Aboro Abingo Akurayo na Kikiipayo Te

“Agu apai dunduko naamanga bataya yo aandu kina kusayo nibipa zanga fu irisa fu aboro.”—MAGDALENA KUSSEROW REUTER, NGA GU NAGBIA NABATI ROGO GU BATAYA ZIZI ABORO NANGIA GA NAZI.

GU KEREPAI naamanga rogo gu bataya zizi aboro nangia ga Nazi ti regbo gu Ue Vura Nga ga Zegino angianga bambata regbo aboro payasipa akurayo watadu yangara regbo aboro payasipa akurayo a te. Singia ani nawisigo gu kuruapai namangi watadu ani nawisigo gu vovoho, gupai ani abihe ziazia nga: “Dungu aboro ima rungo mbikopa payasi aboro payo.”

Ono tie, pa zanga fu irisa fu aboro anyenga kina kuti gu kereapai namangi bakuru kusayo te. Si namanga amanga areme ngba agu agene aboro agumbanga ka inoho rogoho ya. Oni berẽnga pa gu gude akurani asawia ni tipa gu gbãrã kadu ti kpotoni. Watadu gu yeaye i asawia ni tipa gu sino mangaapai “dukia” ni aye nani rogo gani ringara. Watadu gu boro akurani asoga ni kini mangi funi gbegberee mbiko padu rangi kpotoni kia watadu mbiko ni nga vuru kura ringara kia. Agi aboro namanga akurayo na agi apai re rengbe ka bihe wa mbaro du i angihe, ono gu igira si aye nani fu agu aboro i asawia yo re, si ima gbera, anga si nga pa mongo te.—Asanza 26:18, 19.

Gine Nga Fu Irisa fu Aboro?

Buku sa nga gu nasakarogo afugoyo naya tipa fu irisa fu boro wee si nga ‘ka bi boro na kikiipani, kini irisi ni, watadu kini bi ni na kiki.’ Sidu, kiopa boro nakoda gu gene ani abi tirani ngbaha na gu gene aboro amangapai na ani ngbaha. Wa vura duhe nga dungu apai duho nasa wai ani abi tirani, gu gene aboro abi rani ngbaha na wai i amangapai na ani nayugo gaani bangiriba nzunzu dagba aboro rogo gaani raka na aʹuru nibasasa.

Ariko dunduko nga ga aboro duna rungorungo aboro rogoho na aguyo adunga gene beyo ya gbiati aguyo rengbe apai ka gbiayo taata. Ono tie, padu boro rogo gu ngbatunga apai re asanga gupai nga i naabi pani kusende te. Ga aboro sino berã gbiati gayo mangaapai du napayasipa kura aboro. Gupai nafu gberarago nga, agu aboro adunga gene beyo ya, i du aboro abingo yo na kikiipayo ya. Nange bara wai ani naagia agu afugo nga “kungbo zirihe gbua nga ko,” “ko arẽnga tipa i fuhe fuko te,” na “payapaya boro gbua nga ko” ho aboro afura ni tipa gbinza aboro, rungorungo aboro, watadu tipa agu aboro duna riyo yo ue watadu gbarigbari aboro!

Tipagine aboro apayasipa akurayo ti ni? Ya mo regbo atingidi ye aboro kaa fu irisa fu akurayo ti ni? Gu papara kekeapai naye re nika fu wene karagapai kuti agi asanahe re rogo Ziazia Kekeapai, nga Fugo Mbori.