Oni Gbia Ngbarago Be Gunde Ti Yekova
“Ako oni gunde ti Yekova, oni nga gako ziazia aboro, zingo ahe amanga nga agu yo nagunde ti ko te!”—ATAMBUAHE 34:9.
1, 2. (a) Gine agu abarumbatayo du rogo agu akanisa i aya tipaha wee si nga ga aKristano ayugoho tipa Mbori? (b) Gini asanahe ani ka bipai tipaha awere?
AGU abatungusipai du rogo agu akanisa i aya tipaha wee si nga ga aKristano mere kina gene yugo gupai yo nga si naida aboro gunde be Mbori bambiko ko nambusa aboro ingapai ambusa rogo ba ya yo tipaha wee si nga iferno. Si nga gupai i amangaha kuba yugopai fu aboro i naagunde ti Mbori, nga ka gunde ti fu gberarago fuko. Ngbatunga gu yugopai re kia ti gupai Ziazia Kekeapai ayugoho tipa Yekova nigu Mbori duna nyemuse na kini saringbangaa niruruhe. (Bambata Pai 3:19; Pa Fu Rugute ni Ue he 32:4; ARomo 6:23; 1 Yoane 4:8) Gu kura abarumbatayo rogo agu akanisa i aya tipaha wee si nga ga aKristano namanga gu dukia ti gure. I apenga gupai fu aboro nga i gunde ti Mbori te. Kuba gure, i nayugo gupai tigayo ngawee Mbori nambugene ambu fu aboro i naamanga agu apai i aidaha na kini idi na ngbatunga aboro dunduko ka i vura kaa raka kina gini ngbatunga raka vurũ. Gure a nga gupai Ziazia Kekeapai ayugongo ho ya.—AGaratio 5:19-21.
2 Ka gumba rengo, Ziazia Kekeapai nangarasa rani ani gunde ti Mbori. (Yugoti 14:7) Gupai re nakusa asanahe akusa. Tipagine Mbori aida ti ni ani gunde tiko? Na wai du ko aida ani gunde tiko? Wai pa gunde ani ti Mbori aundo rani? Ani nika bipai tipa agi asanahe re baraho ani kaa sakapai ni riipa Atambuahe namba 34.
Ndu Gupai Si Aida Ani Gunde ti Mbori ti Ni
3. (a) Wai oni abi gu zinahe du fu aboro tipa i gunde ti Mbori? (b) Tipagine du agu aboro ti ni na ngbarago nagunde ti Mbori?
3 Nidu Yekova nga Bakusiahe na ni Bakerepa Bakindo nga ga haurago, si daada aboro naagunde tiko. (1 Petero 2:17) Ono tie, gine gunde ti Mbori ayugoho? Si nga ka bi Mbori na kiki. Si a nga gunde ti fu gberarago fuko. Gunde ti Mbori nga iriiripai na si nambakada ga boro raka ambakada, angianga ka gbarasapa ga boro raka watadu ka fu gunde funi ya. Yekova, nga “gu Mbori duna ngbarago,” ko naida gupai nga aboro naagbia ngbarago agbia be raka. (1 Timoteo 1:11, NW) Ono tie, tipa ani rengbe kadu na ngbarago, si naida ani naaraka na ngbanyaa kuti ga Mbori arugute. Tipa dungu aboro, si naida gupai beyo nga i aria gayó sino raka. Agu aboro dunduko namanga gu ariapai si aida i mangihe, i naino rengo pa gupai gu bake apapara Atambuahe nangia Davide agumbaha ki yaa: “Ako, oni ía Yekova ka bi ko ko du ni wene ko! Boro maku nga gu ni ninafu tini ku be ko! Ako oni gunde ti Yekova, oni nga gako ziazia aboro, zingo ahe amanga nga agu yo nagunde ti ko te!” (Atambuahe 34:8, 9) Anga zingo ho tipa guhe duna kikiipaha nzunzu namanga agu aboro duna wene pagume dagbayó na Yekova te.
4. Gini akidohe aDavide na Yesu afuhe?
4 Oni kparia wai Davide adekiki kuti gako akumba niyamba ko yó ni “ziazia aboro.” Si nangia gu fugo-irisa aboro anaagumbaha fu akurayó ti agu aregbo re. I angia agu aboro nadu dagba ga Mbori ziazia rikaaboro. I amoi gayó raka a ngbapai wa i aapefuo Davide. Wa si avura du nga i adu ngba oto be Bakindo Saura, Davide aduna kido ya Yekova nikaa ngera angera fuoyo na agu ahe i aidaha tipa ka songoda ungayo. Ko akepai ki yaa: ‘Zingo ahe namanga paranga abahu amanga, ami nidu adu na gomoro; ono agu aboro nagbata Yekova, anga wenehe ho sa ka zingoho mangi yo te.’ (Atambuahe 34:10) Yesu akido apefuoko tipa pai wakina gure a.—Matayo 6:33.
5. (a) Ginipai nadu tipa dungu apefuo Yesu? (b) Gini arugute Yesu afuhe nibipa gunde?
5 Dungu agu aboro nanaadegatuyo kuti Yesu angia agu aboro naadunga na gene beyo ya, i angia agu aboro payo adu kusende. Sidu, ‘nunga yó amangi Yesu, bambiko i aarungo, kini gbandaka, wakina agu akandoro adunga na babandara tira ya.’ (Matayo 9:36) Ya mo ngbatunga agu aboro payo adu kusende re aduna wingbaduse kaa pekafuo Yesu? Tipa i rengbe ka pekafuo ko, si aidi i he gunde be aboro, ono kini gunde ti fu gberarago fu Yekova. Yesu ayaa: ‘Mi naya furoni nga abadiangbare, ka oni gundenga be agu aboro naimo kpotoboro ya, ka i manginga kurapai fuo gu te re. Ono mi agumbapa guni furoni oni ka gunde tini; oni gunde ti guko, rengbe tanduko ka ba boro ku Geyena yo fuo imo yo ni; ii, ya mi furoni, oni gunde beko. I naabaganga abavurukporo bisue tipa rukutu marã ue tee? Bangiri Mbori agonga ti guru wa sa te. Ono mangerironi tigaha nigedigedihe dunduko. Ka oni gúndenga ya; oni nga bahe ti dungu abavurukporo.’—Ruka 12:4-7.
6. (a) Gini afugo Yesu ngarasi aKristano ti gi gaani regbo re? (b) Tipagine du Yesu ti ni nibawene kpiapai rogo gunde ti Mbori?
6 Ho agu aboro nasoga ga Mbori aboro asosoda yó ni i mbu mangasunge fu Mbori, si naida i tingidi gu rugute Yesu afuhe ki yaa: “Ya mi fu roni we, gu ni nikakusa pa re barangba aboro, Wiri boro akusa pa ni barangba ga Mbori amaraika; ono gu ni nikaora rimore barangba aboro i aora rimoni barangba ga Mbori amaraika.” (Ruka 12:8, 9) Agu afugo re aima ngarasa aKristano, gbe, rogo agu aringara irangbii aima zahe rogoho ti ndikidi irisombori. Ngbatunga agu aboro re nandu kumbatayo kindi kaa sambuo Yekova na rugatise ti regbo agu adunguratise nga ga aKristano na rogo sunge tungusapai. (Amokedi 5:29) Yesu amoi gu kpiapai ngbaa kisusi rogo “gunde ti Mbori.” (AEbere 5:7) Wa nebi aafura tipa Yesu kumbatayo, ko ayaa: “Ga Yekova Toro anyé ri ko, gu toro nga ga . . . gunde ti Yekova. Ga ngbarago adú rogo pa gunde ti Yekova.” (Yesaya 11:2, 3) Sidu, Yesu ima rẽ ka yugopa gunde ti Mbori furani.
7. (a) Wai aKristano akaragapai kuti gu yamba yó i ayamba yó nani duwa kina gu Davide ayambu gako akumba nani? (b) Wai rengbe avunguagude ka pekafuo gu wene kpiapai nangia ga Davide?
7 Agu aboro dunduko napefuo gu kpiapai nga ga Yesu na kini irisi sangbako, si nzunzu nga i nakaragapai kuti gu yambahe nangia ga Davide si ki duwa i ko aayamba yó nani niyaa: “Ako awiri aboro, oni yé ki gi pa re, mi ayúgo pa gunde ti Yekova fu roni.” (Atambuahe 34:11) Si adaada fu Davide ko yambu gako akumba ni “awiri aboro” watadu “awire,” (NW) bambiko i aabi ko nigayo barumbatayo. Tipa Davide tigako, ko afu gu undo nangia ga toro fu apefuoko tipa i du nikpamiakpamiayo na kini gbia ngbarago be ga Mbori weneringise. Nangbaa gu kpiapai re fu agu aKristano nga avunguagude! Yekova ima fu pagbia fuyó nibipa awiriyo tipa i “[naa]mbu ti yo ni ga Gbia rabahe na rugahe.” (AEfeso 6:4) Wa avunguagude kaa saka agu apai nga ga toro na awiriyo na aʹuru dunduko na kini yugu Ziazia Kekeapai fuyó, gure nga i naundo yó i naagbia ngbarago rogo gayó raka wa i agunde ti Yekova.—Pa Fu Rugute ni Ue he 6:6, 7.
Gu Gene Si Aida Ani Gunde ti Mbori Ngbaha
8, 9. (a) Gine nasa gu sino raka nga ga gunde ti Mbori si du na nyemuhe ti ni? (b) Pa banda ani mirãrani nakoda gine?
8 A wa ani nigumbaha mbata, pa gunde ani ti Yekova abengetanga rani na ngbarago te. Davide asanahe ki yaa: “Gini boro nga gu ni ngba unga angba ti ni, ki nikpi nyemu du na dungu arame, ni bi wenepai?” (Atambuahe 34:12) Si tie ziazia nga, gunde ti Yekova nga gu banguapai nasa boro ní raki nigbangaha na weneapai kini mangi funi. Ono tie, si taata boro ya gbua wee, “Mi nagunde agunde ti Mbori.” Ono anga si nitaatapai ani yuguhe rogo gaani sino mangaapai yo te. Sidu, Davide asusi kumbatayo ka sakarogo wai rengbe ani ka gunde ti Mbori.
9 “Mo bánda mirãro ti gbigbitapai, na ngbaro tipa gumba nangahe.” (Atambuahe 34:13) Ga Mbori toro adu kugii gu mokedi nangia Petero ko di gi fugo re rogo Atambuahe namba 34 ka gumbaha, fuo ko fu arugute fu aKristano tipa i naamanga akurayó rogo beedi ngbanyaa. (1 Petero 3:8-12) Pa banda ani mirãrani ti gumba gbegberẽ afugo ngawee ani agumbanga rimo aboro te. Kuba gure, ani nikaa manga asadatise kindi kaa gumba kina wene afugo tipa agu aboro ani afura tipa yó. Kurigure, ani nikaa manga asadatise nyanyakii kaa gumba kina rengo.—AEfeso 4:25, 29, 31; Yakoba 5:16.
10. (a) Oni sakinga rogo gupai yo nga ka guari pati gbigbitapai. (b) Gine pa manga boro weneapai akodaha?
10 “Mo gúari pati gbigbitapai, ki mangi wenepai; mo gbáta zereda, ki dusia ha.” (Atambuahe 34:14) Ani nane manga agu apai Mbori asogaha, wa wasiwasi kodaba, dĩ, sangbaatoro, zuũ, kpibuda, na ingamangasunge na kerengua. Ani nane agu ambaro a na agu ahe nayugo gu ngbatunga kereapai re, wa ngbatunga agu ahe gbiati kekeapai nazingisa nyemu kodaba ti boro. (AEfeso 5:10-12) Kuba gure, ani namangasunge na gaani regbo ka manga wenepai. Gu bakere wenepai kisusi rengbe ani ka mangaha nga kaa tungusapa Kindo fu aboro dedede na kini sa yo ni abawiriki na kini undo yó i gbia bata. (Matayo 24:14; 28:19, 20) Pa manga ani weneapai nakoda mbakadatise tipa agu adunguratise nga ga aKristano na kini ndu kupati ni, kodabee kurogo gu sunge ani amangaha rogo zegino dunduko, ngerafuo gaani aBambu Kindo, na kini ngerefuo agu aKristano adunga gene beyo ya.
11. (a) Wai Davide anaamanga gupai ko aatungusaha tipa pazereda? (b) Gine rengbe oni ka mangaha ka ‘gbata zereda’ rogo dungurati?
11 Davide amoi wene kpiapai rogo gbata gene zereda. Ko aduna mamu beko bara ue ka imo Saura. Ti agu aregbo ue re, ko aaidanga ka ta kpata te, na kusa, ko afura rogo pa irisa na gu bakindo re, na kini asadi i mangi pazereda naako. (1 Samuere 24:8-11; 26:17-20) Ginipai rengbe ani ka mangaha areme ho du apai ni wa si nika gbarasapa gu zereda nga ga dungurati? Si naida ani “gbáta zereda, ki dusia ha.” Sidu, ka ani bi gupai nga gaani pagume dagbarani na kuarani idipase ima gbera, si naida ani irisi fugo Yesu nga gu nayaa: ‘Mo mbakadipai dagba ro na wirinamo.’ Fuo gure tie, ani ki ndu kumbatayo na gu kura apapara ndikidi irisombori.—Matayo 5:23, 24; AEfeso 4:26.
Gunde ti Mbori Naye na Amaku
12, 13. (a) Gini apai agu aboro nagunde ti Mbori wa du rago re agbia ngbarago behe? (b) Gini bakere mosoro ruru airisimbori nika gbia ngbarago behe barambeda?
12 “Bangiri Yekova du ti ruru aboro, tuko ni haha ha tipa gayo kpe ku ari.” (Atambuahe 34:15) Gu kekeapai du tipa ga Mbori mangaapai na Davide nayugoho nga agu afugo re nga kina rengo. Areme, ani nagbia bakere ngbarago gbiati gu zereda nga ga kpotoseyo bambiko ani ini gupai nga Yekova nasinzirirago asinziri auru rani. Ani naa kido ya ko nikaa mangapai amanga ti aregbo dũ tipa gaani azingo, zavura ho du ani ni rogo bakere fudifudiapai vurũ. Ani ima ino gupai nga, mbembedii kumbatayo, ndikidi airisimbori nika gbiatiyo agbia na gu zubohe nga ga Gogo boro Magogo na “gu bakere iiriwo rago nga ga Yekova.” (Yoere 2:11, 31; Yezekere 38:14-18, 21-23) Ka ani vura gbiatirani na kina ginipai, agu apai Davide agumbaha naye re, si nika manga tipa rani, nga: “Ho ruru aboro napaa ni ku ari tipa undahe, Yekova nagia ha agia, ki batasi yo be agu apai nafuda yo dunduko.”—Atambuahe 34:17.
13 Nairiwo wai si ka ngba ti gu regbo re ka bi wai Yekova nataasirimoko duna bakere paha! Ani aduna bakere kiki ti gu regbo re gbiati irisa tipa Yekova susi gu nidumbata, ono tipa agu aboro nga asogo rani, gu regbo re nikangia regbo digido gayó raka, bambiko Ziazia Kekeapai nayaa: “Kpakpu Yekova du kuti amangi gbigbitapai, ka gbandaka tingida pa yo zegino.” (Atambuahe 34:16) Nangbaa gu bakere mosoro re nga ka bi gupai nga Mbori nabatasa aboro ngba gi gene re i rimi kurogo gako vovo zegino!
Agu Akidohe Nasa Rani Ani Hipai
14. Gine nika undo rani ani hi kereapai ka si vura nge wai vurũ?
14 Pa nye ani kaa irisa fugo Yekova kindi rogo gi iraira zegino hi be kereapai re naida ani duadu a na hipai. Gunde ti Mbori nafu bakere undo furani tipa ani du na giasangbaa. Wa duhe nga ani naraka ti kere regbo, gu kura ga Yekova amoyambu nagbiatiyo agbia na kereapai nga gu nafuda yó ngbaduyó yo na ki zeresi kpotoyó yo, a wa si adu nga wo apai nikaa manga. Ono tie, i rengbe kadu naa kido rogo apai dunduko ya ka i aakido kuti Yekova, ko aundo yó aundo i hipai. Afugo Davide nafu ndikidi wasa. Si nayaa: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.” (Atambuahe 34:18) Davide agumba gupai nangarasa rani berewe ki yaa: “Gbigbitapai namanga ruru boro ngenge; ono Yekova nabatasa ni be he dunduko.” (Atambuahe 34:19) Ka kereapai vura nge wai nga gu namanga rani, Yekova ima nyaka ka batasa rani.
15, 16. (a) Gini agberango Davide aini paha ngbutuko fuo ko sari gu bia nga Atambuahe namba 34? (b) Gine nika undo rani ani hi aʹasada?
15 Ngbutuko fuo Davide sari abia Atambuahe namba 34, ko agipa gu gberango nati kurii araki Nobo yo ho Saura aimi yó ni gbiati badungu aboromotumo. Nairiwo wai si avura gbera tiko ka tingida gupai nga, gu kpio yó re aye mbiko ko andu ku Nobo yo si ki zingisi ngbadu Saura! (1 Samuere 22:13, 18-21) Zanga kapa, Davide aima fu kpee fu Yekova tipa undo, na gu maabangirise ko adu nani tipa gu zingabekpio du tipa “ruru aboro” aima fu wasa fuko.—Amokedi 24:15.
16 Areme, gu maabangirise du ani nani tipa zingabekpio, si nafu wasa afu furani a. Gupai ini ani nga, anga pai ho avura rani narengbe ka mangaha na ani nga gu nika gberesa parani nyeanye kindi te. (Matayo 10:28) Davide agumba apai wakina gure rogo agu afugo naye re: ‘Ko nabanda ameme [ruru boro] dunduko; anga gu sa kiti te.’ (Atambuahe 34:20) Digisidigisi gu veresi re nzunzu amangi tipa Yesu. Wa si avura du nga i aimi Yesu ngba kere gene, memeko “akita nga wa sa te.” (Yoane 19:36) Rogo kura digisidigisihe, Atambuahe 34:20 nakido rani na gupai nga, ka mbedimbedi aKristano gbiati “kura akandoro” vura du kina rogo gini aʹasada, apai agberanga kubara yó yo nyeanye kindi te. Ka pepai nimasaku, he ho nika kita memeyo te.—Yoane 10:16.
17. Gini gberango napido agu aboro asanga gayó berã ya nasoga ga Yekova aboro?
17 Tipa gbegberẽ aboro, agu apai du tipa yó, si tigaha kia. Ngbutuko kumbatayo, i nika ke gu gbegberẽ apai i aʹuruguhe. “Gbigbitapai aimo gbegberẽ aboro; i agbarasa ngbanga fu agu yo nasoga ruru boro.” (Atambuahe 34:21) Agu aboro dunduko nye kuti sogote ga Mbori aboro nangera bangiriyo na gu gberango nikaa enga manga ya. Ho i ka yugo Yesu Kristo ni, i “nikahi mbusa nga nyenye gbarasa yo.”—2 ATesaroniko 1:9.
18. Rogo gini gene i naima batasa “bakere rimbasa aboro” wa du rago re, na gine i ka gbiaha kumbatayo?
18 Ga Davide Atambuahe nadigo na agi afugo kido re: “Yekova natumo unga avuruko; a nga gu ni sa nafu tini ku be ko i ka gbarasa ngbanga fu ni te.” (Atambuahe 34:22) Ti digido ga Bakindo Davide zogarago nadi agarã 40, ko ayaa: “[Yekova atumo] mbisimore be imisiri apai dunduko.” (1 Abakindo 1:29) Wakina Davide, regbo ima mbeda fu agu aboro nagunde ti Yekova i ngere kusayo na kidu na ngbarago bambiko i ima batasa yó be ingapai na be aʹasada dunduko. Wa du rago re, dungu mbedimbedi aKristano aima gbia gayó mosoro nga ga raka ngbangbaturũ yo. “Bakere rimbasa aboro” dagba rikaaboro dunduko nakoda tiyó na yangara awirina Yesu kutingba mangasunge fu Mbori na nisangbanaha, i kini gbia ngbarago bambiko payo nigigirihe barabangiri Yekova. Si wo bambiko i na idapase kuti kure Yesu nauka tipa tumo aboro. Ti regbo gu ga Yesu Zogarago Tipa Agarã Kutu naye re, i nika mangasunge na gu undo naabaha du ti gu motumo tumorii re tipa yo, kini sa yo i du nirengberengbe aboro.—Yugoti 7:9, 14, 17; 21:3-5.
19. Gine “bakere rimbasa aboro” nadiberã ka mangaha?
19 Tipagine agi amaku re dunduko nika ye ti ni fu “bakere rimbasa aboro” nga airisimbori? Si nika duwo mbiko i ima diaberã kaa gunde ti Yekova kindi, kini mangisunge fuko na kiki na kini gisangbako. Nirengo, gunde ti Yekova naye na ngbarago furani wa du rago re na kini undo rani ani kakuti “gu unga nga ndikidi unga,” nga nyenye unga rogo ga Mbori vovo zegino.—1 Timoteo 6:12, 18, 19; Yugoti 15:3, 4.
Oni Natingidaha?
• Tipagine si aida ti ni ani gunde ti Mbori, na gine nga gunde ti Mbori?
• Gine pa gunde ti Mbori aida si mangihe na gaani sino mangaapai?
• Gini amosoro du ti gunde ti Mbori?
• Gini akidohe naundo rani ani hi fudifudiapai?
[Gu kpiahe du ti kpewaraga 29]
Agu aboro nagunde ti Yekova namangapai na rugatise ho irangbii azahe ni ti gayó sunge
[Gu kpiahe du ti kpewaraga 31]
Gu bawenepai kisusi rengbe ani ka mangaha fu akuarani nga ka pe gu wene pangbangaa nga ga Kindo fuyó