Paranga Aboro, Oni Tingidipa Bakere Bamangironi Tona Kina Awere

“Mo nitíngidi pa Bakere Bamangiro a ti rago parangaro.”—BATU. 12:1, NW.

1. Wai Yekova ayugu gako kido kuti gu paranga aboro nairisoko?

YEKOVA nabi gu paranga aboro nga aKristano na nyanyakipa yó. I bangiriko nibawene yó wakina wai uru nakura wiso. Nirengo, ko aima fura tipa gipai re kumbatayo ki yawee ti regbo ga Wiriko “rimbasa abarosovura,” paranga akumba na adee ‘afú tiyo zaaza’ tipa ga Kristo sunge. (Tam. 110:3) Gi sangbanebi re adu tipa gaani regbo, nga gu regbo aboro nambu irisombori, kini berẽ kina patiyo, naapa marã, na kingia abasasangbaa. Ono tie, Yekova aima ino gupai nga gu paranga aboro nairisoko i adu kia ti ngbatunga agu aboro re. Nairiwo gu kido du Yekova nani kuti paranga aboro re!

2. Tingidapa Yekova nakoda giniapai kurogoho?

² Oni berẽnga pa gu ngbarago du Yekova nani ho ko abi paranga aboro ni i nitingidi pako ni Bakere Bamangiyo. (Batu. 12:1) A wa aboro naima inoho wenengai, anga tingidapa Yekova nga berã kina pako gbua rise yo te. Tingida pa Yekova nga manga gupai ko akpinyemuhe, mbu gako andiko gbiati bangua arugute si niingbe furani mbatayo rogo gaani raka na aʹuru dũ. Si nakoda gu kurapai a kurogoyo nga ani naakido kuti Yekova na ki ini gupai nga ko nabaka bangiriko abaka tipa ka undo rani. (Tam. 37:3; Yes. 48:17, 18) Ya mo gu bipai re du oni nani tipa Bakere Bamangironi?

“Mo Kída Kuti Yekova Na Kpotoro Yo Dunduko”

3, 4. Wai Yesu ayugu gako kido kuti Yekova, na tipagine duhe ti ni ninyanyakipa pai ani kido Yekova areme?

³ Rengo ngaha nga, Yesu Kristo nga bawene kpiapai furani tipa ani kido kuti Yekova. Ko araki ringbisihe kuti agu afugo du rogo Asanza 3:5, 6 nayaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” Ngbutuko fuo zio Yesu bapatiza, Satana aye ki asadi ko tipa ka fu gi zegino re na gaha taarimo fuko. (Ruka 4:3-13) Yesu aambunga tiko Satana nangi ko te. Ko aima ino gupai nga, ndikidi “aũkumuko na irisa na unga” nga mosoro “umbasitise na gunde ti Yekova.”—Snz. 22:4.

⁴ Gu zegino du awere, si ima hi be agu asino nga ngbaduse na gbangbati. Rogo ngbatunga apai wa gere, si nipatatamana ani pekefuo ga Yesu kpiapai. Oni moi gupai ku berã roni yo nga Satana nagbata gene rogo apai dunduko tipa ka dia ga Yekova amoyambu kusayo ngba gu fitikiri gene nandu koyo du unga ni. Ko naida ka bi aboro dunduko i nindu ngba gu kikii gene nangbe koyo du kpio ni. Ka oni mbunga tironi fuko ko nangi roni wagusa ya! Kuba gure, si naida oni diberã tipa ka tingidapa Bakere Bamangironi ti aregbo dunduko. Oni kido kutiko na ngbaduroniyo dunduko, na ki zadi “ndikidi unga” nyanyakii, nga gu naima mbeda kada.—1 Tim. 6:19.

Paranga Aboro, Oni Duna Tatamana!

5. Gini bipai du oni nani tipa gi zegino re kumbatayo?

⁵ Gu paranga aboro natingidapa Bamangiyo, i ima du na tatamana ki susi agu akurayo atingidanga pako ya. (Oni gedi Atambuahe 119:99, 100.) Bambiko wa du yó na kina gu bangisa bipai du Mbori nani, i ima rugatiyo nani nga gi zegino re nika digo adigo barambeda. Ka si vura du nga garã roni kindi nikina wiri toonihe, zanga kapa, oni ima bi gupai nga aboro dunduko nabakabangiriyo tipa wai raka yó nika du kumbatayo. Ka si du nga oni sukuru yo, si nawira gupai nga oni ima giapai tipa birikosirago, gu bakere faarago namanga rogo zegino dunduko (global warming), dewa angua, na gu kura apai nawira agure. Aboro nabakabangiriyo nibakerehe tipa agu apai namanga kina kumbatayo re. Ono kina aDezire Yekova sa rugutiyo na gupai nga agi apai re du dagba agu apai nayugo gupai nga gi ga Satana zegino re ima mbeda ka digo.—Yugo. 11:18.

6. Wai paranga aboro ananga tiyó areme?

⁶ Si nafu kina gberarago nga, gu kura paranga aboro nga ga Mbori amoyambu ima mbu ngbaduyó yo si zere, na i aberãnga gupai berewe nga gu raka du rogo gi zegino re nikina guruhe te. (2 Pet. 3:3, 4) Gu kurayo ima rimiso tiyó kurogo manga kere ingapai mbiko gbegberẽ kpamiatise na mbiko agu ahe gbiati kekeapai nazingisa nyemu kodaba ti aboro. (Snz. 13:20) Nagberẽ gupai nga boro gbarasipa gu weneringise du dagba ní na Yekova baraho ani ambeda ni kuti digido gi zegino re! Kuba gure, oni wirikipai ti gupai namangi aYisaraere rogo gu garã nangia 1473 M.B.K. ti gu regbo i azi bataya rogo gu Kpasakpasarago Nga ga Moaba, mbembedii na Ringara Mokido. Ginipai namangi rogo gu ba re?

I Ati I Naima Mbeda Koyo

7, 8. (a) Gini birĩ Satana amangisunge nani rogo gu Kpasakpasarago Nga ga Moaba? (b) Gini birĩ Satana amangasunge nani areme?

⁷ Ti agu aregbo nangiaha re, Satana aidi ka ká na aYisaraere ti dia yó gu gayó ũkumbo Mbori akidopaha. Satana aaida gu nebi nangia Birama tiwa yó ono ka ko atiwa nga yó ya. Fuani, ko amangisunge na gu kura abirĩ berewe tipa ka i gbianga maku be Yekova ya. Satana amangisunge na agu adee Moaba nangia airabäri tipa i nangi yó, na bara gere Satana adu na diabese rogo gako birĩ. Aboro atona ka manga sino pa bäri na agu awiri aMoaba nga adee na kini nugadi sande fu gu gayó mbori nangia Bara-peoro! Wa si avura du nga Ringara Mokido aima mbeda fuyó, bange agu aYisaraere nakpiki tipa gupai re adu nga 24,000. Nairiwo gu riko gbegberẽpai namangi re!—Geda 25:1-3, 9.

⁸ Areme, ani ima mbeda koyo du vovo zegino ni, nga gu naima ngba ki susi gu Ringara Mokido nadu re. A wa Satana nidu nirengo, ko mangasunge na wasiwasi kodaba tipa ka gberesa ga Mbori aboro. Ruru mangaapai areme rogo zegino te, aboro nabi meteka nigupai agberanga ya, naapa kodaba kumba na kurani i nabihe tigaha nga ga boro siapai du nitiní. Wirinarani sa ni dee ayaa: “Kina Bambu Kindo yo sa na kporoyo awire naawirika gupai ni nga kodaba kumba na kurani gbiati kodaba na gu boro angia gamo badiarogatise ya, si nga gbegberẽpai bangiri Yekova.”

9. Ginipai rengbe ka manga ti gu regbo boro asona ní kidu na bakere nyemu kodaba na wai rengbe oni ka sovura kuti gupai re?

⁹ Gu paranga aboro natingida pa Bakere Bamangiyo ima ino gupai nga kodaba nga gu ziazia gamahe du tipa unga na tipa ka batika agude. Sidu, i ima ida kuti gupai nga, kodaba duwa ka si du kina kuti ga Mbori andiko, nga kina dagba arogotise sa. (Eb. 13:4) Ono tie, ti gu regbo nyemu kodaba nidu ninyanyakihe ho boro asona ni, si rengbe arengba ka gbarasa ga boro berãpai. Si rengbe kadu nikpakarapai ti gu regbo re tipa boro banda tiní. Ginipai rengbe oni ka mangaha ka si du nga gbegberẽ aberã tona ka rimo kurironi yo? Oni kpari fu Yekova kakaka tipa ko undo roni oni berẽkurii weneapai. Yekova naadegatuko ti aregbo dunduko koyo du agu aboro ni nagbata ko na ruru ngbaduyó yo. (Oni gedi Ruka 11:9-13.) Ka oni afura tipa kina agu apai rengbe ka sonosa boro, si ima rengba ka undo berãroni.

Oni Sia Gaoni Asásá Nitatamana!

10. Gini iraira berã si aida ani nehe, na gini asanahe si aida ani sana tirani nani?

¹⁰ Gu kura ndupai du paranga aboro ti ni rogo zegino wa i ti dingisoro na kini mangi kina agu apai ngba tiyó, si nga i zanga ga Mbori arugute na ndikidi maabangirise beyo tipa kumbatayo te. (Snz. 29:18) I wakina agu aYisaraere nambu pekafuo Yekova rago Yesaya kini raki na “ngbarago na pa du pusiapusia kidu, . . . na pa ri pasio na mbira imekakue.” (Yes. 22:13) Kuba gupai nga ani naakpi agu aboro re, tipagine ka ani aberãnga ti ni kurii gu nyanyakipa maabangirise Yekova nafuhe fu gako amoyambu ya? Ka si du nga oni nga ga Mbori paranga moyambu, ya mo oni nangera nyanyakii kumbatayo tipa vovo zegino? Ya mo oni namanga ome tipa kadu “na rugatise, na rurupai, na sinombori, . . . ki ningere tipa gu betedi maabangirise” Yekova nafuhe furoni? (Tito 2:12, 13) Gaoni karagapai kuti gi sanahe re nika aria agu asásá moi oni he tipa tironi.

11. Tipagine si aida gupai ti ni nga gu paranga aboro du sukuru yo wirikipai wenengai?

¹¹ Zegino naida paranga aboro moi kina agu asásá nga zegino. A wa duhe rogo sino raka, agu roni du sukuru duwa ka oni wirikipai wenengai tipa ka duna inohe. Si aidanga oni naawirikapai na kina pa gbia wene sunge-marã berãroni yo te, ono oni berẽpa ngarasa dungurati aberã a, naapa du niwene abatakipande Kindo. Wirikapai nika undo roni oni fura wenengai, kini berẽ wenengai, na kini fura na aboro nizera na rogo irisa. Berewe a, gu paranga aboro nawirika Ziazia Kekeapai, na kini asadi tiyó ka raka kina kuti gaha arugute, i nagbia bawene wirikapai, na si kini mbakadiyo tipa nyenye unga kumbatayo.—Oni gedi Atambuahe 1:1-3.a

12. Gini kpiapai si aida agu aborokporo nga aKristano wirikipai behe?

¹² Rogo ringara aYisaraere, pa yugo abaagude pai fu awiriyo adu ninyanyakipa pai. Abaagude anaayugo badungu apai fu awiriyo, gbe, agu apai nga ga Mbori. (Pa Rug. 6:6, 7) Sidu, gu paranga aYisaraere nanaadegatuyo fu avunguyo gbiati fu gu kura sosono aboro, i anaagbia inohe gbiati tatamana, rugatinapai, giarogopaiyo, na tandu berãpai, nga agu asino adunga ti gu kura aboro ya, ono kidu kina be agu aboro sa nawirikapai tipa Mbori na gako arugute. (Snz. 1:2-4; 2:1-5, 11-15) Kinawo a si aida gupai nga agu aborokporo nga aKristano niyugopai fu awiriyo.

Ada Si Aida Oni Gipai Ngbayo?

13. Gini ngbatunga arugute paranga aboro agbiaha, na tipagine si aida ti ni i duna tatamana?

¹³ Dungu aboro ninaaruga paranga aboro kodihe na abayugupai sukuru yo nga aguyo ninaaruga agude sukuru tipa i du na diabese rogo gayó raka yo. Ani nazungadi roni oni kpari fu Yekova ko undo roni wa oni kaa wisigo agu arugute re kini ringbisihe na Fugoko gbiati gu rigo nga ga toro ruru kangara moyambu afuhe furani. Rogo gaoni wisigo Ziazia Kekeapai, oni ima ino gupai nga paranga aboro gbiati azanga inohe nga gu bambata aboro Satana aida ka nyasa riipa yó. Nikpiapai, ati Edene yo, Satana agbata kina Eva mbiko ri naadunga na inohe gbe ya. Kandara nunga ri aazionga ko te. Ka ri adegeturi fu Yekova si ka ngba ti gia ri sangba Satana mbiko Yekova nangia gu boro naima yugo gako nyemuse tipa ri rogo dungu agene.—Bam. P. 3:1-6.

14. Tipagine si aida ti ni ani degeturani fu Yekova na fu agu avungurani nga aidipase?

¹⁴ Bakere Bamangironi nakpinyemu roni akpi, na ko namangaha wo na ngbadukoyo dunduko. Ko naida oni du na ngbarago nyeanye kindi, angianga kina awere sa ya. Sidu, mbiko gu nyemuse du ko nani koyo du oni ni na gu kura aboro dunduko nairisoko, ko nafura furoni wa Baroni niyaa: “Gene du re, oni ndú ngba ha.” (Yes. 30:21) Agu roni avunguroni airiso Yekova, bakere maku du ngaha furoni. Si naida oni degeturoni fuyó niʹirisa ti gu regbo oni amaa asásá. (Snz. 1:8, 9) Nirengo, i naida oni gbia nyenye unga, nga guhe nyakipaha ki susi gu worimo watadu aũkumuko du rogo gi zegino re.—Mt. 16:26.

15, 16. (a) Gini kido si aida ani du nani kuti Yekova? (b) Gini nyanyakipa pai ani awirikaha ti gupai nadu tipa Baruka?

¹⁵ Agu aboro natingidapa Bakere Bamangiyo, i nambu gayó raka niwiri taataha, kini kido nga Yekova “ahe nga” unda yo wa sa te, na ko “ambú nga” yó a te.” (Oni gedi Ebere 13:5.) Wa duhe nga gi berãpai re kia ti gupai zegino aida nani, si naida ani bandatirani ka sino zegino moi nga pai kurirani ya. (Ef. 2:2) Nibi gipai re, oni wisigingo gupai nadu tipa ga Yeremaya bakeapai nangia Baruka naraki Yerusarema yo mbata fu gbarasayo ho rogo gu garã nangia 607 M.B.K. na tingbafuo gbarasayo ho.

¹⁶ Si nawira gupai nga Baruka aaida ka raka wene raka kidu na ahe beko gbe. Yekova abi gupai re na ki za Baruka tipa ka ko gbatanga “bakere apai” tipa tiko ya. Baruka aduna umbasitise gbiati tatamana, bambiko ko agi gupai Yekova agumbaha fuko na ki bati ti gu regbo i agbarasi Yerusarema. (Yere. 45:2-5) Ono tipa agu aboro tigayo nagbata “bakere apai” tipa tiyó nga aũzegino, zanga peresa pa iriso Yekova mbatayo, aKasado (nangia aBabero) aima gbarasa pa agu he dunduko nadu beyo. Badunguyo aima kpiko a ti gu regbo re. (2 Peka 36:15-18) Gupai nadu tipa Baruka naundo rani ani bi gupai nga wene pagume na Yekova nyakipaha ki susi aũkumuko na worimo rogo gi zegino re.

Wene Akpiapai

17. Tipagine du gu kpiapai ti ni nga ga Yesu, Pauro, na Timoteo niwenepai fu ga Yekova amoyambu areme?

¹⁷ Fugo Mbori naundo rani na dungu apai tipa ani ndu ngbagene unga. Nikpiapai, Yesu angia gu boro narengbe ka manga dungu apai, ono wa si avura duwo, ko amoiberãko tipa ka manga gupai narengbe ka undo aboro nyeanye kindi, nga tungusa gu “wene pangbanga nga ga ga Mbori ngbi.” (Ruka 4:43) Gu mokedi nangia Pauro ambu pa gako apai tipa ka manga ga Yekova sunge gbe, nga ka tungusapa wene pangbangaa fu aboro. Timoteo ‘nangia wiri Pauro rogo idapase yo,’ ko awiriki gu wene kpiapai nangia ga Pauro. (1 Tim. 1:2) Ya mo Yesu, Pauro, na Timoteo, i abira tiyó mbiko gupai i amangihe na gayó raka? Wagusa te! Nirengo, Pauro ayawee ko aima ka agu ahe zegino aida ka fuhe fuko na si adu ‘bangiriko wa kina mirĩ ahe’ ka ko ringbisihe na gu maku ko agbiaha nga ka mangasunge fu Mbori.—Frp. 3:8-11.

18. Gini bakere ariapai wirina sa amangihe rogo gako raka yo, na tipagine ko abiranga tiko ti ni ya?

¹⁸ Badungu agu aparanga nga aKristano napekafuo gu kpiapai nga ga Yesu, Pauro na Timoteo. Nikpiapai, gu kura wirina sa niparanga nanaamanga sunge-marã mbata kini zi marã nibakerehe ayaa: “Mbiko raka mi kuti agu arugute nga ga Ziazia Kekeapai, i anaatumba pare kuari nikina ipo. Wa si avura du nga mi aazio bakere marã, mi abi tire wa mi na do kina fuo yuge. Ho mi asana abangerekuriisunge ni ki pe gupai fuyó nga mi naida ka mangasunge tungusapai ti aregbo dũ, i ape gupai nga i nika tumba marã re kuari, na gu maabangirise nga mi nyeanye na kina yo. Ono mi aima diaberã tipa ka mbu sunge. Badungu aboro aainongo ndu gupai mi ambu sunge bakere marã wa gure ti ni tipa ka mangasunge tungusapai ti aregbo dunduko te. Karagapai kuti gu gimi diaberã re nga mi naida ka raka ringbisihe kuti gimi kparatise fu Mbori. Awere, wa du berã re kuti iriso Yekova, mi na gu ngbatunga ngbarago tire marã watadu worimo arengbanga ka fuhe fere ya.”

19. Gini wene siapai i angarasa paranga aboro i mangihe?

¹⁹ Rogo zegino dunduko, akutu paranga aboro ima manga ngbatunga gu diaberã nga ga tatamana re. Paranga aboro, ho oni aberã ni tipa gaoni raka kumbatayo, oni moi gupai ku berãroni yo nga ga Yekova uru ima mbeda. (2 Pet. 3:11, 12) Ka oni kpingo agu aboro nagbia undo nibakerehe ti gi zegino re ya. Kuba gure, oni degeturoni koyo du agu aboro ni nakpinyemu roni nzunzu. Oni dungura “ũkumuko ni gaoni ku ngbangbaturũ yo” mbiko yo nga gu wene ba ngba tipa ka igo ahe, na nika fu nyenye amaku furoni. (Mt. 6:19, 20; Oni gedi 1 Yoane 2:15-17.) Ii, oni tingidipa Bakere Bamangironi. Ka oni mangihe wo, Yekova nika fu maku afu furoni.

[Gu rukutu kekeapai du bandu kpewaraga yo]

Oni Rengbe ka Tingidaha?

• Wai ani ayugo gaani kido kuti Mbori?

• Gini wirikapai ngba kisusi?

• Giniapai rengbe ani ka wirikaha be Baruka?

• Ada nga wene akpiapai furani, na tipagine?

[Gu kpiahe du ti kpewaraga 21]

Yekova duna bawene yugopai beko kisusi