yekova gaoni Mbori, ka oni aka nga kuti gako arugute ya, na gako asarangbanga, na gako rugaapai, nga gu rugu mi roni na ni ti gi uru re: ho oni ka ri he ni ki mbiki, ki nidua wene abambu ki niraki rogo ho, ho ka gaoni rimbasa abagara na gaoni rimbasa akandoro ka nge ni, gaoni feda na dahabu ki moi pai, agu ahe dunduko du be roni ki du ni ngenge he, ngbaduroni ki du na ruka, bangironi ki go ti Yekova gaoni Mbori.”—Pa Fu Rugute ni Ue he 8:11-14.
15. Ginipai ka ani mangi ka rugatirani na gupai nga, bangirani agonga ti Yekova te?
15 Ya mo pai wa kina gure rengbe arengba ka manga areme? Ii, ka ani peresi agu apai mbata rogo gaani raka anyakanga paha ya. Ono tie, ka ani aagbata kina ga Mbori ruru mangaapai mbata, ziazia irisombori kini mo kadu nigu nyanyakipa pai du rogo gaani raka. Ani amanga gupai amanga Pauro angarasi rani ani mangihe, nga ka ‘ngbe regbo’ na kini tungusipai niipiipihe. (AKorosaio 4:5, NW; 2 Timoteo 4:2) Ono tie, ka singia padu ani pati adunguratise na pa manga ani sunge tungusapai anyakanga bangirani te ono kina ongoda kiipaha watadu pa gbata agene tipa ka gbia wasa kiipaha bangirani, bangirani go ago ti Yekova na gu rogoyo nga ani kini mo kaa bi pa manga gako sunge niuepai rogo gaani raka. Pauro ayawee rogo yangara areme, aboro adu ni “akpí nyemu sangba borose susi nyemu Mbori.” (2 Timoteo 3:4) Agu aKristano nga airarengo nawisigo tiyo dedede tipa ka rugatiyo na gupai nga, ngbatunga gu sino berã re na ome kuriyo te.—2 AKorindo 13:5.
Ani Bandatirani ti gu Sino Berã Nga ga Ranirii
16. Gini iraira berã Eva gbiati kura bete aboro ti rago Pauro ayuguhe?
16 Ati Edene yo, Satana azomia Eva na diabese ki tigi we ti gu nyemu ranirii nigbangbati nadu ti ri. Eva aaida ka manga gari diaberã tipa tiri nisari tipa rurupai na irairapai. (Bambata Pai 3:1-6) Rogo bambata sa kama agarã, kura aboro rogo gu dungurati nadu Korinda yo aduna aberã nga ga ranirii wa kina gure. I aberẽhe ya i aini apai susi Pauro, na ko ki yambu gu rimo wia kuriyo nangia bawene amokedi.—2 AKorindo 11:3-5; 1 Timoteo 6:3-5.
17. Wai rengbe ani ka ne sonosa gu sino nga ga ranirii?
17 Rogo zegino areme, dungu aboro nga “airanyakari, airaabiatise,” na gi sino berã re aima merafuo bete aKristano. Bete aguyo ada a ni asogo rengo. (2 Timoteo 3:4; AFiripoio 3:18) Ho daha ni ti ziazia irisombori, si ninyanyakipa pai ani ngere kube Yekova tipa arugute na ki mangipai kinakubani sa na ‘ruru kangara moyambu’ gbiati agu abaakumba nga ga dungurati yo. Gure nga gene sa dagba agu akuraha ka gbata ruru mangaapai, na si nabanda rani ti sonosa gu sino nga ga ranirii. (Matayo 24:45-47; Atambuahe 25:9, 10; Yesaya 30:21) Gu dungurati nga ga mbedimbedi aKristano, si nga “songodi rengo na nduhe.” Yekova asigira gi dungurati re tipa si banda rani na kini yugu gene fu rani. (1 Timoteo 3:15) Pa kparia ani gaha nyanyakipa sunge nika undo rani ka ani ‘manginga pai na rukö ya’ wa ani afu tirani niumbasitise ka manga gu rurupai Yekova akpinyemuhe.—AFiripoio 2:2-4; Asanza 3:4-6.
Oni Du Ni Awiriki Mangapai wa Yesu
18. Gini agene i angarasa rani ani wiriki mangapai wa Yesu ngbaha?
18 Tipa Yesu, Ziazia Kekeapai agumba sangbanebi ki yaa: “Mo akpi nyemu rurupai, ki nisogo irairapai.” (Atambuahe 45:7; AEbere 1:9) Nangbaa gu sino berã re tipa ka wirika mangaha! (1 AKorindo 11:1) Anga Yesu aini kina kungbo ino ga Yekova ruru andiko sa te; ono ko akpinyemuhe akpi a. Sidu, ho Satana aʹasadi ko ni ngbakungbo yo, ko adunga dindikodindiko ka ká ti mera kusayo ‘ngba gene rurupai’ te.—Asanza 8:20; Matayo 4:3-11.
19, 20. Gine nga gu wene sangbanaapai naye fu boro be pa gbata ni gene ka manga rurupai?
19 Rengo ngaha nga, gu nyemuapai nga ga borose, si rengbe kadu ninyanyakihe gbe. (ARomo 7:19, 20) Wa vura duhe wo, kangia pa manga ani rurupai ninyanyakipa pai bangirani, si anyakasa rani anyakasa ani sovura kuti gbegbereapai. (Atambuahe 119:165) Bakere nyemu manga rurupai nika banda rani ho du ani ni barabangiri irairapai. (Asanza 4:4-6) Oni tingidi gupai nga, ti agu aregbo dunduko ani ambugene ni fu asada zanga sovura kuti ni, gure nga ani fu mamu fu Satana ko duna diabese. Nairiwo wai ka si ngba ani sovura kutiko ki mbu Yekova ko duna diabese!—Asanza 27:11; Yakoba 4:7, 8.
20 Mbiko wa ndikidi aKristano agbata gene kaa manga rurupai, i ‘nahiisa yo na gu zuzuhe nga rurupai mbiko Yesu Kristo, sa ga Mbori taarimo na tambuahe.’ (AFiripoio 1:10, 11) I naukadi “vovo boro[se], fu yo ni ku sangba Mbori yo na rurupai na ziaziapai nga ga rengo.” (AEfeso 4:24) I nga ga Yekova aboro na kini raki ka mangasunge fuko, angianga ka fu ngbarago fu tiyo ya. (ARomo 14:8; 1 Petero 4:2) Gure nga gupai i amaaha nimburu gayo aberã na mburu gayo mangaapai. Nairiwo gu ngbarago i aye nani fu Bayo du ngbangbaturũ yo!—Asanza 23:24.
[Gu rukutu kekeapai du bandu kpewaraga yo]
a Avunguagude rengbe ka bi wene aberã tipa banda gayo aborokporo be ome wasiwasi maapai kurii rogo gu buku aDezire Yekova akusihe nga The Secret of Family Happiness.
b Gbundo kura papara barangba dee kusayo, si i anaayambaha mbata nga yeratise nga ga adee.
Oni Rengbe ka Sakarogoyo?
• Tipagine duhe ti ni ninyanyakipa pai ani gbata gene kaa manga ruruapai?
• Wai rengbe Kristano nga kpakpa boro ka gbata gene kaa manga rurupai?
• Gine nga gu bete apai du rogo zegino si aida Kristano nehe?
• Wai pa gbata ani gene kaa manga ruruapai abanda rani?
[Gu kpiahe du ti kpewaraga 28]
Tipa apefuo Yesu, zegino angia kere rago fuyo
[Gu kpiahe du ti kpewaraga 29]
Agu agude i ayugopai fuyo i kpinyemu Yekova, i nika nyaka na ki rengbe ka sovura kuti wasiwasi mangaapai
[Gu kpiahe du ti kpewaraga 30]
Bangiri bete aYisaraere ago ti Yekova fuo kumuko yo rogo Ringara Mokido
[Gu kpiahe du ti kpewaraga 31]
Wa kina Yesu, aKristano nasoga irairaapai