Yekova Nga Gaani Bakere Gbia!

“Mi moi Gbia nga Mbori ni gi bagbuko.” —TAM. 73:28.

1. Ginipai Pauro agumbaha rogo 1 AKorindo 7:31?

“PA GI zegino re nago ago.” Wo gu mokedi nangia Pauro agumbaha. (1 Kor. 7:31) Ko aima ino ya apai nasakatihe asaka kindi rogo zegino.

2, 3. (a) Ani rengbe na ringbisa gu vura du kuti ga Yekova bakere pagbia kuti gine? (b) Gini asanahe ani ka ino akaragapai kuti ni awere?

² Areme, bakerepai duho namanga nga gu nabi roni abi! Gipai re nabipa gu bakere pagbia nga ga Yekova Mbori. Ani rengbe na ringbisa gipai re kuti gupai rengbe ka manga rogo kura ringara sa. Si rengbe kadu nga zogarago kinaho nga gu naruga apai rogo ringara. Ono kura riigbu kidu ho a rogo gu ringara re nga gu nga ga abamangi gbegberẽ apai, airabiriki, aboro zuũ, na abaimiaboro. Gu riigbu re nasovura kuti gu zogarago nga ga gu ringara re, na si rengbe arengba ka gbe aboro-ringara kurogoho.

³ Wa kina gure a, zogarago nga ga Bakere “Gbia” nga “Yekova” kinaho. (Tam. 71:5) Ono gbegberẽ riigbu kinaho a nga gudu bazogoho nga “gbegberẽ ko.” (1 Yo. 5:19) Gi riigbu re nasovura kuti gu zogarago nga ga Mbori na kini gbe aboro i ye kurogoho. Wai du gi gbegberẽ riigbu re atona? Tipagine Mbori adianga ha ti ni kusayo ya? Ginipai si aida ani mangihe tipaha wa du ani nibasasa dunduko?

Ga Yekova Bakere Pagbia

4. Gu ngbanga namanga, si nabipa gini apai ue?

⁴ Gi ngbanga namanga re, si nabipa apai ue nga: ga Yekova bakere pagbia naapa nye boro niruruni. I yambu Yekova rogo Ziazia Kekeapai bara dunguhe na gu fugo nga “Gbia Mbori.” Nikpiapai, bake apapara Atambuahe abibia ki yaa: “Mi moi Gbia nga Mbori ni gi bagbuko, ya mi taki pande pa gamo asunge dunduko.” (Tam. 73:28) Wene nduapai kinaho si aida ti ni ani naabi Yekova Mbori nigu Bakere Boro duho kisusi.—Dan. 7:22.

5. Tipagine si aida ti ni ani songodi ga Yekova bakere pagbia?

⁵ Wadu Yekova Mbori nga Bakusiahe, ko nga gu Bakere Gbia du kurii ahe dũ. (Oni gedi Yugoti 4:​11.) Yekova a nga gaani Bafurugute, na Bakindo, bambiko kinako sa nasapangbanga, narũ andiko, na kini mangi diaberã rogo gako zogarago. (Yes. 33:22) Wa duhe nga Mbori du nakusi rani na ani naraka mbiko ko, si naida ani naabiko nigaani Bakere Gbia. Gupai rengbe ka sa rani ani naabi gako bangiriba na kikiipaha gbe na kini songodihe nga, ka ani aberãkurii gupai nga ko “anyakasi gako mbatabakindo rogo angbangbaturũ yo, gako ngbi nazoga aboro dunduko.”—Tam. 103:19; Amo. 4:24.

6. Gine nga kakuti ruru mangaapai?

⁶ Tipa ani songodi ga Yekova bakere pagbia, ani duwa ka ani kakuti gaani ruru mangaapai fuko. Gu boro nakakuti ruru mangaapai, ní niziazia ni na niruruni. Wo gu kumba nangia Eyobo adu.—Eyo. 1:1.

Wai gu Ngbanga re Atona

7, 8. Wai Satana abisira pa ru ga Yekova bakere pagbia?

⁷ Agarã wa 6,000 kusayo, maraika sa abisira pa ru ga Yekova bakere pagbia. Gupai nasa gu maraika re ko mangi gupai re nga, ko aidi i naairisoko wa Mbori. Ko asa bambata kumba na diako nangia Adamu na Eva i sogo ga Yekova bakere pagbia, na ko agumba gbegberẽpai kuti Yekova ki yawee Ko ape ziree. (Oni gedi Bambata Pai 3:​1-5.) Gu basamungu re ada nikere vura Mbori, nga Satana (gu boro nasovura kuti kurani), Bakitingbanga, woo (banangi aboro), na Daragona (bariti aboro).—Yugo. 12:9.

⁸ Satana amoi tiko nigu bazogo nasovura kuti Mbori. Fuo duhe were tie, ginipai si aidi Bakere Gbia nga Yekova mangihe? Ya mo si aidi ko imi Adamu na Eva gbiati Satana kusayo nibasa? Ko aduadu na ome beko ka mangaha wo, na ka ko amangihe wo, ka si aima yugo gupai nga kina ko duna ome tiko kisusi. Ka si ayugu gupai a nga kina rengo du Yekova apehe ki yawee ka Adamu na Eva kuo gako ndiko, i kpi akpi. Ono tipagine Mbori aamanganga gupai re ti ni ya?

9. Gini apai Satana akapa kuti ni?

⁹ Wa Satana agumba ziree na ki sakpoto aAdamu na Eva yo ti Yekova, gure nga ko akapa akapa kuti gu rengo du Yekova nani ka ya fu aboro i gisangbako. Kurigure, wa ko asa Adamu na Eva i basasangba Mbori, gure nga ko akapa akapa kuti gupai nga amaraika na aboro rengbe arengba ka nye niruruyo fu Mbori. A wa si adu tipa Eyobo, nga gu kumba nanye niruruko fu ga Yekova bakere pagbia, Satana ayawee ko rengbe arengba ka sa aboro naabayo dunduko kusayo ti Mbori.—Eyo. 2:1-5.

10. Wa Mbori ambu gbanga regbo si susi ko kini ru ka yugopa ru gako bakere pagbia, ginipai ko ambu gene fuhe?

¹⁰ Yekova ambu gbanga regbo tipa gupai yugutihe nga, rengo du Satana agumbaha. Yekova mbu regbo tipa aboro yugu gupai nga i nara fu gako bakere pagbia. Ginipai mangi vuru gi regbo yo Yekova ambuhe re? Gupai mangi nga, Satana nyakasi gako riigbu nga ga samungu. Yekova nika gbarasa gu riigbu re agbarasa na ki gbarasi Bakitingbanga a, si kini yugu gupai nga ru ga Yekova bakere pagbia aru. Yekova aima ino gupai a nga wenepai nika manga amanga kumbatayo, nga gu ko agumbapaha ho aAdamu asamungu ni.—Bam. P. 3:15.

11. Ginipai badungu aboro namangihe nibipa ga Yekova bakere pagbia?

¹¹ Badungu aboro naima yugo gayó idapase kuti ga Yekova bakere pagbia na ki kakuti ruru mangaapai. Agi aboro re nga Ebere, Enoka, Noa, Abarayama, Sara, Moize, Ruta, Davide, Yesu, gu ga Yesu abawiriki nadumbata, gbiati kura amirioni aboro areme. Agu aboro nasongoda ga Yekova bakere pagbia re nayugo Satana niʹiraziree na i nadia gupai kusayo rii Yekova Bakitingbanga aye nani kutiko ho ko ayani wee ko rengbe arengba ka sa aboro dunduko kusayo ti Mbori.—Snz. 27:11.

Yekova Nika Digiso Gbegberẽ Apai Adigiso

12. Wai ani aino nga Mbori ambunga gbegberẽ apai ambu si nimangi kindi te?

¹² Si naida ani duna gu kido nga, Yekova ima mbeda ka ziasi pa gako bakere pagbia. Ko ambunga gbegberẽ apai ambu si nimangi kindi te, na ani ini ya ani naraka ti yangara arame. Yekova agbarasi gbegberẽ aboro na Ime Akangbii. Ko agbarasi Sodomo na Amora gbiati Faro na gako aborovura. Sisera na Saneriba na gako abasovura nangia aAsura aarengbanga ka diabe Guko Nga Bahe Kisusi te. (Bam. P. 7:1, 23; 19:24, 25; Gate 14:30, 31; Abasa. 4:15, 16; 2 Aba. 19:35, 36) Sidu tie, si naida ani duna gu kido nga, Yekova Mbori ambunga aboro ambu kindi i naayugo zanga irisa tipa rimoko na kini rungosi gako aDezire te. Kurigure, ani nabi gu gopai abi awere nayugo gupai nga Yesu nga bakindo awere ngbangbaturũ yo na digido gi sino raka re ima mbeda.—Mt. 24:3.

13. Ginipai ka ani mangihe ani ki bati ho Mbori nika imo avurako ni?

¹³ Ka ani aidanga Mbori imi rani ho ko nika imo avurako ni ya, si naida ani nye niruru rani fu ga Yekova bakere pagbia. Wai rengbe ani ka manga gipai re? Ani rengbe ka mangaha ninye ani nikparakpara rani ti ga Satana zogarago na ka ani agundenga be ga Satana aboro ya. (Yes. 52:11; Yo. 17:16; Amo. 5:29) Kinagu ka ani kpara tirani ti ga Satana zegino, si ka ani rengbe ti ni ka songoda ga Yekova pagbia na kidu na maabangirise nga ani nika bata abata ho Yekova nika mangapai ni ka ziasi rimoko na ka yugo nani nga ko nga gu Bakere Gbia kisusi duho.

14. Ginipai yuguyo ho rogo apapara Ziazia Kekeapai?

¹⁴ Ziazia Kekeapai naabaha nafura tipa aboro naapa ga Yekova bakere pagbia. Gu bambata akapita du biata nafura tipa wai Mbori akusi ahe na wai aboro aingipai, ono gu yangara akapita du biata nafura tipa wai aboro nika gbia bata. Gu kura papara Ziazia Kekeapai re naabaha nagumbapa gupai Bakere Gbia nga Yekova amangihe tipa ka digiso gako ringbisapai tipa aboro, tipa kpotosende, na tipa haurago naabaha. Gu kitabu nga Bambata Pai nagumba wai Satana aye na gbegberẽ pai ku zegino, ono yangara papara gu kitabu nga Yugoti nayugo wai Mbori nika dia gbegberẽ apai kusayo, ki imi Bakitingbanga, na gupai Mbori akpinyemuhe ki mangi auru kpotosende a wa duhe ngbangbaturũ yo. Nirengo, Ziazia Kekeapai nagumbapa wai furani ingapai na kpio atona, na si nayugo wai furani agu apai re nika nyasa, bakere ngbarago na nyenye unga ki di baha.

15. Ginipai si aida ani mangihe tipa ka gbia undo ho gu ngbanga du tipa ga Yekova bakere pagbia nika nyasa ni?

¹⁵ Fuo regbo ngbutuko, agu apai nga ga gi zegino re nika ariatihe naabaha. Gu ngbanga du tipa ga Yekova bakere pagbia nika nyasa. I nika dia Satana kusayo, ki imiko nyeanye kindi, na ga Mbori pai ki nye auru kpotosende. Ono tipa ani gbia gu badungu amaku Fugo Mbori agumbapaha, ani duwa ka ani songodi ga Yekova bakere pagbia awere. Si naida ani diberã kina awere angianga kadu wa gu boro sungu ngbagoro ndugu ya. Ka ani aida ka yaa: ‘Yekova du tipa re,’ si naida ani du tipa ko a.—Tam. 118:6, 7.

Ani Rengbe Arengba ka Kakuti Ruru Mangaapai!

16. Tipagine si aida ani du ti ni na gu kido nga, aboro rengbe arengba ka kakuti ruru mangaapai aʹasada ki vura du vurũ?

¹⁶ Ani rengbe arengba ka songoda ga Yekova bakere pagbia na ki kakuti ruru mangaapai, bambiko gu mokedi nangia Pauro ayaa: “A nga asada ye sa roni te, kina gu ka boro hi he ahi. Ono Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.” (1 Kor. 10:13) Gini bete aʹasada rengbe ka ye sa rani, na wai rengbe Mbori ka undo rani ani hihe?

17-19. (a) Gini asada aYisaraere ambu tiyo sani ngbakungba yo? (b) Tipagine duhe ti ni nga ani rengbe arengba ka nye niruru rani fu Yekova?

¹⁷ A wa gupai nadu tipa aYisaraere ngbakungba yo ayugoho, “asada” naye sa rani nga gu nasa rani ani kuo ga Mbori ndiko. (Oni gedi 1 AKorindo 10:​6-​10.) AYisaraere arengbe arengba ka diabe gu asada naye sayo, ono i ‘akpinyemu gbegberẽ apai’ ho Yekova afu ambirigba ni fuyó nga agura i arengbe ka rira tipa diwi sa. Wa vura duhe nga i aaringa pasio te tipa gbanga regbo, Mbori aima fu manu fuyó nibakerehe. Ono ho Mbori afu ambirigba ni fuyó, i atona ka dungura ra ningbaduse.—Geda 11:19, 20, 31-35.

¹⁸ Mbata fu gure, ho Moize adakpa Bagangara Sinai ni ka dia aNdiko be Mbori, aYisaraere asatiyo ni airisikpiahe; i aairiso kpia wiri bagara, kini riki ahe, na kini mbirihe. Wa Moize aadunga ho ya, i ambu asada si furii omeyo. (Gate 32:1, 6) Ngbutuko mbata fu aYisaraere rimi ku Ringara Mokido yo, agu aMoabo nangia adee anangi bangiri badungu akutu aYisaraere i ki tona kodaba naayó. Ti gu regbo re, badungu akutu aYisaraere nakpiki mbiko gayó ingapai. (Geda 25:1, 9) Ti kura aregbo, aYisaraere asamungu ki tona ka kpakana Moize na Mbori a! (Geda 21:5) Zavura fuo gbarasa Mbori gu gbigbita aboro nangia Kora, Datana, Abirama, gbiati agu aboro nangbe naayó, aboro aima kpakanahe a, kini berẽhe nga gupai Mbori amangihe re aarunga te. Nisangbana gipai re, aYisaraere 14,700 nakpiki be gu kaza gberãngbi naye be Mbori.—Geda 16:41, 49.

¹⁹ Asada ho dagba agu aʹasada ani nabihe re aYisaraere aarengbanga ka hihe ya te. Kina aboro nafutiyo nisayo sa gu asada re bambiko i aadunga na idapase berewe kuti Yekova te, na bangiriyo aima go tiko, bangiriyo ki go ti gako wene sino, na bangiriyo ki go ti gupai nga gako agene nikina ruruhe. A wa si adu tipa aYisaraere, agu aʹasada naye sa rani, si nga gu aboro naahihe ahi. Ka ani mangi ome gbe tipa ka diabehe, na ani ki kido kuti Mbori, ani nyeanye niruru rani. Gipai re nga kina rengo, bambiko “Mbori du ni irarengo,” na ko ambunga rani i ‘asadi rani susi gu ka ani rengbe nani te.’ Yekova ambunga rani ani du rogo gu asada boro arengbanga ka diabehe ya te.—Tam. 94:14.

20, 21. Ho du ani ni rogo asada, wai Mbori ‘ambakada gene’ furani?

²⁰ Yekova ‘nambakada gene’ ninyakasa ko rani ani sovura kuti asada. Nikpiapai, abarungosi rani rengbe ka mbusa rani ti kpotorani gbegberẽe tipa ka sa rani ani mbu gaani idapase. Ngbatunga gu rungosi re rengbe ka sa rani ani mbu gaani idapase tipa i andu kaa ta rani kindi watadu ka imo rani a. Ono a wa gupai Pauro agumbaha rogo 1 AKorindo 10:13 ayugoho, ani ini ya asada nago ago. Yekova arengbanga ka mbu asada si dati wai ani arengbanga ka hihe ki nye niruru rani fuko ya te. Mbori rengbe arengba ka nyakasa gaani idapase ki fu ome furani ani nye niruru rani.

²¹ Yekova nanyakasa rani na gako ziazia toro. Ziazia toro naundo rani a ani tingidi agu apai rengbe ka undo rani ani sovura kuti asada ki dibehe. (Yo. 14:26) Si ki tadu were, ka ani ameranga ngba gbegberẽ gene ya. Nikpiapai, ani ima ino gu ngbanga du tipa ga Yekova bakere pagbia gbiati pa nye boro niruruni. Gi inohe re gbiati ga Mbori ziazia toro aima undo badungu aboro i nye niruruyo dati kpio. Ono anga kpio du nambakadi gene fuyó i bati be asada te; ga Yekova undo du nasayo i hipai dati kpio. Ko rengbe ka undo rani kinawo a. Na ko nakeda gako amaraika akeda a i undo rani, bambiko i nga amoyambu “du ni kedikedi yo ka manga pa agu yo nikadia ũkumbo bata.” (Eb. 1:14) A wa gu kekeapai ngbe fuo gere ayugoho, kina agu aboro sa naka kuti gayó ruru mangaapai si aida i moibangiriyo nga i nika songoda ga Mbori pagbia asongoda nyeanye kindi. Ani rengbe kadu dagba agi aboro re ka ani kakuti Yekova nigaani Bakere Gbia.

[Gu kpiahe du ti kpewaraga 28]

Gaoni Karagapai Nga Gine?

• Tipagine si aida ani idi ti ni kuti gupai nga Yekova nga gaani Bakere Gbia?

• Gine nga kakuti ruru mangaapai fu Mbori?

• Wai ani aino ya Yekova nika ziasi pa gako bakere pagbia aziasi barambeda?

• Ringbisihe kuti 1 AKorindo 10:13, tipagine duhe ti ni nga ani rengbe arengba ka nye niruru rani fu Yekova asada ki vura du vurũ?