Oni Fu Wasa Fu Agu Aboro Duna Gberarago Tiyo
‘Yekova ambedi re mi ngarasi agu aboro dunduko nakpara kpenunga.’—YESAYA 61:1, 2.
1, 2. Ada si aida ani fu wasa fuyo, na tipagine?
YEKOVA, nga gu Mbori nafu ndikidi wasa, nayugopai fu rani ani duna nunga aboro tirani ho du yo ni rogo gberangbii. Ko nayugopai fu rani ani ‘ngarasi agu aboro duna gberarago tiyo’ na ka fu wasa fu agu aboro dunduko duna nunga. (1 ATesaroniko 5:14) Ho agu akuarani nga aidipase aida ngbatunga gu undo re ni, ani nafuhe fuyo. Ani nayugo nyemuse a fu agu aboro adunga rogo dungurati na ani ya, zavura fu aguyo adunga na wiri gopai ho nga, i aduna nyemu rani mbata ya.—Matayo 5:43-48; AGaratio 6:10.
2 Yesu Kristo agedi gu sangbanebi naye re ki ya sangbaha adigi kuti ko, nga gu nayaa: “Ga Gbia Mbori Toro du ti re, bambiko Yekova nambedi re ni nzeme mi nitungusi wene pangbanga fu rungorungo aboro; ko kedi re mi vodi agu yo ngbaduyo akua [“nyakasi agu aboro narungo kpotoyo yo,” NW ], . . . ka ngarãsa agu yo dunduko nakpara kpenunga.” (Yesaya 61:1, 2; Ruka 4:16-19) Gu mbedimbedi aKristano du areme aima ino gupai bakuru kusayo nga gi sunge re, si a tipa yo, na “kura akandoro” nakodatiyo na yo na ngbarago kurogo gu sunge re.—Yoane 10:16.
3. Ho aboro asanahe ni kini ya, “Tipagine Mbori ambugene ti ni fu agberangbii si nifudi aboro?” wai rengbe ani ka undo yo?
3 Ho gberangbii ati ni kurii aboro na i ki duna rungo kpotoyo yo, i nasanahe dedede kini ya, “Tipagine Mbori ambugene ti ni fu agberangbii si nifudi aboro?” Ziazia Kekeapai nakaragapai ziazia sa gu sanahe re. Ono tie, si rengbe ka dia gbanga regbo tipa gu boro angianga bawiriki Ziazia Kekeapai ya ni gi rogo gu karagapai re wenengai. Undo gu duho rengbe oni ka bihe rogo agu abuku nga ga aDezire Yekova.a Ono tie, ti tonatonaha, ho bete aboro abi kina agu averesi ni gbua du wa gu du rogo Yesaya 61:1, 2, rogo Ziazia Kekeapai, si nafu wasa fuyo mbiko si nayugopa gu nyemu fu wasa fu aboro du ti Mbori.
4. Waigu Dezire Poland yo arengbe ka undo degudesukuru nga guri nadu na gberarago tiri, na waigu rengbe gu pangbanga re ka undo roni oni undo kura aboro?
4 Paranga aboro, kodihe na gu sosono yo, i dunduko naida wasa. Sosono degude nadu na bakere gberarago tiri Poland yo asana gu dee ri aini ri tipa arugute. Wa gi nakureari nga guni sa dagba aDezire Yekova re aasanari rogo zezeredi sino, ri aini gupai nga, gi degude re aduna badungu asanahe riri yo gbiati gu kura apai ri akapa akapa kuti ni, ngbatunga gu du wa: “Tipagine gbegbere mangimangiapai namoipai ti ni rogo zegino? Tipagine aboro arungo ti ni? Tipagine tamere arungo ti ni nga guri nanye kubari mbiko nduri azere? Tipagine bagunda re awoka ti ni? Agu abarumbatayo du Kanisa yo naya wee wo Mbori aida si nimangi re. Ono kangia wo duhe, mi aidanga berewe kuti ko te!” Gu Dezire re afu kpee fu Yekova kukiri fuo gure ri ki ya: “Mi na ngbarago tire mbiko mo sana re tipa gipai re. Mi nika asada tire ka undo ro.” Ri agumba gupai furi nga ho ri aduni ni gude, apai adu kinaho ri anakapa akapa kuti ni nga agu apai aDezire Yekova aundo ri ri girogoyo. Ri asakirogoyo ki ya: “Mi aini gupai nga Mbori asanga aboro i naarungo te. Ko nakpinyemu yo akpi, kini idi kina wene apai naamanga fuyo, na ko nika manga bakere a’ariapai amanga bambeda auru kpotosende. Akaza, asigaro nga ga gbinza, na kpio ni agu apai nika dunga berewe ya, na agisangbaa nika raka nyeanye kindi, kina boro herẽ auru gi kpotosende re.” Agu averesi naye re, ri azaraha fu gu degude re, nga Yugoti 21:3, 4; Eyobo 33:25; Yesaya 35:5–7 na 65:21-25. Fuo gbanga sakapai na gi degude re, gari ngbarago adu niyuguyuguhe ziazia kpakpuri yo na ri ki ya: “Awere, mi ini gu ringbisapai tie du tipa raka. Oni aidaha fere mi ye berewe ka bi roni?” I atona kaa wisigo Ziazia Kekeapai na ri bara ue rogo poso.
Oni Fu Wasa fu Aboro na Kina gu Wasa Mbori Naafu
5. Ho ani ayugo gupai ni nga ani na nunga boro tirani, gine nika fu ndikidi wasa funi?
5 Ho ani afu wasa ni fu kura aboro, ngbaha angba ani gumba agu afugo nga ga nunga. Si naida ani mangi nyanyaki asadatise ka yugo gupai fu gu boro narungo nga ani naberãpa gupai aberã namanga ni, nigumba ani he na gu worofugose nga ga nunga. Ani arengbanga ka mangaha wo nigumba ani afugo nikina ngbarani gbua te. Ziazia Kekeapai naya fu rani wee ‘ani moi bangirani mbiko gaani hipai na mbiko gu wasa nga ga kekeapai.’ (ARomo 15:4) Nibi gipai re, ani rengbe ka sakarogo gupai yo funi du tipa ga Mbori Kindo ti wene regbo, na ani rengbe ka yugo gupai funi rogo Ziazia Kekeapai wai gu Kindo re nika zeresa gu fudifudiapai namanga awere. Fuo gure, ani rengbe ka sakapai nani tipa wai duhe nigu maabangirise rengbe boro ka kido kuti ni. Rogo gi gene re, ani kini fu wasa funi.
6. Gine si aida ani undo aboro i inihe tipa wa ka i gbia agu aundo nabaha naye be gu wasa Ziazia Kekeapai afuhe?
6 Tipa boro rengbe ka gbia agu aundo nabaha naye be gu wasa ani afuhe funi, si naida ni ini ndikidi Mbori, ki ini gu ngbatunga Boro nga ko, na ki ini gupai nga, gako akidohe ni gupai daada boro kido kuti ni. Ho ani a’asada ni ka undo gu boro angianga irisi Yekova ya, si adu niwenepai ani sakirogo gupai funi nga (1) Gu wasa du rogo Ziazia Kekeapai, ye he yo du Yekova ni, nga ndikidi Mbori; (2) Yekova na Tandu Apai Dũ, nga Bakusi ngbangbaturũ na kpotosende. Ko nga Mbori nyemuse na ki duna weneringise nga ga nyemuse kpaima gbiati rengo; (3) Ani rengbe arengba ka gbia ome ka hi agu apai nafuda rani re ka ani mbedi na Mbori nigbia ani ruru inohe rogo Fugo ko. (4) Ziazia Kekeapai na agu averesi rogoho nga gu nafura tipa gu kparakpara a’asada aboro agbia tiyo nani.
7. (a) Gini undo rengbe ani ka mangaha ninyakasa ani gupai nga gu wasa Mbori afuhe si “ni dungu he rogo Kristo yo”? (b) Wai rengbe oni ka fu wasa fu gu boro bi tini nga ni amangi gbegberepai?
7 Gu kura aboro afu agu awasa nga ga toro fu agu aboro naarungo nga aguyo ima inido tiyo na Ziazia Kekeapai nigeda yo 2 AKorindo 1:3-7 fuyo. Ho i naamangaha ni wo, i naanyakasa gu gumbagumbapai nga, “gaani wasa ni dungu he rogo Kristo yo.” Gi veresi re rengbe ka undo boro ni kparia gupai nga, Ziazia Kekeapai niguhe nafu wasa na kingia guhe si aida ni moiberã ni fuoho gbe. Si rengbe a ka du nimburu kura sakapai, isoke ti kura aregbo kusa. Ka boro berẽ gupai nga, gu fudifudiapai namanga ni si mbiko gu gbegbereapai ni amangihe mbata, sidu, kuba gupai nga ani saringbanga ni, ani rengbe ka ya funi wee si aduni pa wasa funi ni ini gupai du nikekehe rogo 1 Yoane 2:1, 2 na rogo Atambuahe 103:11-14. Nimanga ani sunge na agi averesi re rogo agi agene re, ani nafu wasa nirengo fu aboro na gu wasa Mbori afuhe.
Ho Zuũ Gbiati Zingo Mosoro Agbarasapa Raka Ni
8, 9. Wai rengbe ani ka fu wasa ngba ruru gene fu agu aboro narungo be zuũ?
8 Zuũ ima gbarasapa gu raka nga ga dungu amirioni aboro, nga gu zuũ i amangaha dagba aboro watadu gu nga ga vura. Waigu rengbe ani ka fu wasa fu agi aboro re?
9 Ndikidi aKristano nabanda tiyo rogo gayo afugo na rogo gayo mangaapai ka ne ngbe na kura aboro kubani rogo agu avura nga ga zegino. (Yoane 17:16) Ono i namanga beedi sunge na Ziazia Kekeapai ka yugo gupai nani nga, gi kereapai namanga awere re anyenga anye kaa rungosi aboro kindi te. Ndikidi aKristano rengbe ka geda Atambuahe 11:5 ka yugo wai Yekova aberã tipa agu aboro ngbaa zuũ tiyo watadu ka zara Atambuahe 37:1-4 ka yugo gu ngarasahe Mbori angarasa rani nani ani he dia apai ku berani ka karaga gbegberepai fu agu aboro namanga gbegbereapai fu rani ono ka kido kina kuti Mbori. Agu afugo du rogo Atambuahe 72:12-14 nayugo gupai gu Soromo Kiipako gbe, nga Yesu Kristo, nga guko nazogarago awere ni Bakindo ngbangbaturũ, aberãha tipa agu aboro narungo be zuũ.
10. Kangia oni aima digo niraki tipa dungu agarã rogo gu rago i asovura rogoho, wai rengbe agu averesi ke yo kina paha gbua re ka undo roni?
10 Kura aboro ahi kereapai ti regbo avura timburu akuraha wa agi aborovura re aasovura tipa ka zoga akurayo. I naida gu bipai niipo nga, avura na agu asangbanaha namanga tingbafuoho nga papara gu raka nga ga aboro. Gu yangarapai i aamaabangiriyo tipaha nga apai rengbe ka ngba kubarayo yo ka i oro kurogo kura ringara. Ono tie, badunguyo naadunga na diabese rogo manga gupai re te, na badungu agu aboro na’asadi ka mangaha akpiki ti regbo asadaha. Aguyo nasota ki da rogo kura aringara nabi gupai dedede gbua nga i aoro be ambara ki ti kina kube agbee. Ani rengbe ka zara Atambuahe 146:3-6 ka undo ngbatunga agu aboro re i moibangiriyo tipa gupai rengbe aboro ka kido kuti ni tigu nga ka ga kurogo kura ringara. Gu sangbaanebi du rogo Matayo 24:3, 7, 14 watadu gu du rogo 2 Timoteo 3:1-5 rengbe ka undoyo i bi apai ziazia na ki girogo agu apai namanga i ahihe re, nga, ani naraka rogo digido gi zegino re. Ngbatunga agu averesi du wa Atambuahe 46:1-3, 8, 9 na Yesaya 2:2-4 rengbe ka undoyo i rugutiyo na gupai nga, maabangirise kinaho nirengo tipa raka kumbatayo.
11. Gini averesi nafu wasa fu dee du rogo gu papara Afirika du ku Dioyo, na tipagine?
11 Ti gu regbo i aasovura rogo gu papara Afirika du ku Dioyo, dee aoro kusayo kpuri tii woro amarã-bundu naana ku pati ri wa morogumba naatitiwa. Bakere gunde azi ri gbiati gberarago. Kusa, ho gi dee re na gari aborokporo aaraka ni rogo kura ringara, kumbaari adiberã ka zo gayo waraga rogatise kuti ndiko kusayo na we, ki do ri kusayo kporo na gu mobara ri adu nani gbiati wiriyo garãko adu bawe, na fuo gure, ko ki sa tiko nibavugahe. Ho i awisigi AFiripoio 4:6, 7 gbiati Atambuahe 55:22 na ri, gbiati apapara kekeapai rogo Ngbaõbambu Sinziri na Awake!, ri agbia wasa niyangaraha na ki ini gu ringbisapai du tipa raka.
12. (a) Gini wasa Ziazia Kekeapai afuhe fu agu aboro du rogo bakere zingo mosoro? (b) Waigu Dezire Asia yo arengbe ka undo gu dee naye ka ngbeka ahe beri?
12 Zingo mosoro ima gbarasapa gu raka nga ga dungu mirioni aboro. Ti kura aregbo, gipai re nidu a mbiko vura na sangbaha tingbafuoho. Ti kura aregbo, gu mangaapai nga ga zogarago zanga tatamana, na gu ngbaduse gbiati gu gbegbere biriki du ti abazogo nakodatihe ka gbarasapa agu amosoro aboro abandaha, gipai re kini ba rungo tiyo. Gu kura aboro naadunga na dungu aũzegino beyo te. Ngbatunga agu aboro re dunduko rengbe ani arengba ka fu wasa fuyo i ini gupai nga, Mbori nakido agu aboro nangera kubeko tipa dia agu apai kusayo nafuda yo, na ko nakidopa ruru zegino a nga gu aboro ka gbia ngbarago rogoho be agu ahe kina yo amangaha nibeyo. (Atambuahe 146:6, 7; Yesaya 65:17, 21-23; 2 Petero 3:13) Ho Dezire rogo ringara sa Asia yo abi gupai ni nga gu dee naye ka ngbeka ahe beri aakpakanahe tipa gu zingo mosoro du rogo gu ringara re, ri asakirogoyo furi ya gupai namanga re, si nga papara kpia agu apai namanga rogo zegino dunduko. Pa wisigo yo Matayo 24:3-14 na Atambuahe 37:9-11 andu na yo sa wisigo Ziazia Kekeapai dedede.
13. (a) Ho rago agbera ni ti aboro mbiko agu aziree akidohe i akido yo nani, wai rengbe ani ka mangasunge na Ziazia Kekeapai ka undoyo? (b) Ka aboro aaberã gupai nga, gbegbereapai nga gopai nayugopa zanga du Mbori ti ni, wai rengbe oni ka sakapai na yo?
13 Ho aboro narungo ni tipa dungu agarã watadu ho rago aima digo ni nigbere tiyo mbiko gu zire akidohe i agumbaha fuyo, i rengbe ka du wa kina agu aYisaraere nadu Ezipeta yo nanadeganga tuyo ya “mbiko imisiri ngbaduyo.” (Gate 6:9) Ho du apai ni wa ngbatunga gure, si rengbe ka duni gupai nafu undo ka ani nyakasipa agu agene rengbe Ziazia Kekeapai rogoho ka fu undo fu agu aboro re i rengbe ka sovura na diabese kuti gu kpakarakpakaraapai du awere, na ki undoyo i ne gu irairaapai nagbarasa raka fu kura aboro nga gu irairaapai ka i arengbe arengba ka nehe rogo gayo raka. (1 Timoteo 4:8b) Gu kura aboro rengbe ka bi gu kereapai i araka rogoho wa gopai tipa zanga du Mbori ti ni watadu gupai nga ko aidanga ka ngera fuoyo te. Oni rengbe ka saka agu averesi na ni daada tipa si undo ni ni ini gupai nga, Mbori aima fu undo fu aboro ono dungu aboro adianga ha kugume ya.—Yesaya 48:17, 18.
Ho Abavugumo na Abazigizo Amanga Aboro Ni
14, 15. Ho gberango sa amangi ni, ki ba bakere gunde ti aboro, wai aDezire Yekova ayugu gupai nga, i aduna nunga yo tiyo?
14 Gberango rengbe ka ye nisangbana gu mangaapai nga ga bavugumo, ga bazigizo, ga gu we zoo rago, watadu guhe nasu wa ngumbe. Aboro rengbe ka duna gberarago tiyo rogo arago yasika. Gine rengbe ani ka mangaha ka fu wasa fu agu aboro bati be gberango?
15 Aboro naida ka ino gupai nga, kura aboro kinaho nangera angera fuoyo. Ho abomoi azubo aboro ni rogo ringara sa, dungu aboro aduna bakere gunde be gipai re. Dungu agi aboro nadu na bakere gunde re aboro akpiki sa yo, nga gu gayo aborokporo nanaye na riahe fuyo ku kporo, nangia abakureayo, aguyo azanga gayo asunge, na agu apai dunduko i anakido kuti ni ya si nanambakada bayo, paha agbere dunduko. ADezire Yekova andu fuo agu aboro nadu rogo gayo dagbarago, kini yugu nunga tipa gu kerepai namangi yo na kini peke afugo wasa fuyo rogo Ziazia Kekeapai. Dungu aboro aduna bakere tambuahe tipa gu nunga ani adu nani tipa yo re.
16. Ho gberango amangi ni rogo pavururago El Salvador yo, tipagine gu sunge tungusapai nangia ga agu aDezire nadu rogo gu rago re adu ti ni niwenehe?
16 Rogo ringara nga El Salvador, kere bazigizo amangi yo rogo gu garã nangia 2001 na tingbafuoho, nanaga dogoro ki tona ka fu wa ime auru kpotosende nga gu naimi dungu aboro. Gi dogoro re aimi paranga garãko adu 25 nangia wiri Dezire gbiati adegude ue nangia atame gu dee gi paranga re apazua ri. Navungu gi paranga re gbiati gi dee i apazua ri fuko re atona sunge tungusapai nibasa. Dungu aboro aya fuyo wee Mbori du narogodi agu aboro nakpiki watadu kpio yo angia gupai Mbori akpinyemu si mangi. Agu aDezire re adipai rogo Asanza 10:22 ka yugo gupai nani nga, Mbori akpinga nyemu ani du na ima te. I agedi ARomo 5:12 ka yugo gupai nani nga kpio aye sa ngbatunga aboro mbiko gu ingapai nangia ga boro sa, angianga si angia gupai Mbori akpinyemuhe ya. I ayugu gu pangbanga a nga ga wasa du rogo Atambuahe 34:18; Atambuahe 37:29, Yesaya 25:8; na Yugoti 21:3, 4. Aboro adegetuyo zanga keesa, gbe, mbiko gupai nga, aboro aima kpiko a sa agu adee re rogo gu gberango re, sidu i atona ka wisigo Ziazia Kekeapai na dungu aboro.
17. Ti regbo gberango, gini ngbatunga aundo rengbe ani ka fuhe?
17 Ho gberango amanga ni, oni rengbe ka kura bara gu boro naida gu undo nga ga borose niipo. Si rengbe ka ida gupai beroni nga oni yambu munganga, ka undo ni ni da bambungua yo, watadu ka manga gupai ka oni rengbe ka mangaha tipa ka ye na riahe funi na ka fu basura funi ni bi rame tiihe. Rogo gu garã nangia 1998 ti regbo ngbatunga gberango wa gure namangi Itaria yo, bakeke apangbanga abi gupai nga, aDezire Yekova ni agu aboro “nafu gu undo aboro aidaha, kini undo agu aboro narungo, zanga bipa gu pambori du yo rogoho.” Rogo kura aba, agu apai i agumbaha nisangbanebi tipa yangara arame naaye aye na bakere rungo. Rogo agu arago re, aDezire Yekova naayugo sangba agu anebi nga ga Ziazia Kekeapai yo, na kini fu wasa fu aboro na gu kidohe nga ga Ziazia Kekeapai nga gu nafura tipa ga Mbori Kindo niguhe nzunzu nika mbakada ba ngbatunga aboro.—Asanza 1:33; Mika 4:4.
Ho Boro Akpi Ni Dagba Aborokporo
18-20. Ho boro akpi ni sa kura aboro, gine rengbe oni ka gumbaha watadu ka mangaha ka fu wasa fuyo?
18 Rogo a’uru nibasasa, dungu mirioni aboro duna nunga gu boro kpii sa yo. Oni rengbe arengba ka gbia yo wa oni amanga gaoni sunge tungusapai nga ga aKristano watadu ho oni amanga gupai ni oni naamangaha rogo raka na a’uru dunduko. Ginipai rengbe oni ka gumbaha watadu ka mangaha si ki ye na wasa fuyo?
19 Gu boro re na bakere gberarago tini? Oni kuru kporo ki bi gupai nga si hi be agu agume duna nunga? Dungu apai kinaho rengbe oni ka duna nyemu gumbaha, ono gupai nyakipaha gbe nga oni duna rubangirise. (Batungusipai 3:1, 7) Isoke gupai ka vura ngba gbe nga oni yugu gaoni nunga, ki fu gu buku funi du mburuhe rii Ziazia Kekeapai nga gu nafura tipa gipai re (burosua, magazini, watadu keke kpewaraga), na oni ki ye berewe fuo ni fuo bete arame ka bi singia oni rengbe ka fu kura undo funi. Ti wene regbo, oni sana ni tipa ka wisiga wiripai na ni rogo Ziazia Kekeapai nga gu nika ngarasa ni. Si rengbe ka zeresa gupai nafuda ni na ki husi ni. (Asanza 16:24; 25:11) Oni arengbanga ka zingisa kpikpi boro wa gu Yesu amangi te. Ono oni rengbe arengba ka gumba gupai funi Ziazia Kekeapai agumbaha tipa kpikpi aboro, wa avuranga duhe nga gi regbo re nga regbo rugusa gu iraira aberã du aboro nani tipa gu kpikpiyo ya vurũ. (Atambuahe 146:4; Batungusipai 9:5, 10; Yezekere 18:4) Oni tibararoni ue rengbe ka geda agu akidohe nga ga Ziazia Kekeapai du tipa zingabekpio. (Yoane 5:28, 29; Amokedi 24:15) Oni rengbe ka sakapai tipa agu apai si ayugo, gbe, kini mangisunge na gu tingidapai du rogo Ziazia Kekeapai tipa gu boro i azingisi ni. (Ruka 8:49-56; Yoane 11:39-44) Oni gbeberã ni a kuti asino Mbori nga guko duna nyemuse nafu gu ngbatunga maabangirise re fu rani. (Eyobo 14:14, 15; Yoane 3:16) Mo sakirogo wai agi apai i ayuguhe re aundo ro na ndu gupai nasa ro mo kido ti ni kuti ni.
20 Pa yamba oni gu boro duna gberarago tini ni ye ku Bambu Kindo yo rengbe ka undo ni ni ini agu aboro nzunzu nakpinyemu akurayo na nga agu aboro ini wai ka nyakasa akurayo. Dee rogo ringara nga Sweden abi gupai nga si angia gupai ri aima digo nigbataha rogo gari raka nabaha.—Yoane 13:35; 1 ATesaroniko 5:11.
21, 22. (a) Ginipai si akpinyemuhe berani ka singia si naida ani fu wasa fu boro? (b) Wai rengbe oni ka fu wasa fu gu boro ima ino Ziazia Kekeapai wenengai?
21 Ho oni aino gupai ni nga boro gu duho na nunga, singia ni rogo gu dungurati nga ga aKristano watadu ni rogoho te, oni nizanga ruga tironi ti kura aregbo na pa gupai ka oni gumbaha watadu ka mangaha? Gu pa-Giriki i asaha dedede nga “wasa” rogo Ziazia Kekeapai, ndikidi rogoyo nga “yamba boro kurani ni ye ka sungo pati ni.” Padu oni nindikidi afu wasa nayugo gupai nga, oni nandu ka biko agu aboro duna nunga.—Asanza 17:17.
22 Ginipai ka oni mangi ka fu wasa fu gu boro ima ino gupai Ziazia Kekeapai agumbaha tipa kpio, tipa tumorii, na tipa zingabekpio? Kina boro padu boro na gu bakureani du ni na ni ti bangisa ida nafu wasa funi. Ka gu boro duna gberarago tini re aida ka fura, oni degeturoni wenengai. Ka oni berẽnga gupai nga si naida oni mangi gumbapai ya. Kangia oni nika geda averesi, oni bihe ni agu afugo nga ga Mbori nangarasa roni tibararoni dunduko ue. Oni gumba gupai nga, wa du oni dunduko tibararoni ue, oni na nyanyaki ida kuti gu kidohe re. Niyugo oni gu nunga nga ga sinombori na nigumba oni gu kikiipa arengo du rogo Fugo Mbori fu aboro, oni rengbe arengba ka undo agu aboro duna gberarago tiyo i gbia wasa gbiati ome be Yekova nga “Mbori wasa dunduko.”—2 AKorindo 1:3.
[Gu rukutu kekeapai du bandu kpewaraga yo]
a Oni bi agu abuku nga Gu Inohe Nandu sa Nyenye Unga, kapita 8; Reasoning From the Scriptures, kpewaraga 393-400, 427-431; Is There a Creator Who Cares About You?, kapita 10; na gu burosua nga Does God Really Care About Us?
Waigu Oni Asakarogoyo?
• Da dungu aboro abira ni tipa agu agberango namanga, wai rengbe ani ka undo yo?
• Ginipai rengbe ani ka mangaha ka undo kura aboro i gbia undo wenengai be gu wasa Ziazia Kekeapai afuhe?
• Gini apai nafu gberarago fu aboro rogo gaoni dagbarago, na wai rengbe oni ka fu wasa fuyo?
[Gu kpiahe du ti kpewaraga 31]
Bataya nga ga agu aboro oro kurogo kura ringara: UN PHOTO 186811/J. Isaac
[Gu kpiahe du ti kpewaraga 31]
Gumba gu pangbanga nafu ndikidi wasa ti regbo fudifudiapai
[Gu kpiahe du ti kpewaraga 32]
Kina boro padu boro pati bakureani nafu wasa funi