Vovo Abia Tipa Irisombori!
1 Ti regbo gu dunguratise nga ga Watch Tower Bible and Tract Society of Pennsylvania, nga gu i naamangaha na agarã dunduko nga gu i amangihe rogo Tanvuo 4, 2014, i atingidi aboro na gupai nga i naida ka fugo gu buku bia ani amangasunge na ni awere. Gi tingidapai re angia bawene tingidapai gbe! I atingidi agu aboro naadu pati gu dunguratise re dunduko na gupai nga agu abia nga ga Kindo na nyanyaki paha rogo gaani irisombori yo.—Tam. 96:2.
2 Mo rengbe arengba ka baka bangiro nga, ‘Tipagine si aida i fugu gu buku bia re ti ni awere?’ Badungu nduapai duho. Ni bambatapai, gu gene ani agia rogo averesi yo ngbaha si nasona kina kumbatayo, si kini idi gupai nga i aria afugo gaani buku bia aria. (Snz. 4:18) Gu kura ndupai si aida i fuguhe ti nga: Badungu agu afugo du rogoho, i adihe rogo gu Ziazia Kekeapai nangia New World Translation. Sidu, si naida i aria afugoho aria tipa si du wa sa na afugo gu Ziazia Kekeapai du awere. Wa duhe nga si nadia bakere sunge tipa ka aria afugo gu buku bia re tipa si naandu sa na afugo gu Ziazia Kekeapai du awere, i adiberã nga i nika gbia bete vovo abia kuti gu duho awere.
3 Ya mo ani nika sungo ka pido da kuho i nika kusa vovo buku bia ni mbata ani kini ru kaa bi gu vovo abia re? Oó. Ani na ngbarago ka gumba gupai furoni nga rogo agu adiwi nika du kumbatayo re, i nika maa vovo abia dagba agu abia re rogo gu gaani bangiriba nga ga Internet nga jw.org. Ho i kaani kusi vovo bia ni, i aani asia gu bia re tipa i bihe ti digido Gu Dunguratise Nga ga Sunge na kekepai patini nga “vovo bia.”
4 Wai ka Wirika Gu Vovo Abia Re: Taatapai nga wirika vovo bia te. Ono wa vura duhe wo, wakina bake papara Atambuahe, ani naida ka bi bia abi ti regbo gaani adunguratise angianga ka ‘onga aonga’ ya. (Tam. 30:12) Tipa ka wirika vovo bia, oni mangi agi apai du kusende re.
• Oni degeturoni dedede kuti gu woro abia nga gu du rogo gu gaani bangiriba nga ga Internet. Dega oni turoni kutini dedede nika sa gupai nga oni tingidihe.
• Oni wiriki afugoho, na ki asadi ka zioho kurironi yo.
• Oni ta gia woroho kini bihe na afugoho. Oni mangihe wo da kuho oni nika inoho ni wenengai.
• Oni wiriki gu vovo abia re dedede ti regbo Gu Irisombori Nga ga Aborokporo da kuho gaoni aborokporo nika inoho ni wenengai.
5 Ho i nika tona asia gu vovo abia re ni tipa i naabihe ti digido Gu Dunguratise Nga ga Sunge, i nika maa woro gu bia re fu dungurati tipa i gihe bara sa. Fuo gure dungurati ki bi gu bia re wa sa na woroho a wa ani naabi gu kura abia mbataano.
6 Oni berẽkuriihe wenengai, oni nika bi gupai abi nga bibia nga guhe nakoda fogo rani wa sa tipa ani tambua Yekova. Sidu, si aidanga ani du na gu sino tirani nga ga kura ku zegiyo ti regbo bia zanga wene ndupai te.
7 Gu kura gene kinaho nga gu rengbe ani ka yugo gupai ngbaha nga ani na bakere tambuahe tipa gaani ziazia abia. Ti regbo gaani bakere adunguratise, i naamaa amanzigo mbata fu agumbapai tona tipa ani naagiaha. Bara ue rogo garã yo, awirina naye rogo apapara zegino ngba gayo marã ku rogo gu ba nga Patterson, New York, Amerika yo tipa ka kusa agu amanzigo re furani tipa irisombori. Sidu, ho basungu-rii-kiti agumba gupai ni fu aboro nga i ye ka susungo ri gayo aba tipa ka gia gu manzigo re, si naida ani mangihe amanga wo. Manga ani he wo nika undo rani ani mbakadi kpotorani tipa agu agumbapai nika manga.—Eza. 7:10.
8 Ani nika digiso gaani dunguratise areme na bia sa dagba vovo abia nga gu du riihe nga “I Ima Sigira ga Mbori Kingo—Si Ye.” Gi bia re nga gu i abihe ti regbo gu dunguratise i naamangaha na agarã dunduko re, i ambakadihe tipa ga Mbori Kindo wa si nada na agarã 100.
9 Gu vovo abia re nga “wene ahe” furani be Yekova. (Mt. 12:35) Ani diberã wa du ani dunduko ka wirika gu vovo abia re na ka bihe kina boro ngbadurani yo, tipa ka tambua Mbori na ki fu taarimo fuko!—Tam. 147:1.