Gaani Bangbembatayo Namangasunge Kakaka Areme
“Ko ki ta kura nidi be apai, ki ndu ka dia be apai.” —YUGO. 6:2.
1, 2. (a) Wai Ziazia Kekeapai aringbisapa gupai Kristo amangihe tona rogo 1914? (b) Gini apai Kristo namangihe tona ti gu regbo ko asungu rii mbatabakindo?
I AMOI Kristo nibakindo ga Yekova Kindo rogo 1914. Wai du ani abi ko awere berãrani yo? Ya mo ani nabi ko nibakindo nazogarago rii gako mbatabakindo kini ngere ku auru kpotosende kaa bi wai gako dungurati amangasunge? Ka si ngia wo ani abi ko, si naida ani aria gaani bipai. Atambuahe na gu kitabu nga Yugoti nayugo ko nigu bakindo sungu rii gako dongi kini oro “nidi be apai, ki ndu ka dia be apai” daho ko nika dia ni be apai dunduko.—Yugo. 6:2; Tam. 2:6-9; 45:1-4.
2 Gu bambatapai Kristo amangihe fuo sungo ko rii mbatabakindo angia ko adibe “daragona na gako amaraika.” Wangia Kristo bakumba maraika, nga Mikaere, ko azinahe fu gako amaraika i ki tumba Satana na gako amaraika ki mere yó ku sende no, ka gene adunga berewe beyo i ga ku ngbangbaturũ yo ya. (Yugo. 12:7-9) Fuo gure, Yesu aye na bako nigu “bandusunge nga ga mokido ko” tipa ka wisigo gu yekaru nga ga toro. (Mara. 3:1) Ko asapungbanga agu akanisa duna rimo aKristano riihe, nga bakere papara ‘Bakere Babera,’ mbiko i abi gu debäri re na kure aboro kuriri na ri amangi bäri na abazogo gi zegino re.—Yugo. 18:2, 3, 24.
Kristo Agirisi Gako Moyambu
3, 4. (a) Gini sunge Kristo amangihe niga Yekova “bandusunge”? (b) Pa wisigo yó yekaru ayugu ginipai, na wangia Kristo Barii gu dungurati nga ga aKristano, gini sunge ko afuhe fu gako moyambu?
3 Gu wisigo yekaru Yekova aye ka mangaha na gako “bandusunge” ayugu gupai a nga, badona kinaho nga ga ndikidi aKristano naamangasunge rogo gu vurukporo nga ga gu yekaru nga ga toro auru kpotosende, nga aguyo naadunga nipapara agu akanisa du kina rimo aKristano gbua riihe ya. Ono tie, zavura gu mbedimbedi aKristano re, watadu “awiri Revi,” si aidi i girisi yó agiriso, a wa gu nebi nangia Maraki aima gumbaha ki yaa: “[Yekova] asúnga wa baukamarã feda ni bagirisi he a, ko agírisa awiri Revi ziazia ki girisi yo wa i nagirisa dahabu na feda, daho i ka gama ruru amotumo ni fu Yekova.” (Mara. 3:3) Yekova amangisunge na gako “bandusunge nga ga mokido ko,” nga Yesu Kristo, ka giriso agi aYisaraere nga ga toro yó re.
4 Kristo abi gi ruru mbedimbedi aKristano re i nimangisunge wenengai ka fu gu riahe nga ga toro ti regboho fu agu aboro duna idapase. Tona rogo 1879 ka ndu kumbatayo, i aakusa gu rengo du rogo Ziazia Kekeapai tipa ga Mbori Kindo fu aboro rogo gi magazini re, na i amangi gipai re ti kere aregbo. Yesu ayawee “ho ko ka ye ni” ka bi gako aborokporo ti “digida rago,” ko nika bi moyambu abi ní nifu “riahe fu yo ti ragoho.” Si adu nga ko nika ya ti gu moyambu re boro maku nga ní na ki ‘asiapa gako ahe dunduko funi.’ (Mt. 24:3, 45-47) Wangia Kristo barii gu dungurati nga ga aKristano, ko mangisunge na gi ‘ruru kangara moyambu’ re ní ningerefuo agu apai nga ga Kindo auru kpotosende. Ko nafu arugute fu gako “aboro kporo” gbiati “gu kura akandoro” vurube Riigbu Bipasunge.—Yo. 10:16.
Ke Ahe Auru kpotosende
5. Ginipai Yoane abi Bakindo Masiya ko nimangihe?
5 Gu mokedi nangia Yoane abi yuguyugupai tipa kurapai berewe Bakindo Masiya amangihe “rago Gbia” fuo sungo ko rii mbatabakindo rogo 1914. Ko akepa gupai ko abihe ki yaa: “Oni ngére, mi ki bi dubo ni pusi he, auru gu dubo re mi ki bi gu ko nasungu wa kina wiri boro na kpakpari dahabu riko yo, tĩtĩ marã ke ahe ki du be ko.” (Yugo. 1:10; 14:14) Yoane abi kura maraika ko nipoi nibakere fugo fu gu Bake ahe re ko kusi gako marã ke ahe bambiko “gu zuzuhe nga ga kpotosende aima uga.”—Yugo. 14:15, 16.
6. Ginipai Yesu aya si nika manga vuru gbanga regbo?
6 Pa ke “gu zuzuhe nga ga kpotosende” natingida rani naapa gu sanza Yesu agumbaha tipa morũ na rende. Yesu aringbisi tiko kuti gu kumba nami morũ kini berẽpa ke wene morũ, nga ‘awiri kindo,’ nga agu aKristano i ambeda yó nitoro i duni abakindo ngbangbaturũ yo na Kristo. Ono rogo yuru sa, vurako, nga “Bakitingbanga,” aye ki mi rende, nga “awiri gbegberẽ ko.” Baira ati aya fu gako abamangisunge wee i mbu morũ ambu si sono sa na rende da ti rago ke ahe, nga ho zegino nika mbeda ni ka digo. Si adu nga ko nika keda gako amaraika i ye ka kparaka morũ ti rende.—Mt. 13:24-30, 36-41.
7. Wai Kristo amangasunge ke “gu zuzuhe nga ga kpotosende”?
7 Gupai Yoane abihe re namanga awere; Yesu namangasunge ke ahe rogo zegino dũ. Ke “gu zuzuhe nga ga kpotosende” atona na dungura yangara mbedimbedi aKristano nga aguyo si aida namba yó du nga 144,000, nga ‘awiri kindo,’ nga gu “morũ” Yesu agumbapaha rogo gako sanza. Gu kparakparapai du dagba ndikidi aKristano na zire aKristano adu ziazia gbe tingbafuo Bambata Vura Nga ga Zegino, si ki undo rogo sunge ke ue papara “gu zuzuhe nga ga kpotosende,” nga dungura gu kura akandoro. ‘Awiri kindo’ nga agiyo re te, ono i nga gu “bakere rimbasa aboro” i nika zoga yó. I nadungura yó dagba “arika aboro dunduko, na angbatunga yo, na aboro, na angbatunga afugo dunduko.” I nara nigoyo fu ga Masiya Kindo, nga gu duna Kristo Yesu rogoho gbiati “gu ziazia yo” du bangeyo nga 144,000.—Yugo. 7:9, 10; Dan. 7:13, 14, 18.
Bangbembatayo fu Dungurati
8, 9. (a) Gine nayugo gupai nga anga Kristo nawisigo kina agu apai namanga rogo dungurati sa te, ono ko nawisigo gu raka awisigo a nga ga agu aboro du rogo dungurati nibasasa? (b) A wa gu sura du ti kpewaraga 29 ayugoho, gini “dudungura pai nga ga Satana” si aida ani nehe?
8 Rogo gu kekeapai du mbata fu gere, ani abi wai Kristo aamaa berãko wenengai gbe tipa agu apai naamanga rogo agu adungurati dunduko nadu rogo bambata sa kama agarã. Ti gi gaani regbo re, wangia Kristo gu Bakindo i naima ‘asiapa ahe fuko dunduko ngbangbaturũ yo na sende no,’ ko nangera wenengai gbe kurii adungurati rogo zegino dunduko na gaha ababiapai. (Mt. 28:18; Koro. 1:18) Yekova “amoi ahe dunduko ku tii nduko, ki fu ko ko du ku ri ahe dunduko fu kanisa.” (Ef. 1:22) Wa du ko wo, pai ho namanga rogo agu adungurati nga ga aDezire Yekova bangehe naima susa 100,000 ko nahe inopaha te.
9 Yesu akedi fugoko fu gu dungurati nadu Tuatira yo ki yaa: “Wiri Mbori nagumba agi apai re, nga gu ko du bangiriko wa mirãwe, . . . ‘Mi ini ga mangaapai.’ ” (Yugo. 2:18, 19) Ko aza agu aboro nadu rogo gu dungurati re ti gayó wasiwasi mangaapai, ki yaa: “Mi nga gu ko nawisiga vuse yo na ngbaduse yo. Mi ki fuku he fu roni ni ba sa sa rengbe na gaoni mangaapai.” (Yugo. 2:23) Gu fugo Kristo re nayugo gupai nga, anga ko nawisigo kina agu apai namanga rogo dungurati sa te, ono ko nawisigo gu raka awisigo a nga ga agu aboro du rogo dungurati nibasasa. Yesu atambua agu aKristano nadu Tuatira yo nga aguyo ‘naainongo gu dudungura pai nga ga Satana’ ya. (Yugo. 2:24) Areme a, rago nangba angba tiko na gu sosono aboro na paranga aboro aidanga ka rimo kurogo “gu dudungura pai” nga ga Satana rogo Internet watadu rogo gu kere ambaro nga ga vidio ya, singia rogo gu gbegberẽ wisigo apai nga ga aboro. Nairiwo gu ngbarago ko agbiaha ho ko abi gu asadatise ni badungu aKristano amangaha areme kaa pekafuoko rogo gayó raka dunduko!
10. Wai ringbisiyo pa gu gene Kristo amangasunge ngbaha na abaakumba, ono gini mbakadapai si aida abaakumba inipaha?
10 Kristo namangasunge na abaakumba i naangerakurii adungurati auru kpotosende. (Ef. 4:8, 11, 12) Rogo bambata sa kama agarã, ababiapai dunduko nadu nimbedimbediyo nitoro. I aringbisi payo rogo Yugoti ni akerekuru kumbabe Kristo yo. (Yugo. 1:16, 20) Areme, badungu agu abaakumba namangasunge rogo dungurati du dagba kura akandoro. I asiayo ni abaakumba i naima manga kparakpee mbata na tii gu rugapai nga ga ziazia toro, sidu i a kina kpabe Kristo yo. (Amo. 20:28) Ono wa vura duhe wo, i ini gupai nga Kristo namangasunge na umba badona aboro nga mbedimbedi aKristano nga aguyo du rogo Riigbu Bipasunge tipa i naaruga gako abawiriki auru kpotosende.—Oni gedi Amokedi 15:6, 28-30.
“Mo Yé, Gbia Yesu!”
11. Tipagine du ani ti ni na nyemu gupai nga Bairarani ye niipo?
11 Rogo yugoti i ayuguhe fu Yoane, Yesu aya bara dunguhe wee ko naye niipo. (Yugo. 2:16; 3:11; 22:7, 20) Zanga kapa, ko aafura tipa paye ko ka sapangbanga Babera Duna Bakere Ome Ti Ni na yangara ga Satana zegino. (2 Tesa. 1:7, 8) Wa Yoane aduna nyemu ka bi gu iiriwoapai i agumbapaha si namangi, ko ayaa: “Amina. Mo yé, Gbia Yesu!” Agurani naraka rogo yangara arame re, ani na nyemu ka bi gaani Bakindo ko naye ka sa rimo Bako si du niʹirisiʹirisihe na ka dia gbarasarimo kusayo ti gako bakere pagbia.
12. Gini sunge Kristo nika nyasaha mbata i kini ru ka za bee
12 Mbata fu Yesu ye na gbarasahe, yangara boro dagba aguyo du 144,000 duwa ka i nogodahe tiní. Ziazia Kekeapai nagumbaha agumba ziazia ki yawee i nika nogodahe mbata ti agu aboro du 144,000 re dunduko mbata fu i za bee ti agu ayuge nga ga gbarasahe.—Yugo. 7:1-4.
13. Wai Kristo nika yugo tiko ti bambata papara “bakere gberãngbi”?
13 Badungu aboro ainongo nga Kristo aima dia ome Kindo rogo 1914 ya. (2 Pet. 3:3, 4) Ono fuo regbo ngbutuko, ko nika yugo gupai fu aboro nga ko aima dia ome Kindo niye ko na sapangbanga kurii ga Satana zegino. Gu gbarasahe nika ye kurii “gu boro nga ga gbegberẽpai ni,” nga agu abarumbatayo du rogo agu akanisa i aya tipaha wee si nga ga aKristano, si nikadu gbaiga “ni gu yugoti nga ga ye ko.” (Oni gedi 2 ATesaroniko 2:3, 8.) Si nika yugoho gbaiga nga Kristo nga ga Yekova siasia Basapungbanga. (Oni gedi 2 Timoteo 4:1.) Fuo gbarasahe ye kurii agu akanisa duna rimo aKristano riihe, nga gu papara Bakere Babera gberẽ kisusi, Mbori nika gbarasa gu kura yangara zire apambori. Yekova nika sa kpoto agbia zegino yo i gberesi gi bakere debäri re. (Yugo. 17:15-18) Gure nikangia bambata papara “bakere gberãngbi.”—Mt. 24:21.
14. (a) Tipagine i nika guruso regbo bambata papara bakere gberãngbi ti ni? (b) Gine “gu pai i aina pai ti ni nga ga Wiri boro” nika yugoho fu ga Yekova aboro?
14 Yesu ayawee i nika guruso regbo gu gberãngbi re aguruso “tipa siasia aboro,” nga gu yangara mbedimbedi aKristano nikadu kindi auru kpotosende. (Mt. 24:22) Yekova ambunga gi gbarasahe re si ye kurii mbedimbedi aKristano gbiati kura akandoro te. Yesu aya berewe wee “ni ba sa, fuo gu gberãngbi nga ga gu rago re,” yuguyugu apai nikadu bangiri uru yo na diwi na akerekuru, “fuo gure i ki bi gu pai i aina pai ti ni nga ga Wiri boro ngbangbaturũ yo.” Gipai re nika sa agu aboro naraka auru kpotosende i “nirungo arungo.” Ono mbedimbedi aKristano gbiati kura akandoro arungongo tigayo behe te. I nikaa ‘ngera ku ariyo, ki tumba riyo; bambiko rago tumoyo nambeda.’—Mt. 24:29, 30; Ruka 21:25-28.
15. Gini sunge Kristo nika mangaha ho ko nika ye ni?
15 Mbata fu Wiri Boro nyasi gako diabe apai, ko nika manga kurapai amanga berewe. Ko ayaa: “Ho Wiri boro ka ye ni rogo gako taarimo, na amaraika dunduko fuo ko, ko asúnga ri mbatabakindo nga ga taarimo. I adúngura arikaaboro ku bara bangiriko dunduko. Ko ki kparaka yo, wa babanda akandoro nakparaka akandoro ti ameme. Ko amaa akandoro ku kumbabeko yo, ono ameme ku gare yo.” (Mt. 25:31-33) Kristo nika ye ka kparaka aboro dagba “arikaaboro” dunduko kurogo arika yó ue: “akandoro” nga aguyo naundo awirinako nga mbedimbedi aKristano, na “ameme” nga aguyo “agia nga sangba wene pangbanga nga ga gaani Gbia Yesu ya.” (2 Tesa. 1:7, 8) Akandoro, nga aguyo ya yó tiyo i nga “ruru yo,” i nika gbia “nyenye unga” auru kpotosende, ono ameme ‘ki guari kurogo nyenye mbusa.’—Mt. 25:34, 40, 41, 45, 46.
Kristo Nika Nyasa Gako Diabe Apai
16. Wai gaani Bangbembatayo nga Kristo nika nyasa gako diabe apai?
16 Fuo nogoda yó he ti agu aboro dunduko nika zogarago na Kristo, na fuo kparako akandoro ti ameme ki moira ku kumbabeko yo tipa bata, ko nikandu ka nyasa gako “dia be apai.” (Yugo. 5:9, 10; 6:2) Ko nika ngbembatayo fu rimbasa amaraika duna ome kisusi, ki ye ka gbarasa ba Satana azogarago dunduko kodihe na gu sino bagaahe du rogoho angbanga ya. (Yugo. 2:26, 27; 19:11-21) Kristo nika nyasa gako diabe apai ho ko nika gbarasa ga Satana zegino ni naabaha. Fuo gure, ko nika ga Satana na gako adaimona kurogo gu due adunga mburuhe ti ni ya tipa agarã kutu.—Yugo. 20:1-3.
17. Kristo nika ndu na gako akandoro sa gine ti regbo gako zogarago, na ginipai si aida ani diberã ka mangaha?
17 Gu mokedi nangia Yoane afura tipa gu “bakere rimbasa aboro” nika bata be bakere gberãngbi ki yawee “Wiri Kandoro, nga gu ko du auru mbatabakindo, ko adú ni babanda yo, ko angbé ku mbata yo fu yo koyo du agugaabi aime unga ni.” (Yugo. 7:9, 17) Vuru gu ga Kristo zogarago nikadu tipa agarã kutu, ko nikaa ngbe kumbatayo kindi fu gako kura akandoro, nga agura nikaa giasangbako nzunzu, kini ndu na ami sa nyenye unga. (Oni gedi Yoane 10:16, 26-28.) Ani naapekanga gaani Bangbembatayo apeka kindi da kurogo ga Yekova vovo zegino!
ti agu ayuge nga ga gbarasahe?
[Gu kpiahe du ti kpewaraga 32]
Kristo nika yugo tiko nibakindo ho ko nika gbarasa ga Satana zegino ni
[Gu kpiahe du ti kpewaraga 31]
Fugöpai
• Ginipai Kristo amangihe fuo maa yó ko nibakindo?
• Ada Kristo amangasunge naayó auru kpotosende kaa ngbembatayo fu adungurati?
• Rogo gini agene Kristo nika ye berewe nigaani Bangbembatayo?
• Wai Kristo nika ngbe furani mbatayo da kurogo vovo zegino?