Akumba, Oni Nara Kutii Gu Pagbia Nga Ga Kristo?
“Ri akumba dunduko nga Kristo.”— 1 KOR. 11:3.
1. Gine nayugo gupai nga Mbori nga boro ruguzuruguzu apai te?
YUGOTI 4:11 nayaa: “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.” Yekova nga Bahe rogo haurago dunduko, mbiko ko nakusi ahe dunduko. Ani naino nga Yekova ni “Mbori ruguzuruguzu apai te ono zereda” rogo gu gene ko naringbisi gako amaraika ngbaha na gayó asunge.—1 Kor. 14:33; Yes. 6:1-3; Eb. 12:22, 23.
2, 3. (a) Da nga gu bambata mangimangihe nga ga Mbori? (b) Ya mo rengbe Yesu arengba na Bako?
2 Mbata fu Mbori tona ka kusa ahe, ko aima duho nisako. Gu bambata he Mbori akusihe angia boro nitoro, ko anaayamba ko nga “Pai” bambiko ko angia bagumba fugoko. Pai i ambakadi ahe dunduko rogoko yo. Kusa, ko aye ku sende no nirengbe rengbe boro na gu rimo nga Yesu Kristo.—Oni gedi Yoane 1:1-3, 14.
3 Ginipai Ziazia Kekeapai agumbaha tipa ga Mbori bangiriba na gu nga ga bambata Wiriko? Ga Mbori toro adu kugii gu mokedi nangia Pauro ko kepai ki yaa: “Mi nakpi nyemu oni ini he ya, ri akumba dunduko nga Kristo; ri de ki ngia kumba; ri Kristo ki ngia Mbori.” (1 Kor. 11:3) Kristo kutiibe ga Bako pagbia. Pagbia gbiati ra kutiibe pagbia nga agu apai naye na zereda ku dagba amaraika na ku dagba aboro. Zavura guko ‘i afu ahe dũ rogo ko yo’ nakpinyemu ka ra kutiibe ga Mbori pagbia.—Koro. 1:16.
4, 5. Wai Yesu anaabi gako bangiriba?
4 Wai Yesu abi pa ra kutiibe ga Yekova pagbia naapa ye ko ku auru kpotosende no? Ziazia Kekeapai nayaa: “Wa [Yesu Kristo] adu ni kina Mbori; rengba ko na Mbori adu nga bangiriko ni mosoro te, ono ko auka pa tiko ki du wa kina kanga, ki du wa boro; pa bi ko adu wa pa boro. Ko ki umbasi tiko, nigi sangba dati kpio, ii, nga kina gu kpio nga ga wagiwagi ngua.”—Frp. 2:5-8.
5 Yesu aduna umbasitise ka manga gupai Bako akpinyemuhe ti aregbo dũ. Ko ayaa: “Ka mi mangi nga pai ni tire te; . . . ru gi sapangbanga aru; bambiko mi agbata nga gu pai mi akpi nyemu he te, kina gu pai gu ko akpi nyemu he nakedi re.” (Yo. 5:30) “Mi namanga kina agu apai ngba ti [Buba].” (Yo. 8:29) Nimbedi kuti digido ga Yesu raka auru kpotosende, ko aya fu Bako rogo kpee yo wee: “Mi taasi rimoro rogo kpotosende, mi nyasi gu sunge fu mo fere mi mangi he.” (Yo. 17:4) Nirengo, si aadunga fu Yesu nimbumbupai ka ra kutiibe ga Mbori pagbia te.
Pa Ra Wiri Kutiibe Bako Aye na Amaku Fuko
6. Gini wene asino Yesu ayuguhe?
6 Ho Yesu aduni auru kpotosende, ko ayugu dungu wene asino. Gu sa dagba gu wene asino re nga gu bakere nyemuse ko adu nani tipa Bako. Ko ayawee: “Mi nakpi nyemu Buba.” (Yo. 14:31) Ko aima yugo bakere nyemuse a tipa aboro. (Oni gedi Matayo 22:35-40.) Yesu aduna weneringise na kini berẽpa aboro, angianga kaa manga aboro ngba gbegberẽ gene ya. Ko ayaa: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni. Bambiko kii nga gi gonga te, na gi tindiro ni aakpura ha.” (Mt. 11:28-30) Gu bayee aboro naadu ti rago Yesu, aparanga watadu sosono aboro, gbe aguyó i amangi yó ngba gbegberẽ gene, agbia wasa be ga Yesu wene asino na gako wene pangbanga.
7, 8. Ringbisihe kuti ndiko, wai i anaabi gu dee kureri aga tipa agarã 12, ono wai Yesu amangipai na ri?
7 Ani makianga gu gene Yesu anaamangapai ngbaha na adee. Ti gi gaani regbo re, badungu akumba namanga adee gbegberẽe. Kina gu bangisapai re agu abarumbatayo rogo pambori nadu Yisaraere yo anaamangaha. Ono Yesu anaabi adee tigako na kikiipayo na kini fu irisa fuyó. Gi sinoko re adu niyuguyuguhe rogo gako mangapai yo na gu dee kureri aga tipa agarã 12. “Ri aimi be dungu” amunganga gbe, na ri ki bagi agu ahe nadu be ri dũ tipa ka hu. Wa ri avura asada tiri ka hu, ‘kaza azi ri azio bakere ti gu naadu mbata.’ Ringbisihe kuti ndiko, ri adu nibibiriko boro. Gu boro ka zadi ri, ka ní ada a nibibiriko boro.—Pa Mot. 15:19, 25.
8 Ho gi dee re agi gupai ni nga Yesu nahusa aborokaza, ri aye ku dagba gu rimbasa aboro naru patiko kirikiri, niyaa: “Ka mi zadi kina gako remu mi abáta abata.” Ri azadi Yesu ki hu nibasa kindi. Yesu aima ino gupai nga si arẽnga ri zadi gako rokoo te. Wa si avura duwo, ko aazinganga kuti ri te. Kuba gure, ko amangi ri niweneringise. Ko aima rugatiko naapa wai ri ambu be gu kaza re tipa dungu agarã, na ki ini gupai nga ri aida undo. Yesu aya furi ninunga: “Vungu, ga idapase batasi ro; mo ndu zezeredi ki bati.”—Mk. 5:25-34.
9. Ga Yesu karagapai angia gine ho gako abawiriki azahe ni nga ka i yengo na agude fuoko ya?
9 Zavura agude, i aarengbanga ka gunde be Yesu te. Ho aboro ayeni na agude fuo Yesu ti kura regbo sa, gako abawiriki azingi kutiyó, ki berẽ gupai nga ko aidanga agude ye kaa fuda ko te. Ono anga wo Yesu adu te. Gu pangbanga nga ga Ziazia Kekeapai nayaa: “Ho Yesu ainihe ni, si ki nigberẽ agberã ti ko, ko ki ya [fu gako abawiriki], ‘Oni hé rukutu agude i ye fuo re; ka oni káraga nga yo ya; bambiko i wa avuru ga Mbori ngbii.’ ” Fuo gure, “ko ki aka yo beko, ki moi beko auru yo, ki fu maku fu yo.” Yesu ambu agude i ye fuoko na ko adi yó kugume ningbarago.—Mk. 10:13-16.
10. Wai Yesu agbia gu wene asino ko ayuguhe auru kpotosende?
10 Wai Yesu agbia gu wene asino ko ayuguhe rogo gako raka auru kpotosende? Mbata fu ko ye ku auru kpotosende no, ko aima wisigo Bako tipa gbanga regbo na ki wiriki agu agene ko anaamangapai ngbaha. (Oni gedi Asanza 8:22, 23, 30.) Ho ko aduni ngbangbaturũ yo, ko aima bi wai Yekova aamangasunge na gako pagbia rogo nyemuse kurii agu ahe ko akusihe. Fuo bi ko asino Bako, ko asaha ni asinoko. Padu Yesu na agu asino re nayugo gupai nga ko aima ra kutiibe ga Bako pagbia. Si adu nipa ngbarago fuko ka ra kutiibe ga Bako pagbia, na rago aima ngba a ti Yekova kadu na ngbatunga gu gude duwa gure. Ho Yesu aduni auru kpotosende, ko ayugu kina boro gu wene asino nga ga Bako. Nairiwo gu momu du ani nani nga ka ra kutiibe ga Yesu pagbia, nga gu boro Mbori nasia ní nibazogo nga ga gako Kindo!
Oni Wiriki ga Yesu Asino
11. (a) Da si aida ani mangi asadatise ka wirika ní? (b) Tipagine si aida agu akumba du rogo dungurati mangi asadatise ti ni gbe ka wirika Yesu?
11 Agu aboro dunduko du rogo gu dungurati nga ga aKristano, gbe, akumba, si aida i mangi asadatise ka wirika ga Yesu asino. A wa ani nibihe mbata, Ziazia Kekeapai nayaa: “Ri akumba dunduko nga Kristo.” A wa Yesu ara kutiibe gu pagbia nga ga ndikidi Mbori, si naida akumba asaditiyo ka ra kutii gu pagbia nga ga Kristo. Ho Pauro adani ni Kristano, ko amangi kina gu bangisapai re, na ki ngarasi akurako aKristano ki yaa: “Oni dú ni awiriki pa re, a wa du mi a ni wiriki pa Kristo.” (1 Kor. 11:1) Gu mokedi nangia Petero ayaa: “Gi nga gu pai i ayambu roni kuti ni re: mbiko Kristo ahi pai a tigako tipa roni, ki he kpia pai fu roni, oni peke fuo ko.” (1 Pet. 2:21) Gu kura ndupai kinaho du gu rugute re ti ni fu akumba na nyanyakipaha. Si wo mbiko i nga agu aboro nada ni abaakumba na ni amoundo abaakumba. Kina wai Yesu agbia ngbarago be wirika Yekova, kinawo a si aida agu akumba nga aKristano gbia ngbarago be wirika Yesu na asinoko.
12, 13. Wai si aida abaakumba naamangapai na agu akandoro i angerafuo ra?
12 Abaakumba rogo dungurati na gu tindiro nga ka wirika wai kadu wa Yesu. Petero arugu abaakumba ki yaa: “Oni mbú ti ga Mbori rimbasa akandoro du dagba roni, nimangi sunge barumbatayo, mbiko du oni ni zizi roni kuti ni te, ono ni nyemuhe fu Mbori; tipa gbegberẽ ũkumuko a te, ono ni idapaha kpotoroni yo. Ka oni dú nga ni abazogo agu yo i aasia payo fu roni ya, ono oni dú ni kpiahe fu rimbasa akandoro.” (1 Pet. 5:1-3) Si aidanga abaakumba naamangapai na aboro ngbaome watadu na zinga te. Wirika ga Yesu kpiapai nika sa gupai nga i asaditiyo nyanyakii kadu na nyemuse, umbasitise, kini berẽpa aboro, na kidu na zera ho i amanga gayó sunge ni nga ga ngerafuo akandoro.
13 Agu aboro nangbembatayo rogo dungurati nga kpakpa aboro, si aidanga bangiriyo go ti gipai re te. (Rom. 3:23) Sidu, si naida i duadu na nyemu wirika ga Yesu kpiapai na kini wiriki gako nyemuse. Si naida i berẽkurii gu gene Mbori na Kristo amangapai ngbaha na aboro na ki asadi ka wirikayo. Petero angarasi rani ki yaa: “Oni úkadi tironi dunduko na umbasiti, ki ra fu akuaroni; mbiko ‘Mbori naka fu aboro rekangose, ono ko nafu undahe fu agu yo naumbasi tiyo.’ ”—1 Pet. 5:5.
14. Wai gu si aida abaakumba naabi aboro?
14 Ho abaakumba amangapai ni na aboro rogo dungurati, si naida i duna wene asino. ARomo 12:10 nayaa: “Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.” Abaakumba na amoundo abaakumba nairisa aboro airisa. Si aidanga abaakumba ‘mángi pai na vura na ruko wa sa te, ono i niberẽpa akurayo rogo umbasitise nga ga berã, kini berẽ gupai nga akurayó kii payo tiyo.’ (Frp. 2:3) Agu aboro nangbembatayo rogo dungurati nabi tiyo nga pa kura aboro kii ti gayó. Pa manga yó ho wo nasa gupai nga i naapekafuo gu ga Pauro rugute nayaa: “Agu rani du nyanyaki ani ka hi gu mumungo pai ahi nga ga rurungbura aboro, ka ani amanga nga gu pai ngba ti kina rani ya. Ani mongo nimangi gu pai ngba angba ti akuarani sa wenepai, sa pa nyakasa he. Bambiko Kristo a, ko amanga nga gu pai ngba ti kina ko te.”—Rom. 15:1-3.
‘Fu Irisa fu Adee’
15. Wai si aida akumbakuadee naamanga adiayo?
15 Ani makianga gu rugute Petero afuhe fu akumbakuadee. Ko akepai ki yaa: “Akumba, oni rá kporo na yo na rugatinapai, nifu irisa fu de wa arengba nga ome de na ga kumba ya.” (1 Pet. 3:7) Ka irisa boro nga ka bi ní na kikiipa ní. Ho ani airisa boro ni, ani nawisigo gani bipai, gani azingo, gbiati agu apai ní akpinyemuhe, na ki idi kuti gani bipai ka si ruaru wo. Wo si aida kumba nimangi diani.
16. Ginipai Ziazia Kekeapai ayawee ka akumba airisanga adiayo ya, si nika manga?
16 Ho Petero ayaa ni fu akumba i irisi adiayo, ko ayaa: “Ka pai dingisa nga gaoni kpe ya.” (1 Pet. 3:7) Gu zinahe re nayugopa wai Yekova abi gu gene akumba amanga adiayo ngbaha. Ka kumba afunga irisa fu diani ya, Mbori degenga tuko sa gani akpee te. Ya mo adee arengbanga kadu na ngbarago ho akumbayo amangapai ni naayó niʹirisa tee?
17. Wai si aida gu nyemuse nga ga kumba tipa diani du?
17 Nibipa gupai nga akumba nikpinyemu adiayo, Fugo Mbori nafu rugute niyaa: “Akumba kpí nyemu adiayo a wa boroyo. . . . Bambiko a nga boro sa nasoga boroni te, kina mbu ti ni na banda ha, wa kina Kristo na kanisa a; . . . Gu ni nikpí nyemu diani wa du oni ni ba sa sa, wa kina tini.” (Ef. 5:28, 29, 33) Wai si aida gu nyemuse nga ga kumba tipa diani du? Pauro akepai ki yaa: “Akumba, oni kpí nyemu adiaroni, a wa Kristo akpi nyemu kanisa a, ki fu tiko tipa ha.” (Ef. 5:25) Nirengo, si naida kumbakudee fu tiní zavura ungani tipa diani, a wa Kristo afu tiko tipa aboro. Ho gu kumbakudee nga Kristano amanga diani ni ninunga, ki moi berãko fuori, na kini mangi ri besemene, si nadu furi taata tipa ri ra kutii gako pagbia.
18. Gini undo akumbakuadee agbiaha tipa ka ngerafuo gayó asunge rogo ramukporo?
18 Ya mo pa fu akumba irisa fu adiayo ngba gi gene re nga bakere tindiro? Oó, ka Yekova onga gupai be yó arengbanga omeyo nani ya te. Kurigure, airisi Yekova rogo zegino dũ na gu bakere ome beyo nga ga Mbori ziazia toro. Yesu ayaa: “Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama Ziazia Toro fu agu yo nasana ko, te?” (Ruka 11:13) Akumbakuadee rengbe ka sana Yekova tipa gako toro si undoyo i naamangapai na aboro ngba wene gene kodihe na adiayo a.—Oni gedi Amokedi 5:32.
19. Ginipai ani ka wirikaha rogo gu kekepai naye fuo gere?
19 Nirengo, akumba na bakere tindiro beyo nga ka wirika wai ka ra kutiibe Kristo na ki wiriki ka mangapai wa ko rogo pagbia yo. Ono ginipai tie du tipa adee, gbe aguyo nga dereakumba? Gu kekepai naye fuo gere nika sakapai tipa wai si aida adee naabi gayó bangiriba rogo ga Yekova mbakadapai.
[Gu kpiahe du ti kpewaraga 16]
Oni wiriki Yesu niyugo oni irisa fu aboro
[Gu kpiahe du ti kpewaraga 17]
Oni Natingidaha?
• Gini asino Yesu si aida ani wirikihe?
• Wai si aida abaakumba naamangapai na akandoro?
• Wai si aida kumbakudee nimangi diani?