“Oni Ká Fu Bakitingbanga” A Wa Yesu Amangi

“Oni ká fu bakitingbanga, ko ki oro be roni.”—YAK. 4:7.

1. Gini fudifudiapai Yesu aima ino ya ko nika gbiatiko nani auru kpotosende, na sangbanaha angia gine?

YESU KRISTO aima ino ya fudifudiapai nika gbiako agbia be Bakitingbanga. Si aduwo bambiko Mbori aima gumba gipai re bakuru kusayo fu woo, nga gupai ko aagumbaha nzunzu fu Bakitingbanga bambiko ko naafura rogo woo yo. Fugo Mbori adu nga: “Mi amáa sogote dagba roni na de [nga gu papara ga Yekova riigbu du ngbangbaturũ yo], dagba atitaro na atitari a; ko [nga Yesu] ki mburu riro, mo ki mburu gidako.” (Bam. P. 3:14, 15; Yugo. 12:9) Pa mbura yó gida Yesu ayugu gupai nga, i nika imoko auru kpotosende ko kidu nikangba tipa bete regbo gbua, bambiko si adu nga Yekova nika zingisa ko azingisa ko ki ga ku ngbangbaturũ yo. Pa mbura yó rii woo ayugu gupai nga i nika imo Bakitingbanga ko ki kpi nyeanye kindi.—Oni gedi Amokedi 2:31, 32; AEbere 2:14.

2. Tipagine Yekova adu naa kido ti ni nga, Yesu nika dia adia be Bakitingbanga?

² Yekova aima ino ya Yesu nika nyasa gu sunge anyasa ko nafuhe fuko na ki ká fu Bakitingbanga. Tipagine Yekova adu ti ni na gu kido re? Ko adu nani wo mbiko gupai nga, ko nitiko nakusi Yesu badungu agarã kusayo, ko ki wisigi ko tipa dungu agarã, ki ima ino gupai nga, gi “bangbasia boro sunge” re nga “bambata vungu fu agu ahe dũ i afu,” ko adu niboro giasangbaa. (Snz. 8:22-31; Koro. 1:15) Sidu, ho Mbori akedi Yesu ni ku sende no na ki mbu Bakitingbanga ko asadiko na ki imiko, Mbori aima ino gupai nga, gi bangisa Wiriko re nikadu adu na diabese.—Yo. 3:16.

Yekova Nabanda Gako Amoyambu

3. Ginipai Bakitingbanga amanga ga Yekova amoyambu nani?

³ Yesu ayawee Bakitingbanga nga “gbia gi zegino re,” na ki ya fu gako abawiriki wee i nika gbia arungosi agbia a wa ko agbiaha. (Yo. 12:31; 15:20) Gi zegino du tiibe Satana Bakitingbanga re nasoga ndikidi aKristano asoga bambiko i namangasunge fu Yekova na i nga abatungusi rurupai. (Mt. 24:9; 1 Yo. 5:19) Agu aboro Satana asovura naayó gbe nga yangara mbedimbedi aKristano, nga agu aboro nika zogarago na Kristo ngbangbaturũ yo rogo gako Kindo. Satana nasovura aso a na gu badungu aDezire Yekova duna maabangirise ka raka nyeanye kindi rogo paradizo auru kpotosende. Fugo Mbori natingida rani na gupai nga: “Wa bahu nata ki nipoi, nigbata boro ka rita ni, kina wo vuraroni nga bakitingbanga nata.”—1 Pet. 5:8.

4. Gini gopai duho nayugo gupai nga, ga Yekova aboro aima diabe Bakitingbanga ti gi gaani regbo re?

⁴ Wa du ani rogo gu riigbu nga ga Yekova Mbori, ani nasovura kuti Bakitingbanga kini di adia beko. Oni bingo agi apai re: Rogo agu agarã 100 susi kusayo, badungu gbegberẽ abazogo aima asadatiyo ka nyasa riipa aDezire Yekova naabayo dunduko. Ono tie, bange aDezire Yekova nakio kina kumbatayo na si ima mbeda awere kada ti amirioni saba, na i rogo adungurati susi 100,000. Agu abazogo naaida ka nyasa riipa yó, i nga agu aboro adunga areme ho ti ni ya!

5. Wai agu afugo du rogo Yesaya 54:17 ada ti rengo nibipa gu ga Yekova amoyambu du ti gi gaani regbo re?

⁵ Yekova afura tipa gu dungurati nangia ga aYisaraere wa bangisa “boro” ki yaa: “Gu ũvura i ka mbakada ha kuti ro si adía nga be ro wa sa te, gu mirã aboro dunduko nikazinga kuti ro rago sarangbanga mo akíta ngbanga ha akita. Gere nga gu pai nikadu tipa agu amoyambu nga ga Yekova yo, na gayo rurupai nga gu du mbiko re.” (Yes. 54:11, 17) Gu fugo Yekova re aima da ti rengo nibipa gu ga Yekova aboro naraka auru kpotosende ti gi “kusa rago” re. (2 Tim. 3:1-5, 13) Ga Yekova aboro nasovura kuti Bakitingbanga kindi, na ũvura ho ko nika mbakadaha tipa ka nyasa riipa yó nani nikadu na diabese te, bambiko Yekova na kina yó.—Tam. 118:6, 7.

6. Ginipai ga Daniere sangbanebi agumbaha furani tipa gupai nika manga kumbatayo tipa ga Bakitingbanga zogarago?

⁶ Ho digido gi zegino re kada ni, apapara ga Satana zogarago dunduko nika gburuwa. Ga Mbori toro asa Daniere ko gumbapai kumbatayo ki yaa: “Rago agu abakindo re [nga aguyo du awere,] Mbori ngbangbaturũ amáa gu ngbi [ngbangbaturũ yo] nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi [du awere] re rukutu ki digisi he dunduko, si ki nye anye kindi.” (Dan. 2:44) Ho gupai re nika manga ni, ga Satana zogarago gbiati gu nga ga awiri aboro, si nika go kusayo nibasa. Apapara ga Bakitingbanga zogarago dunduko nika go kusayo, ono kina ga Mbori Kindo sa kidu, na boro adunga ho nikaa sovura kuti ni te.—Oni gedi 2 Petero 3:7, 13.

7. Wai ini ani he ya, ga Yekova amoyambu nibasasa rengbe arengba ka diabe Satana?

⁷ Zanga kapa, ga Yekova riigbu nikadu nibandabandaha, na si nika zugo azugo rogo toro yo. (Oni gedi Atambuahe 125:1, 2.) Na ginipai du tipa rani? Ziazia Kekeapai naya furani wee ani rengbe arengba ka ká fu Bakitingbanga watadu ka diabeko, a wa Yesu amangihe. Nirengo, gu yugoti Kristo ayuguhe fu Yoane nayugo gupai nga, wa Satana navura kaa sovura kuti rani, “bakere rimbasa aboro” kinaho nika bata ho digido gi gbegberẽ zegino re nika da ni. Ziazia Kekeapai nayawee agu aboro re napaa kuari niyaa: “Gaani bata ye be gaani Mbori nasunga auru mbatabakindo, na be Wiri Kandoro a [nga Yesu Kristo]!” (Yugo. 7:9-14) Mbedimbedi aKristano nadiabe Satana, na abadiangbayo nga “kura akandoro,” i nadia adia a beko. (Yo. 10:16; Yugo. 12:10, 11) Ono tie, si naida ani mangi bakere asadatise na kini kpari fu Mbori kakaka tipa ko batasi rani be ga Satana “gbegberẽpai.”—Mt. 6:13.

Yesu Nga Wene Kpiapai Furani

8. A wa duhe nikekehe rogo Ziazia Kekeapai, gini bambata asada Bakitingbanga abaha fu Yesu ngbakungba yo, na ginipai Yesu amangi?

⁸ Satana Bakitingbanga aʹasadi ka sa Yesu ko mbu manga rurupai. Ko aba dungu aʹasada fu Yesu ngbakungba yo tipa ka sa ko ko mbu giasangba Yekova. Ono tie, Yesu amoi wene kpiapai furani tipa diabe Satana. Fuo gino Yesu riahe tipa arame 40 na ayuru 40, si nirengo nga gomoro aamanga ko amanga bakere gbe. Fuo Satana bi gipai re, ko aya fu Yesu wee: “Si ngia Wiri Mbori nga mo, mo gúmba ha fu agi ambia re si sa tihe ni kpokuta.” Ono Yesu aaidanga ka mangasunge na gu ome Mbori afuhe fuko tipa ka fu undo fu kina tiko te. Sidu, Yesu aya fuko wee: “Si ni keke he ya, ‘Boro anye nga ni ungani mbiko kina riahe te, ono mbiko agu apai dunduko naye ngba Mbori yo.’”—Mt. 4:1-4; Pa Rug. 8:3.

9. Tipagine si aida ti ni ani ká fu Bakitingbanga wa ko agbatagene ka sa gu nyemuapai i avunga rani nani si sa rani ani mangi ingapai?

⁹ Areme, Bakitingbanga nagbata gene ka mangasunge na gu nyemuapai i avunga boro nani tipa ka gberesapa ga Yekova amoyambu. Sidu tie, si naida ani diberã ka ne gu wasiwasi kodaba moipai areme rogo zegino. Fugo Mbori nafura nyanyakii kini yaa: “Oni aina nga ha te ya iraira aboro adia nga kumbo ga Mbori ngbi te? Ka i nángi nga roni ya; watadu airameteka, na airisikpiahe, na airabari, na azapu tiyo na akumba, . . . i adía nga kumbo ga Mbori ngbi te.” (1 Kor. 6:9, 10) Si tie ziazia nga, agu aboro naraka wasiwasi raka ka i aidanga ka sa sinoyo ya, Mbori ambunga yó i rimi kurogo gako vovo zegino te.

10. Ringbisihe kuti Matayo 4:5, 6, gini kura asada Satana abaha fu Yesu?

¹⁰ Ziazia Kekeapai nagumbapa kura asada berewe Bakitingbanga abaha fu Yesu. Si nayaa: “Bakitingbanga ki ndu na ko ku rogo ziazia bakporo yo; ko ki moi ko ri ngbahõ yekaru, ki ya fu ko, ‘Si ngia Wiri Mbori nga mo, mo gíta ku sande; bambiko si ni keke he ya, “Ko aruga gako amaraika tipa ro,” “I asongoda ro ni beyo, mo ka fo nduro ti mbia.”’” (Mt. 4:5, 6) Satana aberẽ gupai tigako nga Yesu nika manga gupai re amanga tipa ka yugo nani nga ko nga gu Wiri Mbori i agumba pako ya ko nika ye. Ono nirengo, ka Yesu amangi gupai re, ka si angia gbegberẽpai bangiri Mbori kisusi, na ka Mbori aidinga naako te. Ono ti gu regbo re a, Yesu anye niruruko fu Yekova ki dipai rogo Ziazia Kekeapai ki gumbaha fu Satana. Ko ayaa: “Si ni keke he berewe ya, ‘Ka mo ásadi nga Gbia nga gamo Mbori ya.’”—Mt. 4:7; Pa Rug. 6:16.

11. Wai rengbe Satana ka asada rani, na sangbanaha rengbe kadu nga gine?

¹¹ Satana rengbe ka asada rani ngba dungu agene ani gbata taarimo tipa tirani. Ko rengbe ka sosoda rani ani pekefuo gu sino vorokoo gbiati kura ambakadatise nga ga zegino, watadu ani naamanga agu ambaro watadu gu kura aũngbarago aboro akapa akapa kuti ni. Ono ka ani basa gu rugute nga ga Ziazia Kekeapai ki tona pekafuo zegino, ya mo ani rengbe ka berãha ya amaraika nika banda rani abanda be asangbana gu gaani mangaapai re? Wa Bakindo Davide avura saberãko ti gu ingapai ko amangihe na Bataseba, amaraika aabandanga ko be asangbana gako mangaapai te. (2 Sam. 12:9-12) Ka ani banga asada fu Yekova ngba gbegberẽ gene ya, wa gu nga ka zio bakure na zegino.—Oni gedi Yakoba 4:4; 1 Yoane 2:15-17.

12. Gini kura asada berewe Bakitingbanga abaha fu Yesu a wa duhe nikekehe rogo Matayo 4:8, 9, na wai Yesu amangipai sani?

¹² Berewe, Bakitingbanga aba kura asada fu Yesu ngbakungba yo nga gu nadu tipa pa fu agu azogarago nga ga zegino fu Yesu. Bakitingbanga ayugu agu angbii nga ga zegino dunduko fuko na gaha taarimo, na ki ya fuko: “Ka mo ti sande ki irisi re, agi ahe dunduko re mi afú he foro.” (Mt. 4:8, 9) Gure nga Satana aʹasadi tiko ka dia gu iriso narẽ tipa kina Yekova sa, na ka sa Yesu ko samungu kuti Mbori. Satana adumbata nikina wene maraika, ono ko kini tona ka berã gupai nga, si naida i niʹirisiko airiso, sidu, ko kini samungu kini da nikere boro ngbaduse na ni Bakitingbanga. (Yak. 1:14, 15) Ono tipa Yesu tigako, ko aima diaberã ka nye niruruko fu Bako du ngbangbaturũ yo, sidu, ko aya fu Satana wee: ‘Satana, mo gúari erẽ! bambiko si ni keke he ya, “Mo irisi Gbia nga gamo Mbori mo rá fu kina ko.”’ A wa bi ani he re, Yesu aká fu Bakitingbanga berewe ki gumbaha agumba fuko ziazia na nyanyakii ya ko aidanga na gako pai te. Wiri Mbori aaidanga na ga Satana zegino te, na ka ko aidanga ka irisoko a ya!—Mt. 4:10; Pa Rug. 6:13; 10:20.

“Oni Ká fu Bakitingbanga, Ko Ki Oro Be Roni”

13, 14. (a) Ho Bakitingbanga ayugu agu angbii ni nga ga zegino dunduko fu Yesu, gure nga gine ko aafuhe fuko? (b) Wai Satana aʹasada tiko ka gberesa rani?

¹³ Wa Bakitingbanga ayugu agu angbii nga ga zegino dunduko fu Yesu, gure nga ko aidi ka fu guhe fu Yesu boro aagbianga ha mbata ya. Bakitingbanga aberẽhe tigako ya, si nika ngbaangba tiko tipa kadu nibakerepa bazogo zegino. Areme, Bakitingbanga afunga angbii furani te, ono ko naʹasada tiko ka sa bangirani, turani, na berãrani si gberesi ngbaduraniyo.

¹⁴ Bakitingbanga du zegino dunduko kutii beko. Ko du aũgbandaka apangbangaa kubeko. Si du duhe ti ni nga, agu ahe ani abihe, agu apai ani agiaha, na agu apai ani agedaha, si ima hi be pa wasiro gbiati pa zuũ. Gu gene i atakapandepa ahe ngbaha rogo gi zegino re, si nasa rani ani duna nyemu ngbeka agu ahe zingoho amanganga rani amanga nzunzu ya. Rogo gu gene re, Bakitingbanga naasada kindi kaa yugo agu ahe furani nika ngba bangirani, woroho nika ngba turani yo, na nika ngba berãrani yo. Ono ho ani aidanga ni ka bi agu apai angbanga bangiri Mbori ya, watadu ka giaha, na ka gedaha ya, gure wa ka i yawee ani nayaa: “Satana, mo gúari erẽ!” Ani napekafuo Yesu ho ani aká ni nyanyakii fu ga Satana bibiriko zegino. Gu kurapai berewe nayugo gupai nga ani ni avuru ga Satana zegino te, si nga ani nayugo tirani gbaiga ni aDezire Yekova na ni apefuo Kristo basunge yo, sukuru yo, rogo gu rago ani araka rogoho, na dagba agumerani.—Oni gedi Marako 8:38.

15. Tipagine si aida ti ni ani naangera angera kindi tipa ka ká fu Satana?

¹⁵ Fuo Bakitingbanga asadi Yesu bara biata ka ko adianga beko ya, ‘Bakitingbanga aguari patiko.’ (Mt. 4:11) Ono tie, Bakitingbanga aambunga asada Yesu te, bambiko Ziazia Kekeapai nayaa: “Ho bakitingbanga anyasi asadapai ni dunduko [ngbakungba yo,] ko ki guari pati ko tipa toni rago.” (Ruka 4:13) Ho Bakitingbanga aba asada ni furani ani ki di beko, si naida ani tambua Yekova atambua. Ono tie, si naida ani naasana Mbori kindi tipa undo, bambiko Bakitingbanga nika yeaye berewe ka asada rani ti gu regbo daa bangiriko, singia ti gu regbo ani aberãnga pa asada ya. Sidu, si naida ani naangera angera kindi, ki mbakaditirani tipa kaa manga ziazia sunge fu Yekova ka ani vura kaa gbiatirani na dungu aʹasada vurũ.

16. Gini bakere ome Yekova afuhe furani, na tipagine si aida ti ni ani sanako tipaha?

¹⁶ Si naida ani naakpara fu Mbori tipa ko fu gako ziazia toro furani nga bakere ome kisusi. Si nika sa rani ani mangi agu apai ani arengbanga ka mangaha nigaani ome ya. Yesu akido apefuoko naapa ga Mbori toro ho ko ayani wee: “Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama Ziazia Toro fu agu yo nasana ko, te?” (Ruka 11:13) Ani naakparanga akpara kindi fu Yekova tipa gako ziazia toro. Ka ani duna gi bakere ome nga ziazia toro re, ani rengbe arengba ka ká fu Bakitingbanga na ki di beko. Kupati gupai nga ani naakparakpee kakaka, si naida ani ukadi tirani na ga Mbori aũvura dunduko tipa ani ki rengbe “ka ru aru [nyanyakii] sa ga bakitingbanga birĩ.”—Ef. 6:11-18.

17. Gini ngbarago nasa Yesu ko dibe Bakitingbanga?

¹⁷ Kurapai kinaho berewe naundo Yesu ko dibe Bakitingbanga, na si rengbe arengba ka undo rani a. Ziazia Kekeapai nayaa: ‘Yesu ahi pa wagiwagi ngua mbiko gu ngbarago nadu fuko kumbatayo, ki basapa gaha zee, ki ima sunga pati kumbabe gu mbata nga ga Mbori.’ (Eb. 12:2) Ani rengbe ka gbia gu ngbarago re a nisongoda ani ga Yekova bakere pagbia, niʹirisa ani rimoko, na niberã ani pa gu mosoro ani ka gbiaha nga nyenye unga. Nairiwo gu ngbarago ani kadu nani ho Satana na gako mangaapai nika nyasa ni dunduko nyeanye kindi, na ‘bayee aboro ki di kumbo ringara, ki du na ngbarago tipa gu wenepia nikadu kpaima’! (Tam. 37:11) Sidu tie, oni naaká aká kindi fu Bakitingbanga, a wa Yesu amangi.—Oni gedi Yakoba 4:7, 8.

Gaoni Karagapai Nga Gine?

• Gini gopai duho nayugo gupai nga, Yekova nabanda gako aboro abanda?

• Wai Yesu amoi wene kpiapai furani tipa ká fu Bakitingbanga?

• Rogo gini agene rengbe oni ka ká fu Bakitingbanga?

[Gu kpiahe du ti kpewaraga 30]

Ngbanya na zegino nga sogote fu Mbori

[Gu kpiahe du ti kpewaraga 32]

Yesu aká agu angbii nga ga zegino dunduko