Mbumbudo Akuru ti ga Arona Ngbondo

MO BINGO gu mbumbudo gbiati zamba zuzuhe kuru ti gi ngbondo re. Ga Arona ngbondo du. Gi mbumbudo na zuzuhe re akuru ti ga Arona ngbondo rogo yuru sa gbua! Ani bingo gupai si amangi ti ni wo.

AYisaraere adu kindi ngbakungba yo. Kura aboro abihe nga si aidanga Moize du ni gayo bangbembatayo te, na Arona du ni gbiamotumo te. Kora nangia boro sa dagba agu aboro re, na Datana, na Abirama, gbiati abarumbatayo nga ga aYisaraere yo 250. Agi aboro re aye dunduko fuo Moize ki ya: ‘Tipagine moi mo tiro ti ni kurirani dunduko?’

Moize ki ya fu Kora na agu aboro naadu na ko: ‘Oni di gaoni aũzokingire ki moi fuõngua ku riihe. Oni ki ye koyo du ga Yekova banye ni. Ani nika bi gu boro Yekova nika sia ní.’

Fuo girorago, Kora ki guari na gu gako aboro naadu 250 ki ye koyo du banye ni. Dungu kura aboro naye fuo aKora ka songodapai ku barayo yo. Yekova aima du na bakere zinga. Moize ki ya: ‘Oni guari pati agu abamburoko nga ga gi gbegberẽ aboro re. Ka oni zadingo gu he nga gayo ya.’ Aboro agisangba Moize ki guari kusayo pati agu abamburoko nga ga Kora, Datana na Abirama.

Moize ki ya: ‘Gere oni ka ino ti ni ya Yekova nasia re. Sende nika za ngbaha ki mbiri gi gbegberẽ aboro re dunduko.’

Nibasa fuo nyasa Moize fugo, sende ki za ngbaha. Ga Kora bamburoko na gako ahe na Datana na Abirama gbiati agu aboro naadu na yo ki rindo ku sende yo, sende ki kisi ngbaha fuoyo. Ho aboro agi kpe agu aboro ni naarindo ku sende yo, i ki ta ngbayo ki ya: ‘Ani oro! Sende andu ka mbira rani a!’

Kora na gu gako aboro naadu 250 ki ru kindi pati banye. Yekova ki kedi we ngbangbaturũ yo, si ki riti yo kusayo. Fuo gure, Yekova ki ya fu wiri Arona nangia Erazara wẽ ko di agu aũzokingire nga ga agu akumba nakpiki re ki takihe tipa dada bamotumo na ni. Gi ũdada bamotumo re adu tipa kaa tingida aYisaraere na gupai nga kura boro ho fuo kina Arona na awiriko si aida i mangisunge ni aboromotumo fu Yekova te.

Ono Yekova aidi ka yugo gupai fu aboro ziazia berewe nga kina Arona na awiriko sa ko nasia yo ni aboromotumo. Ko aya fu Moize: ‘Agu abazogo nga ga agu angbatunga nga ga aYisaraere dunduko ye na gayo angbondo. Tipa ngbatunga Revi, Arona ye na gako ngbondo. Mo ki moi agu angbondo re banye yo pati sanduki mokido. Mbumbudo nika kura ti gu ngbondo nga ga gu kumba mi nasia ní ni boromotumo.’

Ho Moize andu ni ka bi agu angbondo re rogo kura girarago, ga Arona ngbondo adu na mbumbudo ti ni gbiati zamba zuzuhe a wa mo abihe rogo sura re! Mo ini gupai awere mbumbudo akuru ti ni ti ga Arona ngbondo?