Oni Duna Kakaka Nyemu Ndikidi Irisombori
“Zuzuhe ni bakere he ni rengo, ono abamangisunge ni kina umba yo.”—MT. 9:37.
1. Ginipai nasa boro ní mangipai niipo?
KA SI du nga sunge gudu beroni oni aida boro mangihe mbata fu ti uru, ginipai ka oni mangihe? Oni ya funi ní mangihe niipiipihe! Ka oni andu fuo boro du oni na nyanyaki mbakadapai na ní, ginipai rengbe oni ka mangaha? Oni ndu nikina boro wiri ipo! Nirengo, ho du pai ni nga gu si aida oni mangihe, na regbo kini ndu nikina boro ipo, oni rengbe ka mangaha kakaka zanga ongoda.
2. Gini sunge duho si aida ndikidi aKristano mangihe areme niipiipihe?
2 Gu sunge ndikidi aKristano amangaha areme niipiipihe nga ga tungusa wene pangbanga nga ga Kindo na kini sa riko aboro ni abawiriki. (Mt. 24:14; 28:19, 20) Gu bawiriki nangia Marako adipai rogo fugo Yesu ki ke gupai nga, si naida i mangi gi sunge re “mbata” fu digidoho da. (Mk. 13:10) Rengo ngaha nga, kinawo si aida i mangihe. Yesu ayaa: “Zuzuhe ni bakere he ni rengo, ono abamangisunge ni kina umba yo.” Zuzuhe arengbenga ka sungudo boro te; si naida i kehe mbata fu regboho susi.—Mt. 9:37.
3. Ginipai badungu aboro amangaha tipa ka tungusapai niipiipihe?
3 Wa duhe nga gu sunge nga ga tungusapai na nyanyakipaha furani, si naida ani fu gaani bakere regbo tipaha, na omerani, na ki moiberã rani fuoho wenengai. Badungu awirina namanga kina gu bangisapai re. Kurayo aima sa gayó raka si du taata tipa ka manga sunge tungusapai ti aregbo dunduko ni abazakigene watadu amokedi watadu ka mangasunge Betere yo. Si nga gu sunge i amangaha rogo gayó raka. Si rengbe kadu nga i aima mbupa dungu gayó apai, na dungu kpakaraapai i agbiatiyo nani. Ono wa vura duhe wo, Yekova nafu dungu amaku afu fuyó. Ani na ngbarago tipa gu sunge i amangaha re. (Oni gedi Ruka 18:28-30.) Kura aboro kinaho adunga gene beyo ka mangasunge tungusapa Kindo ti aregbo dunduko ya, ono i nafubee afu sa gi sunge nga ga batasa aboro re, na kini undo rukutu awirani i gbia bata.—Pa Rug. 6:6, 7.
4. Ginipai nasa kura aboro ka i mangingo sunge tungusapai niipiipihe ya?
4 A wa ani nibihe, gupai nasa boro nimangipai niipo nga ho du regbo ni niguruhe watadu ho digido regbo ambeda ni. Badungu agopai gu duho rogo Ziazia Kekeapai na agu apai namanga, nga gu nayugo gupai nga ani naraka ti digido regbo. (Mt. 24:3, 33; 2 Tim. 3:1-5) Wa vura duhe wo, boro ainongo boro gini regbo du digidoho nika ye ti ni te. Ho Yesu aapeka pa agu apai ni “i ka ina pa . . . digida rago” ti ni, ko ayaa: “Boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Mt. 24:36) Pa duhe wo rengbe ka saha fu kura aboro nikpakarakpakaraha ka nye kindi ka mangapai niipiipihe tipa badungu agarã, gu garã aniti ka digido zegino ayengo ya, gu garã kini ti. (Snz. 13:12) Ya mo oni nidu na gu bipai re ti kura aregbo? Ginipai rengbe ka undo rani ani nye kindi kaa manga gu sunge niipiipihe Yekova Mbori na Yesu Kristo aida ani mangihe areme re?
Yesu Nga Gaani Wene Kpiapai
5. Rogo gini agene Yesu amangipai niipiipihe rogo gu sunge nga tungusapai?
5 Dagba agu aboro yo dunduko namangisunge fu Mbori niipiipihe, Yesu nga gu boro namoi bawene kpiapai kisusi. Gu bambata ndupai nasako ko mangisunge niipiipihe nga, sunge adu nibakerehe na si aidi ko mangihe vuru wiri guru regbo yo nga garã biata na beberehe. Wa si avura duwo, kina Yesu sa nga gu boro namangi badungu apai tipa ndikidi irisombori. Ko ayugu rimo Bako fu aboro na gako ringbisapai, na ki tungusi wene pangbanga nga ga Kindo, na ki kusi gu biriki ku yangura na gu ziree yugopai nangia ga abarumbatayo rogo pambori, na ko akakuti ga Yekova bakere pagbia dati kpio. Yesu afu tiko ka ndu rogo aringara kini yugupai, kini undo aboro, na kini husi aborokaza. (Mt. 9:35) Boro ho namangi bakere sunge vuru wiri guru regbo yo wa gu Yesu amangihe te. Yesu aima manga bakere sunge kisusi.—Yo. 18:37.
6. Ginipai Yesu anaaberã paha gbe rogo gako raka yo?
6 Ginipai nasa Yesu ko mangi gako sunge tungusapai zanga mbuhe gene? Yesu aima ino gu regbo nanye fuko koyo tipa ko digisi gako sunge ringbisihe kuti ga Yekova regbo. (Dan. 9:27) A wa ani nibihe, si aidi ga Yesu sunge auru kpotosende digi ‘bebere poso,’ watadu fuo agarã biata na beberehe. Ngbutuko tingbafuo rimoko ku Yerusarema yo na diabese rogo Marungu rogo gu garã nangia 33 F.B.K., ko ayaa: “Ragoho da, i taasi rimo Wiri boro.” (Yo. 12:23) Wa Yesu avura ino gupai nga regbo kpioko aima mbeda, anga si nangia gupai ko anaaberãkuriihe gbe rogo raka yo te, gupai ko anaaberãpaha gbe, nga pa gako sunge. Ko amoi berãko tipa ka manga gupai Bako akpinyemuhe na ki yugu nyemuse tipa aboro. Gu nyemuse re du nasako ko dungura gako abawiriki ki raba yó, ki kedi yó tipa sunge tungusapai. Ko araba yó tipa i susi kumbatayo namanga gu sunge ko asunga mburuhe re, naki mangi gu sunge re susi wai ko amangihe.—Oni gedi Yoane 14:12.
7, 8. Ga Yesu abawiriki ape ginipai nibi gupai Yesu amangihe yekaru yo, na tipagine Yesu amangipai ti ni ngba gu gene re?
7 Gopai sa rogo ga Yesu raka nayugo gupai nga ko aduna kakaka nyemu ndikidi irisombori. Ho ko atona gako sunge ni, rago Pumbo Susiri rogo gu garã nangia 30 F.B.K., ko na gako abawiriki andu ku Yerusarema yo ki bi aboro yekaru yo “nanababaga abaabagara na akandoro na ambipo, na abaundaamarã.” Ginipai Yesu amangihe sa gipai re, na wai si adu na ome kurii gako abawiriki?—Oni gedi Yoane 2:13-17.
8 Gupai Yesu amangihe na gu ko agumbaha ti gu regbo re, asa gupai nga gako abawiri tingidi sangbaanebi sa dagba gu Davide apehe, nga gu nayaa: “Nyemu ga bambu arika re arika.” (Tam. 69:9) Tipagine i atingidi agi afugo re ti ni? Gupai nasayo i tingidihe nga, Yesu amoi gako raka ngbapai. Gu nagarakaha agaraka gbe nga, agu abaakumba naangera kurii yekaru nangia aboromotumo, abakeapai na gu kura aboro adu kinaho. Pa kusa Yesu gayó gbegberẽ mangapai ku yangura, asa gupai nga ko du nivura agu abangbe mbatayo rogo pambori nadu ti gu regbo re. A wa ga Yesu abawiriki agumbaha, ‘nyemu ga Mbori bambu’ watadu nyemu ndikidi irisombori nasa Yesu ko mangipai wo.
Mangapai Niipiipihe
9. Wai Yesu aamanga gako sunge?
9 Ho boro amangasunge ni kakaka tipa ka nyasaha, ani rengbe ka yawee ní namanga gu sunge re na ngbaduniyo dunduko na ningbarago. Wo Yesu aamanga gako sunge. Si nasa gupai nga ga Yesu abawiriki tingidi afugo Davide ho i abi gupai ni Yesu amangihe yekaru yo. Ono tie, ginipai nasa gupai nga ngbadu Yesu yo riki tihe wa we, na ki sako ko mangipai ngba gi gene re?
10. Gu fugo Davide agumbaha nga “nyemu,” kura rogoyo nga gine?
10 Gu fugo nga “nyemu” du rogo ga Davide bia, i adihe ti gu fugo Ebere i nasaha rogo gu kura apapara Ziazia Kekeapai nga “iraringo.” (Oni gedi Gate 20:5; 34:14; Yosua 24:19.) Gu kura buku sakarogo afugo yo sa naya tipa gi fugo re wee: “I namangasunge na gi fugo re gbe tipa arogotise . . . A wa du kumba na rengo beko diako du sa fu kina ko, dee kidu na rengo beri kumbaari du sa fu kina ri, kinawo a du Mbori na rengo beko gako aboro du sa fu kina ko.” Nyemu ndikidi irisombori nasa Davide ka ko idinga gbegberẽpai ye kuti rimo Yekova ya.
11. Gine naafõngbadu Yesu yo ko mangipai zaaza?
11 Si aruaru ga Yesu abawiriki tingidi fugo Davide mbiko gupai i abi Yesu ko nimangihe yekaru yo. Yesu amanganga pai kakaka mbiko gupai gbua nga regbo adu beko tooni te, ono mbiko ko aduna kakaka nyemu Bako na ziazia irisombori. Ho ko abi gu gbarasarimo ni na gberangbayo nadu kuti rimo Mbori, ko aduna kakaka nyemu ka dia gu gbarasarimo re kusayo. Na ho Yesu abi bayee aboro ni gayó abarumbatayo rogo pambori nirungosi yó, ko amangipai zaaza ka undoyo na ki bisirapa agu abarumbatayo re.—Mt. 9:36; 23:2, 4, 27, 28, 33.
Oni Duna Kakaka Nyemu Ndikidi Irisombori
12, 13. Ginipai agu abarumbatayo nga ga agu akanisa i aya tipaha wee si nga ga aKristano namangihe na (a) rimo Mbori? (b) pa ga Mbori Kindo?
12 Kina ngbatunga agu asino irisombori nadu ti rago Yesu du areme, watadu gu du areme ima susa gu nadu. Nikpiapai, oni tingidi gupai nga gu bambata he Yesu aya fu apefuoko i nikpari tipaha nga rimo Mbori. Ko aya ani nikpari kini yaa: “Ani írisi rimoro airisa.” (Mt. 6:9) Ya mo ani nabi abarumbatayo rogo apambori, gbe agu akanisa i aya tipaha wee si nga ga aKristano, i niyugupai tipa Mbori na rimoko fu aboro kini ziasi he watadu kini irisi gu rimo re? Kuba gure, i natudopai tipa ko na agu aziree yugopai nga ga Mbori nga Tirinita, he gu duho nga mbisimo akpinga ya, na we nga iferno i azo aboro rogoho. Agi ayugopai re nasa aboro i nibi Mbori nigu boro ka boro ainongo apai tipa ní ya, nibaenge gbegberẽ apai, watadu nigu boro nagbia ngbarago ho gbegberẽpai amanga ni. Na i ima ye na gbarasarimo kuti Mbori nigayo gbegberẽ apai na biriki. (Oni gedi ARomo 2:21-24.) Kurigure, dungu apai i namangihe tipa ka igo rimo Mbori nga Yekova be aboro, na ki dihe kusayo vuru gayó asasa fugo Ziazia Kekeapai yo. Gipai re sa gupai nga ka aboro mbedinga na Mbori na ki sonosi pagume na ko ya.—Yak. 4:7, 8.
13 Yesu arugu apefuoko a i nikpari tipa ga Mbori Kindo: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Mt. 6:10) Wa vura duhe nga abarumbatayo rogo agu akanisa i aya tipaha wee si nga ga aKristano nadogoda gi kpee re ti aregbo dunduko, i nangarasa aboro tipa i songodi agu apai nga sovura. Kurigure, i nabisirapa agu aboro naʹasadatiyo ka manga dezirepai tipa ga Mbori Kindo. Nisangbana gipai re, dungu agu aboro naya aKristano nga yó afuranga berewe tipa ga Mbori Kindo te, na i na idapase kutini a te.
14. Wai agu abarumbatayo du rogo agu apambori i aya tipaha wee si nga ga aKristano naumbasipa Ziazia Kekeapai?
14 Yesu ape gupai rogo kpee yo fu Mbori ziazia nga: “Ga pai nga rengo.” (Yo. 17:17) Mbata fu Yesu ga ku ngbangbaturũ yo, ko ape gupai nga ko nika sia “gu kangara moyambu” nikaa fu gu riahe nga ga toro fu gako aboro. (Mt. 24:45) Wa vura duhe nga agu abarumbatayo nga ga akanisa yó naya i nayugo pambori ayugo fu aboro, ya mo i namanga gupai nzunzu si aida gu moyambu Yesu ape pako nimangihe? Oó. I nasa gupai Ziazia Kekeapai apehe nikungbo paturẽ. Kuba gupai nga i nirigi gayó rimbasa akandoro na gu riahe nga ga toro nga gu rengbe ka fu wasa fuyó na giarogopaiyo, i nakisika tuyo yo na gu kungbo yugopai nga ga aboro. Kupati gure, i anyakasanga pa ga Mbori arugute nga gu du tipa ruru mangaapai te, ono i kini berẽhe tigayo nga i namangapai nikina ruruhe.—2 Tim. 4:3, 4.
15. Gaoni bipai nga gine nibi agu apai abarumbatayo rogo apambori namangihe ti rimo Mbori?
15 Agi apai i asogimaha ka mangaha ti rimo Mbori re ima sa dungu aboro i zanga idapase kuti Mbori na kuti Ziazia Kekeapai. I ima zoga riyo kutii ga Satana gbegberẽ sino mangaapai. Ho oni agia agu apai ni namanga na kini bihe si nimangi na aʹuru dunduko, gaoni berãpai ningia gine? Wangia oni aKristano, ho oni abi rimo Mbori ni si nigberẽ, ya mo si nafõroni oni mangi gupai du niruruhe? Ho oni abi agu aboro ni nakpinyemu rurupai i ninangiyo na i kini ngbuo angbuo, si naafõnga roni oni fu wasa fuyó te? Ho Yesu abi aboro ni ‘i nirungo, ki nigbandaka, wa kina agu akandoro adunga na babandara ti ra ya,’ anga kina nungayo namangi ko gbua te, ono nungayo amangi ko “ko ki tona yugo dungu apai fu yo.” (Mt. 9:36; Mk. 6:34) Ani na wene nduapai berani kadu zaaza tipa ndikidi irisombori a wa Yesu adu.
16, 17. (a) Ginipai si aida si fõngbaduraniyo ani tungusipai? (b) Ginipai ani nika wisigoho rogo gu kekeapai naye fuo gere?
16 Ho du ani ni zaaza tingba gaani sunge, gu fugo Pauro du rogo 1 Timoteo 2:3, 4 nadu na ndikidi rogoyo ti ni. (Oni gedihe.) Ani namangasunge tungusapai zaaza angianga mbiko kina gupai gbua nga ani naraka ti yangara regbo ya, ono mbiko ani ini gupai a nga ga Mbori ringbisapai du. Ko nakpinyemu gupai nga aboro ini rengo ki ini wai ko aida i irisiko ki gbia amaku. Gu bambatapai nafõngbaduraniyo ani tungusipai nga ani naida ka irisa rimo Mbori na ka undo aboro i ini gako ringbisapai angianga mbiko regbo nye koyo tooni ya. Ndikidi irisombori du du ani tipaha zaaza.—1 Tim. 4:16.
17 Ga Yekova aboro na gu bakere maku nga ga ino gu rengo du tipa ga Mbori ringbisapai tipa awiri aboro na gi zegino re. Ani na gu momu nga ga undo aboro i gbia ngbarago na ndikidi maabangirise tipa kumbatayo. Ani rengbe arengba ka undo yo i gbia bata ho gbarasahe nika ye ni kurii ga Satana gbegberẽ sino raka. (2 Tesa. 1:7-9) Kuba gupai nga rago naagberã tirani mbiko ga Yekova uru naima aima bangirani, si naida ani duna ngbarago mbiko regbo kinaho kindi tipa ani du zaaza tipa ndikidi irisombori. (Mika 7:7; Abak. 2:3) Wai rengbe ani ka sonosa kakaka nyemuse tipa ndikidi irisombori? Si nga gupai ani nika wisigoho rogo gu papara kekeapai naye fuo gere.
Oni Rengbe ka Sakarogoyo?
• Gine nafõngbadu Yesu yo ko tungusipai zanga mbugo?
• Gu fugo Davide agumbaha nga “nyemu,” kura rogoyo nga gine?
• Gini apai ani abihe areme nafõngbaduraniyo ani duna kakaka nyemu ndikidi irisombori?
[Gu kpiahe du ti kpewaraga 16]
Yesu amoi berãko tipa manga gupai Bako akpinyemuhe na kini yugu nyemuse fu aboro
[Gu kpiahe du ti kpewaraga 18]
Ani na wene nduapai berani kadu zaaza tipa ndikidi irisombori