“Gamo Adezirepai Du Ni Gi Pa Ngbarago”
“Agu apai i ake mbata rogo Ziazia Kekeapai i ake he tipa gaani wirikapai.”—AROMO 15:4.
1. Wai Yekova afu atingidapai furani, na tipagine ani aida agu atingidapai re ti ni?
YEKOVA nafu atingidapai fu gako aboro tipa si undoyo i dibe agu akpakarapai nafuda yo ti gi kpakarakpakara aregbo re. Ani nagbia bete agi atingidapai re ti gu regbo ani awisigo Ziazia Kekeapai nisarani, na ani kini gbia agu akuraha vurube agu atingidapai na agu akaragapai awirina afuhe ti regbo agu adunguratise nga ga aKristano. Badungu agu apai ani agedaha watadu ani agiaha ti agi aregbo re nga agu apai ani aima inoho mbata. Si rengbe kadu a nga, ani aima wisigo ngbatunga gu tingidapai re mbata. Wa duhe nga apai nagoago tirani, si naida ani nizambuasi berã rani azambuasi nibipa ga Yekova aringbisapai, gako andiko, na gako arugapai. Si naida ani duna tambuahe tipa ga Mbori atingidapai. Si nangarasa rani ani nigbeberã rani kuti agu apai nafõngbaduraniyo ani tona kaa raka ni avurumbori. Si du bake apapara Atambuahe abibia ti ni fu Yekova ki yaa: “Gamo adezirepai [watadu atingidapai] du ni gi pa ngbarago.”—Atambuahe 119:24.
2, 3. (a) Tipagine Yekova aidi ti ni ka banda agu apangbangaa du tipa agu aboro keyo payo rogo Ziazia Kekeapai si da ti gi gaani regbo re? (b) Gini apangbangaa dagba agu du rogo Ziazia Kekeapai ani ka wisigoho rogo gi papara kekeapai re?
2 Wa vura duhe nga, i asari gu bia re badungu akama agarã kusayo, si na bakere ome ti ni bambiko Fugo Mbori du ngaha. (AEbere 4:12) Si nafu ndikidi apangbangaa furani nga ga agu aboro keyo payo rogo Ziazia Kekeapai. Wa vura duhe nga asino aboro na gu bipai nga ga aboro aima ariatihe tona ti gu regbo i ake Ziazia Kekeapai kada ku awere, gu kpakarapai ani agbiatirani nani, si wakina gu agu aboro nadu ti gu regbo re agbiatiyo nani. Mbori abanda badungu agu apangbangaa du rogo Ziazia Kekeapai tipa si undo rani, na si nafu agu akpiapai nazio ngbadu boro yo nga ga agu aboro nakpinyemu Yekova mbata kusayo na kini mangisunge fuko zanga biriki kpakaraapai ki vura nimangi yo vurũ. Gu kura apangbangaa nayugopa gu mangaapai Mbori asogaha. Yekova na apangbangaa beko rogo Ziazia Kekeapai nga gu nafura tipa wene aboro na gbegbereyo a, na i akehe rogo Ziazia Kekeapai si du ni atingidapai furani. A wa gu mokedi nangia Pauro agumbaha nzunzu ki yaa: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.”—ARomo 15:4.
3 Ani wisiginga apangbangaa biata rogo Ziazia Kekeapai: nga agu apangbangaa du tipa ga Davide mangaapai na Saura, gu du tipa Anania na Safira, na gu nafura tipa ga Yosefa sino mangaapai na dia Potifaro. Agi apangbangaa re dunduko nayugo nyanyakipa apai furani.
Irisa ga Mbori Ambakadaapai
4, 5. (a) Ginipai namangi nga gu nakodi Bakindo Saura na Davide kurogoho? (b) Waigu Davide amangipai sa ga Saura sogote?
4 Bakindo Saura ayugu gupai nga ko adunga niruru ko fu Yekova te, sidu, ka ko arẽnga ka zoga avuru Yekova ya. Si du Yekova ambuko ti ni na ki rugu gu nebi nangia Samuere ko mbedi Davide ko du ni Bakindo aYisaraere kumbatayo. Ho Davide ayugu gupai ni nga ko adu nikere tatamanatatamana basovura, na aboro kini tambuako, Saura atona ka biko wa gu boro naamanga abaangira naako. Saura aaʹasada tiko dedede ka nyasa riipako. Davide anaabata beko ti agu aregbo re dunduko bambiko Yekova nadu naako.—1 Samuere 18:6-12, 25; 19:10, 11.
5 Si asa Davide ko niraki nibatakuari tipa dungu agarã. Ho mamu anaamanga ni fu Davide ko imi Saura, abadiangbako anaazinahe fuko tipa ko mangihe wo, kini gumba gupai ngawee Yekova du nanaafu gu vurako re kubeko. Wa si avura duwo, Davide aidanga ka imoko te. Padu ko niruru ko fu Yekova gbiati gu irisa ko adu nani tipa Saura nigu mbedimbedi Bakindo nga ga ga Mbori aboro, si nasako ko mangipai ngba gi gene re. Anga Yekova du namoi Saura ni Bakindo aYisaraere tee? Yekova arengbe arengba a ka diako kusayo ti gu regbo kada bangiriko. Davide aini gupai nga rengo adunga beko tipa ka rimiso tiko kurogo gupai re te. Fuo manga Davide agu apai dunduko ko arengbe ka mangaha ti agu aregbo re ka zeresa ga Saura sogote, ko adigisipai ki yaa: “Kina Yekova nikaimo ko; watadu nyasa rameko adá, watadu ko andú ka so vura, ki kpi. Ka Yekova idi nga ha fere mi taĩ bere sa gako mbedimbedi boro te.”—1 Samuere 24:3-15; 26:7-20.
6. Tipagine nyakipa wisigo ani gu pangbangaa nga ga aDavide na Saura ti ni?
6 Gi pangbangaa re na gu nyanyakipa apai rogoho rengbe ani ka wirikapai behe. Ya mo oni abingo tironi oni nisanahe ka ino ndu gupai kpakaraapai naakura ti ni rogo gu dungurati nga ga aKristano? Si rengbe kadu nga kura boro sa namangapai ngba gu gene arunga ya. Gani sino mangaapai rengbe kadu nigupai adunga niʹirairaha gbe ya, ono si kini fudi roni afuda. Wai rengbe oni ka mangapai sani? Mbiko gu nyemuse du oni nani tipa gu boro re naapa du oni niruru roni fu Yekova, oni rengbe ka diaberã ka fura na ni ngba wene gene, na gu berã rironi yo nga oni naida oni mbakadi gupai re na ni. Ono ginipai ka oni mangi ka singia gu kpakarapai re banga abanga kindi? Fuo manga oni agu apai dunduko rengbe oni ka mangaha, oni rengbe ka mbu gupai re kina kube Yekova. Si nga gupai Davide amangihe.
7. Nipeka ani fuo gu kpiapai nga ga Davide, wai rengbe ani ka mangapai sa gu irairapai watadu gu sogote kaa fuda rani?
7 Si rengbe kadu a nga oni nifudifudi roni be gu iraira mangaapai nga ga aboro watadu be gu sogote nga ga aboro pambori. Nirengo, oni arengbanga ka mangapai wagu tooni ti gi regbo re te. Ngbatunga gu sino raka re rengbe kadu nikpakarakpakaraha tipa ka hihe, ono ga Davide mangaapai nibipa iraira mangaapai nayugopai ayugo furani. Agu apapara Atambuahe Davide akehe, si nigu pangbangaa nazio ngbaduraniyo azio, angianga mbiko kina gu kpee nga ga nyemuse ko afuhe fu Mbori tipa ko bandako Saura ka ndu ka fu riko ya, ono mbiko padu ko a niruru ko fu Mbori na kini bakibangiriko tipa padu rimo Mbori nitaasitaasihe. (Atambuahe 18:1-6, 25-27, 30-32, 48-50; 57:1-11) Davide anye kindi niruru ko fu Yekova wa si avura du vurũ nga Saura aamanga kina irairapai kindi tipa dungu agarã. Si naida ani nye a niruru rani fu Yekova na fu gako riigbu ka si vura du nga ani nifudifudi rani be gu irairaapai namanga watadu be agu apai kura aboro amangaha vurũ. Ani rengbe kadu tie naa kido nga Yekova ima rugatiko na gu kpakarapai nafuda rani re.—Atambuahe 86:2.
8. Wai agu aDezire Yekova du Mozambique yo amangipai ho gayo padu niruru yo fu Yekova aduni ngba asada?
8 Agu aKristano du Mozambique yo nga kpiapai ti gi gaani regbo re mbiko i nga agu aboro nakakuti Yekova niruru yo ti regbo asada. Rogo gu garã nangia 1984, aboro dagba agu abasamungu ni abanzengere nga ga ringara yo azi gayo gbaria, ki rogo ahe be aboro ngbaome, ki zokodi akporo, na ki imi aboro. Si nawira gupai nga wiripai adunga ho ka agi aKristano re amangihe ka bandatiyo te. I azinahe fu agu aboro nadu rogo gu rago re i rimisi tiyo kurogo sovura, watadu ka songoda gu vura re ngba kura gene. ADezire Yekova abi pa manga yo ho wo nigupai naadunga na ngbanyaa dagbaha na gu kparatise nga ga aKristano kusayo ti gu tagbagaapai nga ga zegino ya. Pa ká yo ka mangaha wo aigirasi gu vura re kutiyo susi gu nadumbata. I aimi aDezire Yekova wa 30 ti regbo gu vunduvunduapai re, nga akumba na adee, ono gunde bekpio asanga gi ga Mbori aboro re i mbu manga rurupai fuko te.a Wakina Davide, i ahi iraira mangaapai na i kidu na diabese ti digidoho.
Gu Tingidapai Nga Zahe
9, 10. (a) Wai rengbe ani ka gbia undo be bete agu akpiapai du rogo Ziazia Kekeapai? (b) Ginipai nadu nigbegberehe ti ga Anania na Safira mangaapai?
9 Bete agu aboro furayo tipa yo rogo Ziazia Kekeapai, payo nafu agu atingidapai nga zahe furani, nga gu nabipa agu amangaapai si aida ani nehe. Nirengo, Ziazia Kekeapai na badungu apangbangaa rogoho nga gu du tipa agu aboro namangi irairapai na i ki bi imaha, zavura ga Mbori amoyambu a. (1 AKorindo 10:11) Ngbatunga gu pangbangaa re nga gu du tipa Anania na Safira, nga agu arogotise nadu ni aboro gu dungurati nangia ga aKristano rogo bambata sa kama agarã Yerusarema yo.
10 Tingbafuo Pendekote rogo gu garã nangia 33 F.B.K., si aidi i fu ahe fu gu vovo aidipase nadu na zingo, nga aguyo nanye Yerusarema yo, tipa i gbia undo be gu kodatise nangia ga amokedi. Kura aboro rogo dungurati abagi bete gayo ahe tipa ka boro dunga ho narungo ya. (Amokedi 2:41-45) Anania na Safira abagi gayo ati na i ki ye na kina bete marãha gbua fu amokedi, kini tibirĩ ya si nangia gu marã dunduko gu ati re akusihe. Rengo ngaha nga, si aidi Anania na Safira fu kina gu bakio marã i aida ka fuhe, ono ndu gupai i amangi gupai ti ni re arunga te, na gayo mangaapai adu nikina biriki. I aida ka yugo gupai nga, i aamanga wenepai na kini yugu tiyo nga i namangaha susi wai i amangihe. Mbiko gu tingidapai naye be ga Mbori toro, gu mokedi nangia Petero akusipa gayo ziree gbiati biriki kuyangura, na Yekova ki imi yo.—Amokedi 5:1-10.
11, 12. (a) Oni funga bete akpiapai rogo Ziazia Kekeapai tipa pa zanga manga boro biriki? (b) Gini aundo naye fu boro be zanga manga ni biriki?
11 Ka si du nga ani nananga tirani ananga tipa aboro niberẽ gupai nga ani namanga wenepai, si naida ani tingidipa gu pangbangaa du tipa Anania na Safira. Ani rengbe arengba ka nanga akuarani aboro, ono ani arengbanga ka nanga Yekova te. (AEbere 4:13) Wo Ziazia Kekeapai naangarasa rani ani duni airarengo fu aboro dunduko, bambiko airaziree arakanga auru gi kpotosende i nika dia gbegbereapai kusayo rogoho re te. (Asanza 14:2; Yugoti 21:8; 22:15) Ndu gupai duhe ti ni wo, si ziazia nga si naye be Satana Bakitingbanga, bambiko anga kura boro ho nagbaraga ziree fuo kina ko te.—Yoane 8:44.
12 Pa raka ani gu raka adunga na biriki ya naye na badungu aundo. Bete agi aundo re nga gigiri sangbakpotoyo gbiati padu ani nigu boro rengbe kura aboro ka kido kutini. Ngba dungu agene, aKristano aima bi sunge-marã na ki nye kuti ngbaha, mbikopa zanga manga yo biriki. Ono tie, gu nyanyakipa undo duho ti zanga manga biriki nga, si nasa rani ani duna ngbanyaa dagbarani na gu Mbori Duna Tanduapai Dũ.—Atambuahe 15:1, 2.
Bandatise ti Wasiro
13. Gini kpakarapai Yosefa abi tiko rogoho na wai ko amangipai sani?
13 Ho garã Yosefa aduni 17, nangia wiri gu iriiripa bakumba nangia Yakobo, i abagi ko nikanga. Ti digidoho, i aye naako kurogo gu kporo nangia ga Potifaro, nangia bamangisunge ngbangaa yo Ezipeta yo, yo du dia baira Yosefa angana ko ni na sanza bangirise. Ri aida ka kodaba na Yosefa, nga guko nadu nibawene pongopongo paranga. Wo ri anaasosoda ko na aʹuru dunduko kini yaa: “Mo rá na mi.” Yosefa adu tutuurũ ti gako aborokporo rogo gu rago boro ainongo ko rogoho ya. Si adu fuko taata ko kodiba na gi dee re ka kura boro ainongo ho ya. Wa si avura duwo, ho dia Potifaro azi Yosefa ni ngbaome niyangaraha tipa ko kodiba naari, ko agba nioto kuzegiyo beri.—Bambata Pai 37:2, 18-28; 39:1-12.
14, 15. (a) Tipagine du ani ti ni na nyemu gu pangbangaa du tipa Yosefa? (b) Tipagine dee sa ni Kristano aduna bakere ngbarago ti ni mbikopa gia ri sangba Mbori?
14 Yosefa asono rogo gu kporo aboro ho anaagunde ti Mbori, na ko ki ima rugatiko na gupai nga, gu kodaba du dagba agu aboro angianga arogotise ya, si niʹirairapai. Ko asanahe ki yaa: “Waĩ tie ka mi mangi gi bakere gbigbitapai re, ki ingi pai kuti Mbori?” Si nawiraha nga ko amangihe wo mbiko ko aima ino gu ga Mbori andiko du tipa dia dee watadu dia kumba kina sa, a wa pa gu rogatise nadu Edene yo ayuguhe. (Bambata Pai 2:24) Ga Mbori aboro areme rengbe arengba ka gbia undo ka i wiriki mangapai wagu Yosefa amangihe re. Rogo kura arago, i azangahe ti kodaba te, na gu paranga aboro naká ka rimiso tiyo kurogo wasiwasi mangaapai, akurayo nasawia yo asawia. Koda boro ba na gu kurani angianga gani badiarogatise ya nigupai omehe naima kio dagba kuru aboro a. Sidu, gu pangbangaa du tipa Yosefa natingida rani na gu nyanyakipa pai si aida ani tingidihe ti gi gaani regbo re. Ga Mbori bipai kindi tipa meteka na bäri nga, si nga ingapai. (AEbere 13:4) Badungu agu aboro nafutiyo tipa iraira kodaba idi kuti gupai nga, wene nduapai kinaho si aida boro zanga manga gupai re ti ni. Bete agu asangbanaha aboro akpinga nyemuhe ti ni ya nga zee, gu sangbakpotoyo nafuda boro, deringo kumba watadu deringo dee, duna gude, gbiati agu akaza nazio boro mbiko kodaba. Si wakina gupai Ziazia Kekeapai atingida rani nani nga, gu boro namanga meteka, ni “nagbarasa kina tini.”—1 AKorindo 5:9-12; 6:18; Asanza 6:23-29, 32.
15 Jenny,b nga Dezire Yekova na kidu nidegbua, ri na ndupai beri tipa kadu na tambuahe tipa wai Mbori atingidi ri naapa gupai si aida ri mangihe. Basunge yo, bawene paranga sa i aamangasunge naako atona kaa kpinyemu ri gbe. Ho Jenny ayugonga gupai ni nga ri nakpinyemu ko akpi a ya, ko agbe berãko fuori susi gu nadumbata. Ri nayaa: ‘Mi abi tire mi nisota tipa ka nye niʹiriʹiri re, bambiko ho kumba agbeberã ko ni koyo du dee ni, watadu ho dee agbeberã ri ni koyo du kumba ni, nyemu ni nazio ni azio.’ Sidu, ri arugu tiri na gupai nga gupai gu kumba re aida ka mangaha gbua nga ka gida ri ku dagba agu adee ko akodiba naayo rogo gako raka yo. Ho ri abi gupai ni nga ri aima tona kaa zezera fuko, ri akparikpee fu Yekova tipa ko undori ri nye niruru ri fu Yekova. Ri abi gupai nga, agu apai ri awirikihe wa ri aaweteka Ziazia Kekeapai na agu abuku nga ga aKristano, si adu furi wakina agu atingidapai nadu wa imarago tipa ka banda ri tipa ri naangera angera kindi. Tingidapai sa dagba agu akuraha gumba ani paha re angia gu pangbangaa du tipa Yosefa na dia Potifaro. Jenny nadigiso fugori kini yaa: ‘Wa mi aaberã kindi tipa pa wai mi akpinyemu Yekova, mi aagundenga ki ya mi nika manga gi bakere gbegberepai re amanga na ki ingipai kutiko te.’
Oni Gisangba Mbori!
16. Wai rengbe ani ka gbia undo mbiko ngera ani rii gu raka nga ga agu aboro keyo payo rogo Ziazia Kekeapai na kini berẽkuriihe?
16 Ani rengbe ka kiiso gaani tambuahe tipa ga Yekova biʹapai nimanga ani nyanyaki asadatise tipa ka giarogo ndu gupai yo ko aidi ti ni i ke agu apangbangaa du rogo Ziazia Kekeapai tipa rani. Ginipai agi apangbangaa re ayugoho? Gini asino watadu asino mangaapai nga ga agu aboro keyo payo rogo Ziazia Kekeapai du nikpiapai si aida ani pekefuoho watadu si aida ani nehe? Si ziazia nga, akutu aboro keyo payo rogo Fugo Mbori. Si naida agu aboro dunduko nakpinyemu ga Mbori rugute gbia gu tatamana nafu unga, kodihe na agu apai rengbe ani ka wirikaha be gu kpiaapai Yekova abandaha wenengai tipa rani re. Gi magazini re aima digo nifura tipa ngbatunga agu aboro du apangbangaa yo rogo Ziazia Kekeapai tipa ka yugopai furani. Tipagine ka oni adianga regbo ti ni tipa kaa ngerarii agi apai re ya?
17. Wai oni abi ga Yekova atingidapai, na tipagine?
17 Nairiwo gu ngbarago rengbe ani kadu nani tipa gu nyemuse Yekova ayugoho wa ko aberãpa agu aboro namanga asadatise ka manga gupai ko akpinyemuhe! Anga rengberengbe aboro nga ani te, a wa agu akumba na agu adee furayo tipa yo rogo Ziazia Kekeapai adunga nirengberengbe aboro ya. Sidu, gu kekeapai nafura tipa gayo mangaapai, si nafu bakere undo furani. Pa gia ani sangba ga Mbori atingidapai nika banda rani ti manga kere ingaapai, na ani ki rengbe ka pekafuo gu wene kpiaapai nga ga agu aboro nanaata ngba agu agene nga ga rurupai. Ka ani mangihe wo, ani rengbe arengba ka bibia a wa bake apapara Atambuahe abihe, ki yaa: ‘Aboro maku nga agu aboro naka kuti [ga Yekova] adezirepai, ninaagbata ko na kpotoyo yo dũ. Mbisimore naka kuti gamo adezirepai; mi nakpinyemuhe gbe.’—Atambuahe 119:2, 167.
[Gu rukutu kekeapai du bandu kpewaraga yo]
a Oni bi gu buku nga 1996 Yearbook of Jehovah’s Witnesses, ti kpewaraga 160-162.
b Ndikidi rimori ngaha te.
Gaoni Karagapai Nga Gine?
• Ginipai rengbe ani ka wirikaha be ga Davide sino mangapai na Saura?
• Ginipai ani awirikaha ti gu pangbangaa du tipa Anania na Safira?
• Tipagine du ani ti ni ti gi gaani regbo re na nyemu gu pangbangaa du tipa ga Yosefa raka?
[Gu kpiahe du ti kpewaraga 18]
Tipagine Davide aidanga i imi Saura ti ni ya?
[Gu kpiahe du ti kpewaraga 19]
Ginipai ani awirikaha ti gu pangbangaa du tipa Anania na Safira?
[Gu kpiahe du ti kpewaraga 20]
Gine nasa Yosefa ko ká wasiwasi mangapai?