“Mo Bérẽ Pa Gu Sunge Mo Adi He Be Gbia”

“Mo bérẽ pa gu sunge mo adi he be Gbia, mo dígisi he.”—KORO. 4:17.

1, 2. Gini sunge du kurii aKristano si aida i mangihe fu aboro?

ANI na sunge rirani si aida ani mangihe fu agu aboro ani araka dagbayo. Agu adiaberã i nika mangaha awere rengbe ka sa gupai nga i bati ti regbo “bakere gberãngbi” watadu i kpiki. (Yugo. 7:14) Gu kumba ga Mbori toro adu kugiiko ko ke Asanza, ko ayaa: “Mo bátasi agu yo i andu na yo sa kpio; mo ká na agu yo i naima ringbisa yo sa imo yo.” Iiriwopai du ko agumbaha re nirengo! Ka ani agumbanga pa gu diaberã fu aboro si aida i mangihe ya, si rengbe arengba ka ye na bapekure kurirani. Nirengo, gu kumba re aya berewe wee: “Ka mo ya, ‘Mo ngere, ani aina nga pa gi te re,’ gu ko ninawisiga kpotoyo aina nga pa ha te? Na gu ko ninabanda tororo ko aina nga pa ha a te; Ati ko afu mosoro fu aboro rengbe na kina gayo mangaapai?” Ono si tie ziazia nga, ga Yekova amoyambu ho rengbe ka yawee i ‘ainongo pa’ gu kerepai naye mbatayo sa aboro te.—Snz. 24:11, 12.

² Yekova nabi unga na kikiipaha. Ko nazungodi gako amoyambu i aʹasadi tiyó ngba agene dunduko a wa rengbe omeyo nani ka undo aboro i bati. Ga Mbori abamangisunge dunduko nibasasa si aida i gumba gu pangbangaa fu aboro nayugo gene bata, nga gu du rogo Ziazia Kekeapai. Gaani sunge wakina ga babandarago natangbani ho ní abi kerepai ni si niye. Ani aidanga kure agu aboro atagbianga gene unga ya du kurirani te. (Yeze. 33:1-7) Nairiwo wai nyakipa gupai tie nga, ani ‘naatungusapai’ kindi!—Oni gedi 2 Timoteo 4:1, 2, 5.

3. Gini apai ani ka wirikaha rogo gi papara kekeapai re na agu du ue naye tifuoho?

³ Rogo gi papara kekeapai re, oni nika wirika wai rengbe oni ka diabe agu apai rengbe ka ká na gene beroni ka oni mangingo gu sunge nayugo gene bata ya, na si nika yugo wai a rengbe oni ka undo badungu aboro. Rogo gu papara kekeapai naye tifuo gere, oni nika wirika wai rengbe oni ka gbia abirĩ yugopai tipa si undo roni oni yugo gu nyanyakipa arengo du rogo Ziazia Kekeapai. Gu biata papara kekeapai nika gumba bete agu apai nafu wasa namanga fu abatakipande kindo rogo zegino dunduko. Ono mbata fu ani wisigi agi apai re, si niwenepai ani wisigingo bete agu apai nasa gi regbo ani araka ti ni re si du nigbegberẽ regbo.

Badungu Aboro na Maabangirise Te

4, 5. Giniapai namanga aboro areme rogo zegino, na wai badungu aboro amangapai sa ni?

⁴ Agu apai namanga rogo zegino, si nayugo gupai nga, ani naraka ti “digida rago,” na digido zegino ima mbeda kada. Ngbatunga aboro dunduko awere du rogo agu apai Yesu na gako abawiriki ayawee si nika manga rogo “kusa rago.” “Rungo,” nga avura, angbongi, abazigizo, na gu kura agberãngbii, si narungosi aboro areme. Kuoandiko, gbangbati, na agu amangaapai Mbori aidanga nani ya, si ima maapai rogo zegino. Zavura agu aboro naʹasada tiyó aʹasada ka raka ringbisihe kuti agu arugute du rogo Ziazia Kekeapai, gi regbo ani araka ti ni re fuyó a nikina ‘gbegberẽhe.’—Mt. 24:3, 6-8, 12; 2 Tim. 3:1-5.

⁵ Ono tie, agu apai namanga rogo zegino, badungu aboro ainongo gupai si ayugoho te. Si ki tadu wo, badunguyo kini berẽ kina pa mbakada bayo na gayo aborokporo. Agu abadiangbarani nakpiko, watadu gu kura agberango namanga, si nafu bakere rungo fu badungu rani. Wa duhe nga badungu aboro ainongo gupai nzunzu agu apai re amanga ti ni te, na gupai rengbe ka diaha kusayo, i na maabangirise te.—Ef. 2:12.

6. Tipagine ‘Babera Duna Bakere Ome Ti Ni’ arengbanga ka undo avuruhe ti ni ya?

⁶ ‘Babera Duna Bakere Ome Ti Ni,’ nga bariwara ngbii zire pambori, ri fu wasa fu aboro kina tooni gbua. Ri ima vundo rii aboro yo rogo toroyo na “gu imekakue nga ga gari bari.” Kurigure, zire pambori namangatihe wa debäri, kini zomia “abakindo zegino” na kini moi yó kutii gaha ome nimangaha sunge na zire yugopai nga ga pambori gbiati gu mangaapai nga ga sangbaatoro tipa ka mbu aboro i du tiibe abakindo. Si ki tadu were, zire pambori kini mo ka gbia ome na kini moipai kurii aboro, ono ka si aidanga na gu rengo du rogo Ziazia Kekeapai ya.—Yugo. 17:1, 2, 5; 18:23.

7. Gini kerepai napido badungu aboro kumbatayo, ono wai rengbe ani ka undo aguyo?

⁷ Yesu ayawee badungu aboro nandu ngba gu gene du nikikiihe nga gu nandu koyo du kpio ni. (Mt. 7:13, 14) Gu kura aboro nandu ngba gu gene re mbiko gupai nga kina yó naká gupai Ziazia Kekeapai ayugoho, ono badunguyo nandu ngbaha mbiko gupai nga i anangi yó ananga, watadu i ambuyo rogo bitimo, ka i ainongo gupai nzunzu Yekova aida i mangihe ya. Isoke ka aguyo aʹaria gayo raka aʹaria wa ka si adu nga i agbia wene nduapai rogo Ziazia Kekeapai tipa ka mangaha wo. Ono aguyo nye rogo Babera na aguyo aidanga na agu arugute du rogo Ziazia Kekeapai ya, i abatanga ti regbo “bakere gberãngbi” te.—Yugo. 7:14.

Oni Naatungusapai Kindi ‘Zanga Piriga’

8, 9. Ginipai agu aKristano nadu rogo bambata sa kama agarã amangihe ho aboro aasoga yó ni, na tipagine i amangipai ti ni wa gure?

⁸ Yesu ayawee gako abawiriki nikaa tungusa gu wene pangbangaa nga ga Kindo na kini sa aboro ni abawiriki. (Mt. 28:19, 20) Ti aregbo dunduko, ndikidi aKristano naabi tungusa wene pangbangaa nigu sunge nayugo gupai nga boro nara fu Mbori, na nigu nyanyakipa pai boro ayugopa gani idapase rogoho. Sidu, agu apefuo Yesu nadumbata anaatungusapai kindi zavura ho aboro anaasoga yó ni vurũ. I anaakido kuti Yekova tipa ko fu ome fuyó, kini kpari fuko tipa ko undoyo ‘i niipeke ga Mbori pai apeka zukazuka’ kindi zanga gunde. Yekova agi gayo kpee ki hiisi yó niziazia toro. I kini gumba gako pai zanga gunde.—Amo. 4:18, 29, 31.

⁹ Ya mo ho aboro atona ka soga ga Yesu abawiriki ni nikerehe, i ambu tungusa wene pangbangaa? Wagusa te. Ngbadu ga aYuda abarumbatayo rogo pambori aimi mbiko gu tungusapai nga ga amokedi, sidu, i ki zi yó, ki serẽ yó, na ki taki yó. Ono wa i avura manga amokedi na agi apai re, “i apiriga nga ti yugo pai na tungusa pa Yesu ya ko nga Kristo ti yekaru yo” te. I arugutiyo na gupai nga si naida i ‘gi sangba Mbori susi sangba aboro.’—Amo. 5:28, 29, 40-42.

10. Gini akpakarapai aKristano agbiatiyo nani areme, na sangbana gayó wene mangapai rengbe kadu nga gine?

¹⁰ Badungu ga Yekova amoyambu areme aboro aatakanga yó watadu ka maa yó ku bambukiso yo mbiko tungusapai ya. Ono wa vura duhe wo, ndikidi aKristano dunduko nagbiatiyo agbia na aʹasada ngba arikoho. Nikpiapai, gu sangbakpotoroniyo Ziazia Kekeapai arabaha rengbe ka sa roni oni naamanga gupai badungu aboro amanganga ha ya, watadu ka sa roni oni mbu manga gupai badungu aboro amangaha. Gaoni abadiasunge, agu akuaroni du oni naayó sukuru yo, watadu gaoni amurakporo, i rengbe kaa bi roni nigu boro dukia, bambiko oni namaamburu gaoni adiaberã rii agu abangua arugute nga ga Ziazia Kekeapai. Ono ka si vura kaa manga wo, si aidanga agu apai i agumbaha nigbegberẽhe tipa roni zeresi kpotoroniyo te. Gi zegino re awere rogo gu bitimo nga ga toro, ono si naida aKristano “[naakí] wa aimahe.” (Frp. 2:15) Isoke gu kura aboro kinaho nika bi gaoni wene mangaapai si ki sayo i fu taarimo fu Yekova.—Oni gedi Matayo 5:16.

11. (a) Ginipai rengbe kura aboro ka mangaha mbiko gu wene pangbangaa ani atungusaha? (b) Gini ngbatunga arungosi Pauro agbiaha, na ginipai ko amangihe sani?

¹¹ Si naida ani duna wingbaduse tipa kaa tungusa gu pangbangaa nga ga Kindo kindi. Gu kura aboro, zavura agumeroni, i rengbe ka sawia roni watadu ka manga kurapai tipa ka ba gberarago tironi oni mbu gupai oni amangaha. (Mt. 10:36) Aboro ataki gu mokedi nangia Pauro bara dunguhe mbiko gu sunge tungusapai ko aamangaha. Oni bingo gupai ko amangihe ho agi apai re aamanga ni. Ko akepai ki yaa: “Ani adu zukazuka rogo gaani Mbori yo ka gumba ga Mbori wene pangbanga fu roni rogo bakere kenapai, ani nahi pai mbata, i namangi rani ni wasiro.” (1 Tesa. 2:2) Nirengo, si aidi Pauro duadu na wingbaduse tipa kaa tungusa wene pangbangaa kindi fuo zioyo ko, ki uru arokoo tiko, ki taki ko na akpudu, na ki turã ko ku bambukiso yo. (Amo. 16:19-24) Gine nasako ko du na wingbaduse wa gure? Ko adu na wingbaduse mbiko gu bakere nyemu manga ga Mbori sunge nadu tiko.—1 Kor. 9:16.

12, 13. Gini fudifudiapai badungu awirina naagbia tiyó nani, na wai i naaʹasadatiyo ka diabehe?

¹² Si rengbe arengba a kadu nikpakarapai tipa kaa tungusapai zaaza rogo agu arago aboro asungongo rogoho dedede kporo ya, watadu rogo agu arago angenga agu aboro duna nyemu gu pangbangaa nga ga Kindo rogoho ya. Ginipai si aida ani mangihe ho du apai ni wa gure? Gure naida ani duadu na wingbaduse berewe gbe tipa kaa fura na aboro ti agu aboro ani agbia yó, singia bangiri gene watadu rogo kura aba. Si daada a ani aria gu regbo ani andu ti ni, watadu kaa ta gbe kina rogo agu arago rengbe ani arengba ka gbia aboro rogoho.—Oni ringbisinga ha na Yo. 4:7-15; Amo. 16:13; 17:17.

¹³ Gu kura fudifudiapai berewe si aida gu kura awirina sovura aso kuti ni nga, gbinza gbiati awokote. Gbinza na awokote nasa badungu aboro ka i tungusinga pai wai i aida ka mangaha ya. Ka si du nga wo duhe tipa roni, ka rago gberẽnga tironi ya. Yekova ima ino pa agu akpakarapai dunduko du tipa roni na ko nagbia ngbarago agbia mbiko gu bete sunge oni amangaha fuko ringbisihe kuti omeroni. (Oni gedi 2 AKorindo 8:12.) Ka oni vura kaa mbu be kina gini rungosiro vurũ, singia sogote du, kaza, watadu aboro aidanga na gu pangbangaa oni agumbaha fuyó te, si naida oni naatungusa wene pangbangaa kindi fu aboro ringbisihe kuti agu apai du tipa roni, na ringbisihe kuti omeroni.—Snz. 3:27; oni ringbisinga ha na Mk. 12:41-44.

‘Mo Berẽpa Gamo Sunge’

14. Gini kpiapai gu mokedi nangia Pauro amoihe fu akurako aKristano, na gini rugute ko afuhe?

¹⁴ Gu mokedi nangia Pauro anaaberãpa gako sunge nyanyakii, na ko anaangarasa akurako aidipase i niimangihe kinawo a. (Amo. 20:20, 21; 1 Kor. 11:1) Boro sa dagba agu aboro Pauro angarasi ní angia gu Kristano rimoko angia Arukipo. Pauro ake waraga fu aKorosaio ki yaa: “Oni gúmba ha fu Arukipo ya, ‘Mo bérẽ pa gu sunge mo adi he be Gbia, mo dígisi he.’” (Koro. 4:17) Ani ainongo gini ngbatunga boro nangia Arukipo na agu apai nadu tipa ko te, ono gupai ini ani he nga sunge kinaho ko adihe be Gbia tipa kaa mangaha. Ka oni ngia gu Kristano naima kpara gani raka fu Mbori, sunge kina beroni a oni adihe be Gbia. Ya mo oni naaberãpa gu sunge re ti aregbo dunduko tipa ka digisoho?

15. Gine gu kparatise nga ga Kristano akodaha, na si nasa rani ani sana tirani na agini asanahe?

¹⁵ Mbata fu ani zi bapatiza, ani akpara gaani raka fu Yekova rogo kpee yo. Gere nayugo gupai nga ani aima diaberã ka manga gupai ko akpinyemuhe. Sidu, si naida ani sana tirani ki yaa, ‘Ya mo pa manga gupai Mbori akpinyemuhe nga nyanyakipa pai nzunzu rogo gimi raka?’ Ani rengbe arengba kadu na asunge berani Yekova aida ani mangihe, wa gu nga ngerafuo gaani aborokporo. (1 Tim. 5:8) Ono wai ani naamangasunge na gu regbo du berani berewe gbiati omerani? Ginipai peresi ani paha mbatayo rogo gaani raka?—Oni gedi 2 AKorindo 5:14, 15.

16, 17. Giniapai rengbe paranga aKristano ka wisigoho nga aguyo adunga na bakere sunge kuriyo ya?

¹⁶ Ya mo mo nga gu paranga Kristano naima nyasa sukuru, watadu ima mbeda ka nyasaha? Ka si duwo, si nawira gupai gbe nga mo atadunga na aborokporo bero mo angerafuo yó te. Wa duhe tie were, ginipai mo aida ka mangaha na gamo raka? Gini adiaberã rengbe ka undo ro mo mangi gu ga Yekova sunge wenengai mo adihe? Badungu aboro naima mbakada gayo apai tipa ka mangasunge nibazakigene, na i aima gbia bakere ngbarago na wasa mbiko manga yó ho wo.—Tam. 110:3; Batu. 12:1.

¹⁷ Isoke si rengbe kadu nga mo nga gu paranga boro naima sona. Mo namangasunge tona wiso ku nyemu tipa ka ngerafuo tiro, ono ngenga agu aboro nangera kina ku bero tipa mo niiundo yó te. Mo naamanga agu asunge amanga nga ga dungurati ringbisihe kuti wai du regbo bero. Ya mo mo akpinga nyemu ka kiiso gamo ngbarago berewe tee? Ya mo mo aberẽnga pa kiiso gamo sunge tungusapai? (Tam. 34:8; Snz. 10:22) Rogo gu kura arago, si naida aboro mangi bakere sunge amanga yo tipa ka gbia aboro dunduko na gu pangbangaa nayugo gene unga. Ya mo gene bero wa ka mo mangi ariapai rogo gamo raka, singia tipa ka mangasunge rogo gu rago duna bakere zingo abatakipande Kindo rogoho?—Oni gedi 1 Timoteo 6:6-8.

18. Gini aʹariapai paranga kumba na diako amangihe, na asangbanaha angia gine?

¹⁸ Oni bingo gupai nadu tipa Kevin na diako nga Elena.a I Amerika yo (United States). Gupai ninaamanga rogo gu rago i aaraka rogoho nga, ho paranga aboro arogatiyo ni, i nangbe bambu tipa kaa raka tiihe. Si nga gupai Kevin na Elena amangihe a ho i arogotiyo ni. I dunduko ue naamanga sunge-marã tona wiso ku nyemu tipa kaa raka dodoroma raka. Ono tie, gu sunge-marã i aamangaha na agu asunge i aamanga ha kpuyo, si ambu regbo fuyó nikina tooni he tipa i naatungusapai. I abi gupai nga i nadia gayo bakere regbo kina kuti ngera fuo gayo ahe. Ono tie, ho i abi gu taata raka ni kura bazakigene na diako aarakaha i kidu na ngbarago, i adiberã ka aria gayo raka. Fuo kpara yó fu Yekova, i abagi gayo bambu ki ndu kaa raka tii agu abambu du na dungu vuruhe yo aboro araka tiihe kini tumo marã fu iraha ti digido diwi. Elena ambu gu sunge rii aamangaha ki tona manga gu naadia asaa tooni, na ri ki da ninazakigene. Kevin agbia wasa mbiko gu weneapai diako aapekaha fuko naamanga ba tungusapai yo, sidu, ko ki mbu mangasunge marã tona wiso ku nyemu na ki tona tungusapai nibazakigene. Fuo bete regbo kusa, i aga na kporo kurogo kura ringara sa Amerika yo ku Dioyo tipa ka mangasunge Kindo rogo gu rago nadu na bakere zingo abatungusipai rogoho. Fugo Kevin nga: ‘Gaani ramukporo aima du niwenehe tona ti kina gu regbo ani arogotirani, ono ho ani atona mangasunge ni sa tipa ka kiiso gu sunge ani amangaha fu Mbori, gaani ramukporo adu nibawenehe na ani ki gbia bakere ngbarago susi gu nadumbata.—Oni gedi Matayo 6:19-22.

19, 20. Tipagine du tungusa wene pangbangaa ti ni nigu bambata sunge nyakipaha areme?

¹⁹ Tungusa wene pangbangaa nga gu bambata sunge nyakipaha aboro amangaha auru kpotosende areme. (Yugo. 14:6, 7) Si nasa rimo Yekova si du niʹirisiʹirisihe. (Mt. 6:9) Gu pangbangaa du rogo Ziazia Kekeapai, si nambakada gu raka nga ga dungu akutu aboro na agarã dũ, nga aguyo naida nani, na si rengbe ka ndu naayó sa bata. Ono Pauro asanahe ki yaa: ‘I awira pa giaha wãi nizanga batungusipai?’ (Rom. 10:14, 15) Wai nzunzu rengbe yó ka giaha ka batungusipai adunga ya? Tipagine ka oni adianga berã ti ni kaa manga sunge tungusapai a wa rengbe omeroni nani tipa ka digiso gu sunge oni adihe be Gbia ya?

²⁰ Gu kura gene berewe rengbe oni ngbaha ka undo badungu aboro i rugutiyo naapa gi kere regbo ani araka ti ni re na asangbana agu adiaberã i amangaha, si nga mbakada oni gaoni gene yugopai. Rogo gu papara kekeapai naye fuo gere, ani nika wisigo wai rengbe ani ka mbakada gaani gene yugopai.

[Gu rukutu kekeapai du bandu kpewaraga yo]

Gaoni Karagapai Nga Gine?

• Gini sunge du kurii aKristano si aida i mangihe fu aboro?

• Wai rengbe ani ka diabe agu apai rengbe ka ká na gene berani ka ani tungusinga pai ya?

• Wai rengbe ani ka digiso gu sunge ani adihe be Gbia?

[Gu kpiahe du ti kpewaraga 9]

Si naida boro duna wingbaduse tipa ka tungusapai ti regbo sogote

[Gu kpiahe du ti kpewaraga 10]

Ginipai si aida oni mangihe ho ka oni tungusipai ni rogo gu rago adunga aboro dedede rogoho tiikporo ya?