Ya Mo Boro Ho Nzunzu Naberã Pare?

Ya mo oni abingo gupai nga oni nisaroni watadu boro ho naberã paroni te ti regbo fudifudipai? Watadu aboro avura inopa gaoni fudifudiapai ka i amaanga berãyo tipaha ya?

HO FUDIFUDIPAI agbia rani ni, gaani raka rengbe kadu wakina gu bavugumo nikaa digongo ya. Ti kura aregbo, ani rengbe ka bi gupai nga, gu kpakaraapai du ani rogoho, si ima igira ka gene adunga berani ani hihe ya. Wo si naamanga boro dedede ho du ní ni nifudifudi ní kpotoniyo, ho du ní ni na bakere gberarago, ho béno namangi ní ni gbegberẽe, ho du ní ni na bangabanga kaza tiní, na ho du ní ni rogo kura ngbatunga kereapai. Ani rengbe ka bi gupai nga boro ho rengbe ka undo rani watadu ka fu wasa furani te. Ono ya mo boro ho nzunzu naberã parani?

“Mbori Wasa Dunduko”

Ziazia Kekeapai nayawee Mbori nga “Ba inaapai, nga Mbori wasa dunduko.” (2 AKorindo 1:3) Gu Mbori nga Yekova, ko ima rugatiko na gupai nga ani naida wasa aida. Gu fugo nga “wasa,” si rogo Ziazia Kekeapai nibadunguhe, si kini yugu gupai nga Mbori ima rugatiko naapa agu apai nafuda rani, na ko na nyemu ka fu wasa furani. Gipai re naundo rani ani ini gupai nga, ka si vura duwa aboro aruganga tiyó naapa agu apai nafuda rani te, watadu i amaanga berãyo tipaha te, Yekova Mbori ima rugatiko nani tigako.

Ziazia Kekeapai nayugo gupai nga Yekova naberãpa aboro aberã wadu yó nibasasa dunduko. Si nayaa: “Bangiri Yekova du rogo arago dũ, ki ningere ku ri gbigbita aboro na wene aboro a.” (Asanza 15:3) Eyobo 34:21 nafura wakina gure kini yaa: “Bangiriko du ku ri ga boro apai, ko nabi pa gani nduge dunduko.” Yekova nabi agu apai abi ani amangaha, singia gudu niwenehe watadu gudu nigbegberẽhe, na ko ima inopa agu apai nafuda rani, na ki ima ino wai rengbe ko ka undo rani. Fugo gu babiapai nangia Anani nayugo gipai re, nga gu fugo ko agumbaha fu Bakindo Asa. Ko aya fuko wee: “Bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.”—2 Pekapai 16:7, 9.

Yekova nawisigo rani tipa kura ndupai. Yesu agumbapaha ki yawee: “Anga boro sa ka ye kono du mi ni gbua te, kina Buba nakedi re ka gbe ni.” (Yoane 6:44) Yekova nawisigo ngbaduraniyo awisigo ka bihe singia si koyo du ko ni. Ho ko abi gupai ni nga boro na nyemu ka inoko, ko nayugo tiko ayugo funi. Nikpiapai, rogo gu ringara nga Dominican Republic, i adika dee ku bambungua yo na gu kaza nga kenisa. Ri azungodi Mbori ko undo ri ri gbia ndikidi pambori. Ti kina gu regbo re, kumbaari aye na gu burosua furi nga Gine Mbori Akpinyemuhe be Rani? a Dezire Yekova afuhe fuko kpuko yo nigu wiso re. Gu dee re agedi gu waraga re na ki bi gupai nga si nangia ga Mbori karagapai kuti gari kpee. Ri aidi ka tona wisigo Ziazia Kekeapai na gu Dezire Yekova re, na vuru adiwi sita, ri ki kpara gari raka fu Yekova na ki zi bapatiza.

Rogo gu kitabu nga Atambuahe, ani nagbia badungu apai yo nga gu ababiki abia tambuahe agumbaha, wa gu Bakindo nangia Davide, na agi apai re kini yugupa wai Yekova angerafuo gako amoyambu. Rogo Atambuahe 56:8, Davide akpari fu Yekova ki yaa: “Mo uka aumere ku rogo ga mangu ime! Ati si ni keke he rogo ga kitabu yo?” Gipai Davide agumbaha re ayugu gupai nga, Yekova aima inopa gako arungo, na ko ki ima ino wai si afuda ko. Ko aima inopa gupai nasa gupai nga aume uka bangiri Davide yo. Nirengo, Yekova namaaberãko amaa fuo agu aboro dunduko naida ka manga gupai ko akpinyemuhe, nga agu aboro “du kpotoyo yo ziazia koyo du ko ni.”

Gu kura papara Ziazia Kekeapai nafura tipa wai Yekova angerafuo gako aboro, si nga Atambuahe 23. Tonatona gu bia re nafura tipa Yekova wa gu babanda anyaa duna nyemuse kini yaa: “Yekova nga babandare, zingohe amánga nga re te.” Yisaraere yo na rogo agu aringara du pati ni, babanda akandoro nangera wenengai fuo gani akandoro, kini yambu arimo kurira nibasasa dunduko. Aʹuru dunduko ní ayambara koyo du ní ni, kini zazadi ra na kini wisigi ra singia pai mangi guru. Ka ní bi aro ti guru, ní ki uka nzeme ku bangirihe yo watadu ime-ngua. Ka u awoka, ní ki ziru ki uka ime-ngua ku goruyo, na ki zadi ru kuari u andu ka pi sande ki kpi. Gere nga gu kpiapai nayugo wai Yekova aberãpa agu aboro nasatiyo koyo du ko ni.

Kparakpee na Zingabekpio

Gi bia re gbiati gu kura abia atambuahe, i aakenga ha kurogo Ziazia Kekeapai gbua tipa ani nigedihe kini gbia ngbarago behe te. Ono agi abia re nayugo wai gu ga Yekova amoyambu nadumbata kusayo anaagumba agu apai nadu ngbaduyó yo fuko, kini yugu gupai nga i naida ko undo yo, na kini yugu gayó tambuahe fuko tipa pa bandako yó naapa fuko amaku fuyó. Agu apai du rogo Atambuahe, si nayugo gupai ziazia nga, gu ga Yekova amoyambu nadumbata aima ida kuti gupai gbe nga, Mbori aaberã payo aberã. Ka ani ageda agu apai re na kini berẽkuriihe, si rengbe ka undo rani ani naabi Mbori kinawo a. Wa duhe nga Yekova naida aida ani naakpara fuko, si nayugo gupai nga, Ko naberã parani aberã.

Ono tie, kura aregbo kinaho rengbe ani kadu rogo kerepai ka ani ainongo wai ka ani kpari fu Yekova tipaha ya. Ya mo gupai re rengbe ka sa Yekova ka ko iningo pai tipa gupai nafuda rani ya? ARomo 8:26 nakaragapai sa gu sanahe re niyaa: “Kina wo Ziazia Toro aunda rani narungbura, ani aina nga waĩ ka ani akpara te; ono kina Ziazia Toro ni tiko nakpara tipa rani niukaga ome nga gu ka i agumba nga ha agumba ya.” Gi veresi re nayugo gupai furani nga, ho adunga gene ni berani wa ka ani kpari ya, Mbori rengbe arengba ka bihe nga gupai du ngbaduraniyo, si wakina gu nadu ngbadu gu gako amoyambu yo nadumbata, si ki tadu wo, ko kini karagapai furani kuti gaani kpee mbiko ko nga gu Mbori “ninagia kpetambuahe.”—Atambuahe 65:2.

Gu maabangirise du tipa zingabekpio, si nga gu kura gopai nayugo gupai nga, Mbori naberã parani aberã wadu ani nibasasa dunduko. Yesu Kristo ayaa: “Ragoho nada, ho agu yo ka gia fugoko ni dunduko du rogo amurã yo, ki kuru.” (Yoane 5:28, 29) Gu fugo Giriki i asaha nga “amurã,” ndikidi rogoyo nga “agu amurã Mbori atingidapa aboro rogoho.” Gipai re nayugo gupai nga, agu apai dunduko du tipa gu boro kpii, si kina berã Mbori yo.

Oni berẽnga kurii gupai nga, tipa Mbori zingisi boro bekpio, si naida ko ini agu apai dunduko nadu tipa ní, kodihe na wai bangera ní adu, agu asino nadu tiní, na agu apai nadu rogo gani dudu! (Marako 10:27) Agu apai du berã Mbori yo tipa gu boro re, si arengbanga ka go te, zavura fuo badungu akutu agarã. (Eyobo 14:13-15; Ruka 20:38) Sidu, gu badungu abirioni aboro kpiki, payo kina berã Mbori yo dunduko, na gipai re nayugo gupai nzunzu nga, Mbori naberãpa aboro aberã wadu yó nibasasa dunduko!

Yekova Nafu Mosoro fu Aboro

Ginipai si aida ani mangihe tipa Yekova niberẽ parani na kini ngerefuo rani? Gu bambatapai si aida ani mangihe nga, ani naakido kutiko na kini gisangbako, na kidu na idapase kutiko. Gu mokedi nangia Pauro agumba gupai nayugo gupai nga, ngbanya kina dagba idapase naapa ngera Mbori fuo boro. Ko akepai ki yaa: “Zanga idapase ga boro pai arengba nga na ngba bangiri Mbori te, bambiko gu ni naye koyo du Mbori ni gani pai nga ida ya Mbori kina ho, ko nafu mosoro [afu] fu agu yo nagbata ko.”—AEbere 11:6.

Oni kparia gupai nga, gu ngbatunga idapase nafu ngbarago fu Mbori, si na apaparaha ue. Bambataha nga, ani ‘naida ya Mbori kinaho,’ ko nga Bakere Bazogo si aida ani gisangbako na kini irisiko. Uepai nga, si naida ani idi kuti gupai nga, “ko nafu mosoro [afu] fu agu yo nagbata ko.” Gu boro duna ndikidi idapase, ní idi kuti gupai nga Mbori naberãpa agu aboro aberã nagbata gene ka manga gupai ko akpinyemuhe, na ko nafu mosoro afu fuyó. Ka oni wiriki Fugo Mbori nga Ziazia Kekeapai na kini koditironi na agu aboro nandu kuti sangba Mbori, oni duadu a na gu idapase nasa gupai nga Mbori fu mosoro fu boro na kini ngerefuo ní.

Badungu aboro naya areme wee Mbori aberãnga pa aboro wagu tooni te. Ono a wa bi ani he, Ziazia Kekeapai nayawee Mbori naberãpa agu aboro aberã gbe duna ndikidi idapase kutiko. Wa vura duhe nga badungu apai nafuda aboro areme, si aidanga ani bihe nga Yekova aberãnga pa aboro te te. Yekova naberã parani aberã. Ko naya furani wee ani naakpara fuko tipa undo. Bake apapara Atambuahe ayaa: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.”—Atambuahe 55:22.

[Gu rukutu kekeapai du bandu kpewaraga yo]

Agu Averesi Rengbe ka Undo Roni Oni Idi Kuti Gupai Nga Mbori Naberã Paroni Aberã

“Bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.”—2 Pekapai 16:9.

“Mo uka aumere ku rogo ga mangu ime! Ati si ni keke he rogo ga kitabu yo?”—Atambuahe 56:8.

“Yekova nga babandare, zingohe amánga nga re te.”—Atambuahe 23:1.

“Ako mo nga gu ko ninagia kpetambuahe! Aboro dunduko nikaye koyo du mo ni.”—Atambuahe 65:2.

“Mo ayamba he, mi akaraga pai foro; mo akpi nyemu gu he bero amangi.”—Eyobo 14:15.

“Gu ni naye koyo du Mbori ni gani pai nga ida ya Mbori kina ho, ko nafu mosoro fu agu yo nagbata ko.”—Aebere 11:6.

“Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.”—Atambuahe 55:22.