Oni Gisangba Ga Yekova Ababanda Akandoro

1, 2. Tipagine duhe ti ni ni nyanyakipa pai nga Yekova naringbisapa tiko kuti babanda akandoro?

YEKOVA naringbisapa tiko kuti babanda akandoro. (Yeze. 34:11-14) Gipai re ni nyanyakipa pai mbiko si naundo rani ani rugutirani na wai du Yekova. Gu boro nabanda akandoro gani sunge nidu nga ka ngerafuo ra na ka bi gupai nga ami dunduko wenengai. Ní nandu na ami ku rogo gu ba du na wene nvuo gbiati gu ba du na ime rogoho (Tam. 23:1, 2); ní nangerafuo ra uru na yuru (Rk. 2:8); ní nabanda ra be guhe ka zubo ra (1 Sam. 17:34, 35); ní natinda agu awira ami navungu ra (Yes. 40:11); ní nagbata agura ingi na kini undo agura du na aro tira.​—Yeze. 34:16.

² Wa duhe nga gu ga Yekova aboro naadu mbata anaaraka rogo agu aba aboro anaazoga anya rogoho na kini sopo bino, i aima rugatiyo wenengai na pa nyaka gupai Yekova aaringbisapa tiko kuti babanda akandoro ti ni. I aima ino gupai nga akandoro naida aida i ningerefuo ra na kini banda ra tipa ami zugo. Kina gu bangisapai re si aidaha tipa aboro rogo toro yo. (Mk. 6:34) Ka boro adunga ho nangera wenengai fuoyo rogo toro yo na kini ngbe fuyo ku mbatayo ya, i ima rengba ka rungo. Pai ima rengba ka mangayo na ki sayo i ingi na ki gbataka “wa agu akandoro adu nga babandara ti ra ya.” (1 Aba. 22:17) Ono tie, Yekova nangerafuo agu azingo nga ga gako aboro rogo nyemuse yo.

3. Ginipai ani nika wisigoho rogo gi kekeapai re?

³ Ani ima rugatirani a na pa wai du Yekova ni babanda akandoro ti gi gaani regbo re. Ko nangera kindi fuo gako aboro duwa akandoro. Ani wisigingo wai ko aruga gako akandoro areme na kini mbisi gaami azingo. Ani a nika wisigopai a tipa wai si aida akandoro ni karagapai kuti wai Yekova angerafuo ra rogo nyemuse yo.

BABANDA AKANDORO SIA KURA ABORO I UNDO KO

4. Ginipai Yekova amangihe tipa ka ngerafuo gako akandoro?

⁴ Yekova asia Yesu ko du ni Barii dungurati nga ga aKristano. (Ef. 1:22, 23) Nidu Yesu ni “wene babanda akandoro,” ko nayugo kina gu nyemupai du Bako na ni, gako ringbisapai, na asinoko. Yesu ‘abagi kpioko tipa gako akandoro.’ (Yo. 10:11, 15) Nairiwo gu undo aboro agbiaha ti ga Yesu motumo re! (Mt. 20:28) Nirengo, ga Yekova ringbisapai du nga “gu ni ka idipa ko ni kpinga te, ono nyenye unga duadu be ni”!​—Yo. 3:16.

5, 6. (a) Ada Yesu nasia yó i ngerefuo gako akandoro, na ginipai rengbe akandoro ka mangaha tipa ka gbia undo ti gi mbakadapai re? (b) Gini nyanyaki ndupai si aida ani gisangba abaakumba ti ni?

⁵ Ga akandoro karagapai nga gine fu Wene Babanda akandoro nga Yesu Kristo? Ko aya: “Gimi akandoro nagia fugore, mi ini ra, ami ki nipeke re.” (Yo. 10:27) Si naida ani degaturani fu Wene Babanda akandoro rogo apai yo dunduko. Gipai re nakoda giasangba agu ababanda akandoro ko nasia yó du kutii beko. Yesu ayugu gupai nga gako amokedi gbiati gako abawiriki nika ndu ku mbatayo na gu sunge ko asi mburuhe. Si adu nga i nikaa ‘ruga’ na kini ‘rigi gako akandoro.’ (Mt. 28:20; oni gedi Yoane 21:15-17.) Wa wene pangbanga aagbandaka na abawiriki kini nge kina ku mbatayo, Yesu amangi mbakadapai tipa agu aKristano nyaki rogo toro yo ngerefuo akandoro.​—Ef. 4:11, 12.

⁶ Ho Pauro afura ni fu agu ababiapai naadu rogo gu dungurati naadu rogo bambata sa kama agarã Efesa yo, ko aya fuyo ziazia toro nasia yó i “rígi ga Mbori kanisa.” (Amo. 20:28) Kina gu bangisapai re du tipa agu ababiapai du areme, mbiko i nasia yo ringbisihe kuti agu arugapai du rogo Ziazia Kekeapai. Sidu, ka ani agisangba abaakumba gure nga ani nayugo gaani irisa fu Yekova gbiati Yesu nga agu ababanda akandoro ue kiipa yó gbe. (Rk. 10:16) Nirengo, gere nga gu nyanyakipa pai si aida ani ra nigorani ti ni fu abaakumba. Ono tie, kura nduapai kinaho si aida ani degeturani ti ni kuti gayo arugute.

7. Waigu abaakumba aundo rani tipa ani du na wene pagume na Yekova?

⁷ Ho abaakumba afu arugute ni fu akurayo aidipase, i nangarasa yó na kini fu agu arugute du mburuhe rii Ziazia Kekeapai. Anga ndu fuyo agu arugute re nga i naida awirinayo nimangi apai wai i aidaha te. (2 Kor. 1:24) Kuba gure, si tipa ka fu agu arugute nga ga Ziazia Kekeapai fuyo tipa si undoyo i mangi wene siapai na kini mangiapai ni ruruhe rogo dungurati na ki ye nazereda. (1 Kor. 14:33, 40) Abaakumba ‘nangera tipa pa mbisimorani’ rogo gu gene nga i na nyemu ka undo aboro ni basasa rogo dungurati i banda gayo wene pagume na Yekova. I barambeda tipa ka undo gu wirina naida ka ingapai watadu gu ní ni ima “ingapai.” (Gara. 6:1, 2; Yuda 22) Anga agi apai re nga wene nduapai tipa ‘giasangba gaani abaakumba’ te?​—Oni gedi AEbere 13:17.

8. Waigu abaakumba abanda ga Mbori akandoro?

⁸ Gu babanda akandoro nangia Pauro akepai fu agu aKristano naadu Korosai yo ki ya: “Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.” (Koro. 2:8) Gi zahe re nafu gu kura ndupai furani si aida ani degeturani ti ni kuti agu arugute abaakumba afuhe furani rogo Ziazia Kekeapai. I nabanda awirinayo be agu aboro rengbe ka gbarasapa gayo idapase. Gu mokedi nangia Petero azahe tipa “zire anebi” na “zire abayugupai” nga aguyo si adu nga i nika ‘ingisa aguyo nawo’ i mangi gbegberẽ apai. (2 Pet. 2:1, 14) Kina gu bangisa zahe re si aida agu abaakumba du awere fuhe ka si aidaha wo. Wa du yó ni agu aKristano ni ima nyaka, i na bakere inohe rogo raka yo. Kurigure, mbata fu i sia yó, i nayugoho nga i na wene giarogopai tipa Ziazia Kekeapai na i ima rẽ tipa ka yugo gupai du ni ruruhe. (1 Tim. 3:2; Tito 1:9) Pa nyaka yó rogo toro yo, du na ruru bipai, na gu tatamana du mburuhe rii Ziazia Kekeapai naundo yó tipa i nifu wene arugute fu akandoro.

BABANDA AKANDORO NARIGA RA NA KINI BANDA RA

9. Waigu Yesu arugapai rogo dungurati na kini rigi gako akandoro areme?

⁹ Yekova nafu bakere riahe furani nga ga toro vurube gako riigbu fu awirina rogo zegino dunduko. Ani nagbia badungu arugute nga ga toro rogo gaani awaraga yo. Kurigure, kura aregbo kinaho riigbu afu arugute fu abaakumba rogo dungurati rogo waraga watadu vurube agu arugute agu ababiapai ninaata ata naafuhe fu abaakumba. Ngba gi gene re, akandoro na gbia wene rugapai.

10. Gini atindiro du abaakumba na ni tipa agu aboro ni ima kparatiyo ti akurayo?

¹⁰ Sidu, abaakumba na gu tindiro beyo nga ka banda agu aboro du rogo dungurati, ka rigayo, na kini ngerefuo yó, gbe aguyo imisi tiyo watadu nawoka rogo toro yo. (Oni gedi Yakoba 5:14, 15.) Bete kura akandoro kinaho naima kpara tira ti kura akandoro na ki mbu manga agu asunge nga ga aKristano. Ya mo si aidanga bakumba mangi ome tipa ka gbata ngbatunga gu ingiingi kandoro re na ki zungadi ru tipa u karaga tiru ku dagba akurai rogo dungurati te? Nirengo, si naidaha aida wo! Yesu aya: “Baroni du ngbangbaturũ yo, sangbako nga ka gu ni kpinga sa dagba gi rukutu yo re ya.”​—Mt. 18:12-14.

SI NAIDA ANI BI AGU AINGAHE NGA GA ABAAKUMBA WAI?

11. Tipagine duhe ti ni kpakarapai fu kura aboro i gisangba abaakumba?

¹¹ Yekova na Yesu nga rengberengbe ababanda akandoro. Ono agu abaakumba Yesu nasia yo i ni rengberengbeyo te. Gipai rengbe ka saha fu kura aboro nimbumbu he tipa i gisangbayo. I rengbe ka berãha nga: ‘I nga kpakpa aboro wakina rani. Tipagine si aida mi gisangbayo ti ni?’ Kina rengo du nga abaakumba nga kpakpa aboro. Ono tie, si naida ani du na ruru bipai tipa gayo aingahe na arungbura.

12, 13. (a) Ginipai rengbe ani ka pehe tipa agu aingahe nga ga agu aboro nangbembatayo rogo apai yo? (b) Tipagine i ake gayo aingahe ti ni ku rogo Ziazia Kekeapai?

¹² Ziazia Kekeapai nafura afura tipa agu aingahe naadu ti agu aboro Yekova asiayo tipa i ngbembatayo fu gako aboro mbata kusayo. Ni kpiapai, Mbori asia Davide ko du ni bakindo na ni bangbembatayo fu aYisaraere. Ono wa si avura du wo, ko amangi bäri na ki imi boro. (2 Sam. 12:7-9) Berewe a, ani bingo gupai naadu tipa Petero. Wa si avura du nga ko anaangbembatayo rogo apai rogo bambata sa kama agarã rogo gu dungurati nangia ga aKristano, ko amangi kere ingahe. (Mt. 16:18, 19; Yo. 13:38; 18:27; Gara. 2:11-14) Fuo manga Adamu na Eva ingapai kindi, boro ho naadu berewe ni rengberengbe ní kpara kusayo ti Yesu te.

¹³ Tipagine Yekova aidihe ti ni fu abake Ziazia Kekeapai i keke agu aingahe nangia ga agu aboro ko asiayo i ningbe ku mbatayo rogo apai? Ko amangihe tipa ka yugo gupai nga ko rengbe arengba ka mangasunge na kpakpa aboro tipa i ngbembatayo fu gako aboro. Nirengo, wo du ko naamangaha. Sidu, si aidanga ani mangisunge na agu aingahe nga ga agu aboro na ngbembatayo tipa ka ruho ka kpakanahe watadu kaa basa gayo pagbia te. Yekova naida ani irisi agu awirina re na kini gisangbayo.​—Oni gedi Gate 16:2, 8.

14, 15. Ginipai rengbe ani ka wirikaha ti gu gene Yekova anaafura ngbaha na gu gako aboro naadu mbata kusayo?

¹⁴ Si ni nyanyakipa pai ani gisangba agu aboro nangbembatayo rogo apai areme. Oni berẽnga kina wai Yekova anaafura fu gako aboro ti regbo kereapai mbata kusayo. Ho aYisaraere akuru ni Ezipeta yo, Mbori anaafu arugute fuyo vurube Moize na Arona. Tipa i bati be agu agberãngbi naadu bawe, si aaida i gisangba agu arugute i afuhe fuyo. Agu arugute re angia ka ri riahe na gayo aborokporo na ki kpe kure kandoro ti ngua pangbadimo gbiati gu ngua naadu ni wagiwagi he barii ngbadimo. Anga kina Mbori ni tiko naafura fuyo nibasa ngbangbaturũ yo te. Si aaida i degetuyo fu agu abaakumba nangia ga aYisaraere yo, nga aguyo Moize afu agi arugute re fuyo. (Gate 12:1-7, 21-23, 29) Ti gu regbo re, Moize na agu abaakumba nangia ga aYisaraere yo aamangasunge tipa ka fu ga Yekova arugute fu aboro. Kina gu bangisapai re Yekova amangaha na agu aKristano nga abaakumba areme.

¹⁵ Si nawira wa mo ima rengba ka berãpa gu pangbanga du rogo Ziazia Kekeapai nafura tipa gu regbo Yekova afu arugute vurube aboro watadu amaraika tipa si batasi unga aboro. Rogo agi abangiriaba re dunduko, Mbori afu pagbia fu aboro i fura kubako. Agu aboro re anaagumbapai ni rimoko, na i anaagumba gupai si aida gako aboro mangihe tipa ka bata be akpakarapai. Ya mo anga Yekova rengbe ka manga kina gu bangisapai re ti regbo Aramegido te? A wa du sino aboro, si naida abaakumba du na rubangirise tipa gu pagbia Yekova nafuhe na ki banda tiyo ti zanga mangasunge na ni ngba iraira gene.

“RIMBASARA ADÚ ADU SA, BABANDA AKANDORO KI DU SA”

16. Ginipai si aida ani degeturani kutini?

¹⁶ Ga Yekova aboro dunduko nga ‘rimbasa akandoro sa’ du kutiibe bangisa “babanda akandoro” nga Yesu Kristo. (Yo. 10:16) Yesu aya ko nika du na gako abawiriki “ti arago dũ, ki da ti digido zegino.” (Mt. 28:20) Wangia ko bakindo ngbangbaturũ yo, ko du du na pagbia kurii agu apai dunduko nika manga mbata fu i saringbanga gi ga Satana zegino re. Ka ani aida kadu ni kodikodi rani na ga Mbori akandoro, si naida ani degeturani ka ‘gia gupai du ku giirani yo’ nayugo gu gene si aida ani ndu ngbaha. ‘Gupai’ turani agiaha re nakoda gu Fugo Mbori gako toro adu kugiipa kehe du rogo Ziazia Kekeapai na gupai aYekova na Yesu apehe vurube agu aboro du kutiibe yo.​—Oni gedi Yesaya 30:21; Yugoti 3:22.

17, 18. (a) Gini kerepai rengbe ka manga akandoro, ono gini kido rengbe ani kadu na ni? (b) Ginipai ani nika wisigopai tipaha rogo gu kekeapai ngbefuo gere?

¹⁷ Satana nata “wa bahu nata ki nipoi, nigbata boro ka rita ni.” (1 Pet. 5:8) Ko nazubo akandoro wakina zingizingi nya tipa ka gbata momu tipa ka zio guru du na rungbura watadu guru kpara tiru kusayo. Gere nga ndu gupai si aida ani du ti ni mbembedi na kura akandoro gbiati agu aboro nga ‘ababanda mbisimorani.’ (1 Pet. 2:25) Nibi agu aboro nika bata ti regbo bakere gberãngbi, Yugoti 7:17 naya: “Wiri Kandoro, nga [Yesu] . . . , ko adú ni babanda yo, ko angbé ku mbatayo fuyo koyo du agugaabi aime unga ni; Mbori awéga aume dunduko ti bangiriyo.” Gini kura kidohe berewe duho ngba kisusi gere?

¹⁸ Fuo wisigo ani gu nyanyaki sunge nga ga abaakumba, si naida ani sana tirani nga, Wai rengbe agi akumba i nasia yo re kadu na kido nga i namanga fu ga Yesu akandoro ngba wene gene? Ani nika gbia karagapai kuti gi sanahe rogo gu kekeapai ngbefuo gere.