Asanahe be Agedihe

Ya mo sanduki mokido adu gbua na kina seke-seke kpakakpaka ambia ue rogoho, watadu gu kura ahe aduadu rogoho?

Ti gu regbo i akpara gu yekaru nangia ga Soromo tipa si tona gaha sunge rogo gu garã nangia 1026 M.B.K., “he adu nga vuru sanduki yo te, kina agu ambia ue Mose amoi he ku rogo ho Orebe yo, ho Yekova arũ ndika ni fu awiri aYisaraere, ho i akuru ni Ezipeta yo.” (2 Pekapai 5:10) Ono tie, si adunga ti aregbo dunduko wo te.

“Rogo biata diwi fuo guari awiri aYisaraere ringara Ezipeta yo,” i arimi gu ngbakungba nangia ga Sinai. (Gate 19:1, 2) Ngbutuko fuo gure, Mose adakpa kurii Bagangara Sinai yo na ki di seke-seke kpakakpaka ambia ue nangia ga Ndiko be Yekova. Ko ayaa: “Mi ki aria tire ki zoro ri bagangara ku pa di no, ki moi agu ambia re ku rogo gu sanduki mi amangi he; si ki du yo kindi a wa Yekova arugu re.” (Pa Fu Rugute ni Ue he 10:5) Gi sanduki re adu gbua tipa bete regbo, nga gu Yekova agumbapaha fu Mose ko mbakadihe tipa ka banda gu seke-seke kpakakpaka ambia nga ga Ndiko re rogoho. (Pa Fu Rugute ni Ue he 10:1) I ambakadanga sanduki mokido te da kina kuti digido gu garã nangia 1513 M.B.K.

Ngbutuko fuo kusa Yekova aYisaraere Ezipeta yo, i atona ka kpakanahe tipa riahe. Si kita du were, Yekova kini mo ka fu manu fuyo. (Gate 12:17, 18; 16:1-5) Ti gu regbo re, Mose arugu Arona ki yaa: “Mo di akoro ki moi bete manu ku rogo ho wa ritere biata na bebere he, ki igi he ku bara bangiri Yekova, ya i banda ha tipa arika ngbatungaroni.” Gu pangbangaa re nayaa: “A wa Yekova arugu Mose kina wo Arona aigi he barangba Dezirepai [nga ba igo nyanyakipa amokanda], ka abanda ha.” (Gate 16:33, 34) Wa si avura du nga Arona adungura manu kurogo akoro ti gu regbo re, tipa ka maaha kurogo Dezirepai, i asungudi regbo mbata daho Mose ambakadi Sanduki mokido ni na ki moi gu seke-seke kpakakpaka ambia nga ga ndiko re kurogoho.

A wa ani nibihe mbata, i ambakadi gu sanduki nga ga mokido re kusa rogo gu garã nangia 1513 M.B.K. I amoi ga Arona ngbondo kurogo gu Sanduki mokido re fuo gbanga regbo tingbafuo gu samungu nangia ga Kora gbiati kura aboro. Pa Geda Aboro 17:10 nayaa: “Yekova ki ya fu Mose, ‘Mo karaga gu ngbondo nga ga Arona ku barangba dezirepai yo, si du ni bandabanda ha ni ngbaanga kuti asamungu, mo digisi gayo gumbarimo kuti re, ka i akpika nga ya.’” Fuo gipai re, sanduki mokido aye kadu na agu ahe rogoho dunduko gu mokedi nangia Pauro atingidipaha. Agu ahe re angia “akoro dahabu . . . [na]du vuru he yo nadu na manu rogo ho, na gu ga Arona ngbondo nafuna, na gu keke ambia nga ga ndika.”—AEbere 9:4.

Mbori afu manu fu aYisaraere nigayo riahe ti regbo gayo nunguro nga gu nadi agarã 40 ku ngbakungbo yo.

Gu manu re adigi ho i atona ka ‘ri mbaku zende ahe nga ga gu ringara re’ ni nangia ringara mokido. (Yosua 5:11, 12) I amoi ga Arona ngbondo kurogo gu sanduki mokido re si du ni gupai i kaa ino apai ti ni watadu nidezirepai kuti gu rikaaboro nangia abasamungu re. Si kini yugu gupai nga, gu ngbondo re anye barangba dezirepai tipa kandara agu aregbo aYisaraere amangi gayo nunguro rogoho ngbakungbo yo. Si ni gupai daada ani yawee, fuo bete regbo fuo rimo aYisaraere kurogo Ringara Mokido, na mbata i nika kpara gu yekaru nangia ga Soromo tipa gaha sunge, i adi ga Arona ngbondo gbiati gu akoro dahabu nangia ga manu kusayo rogo gu sanduki mokido re.