Aboro Nagbata agu Arugute Rengbe ka Undoyo

KANGIA oni nagbata arugute, zingoho ti ni te. Agu abasunge nakusa agu abuku nafu arugute tipa boro undo tiní nisani, si nazugo kina kumbatayo. Agu abuku re aboro amanga pa ngbehe gbe rogo agu aringara duwa Latin America, ringara aNgirisi, Japan, na Amerika. Gi mbakadapai re ima ngba ti aboro mbiko i nakusaha a rogo avidio na terevizioni, na i kini mangi adunguratise a tipa kaa sakapai tipaha. Gupai ngbaha ti ni ti aboro gbe nga i naya tipaha wee si nasa gupai nga boro mbakadi gupai du tipa ní nisani zanga ní sana kura aboro asana tipa rugute. Agi arugute re riipa gini apai?

Si riipa agu apai duwa gupai nafu ngbarago fu boro, gbata boro gu kurani ní aida ka manga rogatise na ní, gbiati raba agude, na si du dagba agu apai ngba ti aboro gbe. Gu kura apai berewe agi abuku re afura tipaha nga sovura kuti gberarago na ki dibehe, sovura kuti rungo, na sovura kuti gu gberarago zi boro mbiko gupai nga i mbutiyo na gani badiarogatise. Berewe a, agi arugute re nafura tipa mbu bakere rihe, mbu vugundö, na mbu bakere mbira buda. Ya mo agu arugute re rengbe ka undo boro? Ii, si naaundo aundo ti kura aregbo, angianga dedede ya. Wa duhe tie were, si nipatatamana ani idi kuti gupai Ziazia Kekeapai agumbaha kini yaa: “Zangainahe naida pa apai aida dũ, ono bangbasia nawisiga pa gani nduge wenengaĩ.”—Asanza 14:15.

Agi abuku nafu arugute tipa boro undo tiní nisani re, si kia ti agu abuku nayugopai tipa dia kpia aboro, tipa banda marã, watadu tipa wirika fugo-aboro. Kiingo geno agu abuku re te, na si rengbe arengba ka undo boro ní inipai nisani angianga ka inoho kina ba wirikapai yo ya. Agu abuku nafu arugute tipa boro undo tiní nisani, singia si nafura tipa sunge bagaahe, tipa rogatise, tipa sonosa agude, watadu tipa agu akaza nga ga berã, si tigaha kia. Si nafura dedede tipa wai si aida boro naaraka watadu kaa berã kia. Sidu, si naida boro sana tiní ki yaa: ‘Da nga gu boro nafu agu arugute re? Wari ye ní ni nani?’

Anga aregbo dunduko agi abangbasia abafurugute re naamaamburu gi gayó arugute re rii wene gopai te. Gu kurayo nafu kina agu arugute ngba ti aboro, sidu, i kini kusi kina agu abuku i ka gbia bakere marã ti ni. Rogo kura ringara sa, agi abuku re nakusa marã rogo garã sa susi adorari abirioni muambe!

Ya Mo agu Abuku re Nafu Undo Afu Nzunzu?

Aboro naageda agu abuku re tipa ka gbia agu arugute rogoho rengbe ka undoyo. Ono tie, kura aregbo kinaho boro ageda agu abuku re ka ní abingo agu arugute rogoho rengbe ka undo ní nzunzu ya. Gu kura agu abuku re nayaa: ‘Ka mo moi gupai ku berãro yo nga mo nika gbia undo agbia, mo gbiaha agbia. Ka mo aida marã, wene kpotose, watadu wene bakure, mo rengbe arengba ka gbiaha ka mo du naa kido.’ Ya mo ngbatunga agu arugute re rengbe ka undo boro? Ya mo si rengbe ka undo roni oni dibe agu apai nafuda roni?

Ani furanga tipa agu abuku nafura tipa pa bakure na tipa ramukporo, nga agu abuku moipai rogo zegino. Ya mo si naundo aboro i sa gayó ramukporo si du niwenehe? Si naundongo aboro ti aregbo dũ te. Abuku nafura tipa nyemuse i akusihe Latin America yo afura tipa wai rengbe boro ka zio wene bakure, na kadu niiriiri boro. Bake agu abuku re ayawee, gu boro nazio tiní kurogo gu bakure andunga wenengai ya, gure nga ní nasamungu kuti tiní. Fugoko ayugu gupai nga, si naida boro asadi tiní ka manga gupai rengbe ka sa ngbarago tiní, angianga ka ino agu apai nafuda ní na ki asadi tiní ka mbakadaha ya.

Kina rengo du nga, agu abuku nafu arugute tipa boro undo tiní nisani, wene arugute kina rogoho. Ono tie, gbegberẽ arugute nidu kina rogoho a. Bafurugute rengbe arengba ka fu wene arugute riipa kurapai sa, ono ki fu agu arugute riipa kurapai rengbe ka ziga kina we ti apai. Si rengbe kadu nigasigasipai tipa boro ini gu rugute nzunzu si aida ní mangipai kuti ni. Gada rugute si aida oni kido kuti ni? Oni sananga tironi ki yaa: ‘Ya mo i awisigi gu rugute wenengai i afuhe re, watadu si gbua nga gupai gu bafurugute re aberẽhe nga si rengbe arengba ka undo boro? Ya mo nyemu marã du watadu pa worimo nasa gu boro re ní ke gu rugute re?’

Buku sa nga Ziazia Kekeapai, si aima undo aboro tipa bagbanga regbo. Si nafu badungu arugute rengbe ka undo boro, nga agu arugute agu abuku naafura tipaha ninaafu arugute boro undo tiní nani, gbiati gu kura arugute a. Ziazia Kekeapai ima sa badungu amirioni aboro i mangipai kuti gu rugute nayaa: “Oni dú ni vovo roni rogo gu toro yo nga ga gaoni berã, ki ukadi gu vovo boro.” (AEfeso 4:23, 24) Ziazia Kekeapai nagumbapa agu apai naye na fudifudiapai kuti rani, na si nagumbapa wai rengbe ani ka diabehe. Si nape ndu gupai furani a si aida ani naamanga rurupai ti ni. Gu papara kekeapai naye fuo gere nika yugo agu apai furani si agumbaha.