Mbori Nangera Angera fuo Aboro Nirengo Ini Ani he Wai?

SANAHE dure ani ka karagapai sani. Anga vovo sanahe ngaha te, aboro aima digo nisanaha. Si nga: Kangia Mbori nakpinyemu rani akpi nirengo, tipagine nge arungo ti ni? Rengo du ngaha nga, ka oni kpinyemu boro, oni idinga rungo mangi gu boro re te, na ka ní du rogo fudifudiapai, oni mangi asadatise amanga ka undo ní. Sidu, dungu aboro nayawee, wa duhe nga dungu aboro duho narungo rogo zegino, Mbori angeranga fuo yó te. Ono tie, si ninyanyakipa pai ani wisigi gu gopai duho nayugo gupai nga, Mbori nakpinyemu rani akpi na kini ngere angera fuo rani.

Agu Ahe Mbori Akusihe, Si Nayugopai Tipa Gako Nyemuse

Yekova Mbori nga gu boro ‘namangi ngbangbaturũ na sende na baime na agu ahe dunduko du rogoho.’ (Amokedi 4:24) Wa ani aberãkurii pa agu apai Yekova namangihe tipa rani, si nasa rani ani dakuti gupai nga, ko nakpinyemu rani akpi nirengo. Nikpiapai, ani berẽnga pa agu apai nafu ngbarago furani rogo raka. Ya mo oni nidu na nyemu wene riahe tironi? Yekova arengbe arengba ka fu ngbatunga riahe furani gbua kina sa. Kuba gure, ko akusi dendekere ngbatunga ariahe tipa si naafu ngbarago furani. Wakina gure a, ko akusi dungu ngbatunga angua furani gbiati ambumbudo na bawene akpakpurago tipa ani naagbia ngbarago behe.

Ani wisigingo gu gene a ko amangi rani ngbaha. Gu wene afugo ani agumbaha naba mongo ti aboro, gu tandu du berani ka gbia ngbarago be manzigo na be wene ahe. Anga agi ahe re tipa ka songoda raka te, ono ko afuhe tipa ani gbia ngbarago be raka. Na ani berẽnga pa gaani pagume na akuarani. Gini boro agbianga ngbarago be sungo na abakureani ya watadu ka gbianga ngbarago ho gani boro nadungo ní ni ya? Oni ngere, gu tandu du ani nani ka kpinyemu akuarani, si nitihe nga gamahe be Mbori nga boro nyemuse! Wa duhe nga Mbori akusi aboro na gu tandu nga ga kpinyemuse, ruhe aru ani yawee si nga papara sinoko.

Ziazia Kekeapai Nakido Rani Naapa Gako Nyemuse

Ziazia Kekeapai naya furani wee Mbori nga nyemuse. (1 Yoane 4:8) Anga gi gako nyemuse re niyuguyuguhe kina rogo agu ahe yo ko akusihe sa te, ono si a niyuguyuguhe rogo Fugoko nga Ziazia Kekeapai. Nikpiapai, Ziazia Kekeapai nafu agu arugute nasa kpotorani si du niwasawasaha, si nangarasa rani ani naamangaapai dunduko rengbe arengba angianga ka mangapai ki yari nani kubani ya, na si nazahe ti kpibuda, na ti angbu, nga agu apai dunduko naye na akaza.​—1 AKorindo 6:​9, 10.

Ziazia Kekeapai nafu wene arugute tipa gu pagume du dagba aboro, kini ngarasi rani ani kpinyemu akuarani, na kini fu irisa fuyó, na kini mangi yó rogo weneringise. (Matayo 7:​12) Si nazahe ti gu mangaapai naye na arungo fu aboro wa gbangbati, gumba rimo aboro, kpi aboro, bäri, na imo boro. Wa ka aboro dunduko amangi asadatise tipa kaa raka ringbisihe kuti gu wene arugute du rogo Ziazia Kekeapai, anga wo ka aboro naarungo wagu duhe areme re te.

Ono tie, gu yuguyugu ga Mbori nyemuse paha nagba rii akuraha nga pa kedako Wiriko nga Yesu ko ye ka kpi ka tumo rirani. Yoane 3:16 nayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” Rogo gi gene re, Mbori aima manga mbakadapai tipa ka digiso kpio na ngbatunga arungo dunduko.​—1 Yoane 3:8.

Sidu, bakere gopai duho nayugo gupai nga, Yekova nakpinyemu rani akpi. Si afunga ngbarago fuko wa ko abi rani ani kini rungo te. Ko nika mangapai amanga tipa ka digiso kpio. Ziazia Kekeapai nagumba gupai furani nzunzu Mbori andu ka mangaha ka digiso arungo, si aidanga ani moi kpia kungboapai ku berã rani yo ya si nga gupai nandu ka manga te.

[Gu kpiahe du ti kpewaraga 4]

Gu tandu du ani nani ka kpinyemu akuarani, si nga gamahe be Mbori nga boro nyemuse