Aboro Nagbatagene ka Gbia Ndikidi Akaragapai
Wai rengbe mi ka banda kpotore be akaza?
Ginipai rengbe mi ka mangaha tipa ka sa gaani ramukporo si du na ngbarago?
Ginipai ka mi mangihe tipa ka i mbunga re ti sunge ya?
YA MO oni asananga sanahe dagba agu asanahe re? Ya mo oni agbia ndikidi akaragapai kuti ni nga gu naundo roni nirengo? Rogo agarã dunduko, abuku wa 2,000 i akusaha nga gu nafu arugute riipa agi apai re na riipa gu kura nyanyakipa apai. Ringara aNgirisi yo nisaha, agu aboro nageda abuku natumo marã wa 80 amirioni aginia rogo marã aNgirisi (nga adorari 150 rogo marã Amerikani) rogo agarã dunduko ka ngbeka abuku nani, nga agu abuku nafu arugute riipa wai rengbe boro ka diabe gu kpakaraapai nga ga raka. Amerika yo tigaha, agu abuku du tipa boro undo tiní nani nisani i abagaha, si nakusa marã nga 600 mirioni adorari rogo marã Amerikani. Anga kina roni sa nagbata arugute tipa agu apai nga ga raka te.
Nibipa gu bazagino arugute du rogo agi abuku re, bake abuku sa ayaa: “Dungu vovo abuku nagumba kina agu apai aboro aima kehe mbata.” Nirengo, badungu agu arugute du rogo agi abuku re nafugö kina gu tatamana du nikekehe rogo gu mbaku buku i aima kehe bakuruyo. Anga kura buku ho rengbe na arago dunduko kisusi gi buku re te. I asa paparaha watadu si naabaha dunduko kurogo afugo 2,400. Bange gu buku re dunduko nga gu i nakusihe rogo zegino, si nga 4,600,000,000 (abirioni biama na sita kama amirioni kuriihe). Gi buku ani afura tipaha re, si nga Ziazia Kekeapai.
Ziazia Kekeapai naya ziazia wee: “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai.” (2 Timoteo 3:16) Ka pe rengo, i aakenga Ziazia Kekeapai si du gbua nigu buku boro aundo tiní nani nisani te. Gu bambata ndupai i akehe ti ni nga ka yugopa gupai Mbori akpinyemuhe tipa ngbatunga aboro. Wa vura duhe wo, Ziazia Kekeapai na dungu apai rogoho tipa ka yugo wai rengbe ani ka sovura kuti agu apai nafuda rani nga aboro na ki dibehe, na si nakido agu aboro namanga gaha arugute ya i agbia undo agbia tipa tiyó. (Yesaya 48:17, 18) Ho aboro amangasunge ni nani, gaha arugute nafu undo afu, zanga bipa ngbatunga boro, gani sino mangaapai watadu gani wirikapai nga ga sukuru.