Oni Kpinyemu Rurupai Na Ngbaduroniyo Dunduko
“Mo akpi nyemu rurupai.”—TAM. 45:7.
1. Ginipai nika undo rani ani naandu “ngba gene rurupai”?
YEKOVA nanungusa gako aboro “ngba gene rurupai” rogo Fugoko na vurube gako ziazia toro. (Tam. 23:3) Wangia ani kpakpa aboro, ani naambu nduge ambu ngba gu gene re ti kura aregbo. Si naida bakere asadatise tipa ka mbu irairapai ka manga rurupai. Ginipai nika undo rani ani duna diabese? Gupai nika undo rani nga, ani kpinyemu manga rurupai wa Yesu.—Oni gedi Atambuahe 45:7.
2. Gine nga “gene rurupai”?
2 Gine nga “gene rurupai”? Si nga gu “gene” du nisigirasigiraha kuti gu rurupai nga ga Yekova. Rogo pa-Ebere na pa-Giriki, “rurupai” nga ndu kuti arugute watadu wene mangaapai. Wa duhe nga Yekova rurupai aenga tiko, airisiko na ngbarago kaa ngera kina kubeko sa tipa ko nungusi yó i nindu ngba gene rurupai.—Yere. 50:7, NW.
3. Wai rengbe ani ka wirikapai nibakerehe tipa ga Yekova rurupai?
3 Tipa ka sa ngbarago ti Mbori wenengai gbe, si naida ani asaditirani na ngbaduraniyo dũ kaa ndu kuti gako rurupai. (Pa Rug. 32:4) Ani natonaha niwirika ani pai tipa Yekova Mbori rogo Fugoko nga Ziazia Kekeapai. A wa ani kaa wirikapai tipa Yekova nibakerehe, na kini mbedi naako na aʹuru dunduko, kinawo a ani ka kpinyemu gako rurupai gbe. (Yak. 4:8) Si naida a ani di agu arugute kugume du rogo Fugo Mbori gako toro adu kugii pakehe ho ani aida ka manga nyanyaki diaberã ni rogo gaani raka.
Oni Gbata ga Mbori Rurupai
4. Gbata ga Mbori rurupai nakoda gine?
4 Oni gedi Matayo 6:33. Gbata ga Mbori rurupai nakoda manga bakere asadatise susi gu gbua nga dia regbo ka tungusa wene pangbanga nga ga Kindo. Tipa Yekova idi na gaani ziazia sunge, si naida gaani mangaapai na aʹuru dunduko duna ngbanya kuti gako andiko. Ginipai si aida agu aboro dũ nagbata ga Yekova rurupai mangihe? Si naida i “ukadi gu vovo boro, fu yo ni ku sangba Mbori yo na rurupai na ziaziapai nga ga rengo.”—Ef. 4:24.
5. Ginipai rengbe ka undo rani ani dibe bakere gberãrago?
5 Wa ani kaa manga asadatise nyanyakii ka raka ringbisihe kuti ga Mbori rurupai watadu gako andiko, rago rengbe arengba ka gberã tirani ti kura regbo mbiko gaani mangaapai nga ga zangarengba. Ginipai rengbe ka undo rani ani dibe gu gberãrago re na ki wiriki kpinyemu manga rurupai? (Snz. 24:10) Si naida ani mbedi na Yekova dedede rogo kparakpee yo “ni ruru kpotorani yo nihiki be idapase.” (Eb. 10:19-22) Singia ani nga mbedimbedi aKristano watadu ani namaabangirani ka raka auru kpotosende, si naida ani duna idapase kuti ga Yesu Kristo motumo tumorii na gako sunge nga ga Gbiamotumo. (Rom. 5:8; Eb. 4:14-16) Gu mokedi nangia Yoane akepai ki yaa: ‘Kure Yesu nagiriso rani ti ingapai dũ.’ (1 Yo. 1:6, 7) Ziazia Kekeapai nayawee ka gaani “ingapai vura du ni zamba ha vurũ, si adú adu kpau wa morogumba.” Nangbaa gu iiriwopai Yekova namangihe nga ka fu Wiriko ko akpinyemuko gbe nimotumo tumorii tipa rani!—Yes. 1:18.
Oni Wisigi Gaoni Ũvura Nga ga Toro
6. Tipagine duhe ti ni ninyanyakipa pai ani niwisigi gaani ũvura nga ga toro?
6 Si naida ani vo “marã ngbaduse nga rurupai” ti aregbo dunduko, bambiko si nga nyanyakipa ũbandatise nga ga toro naye be Mbori. (Ef. 6:11, 14) Singia ani fu tirani fu Yekova bambeda watadu ani aima digo nimangi ziazia sunge fuko tipa dungu agarã, gupai nyakipaha gbe nga ani niwisigi gaani ũvura nga ga toro na aʹuru dunduko. Tipagine si aida ani niwisigihe ti ni? Si wo mbiko i aima ba Bakitingbanga na gako adaimona ku auru kpotosende no. (Yugo. 12:7-12) Satana na bakere zinga mbiko ko inihe nga kina wiri bete regbo gbua nye fuko. Sidu, ko nazubo ga Mbori aboro awere nibakerehe gbe. Ya mo ani nabi “marã ngbaduse nga rurupai” na nyanyakipaha?
7. Wai rengbe gaani sino mangapai kadu ka si du nga ani nabi “marã ngbaduse nga rurupai” na nyanyakipaha?
7 Marã ngbaduse nabanda ngbaduse. Gu zangarengba du ani nani nasa gupai nga ngbadurani naananga rani na kidu na kere kaza ti ni. (Yere. 17:9) Wa duhe nga ngbaduraniyo nasosoda rani ani mangi irairapai, si ninyanyakipa pai ani rabaha na ki ruguhe. (Bam. P. 8:21) Ka si du nga ani nabi “marã ngbaduse nga rurupai” na nyanyakipaha, ani dinga ha kusayo nisia ani agu ambaro nakoda agu apai Mbori asogaha, watadu nifu ani tirani sa manga irairapai te. Ani gberesinga bakere regbo kina kupati bi terevizioni te. Kuba gure, ani mangi asadatise tipa ka sa ngbarago ti Yekova. Ka si vura du nga ani nika kotoka ti kura aregbo niberã ani kina agu apai nga ga borose, Yekova rengbe arengba ka undo rani ani du wenengai.—Oni gedi Asanza 24:16.
8. Tipagine si aida ani du ti ni na gu “vurakube nga idapase”?
8 Gu “vurakube nga idapase” nga papara gu gaani ũvura nga ga toro. Si naundo rani ani ‘bisi gu siida we nga ga gbegberẽ ko.’ (Ef. 6:16) Idapase gbiati gu nyemu Yekova naye kina boro ngbaduraniyo naundo rani ani mangi rurupai na ki nye ngba gu gene nandu sa nyenye unga. Ka ani awirikapa kpinyemu Yekova nibakerehe, kinawo a ani kaa bi gako rurupai na kikiipaha. Ono ginipai tigaha du tipa sangbakpotoraniyo? Wai si aundo rani rogo gaani asadatise ka kpinyemu rurupai?
Oni Banda Sangbakpotoroniyo
9. Wai ani agbia undo be banda ani sangbakpotoraniyo niwenehe?
9 Ho ani aazio bapatiza ni, ani asana Yekova tipa “wene sangba kpotoyo.” (1 Pet. 3:21) Wa ani ayugu gaani idapase kuti motumo tumorii, kure Yesu nadada gaani ingapai ani kini du nigigiri rani bangiri Mbori. Ono tie, tipa ka nye gigirii bangiri Mbori, si naida ani banda sangbakpotoraniyo abanda. Ka sangbakpotoraniyo akitangbaanga rani watadu ka zarani ti kura aregbo, ani duna ngbarago nga si namangasunge amanga wenengai. Gu zahe si afuhe re nayugo gupai furani nga si atakpingo ti manga ga Yekova rurupai te. (1 Tim. 4:2) Sangbakpotoseyo ima rengba a ka manga kurapai berewe fu agu aboro nakpinyemu ka manga rurupai.
10, 11. (a) Oni gumbanga gupai namangi paranga nayugoho nga si naida aida ani irisi ga Ziazia Kekeapai rugute nibipa sangbakpotoseyo. (b) Tipagine rengbe kpinyemu rurupai ka ye na bakere ngbarago furani ti ni?
10 Ho ani amanga gbegberẽpai ni, sangbakpotoraniyo rengbe arengba ka kitangbaanga rani watadu ka fuda rani. Paranga sa ambu “gene rurupai.” Biko agu ahe nazingisa nyemu kodaba ti boro azibaha tiko, na ko atona ka vugundö. Gberarago aziko ho ko andu ni kuba dunguratise yo na ko kini bi tiko wakina irabiriki ho ko amangasunge tungusapai ni. Si ki tadu wo, ko kini mbu manga agu asunge nga ga aKristano. Ko ayaa: “Ono mi aainongo nga sangbakpotoreyo rengbe ka kitangbaanga re tipa gi mangaapai te.” Ko agbia kurapai kutini nga: “Mi araki gi raka pamungo re tipa agarã biama.” Ko atona ka berãpa karagatiko berewe kurogo rengo yo. Wa ko avura ka berã gupai nga Yekova arengbanga ka degatuko sa gako kpee te, ko akpari akpara fuko na ki sanako tipa mbupai. Mbata fu aminiti da bawe fuo kparako, nako aye ka biko, na ki ngarasiko ko tona nduge berewe tipa adunguratise. Ko andu ku Bambu Kindo yo na ki sana bakumba tipa ko naawirikapai naako. Kusa, ko azi bapatiza, na ko na bakere tambuahe tipa wai Yekova nabatasi ungako.
11 Ya mo ani abingo gupai nga boro nagbia bakere ngbarago mbiko manga ní rurupai te? Wa ani kaa wirika kpinyemu rurupai na kini mangihe susi, ani nika gbia bakere ngbarago be manga gupai nafu ngbarago fu gu Barani du ngbangbaturũ yo. Oni berẽnga kurii gipai re! Nga uru nika yeaye aboro dunduko nikadu na ngbarago be sangbakpotoyo yo; kidu nirengberengbeyo na asino Mbori tiyo. Sidu tie, ani rũnga nyemu rurupai awere dudunguroo ku ngbaduraniyo tipa ka sa ngbarago ti Yekova.—Snz. 23:15, 16.
12, 13. Wai rengbe ani ka raba sangbakpotoraniyo?
12 Ginipai rengbe ani ka mangaha ka raba sangbakpotoraniyo? Ho ani awisigo Ziazia Kekeapai ni na gu gaani awaraga du mburuhe rii Ziazia Kekeapai, si ninyanyakipa pai ani tingidi gupai nga “berã ruru boro nawisiga pa karagapai.” (Snz. 15:28) Ani makianga wai gipai re aundo rani ho ani agbiatirani ni na asanahe nibipa sunge. Ka si du nga sunge gu duho natagbagatihe na agu arugute nga ga Ziazia Kekeapai, badungu rani ninaamangapai niipo kuti gu rugapai naye vurube gu riko nga ga ruru kangara moyambu. Ono tie, ho ani ainongo ni singia gu sunge re rẽarẽ ani mangihe watadu si arẽnga te ya, si naida ani wisigi gu bangua arugute nga ga Ziazia Kekeapai, ki berẽkuriihe, na ki mangi kparakpee tipa gupai re. Ani nagbata ngbatunga gu bangua arugute nibipa sunge re tipa ka he fuda sangbakpoto akuarani yo. (1 Kor. 10:31-33) Gbe, si naida ani berẽpa agu arugute nabipa gaani pagume na Mbori. Ka si du nga Yekova nirengo nga gaani Mbori, si idi ani sana tirani nga, ‘Ya mo pa manga mi gi sunge re rengbe ka sa gberarago ti Yekova?’—Tam. 78:40, 41.
13 Ho ani ambakada Ngbaõbambu Sinziri ni watadu Gu Wisigo Ziazia Kekeapai Nga ga Dungurati, si naida ani berẽ aberã kurii gupai ani agedaha re. Ya mo ani ni agu aboro ninaagbata kina karagapai sa sanahe niipo ka gbahe tiihe ani kini gbisi sa kuraha? Ka si du nga wo ani naambakada gaani adunguratise re, si arengbanga ka nyakasa gaani nyemu manga rurupai watadu ka ruga sangbakpotoraniyo te. Ka si du nga ani nakpinyemu rurupai, si naida ani wisigipai zanga nyomoro, na kini berẽkurii gupai ani agedaha rogo Fugo Mbori yo. Pa wirika ani kpinyemu rurupai na ngbaduseyo dunduko naida bakere asadatise!
Gomoro Rurupai
14. Wai Yekova Mbori na Yesu Kristo aida ani du tingba gaani ziazia sunge?
14 Yekova Mbori na Yesu Kristo naida ani duna ngbarago tingba gaani ziazia sunge. Ginipai rengbe ka kodabee sa gaani ngbarago? Si nga kpinyemu rurupai! Yesu aya rogo gu gako Tungusapai Nadu rii Bagangara yo wee: “Aboro maku nga agu yo gomoro amanga yo na gomoro ime tipa rurupai, bambiko i ambika.” (Mt. 5:6) Agi afugo re na gini ome kurii agu aboro nakpinyemu rurupai?
15, 16. Ngba gini agene i nika mbiisa agu aboro gomoro nga ga toro amangayó?
15 Gi zegino ani araka rogoho re, gbegberẽ ko du nazogaha. (1 Yo. 5:19) Ka ani di waraga pangbanga ka gedaha rogo gu ringara du ani rogoho, ani nika bi gupai nga zegino nagberã kina kumbatayo. Gu gbegberẽ apai aboro amanga akurayó nani, si nikpakarakpakaraha fu ruru boro ní berẽkuriihe. (Batu. 8:9) Tipa agu aboro nakpinyemu Yekova, ani inihe ya kina ko sa rengbe ka mbiisa gu gomoro watadu gomoro ime nga ga toro du yó nani tipa rurupai. I nika dia gu mangapai kusayo awere nga ga azangasinombori. Agu aboro nakpinyemu rurupai arungongo berewe be gu mangaapai nga ga gbegberẽ aboro watadu ati andiko te. (2 Pet. 2:7, 8) Naangba wai gipai re nika fu undo fu agu aboro nakpinyemu rurupai!
16 Wangia ani ga Yekova aboro na ni apefuo Yesu Kristo, ani ini gupai nga agu aboro dunduko gomoro rurupai amangayó, “i ambika” ambika. I ambiisa yó vurube ga Mbori mbakadapai nga gudu tipa vovo ngbangbaturũ na vovo kpotosende nga gu “ruru apai nikanye rogo ho.” (2 Pet. 3:13) Ka kpotoraniyo zerenga watadu ka si kpakaranga bangirani ka bi gupai nga gbegberẽ apai na zuũ ima dia rurupai kusayo rogo gi ga Satana zegino re ya. (Batu. 5:8) Yekova nga Bahe Kisusi ima ino gupai namanga, na fuo regbo ngbutuko, ko nika batasa agu aboro abatasa nakpinyemu rurupai.
Gu Undo Duti Kpinyemu Rurupai
17. Gini bete aundo duho ti kpinyemu rurupai?
17 Atambuahe 146:8 nanyakasapa gu undo du ti ndu ngba ruru gene. Bake apapara Atambuahe abibia ki yaa: “Yekova nakpi nyemu ruru aboro.” Ani berẽnga kurii gipai re! Gu Bakere Bakindo nga ga haurago ko nakpinyemu rani mbiko ani nakpinyemu rurupai! Mbiko ga Yekova nyemuse, ani naa kido nga ko nika fu agu ahe afu du ani na zingoho wa ani kaa peresapa agu apai nga ga Kindo mbatayo rogo gaani raka. (Oni gedi Atambuahe 37:25; Asanza 10:3.) Niyangaraha tie, gi zegino re naabaha nikadu niga agu aboro nakpinyemu rurupai. (Snz. 13:22) Tipa badungu ga Mbori aboro, i nika gbia mosoro tipa gayó ruru mangapai nga gu ngbarago adunga digidoho ti ni ya, na ki raki nyeanye kindi rogo Paradizo auru kpotosende. Zavura kina awere, agu aboro nakpinyemu ga Yekova rurupai, ko nafu mosoro afu fuyó nga zereda berãseyo, nga gu naundoyo i du wenengai na gayó aborokporo na rogo dungurati a.—Frp. 4:6, 7.
18. Gini wene apai rengbe ani ka mangaha nisungudi ga Yekova uru?
18 Wa ani apido gu bakere uru nga ga Yekova, si naida ani naagbata gako rurupai kindi. (Zef. 2:2, 3) Sidu tie, ani yugungo ndikidi nyemuse ayugo tipa ga Yekova ruru agene, nga gu nakodapa banda ani “marã ngbaduse nga rurupai” nyanyakii tipa si banda ngbaduraniyo. Si naida a ani banda sangbakpotoraniyo niwenehe si ki fu ngbarago furani na fu Yekova a.—Snz. 27:11.
19. Ginipai si aida ani diberã ka mangaha, na ginipai ani ka wisigoho rogo gu kekepai naye fuo gere?
19 “Bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.” (2 Peka 16:9) Nangbaa wai agi afugo re afu wasa furani wa ani amanga rurupai rogo gi zegino apai agberã rogoho kina kumbatayo re! Nirengo, gaani ruru mangaapai rengbe arengba kadu nivunduvunduhe be azangasinombori. Ono ani nagbia bakere undo ti manga ga Yekova rurupai. (Yes. 48:17; 1 Pet. 4:4) Sidu tie, ani dinga berã adia kaa kpinyemu rurupai kindi na ngbaduraniyo dunduko na kini mangihe, si nika ye na ngbarago furani. Ono tie, tipa ani kpinyemu rurupai na ngbaduraniyo dunduko, si naida ani sogo irairapai asoga. Gu kekepai naye fuo gere nika yugo gupai furani soga irairapai ayugoho.
Gaoni Karagapai Nga Gine?
• Wai padu ani na tambuahe tipa ga Yesu motumo aundo rani ani kpinyemu rurupai?
• Tipagine duhe ti ni ninyanyakipa pai ani ukadi “marã ngbaduse nga rurupai”?
• Wai rengbe ani ka raba sangbakpotoraniyo?
[Gu sura du ti kpewaraga 26]
Ho ani araba sangbakpotoraniyo ni, si naundo rani ani mangi wene diaberã nibipa sunge