Gine Nga Ga Mbori Ngbi?

“Gi wene pangbanga nga ga ngbi re . . .”​—MATAYO 24:14.

ROGO gu ga Yesu Tungusapai Nadu rii Bagangara yo ini aboro paha na rago dunduko, Yesu ayugu kpia kparakpee nga gu ko azungodi Mbori rogo yo ki yaa: “Ga ngbi yé.” Ga Mbori ngbi nga ga Mbori Kindo. Kindo nga zogarago bakindo azogaha. Dungu amirioni aboro nadogoda gi kparakpee re ngbariyo ti aregbo dunduko. Buku sa nasakarogo dungu apai nayawee, si nga gu “kparakpee aKristano dunduko naamangaha rogo gayó irisombori yo.” Wa vura duhe wo, dungu agu aboro nagumba gi kpee re ainongo guhe nga ga Mbori ngbi watadu Kindo na gupai si nika mangaha ho si nika ye ni te.​—Matayo 6:9, 10.

Agu abarumbatayo nga ga agu akanisa nga ga aKristano nagumba dungu tuditudiapai tipa guhe nga ga Mbori Ngbi, na agu apai i agumbaha tipaha, si nikpakarakpakaraha tipa boro girogoyo. Barumbatayo sa akepai ki yawee ga Mbori ngbi nga “kodatise na unga Mbori ngbaduseyo . . . , nga gu nasa akumba na adee i gbia bata.” Gu kurani ayawee gu pangbanga nga ga ga Mbori ngbi nga “gu yugopai du tipa kanisa.” Na gu Katekisimo nga ga aKatoriko nayaa: “Ga Mbori ngbi [nga] rurupai na zereda na ngbarago rogo Ziazia Toro yo.”

I sakipai tipa gipai re gbe ti kpewaraga 2 nga ga gi waraga re. Si nape gupai nga: “Ga Mbori Kindo, nga ndikidi zogarago du ngbangbaturũ yo, si nika nyasa riipa gbegberẽ apai dunduko na ki sa gi kpotosende re ni paradizo.” Ani bingo wai Ziazia Kekeapai asongoda gi bipai re.

Agu Aboro Nika Zoga Kpotosende

Yesu Kristo nga gu ko i azingisiko bekpio nga Bakindo ga Mbori Kindo. I ayugupa maa Yesu nibakindo ngbangbaturũ yo rogo gu yuguyugupai i ayuguhe fu gu nebi nangia Daniere nga guko nakepai ki yaa: “Mi abi yuguyuguapai yuru, oni ngére, boro aye wa wiri boro [Yesu] rogo mai ngbangbaturũ yo, ko ki da koyo du gu Bakuru Ko ni du ho kindi [Yekova Mbori], i ki mbedesi ko ku bara bangiriko. I aasia pa zogarago fu ko na taarimo na ngbi, ya aboro dunduko, na arikaaboro, na ngbatunga aboro na afugoyo mangi pa ko; gako zogarago nga nyenye zogarago, nga gu nikanyasa nga ya, gako ngbi nga gu ka i agbárasa nga ha wa sa ya.”​—Daniere 7:13, 14.

Gu kitabu nga Daniere nape gupai berewe nga, Mbori nika sigira gi Kindo re nyanyakii, si nika diaba agu azogarago nga ga awiri aboro dunduko, na si nika nyeanye kindi. Kapita 2 nasakapai tipa gu musumo ga Mbori toro adu kugiihe bakindo Babera ararihe nangia Nebukadenesara, nga gu ko abi bakere kpiahe naarukuba agu azogarago nga ga zegino nga gu nikaa diaba akuraha. Nebi Daniere akusi sangba gu musumo re. Rogo “yangara arame,” Mbori “ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”​—Daniere 2:28, 44.

Bakindo ga Mbori Kindo adunga ti zogarago nisako te. Ti regbo ga Yesu sunge auru kpotosende, ko akido gako ruru amokedi nga i gbiati gu kurayo nika gbia zingabekpio ku ngbangbaturũ yo ki sungu auru ambatabakindo. (Ruka 22:28-30) Anga agu ambatabakindo nga ga kpotosende du Yesu aafura tipaha te, mbiko gu Kindo re ngbangbaturũ yo. Ziazia kekeapai nape pa agi abadiazogarago re nga i “dagba angbatungayo, na angbatunga afugoyo, na aboro, na arikaaboro dunduko.” I nika du ni “abakindo na aboromotumo tipa gaani Mbori; i ki nizogo rago [ku] auru kpotosende.”​—Yugoti 5:9, 10.

Gupai Du gu Pangbanga Nga ga Kindo ti ni Niwenehe

Oni ini gupai nga i fu pagbia fu Kristo Yesu kurii “aboro dunduko, na arikaaboro, na ngbatunga aboro na afugoyo” na awirinako nika ‘zogarago ku auru kpotosende’ ni abakindo. Ada tie nikangia azogo? Azogo nikangia agu aboro naida na gu wene pangbanga nga gu i atungusaha areme. Na agu aboro i nika zingisayo bekpio ku auru kpotosende nga aguyo nikadu na momu ka raka auru kpotosende ane nyeanye kindi.

Ziazia Kekeapai nafura afura ziazia tipa agu amaku aboro nikadu nani tii gu zogarago re. Bete agu amaku re gi du re:

‘Ko namanga pai, vura nyasi digida kpotosende no; ko akua mboto, ki kuadi baso rukutu, ko azo angbagidavura ku we yo!’​—Atambuahe 46:9.

“I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te.”​—Yesaya 65:21, 22.

“[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”​—Yugoti 21:3, 4.

“Si du bangiri airavurari azá, tu airangbianga ki ha; terengeterenge aboro agúka wa ngbiimo, mirã kisikisi ngba boro abi bia ni ngbarago.”​—Yesaya 35:5, 6.

“Ragoho nada, ho agu yo ka gia fugoko [Yesu] ni dunduko du rogo amurã yo, ki kuru; agu yo nanamanga wenepai sa gu zingabekpio nga ga unga.”​—Yoane 5:28, 29.

“Bayee aboro adía kumbo ringara, ki du na ngbarago tipa gu wenepia du kpaima.”​—Atambuahe 37:11.

Wene pangbanga du rengo! Kurigure berewe, gu digisidigisi asangbaanebi nga ga Ziazia kekeapai nayugo gupai nga regbo ima mbeda gu Kindo re tona zogarago ku auru kpotosende dunduko.