Ya Mo Oni ‘Ngangarã Tipa manga Agu Apai Ngbaangba’?

1, 2. Gini kparakpara momu dube aDezire Yekova, na wai gu ani abihe?

BADUNGU aboro nabihe nibakere momu ho i afu mosoro ni fuyo tipa gu diabese i adu nani. Nikpiapai, kura aboro aima gbia mosoro tipa gayo bakere asadatise ka sigira zereda dagba agu aboro naadunga naapa zereda dagbatiyo ya. Nairiwo wai duhe nibakerepa irisa tipa Mbori kedi rani nigako amokedi watadu tipa ani ru kubako ka undo aboro i sigira wene pagume na Bakusiyo!

² Kina rani sa nga aDezire Yekova du nagi kparakpara momu re berani. Vurube gu zinahe nga ga Mbori na Kristo, ani nazungodi aboro i ‘mbakadipai dagbayo na Mbori.’ (2 Kor. 5:20) Yekova namangasunge na ani tipa ani gbe aboro fuoko. Gere nga gu gene i aundo amirioni aboro ngbaha rogo aringara naima susa 235 i duna wene pagume na Mbori na ki duna maabangirise tipa ka gbia nyenye unga. (Tito 2:11) Ani nayamba aboro zaaza nga “gu ni idi he, ni [ye ka dia] ime unga gbua.” (Yugo. 22:17) Bambiko ani nabi gi sunge re na nyanyakipaha na kini mangihe zanga nyomoro, i rengbe ka yamba rani nga agu aboro du “ngangarã tipa manga agu apai ngba angba.” (Tito 2:14) Ani makianga pai awere tipa wai rengbe padu ani zaaza tipa ka manga gupai ngbaangba aundo rani ani mbedisi aboro fuo Yekova. Gene sa rengbe ani ka mangaha ngbaha nga vurube sunge tungusapai.

ANI WIRIKI WAI DU YEKOVA ZAAZA GBIATI YESU

3. Ginipai “gu kenapai nga ga Yekova” akido rani nani?

³ Yesaya 9:7 nafura tipa gupai gu zogarago nga ga Wiri Mbori nika mangaha ki yaa: “Gu kenapai nga ga Yekova nga ga arimbasa ko nikamanga gere.” Agi afugo re nanyakasapa wai du gu Barani du ngbangbaturũ yo na nyemu ka batasa aboro. Ga Yekova kpiapai nga ga du zaaza nayugo gupai nga gu sunge ko nafuhe furani nga ga tungusapa Kindo re naida ani mangihe na ngbaduraniyo dũ, zaaza, na nyemuhe. Gu kakaka nyemu undo aboro du tirani tipa i ini Mbori nayugopa wai du ko zaaza. Wangia ani ga Mbori abadiasunge, ya mo ani diberã ka takapande wene pangbanga wenengai ka agu apai du tipa rani idihe wo?—1 Kor. 3:9.

4. Wai Yesu amoi wene kpiapai nga ga kpatagara kuti sunge tungusapai?

⁴ Ani makianga pa wai Yesu adu zaaza. Ko amoi wene kpiapai nga ga kpatagara kuti sunge tungusapai. Wa ko avura ka gbiatiko na kere asogote, ko akpatagara kuti tungusapai daho ko adigisi gako raka ni auru kpotosende rogo iigira kpio yo. (Yo. 18:36, 37) Wa regbo aambeda ko futiko nimotumo rogo kpioyo, gako diaberã ka undo aboro i ini Yekova akii kina kumbatayo.

5. Waigu Yesu amangipai ringbisihe kuti gu gako sanza naadu tipa vurumo?

⁵ Nikpiapai, rogo gu garã nangia 32 F.B.K., Yesu afura nisanza tipa gu kumba naadu na ngua vurumo beko rogo gako ati naazungo ya tipa agarã biata. Ho bairaha ayani fu babandaha ko dehe, ko aya fuko ko mbu regbo fuko ko moi miri anyaa pati ni. (Oni gedi Ruka 13:6-9.) Kina bete abawiriki narengbe kadu nizuzu fuo ga Yesu sunge tungusapai. A wa duhe niyuguyuguhe rogo ga Yesu sanza yo tipa babanda vurumo, Yesu amangisunge na gu yangara regbo nangia adiwi sita tipa ka kiiso gako sunge tungusapai Yuda yo na Perea yo. Bete aʹuru mbata fu ko kpi, ko akpari niaume tipa gako aboro-ringara nga aguyo ‘tuyo adu nikisikisihe.’—Mt. 13:15; Rk. 19:41.

6. Tipagine si aida ani kiisi gaani sunge tungusapai ti ni?

⁶ Wa duhe nga ani naraka ti gu regbo niima mbeda ka nyasa, ya mo si aidanga ani mangi ome ka kiiso gaani sunge tungusapai te? (Oni gedi Daniere 2:41-45.) Nairiwo wai duhe nimomu kadu ni ga Yekova aDezire! Ani nga gu yangada aboro auru kpotosende nafu ndikidi maabangirise fu aboro nga ziga tipa gayo akpakarapai. Waraga apangbanga apepai barambeda ki yaa, si ima kpakara ka ino ndu gupai gbegberẽ apai amanga ti ni fu wene aboro. Gaani sunge du nga aKristano ka fu agu akaragapai nga ga Ziazia Kekeapai kuti agu asanahe re fu agu aboro nadegatuyo furani. Si naida ani “dú kakaka toro yo” wa ani amanga ga Yekova sunge. (Rom. 12:11) Yekova nika fu maku kurii gaani sunge tipa ani undo aboro i ye ka iniko na ki kpinyemuko.

GU TORO NGA GA FUTISE NAFU TAARIMO FU YEKOVA

7, 8. Wai gaani toro nga ga futise afu taarimo fu Yekova?

⁷ A wa gu kpiapai nangia ga gu mokedi nangia Pauro ayugoho, si rengbe kadu nga ani nazanga rame mbiko sunge tungusapai, na kini zanga riahe a. (2 Kor. 6:5) Gipai re nayugopa futise na kini tingida rani naapa agu abazakigene naperesa sunge tungusapai rogo gayo raka yo, ti gu sunge i amangaha ka undo tiyo rogo borose yo. Ani berẽnga kina pa gaani amokedi nga aguyo ‘natumo na tiyo wa mbirimbiri motumo’ tipa ka undo aboro rogo kura aringara. (Frp. 2:17) Na ginipai du tipa agu abaakumba namangasunge kakaka nakpa ti riahe watadu nazanga rame tipa ka ngerafuo ga Yekova akandoro? Ani a na gbinza aboro dagbarani gbiati agu aboro nakaza ono namanga ome tipa kaa ye sa adunguratise na kini mangisunge tungusapai. Ngbaduraniyo nahi be ngbarago ho ani aberãpa wai gi ga Mbori amoyambu re afutiyo ni. Ngbatunga gi asadatise re na ome kurii wai aboro abi gaani tungusapai.

⁸ Kura boro angianga dezire Yekova ya akepai fu waraga pangbanga ringara Ngirisi yo ki yaa: ‘Aboro na idapase berewe kuti apambori te. Ginipai abarumbatayo rogo pambori amangaha na agi aʹuru re pitipiti? I atanga rogo akporo wagu Yesu anaamangaha tipa kaa fura na aboro te. Gu bangisa pambori si awira wa si namangaha nga aDezire Yekova, i nandu kini fura na aboro na kini tungusi rengo fuyo.’ Rogo gi zegino aboro abi kina pa tiyo na nyanyakipaha re, pa mbu ani kura gaani apai nafu taarimo fu Yekova.—Rom. 12:1.

9. Ginipai rengbe ka undo rani ani du zaaza tipa ka manga sunge tungusapai?

⁹ Ono tie, ginipai rengbe ani ka mangaha ka si du nga ani ima tona kaa zera ti ngba sunge tungusapai? Si angba gbe ka ani berẽkurii gupai Yekova amangaha vurube sunge tungusapai. (Oni gedi ARomo 10:13-15.) Ga aboro bata naruriipa yamba yó rimo Yekova rogo idapase yo, ono i arengbanga ka yamba rimoko te ka ani atungusanga pai fuyo ya. Si naida pa ino ani gipai re sa rani ani nye zaaza tipa manga gu sunge ngbaangba na kini takipande wene pangbanga nga ga Kindo kakaka.

WENE MANGAPAI NAGBE ABORO FUO MBORI

10. Tipagine rengbe ani ka ya ti ni wee gaani wene mangapai nagbe aboro fuo Yekova?

¹⁰ A kina wai nyakipa sunge tungusapai, du zaaza nisaha arengbanga ka gbe aboro fuo Mbori te. Gu uepai rengbe ka gbe aboro fuo Mbori nga gu wene mangapai nga ga aKristano. Pauro anyakasipa nyaka gaani mangapai ho ko ayaa ni wee: “Ka ani fú nga ũkota rogo gu pai yo wa sa ya, ya ka i dingisa nga pai ti gaani mangaapai ya.” (2 Kor. 6:3) Gaani wene afugo na wene mangapai nafonga gu yugopai nga ga Mbori na kini ba nyemu irisoko ti aboro. (Tito 2:10) Nirengo, ani naagia aboro agia i nitambua rani ho i abi gu gaani wene amangapai ni duwa ga Kristo.

11. Tipagine si aida ti ni ani kparakpee na ki berẽkurii sangbana gaani mangapai?

¹¹ Wa vura duhe nga wene gaani mangapai rengbe kadu na wene sangbanaha kurii aboro, kinawo a rengbe gbegberẽhe kadu nani. Singia ani basunge yo, kporo yo, watadu sukuru yo, si aidanga ani mangi gupai nika do aboro kusayo ti Yekova te. Ka si du nga ani namanga ingapai niwia, sangbanaha rengbe kadu nigbegberẽhe. (Eb. 10:26, 27) Gipai re sanga rani asa ani berẽkuriihe gaani mangapai na ki kpari tipa gupai gaani raka ayugoho fu aboro. Wa duhe nga gu ruru mangapai du rogo zegino nagberã kina kumbatayo, ruru aboro nika bi ‘kparakparapai abi dagba gu boro namangapa Mbori na gu boro amanganga pako ya.’ (Mara. 3:18) Ii, gaani wene mangapai namanga nyanyakipa sunge tipa ka mbakadapai dagba aboro na Mbori.

12-14. Gu gene ani ahi asada ngbaha tipa idapase, wai duhe na ome kurii agu aboro nabi gaani sunge tungusapai? Oni funga kpiapai.

¹² Ho Pauro akepai ni fu Akorindo, ko aya ko agbiatiko na dungu agberãngbi, akpakarapai, i ki ta ko, na ki moiko ku bambukiso yo. (Oni gedi 2 AKorindo 6:4, 5.) Ho ani agbiatirani ni na asada tipa idapase, gaani hipai rengbe ka undo agu aboro nabi rani i di rengo kugume. Nikpiapai: Bete agarã kusayo, aboro aaida ka nyasariipa aDezire Yekova rogo gu ringara nga Angola. I ata aDezire Yekova ue gbegberẽ na agu aboro 30 naadu na nyemu rengo tiyo. Sidu, aboro adunguratiyo ka bi wai i ata agi aboro-wenesa re daho kure atona ka ga ni tiyo. Zavura adee na agude i ainongo pai fuyo te. Gupai i aaidaha nga ka gundesi aboro ka i degenga tuyo berewe fu aDezire Yekova ya. Fuo aboro bi gipai re, badungu agu aboro naadu rogo gu dagbarago re atona ka sana aDezire Yekova tipa i wiriki Ziazia Kekeapai naayo! Fuo gupai re ngbutuko, sunge tungusapa Kindo asono kumbatayo, aboro ki moipai rogo rengo yo na si ki ye na badungu amaku.

¹³ Gi kpiapai re nayugopa wai sangbana gaani ru nyanyaki tipa agu arugute nga ga Ziazia Kekeapai narengbe kadu na ome kurii aboro. Ani rengbe ka bakabangirani nga aboro wai nambakadipai dagbatiyo na Mbori mbiko biyo wai Petero aru nyanyaki na kura amokedi. (Amo. 5:17-29) Ono tipa rani tigaani, akuarani sukuru yo, basunge yo, watadu gaani aborokporo rengbe ka dia rengo kugume ka i bi gupai nga ani kakuti rengo nyanyaki.

¹⁴ Wa du rago re, bete awirinarani nagbiatiyo agbia na rungosiro. Nikpiapai, rogo gu ringara nga Armenia, awirina wa 40 du bambukiso yo bambiko i arimisongo tiyo kurogo birĩ zogarago yo te, na si nawira wa i nikaa zio aguyo azio. Eritrea yo, ga Yekova amoyambu 55 i amoiyo ku bambukiso yo, aguyo garãyo naima susa 60. Rogo gu ringara nga South Korea, aDezire Yekova wa 700 du bambukiso yo tipa gayo idapase. Gipai re ima dia agarã awere wa 60. Ani kpari tipa agu awirinarani i arungosiyo rogo dungu aringara tipa gayo ruru mangapai tipa wa ka si fu taarimo fu Mbori na ki undo agu aboro nakpinyemu rurupai i di rengo kugume.—Tam. 76:8-10.

15. Oni funga kpiapai tipa wai rengbe padu ani niruru rani narengbe ka gbe aboro sa rengo.

¹⁵ Gu gene ani araka gaani raka ngbaha rogo rengo yo ima rengba ka gbe aboro sa rengo. (Oni gedi 2 AKorindo 6:4, 7.) Nikpiapai, ani makianga gipai re: Wirina sa afu marã tipa wa ri adakpa baasi gu kurari kini mo ka ya furi si aidanga ri fu marã te mbiko turunga gu ba re te. Gi wirinarani re aya ruhe aruhe ri fu marã wa vura duhe nga turunga gu ba re te vurũ. Fuo gure, gu kurari re azoro baasi yo. Sidu, bakama baasi asana ri ki yaa, “Dezire Yekova du nga mo?” Ri karagaha ki yaa “ii, ginipai sa ro mo sana re?” ‘Mi niima gia gu sakapai nidu tipa marã, na mi ima inoho nga aDezire Yekova du dagba gu bete aboro rengbe ka mangapai wo na i niruruyo rogo apai yo dũ.’ Fuo bete adiwi kusa, gi kumba re aye fuo gi wirinarani re ba dunguratise yo na ki sana ri nga, “Mo ini re? Mi nga gu bakama baasi naafura na mo tipa tumo marã baasi. Pa kparia mi gamo mangapai naasa re mi diberã ka tona wirika Ziazia Kekeapai na aDezire Yekova.” Padu ani niruru rani nasa aboro i kido kuti gu wene pangbanga ani atungusaha.

ANI YUGU AGU ASINO DEDEDE NAFU TAARIMO FU MBORI

16. Tipagine agu asino duwa hipai nigbangaha, nyemuse, na weneringise azio ngbadu aboro yo ti ni? Oni funga kpiapai.

¹⁶ Ho ani ayugo ngbatunga agu asino ni duwa hipai nigbangaha, nyemuse, na weneringise, si nagbe aboro fuo Yekova. Agu aboro nabi rani rengbe ka kpinyemu ka wirikapai tipa Yekova, gako ringbisapai, na tipa gako aboro. Gu sino na mangapai nga ga ndikidi aKristano, si kia tigu biriki aboro amangaha i yaa i nga avuru Mbori te. Bete abarumbatayo rogo apambori namanga tiyo nga i na wene asino gbiati mangapai. Ono i nape ziree fu apefuo yó na kini mangi marã rii ngongo yó. Aguyo namangasunge na gi marã re tipa ka ngbeka wene akporo na tarambiri tipa tiyo. Gu kurako sa adua wene bambu fu gako ango na ũpida zezere wege vuruhe yo! I apekanga fuo ga Kristo rugute du tipa fuhe “gbua, angianga ti marã ya” te. (Mt. 10:8, NW.) Kuba gure, i wagu ga aYisaraere gbegberẽ aboromotumo ‘naayugopai tipa mosoro,’ na badungu agu apai i ayugoho si rogo Ziazia Kekeapai te. (Mika 3:11) Ngbatunga gi mangapai nga ga biriki re ambakadanga pai dagba aboro na Mbori te.

17, 18. (a) Wai pa yugo ani asino Yekova rogo gaani raka yo afu taarimo fuko? (b) Ginipai saroni oni kpatagara kuti manga gu sunge ngbaangba?

¹⁷ Ono gu ndikidi yugupai nga ga aKristano gbiati wene mangapai fu akurayo nazio ngbadu aboro yo. Nikpiapai, bazakigene agbiatiko na dekurugbo naaidanga ka degaturi fuko ya ti gu regbo ko aatungusapai kporo na kporo. Ri ayaa ho ko ni nari nzoro ni ri nidu bambu manga riahe yo ri tanga ninaambakada gari we ariyo. Ko aya furi: “Si aidanga mo namanga gipai re nisaro te.” Gi bazakigene re ambakadi gi gari we re na ki ndu na gako sunge. Ho wiiri aini gipai re ni, si aima ngbatiko na ko ki gbata gi wirina re tipa ka fu tambuahe fuko. Niyangaraha, gi wiiri re aidi ka wirika Ziazia Kekeapai.

¹⁸ Tipagine oni nadiberã ti ni ka kpatagara kuti manga gupai ngbaangba? Oni ima ino gupai nga ho du ani ni zaaza tipa sunge tungusapai na kini mangipai ringbisihe kuti gupai Mbori akpinyemuhe, ani nafu taarimo fu Yekova na ani rengbe arengba ka undo aboro i gbia bata. (Oni gedi 1 AKorindo 10:31-33.) Du ani zaaza tipa ka tungusa wene pangbanga na asino rani kidu niwenehe nayugo gupai nga, ani na dudunguro nyemuse tipa Mbori na tipa akuarani aboro. (Mt. 22:37-39) Ka ani du zaaza tipa manga gupai ngbaangba, ani nika gbia bakere mosoro na kidu na ngbarago tona kina awere. Kurigure, ani rengbe ka ngera kumbatayo tipa gu uru aboro dunduko nikadu zaaza tipa ndikidi irisombori na kini fu taarimo fu Bakusirani nga Yekova.