Oni Naida ka Ino gu Rengo Du Tipa Ngbangbaturũ?

NAIRIWO wai ngbaa gu maabangirise nga ga ga ku ngbangbaturũ yo! Amasarami, aHindu, aBuddhists, gbiati agu aboro du rogo agu apambori i aya tipaha wee si nga ga aKristano, i dunduko idi kuti gupai nga boro naraka araka fuo kpio ní. Zavura agu aboro adunga na nyemu agu apai nga ga pambori ya, si a nga gupai idi yó kuti ni. Aboro naaberãpa ngbangbaturũ dedede nigu ba du niwenehe na niba ngbarago na nigu ba aboro agbia ongoda rogoho be agu apai i ambu behe na i nayawee si nga gu ba aboro akodatiyo rogoho na gu ‘gayó aboro nakpiki.’ Ono wa vura duhe nga aboro dunduko duna nyemu ka ga ku ngbangbaturũ yo, kina beteyo gbua duna nyemu ka kpi tipa ka ga koyo. Tipagine duhe ti ni wo?

Kangia Mbori ambakadi rani ani naakpiko kini ga ku ngbangbaturũ yo, anga ka aboro dunduko duna nyemu ka kpiko tipa ka ga koyo kina wai gude nidu na nyemu ka sona watadu wa gu paranga boro nidu na nyemu gu regbo ní amaabangirini ka manga rogatise ti ni tee? Ono badungu aboro aidanga ka kpi te.

Wa vura duhe wo, abarumbatayo rogo apambori nayawee, tingbafuo gu bete regbo ani arakaha auru kpotosende, ani naga ku ngbangbaturũ yo nga gu ba i ambakadihe tipa rani. Nikpiapai, kura barumbatayo rogo pambori du rimoko nga Theodore McCarrick du Amerika yo ayaa: ‘Anga gu raka du ani nani awere re, si nga gu raka Mbori akusi rani tipaha te. Mbori akusi rani tipa ani naaraka ngbangbaturũ yo.’ Gu kumba nanaangera mbata kurii gu riigbu nga ga pambori du Amerika yo ape pai wakina gure ki yaa: “Ndu gupai Mbori akusi aboro ti ni nga i naataasarimoko, fuoho, i ki ga ku ngbangbaturũ yo . . . mbiko ngbangbaturũ nga kpurani.”

Agu aboro idi kuti gupai nga raka kinaho ngbangbaturũ yo fuo kpio boro, i namaamburu gi gayó ida re rii kungbopai. George Barna, nga bangerekurii gu basunge naweteka apai tipa agu apai du tipa apambori abi gupai nga, badungu aboro idi kuti “gu bipai nga aboro naraka araka fuo kpioyo du mburuhe rii agu ahe i abihe duwa asinima, agu amanzigo i agiaha, gbiati agu awaraga i agedaha.” Rogo gu papara Amerika nga Florida, kura pasita sa ayaa: “Wiripai ho ini ani he tipa ngbangbaturũ te, gu yangarapai ini ani he tipaha nga si nga gu ba Mbori araka rogoho.”

Ono tie, pa ngbangbaturũ nga gu nyanyakipa pangbanga Ziazia Kekeapai agumbaha. Ringbisihe kuti Fugo Mbori, gini ngbatunga rago du nga ngbangbaturũ? Ya mo Mbori akusi aboro i raki ngbangbaturũ yo? Kangia aboro nika ga ku ngbangbaturũ yo, gini ngbatunga sunge i nikaa mangaha yo?

[Gu kpiahe du ti kpewaraga 3]

Tipagine du badungu aboro ti ni na nyemu ka ga ku ngbangbaturũ yo, ono kina beteyo gbua kini idi ka kpi tipa ka ndu koyo?