Ya Mo Oni Mbakaditironi Tipa Bata?
“Mo ye, oni na gamo aborokporo dunduko ki rimi ku kurungba yo, bambiko mo, kina ro bi mi ro ni ruru boro bara bangire dagba gi rika ngbatunga re.”— BAMBATA PAI 7:1.
1. Gini mbakadapai tipa bata Yekova amangihe ti rago Noa?
YEKOVA “aye na bangirimo ku auru gu zegino nangia ga azangasinombori” ti rago Noa, ono ko aima manga mbakadapai a tipa ka batasa kura aboro ti kina gu bangisa regbo re. (2 Petero 2:5) Ndikidi Mbori afu arugute fu gu ruru kumba nangia Noa na agu futufutuapai dunduko nadu tipa wai ka mbakada kurungba tipa si banda ungaahe dunduko be ngirimo akangbii. (Bambata Pai 6:14-16) Nigupai i aidaha be gu ga Yekova moyambu namangapai na rubangirise, ‘Noa amangi a wa Mbori aruguko nani.’ Nirengo, “kina wo ko amangi he dũ.” Ga Noa giasangbaa nga ndupai sa dagba agu akuraha du ani ti ni areme niungarani.—Bambata Pai 6:22.
2, 3. (a) Wai agu aboro nadu ti rago Noa anaabi gu sunge Noa anaamangaha? (b) Gini kido Noa adu nani ho ko arimi ni ku kurungba yo?
2 Mbakada kurungba angianga taata sunge te. Si nawiraha gbe nga, si aima iriwo ti dungu aboro ka bi gu sunge Noa na gako aborokporo aamangaha re. Wa si avura du wo, sunge mbakada kurungba daho si anyasi ni arengbanga kadu nigupai narengbe ka rugusapai bangiri aboro nga pa bata yo kumbatayo arũ riipa rimoyo ku kurungba yo te. Niyangaraha, ga Mbori zerangbaduse kuti gu gbegbere zegino re ada ti digidoho.—Bambata Pai 6:3; 1 Petero 3:20.
3 Fuo Noa na gako aborokporo mangisunge nyanyakii tipa dungu agarã, Yekova aya fu Noa wee: “Mo ye, oni na gamo aborokporo dunduko ki rimi ku kurungba yo, bambiko mo, kina ro bi mi ro ni ruru boro barabangire dagba gi rika ngbatunga re.” Mbiko idapase gbiati kido kuti fugo Yekova, ‘Noa arimi ku kurungba yo, ko na awiriko na diako na dere awiriko fuoko.’ Fuo gure, Yekova akisi ngbadimo kurungba fuo airisiko tipa ka banda yo. Ho Ime Akangbii ayeni ku auru kpotosende, gu kurungba Mbori ambakadipai tipaha i mbakadihe re angia guhe aboro aakido kuti ni tipa ka gbia bata.—Bambata Pai 7:1, 7, 10, 16.
Agu Apai Namanga ti Gi Gaani Regbo Re Nawiratihe Na Agu Apai Naamanga ti Rago Noa
4, 5. (a) Ginihe Yesu aringbisi pa gu regbo ko nika duho na ome Kindo beko kuti ni? (b) Gini apai naamanga ti rago Noa duna wiratise dagbaha na agu apai namanga ti gi gaani regbo re?
4 “Wa si adu rago Noa, wo pa ye Wiri boro nikadu.” (Matayo 24:37) Agi afugo Yesu du kuari re, ko ayuguhe ya gu regbo ko nikadu ho na ome kindo beko ngbangbaturũ yo, si nikadu wakina gu rago nangia ga Noa, na gupai re aima da nirengo nzunzu. Ono gbe, natona ti gu garã nangia 1919, i natakapande pangbangaa zahe areme fu rikaaboro dunduko wakina gu Noa anaamangaha. Bakere gbe, ga aboro mangaapai areme wakina gu nangia ga agu aboro nadu ti rago Noa.
5 Nimanga Yekova sunge na Ime Akangbii, ko adiberã ka gbarasa gu zegino “[na]hi be zuu.” (Bambata Pai 6:13) Si nirengo nga, Noa gbiati gako aborokporo akodanga tiyo kurogo manga ngbatunga gu zuũ re te, kuba gure, i aandu kina kumbatayo na sunge mbakada kurungba rogo pazereda, nga gu sunge nadu gbaiga fu agu aboro dunduko naabi yo. Ngba gi gene re a, ani nabi gu wiratise du dagba agu apai naamanga ti rago Noa na gu namanga ti gi gaani regbo re. Agu aboro nape rengo rengbe arengba awere tie ‘ka kparakapai dagba rurupai na gbegberẽpai, na dagba gu boro namanga pa Mbori na gu boro amanganga pako ya.’ (Maraki 3:18) Gu mangaapai du niruruhe gbiati gu weneringise nga ga aDezire Yekova na gu pazereda gbiati gu zanga nyomoro i aayugoho, si ima sa agu aboro nabiyo, nga agu aboro amanganga kparakapai dagba aboro ya, i idi kutiyo mbiko agi asino yo re na i kini mangi kparakapai dagba ga Mbori aboro na aboro zegino. ADezire nasoga zuũ rogo angbatungaha dunduko na kini mbu ga Yekova toro si niirugu yo. Si nga ndu gupai du yo ti ni na zereda dagbatiyo na kini mangi kina ruruapai sa.—Yesaya 60:17.
6, 7. (a) Ginipai agu aboro nadu ti rago Noa aruganga tiyo naapaha ya, na wai du aboro kinawo areme? (b) Gini kpiapai nayugo gupai nga, dungu aboro ima ino gupai nga aDezire Yekova kia ti kura aboro apambori?
6 Agu aboro nadu ti rago Noa aruganga tiyo na gupai nga Mbori du naaundo Noa te, na i aruganga tiyo a na gupai nga ko aapekafuo gu rugapai nangia ga Mbori te. Si du tie, i abingo gu pangbangaa zahe Noa anaatungusaha na nyanyakipaha te, na ka i amanganga pai ringbisihe nani wagusa ya. Waigu zegino abi ga Mbori aboro na gu gayo pangbangaa i atungusaha areme? Wa vura duhe nga gu sunge nga ga aDezire Yekova na agu apai i amangaha nairiwo airiwo ti dungu aboro, dunguyo adianga gu wene pangbangaa gbiati gu zapai nga ga Ziazia Kekeapai kugume ninyanyakipa pai te. Gaani amurakporo, gaani abairasunge watadu agumerani, i rengbe arengba ka fu tambuahe tipa gu wene asino nga ga ndikidi aKristano du ani nani, ono tie i rengbe ka saka parani tooni ki yaa, “Gu gbegberepai duho sa angbanga tipa yo ya nga i nga aDezire Yekova!” Gupai agi aboro nakparia rani re aruganga tiyo naapaha ya nga, agi aDezire re na agu asino tiyo duwa ngbatunga gu nga nyemuse, zereda, weneringise, wene sino, zera na rugatise bambiko ga Mbori toro du nanungusa yo. (AGaratio 5:22-25) Agu asino aDezire Yekova ayugoho re, si tie kangia gupai ka sa agu aboro re i idi kuti gu pangbangaa i atungusaha.
7 Ani dinga gupai namangi Russia yo nikpiapai ho aDezire Yekova aadua Bambu Kindo ni. Kura kumba sa naasusa ti gene aru ka fura tipa gupai ko abihe na boro sa dagba agu awirina naadua Bambu Kindo. Ko ayaa: “Nairiwo gu sunge dua bambu oni amangaha mi abingo gu waha mbataano re ya, anga boro ho dagbaroni navu gundö te, nagumba gbegbere fugo te, watadu duna maare buda a te! Ya mo oni nga boro sa dagba aDezire Yekova yo watadu oni nga ni te?” Gu boro-sunge re asana ko ki yaa: “Ka mi ya furoni wee Dezire Yekova nga mi te, oni rengbe ka ida kuti ni?” Gu kumba re akaragapai niipo ki yaa, “Oó, wagusa te.” Rogo kura bagbata sa Russia yo, kina ngba bazogo nazere ho ko abi aDezire Yekova ni i nidua gayo vovo Bambu Kindo, tona ti tonatonaha ki daho sungehe anyasa ni. Ko ayawee wa vura duhe nga ko anaabi agu abadona nga ga apambori dunduko wa i kina sa, fuo ko bi ga aDezire Yekova mangaapai zanga gbangbati, ko aberãnga berewe tipa apambori ngba gu gene ko anaaberã tipaha mbata re te. Gure gbua nga agu akpiapai ue nayugo gupai nga, ga Yekova aboro kia ti agu aboro andunga kuti agu andiko nga ga Ziazia Kekeapai ya.
8. Pa bata ani ti digida gi zegino du nigbegberehe re naruriipa gine?
8 Ti digido gu regbo nangia ga gu “kuru zegino” i agberesihe ti regbo ngirimo akangbii, Noa adu niruru kumba, kingia “batungusi rurupai.” (2 Petero 2:5) Rogo gi yangara arame nga ga gi zegino re, ga Yekova aboro natungusapa gako ruru andiko na kini takipande gu wene pangbangaa rengbe ka sa aboro i rimi kurogo vovo zegino. (2 Petero 3:9-13) Wakina gu Noa na gako aborokporo abati ti regbo ngirimo akangbii, nangia agu aborokporo nanaagunde ti Mbori, tipa aboro nibasasa bati areme a, si naru riipa gayo idapase gbiati gayo ranigose kutii gu papara ga Yekova riigbu nga ga haurago du auru kpotosende.
Si Naida Ani Duna Idapase Tipa ka Bata
9, 10. Tipagine si aida ani du ti ni na idapase ka ani aida ka bata ti digido gi zegino du tiibe Satana re?
9 Ginipai si aida boro mangihe tipa ka bata ti gu regbo i nika gbarasa gi zegino du tii gu ome nga ga Satana re? (1 Yoane 5:19) Si naida gupai nga gu boro re idipa gu bandahe nga ga Yekova. Fuo gure, ni duwa ka ni di gu mbakadapai kugume Yekova amangaha tipa gu bandahe re. Agu aboro nadu ti rago Noa anye kaa manga kina agu apai nangbatiyo zanga i berẽkuriipa gu gberangbii naaye kuriyo re. I adunga na idapase kuti Mbori te.
10 Ngba kura gene, Noa tigako na gako aborokporo aidi kuti gupai nga i nakpinyemu bandahe gbiati bata. I aduna idapase kuti Bakindo Zegino dunduko, nga Yekova Mbori. Gu mokedi nangia Pauro akepai ki yaa: “Zanga idapase ga boro pai arengba nga na ngba bangiri Mbori te, bambiko gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.” Pauro agbia kurapai kuti gure ki yaa: “Mbiko idapase Noa, ho Mbori ayugu pa agu apai ni fu ko i ata bi nga ya, ko ki gunde ti Mbori, ki mbakadi kurungba ki batasi kpuko; rogo gi pai re ko akiti ngbanga zegino, gu rurupai du mbiko idapase ki du ni gako.”—AEbere 11:6, 7.
11. Ginipai rengbe ani ka wirikaha ti wai Yekova abanda aboro mbata kusayo?
11 Tipa ka bata ti digido gi gbegbere sino mangaapai re, ani duwa ka ani mangi kura apai amanga angianga kadu na kina idapase gbua nga i nika gbarasa gi gbegbere zegino re agbarasa ya. Ani duwa ka ani duna idapase, na kini mangisunge nitatamana na ngbanyaa kuti gu ga Mbori mbakadaapai mangi ko ho tipa ka batasa aboro rogo gi gbegbere zegino re. Rengo ngaha nga, si naida ani duna idapase kuti gu motumo tumorii nga ga Wiri Mbori, nga Yesu Kristo. (Yoane 3:16, 36) Ono tie, si naida ani tingidi gupai nga, kina agu aboro nadu vuru gu kurungba nangia ga Noa, i nabati ti regbo Ime Akangbii. Teketeke wakina gure a, agu abaakporo nangia bagbuko rogo gu ringara aYisaraere nadumbata adu nibabanda agu aboro naniʹimi boro nibéno. Si anidu nga, ka gu boro re oro kurogo gu ngbatunga bakporo re, ni nye rogoho da kinaho gbiamotumo nika kpi ni. (Pa Geda Aboro 35:11-32) Dagba agu agberangbii naye bawe kurii aboro Ezipeta ti rago Mose, gu sa dagbaha yo aimi bambata awiri aEzipeto, ono aguyo nangia ga aYisaraere yo abati abata. Tipagine si amangi ti ni wa gure? Si amangi wo bambiko Yekova aima ruga Mose ki yaa: “I [aYisaraere] aroga bete kurera [agu akandoro nga ga Pumbo Susiri] ki kpe he ti angua pangbadimo ue, na ti gu ngua du ni wagiwagi he ba ri ngbadimo nga ga agu abambu i ka ri ra vuru he yo. . . . A nga boro sa nikakura ti ngbadimo gani bambu mbata fu wiso te.” (Gate 12:7, 22) Gini bambata vungu dagba aYisaraere narengbe ka kura kusayo tii gu bambu i akpe kure ti agu angua pangbadimoho nadu ue na gu ngua nadu niwagiwagihe barii ngbadimo, kini ka basa sangba Mbori?
12. Gini sanahe si aida ani sana tirani nani wadu ani nibasasa, na tipagine?
12 Sidu tie, ani na nduapai berani ka berã wenengai tipa agu apai du tipa rani. Ya mo ani awere rogo gu mbakadapai nga ga Yekova nga gu ani agbia bandahe rogoho yo nga ga toro? Ho bakere gberangbii nika manga ni, aume nga ga ngbarago na ga tambuahe nikaa uka bangiri agu aboro yo nagbata ngbatunga gu bandahe re. Tipa kura aboro tigayo, kina agu aume nga ga gberarago gbiati ga biratise nikaa uka bangiriyo yo.
Agu Aʹariapai Namanga Rogo ga Yekova Riigbu Nambakada Rani Tipa Bata
13. (a) Gine agu aʹariapai nga gu namanga rogo ga Yekova riigbu adigisoho? (b) Oni sakinga pai tipa gu bete aʹariapai nandu kina kumbatayo kindi re.
13 Yekova amangi aʹariapai nga gu nandu kindi kina kumbatayo rogo gu gako papara riigbu du auru kpotosende. Agu aʹariapai re nambakada gako riigbu, kini rugusi agu apai du yo si niindu ngba ruru gene, na kini nyakasi gako mbakadapai tipa ani du nibandabanda rani rogo toroyo. Natona vuru agu agarã nangia ga 1870 ki da kurogo gu garã nangia 1932, agu aboro nadu rogo dungurati anaaba waraga aba tipa ka sia abaakumba gbiati amoyambu-undo. Rogo gu garã nangia 1932, i adi gi mbakadapai nangia ga siakasiaka abaakumba re kusayo ki moi gu gbuu nga ga sunge tungusapai kubaha tipa si undo gu boro i asia ni nibarugupasunge tungusapai. Rogo gu garã nangia 1938, i amangi mbakadapai nga kina gu riigbu nga ga Mbori sa nikaa sia amoyambu kurogo dungurati. Natona rogo gu garã nangia 1972, i anaafu rimo aboro ngba gu gene nga ga gu riigbu nga ga Mbori tii gu rugapai nga ga gu Riigbu Bipasunge nga ga aDezire Yekova tipa i sia yo, na fuo i sia yo, i kini kedi awaraga fu adungurati na rimo agu aboro i nasia yo ni ababiapai na ni amoyambu-undo. Vuru agu agarã susi kusayo re, gu sunge Riigbu Bipasunge namangihe ima sona kumbatayo na si ki sa gupai nga i mangi bete aʹariapai tipa ka sa gayo sunge si du taata.
14. Gini mbakadapai tipa raba awirina natona rogo gu garã nangia 1959?
14 Kusa rogo gu garã nangia 1950, awirina awisigi gupai du rogo Atambuahe 45:16 nyanyakii gbe na i ki da kuti gupai nga, i mangi ringbisapai tipa ka raba awirina nga gu nandu areme kindi kumba yo. Gu veresi re nayaa: “Awiro nga akumba adú ku ba abamo; nga agu yo mo ka sa yo ni abazogo auru kpotosende dunduko.” Agu abaakumba nangbembatayo awere rogo dungurati, i naraba yo tipa agu asunge du rogo gu riigbu nga ga Mbori du awere na gu nika ye tingbafuo Aramegido. (Yugoti 16:14, 16) I atona gu Sukuru nga ga Sunge Nga ga Kindo rogo gu garã nangia 1959. Ti gu regbo re, i amangi mbakadapai ka yugopai tipa diwi sa fu agu amoyambu nangia ga dungurati yo, nangia gu rimo i anaayamba abangerekurii ababiapai nani ti gu regbo re. I ima kiiso gu sukuru re awere tipa yugopai fu ababiapai gbiati amoyambu-undo dunduko. Fuo gure, agu awirina re nangbembatayo a kaa raba agu aDezire nga ga Yekova yo rogo gayo adungurati nibasasa dunduko. Ngba gi gene re, aboro dunduko nagbia undo rogo toroyo na i kini undoyo tipa i duna diabese rogo tungusapai nidu yo ni abatakipande gu wene pangbangaa nga ga Kindo.—Marako 13:10.
15. Gini agene duho ue nga gu i abanda gu dungurati nga ga aKristano ngbaha tipa si nye niziaziaha?
15 Agu aboro naida kada nipapara gu dungurati nga ga aKristano, i duwa ka i mangi kura arugute. Nirengo, i aidanga ha fu agu aboro nga aboro sawia i du nipapara gu dungurati re te, a wa i aidanga ha fu ngbatunga agu aboro sawia re i rimi kurogo gu kurungba nadu ti rago Noa ya. (2 Petero 3:3-7) Ono gbe, natona rogo gu garã nangia 1952, aDezire Yekova ima fubee bakere gbe rogo gu mbakadapai yo i amangihe tipa ka banda dungurati nikusayo agu aboro kusayo rogo dungurati mangi ingapai ono aidanga ka sa gayo berã ya. Rengo ngaha nga, agu amangi-irairapai sa gayo berã nirengo, i nga agu aboro rengbe yo ka aundo yo wenengai tipa i ‘nimbakadi ruru agene tipa nduyo.’—AEbere 12:12, 13; Asanza 28:13; AGaratio 6:1.
16. Wai du ga Yekova aboro rogo toroyo?
16 Gu zugo rogo toro yo nga ga ga Yekova aboro, si nigupai adunga niʹiiriwoho ya watadu si amanganga nibéno te. Yekova agumbapai rogo gu nebi nangia Yesaya ki yaa: “Oni ngére, gimi amoyambu ari he, ono oni adú na gomoro; oni ngére, gimi amoyambu ambira he, ono oni adú na gomoro ime; oni ngére, gimi amoyambu angi, ono oni adù na zee; Oni ngère, gimi amoyambu abì bia mbiko ngbarago kpotoyo yo, ono oni akpára kpe mbiko rungo kpotoroni yo, oni ayóra wawa mbiko gu fudifudipai nga ga toro.” (Yesaya 65:13, 14) Yekova nafu riahe furani kindi nga ga toro ti regboho nga gu wene riahe nabanda rani tipa ani du nyanyakii rogo toroyo.—Matayo 24:45.
Oni Mbakaditironi Tipa ka Bata
17. Ginipai rengbe ka undo rani tipa ani mbakaditirani tipa bata?
17 Awere tie nga regbo susi gu nadumbata tipa “ani bérẽ pa akuarani ka nyakasa yo kuti nyemuse na [kuti] wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga.” (AEbere 10:23-25) Pa koda ani tirani na dungurati sa dagba agu adungurati nga ga aDezire Yekova nga agu adungurati bangehe nasusi 98,000, naapa du ani zaaza rogo toroyo nika undo rani ani mbakaditirani tipa bata. Ani nika gbia gu undohe nga ga akurani aidipase ho ani kaa manga asadatise ni tipa ka “ukadi . . . vovo boro” na kini mangi bakere asadatise na ngbaduraniyo dunduko tipa ka undo kura aboro i wirikipai tipa ga Yekova mbakadapai tipa ka batasa aboro.—AEfeso 4:22-24; AKorosaio 3:9, 10; 1 Timoteo 4:16.
18. Tipagine di oni berã ti ni tipa kadu mbembedii na gu dungurati nga ga aKristano?
18 Satana na gako gbegbere zegino nakpinyemu ka asada rani tipa ka gbe rani kusayo rogo gu dungurati nga ga aKristano. Ono tie, ka ani nye nipapara gu dungurati nga ga aKristano, ani rengbe arengba ka bata ti digido gi gbegbere zegino re. Gaani nyemuse koyo du Yekova ni na gaani tambuahe tipa gu mbakadapai mangi ko ho tipa rani, si fõnga ngbaduraniyo ani diberã susi gu nidumbata tipa ka sovura kuti agu aʹasadapai nga ga Satana. Pa berã ani kurii agu amaku Mbori nafuhe furani awere nika nyakasa gaani diaberã. Ani nika sakapai tipa bete agu amaku re rogo gu papara kekepai naye fuo gere.
Gaoni Akaragapai Nga Gine?
• Tipagine du gaani regbo ti ni wakina gu nangia ga Noa?
• Gini ngbatunga wene sino si aida ani du nani tipa ka bata?
• Gini ngbatunga aʹariapai nandu kina kumbatayo nga gu nyakasi ga Yekova mbakadapai tipa ka banda rani?
• Wai rengbe ani ka mbakadatirani tipa bata?
[Gu kpiahe du ti kpewaraga 8]
Agu aboro nadu ti rago Noa, i abingo gupai Noa anaatungusaha na nyanyakipaha te
[Gu kpiahe du ti kpewaraga 9]
Si niwenepai tipa boro bi gu pangbangaa zahe nga ga Mbori ninyanyakipa pai
[Gu kpiahe du ti kpewaraga 10]
Gini sunge gu Sukuru Nga ga Sunge Kindo amangaha?
[Gu kpiahe du ti kpewaraga 11]
Awere tie nga regbo tipa kadu mbembedii na gu dungurati nga ga aKristano