Oni Bi Bia Fu Yekova!

“Mi abí bia atambuahe fu gi Mbori a wa du mi ni ungare.” —TAM. 146:2.

1. Ginipai nafõngbadu Davide yo ho ko aduni niparanga ko sari abia tambuahe?

HO DAVIDE aduni niparanga, ko anaadia bakere regbo kupati banda ga bako akandoro atiyo mbembedii na Betereme. Ho Davide anaasinziri akandoro ni, ko anaabi gu iiriwo ahe Yekova akusihe: akerekuru ngbangbaturũ yo, “agu anya du nvuo yo,” na “ azire ari.” Bibi agi ahe re afõngbadukoyo ko sari abia tambuahe fu Bamangi agi ahe re. Dungu agi abia re gudu rogo gu kitabu nga Atambuahe.a—Oni gedi Atambuahe 8:​3, 4, 7-9.

2. (a) Gini sangbanapai rengbe gia manzigo kadu nani kurii boro? Oni funga kpiapai. (b) Ginipai ani awirikaha ti ga Davide pagume na Yekova rogo Atambuahe 34:7, 8 na Atambuahe 139:​2-8?

² Ho Davide aduni niparanga, ko awiriki ta manzigo wenengai. Ko ada niwene bata manzigo i ki yambu ko ko nita kundi fu Bakindo Saura. (Snz. 22:29) Ga Davide manzigo anaafu wasa afu fu Bakindo Saura a wa wene manzigo nidu areme. Ho Davide anitona ta kundi ni, “Saura ki nizeredi, ki ningba.” (1 Sam. 16:23) Agu abia gu batakundi nanaagunde ti Mbori re asarihe na kina undo ti ni areme. Oni berẽnga gipai re! Tona ti gu regbo i avungu Davide ka da ku awere, agarã ima susa wa 3,000. Ono wa vura duhe wo, amirioni aboro na ngbatungayo nibakiakia naraka rogo apapara zegino dunduko nageda agu abia tambuahe nga ga Davide dedede tipa ka gbia wasa na maabangirise.— 2 Peka 7:6; Oni gedi Atambuahe 34:​7, 8; 139:​2-8; Amosa 6:5.

Manzigo Rogo Ndikidi Irisombori

3, 4. Gini mbakadapai i amangihe tipa irisombori na manzigo ti rago Davide?

³ Davide aduna tatamana, na ko amangisunge na gu tatamana re ngba wene gene ka taasa rimo Yekova. Tingbafuo ko da nibakindo aYisaraere, ko amangi mbakadapai tipa i naata manzigo banye yo. Dagba agu aRevi dunduko nanaamangasunge banye yo, i asia aboro wa 4,000 i ‘naairisa Yekova’ na woroahe. Aboro wa 288 dagba agi abataki woroahe re i araba yó “na pa bibia fu Yekova, nangia agu yo dunduko naadu na birĩ tipa bibia.”—1 Peka 23:3, 5; 25:7.

⁴ Davide nitiko nasari badungu agu abia aRevi anaabikaha. Ga Davide abia aima zio ngbadu agu aYisaraere yo naanigbia momu ka giaha ho i anaabihe ni. Kusa, ho i ayeni na sanduki mokido ku Yerusarema yo, “Dawidi ki gumba pai fu ga aRevi abarumbatayo ya i ringbisi awirinayo ni abayango na aũ ngbatunga woro ahe be yo napaa ku ari, nangia akindondo na anzenze na gu sirigi napaa apaa, i ki nibiki abia ku ari ni ngbarago.”—1 Peka 15:16.

5, 6. (a) Tipagine pa manzigo anyaki ti ni gbe ti rago Davide? (b) Wai ani aino ya pa manzigo aima nyaka rogo irisombori rogo gu ringara aYisaraere nadumbata?

⁵ Tipagine pa manzigo anyaki ti ni wa gure ti rago Davide? Ya mo si adu wo mbiko gupai gbua nga Davide angia bataki manzigo? Oó, gu kura ndupai adu kinaho nadu niyuguyuguhe fuo dungu agarã kusa ho gu ruru Bakindo nangia Izikiya azambuasi sunge ni yekaru yo. Rogo 2 Pekapai 29:25, ani nageda gupai nga: ‘Bakindo [Izikiya] ki ringbisi aRevi rogo ga Yekova bambu yo na gu sirigi napaa apaa be yo, na akindondo, na anzenze, kuti sangba Dawidi na sangba Gada ga bakindo babiapai na Natana nangia nebi; bambiko rugute aye be Yekova ngba gako anebi.’

⁶ A wa bi ani he, Yekova du naya fu airisiko i nisambuo ko na abia. Yekova ayawee ka agu aRevi nangia abibia nimangingo gu kura asunge aRevi anaamangaha ya. Si nasa gupai nga i futiyo sa sara abia na kini wirikihe.—1 Peka 9:33.

7, 8. Ginipai nyakipaha kisusi gu nga ka du na tatamana nga ga bibia?

⁷ Boro rengbe ka yaa: “Gure adu tipa aRevi, ono ka mi adu yó, mi nabihe nga ka mi adunga dagba agu aboro nadu 288 naini birĩ tipa bia te!” Ono tie, anga agu aRevi re dunduko naini taka woroahe te. Bambata Pekapai 25:8 nayawee aguyo kinaho nangia ‘abawiriki.’ Si rengbe arengba kadu a nga gu kura abataki woroahe kinaho nadu dagba kura angbatunga aYisaraere naini taka woroahe kisusi, ono Yekova asia kina aRevi i nimangihe fuko. Gupai si aida ani inihe nga, agu aRevi re dunduko nafu tiyo sa gayó sunge, singia aguyo nangia abangbasia abataki woroahe watadu aguyo nangia ‘abawiriki.’

⁸ Davide aima kpinyemu manzigo gbe na ko aima ino taha wenengai. Ono ya mo kina ino ta manzigo sa Mbori aidaha? Rogo AKorosaio 3:23, Pauro ayaa: ‘Gu oni amanga oni mángi he na kpotoroni yo wa manga ha fu Gbia, wa fu aboro te.’ Nirengo, gupai si aidaha nga ani mangi ome ka sambuo Yekova.

Manzigo Tingbafuo Rago Davide

9. Oni penga pa gupai ka oni abihe ki gihe ka oni andu ku yekaru yo ti regbo kpara yekaru?

⁹ Ti regbo ga Bakindo Soromo zogarago, aboro anaamangasunge kindi na manzigo rogo ndikidi irisombori. Ti regbo kpara yekaru fu Yekova, abataki woroahe ambakaditiyo ki taki bawene woroahe fu Yekova. Abavudi mbanya nitiyo adu nga 120. (Oni gedi 2 Pekapai 5:​12.) Ziazia Kekeapai nayawee “abavudi mbanya [nangia kina aboromotumo dunduko] na abayango adu kina sa, ka manga woro fugoyo kina sa i gi he rogo sambuahe na tambuahe fu Yekova, . . . ‘bambiko ko ni wene ko, gako weneringise nye anye kindi.’ ” Ho i atumba fugoyo ni, “ga Yekova bambu ki hi ahi be dubo,” na gipai re ayugu gupai nga Yekova aima ida na gayó sambuohe.—2 Peka 5:13.

10, 11. Ginipai nayugo gupai nga bambata aKristano anaamangasunge amanga na manzigo rogo irisombori yo?

¹⁰ Bambata aKristano anaamangasunge amanga na abia rogo irisombori yo. Nirengo, agu aKristano nangia ga bambata sa kama agarã yó anaadungura tiyo angianga kina ku banye yo watadu yekaru yo ya, ono ku rogo akporo a. Mbiko arungosiro na kura dungu apai, i aadunga rogo zereda te. Wa si avura duwo, agu aKristano re anaasambuo Mbori asambuo na abia.

¹¹ Gu mokedi nangia Pauro angarasi agu awirinako nadu Korosai yo ki yaa: “Oni . . . nirugu pai rogo abia tambuahe yo, na abia wasa, na agu abia Toro nayugo, nibi he na undahe.” (Koro. 3:16) Tingbafuo i ba aPauro na Sira ku bambukiso yo, ‘i aakpara nibi aimina fu Mbori,’ wa si avura du nga bukubia aadunga beyo te. (Amo. 16:25) Ka i baro ku bambukiso yo, bange abia nga ga Kindo wai rengbe mo ka bihe ngbariro?

12. Wai rengbe ani ka yugo gaani tambuahe tipa agu abia nga ga Kindo?

¹² Wa duhe tie nga manzigo gu duadu na nyanyakipaha rogo gaani irisombori yo, si ngbaha angba ani sana tirani nga: ‘Ya mo mi nabihe na nyanyakipaha? Ya mo mi naamanga ome ka da pati adunguratise na kikindigi adunguratise ti regbo tipa ani bi bambata bia na awirinami, na kini bihe dodoromaa? Mi naangarasa awire i nibi agu abia du dagba gu Sukuru Nga ga Siokrasia na gu Dunguratise Nga ga Sunge watadu gu bia du dagba gu gumbapai du tipa aboro dũ na wisigo Ngbaõbambu Sinziri na nyanyakipaha, watadu si nga gu regbo fuyó si aida i tatai nduyo watadu ka kura ku zagiyo tipa ka dia wege?’ Bibia nga papara gaani irisombori. Singia ani nga abayango watadu ‘abawiriki,’ ani bibia fu Yekova.​—Oni ringbisinga ha na 2 AKorindo 8:​12.

Apai Naʹariatihe Aʹaria Wa Regbo Andu

13, 14. Wai nyakipa bibia dodoromaa ti regbo adunguratise? Oni funga kpiapai tipa gipai re.

¹³ Agarã susi 100 kusayo, i akepai rogo Ngbaõbambu Sinziri ki yaa: “Bibia naundo ga Mbori aboro aundo tipa rengo rimi ku berãyo yo na ku ngbaduyó yo.” Dungu agu afugo du rogo gaani abia du mburuhe rogo Ziazia Kekeapai, sidu, ho ani awirika abia ni kaa bihe ngbarirani, si rengbe arengba ka sa gupai nga rengo rimi ku ngbaduraniyo. Badungu agu aboro duhe fuyó nibambata regbo ka dunguratiyo na ani agu abia ani abihe pati gaani adunguratise azio ngbaduyó yo.

¹⁴ Nyemu sa rogo gu garã nangia 1869, Charles Taze Russell aayego basunge yo ko ki gi bia aboro nibihe rogo gu vurubambu nadu sendeyo. Ti gu regbo re, ko aima dakuti gupai nga ko agbianga rengo tipa Mbori te, ko ki diberã tipa kaa manga sunge-bagaahe na gu berã nga ka undo aboro rogo agu azingo nga ga borose ka si vura du nga pai ho ka ko mangihe tipa yo rogo toro yo te. Gu wirina re arimi koyo aboro abibia ni ki bi gupai nga irisombori namanga. Ko ki sungu kini degetuko. Kusa, ko akepai tipa gupai ko agihe rogo gu nyemu re ki ya si “aima nyakasa gako idapase kuti gupai nga Ziazia Kekeapai aye be Mbori, na Mbori du nasako ko ndu kurogo gu ba re.” Si nirengo nga bia du nagbeberã gu wirina nangia Russell re kuti dunguratise.

15. Gini ariapai rogo giarogopaiyo sa gupai nga i kusi vovo bukubia?

¹⁵ Wa regbo andu, aʹariapai namanga amanga rogo gaani giarogopaiyo nga ga Ziazia Kekeapai. Asanza 4:18 nayaa: “Ga ruru aboro gene du wa gu imarago nga ga ngbawiso, nakĩ akĩ ki susi ki da ti kina bebere uru.” Gu imarago re naye na aʹariapai rogo agu agene ani ‘abi agu abia nga ga rengo’ ngbaha. Agarã susi awere 25 fuo kusayo gu bukubia nga Sing Praises to Jehovah.b Tona ti gu regbo re kada ku awere, imarago ima kí kurii bete kura ayugopai nga ga Ziazia Kekeapai. Mbiko gipai re, gu kura afugo kinaho i akekehe rogo gu bukubia re, nga agu afugo ani agumbanga ha berewe areme ya. Nikpiapai ani nagumba gu fugo awere nga “vovo zegino” angianga “vovo ringbisapai” ya. Awere, ani naya rimo Yekova nikadu “niʹirisi ʹirisihe, angianga aboro nika ida kuti ni” ya. Mbiko agi apai re gbiati agu akuraha, si aidi aida i kusi vovo bukubia.

16. Wai gaani vovo bukubia nika undo rani ani mangipai kuti gu ga Pauro rugute du rogo AEfeso 5:19?

¹⁶ Riigbu Bipasunge aidi i kusi vovo bukubia nga Sing to Jehovah. Bange agu abia dunduko du rogo gu vovo bukubia re nga 135. Wa duhe nga ngenga agi abia re wa gu nadumbata te, si naida aida ani asadi kaa bi betehe ngbarirani, ringbisihe kuti gu rugute Pauro afuhe rogo AEfeso 5:19.​—Oni gedihe.

Oni Yugu Gaoni Tambuahe

17. Gini berãpai rengbe ka undo rani ka zee mangingo rani ti bibia ba dunguratise yo ya?

¹⁷ Ya mo si naida ani mbu zee si furirani ka ani abinga bia ba adunguratise yo ya? Oni bingoho nga: Wa vura duhe nga ani dunduko ‘nakota akota’ rogo fugo yo dedede, si asanga rani ani mbu tungusapai rogo akporo te. (Yak. 3:2) Ka si du tie wo, tipagine rengbe ani ti ni ka mbu sambuo Mbori na bia mbiko ani ainongo ka bibia wenengai te? Yekova “namangi ngba aboro,” ko na ngbarago ka gia fugo rani ani nisambuoko rogo bia yo.—Gate 4:11.

18. Gini apai rengbe ka undo rani ani wiriki afugo gi vovo abia re?

¹⁸ I ima kusa gu CDs nga Sing to Jehovah​—Vocal Renditions rogo dungu afugo. Si na vovo abia rogoho aboro abihe nibawenehe. Ka oni agiaha dedede, oni nika ino bete agi abia re nikina ipo. I akeke dungu agi abia re ngba gu gene nga ka mo ini bambata genehe, si rengbe arengba ka sa ro mo ini gu uehe. Sidu, ho oni amaa gu nga CDs ni kaa giaha, si adu niwenehe ka oni awirikaha wa sa kutini. Ka oni ini afugoho na woroho kporoyo, si dunga furoni nimbumbuhe ka bihe dodoromaa Bambu Kindo yo te.

19. Gini asunge kusa gu woro manzigo nga ga agu abia nga ga Kindo akodaha?

¹⁹ Si taata ani bi agu aworo abia ninaapaa ti regbo gaani kikindigi adunguratise na taatapaha. Bakere sunge i amangaha tipa ka kusaha. Tingbafuo siayo woro agu abia i aidaha, i nikeke agu abia re fu gu gbuu nga ga agu ataki woroahe nataka woro dungu ahe nibakiakia du bangeyo nga 64. Agi ataki woroahe re nadia bakere regbo kaa fugö gi bia re, niyangaraha i kini ka de woroho rogo gu gaani ba woroahe du Patterson, New York yo. Awirina bawe dagba agi ataki woroahe re arakanga United States yo ya. I dunduko nabihe nimomu ka kusa gi wene woroahe re tipa gu sunge nga ga siokrasia. Si naida aida ani yugu gaani tambuahe tipa gu gayó bakere sunge re. Ho basungu-rii-kiti ayamba rani ni ani susungu rii gaani abasungo kaa gia woro manzigo, si naida aida ani mangihe wa ko apehe.

20. Gaoni diaberã nga gine?

²⁰ Yekova namaa berãko amaa tipa wai ani asambuo ko na abia. Si na nyanyakipaha fuko. Ani sa ngbarago ti Yekova nisambuo ani ko na abia dodoromaa ti gu regbo ani adunguratirani tipa irisombori. Sidu tie, singia ani nga abayango watadu abawiriki, ani “bibia fu Yekova”!—Tam. 104:33.

[Gu rukutu kekeapai du bandu kpewaraga yo]

Gaoni Karagapai Nga Gine?

• Gini akpiapai du rogo Ziazia Kekeapai nayugo gupai nga pa manzigo nyaki anyaka rogo irisombori?

• Gini ngbanya du dagba manga ani pai kuti ga Yesu rugute du rogo Matayo 22:37 naapa bi ani agu abia nga ga Kindo na ngbaduraniyo dunduko?

• Gini bete agene duho rengbe ani ka yugo gaani tambuahe tipa gaani abia nga ga Kindo ngbaha?

[Gu kpiahe du ti kpewaraga 31]

Ya mo oni naza awironi ti kura ku zagiyo ti regbo bia?