I Akuo Gayo Kidohe

Yekova aya fu Moize: ‘Mo ye fuo re kurii bagangara no. Mi nika ke gimi andiko ti ambia ki fuhe foro.’ Moize adakpa kurii bagangara yo na ki sungu yo tipa aˈuru 40 na ayuru 40 a. Baraho ko adu ni yo, Yekova ake Agu Arugute Naadu Bawe ti ambia ue na ki fu agu ambia re fu Moize.

Fuo bete aˈuru kusa, aYisaraere aberẽhe tigayo nga Moize ima mbuyo. I aya fu Arona wẽ: ‘Ani naida boro ngbe furani kumbatayo. Mo mangi Mbori furani!’ Arona ki ya: ‘Oni fu gaoni adahabu fere.’ Ko azo agu adahabu re na ki saha ni kpia wiri bagara. Aboro ki ya: ‘Gere nga gaani Mbori nakusi rani Ezipeta yo!’ I atona ka iriso gu kpia wiri bagara naadu rogo dahabu yo re, na kini mangi pumbo. Ya mo gbegberẽpai du naadu? Ii, bambiko aboro aima kidohe nga i nikaa iriso kina Yekova sa. Ono awere i akuo gu kidohe i amangihe re.

Yekova aima bi gupai naamanga, na ko ki ya fu Moize: ‘Mo karagatiro fuo aboro kusende yo. I nabasa re na ki ni irisi gbegberẽ mbori.’ Moize azoro rii bagangara yo na ambia beko ue.

Ho ko ambedi ni na bataya, Moize agi aboro i ni bibia. Fuani, ko ki biyo i ni dogbere na kini nugadi kusende fu gu kpia wiri bagara re. Ngbadu Moize aimi ni kerehe. Ko ki ba agu ambia ue re kusande, si ki kuadi rukutu. Ko ki gbarasi gu kpiahe re nibasa. Fuani, ko ki sana Arona nga: ‘Wai du agi aboro re nisa ro mo idipa manga gi gbegberẽpai re?’ Arona aya: ‘Ka mo zinginga ya. Mo ima ino wai du agi aboro re. I naida na mbori, sidu mi ki ba gayo adahabu ku we yo, gi wiri bagara re ki kuru!’ Si aaidanga Arona mangi gipai re te. Moize akaragatiko kurii bagangara yo tipa ka zungodi Yekova ko mbupai fu aboro.

Yekova ambupai fu agu aboro naadu na nyemu ka giasangbako. Ya mo mo nabi wai si anyaki fu aYisaraere tipa i ni pekefuo ga Moize ngbembatayo?