Yekova Nabi Gaani Giasangbaa Na Kikiipaha
“Ako wire, mo dú ni iratatamana, ka fu ngbarago fu kpotore yo.” —ASANZA 27:11.
1. Gini sino moipai areme kurii aboro?
GU SINO nga ga ranirii gbiati basasangbaa, si ima maapai areme rogo zegino. Rogo gu waraga gu mokedi nangia Pauro akehe fu agu aKristano nadu Efesa yo, ko asakirogo ndu gupai gipai re amanga ti ni. Ko ayaa: “Oni anata . . . mbata ku sangba sino gi zegino yo re, ku sangba gu bakindo yo du na tandu yuge, nga gu toro namanga pai awere rogo agu awiri yo nakeretu.” (AEfeso 2:1, 2) Ii, Satana Bakitingbanga, nga ‘gu bakindo duna tandu yuge,’ ko ima gbirisa gi zegino re naabaha na gu sino nga ga basasangbaa. Ko anaamanga kina gupai re rogo bambata sa kama agarã, na kina gu bangisapai re a ko atona kaa mangaha na kini kiisihe tona ti gu regbo i aba ko ngbangbaturũ yo ku sende no ti regbo Bambata Vura Nga ga Zegino.—Yugoti 12:9.
2, 3. Gini ndupai duho berani tipa ka giasangba Yekova?
2 Ono tie, wadu ani ni aKristano, ani ima ino gupai nga Yekova Mbori ima rẽ ani gisangbako na ngbaduraniyo dunduko mbiko ko nga Bakusirani, bafu unga furani, Bakerepa Bakindo nga ga nyemuse ko, na kidu ni Batasirani. (Atambuahe 148:5, 6; Amokedi 4:24; AKorosaio 1:13; Yugoti 4:11) Agu aYisaraere nadu ti rago Moize aima ino gupai nga, Yekova nangia gu boro nafu unga fuyó na kidu nigayo Batasi. Si du Moize ape gupai ti ni fuyó nga: “Si du oni ka berã pa manga [ga Yekova arugute] ti ni wa Yekova gaoni Mbori arugu roni.” (Pa Fu Rugute ni Ue he 5:32) Ii, Yekova aima rẽ i gisangbako. Ono wa si avura duwo, fuoho aturanga te ka i agianga sangba gayó Mbori ya.
3 Wai nyakipa gupai nga ani gisangba gu boro nambakadi zegino? Ti kura regbo sa, Mbori afura na gu nebi nangia Samuere ya ko ndu ka ya fu Bakindo Saura wee: “Giasangba ngba ti fu motumo.” (1 Samuere 15:22, 23) Tipagine si adu ti ni wa gure?
Giasangba “Ngba ti Fu Motumo”
4. Rogo gini gene rengbe ani ka fu hee fu Yekova?
4 Nidu Yekova ni Bakusiahe, ko nga baira agu ahe dunduko du berani. Fuo duhe wo, ya mo he ho rengbe ani ka fuhe fuko? Ii, ani rengbe arengba ka fu guhe fuko du na kikiipaha. Ginihe du ngaha? Ani rengbe ka gbia karagapai rogo agu arugute naye re: “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.” (Asanza 27:11) Sidu, guhe ngaha rengbe ani ka fuhe fuko re, si nga giasangbako. Wa vura duhe nga agu apai du tipa rani si nibakiakia na ani aye rogo akporo nibakiakia, ka ani gisangba Mbori, ani dunduko rengbe arengba ka karagapai kuti gu kere soapai Satana Bakitingbanga akusihe kuti aboro nga i arengbanga ka nye niruruyo fu Mbori ti regbo aʹasada te. Nairiwo gu mamu du berani re!
5. Gine basasangbaa amanga Mbori nani? Oni yugunga ha na kpiapai.
5 Mbori na ngbarago tiko rogo gu diaberã ani amangaha. Ho ani abasasangbako ni, si nafu kina gberarago fuko. Rogo gini gene? Ko na gberarago tiko ho ko abi rani ni ani namangi ngbatunga gu diaberã arunga ya. (Atambuahe 78:40, 41) Nikpiapai, boro nawoka be gu kaza si aidanga ní ri nzinziri ahe nani ya, ní kini mo ka basapa agu arugute bafungua afuhe funi ono ki nye kindi kuti ri nzinziri ahe. Ya mo rago gberenga ti gu bafungua re tee? Kinawo a rugu ani tirani nani nga rago nagbera agbera ti Yekova ho ko abi aboro ni i nibasasangbako, mbiko ko ima ino gu kerepai rengbe ka gbia aboro nisangbana basa yó agu arugute ko afuhe fuyó tipa raka.
6. Ginihe rengbe ka undo rani ani gisangba Mbori?
6 Ginipai rengbe ka undo rani ani gisangba Mbori? Ruhe aru furani ani sana Mbori ko ‘fú rugatinapai ku kpotoraniyo’ a wa Bakindo Soromo amangihe. Ko asanahe tipa ngbatunga gu rugatinapai re tipa ko rengbe ka “kpara rurupai ti gbegberẽpai” tipa ka ruho kaa sarangbangaa akurako aYisaraere niruruhe. (1 Abakindo 3:9) Ani dunduko si aida ani duna ‘rugatinapai kpotoraniyo’ tipa ka kpara rurupai ti gbegberẽpai rogo gi zegino hii be gu sino nga ga basasangbaa re. Mbori aima fu Fugoko furani, gbiati agu abuku naundo rani rogo giarogo sangba Ziazia Kekeapai, na agu adunguratise nga ga aKristano, na abaakumba rogo dungurati, i naaundo rani ani duna ‘rugatinapai kpotoraniyo.’ Ya mo ani namangasunge wenengai na gu gamunihe nga ga nyemuse re?
7. Tipagine nyakipa giasangbaa ti ni bangiri Yekova kisusi fu motumo?
7 Nibi gipai re, ani tingidinga gupai namangi bakuru kusayo, ho Yekova ayugu gupai ni fu gako aboro nga giasangba nyakipaha kisusi ti fu anyaa nimotumo. (Asanza 21:3, 27; Osea 6:6; Matayo 12:7) Tipagine si adu ti ni wo, wa duhe nga kina Yekova nga gu boro nazinahe tipa gako aboro naafu motumo fuko? Ginipai si anaaidaha be gu boro nanaafu motumo? Ya mo ní anaamangaha tipa ka sa ngbarago ti Mbori? Watadu ní anaapeka kina fuo gu mangapai gbua nga ga pambori? Ka si du nga vuru Mbori ho naida ka fu ngbarago fuko nirengo, gu gene rengbe ní ka mangaha rogoho nga ka irisa gako arugute naabaha dunduko. Anga motumo nga gupai du Mbori na zingoho te, ono giasangbaa nga gupai ko abihe na nyanyakipaha kisusi na kingia guhe rengbe ani ka fuhe fuko.
Gu Kpiapai Nafu Zahe Furani
8. Tipagine Yekova adi zogarago kusayo ti ni be Saura?
8 Gu pangbangaa du tipa Bakindo Saura rogo Ziazia Kekeapai, si nayugopa nyakapa giasangbaa. Saura atona gako zogarago nibayee boro, na kidu nigu bazogo nadu na umbasitise, ‘niwiri tooni ko bangiriko.’ Wa si avura duwo, rukö gbiati gbegberẽ berã asako kusa ko naamanga gbegberẽ adiaberã. (1 Samuere 10:21, 22; 15:17) Ti kura regbo sa, si aidi Saura ndu ka sovura na aFereseto. Samuere ape gupai fu Bakindo Saura nga ko sungudi ko daho ko ka ye ni tipa ka fu motumo fu Yekova na ka fu gu kura arugute fuko mbata. Ono tie, Samuere aayengo niipo wa Saura aidaha te, sidu aboro ki tona ka gbandaka. Fuo bi Saura gipai re were, “ko . . . [a]fu zozo motumo” nitiko. Gipai re kini mo ka fu gberarago fu Yekova. Ho Samuere adani, gi bakindo re ape ndu gupai nasako ko basasangba Yekova. Ko ayawee mbiko wa Samuere aima aima koyo, si nisako ko ‘nyakasi tiko’ ka fu zozo motumo fu Yekova. Tipa Bakindo Saura, pa fu ko motumo aima nyaka kisusi irisa agu rugute ko agbiaha tipa ka pido Samuere daho ko ka ye ni tipa ka fu gu motumo re. Samuere kini mo ka ya fuko wee: “Mo mangi pai ni kina mumungo ho; mo aka nga kuti gu rugute nga ga Yekova ga Mbori te, nga gu ko arugu ro na ni.” Pa zanga gia Saura sangba Yekova nasa gupai nga Yekova di zogarago kusayo beko.—1 Samuere 10:8; 13:5-13.
9. Wai Saura ayugu gupai nga ko angia boro basasangbaa?
9 Ya mo pai ho gi bakindo re awirikihe ti gipai re? Oó! Kusa, Yekova azinahe fu Saura ko ndu ka gberesa gu rikaaboro nangia aAmareko, nga aguyo nasovura bakuru kusayo kuti awiri aYisaraere niwingbaa zanga nduhe. Si adu nga ka Saura batasinga kandara gayó zogozogo anyaa ya. Nirengo, ko aima giasangba Yekova “ki mangi aAmareko, tona Awira yo wa ka mo ndu ki da ku Sura yo.” Ho Samuere ayeni ka gbia Saura, Saura aduna bakere ngbarago mbiko gu diabese ko adu nani na ko ki yaa: “Maku dú foro be Yekova; mi mangi sangba Yekova.” Ono tie, nibi agu arugute i afuhe fuyó nadu ziazia, Saura na gako aboro amangipai kia ti ni ki inipai fu Bakindo Agaga na ki zanga gbarasa “bawene akandoro, na abaabagara na . . . anyanzeme, na awiri akandoro, na agu ahe nadu ni wene he dunduko.” Bakindo Saura aʹasadi ka rugusapa gi gako basasangbaa re niya ko wee “aboro nibatasi gu bawene akandoro na abaabagara [re], [tipa] ka tumo na ami fu Yekova ga Mbori.”—1 Samuere 15:1-15.
10. Ginipai si aidi Saura inihe ono ko akpa akpa tie ti inoho?
10 Fuo gumbako ho were, Samuere kini mo ka ya fuko wee: “Zozo amotumo watadu kura aũbuga, si ngba ti Yekova susi gu nga giasangba Yekova? Mo ngére, giasangba ngba ti fu motumo, dega tue ngba ti nzenze abaakandoro.” (1 Samuere 15:22) Wa si aima du nga Yekova aima diaberã nga i imi agu anyaa re aimo, sidu, ami adanga tipa i fu ra nimotumo te.
Oni Gisangbaa Rogo Apai Dunduko
11, 12. (a) Wai Yekova abi gaani bakere asadatise ka fu ngbarago fuko rogo gaani irisombori yo? (b) Wai rengbe boro ka nanga tiní nga ní namanga gupai amanga Mbori akpinyemuhe baraho duhe ni nirengo nga ní nabasa sangbako abasa?
11 Nairiwo wai du Yekova na ngbarago ka bi gako ruru amoyambu i niru nyanyakii zavura ti regbo arungosi vurũ, kini takipandepa Kindo aboro ki vura du kpasiaka vurũ, na kini ndu kuba adunguratise yo zavura gupai nga raka nikpakarakpakaraha fuyó vurũ! Pa gia ani sangba Yekova rogo gi bangiriba nabi agu apai nga ga toro re, si nga gupai nasa ngbarago tiko! Gu bakere asadatise ani amangaha tipa ka iriso Yekova, si nibawenehe bangiriko ho ani amangaha ni mbiko nyemuse. Aboro rengbe arengba ka bisirapa gaani sunge, ono Mbori nakparia gu gamahe akparia ani agamaha fuko na ngbaduraniyo dunduko na ko natingidapaha atingida a.—Matayo 6:4.
12 Ono tie, tipa ka sa ngbarago ti Mbori bakere gbe, si naida ani gisangbako rogo gaani raka yo naabaha dunduko. Si aidanga ani nangi tirani na gu berã ngawee ani rengbe arengba ka mbu manga gupai Mbori aidaha berani ka singia ani nagia sangbako agia rogo kura apai yo te. Nikpiapai, boro rengbe ka nanga tiní ki yawee wa ni airisombori airiso ngba ruru gene, ní rengbe arengba ka manga wasiwasi kodaba watadu gu kura kere ingapai ka i afunga mbusa funi ya. Nairiwo wai ka gupai re gberẽ!—AGaratio 6:7, 8.
13. Ho du ani ni nisarani, wai rengbe gaani idapase kadu niʹasadiasadihe?
13 Na ngbanyaa kuti gipai re, si naida ani sana tirani ki yaa: ‘Ya mo mi nairisa fugo Yekova rogo gimi mangapai nga ga aʹuru dunduko, zavura ho du mi ni nisare?’ Yesu ayaa: “Gu ni namanga wenengãi na gu du ni toni he, ni amánga wenengãi na gu du ni bakere he. Gu ni namanga toni pai ni iraira ha, ni amánga bakere pai ni iraira ha a.” (Ruka 16:10) Ya mo ani ‘nata na ziazia pai ku kpotoraniyo’ zavura ‘vuru gaani abambu yo,’ singia aboro nabi rani watadu i abingo rani tee? (Atambuahe 101:2) Nirengo, ka ani vura du kina tii gaani abambu yo, gaani idapase ima rengba kadu ni asadiasadihe. Rogo agu aringara du akompiuta rogoho ni agu ahe rengbe na akporo dunduko, si fu dungu aboro taata i kusi kpia kundiri aboro kpakpuhe yo i nimangi kodaba. Mbata kusayo, aboro arengbanga ka bi ngbatunga gu kundiri aboro re te, kinagu ka i ndu ku baha yo yo i ayugoho ni ni agu ahe nafu wasa. Ya mo ani adia gu sangba Yesu kugume nayaa: “Gu ni nangana de ni nyemu ri ni ima manga bari na ri kpotoni yo”? Ii, ya mo ani ahe ngana kandara kpia wasiwasi apai? (Matayo 5:28; Eyobo 31:1, 9, 10; Atambuahe 119:37; Asanza 6:24, 25; AEfeso 5:3-5) Na ginipai tigaha du tipa agu ambakadapai nga ga zuũ du rogo terevizioni? Ya mo gaani mangapai na ngbanyaa na ga gu Mbori ‘mbisimoko asonga airazuũ’? (Atambuahe 11:5) Na ginipai tigaha du tipa pipiyatise na bakere mbira buda? Ziazia Kekeapai nasoga kpibuda, na si nafu zahe fu aKristano nga ka i funga tiyó sa “bakere buda ya.”—Tito 2:3; Ruka 21:34, 35; 1 Timoteo 3:3.
14. Gini kura agene duho nabi mangasunge na marã si aida ani yugu gaani giasangba rogoho fu Mbori?
14 Gu kura bangiriba berewe si aida ani gbeberã rani kuti ni, si tipa mangasunge na marã. Nikpiapai, ya mo ngbaha angba ani rimisi tirani kurogo sunge gbia kumuko nga gu ani amangaha gbarakagbaraka tipa ka gbia kumuko niipo kini mangi agu apai ima mbeda kuti biriko aboro watadu kaa gumba aziree? Ya mo ani na nyemu ka deka ti fu kufuta? Watadu sangba kpotoraniyo nasa rani ani “rũhe fu gu ni du rũhe fu ni; ngbeti fu gu ni du ngbeti fu ni”?—ARomo 13:7.
Gu Giasangba Naye Mbiko Nyemuse
15. Tipagine ani agiasangba Yekova ti ni?
15 Pa irisa ani ga Mbori arugute naye na amaku furani. Nikpiapai, ho ani ambu vugundö ni, ho ani araka ni kuti arugute, ho ani araka gigiri raka ni, na ho ani abi kure ni niziazia hee, si nasa gupai nga ka kura akaza zinga rani ya. Kurigure, pa raka ani na ngbanyaa kuti gu rengo nga ga Ziazia Kekeapai, si naundo rani rogo agu apai nabipa banda marã, pa wai aboro asungo na akurayo, naapa ramukporo. (Yesaya 48:17) Ani rengbe ka bi ngbatunga agu apai re dunduko nigu undo naye furani mbiko irisa ani ga Mbori andiko. Wa vura duhe wo, gu ndupai nasa rani ani fu irisa fu Yekova nga nyemuko du tirani. Ani airisongo Mbori mbiko gbangbati te. (Eyobo 1:9-11; 2:4, 5) Mbori aima fu ranirii furani ani sia gu boro ani aida ka giasangba ní. Ani nagiasangba Yekova mbiko ani naida ka fu ngbarago fuko na mbiko ani naida ka manga rurupai.—ARomo 6:16, 17; 1 Yoane 5:3.
16, 17. (a) Wai Yesu agisangba Mbori na ngbadukoyo dunduko? (b) Wai rengbe ani ka wirika Yesu?
16 Yesu ayugu rengberengbe kpiapai furani nibi wai ko agisangba Yekova na ngbadukoyo dunduko. (Yoane 8:28, 29) Ho Yesu aduni auru kpotosende, “ko awiriki pa giasangba be agu apai ko ahi.” (AEbere 5:8, 9) Ngba gini gene? Yesu “[aumbasi] tiko, nigi sangba dati kpio, ii, nga kina gu kpio nga ga wagiwagi ngua.” (AFiripoio 2:7, 8) Wa vura duhe nga Yesu aima tona giasangba mbuko kina ngbangbaturũ yo, gu gako giasangba re adu niasadiasadihe auru kpotosende ane. Ani rengbe kadu naa kido nga Yesu aima duna wene inohe beko tipa ka mangasunge nigbiamotumo tipa agu awirinako nga ga toroyo na tipa gu kura aidipase.—AEbere 4:15; 1 Yoane 2:1, 2.
17 Na ginipai tigaha du tipa rani? Ani rengbe arengba ka wirika Yesu niperesa ani pa giasangba Mbori mbatayo rogo gaani raka. (1 Petero 2:21) Ani rengbe arengba kadu na wasa baraho nyemuse afõngbaduraniyo ni ani mangi ga Yekova arugute, zavura ho apai asosoda rani ni ani he mangaha watadu ho adunga ani ni na nyemu mangaha ya. (ARomo 7:18-20) Gupai re nakodapa gia ani sangba agu aboro nangbembatayo rogo apai rogo ndikidi irisombori, wa vura duhe nga i nga kpakpa aboro vurũ. (AEbere 13:17) Pa irisa ani ga Mbori arugute rogo gaani raka yo nibasasa ninyanyakipa pai bangiri Yekova.
18, 19. Gine pa gia ani sangba Mbori na ngbaduraniyo dunduko aye nani?
18 Areme, pa gia ani sangba Mbori nakoda hi arungosi wa ka ani ruho ka kakuti gaani ruru mangapai. (Amokedi 5:29) Berewe a, pa irisa ani ga Mbori arugute tipa tungusapai gbiati yugopai naida gupai nga ani hipai dati digido gi zegino re. (Matayo 24:13, 14; 28:19, 20) Si naida ani naahipai ahi tipa ka ruho kaa dungura tirani na akuarani, ka si vura du nga ani nifudifudi rani be gi zegino re vurũ. Gu gaani Mbori nga boro nyemuse, ko ima ino gu bakere asadatise ani amangaha kadu na giasangbaa rogo gi bangiriba re. Ono tie, tipa ani gisangba Mbori nzunzu, si naida ani sovura kuti gu kpotorani nga ga ingapai, ki mbu manga gbegberẽ apai baraho ani asonosa nyemu manga gupai ni du niwenehe.—ARomo 12:9.
19 Ho ani airiso Yekova ni na ngbaduraniyo dunduko, na mbiko nyemuse, ko nadu furani nigu boro ‘nafu mosoro afu fu agu aboro nagbata ko.’ (AEbere 11:6) Daha ada ani fu agamahe fu Yekova, ono guhe nafu ngbarago gbe fuko, si nga giasangbako na ngbaduraniyo dunduko.—Asanza 3:1, 2.
Gaoni Karagapai Nga Gine?
• Tipagine rengbe ani ti ni ka yawee he kina berani si aida ani fuhe fu Yekova?
• Gini irairapai Saura amangihe?
• Wai rengbe oni ka yugoho nga giasangba ngbaa ti fu motumo
• Ginihe nafõngbaduroniyo oni gisangba Yekova?
[Gu kpiahe du ti kpewaraga 22]
Ya mo oni nagiasangba Mbori zavura ho du oni ni dimo kpuroni yo nisaroni?