Asanahe be Agedihe

Ginipai Yesu aberẽhe ho ko ayani wee gako moyambu nikadu niruru ‘kangara moyambu duna tatamana’?

Yesu asana gu sanahe nga, “Da nga gu [ruru] kangara moyambu tie du na tatamana, gani gbia amoi ni ri gako aboro kporo ni fu gayo riahe fu yo ti ragoho?” (Matayo 24:45) Gu “moyambu” nafu gu “riahe” nga ga toro re, ní nga gu dungurati nga ga agu aKristano du nimbedimbediyo nitoro. Tipagine Yesu ayambu yó ti ni nikangara amoyambu duna tatamana?a

Ani rengbe ka rugatirani wenengai na gupai Yesu aaberãha na gu fugo nga ‘kangara moyambu duna tatamana’ re kina rogo agu apai ko anaayugoho. Nikpiapai, ho Yesu afura ni tipa ‘ruru kangara moyambu duna tatamana,’ ko ape gu sanza nadu tipa ngasu adee bawe nga aguyo naapido gu kumba nika diayo. Pa gu ngasu adee re natingida rani naapa mbedimbedi aKristano mbata fu gu garã nangia 1914 nga aguyo naapido gu kumba nika diayo, nangia Yesu Kristo. Dagba gu ngasu adee nadu bawe re, aguyo bisue aadunga na nzeme nibakerehe rogo gayó aramba ho badidee adani te, ka i arimonga ku kporo pumbo diadee yo ya. Gu kurayo bisue re, angia airatatamana tigayo. I aima ngbe bakere nzeme tipa tiyó tipa i ki rengbe kindi kaa zigarago ho badidee nika da ni. I nangia agu aboro i aidihe fuyó i rimi ku kporo pumbo yo tipa badidee diyo.—Matayo 25:10-12.

Ho Yesu atona zogarago ni rogo gu garã nangia 1914, dungu aboro dagba mbedimbedi aKristano aamaabangiriyo ka ndu naako nibasa ku ngbangbaturũ yo. Ono tie, i aduna bakere sunge tipa ka mangaha herẽ auru kpotosende, ono gu kurayo aambakadanga tiyó tipa gu sunge re te. Wakina gu ngasu adee nangia airamungo, i aambakadanga tiyó rogo toroyo mbu regbo koyo kindi te, sidu, ka i ambakadanga tiyó tipa kaa mangasunge kindi ni agu aboro nazigarago ya. Ono tie, dunguyo naima manga apai nitatamana gbiati rubangirise na i ki nyaki rogo toroyo. Ho i aini gupai ni nga bakere sunge adu kindi kumbatayo tipa yó, i atona kaa mangaha na ngbarago. Si ki tadu were, i kini ngia ‘ruru kangara moyambu duna tatamana.’

Ani kparianga wai Yesu amangisunge berewe na gu fugo nga “tatamana” rogo Matayo 7:24. Yesu ayaa: “Gu . . . [boro] nagia gi gimi apai re, ki mangi he, ni wiri gu boro tatamana nadua gani bambu auru mbia.” Gu boro duna tatamana, ní nadua gani bambu nyanyakii nibi gupai nga bavugumo nika yeaye. Mumungo boro tigani nadua gani bambu rii ngume, fuo ye bavugumo, si ki ti. Sidu, gu pefuo Yesu nga boro tatamana, ní nga gu boro naima bi sangbana pefuo gu tatamana nga ga aboro nga si naye na kina gberango. Gani kparakarogopaiyo gbiati kpariapai nandu na ní ní moimburu gani idapase, mangaapai, na agu apai ní ayugoho rii agu apai Yesu ayuguhe. Sidu, ‘ruru kangara moyambu duna tatamana’ namangapai wakina gure a.

Oni kparia wai a Bambata Papara Ziazia Kekeapai rogo dungu aba amangasunge na gu fugo Ebere i asaha nga ‘tatamana’ gbiati gu kura afugo duna rogoyo nani kina sa. Nikpiapai, Faro amoi Yosefa ko naangerakurii sunge banda aũati. Si angia papara ga Yekova mbakadapai ka fu riahe fu gako aboro. Tipagine i asia Yosefa ti ni? Faro aya fuko: ‘Anga boro rugatise ho niʹiratatamana wa mo te.’ (Bambata Pai 41:33-39; 45:5) Teketeke a, Ziazia Kekeapai nayawee Abigaira “adu na wene rugatinapai.” Ri afu riahe fu ga Yekova mbedimbedi boro nangia Davide, gbiati gako akumba. (1 Samuere 25:3, 11, 18) I aya ti Yosefa wee ko angia boro rugatise na ti Abigaira wee boro rugatinapai bambiko i aima rugatiyo naapa gupai Mbori akpinyemuhe na ki mangipai nani nitatamana.

Sidu, ho Yesu afura ni tipa ruru moyambu ya ní nga kangara moyambu duna tatamana, ko ayugu gupai nani ngawee agu aboro namangasunge kuba gu moyambu re, i nikadu na rugatinapai, bipai kumbatayo, na wene kpariapai mbiko i namaamburu gayó idapase, mangaapai, gbiati agu apai i ayugoho rii Fugo Mbori nga rengo.

[Gu rukutu kekeapai du bandu kpewaraga yo]