“Awere Nga Gu Rago Ngba Angba”
“Mo ngére, awere nga gu rago ngba angba; mo ngére, areme nga rago bata.”—2 KOR. 6:2.
1. Ginipai Soromo apehe tipa regbo apai, tipagine nyakipa gupai re ti ni?
“AHE na regboho ti ni dunduko, rago du ho tipa apai ni ba sa sa dunduko tii ngbangbaturũ no.” (Batu. 3:1) Soromo akepai tipa kparia gu regbo ngba angba boro mangipai ti ni, singia rũhe, nunguro, sunge-bagaahe, watadu fugo na aboro. Ono tie, si naida aida ani kpariapa gu nyanyakipa sunge si aida ani naamangaha ti ai regbo. Ka pehe rogo kura gene, si naida aida ani ini ginipai ani naperesipaha mbatayo rogo gaani raka.
2. Ginipai nayugoho nga, ho Yesu aatungusapai ni, ko aima rugatiko wenengai naapa gu regbo ko aaraka ti ni?
2 Ho Yesu aduni auru kpotosende, ko aima rugatiko wenengai naapa gu regbo ko aaraka ti ni, na gupai si aidi ko mangihe. Wa ko aima ino agu apai wenengai si aidi ko peresipaha mbatayo, ko abihe nga regbo aima da tipa agu asangbaanebi i agumbaha tipa Masiya digi. (1 Pet. 1:11; Yugo. 19:10) Sunge adu kinaho si aidi ko mangihe tipa ka yugo nani nga ko nga gu Masiya i agumba paye ko. Si aidi ko mangi dezirepai wenengai tipa rengo na ki dungura agu aboro nika zogarago naako rogo gako Kindo. Na si aidi ko sigira gu dungurati nga ga aKristano tipa si niindu na sunge tungusapai na sunge sa aboro ni abawiriki kumbatayo da ku digido kpotosende yo.—Mk. 1:15.
3. Wai pa ruga Yesu naapa gu regbo ko aaraka ti ni asako ko mangipai?
3 Pa ruga ko tiko naapa agi apai re asa gupai nga ko futiko sa manga gupai Bako akpinyemuhe. Ko aya fu gako abawiriki wee: “Kii zuzu ati [akio], ono abamangisunge du ni umba yo; oni kpári ke fu Gbia ati ko kedi abamangisunge ku rogo gako ati.” (Ruka 10:2; Mara. 4:5, 6) Yesu asia gako abawiriki 12, fuoho, ko ki sia aguyo 70, ki fu arugute fuyó, ki kedi yó i ndu ka tungusapai niyaa: “Gu ngbi nga ga ngbangbaturũ si mbedi.” Na ani nageda gupai tipa Yesu nitiko nga: “Ho [ko] anyasi ruga gako abawiriki ni nanidu bawe na ue, ko ki guari yo ki ta yugo pai nitungusi pai rogo gayo abaakporo.”—Mt. 10:5-7; 11:1; Ruka 10:1.
4. Rogo gini gene Pauro adu niwiriki Yesu Kristo?
4 Yesu amoi wene kpiapai fu apefuoko dunduko nibipa mangasunge kakaka na ngbaduseyo dunduko. Gere nga gupai gu mokedi nangia Pauro afura tipaha ho ko ayani fu aidipase wee: “Oni dú ni awiriki pa re, a wa du mi a ni wiriki pa Kristo.” (1 Kor. 11:1) Rogo gini gene Pauro adu niwiriki Kristo? Gu bambata gene ko awiriki Kristo ngbaha nga ko aatungusa wene pangbanga kakaka. Rogo agu awaraga ko akekehe fu adungurati, ko agumba agu afugo rogoho nga, “ka oni nyómoro nga ya,” “oni nimángi pa Gbia,” “[Oni] nimángi ga Gbia sunge zaza dedede,” na “gu oni amanga oni mángi he na kpotoroni yo wa manga ha fu Gbia.” (Rom. 12:11; 1 Kor. 15:58; Koro. 3:23) Bangiri Pauro aagonga ti gupai namangiko ngbagene Damaseke na gupai Yesu apehe tipa Pauro kungba Anania te, ki yaa: “Mi kpara ko, ko ndu na rimore ku barangba aGendiria na abakindo, na awiri aYisaraere.”—Amo. 9:15; Rom. 1:1, 5; Gara. 1:16.
“Awere Nga gu Rago Ngba Angba”
5. Gine nasa Pauro ko nimangi gako sunge kakaka?
5 Ho ani ageda gu kitabu ni nga Amokedi, ani nabi gupai yo ziazia nga Pauro angia gu boro naamanga gani sunge kakaka na niwingbaduse. (Amo. 13:9, 10; 17:16, 17; 18:5) Pauro aima inopa gu regbo ko aaraka ti ni. Ko ayaa: “Mo ngére, awere nga gu rago ngba angba; mo ngére, areme nga rago bata.” (2 Kor. 6:2) Gu garã nangia 537 M.B.K. nangia wene regbo tipa agu aYisaraere nadu Babera yo karagatiyo kurogo gayó ringara. (Yes. 49:8, 9) Ono gini regbo du Pauro afura tipaha tigako? Agu averesi du pati gu du kuari re naundo rani ani rugutirani naapa gu regbo ko aafura tipaha.
6, 7. Gini bakere pa irisa fuuyó ho fu mbedimbedi aKristano areme, na ada namangasunge sa naayó?
6 Rogo gu bisue kapita nga ga gu ga Pauro waraga re, ko afura tipa gu bakere pa irisa i afuhe fuko gbiati gu kura mbedimbedi aKristano dunduko. Ko ayaa: “Agu apai re naye yo du Mbori ni dunduko nga gu ko nazeresi rani kuti ko rogo Kristo yo, ki asia pa gu mangapase fu rani nga zeresapai; nga, ya Mbori adu rogo Kristo yo nizeresi aboro zegino kuti ko, ka ko ageda nga gayo tiandika kuti yo ya, ko naasia pa zeresapai fu rani. Ani nga amokedi tie ku ba Kristo, wa ka Mbori azungadi he ku ngbarani. Ani nazungadi roni ku ba Kristo, oni zéresi tironi fu Mbori.” (2 Kor. 5:18-20) Gu fugo Pauro i asaha kurogo pa-Zande nga “oni zéresi tironi fu Mbori,” ndikidi sasaha nga “oni mbakadipai dagbaroni na Mbori.” (NW ) Pauro ayawee Mbori du nayambu aKristano tipa i mangisunge, nga gu sunge nga ga zungodi aboro ‘i mbakadipai dagbayó na Mbori’ kidu na wene pagume naako.
7 Tona ti gu regbo aAdamu asamungu ati Edene yo kada ku awere, aboro nikparakparayo ti Yekova. (Rom. 3:10, 23) Padu yó nikparakparayo sayo i du rogo gu bitimo nga ga toro, si kini ye na arungo gbiati kpio. Pauro ayaa: “Ani ini aina ya ũzegino dũ mongo niukaga omehe nimbu be ima kina ku awere.” (Rom. 8:22) Ono Mbori “nazungadi” aboro i karagatiyo fuoko, watadu i mbakadipai dagbayó naako. Gure nga gu sunge i afuhe fu Pauro gbiati gu kura mbedimbedi aKristano. Gu ‘rago nangba angba’ re angia “rago bata” fu agu aboro nadu na idapase kuti Yesu. Mbedimbedi aKristano gbiati “kura akandoro” namangasunge sa, kini yambu aboro i ye ka gbia undo ti gi wene “rago” du awere re.—Yo. 10:16.
8. Gine nasa gu yambahe du tipa mbakadapai dagbase na Mbori si du nibakerepai gbe?
8 Gupai nasa gu yambahe du tipa mbakadapai dagbase na Mbori re si du nibakerepai gbe nga, wa vura duhe nga aboro du nadiberã ka gberesapai dagbayó na Mbori, Mbori du namangipai tipa ka mbakadapai dagbako naayó. (1 Yo. 4:10, 19) Ginipai du Mbori amangihe? Pauro apepaha ki yaa: “Mbori adu rogo Kristo yo nizeresi aboro zegino kuti ko, ka ko ageda nga gayo tiandika kuti yo ya, ko naasia pa zeresapai fu rani.”—2 Kor. 5:19; Yes. 55:6.
9. Ginipai Pauro amangihe ka yugo gako tambuahe tipa ga Mbori inapai?
9 Pa fu Yekova wiriko nimotumo nasa gupai nga, i mbupai fu agu aboro namaa gayó idapase kutiko ti gayó aingapai na i kidu na wene pagume dagbayó naako. Kurigure, ko akedi aboro nga aguyo narukuba ko i ndu ka zungodi aboro rogo arago dunduko tipa i mangi pazereda dagbayó naako. (Oni gedi 1 Timoteo 2:3-6.) Pa ruga Pauro tiko na gupai Mbori akpinyemuhe naapa inoko gu regbo ko aaraka ti ni, nasa gupai nga ko fu tiko sa ‘gu sunge nga ga mbakadapai dagbase na Mbori.’ Gupai Yekova akpinyemuhe aʹarianga tihe te. Ko nafu maku kindi ti gi gaani regbo re. “Awere nga gu rago ngba angba” na “areme nga rago bata,” a wa rago Pauro adu. Naangba agu asino du ti Yekova Mbori, nga inapai na nunga!—Gate 34:6, 7.
‘Ka Oni Dinga ga Mbori Undahe Gbua Ya’
10. Ti gini regbo “rago bata” atona fu mbedimbedi aKristano, na gine nasayo i futiyo sa manga gu sunge nga ga ‘mbakadapai dagbase na Mbori’?
10 Gu bambata aboro nagbia undo be gu weneringise arẽnga boro tipaha re ya nga agu aboro “du rogo Kristo yo,” nga agu aKristano du nimbedimbediyo nitoro. (2 Kor. 5:17, 18) “Rago bata” atona fuyó rago Pendekote rogo gu garã nangia 33 F.B.K. Tona ti gu regbo re kada ku awere, agu aboro re natungusapa ‘mbakadapai dagbase na Mbori.’ Areme, yangara mbedimbedi aKristano namanga gu sunge nga ga ‘mbakadapai dagbase na Mbori’ kindi. I ini gupai nga, agu amaraika gu mokedi nangia Yoane abiyo rogo yuguyugupai yo, i ‘zadi agu ayuge biama nga ga kpotosende, ka yuge ayanga auru kpotosende ya.’ Sidu, zavura gi regbo ani araka ti ni re, si nga “rago bata” na “gu rago ngba angba.” (Yugo. 7:1-3) Mbiko gipai re, tona rogo gu garã nangia 1900 kada ku awere, yangara mbedimbedi aKristano aima futiyo nyanyakii tipa gi sunge nga ga ‘mbakadapai dagbase na Mbori’ re da ku rogo atukpu kpotosende dunduko.
11, 12. Wai gu mbedimbedi aKristano nadu ho gu garã nga 1900 aambeda ni ayugu gupai nga i aima rugatiyo naapa gu regbo i aaraka ti ni? (Oni bi gu sura du ti kpewaraga 23.)
11 Nikpiapai, gu buku nga Jehovah’s Witnesses—Proclaimers of God’s Kingdom [ADezire Yekova Nga Atakipande ga Mbori Kindo] nape gupai nga, ho gu garã nga 1900 aambeda ni, “Charles Taze Russell na agu aboro i aawisigo Ziazia Kekeapai naayó abi gupai nzunzu nga, i aaraka ti regbo keahe, na si aidi aboro gi rengo tipa ka kura rogo zire pambori kusayo.” Ginipai i amangihe tipa gipai re? Wa i abihe nga i aaraka ti gu ‘rago nangba angba,’ anga i afutiyo gbua sa yamba aboro i niiye tipa irisombori te. Gure nga gupai aboro amangaha rogo badungu agu apambori duna rimo aKristano riihe. Ono gupai agu awirina re amangihe nga ka gbata agu agene rengbe yó ka gbandaka wene pangbanga ngbaha rogo arago. Pai sa dagba agu apai i amangihe nga, i amangisunge na gu vovo sonakumbatayo rogo birĩ-ino-mangaahe nadu ti gu regbo re.
12 Agu awirina nadu tooni gbua re atona ka kusa atrakte, aburosua, amagazini, na abuku. I anaakeka atungusapai a kini kparakaha kurogo agu aba nakusa awaraga apangbanga tipa i kusihe ti agu awaraga apangbanga re aboro gedihe. I anaatungusapai a rogo aradio nga gu nanaada rogo dungu aringara. I ambakadi asura a kini gbia fugo kuti ni kini kusihe nisinima, zavura mbata fu bambakada asinima tona gbia afugo kuti sinima. Sangbana gi gayó kakaka sunge re angia gine? Areme, aboro ho nga amirioni saba idi na wene pangbanga na ki koditiyo naayó ka tungusa gupai nga: “Oni mbakadipai dagbaroni na Mbori.” Nirengo, gu ga Yekova amoyambu re amoi wene kpiapai nidu yó na kakaka nyemu ndikidi irisombori apai ki vura du tipa yó nikpakarakpakaraha vurũ.
13. Gini ga Mbori ringbisapai si aida ani berẽpaha?
13 Gu sangba Pauro nga “awere nga gu rago ngba angba,” si nga kina boro rengo ti gi gaani regbo re. Agurani naima inopa ga Yekova weneringise arẽnga aboro tipaha ya, ani na tambuahe tipa gu momu nga ka gia gu pangbanga nga ga mbakadapai na Mbori ki idi kuti ni na ki mbakadi pai dagbarani na Mbori. Kuba gupai nga ani naabi gu momu re taata, si naida ani di gu ga Pauro rugute kugume nayaa: “Ani nazungadi roni a ya ka oni adia nga ga Mbori undahe gbua ya.” (2 Kor. 6:1) Ga Mbori undahe tipa ka “mbakadapai dagbako na zegino.”—2 Kor. 5:19, NW.
14. Gini kura amomu nakura awere rogo kura aringara?
14 Satana ima kiso bangiri badungu aboro, nga aguyo atambakada nga pai dagbayó na Mbori ya na i ainongo ga Mbori ringbisapai te. (2 Kor. 4:3, 4; 1 Yo. 5:19) Ono tie, pa gberã zegino kina kumbatayo nasa gupai nga ka aboro mbakadinga pai dagbayó na Mbori ya, na si kini sa gupai nga gbegberẽ apai nimangi aboro na arungo a. Zavura rogo agu aringara aboro anaaidanga na gaani sunge tungusapai rogoho ya, badunguyo awere naima ida na gu wene pangbanga re na ki ima mbakadapai dagbayó na Mbori. Ya mo ani ima rugatirani na gupai nga, awere nga gu regbo si aida ani fu tirani kakaka ka zungodi aboro i ‘mbakadipai dagbayo na Mbori’?
15. Kuba gupai nga ani naatungusa kina pa agu apai nikaa ngba ti aboro, ginipai ani aida aboro inihe rogo arago dunduko?
15 Anga gupai gbua si aida ani gumbaha fu aboro nga, ka i satiyo fu Mbori, ko nika undoyo rogo agu akpakarapai dunduko du tipa yó na i du wenengai te. Badungu aboro pambori naagumba weneapai fu aboro ka gbe aboro kurogo gayó pambori. (2 Tim. 4:3, 4) Ono anga gu bipai re si aida ani du nani tipa gaani sunge tungusapai te. Gu wene pangbanga ani atungusaha tipa Yekova nga, ko na nyemuse, na ko na nyemu ka mbupai fu aboro ti gayo ingapai rogo Kristo yo. Ngba gi gene re, boro na boro rengbe arengba ka mbakadapai dagba ní na Mbori. (Rom. 5:10; 8:32) Ono tie, “gu rago ngba angba” ima mbeda ka digo.
“Oni Dú Kakaka Toro Yo”
16. Gine naundo Pauro ko duna wingbaduse na kini mangisunge kakaka?
16 Wai tie rengbe ani ka sonosa kakaka nyemuse tipa ndikidi irisombori na kini bandaha? Si rengbe kadu nikpakarapai fu agu aboro duna zee watadu ninaafuranga gbe ya i naagumba gayó bipai watadu ka fura na aboro rogo pabakure yo. Pauro agumbapa wai rengbe boro ka sonosa kakaka nyemuse tipa ndikidi irisombori ho ko ayani fu aKristano wee: “Oni dú kakaka toro yo.” (Rom. 12:11) Ga Yekova toro aundo Pauro ko duna wingbaduse na kini hipai tingba sunge tungusapai. Tona ti gu regbo ko asatiko ni Kristano ki dati gu regbo i aimiko Roma yo, nga agarã naima susa 30, ko aazeranga wa gu tooni te. Ko anaangera kina kube Mbori tipa undo, na Mbori ki undoko na gako ziazia toro. Fugoko nga: “Mi rengbe na manga apai dunduko rogo gu ko nanyakasa re.” (Frp. 4:13) Ani rengbe ka gbia bakere undo ka ani wirikipai ti gako kpiapai.
17. Wai rengbe ani ‘kadu kakaka toro yo?”
17 Ho Pauro ayani “oni dú kakaka toro yo,” ko amangisunge na gu fugo Giriki du rogoyo ngburungburu nga “buyo” watadu “ba.” Ka oni aida ime nibuyo abuyo kindi watadu kaa ba, si naida oni naagindo we agindo kutiihe kindi. Wakina gure a, tipa ‘kadu kakaka toro yo,’ si naida ani naagbia ga Mbori ziazia toro agbia kindi. Ani rengbe ka manga gipai re ka ani amangasunge na agu ambakadapai dunduko Yekova amangaha tipa rani tipa ani du nyanyakii rogo toro yo. Gure nga si naida ani naabi gaani irisombori nga ga aborokporo na ga dungurati na nyanyakipaha gbe, kini mangi wisigopai nisase gbiati na gaani aborokporo dedede, kini kparikpee dedede, na kini koditirani na akuarani aKristano ti aregbo dũ. Si nika undo rani ani gbia gu “we” nika faasa rani ani du “kakaka toro yo.”—Oni gedi Amokedi 4:20; 18:25.
18. Wangia ani agu aKristano naima futiyo fu Mbori, gini bangua sunge si aida ani moiberã rani sani?
18 Gu boro fu tiní tipa gani pai, ní namaa berãni tipa kinaha na boro ho rengbe ka gbe berãni ti ni niipo watadu ka sa ní ní mbuhe te. Wangia ani agu aKristano naima fu tirani fu Yekova, gaani bangua sunge nga manga gupai Yekova aida ani mangihe, a wa si adu tipa Yesu. (Eb. 10:7) Areme, Yekova nakpinyemu gupai nga aboro mbakadipai dagbayó naako. Sidu tie, ani funga tirani kakaka ka manga gi nyanyakipa sunge si aida ani mangihe re, a wa Yesu Kristo na Pauro amangihe.
Oni Natingidaha?
• Gini sunge i afuhe fu Pauro na gu kura mbedimbedi aKristano dunduko?
• Wai yangara mbedimbedi aKristano namangisunge vuru gi “rago ngba angba” re?
• Wai rengbe agu abamangisunge nga aKristano ‘kadu kakaka toro yo’?
[Gu kpiahe du ti kpewaraga 20]
Bangiri Pauro aagonga ti gupai namangiko ngbagene Damaseke te