I “Naapeka Wiri Kandoro Ku Ho Ko Andu Ku Ho Ni Dunduko”
“Agi yo re nga agu yo naapeka Wiri Kandoro ku ho ko andu ku ho ni dunduko.”—YUGO. 14:4.
1. Wai ga Yesu ndikidi abawiriki abipa pekako?
FUO dia Yesu agarã wa ue na beberehe kutingba gako sunge, ko ‘ayugupai bambutiria yo Kaparanauma yo.’ ‘Dungu gako abawiriki akaraga tiyó’ be gupai ko agumbaha, “ka i ata nga na ko berewe ya.” Ho Yesu asana gu gako amokedi ni naanidu 12 singia i naida ka mbuko a tigayo, Simona Petero akaragapai fuko nibasa ki yaa: “Gbia, ani andú koyo du da ni? Wa du mo du agu apai be ro nga ga nyenye unga.” (Yo. 6:48, 59, 60, 66-69) Ndikidi ga Yesu abawiriki aambunga pekako te. Ho i ambedi yó ni niziazia toro, i anye kindi kuti pekako.—Amo. 16:7-10.
2. (a) Da nga ‘ruru kangara moyambu,’ watadu “kangara buruku”? (b) Wai gu moyambu re “naapeka Wiri Kandoro ku ho ko andu ku ho ni dunduko”?
2 Ginipai tigaha du tipa gu mbedimbedi aKristano du ti gi gaani regbo re? Ho Yesu agumbapa gupai ni i nika ‘ina pa gako ye ti ni, na pa digida rago,’ ko afura tipa gu riko nga ga agu aKristano du nimbedimbedi yó nitoro ki yawee i nga ‘ruru kangara moyambu,’ watadu “kangara buruku.” (Mt. 24:3, 45; Ruka 12:42) Wa du yó dunduko nibadona, i “naapeka Wiri Kandoro ku ho ko andu ku ho ni dunduko.” (Oni gedi Yugoti 14:4, 5) I nye ningasu yó rogo gu gene nga, i azapanga tiyó na agu aida gbiati gu mangaapai nga ga ‘Babera Duna Bakere Ome Ti Ni,’ nga bariwara ngbii zire pambori te. (Yugo. 17:5, NW) Aboro agianga gu yugopai nga “zire ngbayo yo wa sa te,” na i “zanga serõ” rogo gi zegino nga ga Satana re. (Yo. 15:19) Gizo kumbatayo, yangara mbedimbedi aKristano nika ‘peka’ Wiri Kandoro kina boro ku ngbangbaturũ yo.—Yo. 13:36.
3. Tipagine duhe ti ni ninyanyakipa pai furani ani kido kuti kangara moyambu?
3 Yesu aima maa ruru kangara moyambu “ri gako aboro kporo” tipa i “ni fu gayo riahe fu yo ti ragoho.” Agu aborokporo re nga agu aboro nibasasa du rogo gu riko nga ga kangara moyambu. Ko aima asiapa “gako ahe dunduko” a fu gi kangara moyambu re. (Mt. 24:45-47) Agi “ahe” re nakoda “bakere rimbasa aboro,” nga “kura akandoro.” (Yugo. 7:9; Yo. 10:16) Ya mo si aidanga mbedimbedi aKristano dunduko nibasasa gbiati “kura akandoro” du naa kido kuti gu moyambu Yesu amoi ní re tee? Badungu nduapai kinaho si aida ti ni ani du naa kido kuti gu moyambu re. Bangua nduapai ue nga: (1) Yekova nakido akido kuti gu moyambu re. (2) Yesu nakido akido a kuti gu moyambu re. Ani wisigingo agu agopai duho nayugo gupai nga, Yekova Mbori gbiati Yesu Kristo, i nakido kuti gu moyambu re rogo apai dunduko.
Yekova Nakido Kuti Kangara Moyambu
4. Tipagine si aida ti ni ani du naa kido nga, kangara moyambu afunga gbegberẽ riahe furani te?
4 Ani wisigingo gupai nasa gu moyambu re ní naafu riahe ti regboho. Yekova ayaa: “Mi arába ro ki yugu pai foro ngba gu gene mo ka ndu ngba ha.” Na ko asusi na fugo kumbatayo ki yaa: “Mi arúga ro ni maa bangire ti ro.” (Tam. 32:8) Yekova du naruga gu moyambu re. Gu moyambu re na wene giarogopai rogo Ziazia Kekeapai yo. Sidu, ani naa kido kuti agu arugute gu moyambu re afuhe furani.
5. Gine nayugo gupai nga, ga Mbori toro nafu ome fu gu moyambu re?
5 Yekova nafu ziazia toro fu gu riko nga ga kangara moyambu. Wa vura duhe nga ani arengbanga ka bi ga Yekova toro te, ani nabi gupai abi si amangaha. Oni berẽnga kuriipa gupai ruru kangara moyambu namangihe nibipa manga dezirepai tipa Yekova Mbori, tipa Wiriko, na tipa ga Mbori Kindo. Airisi Yekova natungusa gu pangbanga nga ga Kindo rogo aringara susi 230 gbiati akisanga. Anga gipai re nga ndikidi gopai nayugo gupai nga, ga Mbori toro du nafu ome fu kangara moyambu tee? (Oni gedi Amokedi 1:8.) Gu riko nga ga kangara moyambu naamanga nyanyakipa adiaberã tipa kaa fu riahe nga ga toro ti regboho fu ga Yekova amoyambu rogo zegino dunduko. Gu moyambu re nayugo nyemuse, na kidu na zera gbiati gu kura apapara zuzu toro ho ko amanga gu nyanyakipa diaberã re ni.—Gara. 5:22, 23.
6, 7. Wai nzunzu Yekova akido kuti ruru kangara moyambu?
6 Tipa ani girogo wai nzunzu Yekova akido kuti gu moyambu re, ani berẽnga kurii gu kidohe ko nakido agu aboro nani du rogo gu riko re. Gu mokedi nangia Pauro akepai ki yaa: “Kpangi apaa apaa, i ki zingisi kangba aboro zanga zirã, i ki sa rani a kia. Bambiko gi zizirĩ boro re ka ukadi zanga zirã, gi kpikpi boro re ka ukadi zanga kpio.” (1 Kor. 15:52, 53) Agu apefuo Kristo nga mbedimbedi aKristano namangasunge fu Mbori niruruyo na ki kpi, Mbori nazingisa yó ni atoro ki fu gu kpoto fuyó susi ga amaraika i naaraka nyeanye kindi. Mbori nafu gu unga fuyó kaa kpingo ya, nga gu unga ka i agbarasanga ha a ya. Kurigure, gu unga ko afuhe fuyó re arengbanga ka zirã te na si nawira gupai nga i arakanga mbiko Mbori te ono kina mbiko tiyó nisayo. Yugoti 4:4 nafura tipa agi aboro re ya i susungu auru ambatabakindo kidu na akpakpari dahabu riyo yo. Mbori nika taasapa mbedimbedi aKristano ki moi yó ni abakindo. Ono kura apai kinaho berewe ko ka mangaha tipa yó.
7 Yugoti 19:7, 8, nayaa: “Ani ngí angi ki du na bakere ngbarago, ani táasi rimoko, bambiko gu rago diade nga ga Wiri Kandoro da, diako aima mbakada tiri; i ki asia ha fu ri ya ri ukadi tiri ni nzaranzara pusi remu, ni imaima ha ni gigiri he a - bambiko gu pusi remu re nga gu ruru mangaapai nga ga ga Mbori aboro.” Yekova asia mbedimbedi aKristano tipa i du nigu dee Wiriko nika dia ri. Agu apai ko namangihe tipa yó nga ko fu gu unga fuyó ka zirãnga ya, na ka kpingo ya, na ki sa yó ni abakindo, na ki sa yó berewe ‘nidia Wiri Kandoro,’ si nga bakere gopai nayugo gupai nga, Mbori nakido akido kuti mbedimbedi aKristano, wa i ‘apeka Wiri Kandoro kuho ko andu kuhoni dunduko.’
Yesu Nakido Kuti Kangara Moyambu
8. Wai Yesu ayugo gupai nga ko naa kido kuti mbedimbedi aKristano?
8 Gini gopai duho nayugo gupai nga, Yesu nakido kuti mbedimbedi aKristano rogo apai yo dũ? Rogo gu yangara yuru Yesu adu auru kpotosende ane, ko amangi mozunga na gu gako ruru amokedi nadu 11. Ko aya fuyó wee: “Oni nga agu yo naadu na mi ho i aasadi re ni. Mi nafu ngbi fu roni a wa Buba afu he fere, oni arí riahe ki mbiri he pati gi mbisa rogo gi ngbi; oni asùnga auru ambataabakindo nisapu ngbanga fu rika aYisaraere bawe na ue.” (Ruka 22:28-30) Gu mozunga Yesu amangihe na agu amokedi nadu 11 re, si a tipa gu mbedimbedi aKristano dunduko bangeyo nikadu nga 144,000. (Ruka 12:32; Yugo. 5:9, 10; 14:1) Ya mo wa ka si adu nga Yesu akidongo kuti mbedimbedi aKristano te, ka ko amangi mozunga naayó tipa ka zogarago naayó?
9. Bete ‘ga Kristo ahe’ nga gine?
9 Yesu Kristo aima asiapa “gako ahe dunduko” fu ruru kangara moyambu. Agu ahe re nga agu apai dunduko du auru kpotosende nabipa Kindo. (Mt. 24:47) Bete agi ahe re nga agu abambu du rogo riibasunge nga ga aDezire Yekova, agu abambu du rogo abe-basunge, agu abambu du tipa kikindigi adunguratise, gbiati aBambu Kindo rogo zegino dunduko. Si nakoda sunge tungusapa Kindo gbiati sunge sa aboro ni abawiriki. Ya mo boro rengbe ka asiapa gani nyanyakipa ahe wa gere fu gu boro ní akidongo kuti ní ya?
10. Gini gopai duho nayugo gupai nga, Kristo na kina mbedimbedi aKristano kindi?
10 Ngbutuko mbata fu Yesu ga ku ngbangbaturũ yo, ko ayugu tiko fu gako abawiriki fuo zingako bekpio ki kido yó niyaa: “Oni ngere, mi na oni ti arago dũ, ki da ti digida zegino.” (Mt. 28:20) Ya mo rengo du Yesu agumbaha fuyó re? Agarã 15 kusayo, bange agu adungurati nga ga aDezire Yekova rogo zegino dunduko adu nga 70,000, ono awere, bangehe ima susa 100,000. Bange abawiriki da tigaha ti wai? Vuru agu agarã 15 susi kusayo re, bange agu aboro zi bapatiza ima mbeda kada ti amirioni biama na beberehe. Gure wa aʹuru dunduko aboro anaazio bapatiza nga 800. Gi bakere sonakumbatayo re, si nga gu gopai nayugo gupai nga, Kristo nafu arugute fu mbedimbedi aKristano kindi ti regbo gayó adunguratise, na ko nasongoda gu sunge asongoda i amangaha, nga sunge sa aboro ni abawiriki.
Gu Moyambu re Niruruko na Nikangarako
11, 12. Wai gu moyambu re nayugu gupai nga, ko niruruko na nikangarako?
11 Wa duhe nga Mbori gbiati Yesu Kristo nakido kuti ruru kangara moyambu rogo apai yo dũ, ya mo si aidanga ani naakido kuti kangara moyambu wakina yó tee? Kurigure, gu moyambu re niruruko nibipa gu sunge i afuhe fuko. Nikpiapai, ko ima kusa gu magazini nga Ngbaõbambu Sinziri tipa agarã awere nga 130. Agu adunguratise nga ga dungurati gbiati kikindigi adunguratise, si nga agu ambakadapai naye be gu moyambu re tipa nyakasa aboro rogo toro yo.
12 Gu ruru moyambu re a nikangarako ngba gu gene nga ko agunga sa apai mbata fu Yekova nika fu gene tipaha te, watadu ka nye sayo Yekova ki vura nifu arugute tipa apai naandu kumbatayo te. Nikpiapai, agu abarumbatayo nga ga zire apambori yó, i naaidaha aida fu aboro i naamanga irairapai, ono tipa kangara moyambu tigako, ko naaza aboro aza ti agu aũkota du rogo gi ga Satana zegino re. Gu moyambu re rengbe arengba ka fu wene arugute ti regboho bambiko Yekova gbiati Yesu Kristo du nafu maku fuko. Sidu, si naida ani naakido kuti gu moyambu re rogo apai yo dũ. Ono wai rengbe ani ka yugo gupai nga, ani nakido kuti ruru kangara moyambu?
Ani “Ndú na” Mbedimbedi AKristano Wa I Apekafuo Wiri Kandoro
13. Ringbisihe kuti ga Zekaraya sangbanebi, wai duhe nga ani rengbe arengba ka kido kuti ruru kangara moyambu?
13 Gu kitabu nga Zekaraya, si nafura tipa “akumba bawe” nika ndu fuo “boro Ebere” ki ya fuko wee: “Ani ndú na mo, bambiko ani gi he ya Mbori du na mo.” (Oni gedi Zekaraya 8:23.) Gu “boro Ebere” re, anga bangisa boro nga ní te, ono badona aboro du. Ti gi gaani regbo re, ní narukuba yangara mbedimbedi aKristano, nga papara “ga Mbori Yisaraere.” (Gara. 6:16) Agu ‘akumba du bawe’ re, i narukuba bakere rimbasa aboro nga kura akandoro. Bakere rimbasa aboro ‘nandu na’ ruru kangara moyambu a wa mbedimbedi aKristano apeka Yesu kuho ko andu kuhoni dunduko. Si aidanga agu aboro du rogo bakere rimbasa mangi zee ti yugotiyo ni abadiangba agu aboro nga “adi gu yambahe nga ga ngbangbaturũ” te. (Eb. 3:1) Zee amanganga Yesu ti yamba mbedimbedi aKristano nga ‘awirinako’ te.—Eb. 2:11.
14. Wai rengbe ani ka undo awirina Kristo?
14 Yesu ayawee ka ani aundo awirinako, gure nga ani naundo kinako a. (Oni gedi Matayo 25:40.) Ono tipa agu aboro duna maabangirise ka raka auru kpotosende, wai rengbeyó ka undo awirina Kristo? Gu bangua gene rengbeyó ka undo yó ngbaha nga, kaa undo yó ti sunge tungusapa Kindo. (Mt. 24:14; Yo. 14:12) Wa duhe nga bange mbedimbedi aKristano ima zora kusende vuru agu agarã susi, bange gu kura akandoro tigaha ima dakpa kuari. Wa kura akandoro amanga sunge tungusapai, aguyo kingia abatungusi wene pangbanga ti aregbo dũ, gure nga i naundo mbedimbedi aKristano ti sunge. (Mt. 28:19, 20) I naundo gi sunge re a nifuyo marã ngba dungu agene si undoho.
15. Wai si aida aKristano nibasasa dunduko naabi gu riahe nga ga toro kangara moyambu afuhe ti regboho, gbiati agu adiaberã riigbu amangaha?
15 Wadu ani nibasasa dunduko, wai ani naabi gu riahe nga ga toro ruru kangara moyambu naafuhe ti regboho rogo awaraga yo na ti regbo adunguratise? Ya mo ani naageda agu awaraga re, kini degeturani ti regbo adunguratise, na kini mangi agu apai ani awirikaha? Wai ani naabi agu adiaberã gu moyambu re naamangaha? Ka ani ara nigorani kutiibe agu arugute i afuhe re, si nika yugo gupai nga ani na idapase kuti gupai nga, kina Yekova du nafu agu arugute re.—Yak. 3:17.
16. Tipagine si aida gupai ti ni nga, aKristano dunduko nigisangba awirina Kristo?
16 Yesu ayaa: “Gimi akandoro nagia fugore, mi ini ra, ami ki nipeke re.” (Yo. 10:27) Gure nga gupai mbedimbedi aKristano amangaha. Na ginipai tigaha du tipa agu aboro ‘nandu’ naayó? I duwa ka i agiasangba Yesu. Si naida i naagiasangba awirinako. Nirengo, gu bangua sunge i afuhe fu mbedimbedi aKristano, si nga ngerafuo ga Mbori aboro. Pa gia ani sangba awirina Kristo nakoda ginipai?
17. Pa gia ani sangba kangara moyambu nakoda ginipai?
17 Riigbu Bipasunge narukuba ruru kangara moyambu, na gu riigbu re du nangbembatayo rogo apai yo na kini ngerekurii sunge tungusapai rogo zegino dunduko. Agu abaakumba du rogo gu riigbu re, i nga agu aboro duna bakere inohe, na i dunduko nga mbedimbedi aKristano. Kina yó nzunzu rengbe ani ka ya tipa yó we i nga ‘abazogo rani,’ watadu gaani abangbembatayo. (Eb. 13:7) Agi abaakumba re na bakere “sunge” beyo, bambiko i nangerafuo abatungusipa Kindo rogo zegino dunduko bangeyo naima susa 7,000,000, na adungurati bangehe naima susa 100,000. (1 Kor. 15:58) Ka ani agiasangba kangara moyambu, gure nga ani nairisa sangba Riigbu Bipasunge rogo apai yo dunduko.
Agu Aboro Nagiasangba Kangara Moyambu, I Nga Aboro Maku
18, 19. (a) Gini bawene apai nika manga fu agu aboro nagiasangba ruru kangara moyambu? (b) Si naida ani diberã kaa manga ginipai?
18 Natona ti gu regbo Yesu amoi ruru kangara moyambu ti sunge kada ku awere, gu moyambu re ‘nasa dungu aboro sa rurupai.’ (Dan. 12:3) Bete agi aboro re na maabangirise ka bata ho Mbori nika gbarasa gi gbegberẽ zegino re ni. Nangbaa agu amaku Mbori nika fuhe fu agu aboro ru gigirii barabangiriko re!
19 Kumbatayo, ho ‘gu ziazia bakporo, nga vovo Yerusarema, [duna agu aboro rogoho du bangeyo 144,000] nika zorã ni ngbangbaturũ yo yo du Mbori ni, i nambakadihe wa gu dee i afongo ri nika dia kumbaari,’ gini bawene apai nika manga fu agu aboro nagiasangba kangara moyambu? Ziazia Kekeapai nayaa: “Mbori anyé na yo tigako, . . . Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugo. 21:2-4) Si naida gupai nirengo nga, ani naagiasangba Kristo gbiati agu awirinako du nimbedimbediyo nitoro.
Ginipai Wiriki Oni He?
• Gini gopai duho nayugo gupai nga, Yekova nakido akido kuti ruru kangara moyambu?
• Ginipai nayugo gupai nga, Kristo nakido kuti kangara moyambu rogo apai yo dũ?
• Tipagine si aida ti ni ani naakido kuti kangara buruku rogo apai yo dũ?
• Wai rengbe ani ka yugo nani nga, ani nakido kuti kangara moyambu?
[Gu kpiahe du ti kpewaraga 19]
Ya mo oni ini gu boro Yekova nasia ní tipa ní du nigu dee Wiriko nika diari?
[Gu kpiahe du ti kpewaraga 20]
Yesu Kristo aima asiapa “gako ahe” fu ruru kangara moyambu
[Gu kpiahe du ti kpewaraga 21]
Ho ani atungusapai ni, gure nga ani naundo mbedimbedi aKristano ti sunge