Bakere Rungo na Nyenye Gberarago

BAMBEDA kusayo, baweteke apai sa aaida ka inopai tipa wai agu aboro gayó aboro nakpiki nidu fuo bete aregbo. Ko akedi awaraga asasanahe fu avunguagude muambe, nga aguyo awiriyo aima dia dungu agarã kusendeyo ti gu regbo re. Anga agu avunguagude re dunduko nakaragapai fuko te. Kumba sa du rimoko nga Vladimir, wiriko naima dia agarã awere bisue kusendeyo, ko ape gupai nga si kindi nikpakarapai fuko ko ukuo ngbako ka fura tipa pa gu wiriko nakpi re.a

Badungu agu avunguagude awiriyo nakpiki, i na ngbatunga gu rungo na gberarago du tipa gbanga regbo re. Agarã bawe kusayo, wiri kura kumba sa nga William arindo kutii ime yo ki kpi. William akepai ki yaa: “Pa gu wire re naimisa re kindi da ku areme, na si nika imisa re daho mi nika kpi ni.” Agarã bisue kusayo fuo wiri gu dee nga Lucy kpi be gu kaza ri aainongo nga si nika imo wiiri ya, ri akepai ki yaa: “Tingbafuo kpio wire, gupai mi anaaberãha nga, ‘Wire tigu nikina ungako, ka pai mangingo wo te. Mere ko amera kurogo kura rago. Ko nika yego ayego.’ Mi aaniberẽhe nga gbegberẽ mosumo du mi araraha nga wire kpi, ono mi nika zinga azinga rameyo. Ono tie, fuo bete regbo, mi atona ka bi gupai nga kina rengo du ngaha nzunzu nga wire ima kpi, bambiko ko ayegongo ku kporoyo te. Wire di agarã awere bisue kusendeyo, ono ho mi nidu ni nisare ti kura aregbo, mi nitingidi pako mi ki ti nikina kpee.”

Tipagine du agu avunguagude ti ni awiriyo nakpiki na bakere gberarago na rungo tipa gbanga regbo, wa aguyo nga Vladimir, William, na Lucy? Ani wisigingo bete agu apai duhe ti ni wo.

Tipagine Du Bakere Rungo ti Ni?

Ho i avunga gude ni kporo, ba gu gude re na nai nagbia gu ngbarago kura boro arengbanga ka fuhe fuyó ya. Ho i atinda fogo wiriyo ni, kini bi ru u nira, watadu kini bi ru u nimomu ti ngbaru, si nasa bakere ngbarago tiyó. Agu avunguagude nakpinyemu awiriyo, i nabiyo na nyanyaki payo. I naraba yó gayó sino mangaapai du niwenehe dagba aboro. (1 ATesaroniko 2:7, 11) Fuo i sono mbiko gi asadatise nga ga avunguyo re, rago nangba ti avunguyo bakere gbe, si ki sa gupai nga i tona ka berãpa gu kura apai berewe rengbe agi awiriyo re ka mangaha kumbatayo.

Agu avunguagude naberãpa awiriyo, i namangasunge nyanyakii tipa ka ngerafuo awiriyo wenengai. I rengbe ka tona igo marã tipa yó watadu ka rũko ahe wa manga-india, ndimo, buni, na ki mangi gu kura apai tipa si undo awiriyo i rengbe ka maa kpuyo nisayo kumbatayo fuo sona yó. (2 AKorindo 12:14) Gi bakere nyemuse avunguagude ayugoho tipa rukutu awiriyo, na gu regbo na marã nagbera beyo, na agu ahe dunduko i mangaha tipa si undo awiriyo re, si nayugo bangisapai sa nga, aboro nasonosa awiriyo i raki, angianga i kpiakpi ya. Ho gude akpi ni, gure nga ndu gupai i aasonosa ru ti ni anyasanga te, na gu maabangirise avunguni adu nani, si kini digi. Si ki ta du were, gure nga kpio digisi gu bakere nyemuse du avungugude nani tipa gu tooni wiriyo re. Na kurigure, gu nyemuse nadu tipa wiriyo, sunge ti ni berewe te. Avungu gu gude re kini du na gu bakere rungo gbiati gberarago kaa gonga niipo ya.

Ziazia Kekeapai nayugo gu rengo nga, agu avungugude wiriyo nakpi, i nambu be gu gberarago na rungo kaa gonga niipo ya. Ziazia Kekeapai nafura tipa pa gu regbo gu iriiripa bakumba nangia Yakoba agi gupai nga i aima imo wiriko nangia Yosefa. Si nayaa: “Yakoba ki sipi gako roko asipa ki nivo kina mbuzaroko dimoko, ki nikpari tipa wiriko tipa dungu arame. Agu awiriko nangia akumba dunduko na agu yo nangia ade i ki mo ka ngarasa ko; ono ko aka pa ngarasa ko. Ko ki ya, ‘Oõ, mi andu ku murã yo na kina kpe wire.’” Fuo agarã kusa, Yakoba aarungo kindi tipa wiriko, nga guko ko aberẽhe tigako nga ko aima kpi. (Bambata Pai 37:34, 35; 42:36-38) Gu kura kpiapai berewe du rogo Ziazia Kekeapai, si tipa gu dee nangia Naomi, nga guri naaraka na rungo kpotoriyo mbiko agu awiiri ue nangia akumbagude nakpiki. Mbiko gu bakere gberarago ri adu nani, ri aidi ka aria rimori ti Naomi, kuti Mara. Gu rimo nga Naomi, rogoyo nga “Gimi Zereda,” ono Mara, rogoyo tigaha nga “Hihii hee.”—Ruta 1:3-5, 20, 21.

Ono tie, Ziazia Kekeapai afuranga sa tipa kina gu gberarago avungugude nidu nani ho wiriyo akpi ni te. Ono si nafura afura a tipa wai Yekova anyakasa agu aboro narungo tipa pakpio gayó aboro. Rogo gu papara kekeapai naye fuo gere, ani nika wisigo agu agene Yekova afu wasa ngbaha fu agu aboro narungo wa gure.

[Gu rukutu kekeapai du bandu kpewaraga yo]