Gu Undo Naye be “gu Mbori Ninaafu Hipai na Wasa”

AGARÃ wa 2,000 kusayo, gu bake Ziazia Kekeapai nangia Pauro afura tipa Yekova ki yawee ko nga “gu Mbori ninaafu hipai na wasa.” (ARomo 15:5, NW) Wa duhe nga Ziazia Kekeapai napehe furani ki yawee Yekova Mbori aʹarianga sinoko te, ani rengbe kadu naa kido nga ko nafu wasa afu kindi fu agu aboro nairisoko. (Yakoba 1:17) Nirengo, Ziazia Kekeapai nayugo gupai furani nga Yekova nafu wasa ngba dungu agene fu agu aboro duna zingoho. Gini bete agene ko afu wasa ngbaha? Mbori nanyakasa agu aboro nakpara fuko tipa undo. Ko nafõngbadu ndikidi aKristano yo a i fu wasa fu akurayo aidipase. Na Yekova nafu gu pangbangaa furani nafu ngbarago, nga gudu rogo Fugoko nga Ziazia Kekeapai. Na si rengbe ka nyakasa agu aboro gbe narungo tipa pakpio wiriyo. Ani wisigingo agi angbatunga wasa du biata re nibasasa.

‘Yekova Agi Pani’

Bakindo Davide akepai tipa Bakusirani nga Yekova ki yaa: “Oni nikída kuti ko na arago dunduko; oni úka kpotoroni yo ku bara bangiriko; Mbori nga bagbuko fu rani.” (Atambuahe 62:8) Tipagine Davide adu ti ni na ngbatunga gu kido re kuti Yekova? Davide afura tipa tiko ki yaa: “Gi rungorungo boro re akpari, Yekova ki gi pa ni, ki batasi ni be agu apai nafuda ni dunduko.” (Atambuahe 34:6) Rogo agu arungo dunduko Davide aaraka rogoho, ko anaakpara dedede fu Yekova tipa undo, na Yekova kini undoko kindi. Davide aima inoho ti agu apai namangi mbata ngawee Mbori nika songoda ko asongoda na ki undoko ko hipai.

Agu avungugude narungo tipa pakpio wiriyo, si naida i ini gupai nga Yekova nika songoda yó asongoda rogo gu bakere rungo du yó nani re, a wa si adu tipa Davide. I rengbe ka kpara fu Yekova, nga gu boro “ninagia kpetambuahe” na kidu naa kido kuti gupai nga ko nika undoyo aundo. (Atambuahe 65:2) William, ani nifura tipa ko rogo gu papara kekeapai ye mbata fu gere, ko ayaa: “Dedede, mi anibi gupai nga mi arengbanga ka raka kumbatayo zanga wire te, ono mi anisana Yekova ko undo re. Ko aima fu ngarasaro fere tipa mi naaraka kumbatayo kindi.” Ka oni kpari a fu Yekova rogo idapase yo, nga bakerepa Mbori nga ga ngbangbaturũ ko, ko songodi roni asongoda. Nirengo, Yekova Mbori nakido agu aboro namanga asadatise ka mangasunge fuko kini yaa: “Mi nga Yekova nga ga Mbori, nazada kumba bero; mi du naya foro, ‘Ka mo gúnde nga ya, mi aúnda ro [aundo].’”—Yesaya 41:13.

Gu Undo Ndikidi Abakure Afuhe

Gu kura aboro kinaho ninaaida ka sungo nisayo tipa ka rungo tipa pakpio wiriyo. Ono tie, tipa i niisungu nikina nisayo tipa gbanga regbo, pa patatamana ngaha te. Ringbisihe kuti Asanza 18:1, “gu ni nakpara tini,” pai rengbe arengba ka mbusa ní. Sidu, agu aboro narungo tipa pakpio gayó boro, si aidanga i ti kurogo gu gbina nga sungo nisase te.

Agu abakure nagunde ti Mbori, i rengbe ka fu nyanyakipa undo fu agu abakureayo narungo re. Asanza 17:17 nayaa: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.” Lucy, ani nifura tipa ri rogo gu papara kekeapai ye mbata fu gere, ri agbia ngbarago be gu wasa abakureari afuhe furi fuo kpio wiiri. Ri afura tipa pa agu abakureari re rogo dungurati ki yaa: “Pa dogoda yó kaa bi rani aundo rani bakere gbe, wa si avura du vurũ nga i anifura gbua tooni ti kura regbo. Gu kura nakureami sa anaaye kaa bi re ti agu aregbo mi anidu nisare. Ri aima ino nga mi kina kporoyo nakpara, na ri anaaye fuore dedede ani nikpari na ri. Gu kura nakureami anaaye fuo re na aʹuru dunduko ka ngarasa re. Berewe a, gu kurayo anaayamba rani ku kpuyo yo tipa riahe, na i kini mangihe wo kindi.”

Wa vura duhe nga gu bakere rungo avungugude nidu nani ho wiriyo akpi ni si agonga niipo te, kparakpee fu Mbori gbiati kodatise na gu ndikidi abakure nga aKristano, si rengbe ka ye na ndikidi wasa fu agu aboro narungo re. Badungu agu aKristano awiriyo nakpiki, i abi gupai nga Yekova na kina yó. Nirengo, Yekova “nahusa agu yo du na rungo kpotoyo yo, ki vodi gayo aoro a.”—Atambuahe 147:3.

Agu Apangbangaa Nafu Wasa

Kupati gupai nga kparakpee gbiati kodatise na abakure, gu Fugo Mbori du nikekehe, si nga mburu gbia wasa fu agu aboro narungo kpotoyo yo. Gu pangbangaa du rogo Ziazia Kekeapai, si nayugo gupai nga Yesu aduna bakere nyemu ka dia gu rungo kusayo du avungugude nani nizingisa ko gu boro bekpio nakpi. Na ko aima du a na ome beko ka mangaha wo. Ngbatunga agu apangbangaa re nafu ndikidi wasa fu agu aboro narungo tipa pakpio gayó boro. Ani wisigingo ngbatunga agu apangbangaa re ue.

Ruka kapita 7 nafura tipa wai Yesu andu ki gbia aboro i niye na kangba paranga kporokpee yo rogo gu gbata nangia Naina. Agu aboro re aima mbeda ka kpisido gu paranga nangia bangisa wiri dekurugbo nakpi re. Veresi 13 nayaa: “Ho Gbia abi ri ni, nungari ki nimangi ko amanga, ko ki ya fu ri, ‘Ka mo kpári nga ya.’”

Ngenga agu aboro rengbe ka za nagude ri mbu kpee tipa pakpio wiiri te. Tipagine Yesu aya ti ni furi ka ri kparingo ya? Ko agumbaha wo bambiko ko aima inoho nga gu rungo na gberarago gu dekurugbo re adu nani, si ima mbeda ka go. Gu pangbangaa re nandu kumbatayo kini yaa: “[Yesu] ki mbedi ki zadi raga: agu aboro naatinda ha ki ru aru za. Ko ki ya, ‘Paranga, ya mi foro, mo gúari.’ Gu ko nakpi ko ki guari, ki tona ka fura. Ko ki fu ko fu nako.” (Ruka 7:14, 15) Si rengbe kadu nga, ti gu regbo re, nako aima kpara berewe, ono gu kpee nga ga ngbarago.

Ti kura regbo berewe, kumba rimoko angia Yairo aye koyo du Yesu ni ki sana ko tipa ko husi gu wiriko garãri adu 12, nga guri naawoka sa kina kpio. Fuo regbo ngbutuko, pangbangaa aye fu Yairo ki yawee gu wiriko re ima kpi. Gi pangbangaa re asako ko duna bakere rungo kpotokoyo, ono Yesu aya fuko wee: “Ka mo gúnde nga ya, mo ídi kina pa re.” Ho i adani kua Yairo yo, Yesu andu nibasa koyo du kangba gu degude re ni. Ko azi ri ti beri ki yaa: “Degude, ya mi foro, mo gúari.” Ginipai namangi? Gu ‘degude re aguari nibasa kini ta.’ Ginipai avunguri amangihe ti gu regbo re? ‘Si airiwo airiwo tiyo bakere gbe,’ i kidu na bakere ngbarago. Ho Yairo na diako adungo wiriyo ni, i aduna bakere ngbarago kisusi. Si kidu bangiriyo wa mosumo du i araraha nga wiriyo ima zinga bekpio.—Marako 5:22-24, 35-43.

Ngbatunga agu apangbangaa du rogo Ziazia Kekeapai nafura tipa wai rukutu agude azingi bekpio re, si nayugo gupai rengbe agu avunguagude narungo areme tipa pakpio wiriyo ka maabangiriyo tipaha kumbatayo. Yesu ayaa: “Ragoho nada, ho agu yo ka gia fugoko ni dunduko du rogo amurã yo, ki kuru.” (Yoane 5:28, 29) Yekova aringbisi gupai nga, Wiriko nika fu unga fu agu aboro kpiki. Gu badungu amirioni agude kpiki be avunguyo, i nika “gia fugoko” ho ko nikaa ya ni fuyo wee: “Ya mi foro, mo gúari.” Agu agude re nikaa ta berewe na kini fura. A wa si adu tipa Yairo na diako, si nika ‘iriwo airiwo’ ti avungu agu agude re na i nikadu na bakere ngbarago kisusi.

Ka si du nga wironi kpi, ako, oni ini gupai nga Yekova rengbe arengba ka aria gaoni gberarago kurogo ngbarago nizingisako ru bekpio. Tipa oni rengbe ka gbia undo be gi bakere maabangirise re, si naida oni gisangba gu zungodihe bake apapara Atambuahe afuhe, nga gu nayaa: “Oni gbáta Yekova na gako ome, oni gbáta kpakpuko waragoagira! Oni tíngidi pa gako iiriwo mangaapai nga gu ko amangi, na gako iiriwo yuguyugu apai.” (Atambuahe 105:4, 5) Ii, oni naamangasunge fu ndikidi Mbori, nga Yekova, na kini irisiko ngba gu gene ko aida nani.

Gini weneapai rengbe ka manga furoni nikina ipo ka oni “gbáta Yekova”? Oni nika gbia ome mbiko kpara oni fuko, oni nika gbia wasa mbiko agu aboro nakpinyemu roni nga ndikidi aKristano, na oni ki gbia ngbarago mbiko wirika oni Fugo Mbori. Kurigure, barambeda kumbatayo, oni nika bi gu “iiriwo mangaapai” Yekova nika mangaha tipa oni gbia weneapai nyeanye kindi, oni na gu wironi kpii.

[Box on page 6]

“Oni Ye na gu Dee Kono Awiiri Ue Akpiki”

Kumba nga Kehinde na diako nga Bintu du Nigeria yo, awiriyo adu biama. Agura ue dagba agi agude re akpiki be gu béno tarambiri amangihe. Tona ti kina gu regbo awiriyo akpiki re, i narungo nikerehe tipa awiriyo. Wa vura duhe wo, pa kido yó kuti Yekova nanyakasa yó, na i nagumbapa gu maabangirise kindi nga ga Ziazia Kekeapai fu agu aboro i araka dagbayo.

Kura aboro abi gu pazereda a Kehinde na Bintu adu nani. Rogo kura uru sa, dee du rimori nga Mrs. Ukoli aya fu nakurea Bintu wee: “Oni ye na gu dee kono awiiri ue akpiki ti bangisa regbo ono ri kini tungusi gu wene pangbangaa nga ga Ziazia Kekeapai kindi. Mi naida ka ino gine nafu ome furi ri duna hipai wa gure.” Ho Bintu adani ngbadimo kua Ukoli yo, Ukoli aya furi wee: “Mi naida ka ino ndu gupai mo atungusapai ti ni kindi tipa gu Mbori naimi awiro. Mi, mo abi re re, Mbori adi bangisa wire. Tona ti gu regbo re kindi, wiri sunge naadunga tire berewe na Mbori te.” Bintu amangisunge na Ziazia Kekeapai ka gumba ndu gupai furi aboro akpiko ti ni, na ndu gupai rengbe ani ti ni kadu na ndikidi maabangirise nga gu gaani aboro kpiki, i nika zinga azinga berewe bekpio.—Amokedi 24:15; ARomo 5:12.

Fuo gure, Ukoli ayaa: “Mi naaberãha tigimi nga agu aboro nakpiko, Mbori du naimo yó. Ono awere tie, mi ima ino rengo.” Ri adiberã aDezire Yekova yugu Ziazia Kekeapai furi tipa ri ini kura badungu apai tipa agu akidohe nga ga Mbori.

[Box on page 7]

‘Mi Naida ka Undo, Ono Mi Ainongo Gupai ka Mi Mangihe Te’

Baraho du avungugude gbiati awirina gu gude kpii re ni na bakere gberarago, abakureayo rengbe kadu na kina gunde ka ukuo ngbayo ka fura. I naida ka undo agu aboro duna gberarago re, ono i kini gunde agunde nga gupai i nika gumbaha, si nika ba kina bakere gberarago berewe tiyó. Bete aberãpai gu fuuyó ho kusende re, nga gu rengbe ka undo agu aboro rengbe ka yaa, ‘Mi naida ka undo, ono mi ainongo gupai ka mi mangihe te.’

❖ Ka oni mbunga agu aboro narungo tipa pakpio gayo gude mbiko gupai gbua nga oni ainongo gupai ka oni gumbaha watadu ka oni mangihe te ya. Ka oni andu kina kandara nduge kaa biyo, si rengbe ka nyakasa yó anyakasa. Ya mo zingo gu fugo ka oni gumbaha du namanga roni? Ka oni gumba kandara gu fugo nga, “Ako, nairiwo gu gaani gude kpii were,” si rengbe ka sa yó i ini gupai nga oni naberã payo aberã. Ya mo oni nagunde agunde nga ka oni tona ka kpara, si nika kiiso gayo gberarago kina kumbatayo? Ziazia Kekeapai nayaa: “Oni kpari na agu . . . [aboro] nakpara.” (ARomo 12:15) Agu aume nauka bangironi yo, si nayugo gupai nga rago ima gberã tironi a na gupai mangi re, na si rengbe ka ngarasa agume gu gude re.

❖ Oni rengbe arengba a ka manga wiri riahe ki ndu nani fuyó. Oni rengbe ka ndu a koyo ki zundu agu asaani gbiati akozoroni i amangi riahe rogoho ti regbo kpee. Oni rengbe a ka ora gene gupai yo i aidaha. Ka oni yanga fuyó, “Mi naida ka inopa guhe zingoho amanga roni” ya. Ka si vura du nga oni nagumbaha wo nikina rengo, si rengbe ka sa avungu gu gude kpii re i berẽ gupai nga regbo beroni tipa ka undo yó te. Ono si naida oni ya fuyó wee, “Oni fu sunge fere mi undo roni ti ni.” Fuoho, oni ki mangi gu sunge ka i fuhe furoni re. Ono ka oni rimisingo tironi kurogo gu kura apai du tipa kina aborokporo watadu ka rimo kurogo agu aba du tipa kina yó ya.

❖ Gu fugo nga, “Mi ima ino wai gupai re aimisa roni,” ka oni gumbanga ha ya. Aboro namangapai nibakiakia kuti pakpio gayo boro. Ka si vura du nga gude aima nyasa beroni a, oni arengbanga ka inopa wai gupai re aimisa yó nzunzu te.

❖ Si nika dia gbanga regbo tipa agume gu gude re tona ka raka na ngbarago. Oni naaundo yó kindi a wa rengbe omeroni nani. Ho gude nikpi ni, badungu aboro niigbe ku kporokpee yo, ono si naida oni naandu andu kindi kaa bi agume gu gude re. Oni moiberã roni tipa gayo azingo rogo agu aposo na adiwi ye fuoho.a

[Gu rukutu kekeapai du bandu kpewaraga yo]

[Gu kpiahe du ti kpewaraga 7]

Agu apangbangaa nga ga Ziazia Kekeapai nayugo gupai furani nga, Yesu aduna ome beko ka zingisa agude bekpio, na ko adu a na nyemu ka mangaha wo