Ya Mo Oni Napekafuo Kristo Nzunzu?

“A wa oni nata a, . . . oni susi asusa na ni.” ​—1 TESA. 4:1.

1, 2. (a) Gini iiriwo apai aboro abihe ti rago Yesu? (b) Gine nayugoho nga nyakipa gi regbo ani araka ti ni re anyaka?

YA MO oni aberẽnga kuriipa gu ngbarago ka oni adu nani ka bi Yesu ho ko adu ni auru kpotosende ane? Isoke oni rengbe ka berã gupai nga ka oni aduho, ka Yesu aima husa roni be gaoni akaza. Gu kurapai berewe ka rago angba tironi mbikoho nga, ka bi Yesu na ki gi agu apai ko anaagumbaha gbiati gu iiriwo apai ko anaamangaha. (Mk. 4:1, 2; Ruka 5:3-9; 9:11) Nairiwo wai ka si angba ka ani aduho ka bi Yesu ko nimangi agi apai re! (Ruka 19:37) Aboro ho berewe nabi ngbatunga agu apai Yesu amangihe re te. Agu apai namangi auru kpotosende ‘mbiko tumo Yesu ni tiko,’ si amanganga berewe te.​—Eb. 9:​26; Yo. 14:19.

² Ono tie, gi regbo ani araka ti ni re na kina nyanyakipaha a. Tipagine gumba anihe ti ni wo? Mbiko ani naraka ti gu regbo Ziazia Kekeapai ayambaha nga “kusa rago” watadu ‘digida rago.’ (Dan. 12:1-4, 9; 2 Tim. 3:1) Ti kina gi bangisa regbo re gu i aba Satana ngbangbaturũ yo ku sende no. Barambeda, i nika vo ko ki bako kurogo “gu due zanga mburuhe.” (Yugo. 12:7-9, 12; 20:1-3) Ti kina gi regbo re a du ani na gu momu berani nga ka gbandaka wene pangbanga nga ga Kindo na ka pepa Paradizo fu aboro. Regbo adunga ho berewe tipa ka manga gi sunge re fuo rugusa yó ho te.​—Mt. 24:14.

3. Mbata fu Yesu ga ku ngbangbaturũ yo, ginipai ko apehe fu apefuoko, na ginipai si adu nga si nika kodaha?

³ Ngbutuko mbata fu Yesu ga ku ngbangbaturũ yo, ko aya fu apefuoko wee: “Oni adu ni adezirere, Yerusarema yo na Yuda yo a Somorona yo, na digida sende yo.” (Amo. 1:8) Si adu nga gi sunge re nika koda yugopai auru kpotosende dunduko. Tipagine si aidi gipai re mangi ti ni wo? Si adu wo tipa ka sa aboro ni abawiriki na i ki tona ka pefuo Kristo mbata fu digido zegino da. (Mt. 28:19, 20) Ginipai si aida ani mangihe ka ani aida kadu na diabese ti ngba gi sunge Yesu afu furani re?

4. (a) Gu fugo Petero du rogo 2 Petero 3:​11, 12 nayugo gini nyanyakipa pai furani? (b) Gini apai si aida ani bandatirani ti ni?

⁴ Oni bingo gipai Petero agumbaha re ki yaa: “Oni ka du ni gini ngbatunga aboro tipa manga ziazia apai na sinombori? Oni ki ngere tipa ye gu uru nga ga Mbori ki niipisi he!” (2 Pet. 3:11, 12) Gi fugo Petero re nanyakasa gupai nga si naida ani bandatirani rogo gi yangara arame re na ki kakuti sinombori. Gu sa dagba gu mangaapai nga ga sinombori re nga tungusa wene pangbanga. Nangba gu zaaza gene awirina atungusa wene pangbanga ngbaha rogo zegino dunduko! Ti gi regbo du awere re, si naida ani bandatirani be gu sosodapai nga ga zegino na gu nga ga kpotorani si andu ka zeresa rani ti mangasunge fu Yekova. Ani makianga pai tie tipa gupai si aida ani mangihe tipa kaa pekafuo Kristo.

Oni Di Agu Atindiro Mbori Nafuhe Furoni

5, 6. (a) Ginipai Pauro atambua awirinako tipaha Yerusarema yo na ginipai ko aza yó ti ni? (b) Tipagine si aidanga ani bi agu asunge fu Mbori he furani ti ni taata ya?

⁵ Rogo gu waraga Pauro akehe fu agu aKristano nadu Yerusarema yo, ko atambua yó tipa wai i akakuti ruru mangapai wa i avura kaa gbiatiyo na rungosi vurũ. Ko ayaa: “Oni báki bangironi ka tingida pa gu rago nadu mbata, rogo ho, fuo hasa yo rago fu roni, oni ki hi bakere vura ni aima.” Nirengo, Yekova aima tingidapa gayó ruru mangaapai. (Eb. 6:10; 10:32-34) Gu fugo Pauro re aima nyakasa agu aKristano nangia aEbere re. Ono tie, kina rogo gu bangisa waraga re, Pauro azahe ti gu sino nga gu ka boro ambungaha ya, si rengbe arengba ka zeresa gani nyemu mangasunge fu Mbori. Ko aya si aidanga aKristano “basa,” watadu deke be pekafuo agu arugute nga ga Mbori te.​—Eb. 12:25.

⁶ Kina gu bangisa bipai re du tipa rani areme a nibipa agu asunge fu Mbori he furani. Si aidanga ani bi agu atindiro fuuyó ho furani nikungbo taatapai te na si aidanga ani mbu gaani nyemu mangasunge fu Mbori si zere te. (Eb. 10:39) Gu ziazia sunge ani amangaha re rengbe ka sa gupai nga ani batasi tirani na ki batasi kura aboro a.​—1 Tim. 4:16.

7, 8. (a) Ginihe rengbe ka undo rani ani du kakaka ti ngba gu sunge nga ga Mbori? (b) Ka si du nga ani ima zera tooni ti ngba gu sunge nga ga Mbori, ginipai si aida ani tingidihe tipa Yekova na Yesu?

⁷ Ginipai rengbe ka undo rani ka ani dekenga be agu asunge Mbori akpinyemu ani mangihe ya? Pai sa nga gu rengbe ka undo rani nga pa berã ani kurii gu mozunga ani amangihe ho ani akpara tirani ni fu Yekova. Gu memepai ani agumbaha rogo gaani mozunga nga ani nika maa pa manga gupai ko akpinyemuhe mbatayo rogo gaani raka, na si naida ani banda gu mozunga re abanda. (Oni gedi Matayo 16:24.) Sidu tie, ti kura aregbo, si naida ani sananga tirani ki yaa: ‘Ya mo mi kindi na gu nyanyaki diaberã mi amangihe tipa kaa raka ringbisihe kuti agu apai mi agumbaha fu Yekova ho mi aadia bapatiza ni? Watadu mi ima zera tooni rogo agu agarã susi kusayo fuo zio mi bapatiza?’

⁸ Ka ani wisigi tirani wenengai ki bi gupai nga ani ima zera tooni rogo gaani sunge Mbori yo, si naida ani tingidi gu fugo Zefania apehe ki yaa: “Ka bero nirúngbura nga ya. Yekova, ga Mbori, du dagba ro, nga iranyaka nafu diabese fu aboro; ko angí mbiko ro na ngbarago.” (Zef. 3:16, 17) I agumba gipai re fu aYisaraere ho i akuru ni Babera yo ki ga ku Yerusarema yo. Wa vura duhe nga i agumbaha fu aYisaraere, si kindi na ndikidi rogoyo furani areme. Wa duhe nga gu sunge ani amangaha re ga Yekova du, si naida ani banda gupai ku berãrani yo nga ko gbiati wiriko nga Yesu nasongoda rani asongoda kutingba gu sunge ani amangaha re. (Mt. 28:20; Frp. 4:13) Ka ani amangasunge fu Mbori kakaka, ko nika fu maku afu furani na ki undo rani tipa ani naasona kindi kumbatayo rogo toro yo.

‘Gbata ga Mbori Ngbi Mbata’

9, 10. Gini memepai du rogo gu kpiapai Yesu afuhe nibipa bakere pumbo, na ginipai rengbe ani ka wirikaha ti ni?

⁹ Ho Yesu aangba ni be riahe kua bazogo aFarusi yo, ko afu kpiapai tipa bakere pumbo. Rogo gu gako kpiapai re, ko aringbisi pa gu momu i afuhe fu dungu ngbatunga aboro tipa i ye tipa gu Kindo nga ga ngbangbaturũ. Yesu aima saka rogo gupai yo a nga deka be sunge watadu be pai. (Oni gedi Ruka 14:16-​21.) Agu aboro i ayambu yó tipa gu pumbo re afu nduapai nga gu nasayo ka i ndunga tipa gu pumbo re ya. Guni sa aya ní andunga te mbiko ní nandu ka bi gu gani ati ní angbehe. Guni ki ya abagara gu duho ní angbera ní aida ka wisigo ra. Gu yangara ní ki yaa: ‘Mi arengbanga ka ye te mbiko mi di dee awere.’ Gu nduapai i afukuhe dunduko re angia agu apai adunga rogoyo ti ni ya. Ho boro angbe rago ni, ní nawisigoho mbata fu ngbe ní he, na kina gu bangisapai re du tipa ngbe anyaa. Sidu, ndupai ho si aida ti ni boro ruaru berewe ka wisigo ra nikina ipo te. Ndupai ho ka sa gu boro mangi rogatise barambeda ní ká ka ndu tipa pumbo te. Zanga kapa, ngbadu gu boro nayambu yó re aima ima nikerehe!

¹⁰ Ga Mbori aboro dũ rengbe ka wirikapai ti gu kpiapai Yesu afuhe re. Ginipai rengbe ani ka wirikaha? Gupai ani awirikaha nga, si aidanga ani mbu gaani apai nitirani paha nyaki kisusi gu sunge ani amangaha fu Mbori te. Ka Kristano moi pa gani apai mbatayo fu ga Mbori sunge, ní rengbe arengba ka zera rogo toro yo. (Oni gedi Ruka 8:​14.) Tipa ka ani zerenga rogo toro yo ya, si naida ani raki ringbisihe kuti gupai Yesu agumbaha ki yaa: “Oni gbáta gako ngbi mbata, na gako rurupai.” (Mt. 6:33) Nangba wai duhe ka bi gupai nga ga Mbori amoyambu nairisa gu fugo Yesu re, gu paranga yó na gu sosono yo a! Badungu aboro sa gayó raka si du taata tipa ka dia bakere regbo ku gene sunge tungusapai yo. Ho i amaa agu apai ni nga ga Kindo mbatayo rogo gayó raka, i nagbia ndikidi ngbarago.

11. Gini pangbanga du rogo Ziazia Kekeapai nayugo gupai nga si naida ani mangisunge fu Mbori zaaza na ngbadurani yo dunduko?

¹¹ Tipa ka ino wai nyakipa manga ga Mbori sunge kakaka, ani bingo gupai namangi rogo gu raka nangia ga gu Bakindo aYisaraere nangia Yoasa. Ho ko abi gupai ni nga aboro Suria nika sovura kuti aYisaraere ki di beyo, ko atakparakpara nindu fuo Erisa. Erisa aya fuko wee ko zumu guanza ti bangiri bambu ka yugo gupai nga Yekova nika sayo asa i dibe aSurio. Isoke, gupai Erisa apehe fuko re aima nyakasako. Gu kurapai berewe Erisa apehe fuko nga ko di gako aguanza ki nofo sende na ami. Yoasa anofo sende gbua bara biata. Ngbadu Erisa aima ima kuti Yoasa mbiko ka ko ‘anofo ho bara bisue watadu bara sita, si du ka ko amángi aSurio ti ni daho ka ko aba tungayo ni kpäkäyä.’ Mbiko gupai nga ko anofo sende gbua bara biata, ko adu na diabese gbua bara biata. Yoasa aagbianga wene sangbanapai te mbiko ko aadunga zaaza te. (2 Aba. 13:14-19) Ginipai rengbe ani ka wirikaha ti gi pangbanga re? Ani nawirika gupai nga Yekova rengbe arengba ka fu maku furani ka ani mangi gako sunge na ngbadurani yo dunduko.

12. (a) Ginihe nika undo rani ani du zaaza ti ngba ga Mbori sunge wa ani ambuka na agu apai nga ga raka? (b) Oni gumbanga pa wai oni agbia undo be tungusapai ti aregbo dunduko.

¹² Gu kpakarakpakaraapai nagbia rani areme rengbe arengba ka saha nimbumbupai ka mangasunge fu Mbori ngba wene gene. Badungu awirina narungo be zingo marã. Agu akurayó arengbanga ka mangasunge fu Yekova nibakerehe te mbiko akakaza. Wa vura duhe wo, ani dunduko rengbe arengba ka manga kina gu rẽ na omerani kidu adu zaaza na kini pekefuo Kristo wenengai. Oni bingo bete agu aberãpai na agu averesi fuuyó ho rogo gu sanduki du riihe nga “Ginihe Nika Undo Roni Oni Naapekafuo Kristo Kindi?” Oni wisigipa wai rengbe oni ka mangasunge nani rogo gaoni raka wenengai. Ka oni mangihe wo, oni gbia ndikidi undo agbia. Tungusapai ti aregbo dunduko rengbe arengba ka mbakada gaani raka, na ki ye na zereda gbiati ngbarago furani. (1 Kor. 15:58) Kurigure, mangasunge fu Yekova na ngbaduseyo dunduko naundo rani ani ‘ningere tipa ye gu uru nga ga Mbori kini ipisihe berãrani yo.’​—2 Pet. 3:12.

Oni Wisigi Tironi Ziazia

13. Wai rengbe ani ka ino singia ani namangasunge fu Yekova na ngbaduraniyo dunduko?

¹³ Gupai si aida ani inihe nga, anga dia boro gani regbo dunduko kutingba gu sunge nga ga Mbori nayugo gupai nga ní namangaha na ngbaduniyo te. Aboro dunduko na gayó apai nibakiakia. Rago nangba angba ti Yekova na gu boro ka di saa sa watadu ue rogo diwi sa kutingba sunge tungusapai ka si du nga si rẽ na ome ní. (Oni ringbisinga ha na Marako 12:41-44.) Wa duhe tie wo, tipa ka ino nzunzu singia ani namangasunge fu Yekova na ngbaduraniyo, si naida ani wisigi agu apai du tipa rani ziazia. Wangia ani apekefuo Kristo, si naida aida a ani du na kina gu bangisa bipai ko adu nani. (Oni gedi ARomo 15:5; 1 Cor. 2:​16) Ginihe Yesu amoipaha mbatayo rogo gako raka? Ko aya fu gu badona aboro nadu Kaparanauma yo wee: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” (Ruka 4:43; Yo. 18:37) Wa oni aberãkurii gu bipai Yesu adu nani tipa sunge tungusapai, oni asadi ka wisigingo tironi singia oni rengbe ka kiiso gaoni sunge.​—1 Kor. 11:1.

14. Ngba gini agene rengbe ani ka kiiso gaani sunge?

¹⁴ Ka ani wisigi gaani apai wenengai, si rengbe arengba ka sa rani ani bi gupai nga ani rengbe arengba ka kiiso gaani sunge tungusapai. (Mt. 9:37, 38) Nikpiapai, dungu gu paranga aboro nanyasa sukuru nakiiso gayó sunge tungusapai na ki gbia gu ngbarago naye be mangasunge ni abazakigene. Ya mo oni naida ka gbia ngbatunga gu ngbarago re? Gu kura awirina wisigi agu apai du tipa yó na ki bi gupai nga i rengbe arengba ka ndu kurogo gu kura ba vuru gayó ringara watadu ka kura kusayo rogo gayó ringara ka tungusapai rogo agu aba du na zingo rogoho tipa abatungusipai. Agu akurayó wiriki kura afugo tipa kaa tungusa wene pangbanga fu agu aboro nagumbaha. Wa vura duhe nga pa kiiso ani gaani sunge rengbe arengba kadu ni kpakarakpakaraha, si nayeaye na dungu amaku na ki undo dungu aboro i gbia “gu inahe nga ga rengo.”​—1 Tim. 2:3, 4; 2 Kor. 9:6.

Agu Akpiapai Du Rogo Ziazia Kekeapai

15, 16. Ga gini aboro kpiapai rengbe ani ka wirikaha tipa kaa pekafuo Kristo wenengai?

¹⁵ Ginipai agu amokedi nadumbata kusayo amangihe ho Yesu ayambuyo ni i ye kadu ni apefuoko? Nibipa Matayo, Ziazia Kekeapai nayaa: “Ko ki mbu ahe ambu dunduko, ki guari, ki nipeke ko.” (Ruka 5:27, 28) Nibipa aPetero na Andarea nangia aba atĩo, Ziazia Kekeapai nayaa: “I ki guari pati gayo apio ni ngara ki nipeke ko.” Tifuo gure, Yesu agbia aYoane na Yakoba i nimbakadi gayó apio atĩo na bayo. Gayó karagapai adu nga gine ho Yesu ayambuyo ni? ‘I aguari ningara pati bayo kurungba yo ki nipeke ko.’​—Mt. 4:18-22.

¹⁶ Gu kura wene kpiapai berewe nga ga gu mokedi nangia Pauro rimoko adumbata nga Saura. Wa ko avura du nigu boro nanaarungosi apekefuo Kristo, ko asa gako berã Yesu ki “kpara ko” tipa ko tungusapai tipa ko. Fuo gure, “ko ki nitungusi pa Yesu atungusa ni ba sa rogo abambutiria yo ki ya ‘ko nga Wiri Mbori.’ ” (Amo. 9:3-22) Wa ko avura gbia tiko na dungu fudifudiapai na arungosi, ko aahenga mangasunge kakaka te.​—2 Kor. 11:23-29; 12:15.

17. (a) Gaoni berãpai nga gine nibipa pekafuo Kristo? (b) Gini amaku ani agbiaha mbiko mangasunge fu Yekova na ngbaduraniyo dunduko gbiati omerani?

¹⁷ Nirengo, si naida ani pekefuo gu wene kpiapai nga ga ga Yesu abawiriki re na ki tona kaa pekafuo Yesu zanga gberesa regbo. (Eb. 6:11, 12) Gini amaku ani agbiaha wa ani amanga ome ti aregbo dunduko kaa pekafuo Yesu wenengai? Ani nagbia ndikidi ngbarago ti manga gupai Mbori akpinyemuhe na kini gbia wasa a ho ani atinda agu tindiro ni i afuhe furani rogo dungurati. (Tam. 40:8; Oni gedi 1 Atesaroniko 4:1.) Nirengo, ho ani afu tirani ni na ngbaduraniyo dunduko ka pekafuo Kristo, ani nadu na zereda berãrani yo, ki gbia wasa, Mbori ki idi na gaani mangapai, na ani kidu na gu maabangirise nga ga nyenye unga.​—1 Tim. 4:10.

[Gu kpiahe du ti kpewaraga 31]

Ginihe Nika Undo Roni Oni Naapekafuo Kristo Kindi?

[Gu kpiahe du ti kpewaraga 31]

▪ Oni gedi Fugo Mbori na aʹuru dunduko na kini berẽkuriihe.​—Tam. 1:1-3; 1 Tim. 4:15.

▪ One kpari dedede tipa ga Mbori toro niyugu gene furoni.​—Zek. 4:6; Ruka 11:9, 13.

▪ Oni koditironi na agu aboro duna ndikidi nyemu sunge tungusapai.​—Snz. 13:20; Eb. 10:24, 25.

▪ Oni ini gupai nga ani naraka ti yangara arame.​—Ef. 5:15, 16.

▪ Oni ini gupai rengbe ka manga ka oni adeka be manga agu apai Mbori akpinyemuhe beroni.​—Ruka 9:59-62.

▪ Oni berẽ dedede tipa gu kparatise oni amangihe fu Yekova na agu amaku oni agbiaha ti mangasunge fu Yekova na ngbaduroni yo dunduko.​—Tam. 116:12-14; 133:3; Snz. 10:22.

[Gu kpiahe du ti kpewaraga 32]

Oni Natingidaha?

• Gini nyanyakipa sunge fuuyó ho furani na wai si aida ani bihe?

• Gini apai si aida ani bandatirani ti ni na tipagine?

• Gini ngbatunga wisigotise si aida ani mangihe?

• Gine nika undo rani ani naapekafuo Kristo kindi?