‘Gu Bakere Rago Nga Ga Yekova Ima Mbeda’
“Gu bakere rago nga ga Yekova du mbembedi, si mbembedi ki niipisi tihe gbe.”—ZEFANIA 1:14.
1, 2. (a) Gini kparakpara regbo aKristano asungudoho? (b) Gini asanahe si aida ni sana tirani nani, na tipagine?
DEGUDE duna ngbarago kpakpuri yo napido uru gari rogatise na nyemuhe. Navuse nasungudo gu regbo ri nika batika fogo wiiri. Gu bamangisunge omeko naima bata napido gu regbo na nyemuhe ko nika tona gako ongoda ko aima digo nipidihe. Ginipai du tipa agi aboro re dunduko? I dunduko nasungudo kparakpara regbo, watadu uru, nga gu nika manga ariapai rogo gayo raka. Agi aboro re dunduko nasungudo pai na nyemuhe, ono agu apai i asungudoho re, si nibakiakia. Gu regbo i asungudoho re, si nika daada, na ho si nika da ni, i nikadu nikina mbakadimbakadi tiyó tipaha.
2 Ndikidi aKristano areme a nasungudo kparakpara uru watadu regbo. Si nga gu bakere “rago [watadu uru] nga ga Yekova.” (Yesaya 13:9; Yoere 2:1; 2 Petero 3:12) Gine nga gu “rago nga ga Yekova” aboro asungudoho re, na wai si nika manga ariapai na ngbatunga aboro ho si nika da ni? Kurigure, wai rengbe ani ka rugatirani nani nga ani ima mbakadatirani tipa gu uru re? Si daada ani gbata akaragapai kuti agi asanahe re awere bambiko gopai nayugoho nga, agu afugo Ziazia Kekeapai du kusende re, rengo du ngaha. Nga agu afugo nayaa: “Gu bakere rago nga ga Yekova du mbembedi, si mbembedi ki niipisi tihe gbe.”—Zefania 1:14.
“Gu Bakere Rago Nga ga Yekova”
3. Gine nga “gu bakere rago nga ga Yekova”?
3 Gine nga gu “bakere rago nga ga Yekova”? Rogo Ziazia Kekeapai naabaha, gu fugo nga “gu rago nga ga Yekova,” si nayugopa gu kparakpara aregbo Yekova anaasarangbanga kuti avurako na ki taasi bakere rimoko. Gu iraira aboro nangia aYuda na aguyó nadu Yerusarema yo kodihe na agu abarungosi aboro nangia avuru Babera gbiati aEzipeto, i dunduko naima gbiatiyo na ‘ga Yekova uru’ ho ko asaringbangaa yó ni. (Yesaya 2:1, 10-12; 13:1-6; Yeremaya 46:7-10) Ono tie, gu bakere “rago nga ga Yekova,” si kindi kumbatayo. Si nga gu “rago” watadu gu regbo Yekova nika sarangbanga agu aboro rogoho nagbirisa rimoko. Si nika tona na gbarasa “Babera Duna Bakere Ome Ti Ni,” nga bariwara ngbii zire pambori. Na fuo gure, i ki nyasi riipa gu gbegberẽapai dunduko du rogo gi zegino re ti regbo gu vura nga Aramegido.—Yugoti 16:14, 16; 17:5, NW, 15-17; 19:11-21.
4. Tipagine si aida badungu aboro gunde ti ni be gu ga Yekova uru naipiso tihe re?
4 Badungu aboro ainongo gupai nga ga Yekova uru nambeda, na si nika ye na bakere rungo kurii badungu aboro te. Tipagine si aida ti ni ani naabaka bangirani abaka tipa gu uru re? Yekova akaragapai rogo gu nebi nangia Zefania ki yaa: “Rago dingidingi ngbaduse nga gu rago re, rago fudifudipai na rago dungbapai, rago gbarasahe na rago pa kungbaahe, rago bitimo na rago du iyo, rago adubo na nduunduu bitimo.” Si ima iriwo nirengo! Kurigure, gu nebi re ayaa: “Mi ayé na fudifudipai ku ri aboro, . . . bambiko i ingi kuti Yekova.”—Zefania 1:15, 17.
5. Gini ruru bipai du badungu amirioni aboro nani nibipa ga Yekova uru?
5 Ono tie, badungu kura amirioni aboro napido ga Yekova uru na nyemuhe. Tipagine? Si wo bambiko tipa yó tigayó, gu regbo re nikangia regbo batasa ruru aboro, nga gu regbo Yekova nika tumbasipa tiko kuari bakere gbe na rimoko kidu niʹiriʹirihe. (Yoere 3:16, 17; Zefania 3:12-17) Singia aboro nagunde be gi uru re watadu i napidoho na nyemuhe, si naru gbe riipa kina gupai i amangaha awere na gayo raka. Wai oni abi gu uru nambeda re? Ya mo oni mbakaditironi tipaha? Ya mo gu rengo nga ga Yekova uru ima mbeda, si namanga ariapai na gaoni raka awere?
“Airasawia Nikaye”
6. Wai badungu aboro abi gu ‘uru nga ga Yekova,’ na tipagine gipai re akpakaranga ti ni bangiri ndikidi aKristano ya?
6 Wa vura duhe nga si naida aboro mangipai niipo tipa gu ‘uru nga ga Yekova’ re, badungu aboro rogo zegino amaanga berãyó tipaha te. I namoma agu aboro amoma nagumbapa gu uru re fuyó na kini sawia yó a. Gipai re akpakaranga bangiri ndikidi aKristano te. I natingida gupai gu mokedi nangia Petero aima gumbaha ki yaa: “[Oni] ini gere mbata, ya ti yangara arame airasawia nikaye ki nipeke agu apai boroyo akpi nyemu he, niya, ‘Wari du gu kidohe ni [du] tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.’”—2 Petero 3:3, 4.
7. Gine nika undo rani ani bi gupai nga ga Yekova uru ima mbeda?
7 Gine rengbe ka undo rani ani sovura kuti gu iraira berã re na ani kini bi gu uru re nga si ima mbeda? Fugo Petero naya furani wee: ‘Mi nazingisa gaoni ziazia aberã rogo tingida apai furoni; ya oni tingidi agu apai ziazia anebi agumbaha mbata, na gu rugute nga ga Gbia, nga Batasi, ngba gaoni amokedi.’ (2 Petero 3:1, 2) Pa dega ani turani kuti agu apai anebi aima gumbapaha kumbatayo nika undo rani ani ‘zingisi gaani ziazia aberã.’ Isoke si nawira ani aima digo nigi agi atingidapai re, ono si ninyanyakipa pai tipa ani naamaaberã rani kuti azahe ti gi regbo re susi gu niidumbata.—Yesaya 34:1-4; Ruka 21:34-36.
8. Tipagine badungu aboro aidanga ti ni na agu atingidapai nga ga Ziazia Kekeapai ya?
8 Tipagine kura aboro abasapa agi atingidapai re abasa ti ni? Petero andu kumbatayo na gako fugo kindi kini yaa: ‘I tigayo nakpinyemu gipai re du niokookoho beyo nga, angbangbaturũ adu kinaho bakuru yo, na kpotosende nimangimangihe be ime na rogo ime, mbiko gupai nga ga Mbori; na be agi apai re gu zegino naduho mbata, ime afu afu ku auru he si ki gberẽ.’ (2 Petero 3:5, 6) Ii, kura aboro kinaho aidanga gupai nga ga Yekova uru ye ya. I aidanga pai fudi gayo raka te. I aidanga Yekova saringbanga yó tipa gu gayo gene raka nga ga gbangbati te! A wa Petero agumbaha, i naraka kina kuti “agu apai boroyo akpi nyemu he.”
9. Gini sino agu aboro nadu ti rago Noa na ti rago Roto adu nani?
9 Mbiko ‘gupai i akpinyemuhe,’ agi airasawia re aidanga kuti gu rengo nga Yekova aima rimiso tiko kurogo agu apai nga ga ngbatunga aboro ti agu aregbo nasusi kusayo te. Yesu Kristo gbiati gu mokedi nangia Petero afura tipa ngbatunga agu apai re ue, nga gu namangi ti “rago Noa” na gu namangi ti “rago Roto.” (Ruka 17:26-30; 2 Petero 2:5-9) Mbata fu Ime Akangbii, aboro aamaanga berã yó sa gu zahe Noa afuhe te. Kina gu bangisapai re a nadumbata fu gbarasa Sodomo na Amora. Gupai Roto agumbaha fu agu akumba napazua awiriko, si “adu bangiriyo wa ko nananga yo ananga.”—Bambata Pai 19:14.
10. Ginipai Yekova nika mangaha fu agu aboro abingo zahe na kikiipaha ya?
10 Kina gu bangisapai re namanga areme a. Ono tie, oni kparianga gupai Yekova nika mangaha tipa agu aboro aidanga ka gia zahe ya. Ko nayaa: “Mi ambúsa agu yo nanyakasa tiyo ku ba yo yo, nga agu yo naya ku kpotoyo yo, ‘Yekova amanga nga wenepai te, ko amanga nga gbigbitapai a te.’ I agbú gayo ahe, gayo abambu adú ni gbarasigbarasi he. Ka i vura dua abambu, i aráka nga rogo ho yo te; ka i vura rũka abakakue, i ambíra nga gaha imekakue te.” (Zefania 1:12, 13) Aboro nikaa manga gu gayo asunge amanga kindi i “naamangaha na aʹuru,” ono i agbianga nyenye undo ti gu gayo bakere sunge re te. Tipagine? Bambiko ga Yekova uru nika da wa ikpirogumba, na agu aũkumuko rengbe kadu beyo abatasanga yó te.—Zefania 1:18.
“Mo Súngudi He”
11. Gini rugute si aida ani tingidihe?
11 Si aidanga ani duwa gu gbegberẽ aboro ani araka dagbayo re te, ono si naida ani naatingida gu rugute gu nebi nangia Abakuka afuhe, nga gu nayaa: “Yuguyugupai nasunguda ragoho kindi; si naipisa tihe sa digidaha—si aré nga zire te. Ka si du wa si ayé yee, mo súngudi he; si ayé aye ni rengo, si aíma nga te.” (Abakuka 2:3) Ka si vura du nga gu regbo re wa si naima aima kuti gu iraira bipai nga ga boro, si naida ani tingidi gupai nga Yekova amanganga pai dokonyo te. Gako uru nika ye ti kina regboho nzunzu, ti gu saa boro nikaa inongo ho ya.—Marako 13:33; 2 Petero 3:9, 10.
12. Ginihe Yesu afura tipaha na wai du gipai re kia ti gu mangaapai nga ga ruru apefuoko?
12 Ninyakasapa gupai nyakipa sungudo ga Yekova uru ti ni, Yesu ayawee zavura apefuoko, bete aguyo kinaho nikaa ipisongo pa gu uru re berãyó yo ya. Ko ayaa: “Ka gu gbegberẽ moyambu ayá re ku kpotoni yo, ‘Gi gbia naima [aima],’ ni ki tona taka gu kura amoyambu du na ko, ki ta ri ahe nimbiri he na akpibuda; gbia gu moyambu re ayé ni gu uru ni aso nga gima ko ya, ti gu saa ni aina nga ha ya, ki taki ni ni pai.” (Matayo 24:48-51) Nigupai dukia ti gure, aboro gu riko nga ga ruru kangara moyambu tigayo nasungo na kina pa gu uru re berãyó yo. I aima digo nisungudi he na i ima mbakadatiyó tipaha. Yesu aima “aásia pa gako ahe dunduko” fuyó auru kpotosende herẽ.—Matayo 24:42-47.
Gupai Si Aida Ani Ipisihe ti Ni
13. Wai Yesu anyakasipa wai si aidi aboro mangipai niipiipihe?
13 Si adu ninyanyakipa pai tipa agu aKristano nadu rogo bambata sa kama agarã naasungo naapa ga Yekova uru berãyó yo. Si aidi i mangipai niipo tipa ka kura Yerusarema yo ho i ka bihe ni ‘i nakisi he kirikiri na aborovura.’ (Ruka 21:20, 21) Ga aRomo aborovura namangi gupai re rogo gu garã nangia 66 F.B.K. Oni kparianga wai Yesu anyakasipa wai si aidi agu aKristano nadumbata re mangipai niipo. Ko ayaa: “Gu ni ka du ri bambu yo ka ni azórã nga ka roga agu ahe ka du tii gani bambu yo ya. Gu ni ka du ati yo ka ni akáraga nga tini ka dia gani baukadi ya.” (Matayo 24:17, 18) A wa kuru apangbangaa ayugoho nirengo nga Yerusarema abati abata tipa agarã susi biama fuo gu garã nangia 66 F.B.K. re, tipagine tie si aidi aKristano gisangba agu afugo Yesu re ti ni nikina ipo wa gu ko agumbaha re?
14, 15. Tipagine si adu ti ni ninyanyakipa pai fu agu aKristano nadu rogo bambata sa kama agarã nga, ka i tabi Yerusarema aborovura nake patihe kirikiri, i kuru kusayo zanga keesa?
14 Wa si avura du nga ga aRomo riivura aagbarasanga Yerusarema te da kina rogo gu garã nangia 70 F.B.K., agu agarã biama re aadunga na zereda rogoho te. Ome fudifudiapai aima kio! Agu agarã re ahiki be zuũ gbiati uka-kure. Bake kuru apangbangaa sa naringbisapa gu sino raka nadu Yerusarema yo ti gu regbo re ki ya “si angia regbo kere vura dagba aboro-ringara nisayo nga gu badungu aboro akpi ragoho, na aboro kini rungosi akurayo nikerehe.” I azi paranga akumba i niibanda ndugu, na i rogo aũvura kubeyo ka mangasunge abanzengere. I anaawirika sunge abanzengere na aʹuru dunduko. Agu aboro naaidanga ka rimiso tiyó kurogo gupai re ya, i aabi yó nga airasamungu du nga yó. Ka aKristano amere amera kaa ke vuru gbata, ka i abitiyo abi rogo kerepai.—Matayo 26:52; Marako 12:17.
15 Si naida ani kparia gupai nga Yesu aayanga wee kina agu aboro nadu Yerusarema yo tona oto te, ono ko aya “agu yo ka du Yuda yo,” i ki oro aora a. Si adu ninyanyakipa pai bambiko fuo bete adiwi gbua fuo ga aRomo riivura karaga tihe Yerusarema yo, i atona gayo sunge vura berewe nivovoho. Nibambatapai, i adibe aboro Gariraya rogo gu garã nangia 67 F.B.K., na i ki tona ka zio ringara Yuda tooni tooni ki nyasihe rogo gu garã naye ti fuo gure. Gipai re aye na bakere rungo kurogo agu agbaria nadu rogo gu ringara re. Si kidu a nikpakarapai fu gu boro nga Yuda tipa ní oro kusayo Yerusarema yo, na gipai re kini gberẽ kina kumbatayo. Kina abanzengere nanaasusungo ti angbadimo dunduko, naapa asada boro tiní ka kura adu wa ka i ya ní naga aga fuo aRomo.
16. Gini sino berã si aidi agu aKristano nadu rogo bambata sa kama agarã du nani tipa ka bata ti gu regbo gberangbii re?
16 Nidu ani na agi apai re dunduko berã rani yo, ani rengbe arengba tie ka ino ndu gupai Yesu azinahe ti ni fu apefuoko i mangipai niipiipihe. Si aidi aKristano mbupa kura gayo apai ambu, angianga ka mbu tiyó fu aũkumuko si kisi berã yó ya. Si aidi i idi aida ka mbu aũkumuko, a wa si adu nga boro ‘mbu gani ahe dunduko’ tipa ka irisa ga Yesu zahe. (Ruka 14:33) Agu aboro nagi sangbako niipo na ki oro ku mbiti Yaradene yo, i nabati.
Ani Sungu Naapaha Berã Rani Yo
17. Tipagine si aida ti ni ani sungu naapa ga Yekova uru berã rani yo susi gu niidumbata?
17 Gu sangbaanebi nga ga Ziazia Kekeapai nayugoho ziazia nga ani naraka mbembedi kuti digido zegino. Si naida ani sungu naapa ga Yekova uru berã rani yo susi gu niidumbata. Ti gu regbo adunga vura ya, banzengere abakanga bangirini te. Ono wa vura duhe wo, ka si ta duwa gure ka ní aberãnga pa vura ya, na i kini tunguo ní atunguo naapa vura, ní dunga nimbakadi mbakadi tiní te, sangbanaha rengbe kadu nga kerepai. Kina gu bangisapai re a du tipa gu vura nga ga toro aKristano asoho. Ka bangirani tona kaa go, ani dunga nimbakadi mbakadi tirani tipa ka sovura kuti gu zubohe rengbe ka gbia rani te, na ga Yekova uru tunguo rani atunguo ho si nika da ni. (Ruka 21:36; 1 ATesaroniko 5:4) Ka si du nga boro ho ‘nakaraga tiní kusayo ti peka Yekova,’ regbo du re tipa ní gbata ko berewe.—Zefania 1:3-6; 2 ATesaroniko 1:8, 9.
18, 19. Gine nika undo rani ani naasungo ‘naapa ye ga Yekova uru’ berã rani yo?
18 Si airiwongo tie te nga, fugo gu mokedi nangia Petero nazungodi rani ani ‘naangera tipa ye gu uru nga ga Mbori’ na kini ipisi paha berã rani yo! Wai rengbe ani ka manga gipai re? Gene sa dagba agu akuraha nga kaa “manga ziazia apai na sinombori.” (2 Petero 3:11, 12) Pa fu ani tirani kakaka sa ngbatunga gu mangaapai re nika undo rani ani naasungudo ‘ga Yekova uru’ na nyemuhe gbe. Nirengo, ani arengbanga ka ipiso gu yangara regbo nye koyo kuti ga Yekova uru re te, daho si nika da ni. Ono tie, wa ani kaa sungudo gu regbo re, si nika ipiso tihe aipiso bangirani ka ani fu tirani ka manga ga Mbori sunge kakaka.—1 AKorindo 15:58.
19 Pa berã ani kurii Fugo Mbori na agu atingidapai du rogo yo nika undo rani ani “naangera tipa gu uru re na nyemuhe,” na “kini sungudihe kindi.” (2 Petero 3:12, The Amplified Bible; The New Testament, by William Barclay) Bete agi atingidapai re nga gu sangbaanebi naima fura tipa paye ga Yekova uru na tipa gu badungu amaku a Yekova nika fuhe kurii agu aboro ‘nasungudo Yekova.’—Zefania 3:8.
20. Gini zungodihe si aida ani dihe kugume?
20 Awere nzunzu nga regbo tipa ani di gu zungodihe kugume i afuhe rogo gu nebi yo nangia Zefania, nga gu nayaa: “Mbata gu pai i aringbisi he nikada rago ki susi wa gundugundu umuhe, mbata gu ngariangaria zinga nikaye nga ga Yekova ku ri roni, mbata gu uru nikada fu roni nga rago ga Yekova zinga. Oni gbáta Yekova, oni dunduko nga bayee aboro ringara, namanga gako sarangbanga; oni gbáta rurupai, oni gbáta umbasitise; si ngia i aõka roni rago ga Yekova zinga.”—Zefania 2:2, 3.
21. Ginipai si aida ga Mbori aboro diberã tipaha rogo gu garã nga 2007?
21 Si daada tie nga, gu veresi i nasiaha tipa gu karendaria nga ga gu garã nga 2007, si nayaa: “Gu bakere uru nga ga Yekova ima mbeda kada.” Ga Mbori aboro ima ida kuti gupai nga “si mbembedii kini ipisitihe gbe.” (Zefania 1:14, NW) “Si aíma nga te.” (Abakuka 2:3) Sidu, wa ani asungudo gu uru re, si naida ani naangeranga angera kindi ti gi regbo ani araka ti ni re, kini tingidi gupai nga yangara digisidigisi gi sangbaanebi re ima mbeda ka manga!
Oni Rengbe ka Karagapai Sa Agi Asanahe Re?
• Gine nga “gu bakere rago nga ga Yekova”?
• Tipagine badungu aboro abingo gupai ti ni nga ga Yekova uru ima mbeda ti gi gaani regbo re ya?
• Tipagine si aidi ti ni agu aKristano nadu rogo bambata sa kama agarã mangipai niipiipihe?
• Gine rengbe ka sa rani ani naasungo na kina pa ga Yekova uru berã rani yo ti aregbo dunduko?
[Gu kpiahe du ti kpewaraga 12]
Gu veresi nga ga garã du tipa 2007 nikangia: “Gu bakere uru nga ga Yekova ima mbeda kada.”—Zefania 1:14, NW.
[Gu kpiahe du ti kpewaraga 9]
A wa si adu ti rago Noa, Yekova nika tunguo airasawia atunguo
[Gu kpiahe du ti kpewaraga 10]
Si aidi aKristano mangipai niipo ho i ka bi Yerusarema ni ‘i nakisi he kirikiri na aborovura’