“Oni Adu ni Adezirere”

1, 2. (a) Da nga ga Yekova bakere dezire? (b) Gu rimo nga Yesu rogoyo nga gine, na wai ko araki ringbisihe kuti rimoko?

“GI PAI i avungu re sa ni re, gi pai mi aye sa ni re ku zegino, nga ka du ni dezire rengo.” (Oni gedi Yoane 18:33-37.) Agi afugo du kuari re, Yesu Kristo nagumbaha ti gu regbo gu ga aRomo bazogo naadu Yuda yo aasasana ko. Yesu ayugu tiko ni Bakindo. Fuo bete agarã kusa, gu mokedi nangia Pauro afura tipa ga Yesu kpiapai nangia gawingbaduse nga “ko nakusi gako pai wenengaĩ barangba Pondio Pirato.” (1 Tim. 6:13) Nirengo, kura aregbo kinaho si aida na wingbaduse tipa boro du ni “ndikidi dezire ni irarengo” rogo gi ga Satana kere zegino re!​—Yugo. 3:14.

² Wa duhe nga Yesu aye dagba aYudo yo, ko angia bakere ga Yekova dezire. (Yes. 43:10) Nirengo, ko angia gu dezire pako aima kio kisusi agu adezire dunduko nanaaye ti rimo Yekova. Yesu aabi padu ko ni dezire na kikiipaha gbe kisusi. Maraika aya fu Yosefa gu gude du vuruMaria yo re u ye mbiko ziazia toro, na ki gbia kurapai kutini nga: “Ri abátika wiriri; mo ki yambu rimoko nga Yesu; bambiko ko nga gu ko nikabatasa gako aboro ti gayo ingaapai.” (Mt. 1:20, 21) Dungu wene abainipai tipa Ziazia Kekeapai ima ida kuti gupai nga gu rimo nga Yesu i adihe ti gu rimo du rogo pa-Ebere nga Yesua, na si na gurusigurusi rimo Mbori rogoyo nga “Yekova nga Bata.” Ringbisihe kuti rogo rimo Yesu yo, ko aundo “gu ingiingi akandoro nga ga ngbatunga aYisaraere” i saberã ti ingapai tipa Yekova idi na gayo pai. (Mt. 10:6; 15:24; Rk. 19:10) Tipa ka manga gipai re, Yesu atungusipai kakaka tipa ga Mbori Kindo. Gu bake kitabu wene pangbanga nangia Marako aya: “Yesu ki ta ye kuGariraya yo nitungusi gu wene pangbanga nga ga Mbori. Ko ki ya, ‘Ragoho da, ga Mbori ngbi nikaye; oni sá gaoni berã, ki idi pa wene pangbanga.’” (Mk. 1:14, 15) Yesu aima soga ga aYudo abarumbatayo rogo pambori, na si nga gu kurapai naasa gupai nga i saringbanga ko sa kpio.​—Mk. 11:17, 18; 15:1-15.

“AGU APAI DU NA TANDU NGA GA MBORI”

3. Ginipai namangi arame biata fuo zinga Yesu be kpio?

³ Arame biata fuo gu iigira kpio Yesu akpihe, iiriwopai amangi, Yekova azingisiko be kpio na gu kpoto tiko nga ga toro. (1 Pet. 3:18) Tipa Gbia Yesu yugu gupai nga ko ima zinga be kpio nirengo, ko adi gu kpoto kutiko nga ga boro ka yugo na ni nga ko ni ungako berewe. Rogo gu uru ko azingi ti ni re, ko ayugu tiko fu gako abawiriki bara bisue ti aregbo ni bakiakia.​—Mt. 28:8-10; Rk. 24:13-16, 30-36; Yo. 20:11-18.

4. Ginihe namangi ho Yesu ayugu tiko ni fu gako abawiriki, na ko ape ginipai fuyo nga i mangihe?

⁴ Bara gu bisuehe, Yesu ayugu tiko fu gako amokedi na fu gu kura aboro naadungura tiyo na yo. Ti gu kura regbo, ko asaki Fugo Mbori fuyo. “Ko ki uru gayo berã, i ki rugu tiyo na Ziazia Kekeapai.” Sidu, si asayo i rugatiyo na pa kpioko na wai avura Mbori aimiko gbiati wai Ziazia Kekeapai aima fura tipa ko nga Mbori nika zingisako ngba iiriwo gene. Ti digido gu dunguratise i amangihe fuo zinga Yesu be kpio re, ko ape gu sunge si adu nga gako abawiriki nika mangaha. Ko aya fuyo ‘i tungusipa saberã na vu aboro ti ingaapai ni rimoko fu rikaaboro dunduko, tona Yerusarema yo.’ Ko agbia kurapai nga: ‘Adezire agi apai re nga oni.’​—Rk. 24:44-48.

5, 6. (a) Tipagine Yesu aya ti ni wẽ: ‘Oni adu ni adezirere’? (b) Gini kura ga Yekova ringbisapai ga Yesu abawiriki ayuguhe fu aboro?

⁵ Sidu, kusa fuo arame 40 ti gu regbo Yesu adu na gako abawiriki ni yangaraha, i aima rugatiyo na rogo gupai ko apehe rogo taata afugo nga: “Oni adu ni adezirere, Yerusarema yo na Yuda yo a Somorona yo, na digida sende yo.” (Amo. 1:8) Tipagine Yesu aya ti ni wẽ: ‘Oni adu ni adezirere,’ angianga ni adezire Yekova ya? Ko aima rengba ka pehewo, ono agu aboro ko afura fuyo angia aYisaraere naima du ni adezire Yekova mbata.

⁶ Awere, si adu nga ga Yesu abawiriki nika yugo ga Yekova ringbisapai ngba kura gene kia paha aima nyaka kisusi pa kusa aYisaraere be sunge kanga Ezipeta yo na Babera yo. Pakpio Yesu Kristo na pa zingako be kpio afu ranirii be gu sunge kanga niima gberã nga du ni kanga fu ingapai na kpio. Ti regbo Pendekote rogo gu garã nangia 33, ga Yesu abawiriki naadu nimbedimbedi yo na ziazia toro ayugupai fu dungu aboro tipa “agu apai du na tandu nga ga Mbori.” Sidu, ho Yesu ada ni ngbangbaturũ yo na ki sungu ku kumbabe Bako yo, ko atona ka bi gupai nga akutu aboro namangasunge na rimoko ka saberã ti gayo ingapai na kadu na idapase kutiko wa ka Yekova batasi yo.​—Amo. 2:5, 11, 37-41.

“TUMO DUNGU YO NI UNGAKO”

7. Agu apai namangi ti rago Pendekote, ginipai si ayugoho?

⁷ Agu apai namangi ti rago Pendekote nayugo gupai nga Yekova aima ida na gu motumo Yesu afuhe tipa ka dada ga aboro ingapai na ni. (Eb. 9:11, 12, 24) Yesu asakipai tipaha nga ko “aye nga i nimangi pa ko te, ko naye ka manga pa aboro, ka tumo dungu yo ni ungako.” (Mt. 20:28) Anga si adu nga gu “dungu yo” re nika ngia kina agu aYudo naasaberã sa te. Kuba gure, gupai Mbori akpinyemuhe nga ko “nakpi nyemu aboro bati dunduko” mbiko gu motumo re nadia ‘gu ingapai nga ga zegino ku sa yo!’​—1 Tim. 2:4-6; Yo. 1:29.

8. Ga Yesu abawiriki aru wai ka tungusapai, na wai gipai re adu fuyo taata tipa i mangihe?

⁸ Ya mo gu ga Yesu abawiriki naadu mbata adu nawingbaduse tipa kamanga dezirepai tipa ko? Ii, i aima du na ni, ono angianga ni gayo ome ya. Ga Yekova ziazia toro naafu ome fuyo tipa i mangi gi dezirepai re. (Oni gedi Amokedi 5:30-32.) Fuo agarã 27 fuo rago Pendekote, si aawira wa pa “wene pangbanga” aima da ti aYudo na aGendiria “rogo arago tii ngbangbaturũ yo dũ.”​—Koro. 1:5, 23.

9. A wa i aima fura tipaha mbata kusayo, ginipai namangi tipa gu bambata dungurati nangia ga aKristano?

⁹ Ono tie, si nafu kina gberarago nga gu bambata dungurati nangia ga ndikidi aKristano re aima gberã. (Amo. 20:29, 30; 2 Pet. 2:2, 3; Yuda 3, 4) Awa Yesu ayuguhe, Satana nga “gbegberẽ ko” asa abasamungu kuti ndikidi pambori i sono ku mbatayo na ki gbarasi ndikidi pambori daho “zegino ka nyasa ni.” (Mt. 13:37-43) Fuani, Yekova kimoi Yesu ni Bakindo kurii rikaaboro dunduko. Gipai re amangi rogo Tanvuo rogo gu garã nangia 1914, na si angia tonatona “kusa rago” nga ga ga Satana zegino.​—2 Tim. 3:1.

10. (a) Gini nyanyakipa garã gu mbedimbedi aKristano du ti gaani regbo re aima digo nifura tipaha? (b) Ginipai namangi rogo Tanvuo 1914, na wai du gupai re gbaiga fu aboro dunduko?

¹⁰ Gu mbedimbedi aKristano du ti gaani regbo, i afura ku mbatayo tipa Tanvuo 1914 nga si nika ngia nyanyakipa garã. Mburu gi gayo pai re adu rii gu sangbanebi nga ga Daniere nafura tipa gu bakere ngua i adehe kusande na si ki sono berewe fuo ‘ringbisiringbisi rago wa bara saba.’ (Dan. 4:16) Rogo gu ga Yesu sangbanebi nafura tipa “pa digida rago” kumbatayo, ko aya gu rago re a nga “rago aGendiria.” Natona rogo gu nyanyakipa garã nangia 1914 re, gu kpiapai nayugo ‘pa ga Kristo ye’ ni Bakindo aima du gbaiga fu aboro dunduko. (Mt. 24:3, 7, 14; Rk. 21:24) Natona ti gu regbo re, “agu apai du na tandu nga ga Mbori” aima kodapa maa Yekova Yesu ni Bakindo kurii zegino.

11, 12. (a) Ginipai vovo Bakindo atona ka mangaha fuo nyasa vura rogo 1919? (b) Gini kurapai nada gbaiga bara bebere agu agarã nangia 1930 ka ndu ku mbatayo? (Oni bi gu sura du ti tonatonaha.)

¹¹ Fuo da Yesu Kristo ni Bakindo nibasa, ko atona ka kusa mbedimbedi apefuoko be sunge kanga rogo ‘Babera nga bakere bakporo’ kusayo. (Yugo. 18:2, 4) Agu agarã natona fuo vura rogo 1919 azakigene tungusapai mangi rogo zegino dunduko tipa gupai Mbori amangihe tipa ka batasa aboro na pa gu pangbanga du tipa ga Mbori Kindo. Mbedimbedi aKristano amangisunge na gi momu re ka manga dezirepai, na sangbanaha aye na dungu mbedimbedi Kristano i ye ka zogarago na Kristo.

¹² Bara bebere agu agarã nangia 1930 na ka ndu ku mbatayo, si adu gbaiga nga Kristo ima tona ka dungura amirioni “kura akandoro” nika du dagba “bakere rimbasa” yo. Tii gu ngbembatayo nga ga mbedimbedi aKristano, bakere rimbasa napeka gu kpiapai nangia ga Yesu nindu yo fuo aboro ka yugoho fuyo nga kina Yekova na Yesu rengbe ka fu bata furani.Ka i hipai tingba gi sunge re na kidu na idapase kuti ga Yesu motumo, i nika du na gu momu beyo nga ka bata ti regbo gu “bakere gberãngbi” nika nyasariipa gi ga Satana zegino re.​—Yo. 10:16; Yugo. 7:9, 10, 14.

ONI DU NA WINGBADUSE TIPA KA TUNGUSA WENE PANGBANGA

13. Wangia ani aDezire Yekova, ginihe ani nadiberã tipa ka mangaha, na wai rengbe ani kadu na kido nga ani nika duadu na diabese?

¹³ Ka animbunga gumomu du berani nga kadu ni aDezire “agu apai du na tandu nga ga Mbori” nga gu Yekova Mbori namangihe na gu ko na kidohe tipa ka mangaha ku mbatayo ya. Nirengo, si ni taatapai ka manga gu sunge dezirepai re te. Dungu awirinarani natungusapai rogo agu adagbarago du na sakparakpa rogoho, watadu arungosi. Ani rengbe arengba ka mangapai wa gu Pauro amangihe na abakureako. Ko aya: “Ani adu zukazuka rogo gaaniMbori yo ka gumba ga Mbori wene pangbanga fu roni rogo bakere kenapai.” (1 Tesa. 2:2) Ka omerani batinga ya. Kuba gure, ani dinga berã adia ka mangapai kuti gaani kparatise daho gi ga Satana zegino re ka digo ni. (Yes. 6:11) Ani arengbanga ka manga gipai ngba gaani ome te, ono ka ani pekefuo gu kpiapai nangia ga agu aKristano naadu mbata, si naida ani kpari tipa Yekova undo rani na gako toro na ki fu “gu bakere tandu susi” furani.​—Oni gedi 2 AKorindo 4:1, 7; Rk. 11:13.

14, 15. (a) Gini bipai aboro adu na ni tipa aKristano rogo bambata sa kama agarã, na ginipai Petero apehe tipa yo? (b) Gini bipai si aida ani du na ni ka aboro asoga rani mbiko du ani ni aDezire Yekova?

¹⁴ Areme, dungu aboro nata ngbaduyo nga i nga aKristano, “ono i naora rimoko [Mbori] ti gayo mangaapai, wa du yo ni airawasiro, keretu akeretu, ki ti ku sa yo ti ruru manga apai dunduko.” (Tito 1:16) Si ni wenepai ka tingida gupai nga, rogo bambata sa kama agarã, dungu aboro aima soga ndikidi aKristano. Si du nga ndu gupai gu mokedi nangia Petero akepai ti ni nga: “Ka i agbarasa rimoroni mbiko rimo Kristo, airamaku nga oni; mbiko gu toro nga ga taarimo nasunga ku ri roni, nga ga Mbori Ziazia Toro.”​—1 Pet. 4:14.

¹⁵ Ya mo ani rengbe ka ya agi afugo re nabi aDezire Yekova abi areme? Ii, mbiko ani namanga dezirepai tipa ga Yesu zogarago. Sidu, ka i asoga rani tipa du ani na rimo Yekova rirani si wa sa wa ka i ‘agbarasa rimorani mbiko rimo Kristo’ naaya fu asogoko wẽ: “Mi ye ni rimo Buba, oni adia nga re ku gume te.” (Yo. 5:43) Sidu, ka oni gbiatironi na sogote gene tungusapai yo, ka oni gunde nga ya. Ngbatunga gu rungosi re nayugo gupai nga Yekova ima ida na oni na gako “toro nga ga taarimo nasunga ku ri roni.”

16, 17. (a) Ginipai namanga fu aDezire Yekova rogo papara zegino dunduko? (b) Gaoni diaberã nga gine?

¹⁶ Ti kina gu bangisa regbo re, si naida oni ini gupai nga dungu aboro naye ku rogo rengo rogo apapara zegino dunduko. Zavura rogo agu aba i aima tungusapai rogoho, aboro nadegetuyo adega na si naida ani tungusi gu wene pangbanga nga ga bata atungusa fuyo. Ani mangingo ome amanga kaa karagatirani fuo agu aboro ani nafura nayo na kini wiriki Ziazia Kekeapai nayo na kini undo yo tipa i mangi sonakumbatayo na ki zi bapatiza. Si nawira wa oni nika du wakina Sarie du South Africa yo tungusipai tipa agarã niima susa 60. Ri aya, “Mi na ngbarago mbiko gu motumo nga ga Yesu Kristo,mi awere na wene pagume dagbare na Yekova nga Bakere Bakindo, na mi na ngbarago nga mi rengbe arengba ka tungusapa gako taarimo fu kura aboro.” Ri gbiati kumbari nga Martinus ima undo dungu aboro kodihe na awiriyo biata i da ni airisi Yekova. Sarie aya, “Gu kura mangapai ho berewe rengbe ka ye na ngbarago susi gere te, na Yekova nafu ome afu furani vurube gako ziazia toro ani ndu ku mbatayo na gi sunge re.”

¹⁷ Singia ani nga agu aKristano niima zio bapatiza watadu ani namanga ome tipa kada ti gu sasa re, si naida ani tambuahe atambua tipa gumomu du berani ka kodatirani na awirinarani nga aDezire Yekova rogo zegino dunduko. Sidu tie, oni tungusipai kakaka wa oni amanga ome ka bandatironi kadu gigiri rogo gi ga Satana bibiriko zegino re. Ka oni mangihe wa gure, oni nika taasarimo gu Barani du ngbangbaturũ yo, na si adu furoni ni momu kadu na iiriwo rimoko rironi.